Акафисты - 02 января 2025
Кондак 1
Избранный страстотерпче и избранниче Христов, святителю Игнатие, похвальная приносим ти пения. Ты же, предстояй со ангелы у Престола Всевышняго, не престай молитися о нас, усердно вопиюших ти: Радуйся, Богоносный Игнатие, великий и преславный страстотерпче.
Икос 1
Ангелом уподобился еси, егда Господь, прием тя на Свои пречистыя руце, постави тя посреде ученик Своих, и возложь руку Свою на твою главу, рече им: «Аще не обратитеся и будите яко дети, не внидите в Царствие Божие». Сего ради, преклоньше колена, вопием ти:
Радуйся, Богом носимый.
Радуйся, яко Бога выну в сердце своем имел еси.
Радуйся, рабе благий и верный.
Радуйся, мужу желаний.
Радуйся, яко от юности Христа всем сердцем возлюбил еси.
Радуйся, яко всецело Ему предался еси.
Радуйся, Богоносный Игнатие, великий и преславный страстотерпче.
Кондак 2
Видяще благочестное житие святаго Иоанна Богослова, учителя твоего, желанием возжелал еси вкупе с ним послужити Господу, проповедуя святое Евангелие людем, седящим во тьме и сени смертней, и научая их пети Единому истинному Богу: Аллилуиа.
Икос 2
Разумев духом, яко ангели на небеси славят Бога во Святей Троице, Творца неба и земли, друг ко другу взывающе: Свят, Свят, Свят Господь Саваоф, ты и в земной Церкви уставил еси такожде пети. Сего ради, со умилением взываем ти:
Радуйся, Церкви Божией столпе и утверждение.
Радуйся, светильниче православия.
Радуйся, яко был еси епископом Церкви, идеже первее имя христиан наречеся.
Радуйся, яко от апостолов первоверховных рукоположение прияти сподобился еси.
Радуйся, яко удостоился еси зрети святыя Ангелы, славящия Бога.
Радуйся, яко ныне и сам со Ангелы славиши Господа.
Радуйся, Богоносный Игнатие, великий и преславный страстотерпче.
Кондак 3
Сила Вышняго укрепи тя, святый Игнатие, егда представ Траяну, не убоялся еси прещения царева, но мужественно исповедал еси Христа Бога быти истинна, и нечестие языческое посрамил еси, верныя же научил еси Богу воспевати: Аллилуиа.
Икос 3
Имея благодать от Господа просвещати люди Божия, ты наставлял еси я к разуму Божественному словом, паче же житием, образ быв любовию, духом, верою, чистотою и смирением. Сего ради воспеваем ти:
Радуйся, яко имя Божие пронесл еси пред цари и языки.
Радуйся, яко добре упасл еси паству твою.
Радуйся, смирением стяжавый высокая.
Радуйся, нищетою приобретый богатая.
Радуйся, апостольских преданий хранителю.
Радуйся, Церкви Божией верный страже и мудрый строителю.
Радуйся, Богоносный Игнатие, великий и преславный страстотерпче.
Кондак 4
Бурю злобы имея в сердце своем Траян, призвав тя, с гневом вопроси: «Ты ли еси Богоносец? Почто люди моя развращаеши?» Ты же отвещал еси: «Аз есмь Богоносец, но люди твоя не развращаю, а спасаю». Кто не ублажит сие твое исповедание веры? Мы же, величающе тя, Богу воспеваем: Аллилуиа.
Икос 4
Слышавше людие вернии твое исповедание, славяху Бога, Траян же, скрежеща зубы своими, паки вопроси тя: «Почто зовешися Богоносец?» Ты же рекл еси: «Яко Бога моего в сердце своем ношу». Сего ради воспеваем тя сице:
Радуйся, верный воине Царя Небеснаго.
Радуйся, поборниче веры непобедимый.
Радуйся, пастырю добрый.
Радуйся, молитвенниче о душах наших.
Радуйся, яко Божественным Духом просвещен, свирепство мучителя пастырским дерзновением посрамил еси.
Радуйся, яко наставляя стадо Христово, многих светом Богоразумия просветил еси.
Радуйся, Богоносный Игнатие, великий и преславный страстотерпче.
Кондак 5
Вся красная мира в уметы вменяя, да Христа приобрящеши, «Кто ны разлучит от любве Божия», - вопиял еси, Игнатие, - «Сладка мне скорбь, любезны узы за Желаемаго, гонения ми сладша паче отечества, болезни - паче здравия телеснаго». Мы же, славную память твою чтуще, поем Богу: Аллилуиа.
Икос 5
Видя тя исповедника веры Христовы непобедима, осуди тя безбожный Траян на смерть: ты же, радуяся, возопил еси: «Сладка мне смерть, мне еже жити- - Христос, и еже умрети - приобретение есть: к Нему иду, Того люблю, Того получити надеюся». Сего ради ублажаем тя, святый Игнатие, сице:
Радуйся, желание имевый разрешитися и со Христом быти.
Радуйся, жертва Богу чиста.
Радуйся, подражателю Христовых страстей.
Радуйся, яко Христови сораспялся еси.
Радуйся, яко кровь за Христа излиял еси.
Радуйся, яко кровию своею святительскую одежду украсил еси.
Радуйся, Богоносный Игнатие, великий и преславный страстотерпче.
Кондак 6
Проповедник терпения, Богоносный Игнатие, явился еси, егда с радостию услышал еси осуждение свое на растерзание лютыми зверьми. Ублажая твое твердое и неустрашимое исповедание веры, и дивяшеся велией благодати, в тебе пребывающей, поем Богу ангельскую песнь: Аллилуиа.
Икос 6
Возсиял еси яко солнце, угодниче Божий, красотою души твоея, егда воины возлагаху на тя узы, ты же, яко ризу спасения и одежду веселия приял еси сие новое мучение, и на страдание в Рим, аки на брачный пир шествовал еси. Сего ради воспеваем ти:
Радуйся, Церкви Антиохийския славо.
Радуйся, Богомудрых отцев красото и удобрение.
Радуйся, цевнице Духа Святаго.
Радуйся, воине Христов непобедимый.
Радуйся, яко гордость Траянову низложил еси.
Радуйся, яко диавола посрамил еси.
Радуйся, Богоносный Игнатие, великий и преславный страстотерпче.
Кондак 7
Хотя, святителю Христов, изыти от Антиохи, прилежно молил еси Господа не оставити паствы твоея. Людие же плакаху и рыдаху, зряще тя на смерть ведома; ты же, благословляя их, воспевал еси Богу: Аллилуиа.
Икос 7
Дивный во святых Бог утеши тя, святый Игнатие, егда на пути в Рим, ведома тя десятию воинами, срете вы в Смирне святый Поликарп, муж праведный. Ты же, беседуя с ним, радовался еси о Бозе спасе твоем. Сего ради ублажаем тя:
Радуйся, яко веру во Христа сохранил еси.
Радуйся, яко надежду несумненну имел еси.
Радуйся, яко имя Христово во всей вселенней прославил еси.
Радуйся, яко уготовася тебе венец правды.
Радуйся, верный служителю Господень.
Радуйся, светильниче Божий, горяй и светяй.
Радуйся, Богоносный Игнатие, великий и преславный страстотерпче.
Кондак 8
Странно и чудно бе шествие твое в Рим на место мучения: воини яко преступника ведяху тя, людие же Божии со епископы и пресвитеры яко ангела Божия сретаху тя, и, сладостно послушая словес твоих, воспеваху Богу: Аллилуиа.
Икос 8
Желание имый разрешитися и со Христом быти, ты, шествуя в Рим на страдания, радостно воспевал еси: «Пшеница Божия есмь: да буду зубы зверей сотрен и чист хлеб Богу явлюся». Сего ради дивящеся терпению твоему и славяще Божие о тебе смотрение, воспеваем сице:
Радуйся, образе мужества и терпения.
Радуйся, непоколебимое правило веры и благочестия.
Радуйся, непобедимый исповедниче Христов.
Радуйся, яко не убоялся еси ни огня, ни меча, ниже зубов рыкающих львов.
Радуйся, яко терпением своим ангелов Божиих возвеселил еси.
Радуйся, яко мужеством своим имя христиан прославил еси.
Радуйся, Богоносный Игнатие, великий и преславный страстотерпче.
Кондак 9
Всего себя предав Богу, ты страшился еси, да не терпящии зрети твоих страданий воспретят тебе восприяти их. Сего ради писанием умолял еси: «О, возлюбленнии! Помозите ми сораспястися Христу, пострадати и умрети за него, да и царствую, и живу с Ним во веки, воспевая Богу: Аллилуиа.»
Икос 9
Вития многовещанныя не могут по достоянию воспети твоя страдания: сего ради и нам удобее любити молчание, но побеждаеми любовию твоею, от избытка сердца вопием ти:
Радуйся, яко многих ко Христу привел еси.
Радуйся, яко писаниями своими путь ко спасению уяснил еси.
Радуйся, яко жаждущия спасения напоил еси благочестия водами.
Радуйся, яко душевными очима ослепленных светом Богоразумия просветил еси.
Радуйся, яко грехом разслабленных воздвигл еси на путь спасения.
Радуйся, яко скорбящия и плачущия утешил еси.
Радуйся, Богоносный Игнатие, великий и преславный страстотерпче.
Кондак 10
Спасти хотя душу свою, ты, святый Игнатие, пламенел еси серафимскою любовию к Богу: «О, братия!», - молил еси христианы, - «желайте мне смерти: она приведет мя ко Христу: звери мне радостни, огнь - роса мне, тщуся умрети, да живу со Христом». Темже вселился еси в небесныя обители, идеже со Ангелы Богу воспеваеши: Аллилуиа.
Икос 10
Царь Небесный, Утешитель Благий, Дух истины постави тя пасти Церковь Христову, право правити слово истины, верныя люди поучати, противящияся обличати. Сего ради зовем ти:
Радуйся, учителю благочестия.
Радуйся, обличителю нечестия.
Радуйся, душу свою положивый за овцы своя.
Радуйся, стяжавый венец мученичества.
Радуйся, непрестанно в жизни моливыйся за христианы.
Радуйся, и по смерти за ны моляйся.
Радуйся, Богоносный Игнатие, великий и преславный страстотерпче.
Кондак 11
Воспевая Господа и непрестанно моляся Ему, ты, святый Игнатие, поучал еси и вверенныя тебе люди творити такожде: «Молитеся непрестанно, кротость ваша да будет известна всем. В братолюбии пребывайте, да не будут в вас распри. Подражайте за ны Распятому, веруйте в Него, Он есть живот вечный: веруяй в него, аще и умрет - оживет». Мы же, прославляя Бога, даровавшаго нам таковаго наставника, вопием Ему: Аллилуиа.
Икос 11
Яко солнце доблестно обтекл еси землю от восток до запад, и зашед незаходимо от земли ко Христу, просвещая мир своим учением. Сего ради взываем ти:
Радуйся, угодниче Христов.
Радуйся, мучениче и пастырю.
Радуйся, скорый в бедах помощниче.
Радуйся, гонимых за правду защитниче.
Радуйся, немощных врачу.
Радуйся, покров и заступление притекающих к тебе с верою.
Радуйся, Богоносный Игнатие, великий и преславный страстотерпче.
Кондак 12
Благодать велию и богатую милость приял еси от Христа Бога нашего молитися за всех, с верою призывающих тя. Темже молим тя: помози нам предстательством твоим у Господа сохранити в сердце своем веру несумненну, упование непреложно, любовь к Богу и ближнему нелицемерну, подвигом добрым подвизатися, воспевая Спасителю нашему: Аллилуиа.
Икос 12
Поюще подвиги твоя, почитаем страдания твоя, восхваляем мужество твое, ублажаем святую кончину твою, и прилежно молим тя: услыши ны, взывающия ти:
Радуйся, течение жизни славно скончавый.
Радуйся, кровию своею истину Христова учения запечатлевый.
Радуйся, получивый от Христа венец правды, уготованный всем возлюбившим явление Его.
Радуйся, во светлостех святых вселивыйся.
Радуйся, яко со Архангелы ликовствуеши.
Радуйся, яко лицезрением Божиим наслаждаешися.
Радуйся, Богоносный Игнатие, великий и преславный страстотерпче.
Кондак 13
О многострадальный и предивный мучениче, Богоносный Игнатие! Приими от нас недостойных сие малое хвалебное пение и умоли Бога, да сохранит ны и защищит Своею благодатию от всякаго зла в сей жизни, и во время кончины нашея не оставит нас, и по кончине сподобит Царствие Небесное наследовати и вечно воспевати Ему: Аллилуиа.
(Этот кондак читается трижды, затем икос 1 и кондак 1)
Молитва
О великий святителю, Богоносный Игнатие! К тебе припадаем и молим тя: призри на ны, грешныя, прибегающия к твоему заступлению, и умоли Господа, да простит нам вся согрешения наша. Ты мученически душу твою за веру положил еси, даруй и нам мужество во всем подражати тебе. Ничесо в жизни не возмогло отлучити тя от любви ко Господу: ни лестная обещания, ни прещения, ни угрозы, ниже самыя муки. Ты с радостию предстал еси пред зверьми на смерть лютую, и яко Ангел возлетел еси во оибтели Отца нашего Небеснаго. Сего ради и молитва твоя много может пред Господем. Буди же, святый угодниче, предстателем за ны пред Спасителем нашим. Помогай всем православным христианом святыми твоими молитвами ко всемогущему Богу, да избавит ны от глада, труса, града, бездождия и смертоносных болезней, и да дарует нам здравие и спасение. Буди же нам помощник скорый во всякой скорби, наипаче же в час кончины нашея явися нам светлым защитником и ходатаем, и умоли Господа сподобитися всем нам, тебе ныне тепле молящимся, получити по христианстей кончине Небесное Царствие, идеже вси святии вкупе с тобою славят Отца и Сына и Святаго Духа. Аминь.
Кондак 1
Избраннаго стада овец Христовых пастырю великославный, святителей Митрофана и Тихона сопрестольниче, пение похвальное в память твою святую днесь приносим; ты же, предстоя Престолу Божию, святителю отче Антоние, поминай нас, тебе почитающих и сице тебе вопиющих: Радуйся, святителю Антоние, благодатный помощниче и чудотворче.
Икос 1
Ангельскою чистотою души просиял еси в земнем житии твоем, отче Антоние, ничтоже бо на земли возлюбив, к горнему отечеству стопы твоя направил еси, путем узким и многоскорбным шествуя. Ныне же на Небесех достойно утешаешися, вечною славою облиставаемь; но и нас, земных, не оставляеши, скорую помощь являюще благодарне тебе вопиющим: Радуйся, великих святителей преемниче; Радуйся, добрых пастырей подражателю. Радуйся, града Воронежа светильниче преславный; Радуйся, Задонския обители теплое радование. Радуйся, Пастыреначальника Иисуса благоволение; Радуйся, благодати Духа Святаго сосуде драгий. Радуйся, сонма архиереев светлое украшение; Радуйся, монашествующих славо и похвало. Радуйся, кротостию и смирением украсивыйся; Радуйся, молитвою и постом аки двема крилома возлетевый. Радуйся, житнице щедродательная, гладныя и нищия питающая; Радуйся, свитче богописанный, глаголами живота вечнаго испещренный. Радуйся, святителю Антоние, благодатный помощниче и чудотворче.
Кондак 2
Видяще благочестивое житие родителю твоею, отче Антоние, со усердием поревнова подражати има в любви ко храму Божию, идеже купно со отцем твоим от чистаго детскаго сердца возношаше хвалу Творцу всех, поя Ему: Аллилуиа.
Икос 2
Разум имуще свыше просвещен, святитель киевский Самуил не благослови брак тебе, иной путь жития указуя. Зрящи же себе от уз брачных свобождаема, возрадовался еси, блаженне отче. И мы вси, ревнителя чистоты тя похваляя, вопием ти: Радуйся, целомудрие возлюбивый; Радуйся, чистоте себе обручивый. Радуйся, яко не восхоте двема господинома работати; Радуйся, яко Единому Господу возжела послужити. Радуйся, книжным учением, яко пищею напитанный; Радуйся, смиренномудрием, яко питием напоенный. Радуйся, юношам добрый наставниче; Радуйся, старцу страннику попечение. Радуйся, видением Антония Печерскаго обрадованный; Радуйся, в нем сподобивыйся от преподобнаго причаститися. Радуйся, иноческаго жития возжелавый; Радуйся, умныя молитвы делателю изряднейший. Радуйся, святителю Антоние, благодатный помощниче и чудотворче.
Кондак 3
Сила велия любве ко иноческому житию явися в тебе, отче, яко некий огнь божественный в душе твоей распаляемь. Сего ради, оставив мир и вся яже в нем, притече в Лавру Киево-Печерскую, благодарне поя на всякое время Иисусу Сладчайшему: Аллилуиа.
Икос 3
Имуще велию ревность о благоустроении Печерския обители, тебе вверенныя, труды неустанныя подъял еси, отче святый Антоние. Царица же Небесе и земли, зряще твое многое попечение о третием Ея уделе, восхоте тя на высоту архиерейского сана поставити и тебе о сем в чудном видении возвестила есть. Мы же вси приносим ти сицевыя похвалы: Радуйся, добронравный подвижниче Христов; Радуйся, плоть распявый со страстьми и похотьми. Радуйся, во граде Киеве благоухавый своею святостию; Радуйся, просиявый своею праведностию. Радуйся, Небесныя Царицы возлюбленное чадо; Радуйся, Ея обители служителю неустанный. Радуйся, величия Пречистыя воспевателю изрядный; Радуйся, архиерейскаго сана достойный. Радуйся, видения чуднаго созерцателю; Радуйся, предречение дивное прияти удостоивыйся. Радуйся, яко паства воронежская тебе Богородицею вручена бысть; Радуйся, яко Мати Божия заповеда ти обветшавшее исправити. Радуйся, святителю Антоние, благодатный помощниче и чудотворче.
Кондак 4
Буря гордости и самомнения никогдаже поколеба храмину души твоея, основана бо бе на камени смирения, на немже всегда предстоя, искусно избегал еси многообразных козней лукаваго, поюще Спасителю своему: Аллилуиа.
Икос 4
Слышаще о поставлении твоем во епископы града Воронежа, умом не вознеслся еси, угодниче Христов, но и по посвящении образ смиренномудрия, воздержания и иных добродетелей всем являл еси. Сего ради ублажаем тя, зовуще: Радуйся, нищетою духовною обогативыйся; Радуйся, крилами смирения на высоту возлетевый. Радуйся, в богатых домех не вознесшийся; Радуйся, хижин убогих не возгнушавыйся. Радуйся, кротостию душу одеявый; Радуйся, в преподобие и правду оболкийся. Радуйся, безстрастия тихое сияние; Радуйся, венче воздержания. Радуйся, ум в горняя вперивый; Радуйся, душу в молитве утвердивый. Радуйся, кандило многосветлое, пред Господем горящее; Радуйся, звездо, воронежскую землю осветившая. Радуйся, святителю Антоние, благодатный помощниче и чудотворче.
Кондак 5
Боготечныя звезды течению подобно бысть шествие твое к воронежстей пастве твоей, святителю Христов Антоние. Людие бо зряще сияние добрых дел твоих и познавше в тебе истиннаго пастыря овец Христовых, милостива и кротка, воспеша благодарне Богу: Аллилуиа.
Икос 5
Видеша духовная чада твоя, множество добрых дел тя творяща, ревностию о спасении ближних тя исполнена, таже и велиею святостию и праведностию сияюща, воспеша ти похвалы таковыя: Радуйся, отче благосерде, милость всем безмездно творящий; Радуйся, отче чадолюбивый, от зол нас ограждающий. Радуйся, трапезо, нищия питающая; Радуйся, деснице, щедро благодеющая. Радуйся, в бедствиих скорый помощниче; Радуйся, в недоумениих добрый наставниче. Радуйся, странноприимству праотца Авраама подражаяй; Радуйся, утешение в скорбех, унывающия ободряяй. Радуйся, в богоугодном житии наставляяй; Радуйся, своею отеческою любовию вся объемляй. Радуйся, медоточная уста, горесть скорбей услаждающая; Радуйся, живительная росо, в сердцах веру оживляющая. Радуйся, святителю Антоние, благодатный помощниче и чудотворче.
Кондак 6
Проповедником святости Митрофана Воронежскаго явился еси, преблаженне отче. Любовь бо велию к сему угоднику Христову имея, потщался еси прославлению его на земли потрудитися, да узрев на всероссийстем свещнице сей велий светильник поставлен, к нему вернии притекали быша, благодаряще о нем Бога песнию: Аллилуиа.
Икос 6
Возсия велия благодать во граде Воронеже от мощей святителя Митрофана источаема, егоже прославлению много потрудился еси, Антоние боголюбиве, в житии своем всегда подражая тому и именуя ся служкою его. Темже достоин еси похвал сих: Радуйся, святителю, святаго архиерея прославивый; Радуйся, народу русскому великую радость явивый. Радуйся, святителя Митрофана почитателю усердный; Радуйся, прилежныя молитвы всегда ему возносивый. Радуйся, обители Митрофаниевой устроителю; Радуйся, иноческаго жития в ней насадителю. Радуйся, купно со святым Митрофаном нам скоро помогающий; Радуйся, в горних селениих с ним ликовствующий. Радуйся, прозорливче предивный; Радуйся, неустанный молитвенниче. Радуйся, молитву Иисусову дыханием имевый; Радуйся, имя Иисусово на сердце начертавый. Радуйся, святителю Антоние, благодатный помощниче и чудотворче.
Кондак 7
Хотяще оставити епархию свою и удалитися в Лавру Печерскую, святителем Митрофаном от сего удержан чудесне был еси, святителю Антоние. Вразумление же его в сердце своем сложивше, воспе благодарне песнь: Аллилуиа.
Икос 7
Новый источник великия благодати открыл еси в Задонстей обители, отче Антоние. Мощи бо нетленныя святителя Тихона обретше, возрадовался еси зело, к ним припадающе и лобызающе их. Братия же обители сея, тя благодаряще, воспеша ти таковая: Радуйся, задонскаго чудотворца Тихона почитателю; Радуйся, душеспасительных его писаний последователю. Радуйся, яко молитвами сего святаго укрепляем был еси; Радуйся, яко и в житии ему потщался подражати еси. Радуйся, главо богомудрая и богопросвещенная; Радуйся, сладкогласная уста, воронежских чудотворцев прославляющая. Радуйся, наставниче, колеблющихся в вере укрепивый; Радуйся, согрешающих кроткий вразумителю. Радуйся, заповедей Господних хранителю верный; Радуйся, ревностный защитниче благочестия. Радуйся, Церкви непоколебимый столпе; Радуйся, крепкое ограждение винограда Христова. Радуйся, святителю Антоние, благодатный помощниче и чудотворче.
Кондак 8
Странен быв на земли, к горнему отечеству добре шествовал, еси, Христов угодниче Антоние, Господа бо всем сердцем и всею душею измлада возлюбив, овцы Его словеснаго стада ревностно пасл еси, вопия Царю Славы песнь: Аллилуиа.
Икос 8
Весь исполнь любви и сострадания к ближним, всякому притекавшему к тебе помогал еси, страждущия и скорбящия утешая, бедныя и странныя упокоевая, в бедах и скорбех помогая, таже и многая добрая дела творя втайне, ихже Сам Господь весть. Ныне же за сие на Небесех достойно увенчанный, приими и наша тебе возносимыя похвалы: Радуйся, плате, слезы отирающий; Радуйся, чаше, отрадою напояющая. Радуйся, болящих и страждущих скорое посещение; Радуйся, сирым и убогим присное вспоможение. Радуйся, яко огня, осуждения избегаяй; Радуйся, распри скоро искореняяй. Радуйся, в вере, надежде, любви укрепляющий; Радуйся, скорби и болезни безропотно нести научающий. Радуйся, в бедах сущим утешение; Радуйся, узников отрадное посещение. Радуйся, немощи немощных носяй; Радуйся, помощь безпомощным подаваяй. Радуйся, святителю Антоние, благодатный помощниче и чудотворче.
Кондак 9
Всяк человек, достойно приемляй Святыя Христовы Тайны, просвещася; аще ли же недостойне, помрачася. Сицевому зрению о тебе бываему, сотаинник твой ужасеся, со страхом и радостию вопия Богу: Аллилуиа.
Икос 9
Ветии многовещанниии не возмогут по достоянию восхвалити твои, отче Антоние, труды неустаннии, на благо воронежския епархии тобою понесеннии, имиже соплел еси себе неувядаемии венцы на небесех. Темже и мы, на земли сущии, воспеваем ти таковыя похвалы: Радуйся, дому Божия страже неусыпный; Радуйся, благолепия церковнаго рачителю. Радуйся, олтаря служителю благочестный; Радуйся, Таин Божиих верный строителю. Радуйся, покаяния и исправления жития проповедниче; Радуйся, злых искоренителю, насадителю благих. Радуйся, добрый пастырю овец словесных; Радуйся, заблуждших в стадо Христово приведый. Радуйся, ко спасению всех призываяй; Радуйся, дерзость противу святыни наказуяй. Радуйся, яко тобою духовная жизнь епархии возродися; Радуйся, яко повеление Богоматери достойно исполнил еси. Радуйся, святителю Антоние, благодатный помощниче и чудотворче.
Кондак 10
Спасения вечнаго ходатай нам являешися, отче Антоние, погружаемых бо нас в житейстем море, от потопления конечнаго спасаеши, палимых страстьми прохлаждаеши, заблуждшия на истинный путь наставляеши и воздвизаеши за все благодарити Господа, поя Ему: Аллилуиа.
Икос 10
Стене подобно стояше народ мног окрест гроба твоего, о твоей кончине услышавый и поклонитися к тебе пришедый, мнози же слезы духовенство, монаси и мирстии проливающе, вопиша ти: Радуйся, в добрых подвизех подвизавыйся; Радуйся, течение неукорно скончавый. Радуйся, ясное зерцало Христовы веры; Радуйся, светильниче Божественного света. Радуйся, память смертную всегда пред очима имевый; Радуйся, разрешитися и со Христом быти возжелавый. Радуйся, лозо многоплодная винограда Христова; Радуйся, земли воронежския шипок благовонный. Радуйся, ангелов достойный сожителю; Радуйся, стрело, разящая невидимыя враги. Радуйся, со святыми Пресвятую Троицу прославляющий; Радуйся, и нам, недостойным, милости у Господа просящий. Радуйся, святителю Антоние, благодатный помощниче и чудотворче.
Кондак 11
Пение похвальное от чтущих тя тебе возносимое, приими, святителю отче Антоние, мы бо многая чудеса тобою совершаемая зряще, умиления исполняемся и благодарим о тебе Господа, поя Ему: Аллилуиа.
Икос 11
Светильник еси пресветел, на церковней тверди блистающ, отче Антоние; мы же, во мраце скорбей и напастей погружаеми, лучами помощи твоея облиставаеми есмы. Скорую бо помощь и утешение от тебе обретающе, вопием ти: Радуйся, светильниче, правы стези ко спасению освещаяй; Радуйся, свеще, любовию к Руси присногорящая. Радуйся, яко и по отшествии с нами пребываеши; Радуйся, яко скоро и пречудно помогаеши. Радуйся, щите от бед сохраняющий; Радуйся, враг видимых и невидимых от нас отгоняющий. Радуйся, гонимой девице помощь скорую явивый; Радуйся, старца обидимаго не оставивый. Радуйся, от внезапныя смерти избавляющий; Радуйся, в скорбех сущим радость подающий. Радуйся, Горняго Иерусалима обитателю блаженный; Радуйся, чтущим тя крепкий покрове. Радуйся, святителю Антоние, благодатный помощниче и чудотворче.
Кондак 12
Благодать источаеши чтущим тя, отче Антоние, и просящим у тебе помощи и заступления. Якоже в житии всем помогал еси, тако и ныне сие твориши, воздвизая нас славити Подателя всяческих благ пение хвалебным: Аллилуиа.
Икос 12
Поюще на земли твое прославление, радуемся, яко земля Российская в тебе новаго заступника и молитвенника обрела есть, Отечество бо наше твоею молитвою от враг и напастей ограждаеши. Почитающии же тя вернии прославляют тебе сицевыми благохваленьми: Радуйся, веселия вечнаго причастниче; Радуйся, славою небесною сияющий. Радуйся, ко Господу наш неустанный ходатаю; Радуйся, к Богородице наш теплый молитвенниче. Радуйся, сердца наша от скверн греховных очищающий; Радуйся, суетою помраченный наш ум просвещающий. Радуйся, телесных недугов свободителю; Радуйся, душевных болезней исцелителю. Радуйся, святителема Митрофану и Тихону равностоятелю; Радуйся, с ними о спасении нашем молящийся. Радуйся, яко с Царем Христом во веки пребываеши; Радуйся, яко еси причастник неизреченныя Его славы. Радуйся, святителю Антоние, благодатный помощниче и чудотворче.
Кондак 13
О, преславный святителю Антоние, утешителю наш и крепкий покровителю, от бед и скорбей избавителю! Приими нынешнее наше молитвенное приношение и ходатайством твоим сподоби нас стати одесную Престола Божия, идеже предстоят праведных лики и славословят Творца всех песнию: Аллилуиа, Аллилуиа, Аллилуиа.
(Этот кондак читается трижды, затем икос 1 и кондак 1)
Молитва святителю Антонию (Смирницкому)
О, святителю Христов, отче Антоние, светило преславное земли Воронежския! Скорый помошниче всем с верою к тебе притекающим, услыши ныне наш вопль сердечный, к тебе возносимый. Исходатайствуй нам вечное спасение и прощение множества грехов наших. Молися прилежно, да помиловани будем, и Царствия Небеснаго наследницы явимся. Таже и в многоразличных скорбех и нуждах наших помози нам: болящия исцели, обидимыя защити, печальныя возвесели, о Державе Российстей и людех ея молитву теплую сотвори. Егда же приблизится время скончания земнаго жития нашего, моли, да не без покаяния и причащения Святых Христовых Таин отыдем, да неосужденно предстанем Царю Славы, грозному Судии всех и да сподобимся со всеми святыми славити Единаго Истиннаго Бога, Отца и Сына и Святаго Духа, во веки веков. Аминь.
Текст утвержден Священным Синодом
Русской Православной Церкви
24 декабря 2008 года
(журнал № 108)
Конда́к 1
Подо́бен: Взбра́нной Воево́де:
Избра́нный уго́дниче и пресла́вный чудотво́рче,
о́тче пра́ведный Иоа́нне, гра́да Кроншта́дта пресла́вное украше́ние!
Ты, от младе́нства Христу́ после́дуя, сораспя́тися Ему́ возжеле́л еси́
и, жизнь твою́ в Нем утверди́в, дар чуде́с от Бо́га прия́л еси́
и сло́вом живоно́сным всех напита́л еси́.
Мы же, недосто́йнии, благода́рне вопие́м ти:
Ра́дуйся, Иоа́нне, земли́ Росси́йския моли́твенниче преди́вный.
И́кос 1
А́нгела све́тла, еще́ о́трок сый, я́ве узре́л еси́, о́тче Иоа́нне, и́же и рече́ ти, я́ко повеле́нием Госпо́дним приста́влен храни́ти тя во всех путе́х твои́х. Те́мже я́ко избра́нника Бо́жия ве́дуще тя, взыва́ем си́це:
Ра́дуйся, благода́ти Бо́жия сосу́де избра́нный;
ра́дуйся, сло́вом Бо́жиим измла́да наста́вленный.
Ра́дуйся, во о́трочестве явле́ния А́нгела Храни́теля сподо́бивыйся;
ра́дуйся, от ю́ности води́тельству Ду́ха Свята́го преда́выйся.
Ра́дуйся, роди́телей боголюби́вых благоче́стие восприе́мый;
ра́дуйся, целому́дрием и чистото́ю себе́ огради́вый.
Ра́дуйся, духо́вным наста́вником твои́м всем се́рдцем внима́вый;
ра́дуйся, почита́нием роди́телей благоволе́ние Бо́жие стяжа́вый.
Ра́дуйся, Иоа́нне, земли́ Росси́йския моли́твенниче преди́вный.
Конда́к 2
Прови́дя, богоно́сне о́тче Иоа́нне, я́ко мно́гия беды́ и собла́зны гряду́т на Це́рковь Ру́сскую и ча́да Бо́жия гони́ма бу́дут, увеща́л еси́ лю́ди, глаго́ля: пока́йтеся, сто́йте в ве́ре Правосла́вней, крепи́теся и сла́вите Го́спода, взыва́юще Ему́: Аллилу́ия.
И́кос 2
Ра́зумом Боже́ственным наставля́емь, всеблаже́нне о́тче Иоа́нне, све́том и́стиннаго Богопозна́ния всех, приходя́щих к тебе́, просвеща́л еси́. Мы же, писа́ньми твои́ми науча́еми, вопие́м ти такова́я:
Ра́дуйся, ева́нгельския И́стины пла́менный служи́телю;
ра́дуйся, глаго́лов жи́зни ве́чныя немо́лчный возвести́телю.
Ра́дуйся, пра́ведным житие́м твои́м Бо́гу угоди́вый;
ра́дуйся, Це́рковь Бо́жию писа́нии твои́ми просла́вивый.
Ра́дуйся, Крест Христо́в пред очи́ма твои́ма вы́ну созерца́вый;
ра́дуйся, сораспя́тися Христу́ вседу́шне возжела́вый.
Ра́дуйся, Бо́га и бли́жних всем се́рдцем возлюби́вый;
ра́дуйся, лю́дем, в ско́рбех и печа́лех су́щим, утеше́ние подава́вый.
Ра́дуйся, Иоа́нне, земли́ Росси́йския моли́твенниче преди́вный.
Конда́к 3
Си́лою Боже́ственныя благода́ти, я́ко свети́льник многосве́тлый Правосла́вныя Це́ркве, во гра́де Кроншта́дте просия́л еси́, пра́ведне Иоа́нне, и лю́ди, во тьме грехо́вней седя́щия и собла́зном богобо́рчества смуща́емыя, просвети́в, наставля́л еси́ пе́ти Бо́гу: Аллилу́ия.
И́кос 3
Име́я любо́вь па́стырскую, пра́ведне о́тче Иоа́нне, поте́кл еси́ к лю́дем, не иму́щим кро́ва и хле́ба насу́щнаго и во отча́янии погиба́ющим, и сих любо́вию и милосе́рдием Христу́ приобре́л еси́. Мы же благода́рне взыва́ем ти си́це:
Ра́дуйся, в хра́ме Бо́жии дерзнове́нный о лю́дех моли́твенниче;
ра́дуйся, си́рым и вдови́цам ми́лостивый помо́щниче.
Ра́дуйся, окамене́нныя се́рдцем к покая́нию побужда́яй;
ра́дуйся, неве́дущия Бо́га Боже́ственною прему́дростию просвеща́яй.
Ра́дуйся, стропо́тных и злонра́вных ти́хое исправле́ние;
ра́дуйся, лени́вых и малове́рных ре́вностное обличе́ние.
Ра́дуйся, Ца́рствия Бо́жия и пра́вды его́ пропове́дниче неустраши́мый;
ра́дуйся, проти́ву ко́зней духо́в зло́бы поднебе́сных вои́телю неуста́нный.
Ра́дуйся, Иоа́нне, земли́ Росси́йския моли́твенниче преди́вный.
Конда́к 4
Бу́рю злоче́стия, воздвиза́ему на Це́рковь на́шу святу́ю, прови́дя, о́тче Иоа́нне, я́ко ве́рный страж до́му Госпо́дня, поуча́л еси́ ча́да Бо́жия бде́ти, во и́стинней ве́ре пра́во ходи́ти и в за́поведех Госпо́дних непоро́чно пребыва́ти, да спасе́т Госпо́дь лю́ди Своя́, в покая́нии Ему́ зову́щия: Аллилу́ия.
И́кос 4
Слы́шаще лю́дие Бо́жии, я́ко ты еси́, о́тче Иоа́нне, сосу́д избра́нный и благода́тных даро́в преиспо́лненный, не то́кмо от Кроншта́дта, но и от всех конце́в земли́ к тебе́ притека́ху, я́ко да исцеле́ния и по́мощь улуча́т. С ни́ми же и мы, я́ко хода́таю пред Бо́гом те́плу, уми́льно зове́м ти:
Ра́дуйся, се́ятелю пра́вды, а́лчущия жи́зни ве́чныя напита́вый;
ра́дуйся, обличи́телю непра́вды, ве́рныя от пре́лести грехо́вныя огражда́вый.
Ра́дуйся, заблу́ждшим и неразу́мным путь к Бо́гу указу́яй;
ра́дуйся, писа́ньми твои́ми ча́да Бо́жия наставля́яй.
Ра́дуйся, скорбя́щих и обремене́нных при́сное упова́ние;
ра́дуйся, боля́щих и стра́ждущих благода́тное врачева́ние.
Ра́дуйся, сосу́де избра́нный, да́ры Ду́ха Свята́го ди́вно укра́шенный;
ра́дуйся, свети́льниче всесве́тлый, на све́щнице церко́внем Бо́гом поста́вленный.
Ра́дуйся, Иоа́нне, земли́ Росси́йския моли́твенниче преди́вный.
Конда́к 5
Я́ко звезда́ многосве́тлая, священноле́пным житие́м твои́м просия́л еси́, па́стырю Христо́в Иоа́нне! Ты бо ста́до, Бо́гом вруче́нное тебе́, от волко́в, губя́щих е́, огражда́л еси́, взыва́я: пока́йтеся и жи́ви бу́дете, отыми́те лука́вство от душ ва́ших, да чи́стым се́рдцем Бо́га у́зрите и воспое́те Ему́: Аллилу́ия.
И́кос 5
Ве́дая мно́жество люде́й, утеше́ния ча́ющих, я́ко апо́стол Христо́в, обходи́л еси́ гра́ды и ве́си Росси́йския, чудотво́рче изя́щне, се́я сло́во Бо́жие, исцеля́я неду́жныя и малове́рныя исправля́я, быв всем вся, да вся́ко не́кия спасе́ши. Мы же боле́зни и труды́ твоя́ почита́юще, вопие́м ти си́це:
Ра́дуйся, я́ко си́лою благода́ти немощны́я укрепля́л еси́;
ра́дуйся, я́ко моли́твами твои́ми гре́шныя к покая́нию приводи́л еси́.
Ра́дуйся, а́лчущия и жа́ждущия по за́поведи Госпо́дни насыща́вый;
ра́дуйся, благове́стием Христо́вым лю́ди к пра́вде Бо́жией приводи́вый.
Ра́дуйся, моли́твами твои́ми малове́рныя в ве́ре укрепля́вый;
ра́дуйся, си́лою Бо́жиею немощны́м здра́вие подава́вый.
Ра́дуйся, зе́млю на́шу благогове́йно с про́поведию обходи́вый;
ра́дуйся, мир сей, я́ко прему́дрое творе́ние Бо́жие, воспева́вый.
Ра́дуйся, Иоа́нне, земли́ Росси́йския моли́твенниче преди́вный.
Конда́к 6
Пропове́дницы чу́дных дея́ний твои́х, блаже́нне Иоа́нне, яви́шася мно́зи: бога́тии и ни́щии, ста́рцы и ю́ноши, ты бо всем любо́вь твою́ излива́л еси́ бога́тно. Те́мже не то́кмо правосла́внии, но и инове́рнии си́лою моли́тв твои́х ми́лость Бо́жию обрета́ху, пою́ще Бо́гу: Аллилу́ия.
И́кос 6
Возсия́л еси́ житие́м твои́м в Це́ркви Правосла́вней па́че сия́ния се́вернаго, блаже́нне Иоа́нне, путь пра́вый лю́дем указу́я. Те́мже моли́ Го́спода Сил, да любо́вь свята́я утверди́тся в сердца́х на́ших, да ни скорбь, ни теснота́, ни смерть, ни бла́га ми́ра сего́ возмо́гут разлучи́ти нас от любве́ Бо́жия, благода́рне тебе́ вопию́щих:
Ра́дуйся, ве́ру Правосла́вную в чистоте́ храни́ти завеща́вый;
ра́дуйся, те́сным путе́м за́поведей Христо́вых ходи́ти поуча́вый.
Ра́дуйся, в ско́рбех и печа́лех су́щим ра́дость подава́вый;
ра́дуйся, к и́стинному покая́нию гре́шники призыва́вый.
Ра́дуйся, Бо́жиим смотре́нием гряду́щая нам возвеща́вый;
ра́дуйся, от сете́й вра́жиих оте́чество на́ше огражда́вый.
Ра́дуйся, мир с Бо́гом свя́то храни́ти запове́давый;
ра́дуйся, сло́вом и́стины и любо́вию ве́рным лю́дем послужи́вый.
Ра́дуйся, Иоа́нне, земли́ Росси́йския моли́твенниче преди́вный.
Конда́к 7
Хотя́ Всеблаги́й Госпо́дь спасти́ лю́ди земли́ на́шея и угото́вати я́ к же́ртвенному служе́нию, испо́лни тя, всеблаже́нне Иоа́нне, ду́ха проро́чества, прему́дрости и ра́зума, я́ко да, сло́вом твои́м наста́влени, во дни гряду́щих испыта́ний непоколеби́мо вопию́т Бо́гу: Аллилу́ия.
И́кос 7
Но́ваго избра́нника Бо́жия, всеблаже́нне Иоа́нне, ве́дуще тя боголюби́вии лю́дие, на всяк день Же́ртву безкро́вную принося́ща и со дерзнове́нием за всех Христу́ моля́щася, с ве́рою к тебе́ притека́ху и исцеля́хуся. Те́мже и мы, испо́лненнии твои́х благодея́ний, с любо́вию воспева́ем ти сицева́я:
Ра́дуйся, у Престо́ла Бо́жия приле́жный о нас моли́твенниче;
ра́дуйся, и́стиннаго покая́ния усе́рдный пропове́дниче.
Ра́дуйся, я́ко неле́ностно рабо́тати Христу́ Бо́гу нас наставля́еши;
ра́дуйся, я́ко стоя́ти на боже́ственней стра́жи нас призыва́еши.
Ра́дуйся, о́браз воздержа́ния и целому́дрия ве́рным яви́вый;
ра́дуйся, па́ству твою́ от ересе́й и раско́ла му́дре защити́вый.
Ра́дуйся, су́щих во тьме неве́дения ре́вностный просвети́телю;
ра́дуйся, душ челове́ческих от суеты́ жите́йския ди́вный огради́телю.
Ра́дуйся, Иоа́нне, земли́ Росси́йския моли́твенниче преди́вный.
Конда́к 8
Стра́нное чу́до ви́дим, явле́нное тебе́, преди́вный па́стырю Христо́в Иоа́нне! Тя бо и лю́ди ве́рныя Сама́ Пречи́стая Ма́ти Бо́жия я́ко миле́йшая ча́да Отца́ Небе́снаго нарече́. Сего́ ра́ди мы, си́ми словесы́ утеша́еми, вопие́м Царю́ веко́в: Аллилу́ия.
И́кос 8
Весь жела́нием Боже́ственным распаля́емь, любве́ Христо́вы преиспо́лнился еси́, па́стырю до́брый! Мы же, неради́вии, сокро́вищ ея́ не стяжа́вше, мно́гих скорбе́й и печа́лей досто́йни яви́хомся. Оба́че, ве́дуще тя помо́щника неусы́пна, со упова́нием взыва́ем ти си́це:
Ра́дуйся, любве́ Христо́вы сосу́де избра́нный;
ра́дуйся, явле́ния Бо́жия Ма́тере удосто́енный.
Ра́дуйся, Це́ркве Христо́вы неугаса́ющий свети́льниче;
ра́дуйся, о всем ми́ре хода́таю и печа́льниче.
Ра́дуйся, ми́ра и пра́вды Бо́жия ревни́телю;
ра́дуйся, благоче́стия и добронра́вия насади́телю.
Ра́дуйся, Росси́йския Це́ркве похвало́ и украше́ние;
ра́дуйся, земли́ на́шея благода́тное утвержде́ние.
Ра́дуйся, Иоа́нне, земли́ Росси́йския моли́твенниче преди́вный.
Конда́к 9
Всем лю́дем, в неве́дении, ско́рбех и печа́лех су́щим, воздви́же тя Госпо́дь па́стыря и чудотво́рца преди́вна, о́тче Иоа́нне, е́же гре́шныя на путь пра́вый наста́вити, неве́рныя к Бо́гу обрати́ти и боля́щия исцели́ти, да согла́сно воспою́т вси спаси́тельную песнь: Аллилу́ия.
И́кос 9
Вети́и многовеща́нии безгла́сни бы́ша о благода́ти, да́нней тебе́, Иоа́нне преди́вне, егда́ сло́вом еди́нем лю́ди от греха́ к покая́нию приводи́л еси́, неду́жныя от одра́ боле́зни воздвиза́л еси́, бе́сы изгоня́л еси́. Мы же я́ко чудотво́рца и уго́дника Бо́жия прославля́ем тя си́це:
Ра́дуйся, страстьми́ одержи́мых ди́вный врачева́телю;
ра́дуйся, в долгонеду́жии су́щих безме́здный цели́телю.
Ра́дуйся, отпа́дшия к Бо́гу приводи́вый;
ра́дуйся, безбо́жныя гро́зно облича́вый.
Ра́дуйся, ка́ющихся кро́ткий наказа́телю;
ра́дуйся, ми́лостыни ще́дрый пода́телю.
Ра́дуйся, христиа́нскаго просвеще́ния и благоче́стия ре́вностный насади́телю;
ра́дуйся, ю́ных по стезя́м пра́вды му́дрый путеводи́телю.
Ра́дуйся, Иоа́нне, земли́ Росси́йския моли́твенниче преди́вный.
Конда́к 10
Спасти́ хотя́ лю́ди Росси́йския, ересьми́ и неве́рием соблазня́емыя, о́тче Иоа́нне, ко́зни бесо́вския обличи́л еси́ и правосла́вное испове́дание ве́ры тве́рдо яви́л еси́. Сего́ ра́ди Ца́рствия Небе́снаго дости́гл еси́, иде́же со А́нгелы и ли́ки святы́х непреста́нно о нас мо́лиши Бо́га и пое́ши Ему́: Аллилу́ия.
И́кос 10
Стена́ тве́рда яви́лся еси́ лю́дем стра́ждущим, от всех конце́в земли́ Росси́йския к тебе́ приходя́щим, богоно́сне о́тче Иоа́нне. Те́мже и нас, бе́дствующих и немощству́ющих душе́ю и те́лом, укрепи́ моли́твами твои́ми, и́миже огражда́еми, прино́сим ти похвалы́ сия́:
Ра́дуйся, свети́льниче неугаси́мый, огне́м Ду́ха Свята́го возжже́нный;
ра́дуйся, кри́не благоуха́яй, росо́ю благода́ти Бо́жия напое́нный.
Ра́дуйся, лозо́ многопло́дная, благода́тными да́ры ве́рных пита́ющая;
ра́дуйся со́ле земли́, от грехо́внаго тле́ния нас сохраня́ющая.
Ра́дуйся, в мо́ри жите́йстем обурева́емым ти́хое приста́нище;
ра́дуйся, душе́вне и теле́сне изнемога́ющим благо́е вспоможе́ние.
Ра́дуйся, сердцеве́дче прему́дрый, ве́рныя лю́ди от мудрова́ния ми́ра сего́ огражда́яй;
ра́дуйся, се́ятелю Христо́в, се́янием ева́нгельским сердца́ мно́гих увеселя́яй.
Ра́дуйся, Иоа́нне, земли́ Росси́йския моли́твенниче преди́вный.
Конда́к 11
Песнь достохва́льную прино́сим ти, о́тче Иоа́нне, всем житие́м твои́м Бо́га просла́вльшему. И я́коже на земли́ за всех и за вся Влады́ку ми́ра умоля́л еси́, си́це и ны́не на Небеси́ вознеси́ моли́твы твоя́, да во оте́чествии на́шем при́сно воспева́ется Бо́гу побе́дная песнь: Аллилу́ия.
И́кос 11
Светоза́рную свещу́ ве́мы тя, Бо́гом избра́нне о́тче Иоа́нне, ты бо и по отше́ствии от земны́х к Небе́сным у Престо́ла Бо́жия в со́нме святы́х и Сил а́нгельских о нас при́сно хода́тайствуеши. Сего́ ра́ди благода́рственно взыва́ем ти си́це:
Ра́дуйся, я́ко в по́двизе твое́м И́мя Пресвяты́я Тро́ицы ди́вно просла́вися;
ра́дуйся, я́ко благоче́стием и ве́рою твое́ю Це́рковь Христо́ва украси́ся.
Ра́дуйся, па́стырей богому́дрый наста́вниче;
ра́дуйся, и́нокинь до́брый учи́телю.
Ра́дуйся, супру́ги соу́з бра́чный свя́то храни́ти поуча́вый;
ра́дуйся, ча́да почита́ти роди́тели своя́ увещава́вый.
Ра́дуйся, я́ко сострада́нием твои́м к бли́жним ско́рби и печа́ли утоля́ются;
ра́дуйся, я́ко моли́твами твои́ми гре́шницы на путь спасе́ния обраща́ются.
Ра́дуйся, Иоа́нне, земли́ Росси́йския моли́твенниче преди́вный.
Конда́к 12
Благода́тных даро́в Ду́ха Свята́го испо́лни тя Госпо́дь, о́тче наш Иоа́нне, и́миже ре́вностно послужи́л еси́ наро́ду Бо́жию. Вознеси́ моли́тву к Бо́гу и о нас, да ве́ры, наде́жды и любве́ дости́гше, прича́стницы жи́зни во Христе́ бу́дем и сподо́бимся воспева́ти благода́рственную песнь: Аллилу́ия.
И́кос 12
Пою́ще твое́ достохва́льное житие́ на земли́ и сла́ву, ю́же стяжа́л еси́ на Небеси́, о́тче Иоа́нне, притека́ем во оби́тель тобо́ю созда́нную и припа́даем к гробни́це твое́й, от нея́же исцеле́ния и по́мощь улуча́юще, возглаша́ем ти сицева́я:
Ра́дуйся, пропове́дниче изря́дный, проро́ком и апо́столом до́бре поревнова́вый;
ра́дуйся, па́стырю земли́ Росси́йския, Бо́гом избра́нный и просла́вленный.
Ра́дуйся, оби́тель преподо́бнаго покрови́теля твоего́ Иоа́нна Ры́льскаго ди́вно устро́ивый;
ра́дуйся, оби́телию се́ю град свята́го Петра́ сла́вно украси́вый.
Ра́дуйся, в возсозда́нную оби́тель и́нокини собира́яй;
Ра́дуйся, я́ко оте́ц чадолюби́вый, при́сное попече́ние о них име́яй.
Ра́дуйся, всем притека́ющим к тебе́ ско́рое вспоможе́ние подава́яй;
ра́дуйся, о́браз до́браго па́стыря сло́вом, житие́м и ве́рою нам яви́вый.
Ра́дуйся, Иоа́нне, земли́ Росси́йския моли́твенниче преди́вный.
Конда́к 13
О святы́й пра́ведный о́тче Иоа́нне, всеросси́йский свети́льниче и преди́вный чудотво́рче! Приими́ хвале́бное сие́ пе́ние на́ше и умоли́ Христа́ Бо́га Це́рковь Святу́ю в благоче́стии утверди́ти, еди́нство в сою́зе ми́ра и любве́ Христо́вы соблюсти́, да и мы воспое́м с тобо́ю Бо́гу: Аллилу́ия.
Сей конда́к глаго́лется три́жды.
И па́ки чте́тся 1-й и́кос и 1-й конда́к.
Моли́тва
О вели́кий чудотво́рче и преди́вный уго́дниче Бо́жий, богоно́сне о́тче Иоа́нне! При́зри на нас и внемли́ благосе́рдно моле́нию на́шему, я́ко вели́ких дарова́ний сподо́би тя Госпо́дь, да хода́тай и при́сный моли́твенник за нас бу́деши. Се бо, страстьми́ грехо́вными обурева́еми и зло́бою снеда́еми, за́поведи Бо́жия пренебрего́хом, покая́ния серде́чнаго и слез воздыха́ния не принесо́хом, сего́ ра́ди мно́гим ско́рбем и печа́лем досто́йни яви́хомся. Ты же, о́тче пра́ведне, ве́лие дерзнове́ние ко Го́споду и сострада́ние к бли́жним свои́м име́я, умоли́ Всеще́драго Влады́ку ми́ра, да проба́вит ми́лость Свою́ на нас и потерпи́т непра́вдам на́шим, не погуби́т нас грех ра́ди на́ших, но вре́мя на покая́ние ми́лостивно нам да́рует. О свя́тче Бо́жий, помози́ нам ве́ру правосла́вную непоро́чно соблюсти́ и за́поведи Бо́жия благоче́стно сохрани́ти, да не облада́ет на́ми вся́кое беззако́ние, ниже́ посрами́тся пра́вда Бо́жия в непра́вдах на́ших, но да сподо́бимся дости́гнути кончи́ны христиа́нския, безболе́зненныя, непосты́дныя, ми́рныя и Та́ин Бо́жиих прича́стныя. Еще́ мо́лим тя, о́тче пра́ведне, о е́же Це́ркви на́шей Святе́й до сконча́ния ве́ка утвержде́нней бы́ти, Оте́честву же на́шему мир и пребыва́ние в пра́вде Бо́жией испроси́ и от всех зол сохрани́, да та́ко наро́ди на́ши, Бо́гом храни́ми, в единомы́слии ве́ры и во вся́ком благоче́стии и чистоте́, в ле́поте духо́внаго бра́тства, трезве́нии и согла́сии свиде́тельствуют: я́ко с на́ми Бог! В Не́мже живе́м, и дви́жемся, и есмы́, и пребу́дем во ве́ки. Ами́нь.
И́на моли́тва
О святы́й пра́ведный о́тче Иоа́нне, всеросси́йский свети́льниче и преди́вный чудотво́рче! Ты от младе́нческих лет Бо́гом избра́н был еси́ и, ду́хом пламене́я, я́ко и́стинный па́стырь, житие́м, сло́вом, любо́вию, ве́рою, чистото́ю лю́дем послужи́л еси́. Сего́ ра́ди мо́лим тя, пра́ведный о́тче: моли́ Человеколю́бца Бо́га Це́рковь Святу́ю ми́ром и тишино́ю огради́ти, зе́млю Росси́йскую во благоде́нствии сохрани́ти, па́стыри благода́ти и и́стины преизоби́льно испо́лнити, вла́сти умудри́ти, правосла́вное во́инство укрепи́ти, немощны́я исцели́ти, развраще́нныя испра́вити, ю́ныя воспита́ти, ста́рцы и вдови́цы уте́шити и нам всем во Ца́рствии Небе́снем сподо́битися со все́ми святы́ми прославля́ти Отца́ и Сы́на и Свята́го Ду́ха, ны́не и при́сно, и во ве́ки веко́в. Ами́нь.