Акафисты - 12 января 2025
Кондак 1
Избранный и чудный архиерею Церкве Российския, града Москвы первопрестольниче, блаженне святителю Макарие! Восхваляем тя ныне мы, недостойнии, но, яко имея дерзновение у Святыя Троицы, предстательством твоим Небесным помогай нам, сущим в бедах и скорбех, радостно взывающим ти: Радуйся, блаженне Макарие, похвало церкве Христовы и предивный чудотворче.
Икос 1
Ангела земнаго и человека Небеснаго прославляем тя, яко ревнителя Православия: от земных бо к Небесным обителем возшел еси. И ныне, предстоя Престолу Святыя Троицы вкупе с лики чудотворцев Российских, не престай моляся о воспевающих тя: Радуйся, корене благаго ветве многоплодная; Радуйся, благочестивых родителей плоде богодарованный. Радуйся, от юности возлюбивый Бога всем сердцем твоим; Радуйся, яко Ему Единому работати возжелел еси. Радуйся, яко измлада мудрости прилежал еси; Радуйся, поста и молитвы ревностный блюстителю. Радуйся, блаженне Макарие, похвало Церкве Христовы и предивный чудотворче.
Кондак 2
Видя тщету мирскаго жития, блаженне святителю Макарие, во ограду обители преподобнаго Пафнутия Боровскаго удалился еси, идеже имя египетскаго пустынника, монашествующих наставника, Макария Великаго, приял еси и, яко звезда небосветлая возрастая на тверди церковней, весь живот свой от младых ногтей Богу предал еси, сердцем и усты непрестанно поя Ему: Аллилуиа.
Икос 2
Разум твой богодухновенный, научением книжным в Пафнутиево-Боровстем монастыре просвещаемый, богомыслию предал еси, блаженне Макарие, молитвою и пощением во служение Богу себе уготовляя. Восхваляюще же ныне твоя благая тщания, взываем ти сице: Радуйся, яко, отложив вся мирския сласти, Христов ярем носити изволил еси; Радуйся, юность твою, яко жертву непорочну, отвер-жением мира Богу принесый. Радуйся, в постех и подвизех твоих добродетельми украсивыйся; Радуйся, ангельски во плоти поживый. Радуйся, монашескаго послушания светлый облаче; Радуйся, иноков обители Боровския украшение. Радуйся, блаженне Макарие, похвало Церкве Христовы и предивный чудотворче.
Кондак 3
Силою Вышняго, уготовлявшаго тя во спасение многих, досточудне святителю, ведом был еси от силы в силу во святем житии твоем, день и нощь поучался еси в Законе Господни, присно взывая Богу: Аллилуиа.
Икос 3
Имея чистое житие и душу непорочну, в монашеския ризы облеклся еси, еще млад сый, и, подвигом добрым труждаяся, искус жестокаго жития прошед и саном архимандрита обители Лужецкия от первосвятителя Даниила почтен быв, ревностно подвизался еси о спасении Богом данного тебе стада словеснаго, с нимже и мы днесь радостно взываем: Радуйся, красото смиренномудрия и воздержания; Радуйся, образе кротости и послушания. Радуйся, соборов иноческих похваление; Радуйся, преподобных и праведных сонаследниче. Радуйся, премудрый монахов наставниче; Радуйся, добрый о них попечителю. Радуйся, блаженне Макарие, похвало Церкве Христовы и предивный чудотворче.
Кондак 4
Бури страстей избежав, архипастырски трудился еси, святителю отче Макарие; достойный служитель святыя Софии, Премудрости Божия, явился еси и сокровища премудрости ревностно собирати потщался еси, ко просвещению народов российских, научая разумно пети Богу: Аллилуиа.
Икос 4
Слышавше ближнии и дальнии людие, дивляхуся о трудех твоих неустанных, имиже трудился еси на кафедре богоспасаемых градов Великаго Новаграда и Пскова, и радовахуся, яко приял еси жезл архипастыря от митрополита Российскаго Даниила. Мы же, овцы пажити твоея, светом твоего богораэумия озаряеми, вопием ти: Радуйся, на престоле святительстем достойно возседый; Радуйся, архиерею и премудрый учителю. Радуйся, в подвизе учительства неустанный ревнителю; Радуйся, винограда Христова усердный делателю. Радуйся, яко твоим благословением некрещеная лопь светом Евангелия просвещена бысть; Радуйся, благочиния монастырскаго мудрый устроителю. Радуйся, блаженне Макарие, похвало Церкве Христовы и предивный чудотворче.
Кондак 5
Боготечному солнцу уподобился еси, блаженне Макарие, егда волею Пастыреначальника Христа на свещнице Церкве Российския собором архиереев поставлен был еси, да светиши светло отечествию твоему. Мы же Небесному Царю, Триединому Богу, дивно прославльшему тя, поем: Аллилуиа.
Икос 5
Видевше тя православнии людие, яко светило безоблачно сияюща многими дарованьми, радовахуся. Ты же, добрый пастырю Христов, мучениколюбец сый, соборне уставил еси празднования творити святым новым чудотворцем земли нашея, ихже Господь Бог прослави, якоже Своя угодники, многими различными чудесы и знаменьми. Мы же, чудящеся о таковей неизреченней благости Божией, Церкви нашей Российстей дарованней, умильно взываем ти сице: Радуйся, святителю, други Божия достолепно прославивый; Радуйся, деяния подвижников российских писанию предавый. Радуйся, труды и подвиги мужей святых в песнех славословивый; Радуйся, образы новых чудотворцев благоговейно писавый и лобызавый. Радуйся, научивый паству достойно покланятися святым новым чудотворцем; Радуйся, яко купно с сими святыми ныне и от нас славословие приемлеши. Радуйся, блаженне Макарие, похвало Церкве Христовы и предивный чудотворче.
Кондак 6
Проповедник веры Православныя и ревнитель благочестия словом и житием был еси, достославне святителю, блаженне Макарие, потщался еси труды неленостными нравы и обычаи людей российских исправити, научая непрестанно воспевати Богу: Аллилуиа.
Икос 6
Возсиял еси, яко звезда лучезарная, в Церкви Российстей светом Христова учения и ревностию твоею о славе Божией, иерарше блаженне, и созвал еси великий собор, Стоглав нарицаемый, ко исправлению и утверждению в добродетелех верных чад, внимающих учению Христову и похваляющих тя сице: Радуйся, благочиния церковнаго строгий блюстителю; Радуйся, яко тобою вера Христова утвердися. Радуйся, чтения и пения Божественнаго искусный учителю; Радуйся, соблазнов и нестроений мудрый искоренителю. Радуйся, яко страх Божий, начало премудрости, в сердцах пасомых насаждал еси; Радуйся, яко праведныя жизни образ верным подавал еси. Радуйся, блаженне Макарие, похвале Церкве Христовы и предивный чудо-творче.
Кондак 7
Хотяй враг спасения рода человческаго нарушити мир Церкве нашея, воздвиже еретическое мудрование в людех о Божестве, и о Церкви, и о православных догматех веры христианския. Мы же, трепетни суще о таковем злочестии, прославляем святителя Макария, православных догматов защитителя, взывающе Богу: Аллилуиа.
Икос 7
Новаго тя Петра Александрийскаго и Николая Мирликийскаго зрим, святителю Макарие: овии отсекоша Ариа безумнаго, раздравшаго, яко ризу Церковь Христову, ты же еретическая лжемудрования соборне осудил еси, прелесть их посрамив да не сеют злобы своея в роде человечестем, и тако утвержден бысть истинный Закон Христов. Мы же, чада Церкве Православныя, благодарно прославляем тя, блаженне Макарие: Радуйся, Православия великий ревнителю; Радуйся, стада Христова от волков хищных верный оградителю. Радуйся, жезлом догматов лжемудрствование посрамивый; Радуйся, небрегущия о святыни от Церкве Божия отлучивый. Радуйся, презрители законоположений церковных низложивый; Радуйся, громе, поражаяй злочестивых. Радуйся, блаженне Макарие, похвало Церкве Христовы и предивный чудотворче.
Кондак 8
Странника и пришельца в мире сем себе помышляя, святителю отче наш Макарие, в подвизех и постех присно пребывая, кроток же, смирен и милостив был еси, отроком в незлобии подражая всегда, совершен умом быв, поя Всемилостивому Богу: Аллилуиа.
Икос 8
Весь ум твой, святителю, вперил еси к Богу, пастырски врученное тебе от Христа стадо упасл еси: лица бо сильных не стыдяся, наставлял еси их на путь спасения, его ради чтуще святую память твою, любовию ти вопием: Радуйся, великий благочестия столпе; Радуйся, святопомазанная главо, честный наш учителю. Радуйся, Христа Господа всею душею и сердцем возлюбивый; Радуйся, христианскаго благочестия истинный ревнителю. Радуйся, неутомимый проповедниче Евангелия Христова; Радуйся, каменю драгий, всю землю Российскую украшаяй. Радуйся, блаженне Макарие, похвало Церкве Христовы и предивный чудотворче.
Кондак 9
Всего себе вперив в премудрость книжную, составил еси многими труды и подвиги Великия Четия Минеи во славу Божию, в похвалу святых и в научение всему роду православному. Мы же, дивящеся дарованней ти от Бога премудрости, прославляем тя, зовуще Богу: Аллилуиа.
Икос 9
Витии любомудрии прославляют деяния славных мира сего, ты же, пчеле уподоблялся, воедино собирал еси жития иже в постех просиявших и за Христа кровь свою пролиявших. Мы же, писании твоими просвещаеми, поем и благодарим тя за толикие труды твоя и преусердно приносим ти сицевая: Радуйся, книжную премудрость, яко бисер, собравый; Радуйся, сокровища премудрости чадом Божиим явивый. Радуйся, имиже люди российския просветивый; Радуйся, деяния святых писанию предавый. Радуйся, начало книгопечатанию положивый; Радуйся, духовный пастырю словесных овец. Радуйся, блаженне Макарие, похвало Церкве Христовы и предивный чудо-творче.
Кондак 10
Спасти хотя душу твою, святителю, покоя духовнаго возжелел еси, хотя оставити первосвятительский престол и паству российскую, но, умолен быв от собора святителей и самодержцем державным, показал еси нам пример послушания Церкви Христове, да поем Богу: Аллилуиа.
Икос 10
Стена и крепкое ограждение земли Российстей был еси, святителю, многими добродетельми украсивыйся, постнически пожив, течение скончав, ко отшествию от земнаго бытия приблизился еси и предал еси душу свою в руце Бога Жива. Собор же народа многа, стекшеся ко одру твоему и видевше лик твой, яко свет сияющий, чистаго и непорочнаго жития твоего ради, прославиша Бога, даровавшаго таковаго светильника, вопиюще: Радуйся, святителю, пред кончиною твоею явления Богоматере сподобивыйся; Радуйся, мирно и радостно час кончины твоея сретивый. Радуйся, яко пресветлое житие твое на земли прешел еси; Радуйся, святителю, и по смерти твоей нас не ос-тавляяй. Радуйся, яко и по преставлении твоем с нами пребываеши; Радуйся, гражданине Иерусалима Небеснаго. Радуйся, блаженне Макарие, похвало Церкве Христовы и предивный чудотворче.
Кондак 11
Пение наше молебное презри, богомудре и блаженне отче, любовию подвизаеми, к честному образу твоему притекаем и, прославляюще Триединаго Бога, молимтися: молися выну у Престола Господа Славы избавитися нам от мятежей и треволнений, да благодарне зовем Богу: Аллилуиа.
Икос 11
Светодательная свеща явился еси стране нашей, Макарие чудный, и по смерти своей. Темже сиянием учений и трудов твоих озаряеми, почитаем святую память твою, просвети убо очи наша душевная, да благодарно взываем ти: Радуйся, бедствия, грядущая на землю Россий-скую, предзревый; Радуйся, о всех людех российских усердный молитвенниче. Радуйся, вместо временных вечная блага нам подаваяй; Радуйся, бисере честный, сиянием Небесныя славы сердца наша увеселяяй. Радуйся, светильниче многосветлый, светом истиннаго богопознания нас озаряяй; Радуйся, святителей Московских достойный преемниче. Радуйся, блаженне Макарие, похвало Церкве Христовы и предивный чудотворче.
Кондак 12
Благодать Господню и благовременную помощь испроси нам, святителю Макарие, во дни нестроений и буди нам в скорбех утешитель и в бедах заступник. Молим тя, иерарше блаженне, пролей за нас теплую молитву ко Господу, да сохранит Церковь Российскую невреждену от ересей и расколов и спасет вопиющих Ему: Аллилуиа.
Икос 12
Поюще преславное житие твое и богомудрая деяния, святителю отче Макарие, блаженству тезоименитый, восхваляем Подателя всех благих, Бога, даровавшаго в последняя времена стране нашей великаго чудотворца. Озари, иерарше чудный, нас светоизлиянием твоея благодати, увеселяя сердца наша пети ти со умилением: Радуйся, Православия поборниче нелицемерный; Радуйся, архиереев доброто, священников и иноков похвало. Радуйся, звездо, сияющая во тьме сущим; Радуйся, первопастырю и учителю христоименитых людей земли нашея. Радуйся, иконописче благоговеен, дела рук своих посвящаяй Богу; Радуйся, от Царя Небеснаго венец славы приемый. Радуйся, блаженне Макарие, похвало Церкве Христовы и предивный чудотворче.
Кондак 13
О чудотворче преславный и боголюбезный пастырю, первопрестольниче изрядный, великое украшение церковное, всем архиереем и иереем неленостный учителю, всея российския паствы истинное управление, святителю Макарие чудный! Милостивно прием сие малое моление наше, в похвалу тебе приносимое, умоли Господа Бога даровати мир душам нашим, Церкви и стране, да взываем присно: Аллилуиа.
(Этот кондак читается трижды, затем икос 1 и кондак 1)
Молитва святителю Макарию, митрополиту Московскому и всея Руси, чудотворцу
О великий святителю, Церкве Российския первопрестольниче, града Москвы пастырю и учителю, отче наш Макарие блаженне, добре подвиг жития твоего совершивый и дерзновение у Господа стяжавый! К тебе во умилении сердец наших припадаем и усердно молим: буди о нас теплый предстатель у Престола Вседержителева и умоли Всеблагаго Бога: да не презрит нас, во многая и лютыя грехи впадших, но дарует нам вся благая и потребная, яже ко спасению. Вемы бо, яко немощни есмы, но молим тя усердно, святителю Божий, предстательством твоим сохрани невредимо всероссийскую паству, юже во святительстве твоем добре упасл еси. Архиереем и пресвитером у Господа испроси мудростъ, во еже право правити слово Божественныя истины, жертвенную любовь и ревностъ о спасении, да не погибнет ни един от паствы их; иночествующих в подвизех укрепи, в мире живущим истинный и потребный им, иже во Христе Иисусе образ жительствования покажи; веру нашу укрепи, любви нелицемерней друг ко другу научи, в надежде на милосердие Божие утверди. Еще же молим тя, святителю, испроси нам у Всемилостиваго Бога духа разума и премудрости, да украсимся истинным боговедением спасительных писаний святых отец и мудростию их творений. Ей, святителю Божий, о мире всего мира Господа умоли, страну нашу твоим предстательством в мире и безмятежии соблюди; вся люди отечества нашего в добрем расположении друг ко другу сохрани и чужды междоусобных нестроений покажи; вся грады и веси добре сохрани, святую веру в людех непорочну соблюди. Буди всем нам скорый помощник в нуждах наших, да тобою окормляеми, мирно и благочестно поживем в жизни сей, да сподобимся и вечных благ восприятия на Небеси, славяще и превозносяще Отца и Сына и Святаго Духа и твое милостивное о нас предстательство во веки веков. Аминь.
Кондак 1
Избранному Апостолу Христову, иерарху преславному и мученику предивному, Иакову премудрому, брату Божию блаженному похвальная восписуем, яко ходатаю и скорому помощнику нашему. Ты же, предстояй Престолу Пресвятыя Троицы, не престай молитися за ны, сохраняющи от всяких бед и зол верою празднующих память твою и зовущих:
Радуйся, Апостоле Иакове, Церкви Иерусалимския первый иерарше.
Икос 1
Ангелов Творец и всея твари Содетель, яви тя, Иакове, яко звезду многосветлую, на тверди церковней возсиявшую, светом Богопознания мир просвещающую и тьму лжеверия прогоняющую. Мы же, к заступлению твоему прибегающе, радостно тебе приносим сицевая:
Радуйся, яко брат Господень по плоти сый, ученик и самовидец неизреченных таин Его показался еси;
Радуйся, Богом избранный, да людем верным тайну спасения премудро изъясниши.
Радуйся, велегласно словеса Божия иудеем провозгласивый;
Радуйся, сими народ Божий, от Христа отвергшийся, к покаянию призывавый.
Радуйся, Церкве Иерусалимския истинный управителю;
Радуйся, и всех христиан Богомудрый наказателю.
Радуйся, иерарше Иерусалима дольняго, ныне во Иерусалиме горнем пребываяй;
Радуйся, Жертву Безкровную принося, себе же в жертву чисту Творцу и Царю уготовавый.
Радуйся, Апостоле Иакове, Церкви Иерусалимския первый иерарше.
Кондак 2
Видящи, издалеча прозря твое жительство, Иакове, брата тя прия Христос Человеколюбец: ты бо, старший сын праведнаго Иосифа Обручника быв, издетска, яко назорей, Богу посвящен, воздержание возлюбил еси. Нравов же твоих благостию и ума чистотою Христов показался еси ученик искренний, сего ради сподобился еси у Престола Владычня вечно воспевати: Аллилуиа.
Икос 2
Разум всякий отвергше, Ирод царь искаше Младенца Иисуса, да погубит Его; и се Ангел Господень во сне явися Иосифу глаголя: «Возстав, поими Отроча и Матерь Его и бежи во Египет». Ты же, Иакове, яко сродник по плоти Иисусов сый, со Иосифом и Материю Его во Египте пребывал еси. Сего ради, приими от нас, Иакове, усердныя похвалы сия:
Радуйся, яко из колена Иудова процвел еси;
Радуйся, яко Иосифа праведнаго отрасль пречестная был еси.
Радуйся, яко чрез Христа лицем к лицу Бога узрел еси;
Радуйся, яко от Негоже благодать многу приял еси.
Радуйся, яко Христовым светолитием просвещен еси;
Радуйся, яко сугубыя почести от Христа сподобился еси.
Радуйся, яко Христа Пастыреначальника по плоти брат был еси;
Радуйся, яко Христом наследник обетований Отца Небеснаго явился еси.
Радуйся, Апостоле Иакове, Церкви Иерусалимския первый иерарше.
Кондак 3
Сила Вышняго постави тя, Иакове праведне, пастыреначальника и таинника, неизреченная священнодействующа Таинства в Сионе святем, егда лик Апостольский избра тя епископа перваго Церкви Иерусалимския. Ты же, Апостоле, иго Христово усердно взем, Евангелия благости Его и Царствия проповедник был еси, поя Вседержителю Богу песнь: Аллилуиа.
Икос 3
Имеяй мудрость Божественную во уме своем всегда, Иакове, служение апостольское приял еси, егоже тридесять лет совершая, ко Христу вся страждущия и обременненныя приводил еси, неустанно веру спасительную во граде Святем и земле Палестинстей проповедуя и к познанию истины вся приводя. Темже тя, яко избранника Спаса нашего, славословим тако:
Радуйся, Святый Град Иерусалим проповедию Слова Божия огласивый;
Радуйся, велию власть от Бога приемый.
Радуйся, благовестниче Агнца Божия, вземлющаго грехи мира;
Радуйся, многих от народа иудейскаго во имя Отца и Сына и Святаго Духа крестивый.
Радуйся, пастырю добрый и учителю святый, яко тобою Бог Церковь Свою украси;
Радуйся, кладезю, из негоже воды живыя напаяемся.
Радуйся, яко стопам Спаса Христа неуклонно последовал еси;
Радуйся, яко Духа Божественнаго сиянием верных сердца просветил еси.
Радуйся, Апостоле Иакове, Церкви Иерусалимския первый иерарше.
Кондак 4
Бурю нечестия разгоняя, множество иудеев и еллинов к Церкви Христовой обратил еси, отче праведный: словом бо и житием твоим любовь велию людей иерусалимских стяжал еси, и теми ко Христу вся приводил еси, научая пети Богу: Аллилуиа.
Икос 4
Слыша мудрыя слова твоя, «яко от дел оправдается человек, а не от веры токмо», гордии фарисее и книжницы распыхахуся сердцем, мнящи тя разорителя отеческих преданий быти. Мы же, учителя благочестия тя ведуще, вопием:
Радуйся, яко праведным житием твоим злословныя враги посрамил еси;
Радуйся, яко широтою Божественнаго разума пути вражия утеснил еси.
Радуйся, яко благодатию, из уст твоих изливающеюся, веровати в Троицу Единосущную верныя научал еси;
Радуйся, столпе благочестия непоколебимый и стено Церкве необоримая.
Радуйся, яко возсиял еси сущим во тьме неразумия, ко благочестию всех призываяй;
Радуйся, яко собранное стадо твое от волков лютых избавил еси.
Радуйся, яко брат Божий, Сына Бога Вышняго добльственне на земли исповедал еси;
Радуйся, Апостоле святе, мудростию обложенный и благодатию озаренный.
Радуйся, Апостоле Иакове, Церкви Иерусалимския первый иерарше.
Кондак 5
Боготечною звездою прошел еси житие твое, Апостоле Иакове, благоговейно служение в Церкви Иерусалимстей совершая и образ праведнаго святителя Божия собою являя. Мы же, Богу, премудрость велию тебе даровавшаму и благодатными дары преизобильно тя украсившему, немолчно воспеваем: Аллилуиа.
Икос 5
Видеша тя вернии людие Израилевы помощника и утешителя в скорбех и печалех: ты бо усердно молился еси о отпущении грехов народа Божия, якоже и колена твоя зело огрубеша непрестаннаго ради коленопреклонения твоего. Сего ради восхваляем тя по достоянию, яко молитвенника нашего пред Богом, взывая сице:
Радуйся, житием твоим добродетельным, яко солнце светозарное, вся просвещаяй;
Радуйся, презирати плоть свою и прилежати о души безсмертней научаяй.
Радуйся, Божественнаго Духа благодать приемля, плевелы лжеверия попаливый;
Радуйся, плоть свою духови совершенно поработивый.
Радуйся, вертограда Христова делателю усердный;
Радуйся, молитвенниче к Богу неустанный.
Радуйся, яко союзом любве стадо твое связал еси;
Радуйся, яко свет миру и соль земли явился еси.
Радуйся, Апостоле Иакове, Церкви Иерусалимския первый иерарше.
Кондак 6
Проповедник истинныя веры Христовы и ревнитель благочестия был еси, святителю Иакове: сего ради, Духом Святым просвещаемый, чин Божественныя Литургии мудре устроил еси, благодарению Богу за вся научаяй. И ныне с небеси на ны милостиво призираеши и преизобильно всем нам благодать подаеши от щедраго Христа Бога, Емуже со Ангелы у Престола славы Его поеши: Аллилуиа.
Икос 6
Возсиял еси яко звезда утренняя Церкви Христовой ревностию о славе Божией, и, Жизнеподательным Духом законополагая и вещая неизреченныя тайны Божия, паству свою таинствы церковными и служением Божественныя Литургии освящал еси и правилам веры научал еси. Мы же тебе, Святыя Троицы служителю верному, воспеваем таковая:
Радуйся, чина церковнаго благоукрасителю;
Радуйся, ученьми твоими мир просветивый.
Радуйся, яко Духом Святым чрез тебе свет Богопознания в мир излияся;
Радуйся, яко тобою Евангелие Царствия Божия проповедася.
Радуйся, яко дару совершенну от Отца светов человеком подаятися учиши яве;
Радуйся, яко Божественным проповеданием твоим свет благодатный седящим во тьме греховней возсиял еси.
Радуйся, яко умом чистым и святыми усты твоими спасение всем верным предложил еси;
Радуйся, яко Бог Слово богатно блистании Божественныя благодати тя просвети.
Радуйся, Апостоле Иакове, Церкви Иерусалимския первый иерарше.
Кондак 7
Хотя положити предел бывшей распре о законе Моисеове посреде благовествующих народом языческим слово Христово, на соборе Апостольстем во граде Иерусалиме главенствуя, ты, Апостоле преславне, словесы твоими богомудрыми о спасении души христианския паки мир в Церквах водворил еси. Мы же ублажаем тя, научившаго нас право разумети учение Христово и пети Тому: Аллилуиа.
Икос 7
Новаго избранника Божия видим тя, святе Иакове: ты бо мудре вразумлял еси на соборе Апостольстем о скончании времени Завета Ветхаго и о Промысле Божием о обращении и спасении народов языческих. Сего ради тебе, яко великому во иерарсех Христовых, взываем:
Радуйся, Мудрость Ипостасную — Христа всем проповедавый;
Радуйся, яко о спасении верою и делами благочестия не токмо иудеев, обаче и язычников научавый.
Радуйся, о Христе, яко о совершении пророчеств и преданий отеческих, свидетельствовавый;
Радуйся, яко седящия во тьме греховней к свету благоверия приводил еси.
Радуйся, яко просветил еси мудростию твоею вся;
Радуйся, кладезю истиннаго Боговедения.
Радуйся, реко богоглаголивая;
Радуйся, премудрости чаше, добродетельми исполненная.
Радуйся, Апостоле Иакове, Церкви Иерусалимския первый иерарше.
Кондак 8
Странно и предивно всем иерусалимляном бысть житие твое, священномучениче Иакове, ты бо миротворец и истолкователь Закона Божия явился еси, просвещая и вразумляя люди. Темже и нас научи пети от всего сердца Творцу и Зиждителю нашему: Аллилуиа.
Икос 8
Весь освящен благодатию Духа Святаго, Церковь Иерусалимскую добре упасл еси, святе Иакове, день и нощь укрепляя новопросвещенныя в благодати Христовой. Мы же восхваляем тя, горнюю премудрость стяжавшаго, пении сими:
Радуйся, яко Божественный разум стяжал еси;
Радуйся, яко словесы богомудрыми люди, от неведения избавляя, ко Христу руководил еси.
Радуйся, яко труды твоими к водам спасения овцы словесныя приводил еси;
Радуйся, яко жребий пастырскаго о душах попечения праведно ти дадеся.
Радуйся, коегождо к безропотному несению креста его наставляяй;
Радуйся, яко солнце миру учении твоими возсиявый.
Радуйся, искусный ловителю душ человеческих;
Радуйся, Божественныя благодати светило.
Радуйся, Апостоле Иакове, Церкви Иерусалимския первый иерарше.
Кондак 9
Всем сердцем возлюбивый Христа Бога, яко брат Его по плоти, и о спасении творения Его ревновавый, наставлял еси народ Божий в вере христианстей: яко быти во испытаниих терпеливу, на Бога уповающе и во смирении тяготы носяще. Мы же, тобою наученнии, милосердному Человеколюбцу Богу непрестанно взываем: Аллилуиа.
Икос 9
Вития многовещанныя не возмогут воспети твоея, богоблаженне Иакове, мудрости, егда вразумлял еси, яко не в единем книжнем научении и внешнем исповедании есть вера спасительная, а в вере, поспешествуемой любовию и делами во имя Христово. Мы же, тебе, яко Богомудрому наставнику, благодарно воспеваем:
Радуйся, яко тело без духа мертво есть, тако и вера без дел мертва есть, возвещаяй;
Радуйся, яко во искушения различная впадая, радость имети научаяй.
Радуйся, яко блажен муж, иже претерпит искушения, зане приимет венец жизни, рекий;
Радуйся, яко «искушение вашея веры соделовает терпение», — мудро нам глаголеши.
Радуйся, яко ведущему убо добро творити и не творящему — грех есть, нас умудряеши;
Радуйся, яко любы мира сего — вражда Богу есть, нас вразумляеши.
Радуйся, яко молитися друг за друга, много бо может молитва праведнаго поспешествуема, нас призываеши;
Радуйся, яко обративый грешника от заблуждения пути его, спасает душу от смерти, нам взываеши.
Радуйся, Апостоле Иакове, Церкви Иерусалимския первый иерарше.
Кондак 10
Спасти хотяй всякаго человека, грядущаго в мир, Всевидец Господь дарова ти, Иакове славне, благодать велию укрепляти обращенныя в вере: ты бо на страдания предстоящия коегождо приуготовляя, призывал еси всех к терпению и упованию на Бога, всех и вся содержащему в деснице Своей. И нас, недостойных, сподоби молитвами твоими разумно пети Богу: Аллилуиа.
Икос 10
Стена необоримая Церкви Иерусалимстей был еси, священномучениче преславне, и тако научал еси люди твоя спасительней вере Христовей: «Вера бо чиста и нескверна пред Богом есть, еже посещати сирых и вдовиц в скорбех их и нескверна блюсти себе от мира». Мы же, тебе, о нас молящемуся, неустанно взываем:
Радуйся, яко «суд без милости — не сотворшему милости», — рекий;
Радуйся, яко «гнев мужа правды Божия не соделовает», — вразумляяй.
Радуйся, яко «плод правды в мире сеется творящим мир», — научаяй;
Радуйся, яко «Господь гордым противится, смиренным же дает благодать», — глаголяй.
Радуйся, яко «смиритеся пред Господем, и вознесет вы», — взываяй;
Радуйся, путеводителю наш к Небеси.
Радуйся, слова Божия истолкователю неложный;
Радуйся, на подвиг деятельныя любве подвигаяй.
Радуйся, Апостоле Иакове, Церкви Иерусалимския первый иерарше.
Кондак 11
Пение всеумиленное приносил еси Пресвятей Троице во вся дни земнаго жития твоего; отпавшия же от благодати вожди иудейстии, видевше, яко множество мужей и жен к Церкви Христовой прилагается твоими, всеславне Апостоле, трудами, злоумыслиша конец положити сему: нестерпим бо бысть им праведник истинный, Господу верно служащий. Нас же, святителю Иакове, благослови, укрепи и настави в вере спасительней возрастати, поюще Богу: Аллилуиа.
Икос 11
Светло Пасху Христову празднуя, во дни тыя неустанно проповедал еси, Иакове, глаголы жизни вечныя во граде Иерусалимстем собравшимся коленом иудейским и язычником множеству; начальницы же иудейстии совет положиша убити тя, пастыря Града Святаго. Мы же, тебе, яко мужественному воину Христову, усердно вопием:
Радуйся, истину Христову пред вожди небоязненно вещавый;
Радуйся, блистанием твоим тьму неведения просветивый.
Радуйся, правил церковных нелицеприятный блюстителю;
Радуйся, яко тобою Церковь Христова дивно красуется.
Радуйся, яко Богомудрыми ученьми умы верных к небеси возводиши;
Радуйся, яко крепостию проповеди твоея прелесть лжеучителей разрушил еси.
Радуйся, святый иерарше и проповедниче, многия в послушание веры уловивый;
Радуйся, лучу, от Солнца Правды исходяй, всю землю просвещаяй.
Радуйся, Апостоле Иакове, Церкви Иерусалимския первый иерарше.
Кондак 12
Благодатию Божиею и силою, от Бога тебе дарованною, облеклся еси, страстотерпче Иакове, Христа ради готовый мучения всякия претерпети, егда лестию поставлен был еси на криле храма святаго нечестивыми, вопрошающими тя: «Рцы нам о Распятом». Мы же Богу, в мученичестем подвизе тебе укрепившему, гласом велиим воспеваем: Аллилуиа.
Икос 12
Поюще Пресвятей Троице хвалу и благодарение и исполнився Духа Святаго, ты, Богоносе Иакове, изрекл еси пред народом о Христе, яко Той «сидит на Небесех, одесную Силы Всевышняго и грядет на облацех небесных». Слышавше же сия, нечестивии скрежетаху зубы своими и устремишася на тя; быв же долу низвержен с криле храма, Апостоле святе, востав на колени, Творцу молился еси о прощении убивающих тя и, камением до смерти побиваем, душу свою в руце Божии предал еси. Мы же, предстоящему тебе пред Престолом Святыя Троицы, радостно зовем:
Радуйся, яко на криле святилища представ, Бога Слова проповедал еси;
Радуйся, яко от иудей низвержен быв, небесных чертогов сподобился еси.
Радуйся, Горняго Иерусалима Апостольское основание;
Радуйся, яко жертву чисту себе Царю и Творцу принесл еси.
Радуйся, яко кровию твоею в Церковь Небесную вшел еси;
Радуйся, яко тя заступника крепкаго пред Богом имамы.
Радуйся, яко нетленныя пищи наслаждаяся, Престолу Святыя Троицы предстоиши;
Радуйся, священномучениче непобедимый, иерарше прехвальный и светильниче всемирный.
Радуйся, Апостоле Иакове, Церкви Иерусалимския первый иерарше.
Кондак 13
О преславный Апостоле Иакове, брате Господень, Церкви Христовой светильниче многосветлый! Приими от благоговейных сердец наших с любовию тебе приносимое хвалебное пение сие и испроси нам у Христа Бога нашего в вере утверждение, прегрешений оставление и от вечнаго осуждения избавление, да сподобимся в Царствии Небеснем купно с тобою во веки пети Богу: Аллилуиа.
Этот кондак читается трижды, затем икос 1-й и кондак 1-й
Молитва апостолу Иакову, брату Господню
О великий богоизбранный и богопрославленный Апостоле Иакове, брате Господень! Ты еси великий архиерей Града Святаго, теплый наш заступник и ходатай, предстоящий Престолу Пресвятыя Троицы. Не отрини нас от твоего заступления, но воздвигни нас, низверженных грехи многими. Имеяй власть решити и вязати, разреши зол наших соузы, любве Божией причти нас и Царствия Небеснаго причастники, блаженне, соделай молитвами твоими. Моли Христа Спаса, да сподобит непреткновенно совершати странствие наше земное, да вечныя и блаженныя жизни на небеси сподобившеся, с тобою вкупе возможем выну восхваляти Троицу Нераздельную и воспевати Едино Божество Отца и Сына и Духа Всесвятаго во веки веков. Аминь.
Кондак 1
Избранный хранителю Пресвятыя Девы Марии, пестуне и кормителю Богочеловека, праведный Иосифе, прославляя служение твое неизреченной тайне воплощения Бога Слова, похвальная восписуем ти. Ты же ныне, предстоя престолу Христа Бога нашего и имея велие дерзновение к Нему, молися о нас, взывающих ти: Радуйся, праведный Иосифе, скорый помощниче и молитвенниче о душах наших.
Икос 1
Ангелом непостижимую тайну рождения Бога Слова от Пренепорочныя Девы соблюдая чисту от клеветы людей и коварства диавола, тебе, праведный Иосифе, смиреннаго тектона, избра Бог быти хранителя и свидетеля девства Пресвятыя Марии. Темже прославляя тя, яко избраннаго таинника Божия, взываем ти: Радуйся, честная отрасле от корене Иессеова; Радуйся, внутрь украшенный царским величием. Радуйся, скудостью в земном духовное стяжавый богатство; Радуйся, безвестностью славу вечную обретый. Радуйся, славный паче царей; Радуйся, праведный паче патриархов и праотцев. Радуйся, праведный Иосифе, скорый помощниче и молитвенниче о душах наших.
Кондак 2
Видя Деву Марию, при храме воспитавшуюся, совершеннолетию сущу, первосвященник Захария возопи ко Господу: Господи, покажи мужа, достойнаго обручитися с Девою; егда же процвете жезл Иосифа, вручая ему Деву, воспеваше Богу: Аллилуиа.
Икос 2
Разумна есть всем концем земли праведность твоя, святый Иосифе, яко несравненныя чести сподобился еси обрученником быти Преблагословенныя Девы, из Неяже безмужно произыде Христос Бог, ты бо крепкия ради веры, чистоты, смирения и преспеяния во всех добродетелех на сие избран был еси. Темже взываем ти: Радуйся, праведне Чистейшей обручивыйся; Радуйся, муже веры, приявший под кров свой Святую Деву Марию, верою соделавшуюся Престолом Божиим. Радуйся, смиренный духом; Радуйся, простый сердцем. Радуйся, добродетелями преукрашенный; Радуйся, святый, Святейшей послуживший. Радуйся, праведный Иосифе, скорый помощниче и молитвенниче о душах наших.
Кондак 3
Сила Вышняго осени тогда к зачатию неискусобрачную, дивной тайны не ведущу Иосифу, да от самого Бога наученный, возопиет к Нему: Аллилуиа.
Икос 3
Имущую Богоприятную утробу Деву видев, Иосиф смятеся, зря не к брачней и бракоокрадованную помышляя; но праведен сый, восхоте ю тай пустити, Богу, ведущему вся, суд вверяя и нас научив взывати: Радуйся, целомудрия ревнителю; Радуйся, израильтянине, в нем же льсти несть. Радуйся, благий сердцем; Радуйся, кроткий нравы. Радуйся, все упование на Бога полагаяй; Радуйся, промышлению Его себе и других вверяяй. Радуйся, праведный Иосифе, скорый помощниче и молитвенниче о душах наших.
Кондак 4
Бурю помышлений сумнительных целомудреннаго Иосифа укрощая, Ангел открывает тайну рождения от безневестныя Марии Сына Божия, Спасителя мира, якоже глагола: и наречеши имя Ему Иисус, Той бо спасет люди Своя от грех их, Ему же вопием вси: Аллилуиа.
Икос 4
Слышав в писании Господа, глаголющаго: се Дева в чреве приимет и родит сына Эммануила, веровал еси, праведный Иосифе, глаголанному от Ангела, яко книгу запечатленную, в ней же перстом Отчим написася Слово, приял еси Марию в дом свой, яко раб, служа Непорочней со страхом и ревностию. Сего ради взываем ти: Радуйся, яко приложил еси сердце твое к познанию закона Божия; Радуйся, яко открыл еси смысл твой к принятию таин Божиих. Радуйся, яко прежде всех людей сподобился еси уведети велию благочестия тайну, яко на земли явися Бог; Радуйся, яко познал еси пришествие Его быти ради спасения людей от грех их. Радуйся, яко несомненно уверовал еси, яже быша тебе откровена; Радуйся, яко вера вменися тебе в правду. Радуйся, праведный Иосифе, скорый помощниче и молитвенниче о душах наших.
Кондак 5
Богоизбранную Отроковицу приимши в дом свой, блаженне Иосифе, любил еси Ю, яко обручницу, почитал еси Ю, яко Пречистую Деву и Матерь Спасителя мира, и служил Ей со страхом и благоговением, вседушно подвизаяся, да совершатся вся в Законе и пророцех писанная, и купно с Мариею вопия Богу: Аллилуиа.
Икос 5
Видев в яслех Вифлеемских звезду, возсиявшую от Иакова, первый поклонился еси Рожденному, и егда небо звезду, Ангели пение, пастыри исповедание и волсви поклонение и дары приношаху Ему, ты же, праведный Иосифе, всего себе принесл еси в дар Господу, и жизнь и попечения и труды отдавая на служение Ему. Сего ради вопием ти: Радуйся, узревший прежде всех восхождение на земли незаходимаго Солнца правды; Радуйся, первый на земли свидетелю и служителю воплощения Сына Божия, прежде век от Отца рожденнаго. Радуйся, тектоне земный, сподобивыйся имени отца Архитектона Небеснаго; Радуйся, хранителю и попечителю Отрочати, Ему же со страхом служат чины Ангельские. Радуйся, благоговейный служителю Матери Бога Слова. Радуйся, праведный Иосифе, скорый помощниче и молитвенниче о душах наших.
Кондак 6
Проповеданнаго Законом и пророки яко человека осмодневна обрезал еси, и хранимое в Троичном Совете имя Иисус, яко драгоценный бисер от сокровищ пренебесных принесенный, во откровение всех людей подал еси, Иосифе, им же Ангелов удивив, человеков обрадовав, демонов устрашив, и, яко миром благовонным всю вселенную облагоухав, возопил еси к Богу: Аллилуиа.
Икос 6
Возсиявший тебе, праведный Иосифе, в младенце Иисусе проречением Симеона свет во откровение языков и славу людей Израилевых, абие облаком скорби покрывается: народ бо смущается, Ирод беснуется, души Отрочати ища, в сердце Матери оружие пройти предрекается, да вера и терпение твое явны будут всем. Темже тебе, яко крепкому в терпении и в вере непоколебимому, взываем: Радуйся, яко злато в горниле, очищаемый непрестанно искушениями; Радуйся, в радости смиренный, в скорби же терпеливый. Радуйся, всегда верный тайнам, вверенным тебе; Радуйся, в мужестве непоколебимый. Радуйся, верою, яко звездою, в мрачных путех жизни руководимый; Радуйся, упование на Бога, яко якорь, в бурях житейскаго плавания имевый. Радуйся, праведный Иосифе, скорый помощниче и молитвенниче о душах наших.
Кондак 7
Хотяй спасти от злобы Иродовы пришедшаго спасти мир, не вопрошал еси, дивный Иосифе, Ангела, дающаго ти повеление о бегстве в Египет, иныя спасаяй себе ли не может спасти; но яко муж веры, яко новый Авраам, выну готов сый на послушание, не помышляя о трудах пути, ниже испытуя времени возвращения, абие же с Мариею и Младенцем устремился еси в Египет, радостно вопия Богу: Аллилуиа.
Икос 7
Новый в Египте показался еси Иосиф паче онаго древняго патриарха, спасшаго люди Египетския от глада: ты бо спасл еси от смерти Спасителя мира и людем Египетским, гладом нечестия гибнущим, хлеб животный принесл еси и семена вечной жизни насеял еси, от них же возрасте дивное прозябение в пустынях Египетских. Темже вопием ти: Радуйся, скорби и труды Христа ради в пути радостно терпевый; Радуйся, детоводителю Отрока Иисуса, в пустыни водившаго иногда Израиля столпом огненным и облачным. Радуйся, питателю Питавшего люди Своя манною; Радуйся, носивший на руках Творца и Носителя всея твари. Радуйся, спасый от Иродовой злобы Спасшаго иногда люди Божии от горькой работы фараоновой; Радуйся, Египту за рабство благодать сыноположения предуказавый. Радуйся, праведный Иосифе, скорый помощниче и молитвенниче о душах наших.
Кондак 8
Странное видев чудо, еже о Иисусе, Бога по предречению родитися во плоти имеюща, и младенца повита в яслех, Деву Матерь, Ангелов славословие и плоти обрезание, волхвов с востока пришествие с дары на поклонение и бегство в Египет от Иродова неистовства, спасение всех людей и Свет языков, якоже рече Симеон, и оружие в сердце родившей, познал еси Его Бога истинна быти и истинна человека и сего ради возопил еси Ему: Аллилуиа.
Икос 8
Всего себе предав Богу, чрез Ангела воззвавшему Сына Своего из Египта, последовал еси велению Его и вселился еси с Иисусом и Материю Его в Назарете, да сбудется слово пророка о нем, яко Назорей наречется. Темже и мы тебе, яко верному слуге Божию, вопием: Радуйся, споспешниче Божия изволения; Радуйся, соучастниче Божия домостроительства. Радуйся, присный собеседниче Ангелов; Радуйся, на земли в глубины таин небесных посвященный. Радуйся, пророков проречения о Иисусе слышавый; Радуйся, вся благоговейно в глубине сердца сохранивый, никому же поведая. Радуйся, праведный Иосифе, скорый помощниче и молитвенниче о душах наших.
Кондак 9
Всяко колено небесных, земных и преисподних покланяется о имени Иисусовом, тебе же, чудный Иосифе, повинуяся бе Отроча Иисус, яко отцу. Мы же таковому к тебе снисхождению Господа чудящеся, вопием Ему: Аллилуиа.
Икос 9
Вития многовещанная недоумеют по достоянию восхвалити тя, праведный Иосифе: Матерь Божия, Царица неба и земли именует тя господином своим, воплотившийся Сын Божий нарицает тя отцем, и дом твой на земли бысть вместилище святыни пренебесныя, яко в нем обиташе Царь неба и земли. Темже мы смиренно вопием ти: Радуйся, избранниче Божий, иже храняше кивот святыни пренебесныя; Радуйся, дивный тектоне, в его же доме живяше Творец неба и земли. Радуйся, питателю и попечителю Отрока Иисуса, иже, яко Бог, дает бытие всем тварям и промышляет о всем мире, видимом и невидимом; Радуйся, яко на земли сподобился еси лицезрети Сына Божия и держати Его в объятиях, и лобызати Его. Радуйся, яко и по отшествии в горния обители во свете лица Его, Царя славы, блаженствуеши и выну прославляеши Его со Отцем и Святым Духом. Радуйся, праведный Иосифе, скорый помощниче и молитвенниче о душах наших.
Кондак 10
Спасти можеши всякаго, к твоему предстательству и заступлению прибегающаго, блаженне Иосифе, како бо, иже на земли бе повинуяся тебе во всем, не услышит тя предстояща ныне пред Ним на небе и вопиюща с Ангельскими лики: Аллилуиа.
Икос 10
Стена еси крепкая всем, к твоему предстательству прибегающим, праведный Иосифе, темже не презри и нас, к твоему заступлению притекающих, в бурях искушений, в бедах и скорбех житейских взывающих ти: Радуйся, скорый заступниче наш в нуждах и напастех; Радуйся, сильный предстателю о нас пред Богом. Радуйся, твердое упование наше в буре смущения и недоумении; Радуйся, скорое избавление от клеветы человеческия. Радуйся, питателю Того, иже носит всяческая глаголом силы Своея; Радуйся, избавляющий нас от глада душевнаго и всякия скорби. Радуйся, праведный Иосифе, скорый помощниче и молитвенниче о душах наших.
Кондак 11
Пение всеумиленное приносим ти, богомудре Иосифе, и молим тя, якоже хранил еси от всякаго вреда и озлобления самого Христа Господа, сохрани своим предстательством пред Ним Церковь Его Святую Православную от всякаго озлобления врагов видимых и невидимых, огради заступлением твоим от всякия козни страну нашу Российскую, да тихое и безмолвное житие провождающе, вопием Богу: Аллилуиа.
Икос 11
Светоподательна светильника, сущим во тьме неразумия явльшагося, узрел еси во храме двоенадесятилетняго Отрока Иисуса, подающа свет истиннаго ведения учителям закона Божия и открывающа тайну Своего великаго служения по предопределению Отца Нeбеснаго. Темже вопием ти: Радуйся, верный хранителю закона Отеческаго; Радуйся, яко ревнуя о соблюдении закона, и Отрока Иисуса в дом Отца Небеснаго приводил еси. Радуйся, яко егда оста Отрок Иисус в Иерусалиме, мневше Его в дружине суща, вкупе с Материю Его отечески печалися о Нем; Радуйся, яко иска Его во сродницех и знаемых и не обретше, возвратися в Иерусалим и по триех днех обрете Его в церкви, седящаго посреде учителей и послушающаго их, и вопрошающаго их. Радуйся, яко слышал еси откровение тайны, егда глаголаше Отрок Иисус: не весте ли, яко в тех, яже Отца моего, достоит быти Ми; Радуйся, видевый и свидетельствовавый, яко Иисус преспеваше премудростию и возрастом, и благодатию у Бога и человек. Радуйся, праведный Иосифе, скорый помощниче и молитвенниче о душах наших.
Кондак 12
Благодатию у Бога и человеков видя преспевающа Отрока Иисуса и с возрастом тела премудростию преспевающа, вся слагал еси в сердце твоем, яко раб верный, храня вверенное сокровище в тайне до дне, внегда начаша вопити Ему вси верующии яко Богу и Спасителю мира: Аллилуиа.
Икос 12
Поюще труды и подвиги твоя, славим и блаженное успение твое: на руках бо Бога Слова и Матери Его сладце почил еси от трудов твоих, праведный Иосифе, блаженной вечности имея несомненное уверение. Темже вопием ти: Радуйся, верный в великом служении; Радуйся, сего ради величайшей почести от Бога сподобивыйся. Радуйся, содруживыйся на земли с славою и красотою неба; Радуйся, Отцем будущаго века в будущий век с миром отпущенный. Радуйся, благовествовавый Давиду радость велию; Радуйся, всем сущим во аде весть известную принесший, яко прииде Христос, имеяй свободити и спасти род человеческий. Радуйся, праведный Иосифе, скорый помощниче и молитвенниче о душах наших.
Кондак 13
О святый и праведный Иосифе! Приими сие малое моление наше и твоим сильным ходатайством ко Христу Богу умоли Его, да благодатию Своею соделает нас тверды и непоколебимы в православной вере, ревностны и непреткновенны в соблюдении заповедей Его, и дарует вся полезная к временному и вечному житию нам, вопиющим Ему: Аллилуиа.
(Этот кондак читается трижды, затем икос 1 и кондак 1)
Молитва святому праведному Иосифу, обручнику Пресвятыя Девы Марии
О святый праведный Иосифе! Ты еще на земли сый, велие имел еси дерзновение к Сыну Божию, иже благоизволи именовати тя Отца Своего, яко обрученика Своея Матери, и послушати тя: веруем, яко ныне с лики праведных во обителех небесных водворяяся, услышан будеши во всяком твоем прошении к Богу и Спасителю нашему. Темже, ко твоему покрову и заступлению прибегающе, смиренно молим тя: якоже сам от бури сумнительных помышлений избавлен был еси, сице избави и нас, волнами смущений и страстей обуреваемых: якоже ограждал еси Всенепорочную Деву от клеветы человеческия, огради и нас такожде от всякия клеветы напрасныя: якоже хранил еси от всякого вреда и озлобления воплотившагося Господа, сице сохраняй твоим заступлением Церковь Его православную и всех нас от всякаго озлобления и вреда. Веси, святче Божий яко и Сын Божий во днех плоти Своея в телесных потребах нужду имеяши, и ты послужил еси им: того ради молим тя, и нашим временным нуждам благопоспеши твоим ходатайством, подая нам вся благая, в житии сем потребная. Изряднее же просим тя, исходатайствуй нас оставление грехов прияти от нареченнаго ти Сына, Единороднаго же Сына Божия, Господа нашего Иисуса Христа и достойны быти наследия Царства Небеснаго нас предстательством твоим сотвори, да и мы, в горних селениих с тобою водворяющеся, прославим Единаго Триипостаснаго Бога, Отца и Сына и Святаго Духа, ныне и во веки веков. Аминь.