Тропари, кондаки и величания - 06 января 2025
Тропарь Рождеству Христову (Предпразднеству)
Готовися, Вифлееме, отверзися всем, Едеме, красуйся, Евфрафо, яко древо живота в вертепе процвете от Девы: рай бо Оноя чрево явися мысленный, в немже Божественный сад, от негоже ядше, живи будем, не якоже Адам умрем. Христос раждается прежде падший возставити образ.
Тропарь преподобномученицы Евгении Римской
Агница Твоя, Иисусе, Евгения/ зовет велиим гласом:/ Тебе, Женише мой, люблю,/ и, Тебе ищущи, страдальчествую,/ и сраспинаюся, и спогребаюся крещению Твоему,/ и стражду Тебе ради,/ яко да царствую в Тебе,/ и умираю за Тя, да и живу с Тобою,/ но, яко жертву непорочную, приими мя с любовию пожершуюся Тебе./ Той молитвами, яко милостив, спаси души наша.
Кондак преподобномученицы Евгении Римской
Благородия нравом тя честноподобне украсив обоживый Господь,/ в рабий образе от Девы нам соединися,/ Иже тя в лик дев свещеносиц вчини/ и с мученики сочета, Евгение,/ яко воистинну благородия Божественныя славы венец улучи.
Тропарь предпразднства Рождества Христова
Написовашеся иногда со старцем Иосифом,/ яко от семене Давидова,/ в Вифлееме Мариам,/ чревоносящи безсеменное Рождение./ Наста же время рождества,/ и место ни единоже бе обиталищу,/ но якоже красная палата/ вертеп Царице показашеся.// Христос раждается прежде падший воскресити образ.
Кондак предпразднства Рождества Христова
Дева днесь превечное Слово/ в вертепе грядет родити неизреченно:/ ликуй, вселенная, услышавши,/ прослави со Ангелы и пастырьми/ хотящаго явитися// Отроча Младо, Превечнаго Бога.