Тропарь святителя Петра
Наста днесь всечестный праздник/ пренесения честных мощей твоих, святителю Петре,/ веселя изрядно твое стадо,/ и верное отечество, и люди,/ о нихже не оскудевай, моляся Христу Богу,/ еже от Него дарованней ти пастве сохранитися от враг ненаветованней// и спастися душам нашим.
Тропарь святителям Московским
Первопрестольницы Российстии,/ истиннии хранителие апостольских преданий,/ столпи непоколебимии, православия наставницы,/ Петре, Алексие, Ионо, Филиппе и Ермогене,/ Владыку всех молите/ мир вселенней даровати// и душам нашим велию милость.
Тропарь святителя Петра
Яже прежде безплодная, земле,/ ныне веселися:/ се бо Христос светильника в тебе показа,/ яве сияюща в мире/ и исцелевающа недуги и болезни наша./ Сего ради ликуй и веселися со дерзновением:// святитель бо есть Вышняго сия соделоваяй.
Тропарь святителя Петра
Ликуй светло, благославнейший граде Москва,/ имеяй в себе архиерея Петра, яко зарю солнца,/ всю Россию чудодеянии озаряюща,/ той бо немощи врачует/ и недуги, яко тьму, прогонит от вопиющих ему:/ радуйся, иерарше Бога Вышняго,// тобою сия пастве твоей соделовающаго.
Кондак святителя Петра
Яко врача преизрядна и источника чудесем обильна,/ днесь сошедшеся любовию, духовная твоя чада,/ в пренесение честных мощей твоих,/ архиерею Петре, молим тя:/ моли Христа Бога даровати честным твоим пренесением/ верному воинству нашему на враги победительная,/ да твоими к Богу молитвами находящих зол избавльшеся,/ радостною душею и веселием сердца/ благодарная ти воспоем, глаголюще:// радуйся, отче Петре, архиереев и всея Российския земли удобрение.
Ин тропарь святителя Петра, митрополита Московского, всея России чудотворца
Благоверно пожив в мире,/ житием чистым просветився,/ учением святительства прият паству,/ апостолом наследниче./ Тем прием дар чудес от Бога, отче Петре,/ моли Христа Бога,/ да спасет души наша.
Ин кондак святителя Петра, митрополита Московского, всея России чудотворца
Явися днесь пресветлая память твоя,/ святителю преблаженне Петре,/ в мире светло сияющи/ и являющи всем/ Божественное сияние.
Кондак святителям Московским
Во святителех благочестно пожисте/ и люди к богоразумию настависте,/ и добре Богу угодисте,/ сего ради от Него нетлением/ и чудесы прославистеся,// яко ученицы Божия благодати.
Кондак святителя Петра
Взбранному и дивному нашея земли чудотворцу,/ днесь любовию тебе притекаем, песнь, богоносе, плетуще,/ яко имея дерзновение ко Господу,/ многообразных избави нас обстояний, да зовем ти:// радуйся, утверждение граду нашему.
Ин тропарь святителя Петра
Благоверно пожив в мире,/ житием чистым просветився,/ учением святительства приим паству,/ апостолом наследниче./ Тем прием дар чудес от Бога, отче Петре,/ моли Христа Бога/ да спасет души наша.
Ин кондак святителя Петра
Явися днесь пресветлая память твоя, святителю преблаженне Петре,/ в мире светло сияющи/ и являющи всем Божественное сияние.
Величание
Величаем вас,/ святителие Христовы,/ Петре, Алексие, Ионо, Филиппе и Ермогене,/ и чтим святую память вашу,/ вы бо молите за нас// Христа Бога нашего.
Тропарь мученицы Иулиании
Агница Твоя, Иисусе, Иулиания/ зовет велиим гласом:/ Тебе, Женише мой, люблю,/ и, Тебе ищущи, страдальчествую,/ и сраспинаюся, и спогребаюся крещению Твоему,/ и стражду Тебе ради,/ яко да царствую в Тебе,/ и умираю за Тя, да и живу с Тобою,/ но, яко жертву непорочную, приими мя, с любовию пожершуюся Тебе./ Тоя молитвами,/ яко милостив, спаси души наша.
Кондак мученицы Иулиании
Девства добротами преочищена, девице,/ и мучения венцы, Иулиание, ныне венчавшися,/ даеши сущим в нуждах и недузех исцеление и спасение,/ приступающим к раце твоей:/ Божественную бо благодать Христос источает и жизнь вечную.
Тропарь праведной Иулиании Новоторжской
Благочестно в законе поживши/ и благими делы украсившися,/ яко крепкий адамант, явися,/ целомудренная святая благоверная княгине Иулиание,/ тленную славу и добротство телесное презревши,/ злокозненнаго врага победила еси,/ целомудрия ради мученическую смерть прияла еси./ Сего ради от Христа Бога нетленным и вечным венцем венчавшися,/ ныне с лики мученик ликуеши/ и нам велия чудеса, приходящим ко гробу твоему,/ обильно источавши./ Темже ти вопием:/ молися Христу Богу о всех нас,/ верою и любовию страдания твоя почитающих.
Кондак праведной Иулиании Новоторжской
Воспоем днесь Благодетеля всех Бога,/ прославльшаго в России Иулианию Богомудрую,/ да молитвами ея подаст душам нашим/ грехов оставление и велию милость.
Тропарь блаженному Прокопию
Иже на земли Христа ради волею в буйство преложися,/ и мира сего красоты отнюд возненавиде,/ и плотская играния увядив постом и жаждою/ и на земли леганием,/ от зимы студению и мразом,/ и от зноя солнечнаго и дождя/ и прочил тяготы никогда же уклонися под кров,/ и на теле своем не имея одеяния,/ Божиею помощию покрываем,/ и душу очистил еси добродетельми своими, яко злато в горниле,/ Прокопие премудре,/ с верою творящим память твою честно/ и усердно притекающим к мощем твоим,/ прославляюще твое святое успение,/ Христу Богу молися, благоюроде,/ да избавит ны Господь от варварскаго нашествия и междоусобныя брани/ и мир мирови дарует/ и душам нашим велию милость.
Ин тропарь блаженному Прокопию
Велию любовь ко Господу в себе имея,/ все претрудное житие твое/ во граде Хлынове, юродствуя, провел еси, блаженне Прокопие,/ зной и мраз, глад и жажду благодушно терпя,/ биение и поношение от людий безбожных/ радостно принимал еси, подвижниче добропобедный,/ любовию же и добром велиим за зло воздавая,/ мнозем предрекал еси их ожидающее/ и от недугов исцелял еси, беззлобие,/ тем же, наслаждался ныне в сонме святых,/ моли Господа помиловати град и люди, тя почитающия.
Ин тропарь блаженному Прокопию
Ангельски живя на земли богоугодно,/ многия скорби и труды терпеливо неся,/ добродетельми и дарованиями от Бога украсився,/ предвещая грядущая и исцеляя болезни,/ безмолвно, непрестанно моляся,/ юродствуя, скрыв дарования своя,/ ныне наслаждался в селениих святых,/ святый блаженне Прокопие,/ моли Христа Бога спастися душам нашим.
Кондак блаженному Прокопию
Возбранному и дивному в праведницех мужу,/ волею во юродство претворившуся,/ мира сего красоты возненавидел еси,/ плотская мудрования увядил еси постом и жаждею,/ студению мраза, снега, и зноя, и дождя,/ и от прочил воздушныя тяготы никогда же уклонися/ и очистил еси себе, яко злато в горниле, Прокопие блаженне,/ всей Вятской земли похвала и утверждение.
Ин кондак блаженному Прокопию
Многою любовию к Богу пламенея,/ любви и смирению людей безмолвно учил еси,/ деянием будущая являя,/ недуги и болезни целил еси./ На путь спасения нас настави,/ от язв греховных исцели,/ Прокопие блаженне,/ о всех нас Христа Бога моли.