Акафисты - 03 января 2025
Кондак 1
Избранный и дивный в чудесех святителю, Российския Церкве первопрестольниче, и усердный о душах наших молитвенниче, отче наш Петре! В песнех восхваляем тя с любовию, святаго заступника нашего: ты же, яко имеяй дерзновение ко Господу, предстательством твоим небесным, от всяких нас бед свободи, да зовем ти: Радуйся, святителю Петре, великий чудотворче.
Икос 1
Ангелоподобно на земли пожил еси, святителю отче, и яко ангел благий хранитель Отечествию твоему явился еси не токмо в житии твоем, но по честнем успении твоем, благотворя людем ти сродным, от нихже слышиши благохваления таковая: Радуйся, благочестивых родителей плоде богодарованный. Радуйся, корене благаго ветве многоплодная. Радуйся, прежде рождения твоего, видением божественным рождшей тя во избранника Божия предуказанный. Радуйся, во утробе матерней освященный. Радуйся, по рождении твоем благодатию Духа Святаго просвещенный. Радуйся, сосуде Божия благодати избранный. Радуйся, святителю Петре, великий чудотворче.
Кондак 2
Видевше честнии родителие твои, Петре богоизбранне, яко косно в учении книжнем преуспевал еси, о сем тужаху. Сие же бысть по смотрению Божию, да не от человек, но свыше от Бога, навыкнеши учению небесному: явивыйся бо тебе муж светел, в святительския ризы облеченный, рукою коснувся твоего языка, благословением своим разреши косность твою, и преисполни тя разума, яко пети тебе разумно Богу: Аллилуиа.
Икос 2
Разум небесный свыше тебе даровася, угодниче Божий, имже добре уразумел еси, яко вся красная мира сего скоро преходят: темже, двадесятолетну ти сущу, мир и вся благая его оставил еси, и возжелел еси инок быти и Единому Христу работати. О сем тя хвалим и зовем: Радуйся, земли Волынския святое прозябение. Радуйся, всея страны Российския духовная лепото. Радуйся, восхождения от добродетели к добродетели невидимо совершивый. Радуйся, совершенства о Христе богомудренно достигнувый. Радуйся, послушания добрый рачителю. Радуйся, смирения Христова верный подражателю. Радуйся, святителю Петре, великий чудотворче.
Кондак 3
Силою Божиею укрепляемь, отче Петре, вся послушания монастырская добре проходил еси во обители, и яко звезда богосветлая, сиял еси добродетельми евангелскими среди братии твоея: темже священства саном почтен был еси, и непорочно возносил еси безкровную жертву Богу, присно поя Ему серафимскую песнь: Аллилуиа.
Икос 3
Имея помысл чист и непорочную душу, Петре богоблаженне, святыя иконы изображати научился еси, и был еси изограф благоговеин, дело рук своих посвящаяй Богу, иже писанныя тобою иконы чудесы многими прослави; сего ради хвалебно вопием ти: Радуйся, трудолюбче благословенный, трудивыйся во славу Божию. Радуйся, яко труды твоя святыя Богом прославлени суть. Радуйся, божественному евангелисту Луце в иконописании подражавый. Радуйся, иконы Пресвятыя Богородицы благолепно написавый. Радуйся, в душе твоей образ Божий добре изобразивый. Радуйся, сердце твое в храм Триипостасному Богу посвятивый. Радуйся, святителю Петре, великий чудотворче.
Кондак 4
Бури страстей избежав, отче Петре, к тихому пристанищу безмолвия корабль души твоея направил еси, и с благословения настоятеля твоего, в месте безмолвнем, на реце Рате, поселился еси, да един Единому Христу поработаеши в посте и молитве, воспевая Ему немолчную песнь хвалы: Аллилуиа.
Икос 4
Слышавше людие благочестивии о твоих добродетелех, Петре преподобне, прихождаху к тебе, благословения и молитв от тебе ищуще, ихже любезно приимал еси, и обитель иноческую на реце Рате устроил еси, в ней же спасошася мнози твоим наставлением богомудрым. Темже, яко сотворившаго и научившаго, ублажаем тя и глаголем: Радуйся, непопустивый погибнути Богом врученным тебе овцам. Радуйся, устроителю благоискусный общежития иноческаго. Радуйся, учителю пресладкий благочестию христианскому. Радуйся, возшедый на высоту совершенства духовнаго. Радуйся, достигнувый глубины смирения христианскаго. Радуйся, святителю Петре, великий чудотворче.
Кондак 5
Боготечное светило быв, волею Пастыреначальника Христа, на свещнице Церкве Всероссийския поставлен был еси, Петре богоносне, да светиши Отечеству твоему земному, и приводиши к Солнцу Правды люди российския, научая их благочестно воспевати Пресвятей Троице: Аллилуиа.
Икос 5
Ощутив патриарх Царяграда, святейший Афанасий, яко благоуханием дивным исполнися весь храм, егда в него вшел еси, Петре досточудне, позна тя избранника Божия, достойнаго воистину сана святительскаго, и постави тя в митрополита Киевскаго, и всея России. Сему же бывающу, просветися лице твое светом небесным: мы же дивящеся таковому чудеси, вопием ти: Радуйся, архиерее Божий, от Пастыреначальника Христа свыше прославленный. Радуйся, иерарше Христов, дарами Святаго Духа преисполненный. Радуйся, апостолов преемниче и святителей сопрестольниче. Радуйся, в Российстей стране светом благоразумия возсиявый. Радуйся, паству Всероссийскую духовно удобривый. Радуйся, светоносный первопрестольник в ней бывый. Радуйся, святителю Петре, великий чудотворче.
Кондак 6
Проповедал еси пастве твоей нелестное евангелское учение, святителю приснопамятне, и всех учил еси мир имети между собою: мира любитель быв, враждовавших на тя в любовь привел еси кротостию и незлобием твоим, яко всей пастве твоей радоватися о тебе, и хвалебно взывати ко Господу: Аллилуиа.
Икос 6
Возсиял еси в стране Российстей светом добрых дел твоих, святителю отче наш Петре, и еретическия плевелы не леностно искоренял еси в пастве твоей: чада твоя поучая православно веровати в триединаго Бога, иже и нам внушает благохвалити тя звании сими: Радуйся, столпе непоколебимый апостольских преданий. Радуйся, мечу обоюду острый, ереси посекаяй. Радуйся, православия наставниче, всех поучавый троическому поклонению. Радуйся, еретиков противоборче, бодренно стоявый на страже святыя Христовы Церкве. Радуйся, вдов и сирот милостивый питателю. Радуйся, обидимых и гонимых нелицеприятный предстателю. Радуйся, святителю Петре, великий чудотворче.
Кондак 7
Хотя враг спасения человеческаго нарушити мир души твоея, святителю богоугодне, воздвиже на тя клеветника ложнаго, Тферскаго епископа Андреа, глаголавшаго на тя праведнаго беззаконие. Обаче правда твоя, яко солнце в полудне, возсия на соборе, клеветник же злобный посрамлен бысть, и достойное по делом своим получи, ты же благодарственно взывал еси ко Господу: Аллилуиа.
Икос 7
Ново место престолу твоему святительскому избрал еси, угодниче Божий, во граде Москве: возлюбив бо кроткаго и боголюбиваго ея князя Иоанна, тамо поселился еси, и церковь каменну, во имя Успения Пресвятыя Богородицы, тамо соорудити князю Иоанну советовал еси, пророчески глаголя ему, яко град той славен будет, святители в нем поживут и Бог в нем прославится, и яко кости твоя в нем положены будут. Сие пророчество твое исполншееся видяще, радостно приносим ти сия благохваления: Радуйся, царствию Российскому основание крепкое положивый. Радуйся, первопрестольный град Москву благословением твоим освятивый. Радуйся, прозорливче богопросвещенный, будущая, яко настоящая, провидевый. Радуйся, храм Пресвятыя Богородицы, честнаго и славнаго Ея Успения, основавый. Радуйся, в нем гроб себе устроивый. Радуйся, свято и богоугодно на земли поживый. Радуйся, святителю Петре, великий чудотворче.
Кондак 8
Странника и пришельца в мире сем себе помышляя святителю отче наш Петре, своима рукама гроб каменный себе устроил еси, и выну поминал еси о исходе твоем, к немуже приуготовлялся еси молитвами непрестанными, зовый Богу во умилении сердечнем: Аллилуиа.
Икос 8
Весь в Бозе быв, час кончины твоея провидел еси духом, отче Петре, и Божественную Литургию совершив, о всех живых и усопших помолился еси, себе же брашном негиблющим Пречистых Христовых Таин напитал еси, и милостыню многу нищым и убогим раздал еси, приуготовляяся к сретению Жениха Безсмертнаго Христа. Сие воспоминающе, дивимся прозорливости твоей, и глаголем: Радуйся, доброе напутствие для души твоей приемый. Радуйся, со Христом жити на веки возжелавый. Радуйся, любовию божественною страх смертный победивый. Радуйся, мирно и радостно час кончины твоея сретивый. Радуйся, яко праведно и непорочно течение земное совершил еси. Радуйся, яко успение преподбное во мзду трудом твоим, от Господа получил еси. Радуйся, святителю Петре, великий чудотворче.
Кондак 9
Вси царедворцы великаго князя Иоанна собрашася к одру твоему, святителю Христов: ты же, чрез старейшаго из них Протасиа, мир и благословение Божие великому князю Иоанну преподал еси, не бывшу тому во граде, и с светлым лицем воздев горе преподобнеи руце твои, усердно помолился еси, и тако в молитве Богу душу твою предал еси, юже ангели святии в Горния Обители вознесоша, с пением радостным: Аллилуиа.
Икос 9
Витии любомудрии прославляют славных мира сего деяния, мы же твоим житием честным красуемся, святителю Божий, и прославляем преставление твое святое и многая чудеса, тобою содеянная и содеваемая от рода в род: воистину бо не вотще чудотворец именуешися, преблаженне, и достойно слышиши хвалебныя песни таковыя: Радуйся, в молитве усердной дух твой Богу предавый. Радуйся, погребением честным от великаго князя Иоанна почтенный. Радуйся, во храме Богоматери у святаго жертвенника положенный. Радуйся, видением дивным, неверовавшаго в святость твою, в веру обративый. Радуйся, со одра погребальнаго благословляющий паству твою виден бывый. Радуйся, во гробе, тобою уготованном, мирно почивый. Радуйся, святителю Петре, великий чудотворче.
Кондак 10
Спаса Христа умоляти не престай за град и люди, тя почитающыя, угодниче Божий, святителю отче наш Петре. Тебе бо дарова нам Господь помощника и предстателя во всяких бедах и напастех, и гроб твой святый содела врачебницу безмездную недугов человеческих: к немуже с верою и любовию припадающе, вопием прославльшему тя и дивному во святых своих Богу: Аллилуиа.
Икос 10
Стеною молитв твоих небесных, первопрестольный град Москва благодатно ограждается, и светло красуется, имея в себе многоцелебную раку святых твоих мощей, Петре чудотворче, яко крин нетлением процветших, и благоухание святыни испущающих: имже покланяющеся, умильно тебе глаголем: Радуйся, смерть вкусивый, тления же не познавый. Радуйся, исцеления многая от святых твоих мощей источивый. Радуйся, юношу разслабленнаго и недвижимаго у гроба твоего здрава возставивый. Радуйся, сляченнаго и отнюд восклонитися немогшаго, таможе прямо ходити сотворивый. Радуйся, глухому слух отверзый. Радуйся, слепому зрение милостивно даровавый. Радуйся, святителю Петре, великий чудотворче.
Кондак 11
Пение молебное не умолчно бысть при гробе твоем, святителю отче наш Петре, от дне честнаго преставления твоего до ныне, чудесем свидетельствующым святость твою, юже вся Российская Церковь исповедует ясно: мы же, чада твоя и овцы словесныя паствы твоея, радующеся о твоем прославлении на Небеси и на земли, благодарственно вопием святых Святейшему Христу Богу: Аллилуиа.
Икос 11
Светоподательный светильник Божия благодати, воистину являешися и по смерти, Петре чудотворче: темже, сиянием чудес твоих озаряеми, с любовию чествуем святую твою память, яко торжество веры и благочестия, и от усердия нашего приносим ти пения таковая: Радуйся, апостолов во благовестии Христове не леностный подражателю. Радуйся, перваго иерарха Российскаго Михаила достойный преемниче. Радуйся, преемником твоим во святительстве добрый споспешниче. Радуйся, о всех людех российских усердный молитвенниче. Радуйся, правило веры истинныя и образе кротости духовныя. Радуйся, врачу безмездный и целебниче благосострадательный. Радуйся, святителю Петре, великий чудотворче.
Кондак 12
Благодать Господню и благовременну помощь испроси нам, угодниче Божий, во дни безпомощия нашего и буди нам в скорбех утешитель, в бедах заступник, в недузех врачь, туне подаваяй нам дары целебныя от святых твоих мощей, к нимже усердно притекающе, не тщы отходим, но ущедреннии тобою вопием Богу хвалебно: Аллилуиа.
Икос 12
Поюще чудеса твоя и многое сострадание твое к людем, отче наш Петре, усердно просим твоего многомощнаго ко Господу предстательства: вемы бо, яко молитва твоя, подобно фимиаму восходит пред Вседержителя Бога, и низводит на нас Его благословение, помощь и милость. Темже и взываем к тебе: Радуйся, Пресвятыя Троицы верный исповедниче. Радуйся, Пресвятыя Богородицы изрядный служителю. Радуйся, ангельских воиств собеседниче. Радуйся, всех святых присный друже. Радуйся, от горних высот к земнородным милостиво приникаяй. Радуйся, душы и телеса наша благоутробно врачуяй. Радуйся, святителю Петре, великий чудотворче.
Кондак 13
О чудотворче преславный, и помощниче всем нам скорый и милостивый, святителю отче наш Петре! Милостиво прием сие малое моление наше, в похвалу тебе приносимое, умоли Господа Бога даровати нам телесное здравие и душевное спасение, да во Царствии Небеснем сподобимся пети Ему со святыми: Аллилуиа.
Этот кондак читается трижды, затем икос 1-й и кондак 1-й
Молитва
О великий святителю, преславный чудотворче, Российския Церкве первопрестольниче, града Москвы хранителю и о всех нас усердный молитвенниче, отче наш Петре! К тебе смиренно припадаем и молимся: простри руце твои ко Господу Богу, и помолися за ны грешныя и недостойныя рабы Его: да пробавит нам милость Свою и ниспослет нам вся благопотребныя к временному житию и вечному спасению нашему дары благости Его, наипаче же, да оградить нас миром, братолюбием и благочестием от всех искушений врага диавола, и дарует нам быти верными чады твоими, не по имени токмо, но и всем житием нашим. Молим тя, святителю Христов, проси предстательством твоим у Небеснаго Владыки: страждущую страну Российскую от лютых безбожник и власти их да свободит, и да возставит престол православных правителей; верных рабов Его, в скорби и печали день и нощь вопиющих к Нему, многоболезный вопль да услышит и да изведет от погибели живот наш. Ей, угодниче Божий! Услыши нас благоутробно, и буди нам помощник и заступник во всяких бедах и напастех, не забуди нас и в час кончины нашея, егда наипаче твоего заступления потребуем: да при помощи молитв твоих святых, сподобимся и мы грешнии, кончину благую получити, и Царствие Небесное унаследити, славяще дивнаго во святых Своих Бога нашего, Отца, и Сына, и Святаго Духа, во веки веков. Аминь.
Кондак 1
Избранную от великоиментаго боярскаго рода, женскую слабость мужески поправшую и разжженнаго похотью мучителя чистотою своею посрамившую, Иулианию славную, вернии, песньми почтим, точит бо нам неоскудно исцеления и молит о спасении всех, зовущих ей:
Радуйся, Иулиание, благоверная княгиня целомудренная.
Икос 1
Ангелов сожительница и страстотерпцем сопричастница быти сподобилася еси, всечестная Иулиание, ангельскую бо чистоту от пелен сохранила еси и тоя ради мученическую кончину доблественно восприяла еси: и ныне со ангельскими лики и мучеников сонмы Престолу Всесвятыя Троицы предстоящи, моли о помиловании нас, приносящих ти похвальная сия:
Радуйся, даров духовных исполненная.
Радуйся, венцем мученическим украшенная.
Радуйся, непоколебимый во искушениях терпения столпе.
Радуйся, твердое во обстояниях мужества основание.
Радуйся, добродетели неувядаемыи цвете.
Радуйся, лозы Христовой многострадальная розго.
Радуйся, благочестия честное прозябение.
Радуйся, чистоты доброто и похваление.
Радуйся, голубице, крыла позлащенная имущая.
Радуйся, теми в райская обители возлетевшая.
Радуйся, Иулиание, благоверная княгиня целомудренная.
Кондак 2
Видящи мати твоя, благоверная Иулиание, всю скорбь и тяготу вдовства своего, еще малолетней ти сущей моляще Всесильнаго Бога, да возрастит и усовершит тя Своею благодатию, и купно с тобою пояше Ему: Аллилуиа.
Икос 2
Разумом неомраченным греховными страстьми издетска разумевши необыменнаго Бога, Иулиание богомудрая, несомненно в Того веровала еси, и неизреченная и спасительныя повеления Его соблюдши, подвизаеши пети тебе звании сими:
Радуйся, ум свои к Божественней высоте вперившая.
Радуйся, одеяние души твоея чистотою украсившая.
Радуйся, силу Божию в немощном естестве своем показавшая.
Радуйся, венец победный от Десницы Живоносныя приявшая.
Радуйся, цвете чистоты, среди кала греховнаго проросший.
Радуйся, крине целомудрия, посреди терния похотей душегубительных процветшии.
Радуйся, чистая ластовице.
Радуйся, красная горлице.
Радуйся, яко в молитве тайно бдела еси.
Радуйся, яко писаньми богодухновенными насладилася еси.
Радуйся, Иулиание, благоверная княгиня целомудренная.
Кондак 3
Силою благодати Божией сохраняема, блаженная княгиня Иулиание, во благочестии от юных лет возрастала еси, и от силы в силу, и от славы в славу восходила еси, воспевающи укрепляющему тя Богу благодарственную песнь: Аллилуиа.
Икос 3
Имущи в сердце своем огнь любви ко Христу Богу, грех и нас ради человек распеншагося Господа, выну помышляла еси, прехвальная Иулиание: темже ко страстем себе от младенства приуготовила еси и научила еси всех вопити тебе сице:
Радуйся, любовь ко Христу в себе возжегшая.
Радуйся, тоя ради любве тягчайшия муки претерпевшая.
Радуйся, яко Жениха Безсмертнаго возжелала еси.
Радуйся, яко Тому в дар страдания своя принесла еси.
Радуйся, яко красотою страданий твоих Прекрасному Жениху Христу уподобилася еси.
Радуйся, яко Крест Господень на рамо вземши, воздержанием Сему последовала еси.
Радуйся, благочестия ревнительнице.
Радуйся, на врага добляя победительнице.
Радуйся, яко тобою от нечистых похотей избавляемся.
Радуйся, яко тобою от пагубных страстей свобождаемся.
Радуйся, Иулиание, благоверная княгиня целомудренная.
Кондак 4
Бурю жития долу влекущаго, и наслаждения красоты, и славу цветущую, яко временну оставльши, блаженная Иулиание, добротою красною целомудрия распаляема, ко Христу прилепилася еси, поющи Ему: Аллилуиа.
Икос 4
Слышавши богоименитая Иулиание иерея некоего сказания о подвизех мучеников, Христа Господа больши живота своего возлюблыших и за имя Христово смерть радостно приявших, ревностию о подвизех сих воспламеняшеся и к святости и чистоте христианстей понуждашеся. Мы же, ведуще сия, восхваляем тя сице:
Радуйся, яко о подвизех мученических возревновала еси,
Радуйся, красоту духовную и доброту телесную в себе сочетавшая.
Радуйся, благоухания духовнаго нас исполняющая.
Радуйся, тьму бесовскую далече отгоняющая.
Радуйся, благ духовных и телесных подательнице.
Радуйся, у Престола Божия за нас присная ходатаице.
Радуйся, яко о Господе ликуеши.
Радуйся, яко лучами благодати Божиеи исполняешися.
Радуйся, Иулиание, благоверная княгиня целомудренная.
Кондак 5
Богсиянную звезду, от града Торжка взошедшую и небесными светлостьми возсиявшую, видим тя, всехвальная княгиня Иулиание: и ныне во светлостех мучеников святых пребывавши, купно с ними восхваляющи Светоподателя всяческих и поющи Тому: Аллилуиа.
Икос 5
Видев тя беззаконный князь Юрий, елико душевною красотою сияющую, тако и телесным добротством блистающу, и похотью нечистою распаляем, восхоте обольстити тя. Ты же, всечестная Иулиание, рачение плоти превозмогши, яко воистину крепкий адамант целомудрия явилася еси. Сего ради любовию вопием ти:
Радуйся, чистоты забрало боговидное.
Радуйся, естества цвете благороднейший.
Радуйся, елеем благочестия превращенная.
Радуйся, чистоту душевную и телесную соблюдшая.
Радуйся, в женстем естестве мужескую доброту явившая.
Радуйся, невидимую державу противных сил победившая.
Радуйся, паче сильных мужей крепчайшая.
Радуйся, премудрых века сего мудрейшая.
Радуйся, яко врага льстивого крепкая сопротивоборница явилася еси.
Радуйся, яко мужески подвиг претерпела еси.
Радуйся, Иулиание, благоверная княгиня целомудренная.
Кондак 6
Проповедник твоея чистоты и праведности явися мучитель твой, святая княгиня Иулиание, ты бо доброте красней души твоея страстьми осквернится не стерпела еси, доброту несказанную честнаго Жениха твоего уразумевши и плотскую любовь твердо отвергла еси, воспевающе Христу Богу победную песнь: Аллилуиа.
Икос 6
Возсияла еси светлостьми добродетелей твоих, преславная Иулиание, и подвигом мученическим украсилася еси. Темже паче солнца сияеши и просвещаеши всех, твою светоносную память совершающих верно и приносящих ти хваления сия:
Радуйся, мужественная мученице.
Радуйся, плотских страстей целительнице.
Радуйся, яко крин добродетельми твоими процветшая.
Радуйся, целомудренным путем шествовавшая.
Радуйся, адскую гордость отвергшая.
Радуйся, небесную сладость возлюбившая.
Радуйся, пламень похоти разжженныя мудрованием угасившая.
Радуйся, свещу душевную неугасимую соблюдшая.
Радуйся, яко стремление нечистоты опалила еси.
Радуйся, яко на высоту добродетелеи взошла еси.
Радуйся, Иулиание, благоверная княгиня целомудренная.
Кондак 7
Хотя ласкосердый мучитель похоти своея желание улучити, ласкательными словесы и мольбы многими и коварством и прещении грозными соблазнити тя покушашеся: ты же, всеславная, плоти мудрование отвергши, болезненне вопияла еси: не разлучит мене любве Христовой ни славы обещание, ни мук прещение, и радостно взывала еси Ему: Аллилуиа.
Икос 7
Новую безчеловечия ярость показа неистовый мучитель твой, досточудная Иулиание, егда слугам повеле сотворити ног твоих отъятие и рук отсечение и в реку Тверцу воврещи бездыханное тело твое. Мы же таковому зверонравию содрогающеся, твоя страсти восхваляюще, вопием ти сице:
Радуйся, мучеников радование.
Радуйся, целомудренных похваление.
Радуйся, струями кровей твоих землю оросившая.
Радуйся, отсечение удов телесных претерпевшая.
Радуйся, к лику мученическому сопричтенная.
Радуйся, одеждою чистоты испещренная.
Радуйся, кровию своею освятившаяся.
Радуйся, тлителя целомудрия поправшая.
Радуйся, яко сердечным рачением твоим Ангелы удивила еси.
Радуйся, яко мужеским сплетением врага невидимого низложила еси.
Радуйся, Иулиание, благоверная княгиня целомудренная.
Кондак 8
Странствия земнаго течения мученически скончавши, ко Христу, Неприступному Свету, взошла еси, достохвальная Иулиание. Ему же ныне предстоиши духовно ликовствующи и воспевающи радостную песнь: Аллилуиа.
Икос 8
Всю лесть змиину низложила еси, и Ангельские лики возвеселила еси, преблаженная Иулиание, на камени бо твердо целомудрия утвердившеся, убийцу врага посрамила еси и венец победный от Христа Царя достоино восприяла еси. Сего ради слышиши от нас похвалы сия:
Радуйся, духом своим безплотныя удивившая.
Радуйся, мужеством своим тех возвеселившая.
Радуйся, в жертву себе Богу предавшая
Радуйся, жертва благоприятная Тому явившаяся.
Радуйся, яко страсти многих мук претерпела еси.
Радуйся, яко к сиянию незаходимаго света преставилася еси.
Радуйся, тела мертвенного не пощадившая.
Радуйся, безсмертие неиждиваемое наследовавшая.
Радуйся, яко преступнаго мучителя советы избегла еси.
Радуйся, яко страдальческим путем во обители Небесныя взошла еси.
Радуйся, Иулиание, благоверная княгиня целомудренная.
Кондак 9
Всецелу себе самою Богу принесла еси, богомудрая Иулиание, и Божественную силу в немощи своей совершила еси, в женстем естестве невидимую державу и силы ея победивши. Тем же убо во дворы Господа твоего, яко дева мудра свещу носящи вошла еси, поющи Тому хвалебную песнь: Аллилуиа.
Икос 9
Витии красноглаголивых лик не возможет достойно восхвалити тя, всехвальная Иулиание, како бо ты чудодетельне явила еси тело твое, противу быстрин речных плывущи, разслабленному некоему, по брегу Тверцы идущему. Таковому промышлению о тебе Божию чудящеся, во умилении сердец наших приносим ти похвальная сия:
Радуйся, зарями чудес твоих сияющая.
Радуйся, богато нам чудесы источающая.
Радуйся, яко каплями кровей твоих души твоеи багряницу многоценну исткала еси.
Радуйся, яко теми в ризу нетленнаго веселия одеялася еси.
Радуйся, елей Божия Благодати искапающая.
Радуйся, яко благовонный фимиам ко Христу Богу вознесшаяся.
Радуйся, тленную славу презревшая.
Радуйся, венцем нетления венчавшаяся.
Радуйся, яко страданьми твоими, яко злато в горниле, искусилася еси.
Радуйся, яко честное жилище Спасу Христу соделалася еси.
Радуйся, Иулиание, благоверная княгиня целомудренная.
Кондак 10
Спастися хотя всем человеком Щедродатель Господь дарова нам святое тело твое, блаженная Иулиание, яко сосуд избранный и источник благодатный, от негоже вси вернии токи исцелении черплюще, выну вопиют прославляшему тя Богу: Аллилуиа.
Икос 10
Стена еси твердая и крепкое забрало граду нашему, святая мученице Иулиание, и всех, с верою и любовию прибегающих к тебе, знамении дивных исполняеми о величии явльшагося в тебе Бога вещающих. Сего ради приими от нас пения сия:
Радуйся, чудеса возсиявшая.
Радуйся, цельбы нам источающая.
Радуйся, страстей лютых утоление.
Радуйся, в скорбех сущих заступление.
Радуйся, яко недуги неисцельныя врачующи.
Радуйся, яко огненное опаление уставляющи.
Радуйся, источниче исцелений неоскудеваемый.
Радуйся, сокровище Божиих даровании неиждиваемое.
Радуйся, яко духи лукавыя отгоняеши.
Радуйся, яко в печалех всем помогавши.
Радуйся, Иулиание, благоверная княгиня целомудренная.
Кондак 11
Пению нашему похвальному вонми, угоднице Божия Иулиание, аще бо и ни единоже наше слово довольно было, уповаем бо тобою прощение согрешений наших получити и милость от Благодеющаго всяческих улучити, да вкупе с тобою воспоем Ему: Аллилуиа.
Икос 11
Светозарными сияньми Христа, Невечерняго Солнца, душу и сердце свое озарила еси, богомудрая Иулиание, и к Нему утреневала еси: темже и к Свету присночудному преложилася еси. Им же просвещаеши всех, любовию почитающих тя и приносящих ти сицевая:
Радуйся, в чертоги Небесныя вселившаяся.
Радуйся, к вечным обителем преставившаяся.
Радуйся, к Свету невещественному возшедшая.
Радуйся, целомудрия любовию в горняя скиния вознесшаяся.
Радуйся, яко благодати Христовы благоуханием в небеснем вертограде ныне исполняешися.
Радуйся, яко Божественным славы зрением во обителех светозарных ныне утешаешися.
Радуйся, доблественная страстотерпице.
Радуйся, вечного блаженства наследнице.
Радуйся, яко мрак страстей разгоняеши.
Радуйся, яко славою Божиею исполняешися.
Радуйся, Иулиание, благоверная княгиня целомудренная.
Кондак 12
Благодать прияла еси страсти плотския целити, прехвальная мученице Иулиание, и нас, усердно воспевающих тя, душевных и телесных болезней избави твоими яже к Богу молитвами, да дерзновенно вопием Ему: Аллилуиа.
Икос 12
Поюще подвиги твоего предивнаго жития, твоя преславная и богатодательная благодеяния, тобою нам дарованная, ублажаем тя, блаженная княгине Иулиание, блаженна бо воистину явилася еси и в житии твоем, и в смерти, и по смерти твоей. Сего ради воспеваем тя похвалами сими:
Радуйся, нищету духовную возлюбившая.
Радуйся, вся красная мира сего презревшая.
Радуйся, в плаче о Господе слезами очи своя оросившая.
Радуйся, правды небесныя возжаждавшая.
Радуйся, земли кротких наследнице.
Радуйся, преудобренная страстотерпице.
Радуйся, милость от Бога восприявшая.
Радуйся, чистотою сердечною Того узревшая.
Радуйся, яко миром духовным облагоухаеши.
Радуйся, яко мзду небесную достойно восприяла еси.
Радуйся, Иулиание, благоверная княгиня целомудренная.
Кондак 13
О святая мученице, благоверная княгиня Иулиание! Тебе, у Престола Господа Славы молящеися за ны, мы, грешнии, на земли живущии, приносим хвалебное сие благодарение и усердно просим тя: моли Всещедраго Бога пробавити милость Свою на землю Российскую, утвердити ны в православии и благочестии, даровати нам прощение согрешении, избавится нам от напрасныя смерти и будущия муки, да с тобою во веки поем Ему: Аллилуиа.
Этот Кондак читается трижды, затем 1-й Икос «Ангелов сожительница...» и 1-й Кондак: «Избранную...»
Молитва
О всехвальная мученице, святая угоднице Божия, благоверная княгиня Иулиание! Ты супружеския ради чистоты душу свою положила еси и за целомудрие даже до крови подвизалася еси, и сего ради, аще и жена была еси, обаче к лику праведных дев сопричтена быти сподбилася еси.
К тебе, велие дерзновение ко Владыце стяжавшеи, смиренно притекаем и умильно просим тя: подаждь нам отраду и свобождение от плотския брани, житие целомудренное и благочестное в супружестве, девстве пребывание, се бо страстми плотскими обуреваемся, и грехов многих пучина объяла есть ны. Темже и несть мы достоины ниже взирати на высоту Небесную, ниже Господа в помощь свою призывати.
Буди нам помощница во спасение скорая и от зол и обстоянии избавительница неодолимая. Всех, с верою несумненною к Богу приходящих и молитвенно к тебе притекающих, от всяких бед душевных и телесных свободи, скорбящия обрадуй, труждающимся помози, плачущия утеши, изнемогающия поддержи, нападствуемым буди заступница, вдовицам и сирым защитница, младенцем питательница.
Помози нам, да не погибнем со страстьми и похотьми нашими, но да управим живот наш во всяком благочестии и чистоте, яко да соделаем телеса наша храм живущаго в нас Духа Святаго и прославим благодать и милость Триединаго Бога во веки веков. Аминь.
Кондак 1
Избранному чудотворцу, дивному предстателю пред Богом, блаженному Прокопию, пресветлому светильнику страны Вятския, многими чудотвореньми утешающему с верою чтущих святую память его, умильно взываем:
Радуйся, блаженне Прокопие, скорый помощниче, Вятский чудотворче.
Икос 1
Ангела на земли яви тя милосердный Творец Небеси и земли: вся бо земная во уметы вменил еси, блаженне Прокопие, да Христа приобрящеши. Темже вси многотрудное житие и блаженную кончину твою зряще, радостно тебе вопием:
Радуйся, издетства в жилище Духа Святаго чистое и непорочное предуготованный.
Радуйся, от лютаго недуга чудесне исцеленный.
Радуйся, на подвиг юродства, Христа ради, свыше призванный.
Радуйся, от преподобнаго Трифона на путь спасения наставленный и благословенный.
Радуйся, благодати сосуде избранный.
Радуйся, благословение преподобнаго Трифона, яко легкое иго Христово понесый.
Радуйся, блаженне Прокопие, скорый помощниче, Вятский чудотворче.
Кондак 2
Видя тя Господь угодна себе быти, блаженне Прокопие, егда млад сый громом поражен бысть, по слезней же молитве родителей твоих к Богу, исцеле. Вси же людие, окрест живущии, со страхом и удивлением вопияху Богу: Аллилуиа.
Икос 2
От юности подвиг юродства стяжевая, сердце к небесней чистоте устремил еси, блаженне Прокопие, сего ради вопием ти:
Радуйся, родителей твоих похвало и украшение.
Радуйся, труды их молитвою выну услаждавый.
Радуйся, к деланию духовному предуказанный.
Радуйся, послушания сыновняго наставниче.
Радуйся, молитв ради родителей, от недуга тяжкаго Господем исцеленный.
Радуйся, молитвами преподобнаго Трифона от всякаго страхования прият исцеления.
Радуйся, блаженне Прокопие, скорый помощниче, Вятский чудотворче.
Кондак 3
Сущу бо ти недужну, блаженне Прокопие, родителие принесоша тя во град Хлынов во обитель Пресвятыя Богородицы к преподобному Трифону. Силою молитв его от лютыя смерти избавлен бысть, поя Богу: Аллилуиа.
Икос 3
Имеяй богатство милосердия неизреченное, скоро руку помощи своея простре ти Господь, блаженне Прокопие: зане с верою к Тому притекл еси, на Него Единаго все упование свое возложив. Темже мы, видяще веру твою и дивное ея оправдание, умиленно вопием ти:
Радуйся, по исцелении от недуга единому Богу поработати возжелавый.
Радуйся, любве ради Божией, дом отеческий оставивый.
Радуйся, во одежде убозей странника во град Слободский, душевнаго ради спасения, пришедый.
Радуйся, в храме великомученицы Екатерины, верно и усердно служивый.
Радуйся, у пресвитера Илариона приют телеси своему обретый.
Радуйся, к пресвитеру оному всецело в послушание предавыйся.
Радуйся, блаженне Прокопие, скорый помощниче, Вятский чудотворче.
Кондак 4
Бури многих бед и соблазнов житейских в мире сем бегая, тайно от дома отеческаго ушед, и жестокому пути спасения юродству, Христа ради, умыслил еси подражати поя Богу: Аллилуиа.
Икос 4
Провидя преподобный Трифон, благодати сосуд избранный явитися стране Вятской, благослови тяна подвиг юродства. Мы же, проразумение того сбывшееся зряще, вопием ти, блаженне Прокопие:
Радуйся, в Дом Пресвятыя Богородицы на спасение от родителей принесенный.
Радуйся, от преподобнаго Трифона любезне приятый.
Радуйся, отечествие свое ради пользы душевныя оставивый.
Радуйся, труды ко трудом, посты ко постом прилагавый.
Радуйся, с усердием и любовию к Дому Божию во граде Слободстем Богови работавый.
Радуйся, добрый подвижниче благочестия в стране Вятской.
Радуйся, блаженне Прокопие, скорый помощниче, Вятский чудотворче.
Кондак 5
Боготечную Кровь Христа за ны пролиянную духовныма очима выну созерцая, блаженне Прокопие, прилепился еси совершенною к Тому любовию. Темже преселился еси из града Слободскаго во град Хлынов, да славы людския убежав, поеши Христу Богу: Аллилуиа.
Икос 5
Врагу, присно на подвижники ополчающуся, жестоким житием противустал еси, блаженне Прокопие, плоть духови твоему поработив воздержанием. Темже мы, подвигом твоим чудящеся, зовем ти:
Радуйся, во град Хлынов удаливыйся славы и молвы людския уклоняяся.
Радуйся, безплотному ангелу житием зде уподобивыйся.
Радуйся, ту ветхаго человека в себе умертвивый, смиренно досаждения от людей безумных терпя.
Радуйся, хлад страны Вятския не превозможе пламенныя веры твоея.
Радуйся, днем на на торжищих и стогнах людей града Хлынова обличаяй и на путь спасения направляяй.
Радуйся, нощи в пламенней молитве к Богу в притворах храмов пребываяй.
Радуйся, блаженне Прокопие, скорый помощниче, Вятский чудотворче.
Кондак 6
Проповедует подвиги твоя, блаженне Прокопие, страна Вятская многотрудному житию твоему чудящеся. Воздвиже бо на тя брань лютую враг спасения нашего: ты же постом и молитвою таковая соодолел еси, благодарственне воспев Богу: Аллилуиа.
Икос 6
Возсия благодать в подвизе многотруднаго жития твоего, блаженне Прокопие. Не точию бо на тя бывшая искушения мужественне отразил еси, но и всем во искушениих мудрый споборник являешися, да с радостию тебе вопием:
Радуйся, святаго ради жития от Бога зело возлюбленный.
Радуйся, безстрастия проявителю.
Радуйся, воздержания образе.
Радуйся, сластолюбец посрамление.
Радуйся, в бедах и тесноте на Бога упователю.
Радуйся, в покров себе имевый пречудный омофор Приснодевы.
Радуйся, блаженне Прокопие, скорый помощниче, Вятский чудотворче.
Кондак 7
Хотя Владыка Господь явити тя, блаженне Прокопие, мужа во всем совершенна, попусти врагу спасения нашего пакости ти делати. Ты же смирением искушения посрамив, победне воспел еси Богу: Аллилуиа.
Икос 7
Новая купель Силоамская явися ти, блаженне, обитель Пресвятыя Богородицы, в ней же от болезни душевныя и телесныя исцелился еси, и яко муж в меру возраста Христова Богови предстал еси. Мы же вопием ти:
Радуйся, истиннаго трезвения учителю.
Радуйся, бодрственнаго к себе внимания стяжателю.
Радуйся, блаженных Прокопиа и Иоанна Устюжских единонравниче.
Радуйся, яко с теми Христу ныне молишися, да низложится сила диаволя.
Радуйся, еще в житии на земли яко чудотворец дивен явился еси.
Радуйся, Церкве Православныя славо и украшение.
Радуйся, блаженне Прокопие, скорый помощниче, Вятский чудотворче.
Кондак 8
Странники сущыя на земли сей, враг присно искушает ны, и многи поставляет преграды, да не достигнем Отечествия Небеснаго, но ты яко сокрушивый того ухищрения, помози нам, блаженне Прокопие. Дадеся бо ти благодать недуги целити, будущая провидети и выну быти со призывающими тя и верно поющими Богу: Аллилуиа.
Икос 8
Все житие наше на земли, печали и скорби полно есть, искушения же и падения предлежит нам претерпети, но ты помози нам, блаженне Прокопие, да благодарственне зовем ти:
Радуйся, помышления сердец провидевый.
Радуйся, сердец скорбных уврачевателю.
Радуйся, коегождо от мудрости жития твоего наставлял еси.
Радуйся, нищ сый плотию, богатство многоценное дарований духовных имевый.
Радуйся, аки крин благоуханный во граде Хлынове явивыйся.
Радуйся, болярину Михаилу Татищеву скорое свобождение от темничных уз предуказавый.
Радуйся, блаженне Прокопие, скорый помощниче, Вятский чудотворче.
Кондак 9
Всею душею прилепивыйся Богови, славою земною не уязвился еси, блаженне Прокопие, дары и приношения, от людей даваемыя, со смирением приимал еси, ношаше на малое время, глаголя в себе, довлеет ми покрова неба и ложа земли. Темже и нас добродетели нестяжания научи, во еже чистыми усты и сердцем пети Богу: Аллилуиа.
Икос 9
Вси людие града Хлынова высоту подвигов твоих всюду возвестиша, блаженне Прокопие. Мы же добродетели твоя воспевающе, в похвалу тебе сия вопием:
Радуйся, яко солнце пресветлое земли Вятской возсиявый.
Радуйся, в трудех многих покой телеси своему обретый.
Радуйся, подвиг свой усугубляяй тайным доброделанием.
Радуйся, лютость людей неразумных града Хлынова благостию своею укротивый.
Радуйся, ведети грядущее от Владыки Христа сподобивыйся.
Радуйся, ангелом земным быти удостоенный.
Радуйся, блаженне Прокопие, скорый помощниче, Вятский чудотворче.
Кондак 10
Спастися хотя и со Христом быти, о сем Господа молил еси, блаженне Прокопие. Человеколюбец же Господь приим моление твое, откры кончину твою и со избранными причастие поведа ти, с нимиже ныне воспеваеши Ему: Аллилуиа.
Икос 10
Стена ти бысть крепка, блаженне Прокопие, Пресвятая Богородица, в Еяже обители прежде благословение от преподобнаго Трифона на подвиг юродства получил еси. Матерним Ея покровом осеняемь, течение жизни скончав на земли, небесную весть слышати сподобился еси. Темже ныне радостно вопием ти:
Радуйся, в молитве скоро от Бога услышанный.
Радуйся, Пресвятою Богородицею соблюденный в подвизе юродства Христа ради.
Радуйся, благословение преподобнаго Трифона, яко путеводную звезду пред взором духовным имея.
Радуйся, наготу и лишения терпяше, даже до скончания жития своего.
Радуйся, от Бога извещенный о часе скончания твоего.
Радуйся, скорое сопричтение ко ангелом увидевый.
Радуйся, блаженне Прокопие, скорый помощниче, Вятский чудотворче.
Кондак 11
Пение немолчное принесоша Богу людие града Хлынова, блаженне Прокопие, зряще блаженную кончину твою. Обретоша бо тогда лице твое, яко лице ангела, и свет от святаго телесе твоего исходящ, с благоговением воспеша Богу: Аллилуиа.
Икос 11
Яко светоприемная свеща, благодатию Божиею возжженная, озарил еси, блаженне Прокопие, чудесы твоими страну Вятскую. Темже радостно вопием ти:
Радуйся, добрый воине, от Христа венцем славы украшенный.
Радуйся, благоухания дивнаго источниче.
Радуйся, пред кончиною своею за град Хлынов молитву к Богу вознесый.
Радуйся, за люди творящыя ти досады и утеснения, яко за творящих добродетели Богу моливыйся.
Радуйся, тело свое к погребению на овразе засоре приготовивый.
Радуйся, дом Симеона Павлова принесением мощей своих благословивый.
Радуйся, блаженне Прокопие, скорый помощниче, Вятский чудотворче.
Кондак 12
Благодати великия носителя и будущаго всех воскресения уверителя людем Вятским дарова тя Господь, блаженне Прокопие. Вси бо с верою к тебе притекающии, молитв исполнение и надежду общаго воскресения улучат, благодарственне поюще Богу: Аллилуиа.
Икос 12
Поем твоя милости и чудеса, блаженне Прокопие: выну бо и по отшествии твоем с нами пребываеши, Христу за нас моляся. Темже от благодарных устен в похвалу тебе приносим сицевая:
Радуйся, молитвенниче наш усердный.
Радуйся, помощниче наш скорый.
Радуйся, от наваждения духов злобы спасаяй.
Радуйся, вериги твоя, тобою носимыя, источник исцелений явишася.
Радуйся, всех недугов душевных и телесных врачу скорый.
Радуйся, о спасении всех христиан теплый молитвенниче.
Радуйся, блаженне Прокопие, скорый помощниче, Вятский чудотворче.
Кондак 13
О блаженне Прокопие, скорый помощниче и Вятский чудотворче! Приими сие малое со умилением приносимое тебе моление, и со Пресвятою Богородицею, и преподобным Трифоном, и всеми святыми молися Господу Иисусу Христу, да избавит нас от всяких бед и скорбей, от враг видимых и невидимых, от напрасныя смерти и будущих мук и сподобит нас со избранными своими воспевати Ему: Аллилуиа.
Этот кондак читается трижды, затем икос 1-й и кондак 1-й
Молитва святому блаженному Прокопию, Христа ради юродивому, Вятскому чудотворцу
О блаженне Прокопие! Велие имея дерзновение к Богу, молися выну о всех нас, зане буря многих бед и скорбей обдержит ны: недузи телесныя, болезни душевныя, приражения вражия обуревают ны. Ходит бо враг наш, иский кого поглотити, и ежечасно от того уловляемся: о спасении же своем нерадяще, несмы достойни воззрети на высоту небесную. Но ты буди нам помощник скорый и избавитель. Яко сам досаждаемь быв от врага, победив же сего добльственне, вразуми ны, да разумеем того коварства. Подаждь нам память смертную, слезы покаяния и надежду спасения: да не во отчаяние впадем, ниже дерзостным на милосердие Божие упованием, во гресех же пребыванием в конец себе погубим, но да будет нам память грехов наших во источник теплых слез и сокрушения сердечнаго, милосердие же Божие и благодать Его, молитвами твоими в спасение наше, ныне и присно и во веки веков. Аминь.