Акафисты - 11 января 2025
Кондак 1
Избранниче Божий, преподобне отче наш Феофиле, прием крест свой, последовал еси Христу, и деянием учил еси презирати плоть, преходит бо, прилежати же о души безсмертней. Темже со ангелы срадуется дух твой, и мы земнии тя по долгу ублажаем, поюще:
Радуйся, Феофиле, скорый наш помощниче и чудотворче.
Икос 1
Ангел земный и человек быв небесный, преподобне, всем житием твоим научаеши нас, яко надеющиися на Господа, яко гора Сион, не подвижется вовек. Той бо покрыет и в день напасти и спасет от неприязни, иже памятствующе, тако тя ублажаем:
Радуйся, изрядный сосуде благодати Божия.
Радуйся, Христа ради оставивый вся мира сего красная.
Радуйся, тесным и горким путем вшедый в вечный живот.
Радуйся, сего ради зело от Бога прославленный.
Радуйся, дивный в чудесех о нас молитвенниче.
Радуйся, скорый призывающым тя споспешниче.
Радуйся, Феофиле, скорый наш помощниче и чудотворче.
Кондак 2
Видение бе радостное, егда тя, младенца суща, принесоша родителие в храм Господень. Тамо бо иерей в купели крещения возроди тя о Христе, и священным мира помазанием дарова ти силы к животу и благочестию, да выну Богови, с искупленными честною Его Кровию, вопиеши: Аллилуиа.
Икос 2
Разуместа бо родителя твоя, преподобне, яко аще кто не родится водою и духом, не может внити в Царствие Небесное, его ради тщастася тя принести в храм Господень в немже последи приметатися выну возлюбил еси, слышай днесь от нас сицевыя хвалы:
Радуйся, горлице, измлада сети ловчи избегшая.
Радуйся, яко в купели крещения от древния клятвы омылся еси.
Радуйся, яко премудрости и разума приял еси в миропомазании.
Радуйся, яко утвердися в тебе дух совета и крепости.
Радуйся, яко измлада возлюбил еси благочестивое житие.
Радуйся, емуже благодатне укрепишася вся силы естества во спасение вечное.
Радуйся, Феофиле, скорый наш помощниче и чудотворче.
Кондак 3
Силою благодати Божией укрепляемь, возлюбил еси узкий путь, ведущий в вечный живот и возненавидел еси вводяй в пагубу. Егда чтению навыкл еси и словеси Христову: «Иже хощет по Мне ити, да отвержется себе и возмет крест свой и по Мне да идет»; познал еси, Тому невозвратно последовал еси, умиленно поя: Аллилуиа.
Икос 3
Имуще чада и сродники млады, учению вданныя, усердно просим тя, преподобне, призри на ня, и отверзи их ум ко приятию, разумению, памятствованию полезных учений и быти им в добродетельнем жительстве в радость и утешение родителем и Церкве Святей во утверждение, да радостно тако тя хвалим:
Радуйся, навыкнув чтению, прилежавый познанию полезнаго учения.
Радуйся, оттоле совершенне уразумевый потребная ко спасению.
Радуйся, почитанием Писания умудривый душу свою.
Радуйся, невидимый днесь спомощник учащихся отроков.
Радуйся, наставниче ищущым разумения божественнаго учения.
Радуйся, защитниче к тебе прибегающым с молитвою теплою.
Радуйся, Феофиле, скорый наш помощниче и чудотворче.
Кондак 4
Бури езера Ладожскаго не убоялся еси, егда бури житейския бежал еси, преподобне Феофиле. С радостию бо устремился еси, отнюдуже яко свещи во тме мерцающыя, светяху и звоном церковным воды оглашающя, зваху ищущих спасения обители Валаамская и Коневская, идеже иноцы немолчно Богови поют песнь ангельскую: Аллилуиа.
Икос 4
Слыша божественное пение и зря монахов множества во обители Коневстей, юже преподобный Арсений созда труды многими, к стопам обители игумена припал еси и смиренне молил еси, да приимет тя, яко единаго от наемник. Мы же зряще твое смирение, тако ти рцем:
Радуйся, яко свещу благочестия пред образом Пречистыя возжженную, узрев обитель Коневскую, возлюбил еси.
Радуйся, во ограду Арсениеву вшед, в мир возвратися не возжелевый.
Радуйся, возложь руку на рало, вспять не обративыйся.
Радуйся, вся тяготы искушения иноческаго пренесый добре.
Радуйся, всякое послушание приимавый со благодарением.
Радуйся, тако достойне предъуготовавый себе к приятию ангельскаго образа.
Радуйся, Феофиле, скорый наш помощниче и чудотворче.
Кондак 5
Боготечный апостол Павел, многи страны обтекий, благовествуя Евангелие, глаголаше верным: «Глаголю безбрачным и вдовицам, добро им есть, аще пребудут, яко же и аз, аще ли же ни, да посягают». Ты же, преподобне, девство паче брака честнаго возлюбил еси, и егда ангельскаго образа сподобился еси, благодарне воспел еси Богу: Аллилуиа.
Икос 5
Врача Небеснаго умолил еси, Преподобне! Сего ради вся иноческаго скорбнаго жития тяготы понесл еси мужественне, научая нас пети тя, яко иноком наставника, глаголюще:
Радуйся, со отъятием влас своея воли отрешивыйся.
Радуйся, смиренное послушание имевый ко настоятелю и братии.
Радуйся, в нищете скончавый дние свои.
Радуйся, постом источивый плоти страстная.
Радуйся, молитвою просветивый душу свою.
Радуйся, труды многими праздности губительныя бегавый.
Радуйся, Феофиле, скорый наш помощниче и чудотворче.
Кондак 6
Проповедниче смирения, преподобне отче наш Феофиле, егда во игумена Коневския обители избран был еси, чести сея аки бремене тяжкаго бегий, отшел еси в место блатно и тайно, идеже точию с Богом беседуя, сладце пел еси: Аллилуиа.
Икос 6
Возсия добродетель твоя, преподобне, из пустыни. Не может бо град, верху горы стояй, укрытися, тако и о тебе, преподобнем мужи, поскору уведаша вернии и начаху приходити к тебе, спасения ищуще душам и вопиюще ти тако:
Радуйся, пустыннаго жития рачителю.
Радуйся, в убозей хижине возсылавый ко Творцу молитвы теплыя.
Радуйся, теми аки пламенным мечем прогонявый демоны.
Радуйся, препобедивый тех многоразличная страхования.
Радуйся, яко зной и мраз со благодушием тамо преносил еси.
Радуйся, тако душу свою к вселению благодатных даров предъочистивый.
Радуйся, Феофиле, скорый наш помощниче и чудотворче.
Кондак 7
Хотяй спасения нашего, Господь апостолом своим Иаковом рече: «Яко иже аще обратит человека от пути нечестиваго, спасет душу его и покрыет множество грехов». Ты же, преподобне, сия памятуя с любовию приимал еси к тебе притекающих и с ними усердныя молитвы возносил еси, едиными усты и сердцем поюще Богови: Аллилуиа.
Икос 7
Купель Силоамская бысть многим немощным пустыня твоя, преподобне! Воистину бо сбыстся на тебе слово Господа, рекшаго о иже вся Его ради оставльших, яко той приимет сторицею еще же во время сие домов, и братий, и сестер, и отца, и матере, и чад, и сел, в век же грядущий живот вечный. Темже ти поем хвалы:
Радуйся, пустыню убогую житием своим просветивый.
Радуйся, безмолвием научай нас не осуждати ближняго.
Радуйся, нестяжанием своим обличаяй любоименныя.
Радуйся, целомудреннаго жительства показателю.
Радуйся, прилежания земледелию образ нам явивый в житии своем.
Радуйся, многия привлекий к себе добродетелей исполнением.
Радуйся, Феофиле, скорый наш помощниче и чудотворче.
Кондак 8
Странник в земной юдоли, преподобне, покров странником создал еси, егда обитель Омучскую соградил еси со учеником своим блаженным Иаковом, и храмом в честь Успения Пречистыя Владычицы украсил еси, ейже со умилением взывал еси: «К кому прибегну в горести моей, разве не к Тебе, Владычице», и славил еси Троицу Живоначальную, поя: Аллилуиа.
Икос 8
Вся в обители твоей устроив благообразно и по чину, наипаче прилежал еси, преподобне, молитве и жертвы безкровныя приношению. Иерей бо сый со умилением ю приносяй, о преставльшихся от сего временнаго жития тепле молился еси, стяжавая им вечное упокоение. Темже ти вопием:
Радуйся, чистый святейшаго таинства совершителю.
Радуйся, престола Господня умиленный предстоятелю.
Радуйся, о грешницех усердный ходатаю.
Радуйся, спасительнаго покаяния проповедниче.
Радуйся, молитвою умершым благодетелю.
Радуйся, днесь у Престола Горняго о нас прилежный молитвенниче.
Радуйся, Феофиле, скорый наш помощниче и чудотворче.
Кондак 9
Вседушне поработав Богови, преподобне, старости маститыя достигл еси и притекл еси к часу смертному, аки солнце к захождению. С умилением кончину провидяй, вручил еси обитель возлюбленному ученику твоему Иакову, и в добрем исповедании предал душу свою еси в руце Божии, с песнию: Аллилуиа.
Икос 9
Витийствующии уста твоя умолкоша, сокрыстася кротцеи очи твои, руце, постом умаленнеи и ссохшиися, согбенне на персех опочиста, и безгласна быша уста мудрая, глава же, сединами украшенная, преклонися долу. Земля лик твой умиленный сокры, но слава добродетелей не умре, преподобне, и мы, чтущии память твою, радостно вопием:
Радуйся, рабе, вшедый в радость Господа твоего.
Радуйся, нищетою духовною обретый богатство неиждиваемое.
Радуйся, жаждавый правды, зряй днесь правду вечную.
Радуйся, кротостию стяжавый землю святых.
Радуйся, за скорби жития временнаго зело днесь утешенный.
Радуйся, собеседниче преподобных Сергиа, Германа и Арсениа.
Радуйся, Феофиле, скорый наш помощниче и чудотворче.
Кондак 10
Спасению верных многое сотвориша вспоможение преподобнии наши отцы, имже и ты, отче Феофиле, сподвижник был еси. Учаху бо вся добродетельному житию смирением, скорби безропотно терпяще, потребных лишения во благодушии преносяще, имеяху же к ближним велию любовь и места непроходимая населяюще, оглашаху безмолвия пустыни деннонощною Богови песнию: Аллилуиа.
Икос 10
Стена спасительная от мрака неверия языческаго и нечестия, бысть в древняя времена обитель твоя в сем концы земли, преподобне, учащая люди боголюбезному жительству. Аще и не пребысть до дне сего, обаче память исправлений твоих не померче и научает спасению нас, тебе ублажающих:
Радуйся, присный наш во благочестии наставниче.
Радуйся, неусыпный зде обитающих охранителю.
Радуйся, низводяй благословение Божие на зде смиренне трудящихся.
Радуйся, яко сердцем смиренным тя призывающих от напасти покрываеши.
Радуйся, яко изобилие плодов земных земледельцем даруеши.
Радуйся, Феофиле, скорый наш помощниче и чудотворче.
Кондак 11
Пение и звон не умолче на сем месте, идеже потрудился еси, преподобне, аще и преста зде иноческое житие. Благословенный бо государь Александр Первый, емуже дивное от недуга даровал еси исцеление, храм чуден созда, да памятуем, православнии, яко многое имаши дерзновение у Престола Христова, поя со ангелы: Аллилуиа.
Икос 11
Светоприемная свеща благодати Божией явися гроб твой, преподобне отче Феофиле, иже различная источает чудотворения и недугов врачует множество, егда с верою и любовию к тебе прибегаем вернии, радостне тебе поюще:
Радуйся, егоже память с похвалами.
Радуйся, яко гроб твой источник исцелений явися.
Радуйся, егоже кости яко пророка Елиссеа чудотворят.
Радуйся, яко житием благим очистил еси плоти твоея немощная.
Радуйся, яко изобильно вселися благодать в тя сосуд избранный.
Радуйся, втораго пришествия Христова проповедниче.
Радуйся, Феофиле, скорый наш помощниче и чудотворче.
Кондак 12
Благодати великия носителя и будущаго всех воскресения уверителя яви тя, преподобне отче Феофиле, Владыка Христос. Гроб бо твой, чудесы источаяй, яве вещает, яко приидет час и вси сущии во гробех услышат глас Сына Божия, и оживут, и изыдут грешнии в муку вечную, праведницы же в жизнь вечную с песнию: Аллилуиа.
Икос 12
Поем твоя милости и чудеса, преподобне отче наш Феофиле, выну бо и по отшествии твоем нас не оставляеши, всем бо потребная во спасение скоро подаеши и болезни наша и скорби дивне незримо врачуеши, да с радостию ти вопием:
Радуйся, незримый и скорый наш покровителю/
Радуйся, ходатаю о нас теплый.
Радуйся, недугов душевных и телесных безмездный врачу.
Радуйся, злых духов прогонителю.
Радуйся, скорбящих умиротворение.
Радуйся, на небесех о нас неусыпный молитвенниче.
Радуйся, Феофиле, скорый наш помощниче и чудотворче.
Кондак 13
О преподобне и богоносне отче наш Феофиле! Приими сие малое приносимое ти хваление. Яко имеяй велие к Господеви дерзновение, молися Господу Иисусу, да избавит нас от всяких бед и скорбей, враг видимых же и невидимых, нечаянныя смерти и вечныя муки, и сподобит с тобою и всеми святыми во веки нескончанную пети Ему со безплотными песнь великую в вышних песнословимую: Аллилуиа.
Этот кондак читается трижды, затем икос 1-й и кондак 1-й
Молитва преподобному Феофилу, игумену Омучскому, Лужскому чудотворцу
О преподобне и богоносне отче наш Феофиле! По днех многоскорбныя и многотрудныя жизни, преселился еси в небесная селения и днесь радостей неизреченных причащаешися. Но аще и духом от нас отшел еси, обаче не забыл еси нас, верно чтущих память твою. И скорое к тебе притекающым твориши вспоможение. Сего ради усердно молим тя: предстоя Престолу Вседержителеву, молися, преподобне, да помилует нас Господь, не по беззаконием воздаст нам, но по неизреченной Его милости, страждущую страну Российскую от лютых безбожник и власти их Господь да свободит, и да возставит престол православных правителей; верных рабов Его, в скорби и печали день и нощь вопиющих к Нему, многоболезный вопль да услышит и да изведет от погибели живот наш; помянет предстоящыя люди, и ради благословных вин оставльшихся, и помилует их и нас по множеству милости Своея, сокровища их исполнит всякаго блага; супружества их в мире и единомыслии соблюдет, младенцы воспитает, юность наставит, старость поддержит, малодушныя утешит, расточенныя соберет, прельщенныя обратит, и совокупит святей Своей соборней и апостольстей Церкви, стужаемыя от духов нечистых свободит, плавающым сплавает, путешествующым сшествует, вдовицам предстанет, сирых защитит, плененныя избавит, недугующыя исцелит, на судищи, и в рудах, и в заточениих, в горких работах, и всякия скорби, и нужде и обстоянии сущих. Помянет же и всех, требующих великаго Его благоутробия, и любящих нас, и ненавидящих, и заповедавших нам недостойным молитися о них, и вся люди Своя помянет Господь Бог наш, и на вся излиет богатую Свою милость, всем подаст, яже ко спасению прошения. Сам да помянет Сердцеведец коегождо возраст и именование, ведый коегождо от утробы матере его: Господь бо есть Помощь безпомощным, Надежда безнадежным, обуреваемым Спаситель, плавающым Пристанище, недугующым Врачь, Сам всем Вся будет, ведый коегождо и прошение его, дом и потребу его. Избавит же храм сей, и всякий град и страну от глада, губительства, труса, потопа, огня, меча, нашествия иноплеменных и междоусобныя брани и вся управит в Своя горняя селения, идеже выну славится Пречестное и Великолепое имя Отца и Сына и Святаго Духа. Аминь.
Для келейного чтения
Кондак 1
Избрал еси, Господи, угодника Твоего Василиска, / из млада сердце чисто созиждя в нем, / и, дары духовными изрядно его украсив, / явил еси земли Сибирстей подвижника дивнаго, / иже, пустыни тяжкая волею претерпевая, / молитвы чистыя благодать воистинну стяжа, / темже подвигни и нас, Христе Боже, горняя помышляти, / предстательством блаженнаго отца нашего, да поем тому: / Радуйся, преподобне отче Василисче, умнаго безмолвия велий рачителю.
Икос 1
Ангелов крилами к Богу воспаряющих, образы святыя издетска с любовию зрел еси, отче Василисче, темже, возрастом еще младенствуя, к Вышнему вознестися помыслил еси, во еже телесныма очима славу Божию видети, отонудуже крилы духовныя Господь тебе дарова, имиже в Небесныя обители воистинну вознеслся еси. Мы же, сим поучаеми, приносим ти таковая:
Радуйся, издетска в служение Богу избранный;
радуйся, светом божественнаго разума осиянный.
Радуйся, от млада познавый нищету телесную;
радуйся, воистинну стяжавый нищету духовную.
Радуйся, кротостию и незлобием ангелом подобниче;
радуйся, истиннаго смирения верным наставниче.
Радуйся, монахом и мирским красоту восхождения явивый;
радуйся, богоугодными делы страну Сибирскую просветивый.
Радуйся, преподобне отче Василисче, умнаго безмолвия велий рачителю.
Кондак 2
Видя желание твое, токмо единому Богови работати, и нрав послушливый, Господь Всеведец умягчи жены твоея сердце, юже родитель твой избра тебе, и тако три леты воздержанием себе испытующа, супружества соуз согласно расторгли еста; ты же, отче, душу твою Христу уневестив, радостне воспел еси Богу: Аллилуия.
Икос 2
Разумея волю Божию и закону Христову кротко повинуяся, блаженне, тяготы брата твоего, подвижника тайнаго, с любовию понесл еси, в немощах его служа ему усердно; наипаче же вкупе в молитвах прилежаща, вашим изрядным в Боге радением многия нерадивыя к исправлению призвали еста. Мы же, братолюбие христианское твое зряще, сице тебе взываем:
Радуйся, Бога паче всего земнаго возлюбивый;
радуйся, Того Единаго в животе твоем взыскавый.
Радуйся, яко любовь божественную мирстей любви предпочел еси;
радуйся, яко житейскую радость на тяготы пустынныя пременил еси.
Радуйся, образе смиренномудрия и послушания;
радуйся, правило постническаго воздержания.
Радуйся, помысла чистотою просиявый;
радуйся, яко Мария, благую часть избравый.
Радуйся, преподобне отче Василисче, умнаго безмолвия велий рачителю.
Кондак 3
Силою любве ко Господу мира красная отвергл еси, отче Василисче, отшельническое житие избрав, идеже ревностно подвизаяся, к вящшему постничеству приступил еси, и тако тело твое поклоны и бдении зело утруждая, страсти плотския воздержанием крайним уставил еси, вопия в смирении Богу: Аллилуия.
Икос 3
Имущу велие стремление богоугодно жити, Подвигоположник Господь показа тебе ума самочиннаго пагубу, и в леса брянския стопы твоя направи, идеже старцу пустынному Адриану в послушание себе вдал еси, отче, и, яко лоза благораслена, в трудех пустынных зело преспев, иноческим одеянием достойно украсился еси. Мы же взываем ти тако:
Радуйся, в пустыню, яко в цветник, с радостию вшедый;
радуйся, подвиги твоими, яко крин сельный, процветый.
Радуйся, нестяжанием зело обогативыйся;
радуйся, воздержанием крепким украсивыйся.
Радуйся, обет пустынничества при постриге твоем давый;
радуйся, егоже в подвизе добром до конца исполнивый.
Радуйся, псалмы и молитвы Господу присно возлиявый;
радуйся, поклоны земными от сна себе воставлявый.
Радуйся, преподобне отче Василисче, умнаго безмолвия велий рачителю.
Кондак 4
Буря искушений и бесов наветы обступиша тя, хотяще унынием душу твою поборити, ты же, отче Василисче, болезньми воздержания силу вражию посрамил еси, на камени смирения терпением велием веру твою утвердив, и тако немощь естества о Господе укреплял еси, денно и нощно возывая к Тому: Аллилуия.
Икос 4
Слышавше людие о твоем, отче Василисче, благочестном житии пустынном, стекахуся к тебе, желающе с тобою купно жительствовати и во спасении тобою наставлятися, ты же, святе, смирения истиннаго исполненный, невежду себе пред всеми почел еси, во еже в безмолвии един с Единым всегда пребывати. Мы же, богомудре, глаголем тебе тако:
Радуйся, сердце твое мирови затворивый;
радуйся, воле Божией всего себе покоривый.
Радуйся, благоуветия и благочестия смиренный учителю;
радуйся, словесным и безсловесным кроткий благодетелю.
Радуйся, с усердием на врага спасения противоставый;
радуйся, постом и молитвою демоны отгнавый.
Радуйся, духа нищету паче славы человеческия возлюбивый;
радуйся, не в многословии твоем глубину мудрости показавый.
Радуйся, преподобне отче Василисче, умнаго безмолвия велий рачителю.
Кондак 5
Боготочный источник духовныя благодати зря в тебе юный Зосима, тепле моляше тя, да ученик тебе прилежен будет, ты же, отче, духовными очами промысл Божий в сем прозрев, яко друга искренняго любовию того приял еси; темже словесы и делы на путь иночества тобою наставляемый Зосима радостне воспе Богу: Аллилуия.
Икос 5
Видя помышление духовника твоего, хотяща во обитель Коневскую тебе, отче, преселити, тепле моля просил еси того, да в отшельстве своем недвижимо пребудеши; обаче послушания ради, яко воли Божией повинуяся, с Зосимою вкупе, егоже возлюби душа твоя, за старцем своим последовал еси. Мы же, кротость твою ублажающе, взываем ти сице:
Радуйся, Авраамле послушание познавый;
радуйся, Иовлю терпению поревновавый.
Радуйся, иноче, в смирении и кротости совершенный;
радуйся, в безстрастия ризу оболченный.
Радуйся, скудною пищею тело твое изнуривый;
радуйся, хлебом Живота вечнаго душу твою насытивый.
Радуйся, простоты жития монашескаго наставниче;
радуйся, чистоты души христианския хранителю.
Радуйся, преподобне отче Василисче, умнаго безмолвия велий рачителю.
Кондак 6
Проповедуемым словесем Христовым, яко кроток есмь и смирен сердцем, воистинну поучился еси, труженниче пустынный, темже и Господь тя зело утеши, благоволив чрез Зосиму открыти ти сокровище молитвы сердечныя учения; ты же, преподобне Василисче, благодарен сый воспел еси Богу о сем: Аллилуия.
Икос 6
Возсиял еси на острови Коневстем высотою жития твоего, отче досточудне, идеже в молитвы делании вельми возрастая, ум твой священным безмолвием просветил еси, и сладость молитвенную о имени Иисусове, рекою из сердца обильно изливаему, вкусил еси, богоблаженне. Мы же, толикое дарование в тебе зряще, смиренно взываем ти:
Радуйся, словес евангельских послушателю благодатный;
радуйся, ига Христова благаго носителю благодарный.
Радуйся, добродетель благую, трезвение, стяжавый;
радуйся, ума хранением сердце твое очистивый.
Радуйся, благодати Божией хранилище преисполненное;
радуйся, Духа Святаго жилище достойное.
Радуйся, высоты Христова разумения достигнувый;
радуйся, ум твой с сердцем в молитве срастворивый.
Радуйся, преподобне отче Василисче, умнаго безмолвия велий рачителю.
Кондак 7
Хотя, преподобне, в Бозе Единем всегда пребывати, ум твой памятованием Христовым от всякия страсти очистил еси, и Духа Святаго благодатию молитву самодвижиму в сердце твоем стяжал еси, темже непрестанно Господеви в любви предстоя, в умилении чистом вопиял еси Ему: Аллилуия.
Икос 7
Новую лествицу восхождения чтим тя, богомудре, ты бо любве ради благоволил еси, молитвенных твоих деяний рукописание, егоже сподвижник твой и сотаинник Зосима прилежный списатель бысть, по преставлении твоем на полезное мирови явити. Мы же, отче Василисче, молитвенно светильник сей приемлюще, в спасительной ревности взываем ти:
Радуйся, Христа Бога в сердце твоем вместивый;
радуйся, имя Его спасительное в уме всегда носивый.
Радуйся, молитвенную сладость сердцем твоим познавый;
радуйся, слез благодатных поток умилительный источивый.
Радуйся, к Богу пламеневый любовию великою;
радуйся, яко действом ея сердце твое взыграся.
Радуйся, молитвы чистыя священнодейства стяжателю;
радуйся, сокровенных Божиих предивный тайнозрителю.
Радуйся, преподобне отче Василисче, умнаго безмолвия велий рачителю.
Кондак 8
Странен быв всякия славы человеческия, единыя славы Божия иский, блаженне, в пустыню внутреннюю с Зосимою верным удалитися возжелал еси, Василисче, темже, старцем твоим благословенный, предел Сибирских достигл еси, идеже лишения многа претерпевая, Богу в надежде воспевал еси: Аллилуия.
Икос 8
Все упование возложив на промысл Божий и к Пречистей в молитвах всегда прибегая, пустынниче святый, яко птица небесная попечением малым о телесе твоем тщался еси, паче же воздержанием многим дух твой укрепив, красоту исправлений твоих верным уяснил еси, темже приими от нас сицевая:
Радуйся, узок путь во Царствие небесное избравый;
радуйся, пустынничества крест волею подъявый.
Радуйся, страны мразныя не убоявыйся;
радуйся, ветра хладнаго не устрашивыйся.
Радуйся, скорби и болезни мужественно понесый;
радуйся, Заступницею усердною всегда хранимый.
Радуйся, молитвы храм в сердце твоем воздвигнувый;
радуйся, труд, терпение и усердие в основание того положивый.
Радуйся, преподобне отче Василисче, умнаго безмолвия велий рачителю.
Кондак 9
Всего себе Господу освятив, отче Василисче, в болезнях жестоких Христу сраспялся еси воистинну, и в пустыни, яко во гробе, Тому спогреблся еси, блаженне, и Того ради многая злострадания претерпел еси, но любве Божия никако же отпал еси, присно поя Ему: Аллилуия.
Икос 9
Витии многоречивии умолкают, зряще твоего, отче Василисче, жития безмолвнаго подвиг, ибо яко пламя прилежит свещи, тако ты, блаженне, умом и сердцем твоим воистинну Христу в молитве срастворился еси. Мы же, таковое действо в тебе зряще, любовию взываем ти:
Радуйся, Богу в любви непрестанно предстоявый;
радуйся, благодать Богообщения стяжавый.
Радуйся, великих дарований небесных приятелю;
радуйся, духов поднебесных велий устрашителю.
Радуйся, на высоту добродетелей восшедый;
радуйся, Царствие Божие внутрь себе имый.
Радуйся, Владыки вышняго верный служителю;
радуйся, истинныя радости о Боге благий стяжателю.
Радуйся, преподобне отче Василисче, умнаго безмолвия велий рачителю.
Кондак 10
Спасения ради души твоея, отче Василисче, многая лета в пустыне неисходно подвизался еси, и тамо старости честныя достигнув, высоту добродетели стяжал еси, темже Господь на ину стезю направи тя, во еже ближних спасению послужити, отонудуже малую братию собрав, воспел еси Богу: Аллилуия.
Икос 10
Стена крепкая в молитве братии пустынней был еси, святый Василисче, духом сокрушенным, яко мечем, научал еси тех коварства вражии посекати, и нас ныне от сна лености житием твоим богозарным пробуждая, явился еси утешения духовнаго податель. Мы же, подвиги твоя ублажающе, воспеваем тя сице:
Радуйся, в горении духа ангелом уподобивыйся;
радуйся, в доброделании душею обновивыйся.
Радуйся, чистою молитвою изрядно благоукрашенный;
радуйся, во брани невидемей воине совершенный.
Радуйся, правды Божией всегда алкавый;
радуйся, рая сладости еще на земли вкусивый.
Радуйся, блаженнаго смирения доброту стяжавый;
радуйся, Иерусалим небесный воистинну наследивый.
Радуйся, преподобне отче Василисче, умнаго безмолвия велий рачителю.
Кондак 11
Пение умиленное тебе приносим, блаженне отче, и успению твоему с трепетом внимаем, ибо всельшагося в тя Святаго Духа действо благодатию обильно сердце твое напита, якоже и по изшествии души твоея ко Господу молитвы чистыя двизанием сердце твое исполненно бе. Мы же, сему дивящеся, вопием Богу о тебе: Аллилуия.
Икос 11
Светом божественным просвещенный, отче Василисче, внутренняго делания высоты молитвы непрестанныя достигл еси, отонудуже умными очами сердечными Свет присносущный воистинну сподобился еси зрети, имже вельми озаренный сам световиден верным показался еси, темже приими от нас таковая:
Радуйся, главо, о Господе присно любомудрствующая;
радуйся, заре, от нощи к Богу утреннюющая.
Радуйся, яко руце твоя в молитве многажды простирал еси;
радуйся, яко нозе твоя во бдениих зело претрудил еси.
Радуйся, заповеди Евангельския до конца совершивый;
радуйся, обетования Евангельския вправду восприемый.
Радуйся, яко житием твоим ко благочестию нас пробуждаеши;
радуйся, яко деянии твоими на путь спасения нас наставляеши.
Радуйся, преподобне отче Василисче, умнаго безмолвия велий рачителю.
Кондак 12
Блажен воистинну еси, отче Василисче, ибо в клеть сердца твоего вшед, собеседник любезен Господеви был еси, и яко Серафими любовию к Нему горел еси, и якоже Херувими всегда умно Его зрел еси; ныне же в нескончаемой радости пребывая, и нас научаеши славословити Бога: Аллилуия.
Икос 12
Поюще честную память твою, отче Василисче, благодарная приносим ти, и молитв благоухание от мощей твоих приемлюще, веселия духовнаго исполняемся, и твоя, пустыннолюбче, труды и болезни, Христа ради подъятыя, ублажающе, достойно величаем тя словесы таковыми:
Радуйся, звездо, спасения путь ко вратом небесным нам указующая;
радуйся, сокровищнице, пребезценный камень, Христа, в себе имущая.
Радуйся, кладезю, духовною влагою обильно нас напаяяй;
радуйся, столпе, несокрушимую силу молитвы во брани являяй.
Радуйся, стамно, чудесы доныне богатно преизливаемая;
радуйся, реко, деянии твоими души верных орошающая.
Радуйся, в скорбех пребывающим скорый и благий поспешниче;
радуйся, тебе чтущих теплый и верный к Богу молитвенниче.
Радуйся, преподобне отче Василисче, умнаго безмолвия велий рачителю.
Кондак 13
О, пустынниче дивный, преподобне отче Василисче, к тебе в смирении припадаем, яко стяжавшему велию Духа Святаго благодать: призри с высоты райския на нас, дольними обуреваемых, и подаждь душам нашим молитвами твоими возрастание духовное, во еже чистым умом и сердцем достойно пети Христу Богу нашему: Аллилуия, аллилуия, аллилуия.
Сей кондак чтется трижды, затем Икос 1 и Кондак 1.
Молитва
О, преподобне и богоблаженне отче наш Василисче, безмолвия доблий рачителю и пустынножителю ревностный, умнаго делания смиренный наставниче и послушания предивный образе! Ты мира сладости бегая, пустыни непроходныя достигл еси, в нейже многая лета, богомыслием озаряем, в трудех пустынных подвизался еси, смиренномудрия глубину ископав; сего ради, яко сокровище пребогатое, сердечныя молитвы сладость утешительную Господь тебе дарова, еяже действием великих дарований исполнился еси. Темже молим тя, отче Василисче, воззри на ны, унылыя и немощныя, и возгрей в сердцах наших истинную ревность о Христе Иисусе Господе нашем, Иже есть един источник спасения нашего. Буди нам поспешник к высоты духовныя восхождению: ум наш в трезвении бодренном укрепи и дух сокрушен в сердца наша вкорени; наипаче вразуми, научи и усердие неослабное в молитве непрестанней подаждь нам, во еже освятити уста, умы и сердца Христу Богу нашему, Егоже именем отбежит от нас всякая неправда и уныние, диавольским действом составляемыя, и да просветятся души наша светом любве Божественныя ко исправлению жития нашего, да не погибнем в огне аки плевелы, но, яко пшеницу чистую, соберет ны Господь в житницу Свою небесную, идеже вси любящии Его в радости нескончаемей пребывают, славяще Отца, и Сына, и Святаго Духа, во веки веков. Аминь.
Кондак 1
Избранный угодниче Божий, преподобне отче Лаврентие, приемый благословение от Божия Матери и пришедый во святый град Чернигов, еже вселитися в обитель Пресвятыя Троицы, идеже изыде на тя Дух Святый: изгнание претерпевый и множество словесных овец себе собравый, пищею слова Божия их напитавый и ко Христу приведый: яко имея дерзновение ко Святей Троице, не преставай моляся избавити нас от всяких бед и скорбей, да со умилением зовем ти: Радуйся, преподобне отче наш Лаврентие, скорый помощниче и молитвенниче к тебе притекающих.
Икос 1
Ангела дивна стране Черниговстей яви тя Господь, всея твари Содетель, яко показа Духа Святаго в тя всельшагося, даром прозрения и исцеления обогати тя. Мы же, зряще тя, сосуде избранный Пресвятыя Богородицы, благодаряще Бога, прославляем тя, яко светильника и молитвенника нашего, и прилежно зовем ти сицевая: Радуйся, пречудный избранниче Божия Матере; Радуйся, сосуде благодати преизрядный. Радуйся, преподобных и святителей похвало и собеседниче. Радуйся, преподобному старцу Серафиму поревновавый. Радуйся, и по смерти с преподобными вселивыйся. Радуйся, яко тобою помыслы нечистыя обличаются. Радуйся, яко дела благая и полезная тобою благословляются. Радуйся, преподобне отче наш Лаврентие, скорый помощниче и молитвенниче к тебе притекающих.
Кондак 2
Видяще исполнение божественнаго о людех смотрения Отца Небеснаго, избравшаго от народа мужей праведных ко спасительному служению, ради нашего поддержания духовнаго, и Божественным даром прозрения тя наградившаго, вопием Богу в Троице: Аллилуиа.
Икос 2
Разум Божественный вразуми тя, отче Лаврентие, егда отреклся еси от жизни временныя и притекл к жизни вечней, от юности Христа прославляя всем сердцем твоим и Тому Единому паче всех работая; притекл еси в Рыхловский монастырь, тамо подвизаяся в пении и чтении. Мы же, видяще в тебе сосуд Духа Святаго, со умилением зовем ти сице: Радуйся, яко от юности пламенне житие монашеское возлюбил еси; Радуйся, яко от мира сего отреклся еси. Радуйся, старость матери упокоивый; Радуйся, по смерти тоя в обители Святителя Николая вселивыйся. Радуйся, яко в менших братии тамо послуживый. Радуйся, яко в пении Бога в Троице прославивый. Радуйся, яко тем Пресвятей Богородице угодивый. Радуйся, разумом Божественным людей удививый. Радуйся, преподобне отче наш Лаврентие, скорый помощниче и молитвенниче к тебе притекающих.
Кондак 3
Егда услыша о тебе, отче Лаврентие, архиепископ Антоний, повеле прибыти во град Чернигов, в монастырь Пресвятыя Троицы; ты же, внемля его прошению, усилил молитвы. Тогда Сама Царица Небесная благослови тя. Мы же грешнии, дивящеся сему чудеси, зовем ко Господу: Аллилуиа.
Икос 3
Пришел еси во святую обитель Пресвятыя Троицы и, узрев образ Богоматери Троице-Ильинския, поклонился ему, яко уведе в нем Явльшуюся тебе и Повелевшую идти в дом Ея Сына и тамо прославити Его. Тогда преклонився пред Нею, просил еси у Нея благословения и покрова. Мы же, видяще твое предание воле Божией, вопием таковая: Радуйся, яко послушание велие Божией Матери явил еси; Радуйся, яко избра тя служити Ей во граде Чернигове. Радуйся, дивным пением Ея прославивый; Радуйся, всего себе руководству Тоя предавый. Радуйся, и до конца жизни твоей Ей добре послуживый; Радуйся, в чистоте девство твое сохранивый; Радуйся, сердцем и устами Ея прославивый; Радуйся, образ смирения нам оставивый. Радуйся, преподобне отче наш Лаврентие, скорый помощниче и молитвенниче к тебе притекающих.
Кондак 4
Звезда лучезарная, озарившая путь тебе, приведе тя во святый град Иерусалим, да поклонишися Гробу Господню и прославиши Бога, терпевшаго страдания за грехи наша, поюще Ему: Аллилуиа.
Икос 4
Видя благодать и дар Святаго Духа в тебе, возлюбиша тя братия святыя обители Черниговския и избраша яко искуснаго руководителя и жизнию Богу угождающа. Мы же, благодаряще тя, вопием тебе: Радуйся, Роману сладкопевцу уподобивыйся. Радуйся, яко с ним в Сионе Горнем песнь Богу воспеваеши. Радуйся, Царя Славы прославивый; Радуйся, на путь спасения нас наставивый. Радуйся, яко со Ангелы славу Его воспеваеши; Радуйся, пением своим небо и землю соединивый. Радуйся, всех достойно Бога славящих в бедах не оставляеши; Радуйся, яко за них пред Господем и Богородицею ходатайствуеши. Радуйся, преподобне отче наш Лаврентие, скорый помощниче и молитвенниче к тебе притекающих.
Кондак 5
Время наста, егда попрана бысть святыня, ты же яко пастырь добрый, душу свою за овцы положити готовый, не оставил еси града Чернигова и обители Троице-Ильинския, но молитвами святых, под покровом Божией Матери в горах Болдиных вселился еси, да тамо хвалебную песнь воспеваеши Богу в Троице единому славимому: Аллилуиа.
Икос 5
Прииде час и сбудется реченное тобою: обновися Дом Святыя Троицы, в нем же собрашася вся чада твоя духовная. Ты же в дом Духа Святаго вшел еси, боголепно его украсив, и мудро стадом словесных овец до кончины твоея руководил еси, имя Божие призывати в радостех и печалех всех поучая, и многим святым в трудех твоих поревновал еси. Возвращение мощей Святителя Феодосия провидев, место славно ему уготовил. Мы же, хваляще Бога, давшаго тебе дух прозрения и разум мудрый, воспеваем песнь таковую: Радуйся, уставов церковных строгий блюстителю. Радуйся, обители многоопытный руководителю; Радуйся, рачителю благолепия церковнаго; Радуйся, Православия столпе непоколебимый. Радуйся, яко мощи блаженнаго Филарета нетленными почитал еси; Радуйся, пришествие Святителя Феодосия песньми прославивый. Радуйся, пред взором нашим седмь небес начертавый; Радуйся, яко и по смерти на небесах в райских обителех вселивыйся. Радуйся, преподобне отче наш Лаврентие, скорый помощниче и молитвенниче к тебе притекающих.
Кондак 6
Бурю многих бед и скорбей житейских претерпевая, помогал еси всем к тебе приходящим; тако и по смерти не оставил еси нас грешных, заповедав нам призывати тя в скорбех и печалех. Уповая на молитвенную помощь твою пред Господем, вопием Ему: Аллилуиа.
Икос 6
Провидев кончину свою скорую, отче Лаврентие, предрекл еси ю трикратно. Мы же молим тя, да не оставиши нас грешных по отшествии своем, но с нами пребудеши во вся дни, во еже с радостию ублажати тя: Радуйся, кончину свою предуведевый; Радуйся, о ней же многим возвестивый. Радуйся, яко вечныя жизни сподобивыйся. Радуйся, безболезненным исходом душу свою Богу предавый. Радуйся, яко и бесы в той час вострепеташа; Радуйся, сладость небесную на земли вкусивый. Радуйся, яко на небеси тою наслаждаешися; Радуйся, яко мощи твоя нетленныя нам оставил еси. Радуйся, преподобне отче наш Лаврентие, скорый помощниче и молитвенниче к тебе притекающих.
Кондак 7
Пение и рыдание надгробное чада твоя духовная приношаху ти у гроба, отче Лаврентие, егда преставился еси ко Господу душею: нас же не оставил еси телом нетленным, праведнии бо и по смерти живы будут, поя Богу: Аллилуиа.
Икос 7
Четыредесят дний не смолкаше рыдание и пение у гроба твоего, блаженне Лаврентие; ты бо четыредесят дний ожидал еси, егда чада твоя уготовят ти место погребения. Пребывая с нами телом во храме, душею же молился еси за ны грешныя пред Господом. Сим пребыванием чудо велие явил еси: нетленныя бо мощи твоя, благовония исполненнии, показуют святость твою. Дивящеся сему чудеси, восхваляем тя тако: Радуйся, благодать Божию стяжавый; Радуйся, лозо винограда Христова. Радуйся, четыредесятидневным стоянием телесе твоего нас утешивый; Радуйся, яко множество чудес сотворивый. Радуйся, благоуханием от гроба твоего всю обитель наполнивый; Радуйся, яко по окончании четыредесяти дний тело твое с честию в гробницу положися. Радуйся, яко и до ныне нетленно Богом сохранися; Радуйся, яко и по смерти нас не оставивый. Радуйся, преподобне отче наш Лаврентие, скорый помощниче и молитвенниче к тебе притекающих.
Кондак 8
Проповедником истины Христовой явился еси, отче Лаврентие: непрестанным служением Богу и ближним пророком древним уподобился еси. Службы Божия в храме совершая, в молитве келейной неустанно подвизался еси. Тем же и по преставлении твоем хвалебную песнь о тебе воспеваем Богу: Аллилуиа.
Икос 8
Просвети землю Российскую лучезарным светом велиим преподобный Серафим Саровский чудотворец. По нем лучи трисолнечнаго сияния изыдоша от праведнаго Иоанна, чудотворца Кронштадтскаго. Ты же, святе Лаврентие, новый светильник по сих явился еси, просвещая и утверждая всех в вере непоколебимей. Сего ради ти яко светильнику земли Черниговския возглашаем тако: Радуйся, преподобне Лаврентие, миру новый светильниче; Радуйся, пред Богом наш новый молитвенниче. Радуйся, сосуде златый, от чрева матери Богом избранный; Радуйся, и Богородицею прославленный. Радуйся, служителю Христов преизрядный; Радуйся, яко во иереех Тому послуживый. Радуйся, яко о имени твоем бесы падоша; Радуйся, яко имя твое Ангелы на небеси прославиша. Радуйся, преподобне отче наш Лаврентие, скорый помощниче и молитвенниче к тебе притекающих.
Кондак 9
Всякое слово и плоть довлеют к похвале твоей, отче Лаврентие: ты бо движимый Духом Святым, от юности и до конца дний твоих славил еси имя Всесвятаго Творца неба и земли, Его Пречистую Матерь и всех святых. И по смерти с ними водворился еси в райских чертозех, да и тамо со всеми святыми воспеваеши Богу хвалебную песнь: Аллилуиа.
Икос 9
Витию богоугодна в тебе показа Господь, яко многа чада духовныя к тебе идоша. Вернии же Богу да возвеселятся с тобою во второе пришествие Спасителя. Мы же с кротостию и смирением приемлем наставления твоя и, подражая твоему человеколюбию, с любовию воспеваем тебе: Радуйся, гусли духа сладкозвучныя; Радуйся, кимвале восклицания. Радуйся, цевннце боговещанная; Радуйся, Ангелов собеседниче. Радуйся, о Бозе живе наше подражание; Радуйся, яко наставления твоя с радостию приемлем. Радуйся, яко теми муки вечныя избавляемся; Радуйся, поучение от Бога нам преподал еси. Радуйся, преподобне отче наш Лаврентие, скорый помощниче и молитвениче к тебе притекающих.
Кондак 10
Хотя спасти душу свою, всю полноту добродетелей Евангельских в себе совокупил еси богоблаженне Лаврентие: апостольское проповедание, мученическое терпение, преподобных воздержание, нестяжание, смирение и нищету духовную. Тем же ныне на небеси, восхваляюще Христа Бога, давшаго ти крепость, поминай нас, чтущих светлую память твою, и поющих Богу: Аллилуиа.
Икос 10
Познал еси, богомудре отче Лаврентие, разум Божественных Писаний, непрестанно подвизаяся в молитвах, и почерпнул еси воду живу, юже и нам преподал еси; сего ради вопиим ти сице: Радуйся, яко жаждущих от источника Святыя Троицы напаяеши; Радуйся, теми же водами души исцеляеши. Радуйся, вместо пищи водами словес твоих нас и ныне утешаеши; Радуйся, пламенем словес твоих терние грехов наших попаляеши. Радуйся, яко словеса твоя паче меда сладчайша; Радуйся, яко сладостию словес твоих скорбящим радость даруеши. Радуйся, яко прореченныя тобою словеса и ныне исполняются; Радуйся, яко в них мы славу твою уразумеваем. Радуйся, преподобне отче наш Лаврентие, скорый помощниче и молитвенниче к тебе притекающих.
Кондак 11
Множество чудес совершил еси, отче Лаврентие: бесы изгнал и прокаженныя исцелил еси, падшим духовно руку помощи твоея простерл еси. Посети и нас в бедах сущих, да умиленное пение тебе приносяще, вопием дивному во святых Своих Богу: Аллилуиа.
Икос 11
Светильник света Божественнаго, ты прозорливо провидя грехи наша, гнев Божий, праведно на ны движимый, предрекл еси. Мы же молим тя, отче Лаврентие, яко имуща дерзновение пред Господем: испроси нам недостойным милость у Бога, да яко молитвенника тепла, ублажаем тя, зовуще: Радуйся, пророком последовавый и им же уподобивыйся; Радуйся, пророчествами твоими мир наполнивый. Радуйся, яко многим напутствие давый; Радуйся, будущая в их жизни, предсказавый. Радуйся, яко монастырь по предсказанию твоему устроился; Радуйся, словесных овец пастырю. Радуйся, гнева Божия на грешники возвестителю; Радуйся, покаяния проповедниче и грешников исправителю. Радуйся, преподобне отче наш Лаврентие, скорый помощниче и молитвенниче к тебе притекающих.
Кондак 12
Благодать велию восхоте подати тебе Господь Вседержитель, прослави тя в житии твоем, дар прозрения дарова тебе и множеством чудес обогати. Научи и нас воспевати с тобою благодарственную песнь Богу: Аллилуиа.
Икос 12
Поем тя, угодниче Христов Лаврентие, яко низу пребывая на земли, удостоился еси возвыситися до высоты небесныя и тамо возсияти духом, яко солнце, да посетиши нас с высот небесных воспевающих ти сицевая: Радуйся, светильниче лучезарный; Радуйся, свете, мрак бесовский разгоняющий. Радуйся, столпе огненный и каменю непоколебимый; Радуйся, святителей любимый собеседниче. Радуйся, апостолов преизрядный ревнителю; Радуйся, мучеников и преподобных славо превознесенная. Радуйся, благоверных похвало усердная; Радуйся, чтущих память твою покрове и защищение. Радуйся, преподобне отче наш Лаврентие, скорый помощниче и молитвенниче к тебе притекающих.
Кондак 13
О пречудный угодниче Божий, отче наш Лаврентие! Приими сие хвалебное пение, в похвалу тебе приносимое, и твоим богоприятным ходатайством избави нас от всех враг видимых и невидимых, от всякия напасти и скорби, от напрасныя смерти и будущия муки, да сподобимся с тобою и со всеми святыми воспевати Богу: Аллилуиа.
(Этот кондак читается трижды, затем икос 1 и кондак 1)
Молитва преподобному Лаврентию Черниговскому, чудотворцу
О всехвальный отче Лаврентие, приими сие малое моление, от нас грешных тебе приносимое, и призри милостивно с высот небесных на нас, просящих твоего ходатайства у Престола Пресвятыя Троицы, да подаст твоими молитвами мир и благоденствие стране нашей, пастырем силу в молитве, иноком подкрепление на пути совершенства в подвизех смирения и послушания, вдовицам и сиротам заступление, немощным подкрепление, недугующим духом и душею от бесов избавление, больным исцеление, путешествующим Ангела Хранителя. Всем чтущим с любовию память твою, веру искреннюю и непоколебимую. И по преставлении в жизнь вечную приведи нас ко Христу твоими молитвами, да с тобою прославляем Святую Троицу: Отца и Сына и Святаго Духа, всегда, ныне и присно, и во веки веков. Аминь.