Загрузка...

Календарь Молитвослов Библия

Тропари, кондаки и величания - 11 января 2025

Тропарь 14000-м мученикам младенцам, от Ирода в Вифлиеме избиенным

Болезньми святых, имиже о Тебе пострадаша, / умолен буди, Господи, / и вся наша болезни исцели, / Человеколюбче, молимся.

Кондак 14000-м мученикам младенцам, от Ирода в Вифлиеме избиенным

В Вифлееме рождшуся Царю, волсви от Персиды с дары приходят,/ звездою свыше наставляеми,/ но Ирод смущается и пожинает младенцы, яко пшеницу,/ и рыдает себе,/ яко держава его вскоре разорится.

Ин кондак 14000-м мученикам младенцам, от Ирода в Вифлиеме избиенным

Звезда волхвы посла к Рождшемуся,/ и Ирод неправедное воинство посла люто,// убити мня во яслех яко Младенца лежаща.

Тропарь преподобному Маркеллу Апамейскому

В тебе, отче, известно спасеся, еже по образу,/ приим бо Крест, последовал еси Христу/ и дея учил еси презирати убо плоть, преходит бо,/ прилежати же о души, вещи безсмертней.// Темже и со Ангелы срадуется, преподобне Маркелле, дух твой.

Кондак преподобному Маркеллу Апамейскому

Яко звезда, красно сияя,/ от Ефеса провозсиял еси нам, всеблаженне, постижно,/ и добродетельми возгремел еси,/ наставник иноком многим быв, преподобие,/ того ради и царствующий град просветил еси,/ и сего ради вопием ти:/ радуйся, отче всеблаженне Маркелле.

Тропарь преподобного Марка гробокопателя, Печерского, в Ближних пещерах
Умертвив плотския похоти многим воздержанием/ и копанием гробов святым,/ присно, аки мертв, в пещере живя,/ мертвыя повелением своим воздвизал еси,/ Марко прехвальне,/ мертви и наша мудрования плотская/ и настави нас на течение добродетелей,/ моля о нас Единаго Человеколюбца.
Кондак преподобного Марка гробокопателя, Печерского, в Ближних пещерах
Врача изрядна и чудотворца любовию, вернии, ублажим, просяще его:/ да молитвами своими уврачует наша страсти, душевныя и телесныя,/ имать бо на сие благодать от Бога,/ и прогонит духи лукавыя от всех, верно ко гробу его притекающих и зовущих:/ радуйся, Марко, целителю немощей наших.
Тропарь преподобному Лаврентию Черниговскому, чудотворцу

От юности Христа возлюбил еси, и Тому тесным путем последуя, сосуд избран Духа Святаго быв, дар чудотворения и прозрения восприим: сего ради в невечернем свете Пресвятыя Троицы присно радуяся, поминай чад твоих, Лаврентие преподобне, отче наш.

Ин тропарь преподобному Лаврентию Черниговскому, чудотворцу

Днесь светло красуется град Чернигов, и торжествует обитель Пресвятыя Троицы, в ней бо молитвою и постом пребывая, иночествующим и верным людям велий наставниче и скорый помощниче, и избранник пречудный Царицы Небесныя явился еси, яко звезда лучезарная в стране Российстей, преподобне отче наш Лаврентие, моли Человеколюбца Бога спасти души наша.

Кондак преподобному Лаврентию Черниговскому, чудотворцу

Мир оставив, чистоту ангельскую стяжав и мирови любовию послужив, отче наш Лаврентие, помощь благодатную с верою приходящим обильно являя: темже и в премирная селения достойно вселився, телом нетленным с нами пребываеши, утверждая нас в православной вере отцев наших, душею светозарною Подателю мира молишися даровати нам мир и велию милость.

Ин кондак преподобному Лаврентию Черниговскому, чудотворцу

Возсиял еси, яко светильник лучезарный услыша глас Царицы Небесныя, и последовав невозвратно зову Ея. Пришел в обитель Пресвятыя Троицы, идеже Владычицы Богородицы чудотворная икона, целомудренно собрав стадо словесных овец. Не забуди и нас, последовавших ти, и да избавит Господь геенны вечныя, совершающих святую память твою, преподобне отче наш Лаврентие.