Акафисты - 19 января 2025

Текст утвержден Священным Синодом
Русской Православной Церкви
27 декабря 2000 года
(журнал б/н)

Конда́к 1

Избра́нный Го́сподем Це́ркве Ру́сския свети́льниче, изря́дный подви́жниче и и́стинный служи́телю Христо́в, богому́дре святи́телю Феофа́не! Восхваля́ем тя любо́вию и чтим по́двиги и труды́ твоя́, и́миже ве́рным лю́дем до́бре послужи́л еси́, и в затво́ре пребыва́я, благода́тными уче́ньми путь спасе́ния начерта́л еси́. Ны́не же, престо́лу Бо́жию предстоя́, о нас моли́ся, зову́щих ти:

Ра́дуйся, святи́телю Феофа́не, прему́дрый учи́телю и христиа́нскаго жития́ наста́вниче.

И́кос 1

А́нгельския чистоты́ взыску́я и ве́лию любо́вь ко Го́споду име́я, по́двиг и́ноческаго жития́ подъя́л еси́, святи́телю преди́вный. Му́дрости же дар, от Го́спода ти да́нный, стори́цею умно́жив, лю́дем во спасе́ние послужи́л еси́. Сего́ ра́ди и мы с любо́вию вопие́м ти:

Ра́дуйся, па́че всего́ земна́го Го́спода возлюби́вый;

ра́дуйся, на Него́ еди́наго все упова́ние возложи́вый.

Ра́дуйся, от младе́нчества се́рдце свое́ Го́сподеви преда́вый;

ра́дуйся, от ю́ности ра́зум свой Бо́жиею прему́дростию напита́вый.

Ра́дуйся, а́нгельскаго жития́ ревни́телю;

ра́дуйся, Ду́ха Свята́го стяжа́телю.

Ра́дуйся, на лови́тву челове́ков Бо́гом предъизбра́нный;

ра́дуйся, я́ко лучеза́рный свети́льник, Го́сподем возже́нный.

Ра́дуйся, святи́телю Феофа́не, прему́дрый учи́телю и христиа́нскаго жития́ наста́вниче.

Конда́к 2

Ви́дев, я́ко вся́кая жите́йская сла́дость быва́ет печа́ли прича́стна, свя́тче Феофа́не, суету́ суе́т возненави́дел еси́ и кра́сная ми́ра сего́ отве́ргл еси́, вседу́шно Бо́гу себе́ преда́в, поя́ Ему́: Аллилу́иа.

И́кос 2

Разуме́нием кни́жныя прему́дрости оби́льно от Бо́га измла́да одаре́нный, ум свой чте́нием святы́х писа́ний пита́л еси́, обрета́я в них си́лу вели́ку и свет духо́вный. Мы же, ве́дуще сие́, со умиле́нием к тебе́ взыва́ем:

Ра́дуйся, благочести́вых роди́телей отроча́ богоизбра́нное;

ра́дуйся, сокро́вище целому́дрия, благода́тию свы́ше испо́лненное.

Ра́дуйся, изде́тска к Бо́гу любо́вию пламене́вый;

ра́дуйся, от ю́ности к послуша́нию прилежа́вый.

Ра́дуйся, кро́тостию и незло́бием Го́споду подража́вый;

ра́дуйся, путь де́вства и чистоты́ избра́вый.

Ра́дуйся, и́ноческаго жития́ всем се́рдцем возжела́вый;

ра́дуйся, всего́ себе́ на служе́ние Го́сподеви преда́вый.

Ра́дуйся, святи́телю Феофа́не, прему́дрый учи́телю и христиа́нскаго жития́ наста́вниче.

Конда́к 3

Си́ла Бо́жия тя, святи́телю Феофа́не, немощны́й сосу́д челове́ческий, исто́чник прему́дрости соде́ла и па́стыря до́браго лю́дем дарова́, о спасе́нии их ду́шу полага́ющаго и Го́споду непреста́нно вопию́щаго: Аллилу́иа.

И́кос 3

Име́яй в се́рдце твое́м еди́наго Го́спода, ты, уго́дниче Бо́жий, с ра́достию ве́лиею вся сокро́вища души́ твоея́ и ра́зума на служе́ние Це́ркви святе́й отда́л еси́, уча́ и наставля́я вся прибега́ющия к тебе́. Мы же, ублажа́юще труды́ твоя́, вопие́м ти си́це:

Ра́дуйся, ве́лиею му́дростию Го́сподем напое́нный;

ра́дуйся, в труде́х подви́жничества испыта́нный.

Ра́дуйся, архиере́ю. Бо́гом избра́нный;

ра́дуйся, моли́твенниче о нас ко Го́споду неуста́нный.

Ра́дуйся, святи́тельскаго са́на смире́нный носи́телю;

ра́дуйся, богому́дрия ве́рный учи́телю.

Ра́дуйся, душевре́дных раско́лов искорени́телю;

ра́дуйся, ве́ры правосла́вныя ревни́телю.

Ра́дуйся, святи́телю Феофа́не, прему́дрый учи́телю и христиа́нскаго жития́ наста́вниче.

Конда́к 4

Бу́рею смяте́ния испо́лнишася ча́да па́ствы твоея́, хотя́щу ти, святи́телю Феофа́не, по́двигу затво́ра себе́ посвяти́ти, последи́ же возра́довахуся, ви́дяще тя наипа́че о спасе́нии их пеку́щася, и воспе́ша Бо́гу: Аллилу́иа.

И́кос 4

Слы́шавше лю́дие о вселе́нии твое́м в пу́стынь Вы́шенскую стека́хуся к тебе́ и, почита́юще тя па́стыря до́браго, проси́ша моли́тися о них и ко спасе́нию наста́вити. Мы же, ве́дяще сие́, прино́сим ти похвалы́ сицевы́я:

Ра́дуйся, я́ко оте́ц чадолюби́вый па́стве твое́й бы́вый;

ра́дуйся, непреста́нно о ней попече́ние име́вый.

Ра́дуйся, па́стырю, ду́шу твою́ за о́вцы полага́вый;

ра́дуйся, неуста́нно спасе́нию их соде́йствовавый.

Ра́дуйся, тишину́ и богомы́слие наипа́че возлюби́вый;

ра́дуйся, благо́ю во́лею себе́ от ми́ра затвори́вый.

Ра́дуйся, и́ноков любвеоби́льный наста́вниче;

ра́дуйся, оби́тели Вы́шенския неугаси́мый свети́льниче.

Ра́дуйся, святи́телю Феофа́не, прему́дрый учи́телю и христиа́нскаго жития́ наста́ниче.

Конда́к 5

Боготе́чная звезда́ яви́лся еси́, святи́телю досточу́дне, во оби́тели бо Вы́шенстей в по́двизех теле́сных и духо́вных пребыва́я, о́браз до́брый был еси́ христолюби́вой бра́тии, на тя взира́ющей, науча́я всех немо́лчно пе́ти Го́споду:Аллилу́иа.

И́кос 5

Ви́девше бра́тия тя, во смире́нии и кро́тости по́двиг и́ноческий соверша́юща, прихожда́ху к тебе́ и назида́хуся. Та́кожде и мы, почита́юще тя и́стиннаго избра́нника Бо́жия, вопие́м сицева́я:

Ра́дуйся, исто́чниче любве́ ко Го́споду неизсяка́емый;

ра́дуйся, кла́дезю смире́ния и кро́тости, жа́ждущих напая́ющий.

Ра́дуйся, жи́тнице, пи́щею духо́вною всех насыща́ющая;

ра́дуйся, свеще́, све́том ве́ры озаря́ющая.

Ра́дуйся, воздержа́ния до́брый рачи́телю;

ра́дуйся, спасе́ния душ усе́рдный попечи́телю.

Ра́дуйся, Правосла́вия пропове́дниче неуста́нный;

ра́дуйся, кри́не ра́йский, в пусты́не процве́тший.

Ра́дуйся, святи́телю Феофа́не, прему́дрый учи́телю и христиа́нскаго жития́ наста́вниче.

Конда́к 6

Пропове́дник немо́лчный и веща́тель и́стин Бо́жиих был еси́ во святи́тельстем служе́нии, просвеща́я и наставля́я па́ству твою́, досточу́дне Феофа́не, и, в затво́ре сый, не оста́вил еси́ благода́тными словесы́ твои́ми всех, притека́ющих к тебе́, подвиза́я пе́ти Бо́гу: Аллилу́иа.

И́кос 6

Возсия́, я́ко звезда́ пресве́тлая, му́дрость твоя́, ди́вный служи́телю Христо́в: Бо́жиим бо изволе́нием из затво́ра, тя сокры́вшаго, яви́шася пото́цы живы́х слове́с твои́х и откры́ся цельбоно́сный исто́чник благода́тных уче́ний, утоля́яй вся́каго жа́ждущаго и с ве́рою к нему́ припа́дающаго. Мы же взыва́ем ти си́це:

Ра́дуйся, устна́ми твои́ми му́дрость Бо́жию веща́вый;

ра́дуйся, е́юже жа́ждущия напои́вый.

Ра́дуйся, в по́двизех и́ноческаго жития́ неутоми́мый;

ра́дуйся, сто́лпе правосла́вия непоколеби́мый.

Ра́дуйся, обы́чаев грехо́вных му́дрый искорени́телю;

ра́дуйся, к доброде́тели неуста́нный води́телю.

Ра́дуйся, душ на́ших цели́телю; ра́дуйся, благоче́стия на́шего окорми́телю.

Ра́дуйся, святи́телю Феофа́не, прему́дрый учи́телю и христиа́нскаго жития́ наста́вниче.

Конда́к 7

Хотя́ Ца́рствия Бо́жия дости́гнути, ты, святы́й о́тче, отре́клся еси́ ми́ра, и обре́л еси́ благода́ть Ду́ха Свята́го, и с любо́вию служи́л еси́ лю́дем, подража́я Пастыренача́льнику Христу́ и поя́ Тому́: Аллилу́иа.

И́кос 7

Но́ваго подви́жника и уго́дника Христо́ва, смире́ния и кро́тости испо́лненнаго, ви́дяще тя лю́дие, с наде́ждою устреми́шася в пу́стынь Вы́шенскую, ча́юще твоея́ благода́тныя по́мощи. Та́кожде и мы, по́мощи от тебе́ прося́ще, вопие́м такова́я:

Ра́дуйся, кро́тостию ду́ха твоего́ мно́гия к Бо́гу обрати́вый;

ра́дуйся, умы́ помраче́нныя просвети́вый.

Ра́дуйся, чистоту́ а́нгельскую на земли́ стяжа́вый;

ра́дуйся, стра́ждующия твое́ю любо́вию уврачева́вый.

Ра́дуйся, незло́бия ди́вный наста́вниче;

ра́дуйся, благоче́стия всесве́тлый свети́льниче.

Ра́дуйся, к покая́нию всех призыва́яй;

ра́дуйся, по́мощи твоея́ прося́щих не оставля́яй.

Ра́дуйся, святи́телю Феофа́не, прему́дрый учи́телю и христиа́нскаго жития́ наста́вниче.

Конда́к 8

Стра́нный и ди́вный по́двиг яви́л еси́, святи́телю, в житии́ твое́м: в труде́х и непреста́нном богомы́слии пребыва́яй, ра́зума духо́внаго сокро́вище стяжа́л еси́ и писа́ньми твои́ми це́ркви усе́рдно послужи́л еси́. Мы же, ви́дяще сие́, во умиле́нии серде́ц на́ших благода́рно пое́м Бо́гу: Аллилу́иа.

И́кос 8

Всем вся явля́ешися, святи́телю Бо́жий: па́стырь и оте́ц, учи́тель и наста́вник и и́стинный пропове́дник, писа́ния бо твоя́ во всех граде́х и ве́сех до ны́не вопию́т немо́лчным благове́стием. Сего́ ра́ди мы, ча́да твоя́ духо́вныя, с любо́вию глаго́лем ти:

Ра́дуйся, росо́ю Ду́ха Свята́го напое́нный;

ра́дуйся, све́том благода́ти Бо́жия осене́нный.

Ра́дуйся, сокро́вище нетле́нное стяжа́вый;

ра́дуйся, дея́нием апо́стольским поревнова́вый.

Ра́дуйся, к богопозна́нию путь указу́ющий;

ра́дуйся, му́дрость благода́тную взыску́ющий.

Ра́дуйся, Це́ркве Ру́сския процвете́ние;

ра́дуйся, святы́х оте́ц украше́ние.

Ра́дуйся, святи́телю Феофа́не, прему́дрый учи́телю и христиа́нского жития́ наста́вниче.

Конда́к 9

Всяк час привре́меннаго жития́ твоего́, святи́телю, еди́ному на потре́бу рабо́тал еси́, и ду́шу твою́ хра́мину чи́сту Ду́ха Свята́го соде́лал еси́, возгрева́я се́рдце твое́ непреста́нною моли́твою Иису́совою и воспева́я Го́споду: Аллилу́ия.

И́кос 9

Вити́я златовеща́нный, кро́ткий и му́дрый яви́лся еси́ всем, внима́вшим тебе́ с ве́рою, и си́лою слове́с твои́х науча́л еси́ пра́вде Бо́жией. Сего́ ра́ди приими́ от нас, блаже́нне о́тче, восхвале́ния сицева́я:

Ра́дуйся, святи́телю Бо́жий, смире́нный и кро́ткий;

ра́дуйся, па́стырю благи́й и чадолюби́вый.

Ра́дуйся, земли́ Росси́йския златоу́сте;

ра́дуйся, богоявле́нию тезоимени́те.

Ра́дуйся, душ заблу́дших и́стинный путеводи́телю;

ра́дуйся, печа́льных ско́рый уте́шителю.

Ра́дуйся, немощны́м в ве́ре непоколеби́мое утвержде́ние;

ра́дуйся, уныва́ющим в труде́х мно́зех ободре́ние.

Ра́дуйся, святи́телю Феофа́не, прему́дрый учи́телю и христиа́нского жития́ наста́вниче.

Конда́к 10

Спасе́ния путь от грехо́вных тене́т ча́дом Бо́жиим начерта́л еси́, уго́дниче Христо́в, сказу́я о та́йнах бра́ни неви́димыя, и вене́ц вожделе́нный жа́ждущим спасе́ния показа́л еси́, призыва́я благода́рно пе́ти Бо́гу: Аллилу́иа.

И́кос 10

Стена́ и защище́ние ста́да Христо́ва от волко́в, губя́щих е́, яви́шася богому́драя писа́ния твоя́, святи́телю Бо́жий, и́миже огражда́еши ве́рных на пути́ ко спасе́нию. Мы же, просвеща́емии уче́ньми твои́ми, благогове́йно взыва́ем ти си́це:

Ра́дуйся, пра́вило ве́ры;

ра́дуйся, наста́вниче прему́дрый.

Ра́дуйся, учи́телю благоче́стия;

ра́дуйся, искорени́телю нече́стия.

Ра́дуйся, свети́льниче пресве́тлый;

ра́дуйся, пропове́дниче дерзнове́нный.

Ра́дуйся, я́ко се́ятель до́брый ни́ву Христо́ву возде́лавый;

ра́дуйся, я́ко ко́кош, ча́да твоя́ охраня́ющий.

Ра́дуйся, святи́телю Феофа́не, прему́дрый учи́телю и христиа́нского жития́ наста́вниче.

Конда́к 11

Пе́ние всехва́льное прино́сим ти, святи́телю, и ублажа́ем тя, просла́вившаго житие́м и по́двиги твои́ми свято́е и́мя Творца́ и Бо́га на́шего. Сподо́би и нас моли́твами твои́ми благонра́вное житие́ препроводи́ти, да вку́пе с тобо́ю воспои́м Тому́: Аллилу́иа.

И́кос 11

Светоза́рное житие́ твое́, преди́вный Затво́рниче, не скры́ся от и́щущих пра́вды Бо́жией. Благи́й же коне́ц твой безмяте́жный и ми́рный показа́ тя и́стинный сосу́д Бо́жией благода́ти. Мы же еди́ными усты́ со умиле́нием глаго́лем ти:

Ра́дуйся, чистоты́ душе́вныя и теле́сныя сосу́де благослове́нный;

ра́дуйся, до конца́ Го́споду послужи́вый.

Ра́дуйся, по кончи́не твое́й блаже́нства ве́чнаго удосто́ивыйся;

ра́дуйся. Ца́рствие Бо́жие насле́довавый.

Ра́дуйся, оби́тели Вы́шенския ди́вное украше́ние;

ра́дуйся, земли́ Тамбо́вския и Ша́цкия просвеще́ние.

Ра́дуйся, па́ствы ряза́нския похвале́ и ра́дование;

ра́дуйся, душ на́ших попече́ние.

Ра́дуйся, святи́телю Феофа́не, прему́дрый учи́телю и христиа́нского жития́ наста́вниче.

Конда́к 12

Благода́тию Бо́жиею преизря́дно озаре́нный и па́стве твое́й му́дре и предо́бро послужи́вый, ди́вный и кро́ткий святи́телю, не преста́ни о нас хода́тайствовати пред Го́сподем на Небеси́, иде́же предстои́ши в немо́лчном славосло́вии, со а́нгелы взыва́я Тому́: Аллилу́иа.

И́кос 12

Пою́ще по́двиги твоя́, со упова́нием припа́даем к честны́м моще́м твои́м (или́:ико́не твое́й), святи́телю Бо́жий, и мо́лим тя, небе́снаго покрови́теля на́шего и вели́каго о нас предста́теля пред Престо́лом Го́спода Сла́вы, умиле́нно взыва́юще:

Ра́дуйся, уго́дниче Бо́жий преизря́дный;

ра́дуйся, подви́жниче Христо́в преди́вный.

Ра́дуйся, предста́телю кре́пкий на тя упова́ющих;

ра́дуйся, засту́пниче ско́рый тя призыва́ющих.

Ра́дуйся, дру́же Христо́в и люби́миче Бо́жий;

ра́дуйся, хода́таю те́плый спасе́ния душ на́ших.

Ра́дуйся, целому́дренных усе́рдный охрани́телю;

ра́дуйся, в ско́рбех на́ших уте́шителю.

Ра́дуйся, святи́телю Феофа́не, прему́дрый учи́телю и христиа́нского жития́ наста́вниче.

Конда́к 13

О, богому́дрый учи́телю, земли́ Ру́сския похвале́ и украше́ние, святи́телю о́тче Феофа́не, кро́ткий и те́плый наш засту́пниче! Приими́ от нас ма́лое сие́ моле́ние, тебе́ приноси́мое, и душ на́ших благода́рное восхвале́ние. Не забу́ди нас, гре́шных, в моли́твах твои́х, да, упова́юще на тя, непреста́нно взыва́ем Го́споду Сил: Аллилу́иа.

Сей конда́к глаго́лется три́жды.
И па́ки чте́тся 1-й и́кос и 1-й конда́к.

Моли́тва

О, святи́телю о́тче Феофа́не, архиере́ю пресла́вный и преди́вный затво́рниче, Бо́жий избра́нниче и Тайн Христо́вых служи́телю, богому́дрый учи́телю и апо́стольских слове́с изря́дный изъясни́телю, оте́ческих добротолю́бных сказа́ний описа́телю, христиа́нского благоче́стия изя́щный пропове́дниче и жи́зни духо́вныя иску́сный наста́вниче, по́двигов мона́шеских усе́рдный ревни́телю и всем лю́дем благода́ти хода́таю! Ны́не к тебе́, на Небесе́х Бо́гу предстоя́щему и о нас моля́щемуся припа́даем и си́це взыва́ем: испроси́ у Всеще́драго Бо́га Це́ркви Росси́йстей и стране́ на́шей мир и благостоя́ние, святи́телем Христо́вым — и́стины Боже́ственныя досто́йное охране́ние, па́ствы до́брое окормл'ение, лжеучи́телей и еретико́в изря́дное посрамле́ние, подвиза́ющимся — смире́ние, страх Бо́жий и чистоту́ душе́вную и теле́сную, учи́телем — богове́дение и му́дрость, уча́щимся — ре́вность и по́мощь Бо́жию. И всем правосла́вным — утвержде́ние на пути́ ко спасе́нию, да вку́пе с тобо́ю просла́вим Бо́жию Си́лу и Прему́дрость Го́спода на́шего Иису́са Христа́, со Безнача́льным Его́ Отце́м, со Пресвяты́м, Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.

Кондак 1

Возбранный Воеводо, Царю неба и земли, Тебе Просветителя нашего зряще во Иордане от раба крещаема, небеса ужасошася, и вся земля вострепета, Ангели же удивишася и вся тварь возрадовася. Мы же недостойнии благодарственно Тебе вопием: ко грешником и мытарем явился еси, да водами омыеши человеков грехи.

Слава Тебе, Сыне Божий, во Иордане крестивыйся и весь мир просвещей, слава Тебе.

Икос 1

Ангельския днесь предгрядите силы, Владыку Христа зряще, ко Иорданским струям грядуща Адамов грех очистити, и смотряще толикое Божие таинство, со страхом прославите велие снисхождение Его, яко Бог человеком уподобися и отнюдь не ведый греха приходит, яко Агнец Божий взяти всего мира грехи. Сего ради прославляюще Божественное явление Христово, воспойте Ему якоже и в Вифлееме славословия сицевая:

Слава Тебе, Сыне Божий, от Отца с небесе в мир сей пришедый. Слава Тебе, Превышний Боже, даже до рабия зрака снисшедый. Слава Тебе, Спасителю мира, яко человек ко Иоанну креститися грядый. Слава Тебе, Просветителю твари, яко нов Адам падшаго Адама грехи на Себе понесый. Слава Тебе, безначальный Свете, велию зарю просвещения всему миру на Иордане возсияти восхотевый. Слава Тебе, Солнце правды, светоносное утро благодати человеком в Богоявлении Твоем даровати возжелавый. Слава Тебе, мир от древния прелести омыти пришедшему. Слава Тебе, велие благочестия таинство нам показавшему. Слава Тебе, чудеса велия нам водами многими сотворившему. Слава Тебе, небеса и всю землю светом разума просветившему. Слава Тебе, фараона мысленнаго в струях Иорданских потопившему. Слава Тебе, новыя люди в водах крещения к вечной жизни приведшему.

Слава Тебе, Сыне Божий, во Иордане крестивыйся и весь мир просвещей, слава Тебе.

Кондак 2

Видев духом Божественный Предтеча Твое, Христе, в мир пришествие, прииде из пустыни на Иордан, светло людем вопия: Приближися и явися Избавление наше, покайтеся и водою очиститеся, и срести Его потщитеся, да чистыми помышлении просвещаеми, душами чистыми и нескверными усты с веселием воспойте Ему: Аллилуия.

Икос 2

Разум небесный в себе являя, светильник Света, великий Предтеча, возопи к людем: Очиститеся, се бо предгрядет Христос от тли мир избавляяй, разрешити осуждение Адама первозданнаго. Да возрадуется пустыня Иорданова и да процветет, яко крин, земля же вся ныне пророчески да возрадуется. Уготовайте путь Господень и правы сотворите стези Бога нашего, вси с веселием возопийте Ему тако:

Слава Тебе, неизреченный Свете, от светильника миру предъявленный. Слава Тебе, непостижимый Слове, от гласа Твоего Предтечею предреченный. Слава Тебе, Огню чистительный, Егоже действом всякая нечистота потребляется. Слава Тебе, Источниче благодатный, Имже всякое естество человеческое освящается. Слава Тебе, Творче неба и земли, от раба креститися восхотевый. Слава Тебе, Сыне Единородный, на Иордан явитися изволивый. Слава Тебе, Царю правды, у Негоже Предтеча ремень сапогу разрешити убояся. Слава Тебе, Владыко твари, Имже весь род человечь в крещении Твоем возвеселися. Слава Тебе, Превечный Боже, яко явление Твое просвещает и вразумляет младенцы. Слава Тебе, Свете мира, яко пришествие Твое просветляет и умудряет слепцы. Слава Тебе, яко у Тебе источник живота. Слава Тебе, яко во свете Твоем узрим свет.

Слава Тебе, Сыне Божий, во Иордане крестивыйся и весь мир просвещей, слава Тебе.

Кондак 3

Силу Божества Твоего, Христе, уразумев Предтеча, егда со страхом увиде Тя на Иордан пришедша, радуется душею и трепещет, рукою показуя Тя, и глаголет людем: Сей – избавляяй мир от истления. Сей – свобождай нас от скорби. Сей – вместо рабов, сыны Божии нас соделовает. Сей – вместо тьмы просвещает человеки водою Божественнаго крещения. Се – Агнец Божий Вземляй грехи мира, Егоже сретающе, вопием: Аллилуия.

Икос 3

Имея богатство милосердия, ко грешником и мытарем на Иорданскую реку пришел еси, Иисусе, не терпел бо еси зрети от диавола мучимый род человечь, но пришел еси, да паки речеши падшему Адаму: «Где еси? Не скрывайся от Мене. Хощу бо видети тя, аще наг еси и нищ, и тако уподобихся тебе, да не стыдишися». Сего ради проповедуем велие снисхождение Твое, вопиюще Тебе таковая:

Слава Тебе, Пастырю добрый, заблуждшее овча взыскати восхотевый. Слава Тебе, Сыне Единородный, понести тое на рамех пришедый. Слава Тебе, Милосте безмерная, к человеком падшим долу низшедый. Слава Тебе, Любы неизреченная, люди отчаянныя паки горе возведый. Слава Тебе, руки ослабленныя нищим укрепляяй. Слава Тебе, колена расслабленныя убогим исцеляяй. Слава Тебе, пустыню жаждущую яко Ливан возвеселивый. Слава Тебе, пустыню Иорданову, яко Кармил произростивый. Слава Тебе, Милостиве, яко льна курящагося не угасаеши. Слава Тебе, Долготерпеливе, яко трости сокрушенныя не погубляеши. Слава Тебе, взыскати и спасти погибшия пришедый. Слава Тебе, Адама отриновеннаго призвати восхотевый.

Слава тебе, Сыне Божий, во Иордане крестивыйся и весь мир просвещей, слава Тебе.

Кондак 4

Бурею помышлений сумнительных исполнен бысть Предтеча, Христе Царю, егда Ты, яко человек на реку пришел еси и рабское крещение от него прияти восхотел еси, глаголя: простри руку твою и прикоснися верху Моему и ужас весь отряси, совершая повеленное. Трепетен бысть тогда Предтеча и возопи, глаголя: Что к рабу пришел еси, скверны не имый, Господи? Что ми повелеваеши, якоже выше мене? Высоты небесныя никакоже изследих звезд число, ниже землю николиже измерих. Како крещу Носящего горстию тварь? Како просветит светильник Света? Како руку положит раб на Владыку? Аз требую Тобою креститися, да воспою Тебе: Аллилуия.

Икос 4

Слыша Человеколюбец Господь смиренных Предтечевых глагол высоту и видев страх его, рече к нему: добре, о Иоанне, яко благоговееши предо Мною, обаче остави ныне и отложи боязнь твою, должен еси послужити Ми, тако бо подобает нам исполнити всяку правду, да во Мне человеков очистятся греси. Сему человеколюбному слову Твоему внемлюще, с любовию вопием Тебе сице:

Слава Тебе, Христе, Свете истинный, яко милость и истина о тебе сретостеся. Слава Тебе, Царю правды, яко правда и мир о тебе облобызастася. Слава Тебе, Сладчайший Иисусе, яко истина Твоя в Вифлееме от земли возсия. Слава Тебе, Всемилостивейший Спасе, яко правда Твоя во Иордане с небесе приниче. Слава Тебе, Очищение наше, яко водами крещения нас паче снега убеляеши. Слава Тебе, Просвещение наше, яко струями благодати сердце чисто в нас созидаеши. Слава Тебе, преклонивый снисхождением небеса, главу Свою под руку Предтечеву приклонити восхотевый. Слава Тебе, покрываяй водами превыспренняя Своя, в водах Иорданских погрузитися благоволивши. Слава Тебе, Господи сил, Егоже вся боятся и трепещут, велию боязнь Предтече отложити повелевый. Слава Тебе, щедрот Отче, у негоже милость безмерна и неизследованна, милостию Своею грехи мира покрыти изволивый. Слава Тебе, рождейся от Девы, Спасителю наш, посети нас неизреченным снисхождением Твоим. Слава Тебе, явлейся всему миру, Христе Боже наш, освяти нас Божественным явлением Твоим.

Слава Тебе, Сыне Божий, во Иордане крестивыйся и весь мир просвещей, слава Тебе.

Кондак 5

Боготечная Струя сый благости, Господи, в струи Иорданския возшел еси, да водами омыеши человеческий грех. Ужас бе видети Творца небеси и земли в реце обнажшагося и от раба крещение приемлющаго. Ангельския силы дивляхуся, Иордан же река возвращаше струи свои, не могуще терпети огня поядающаго воды его, яко не обычно ему есть Чистаго измывати и Безгрешного отирати. Сего ради веселися Иордане реко, и да радуются источницы и езера, и вся бездны и моря, яко освятися днесь водное естество, свободившеся от таящагося тамо князя тьмы, и вся тварь веселящеся да поет с нами: Аллилуия.

Икос 5

Видев Тя Божественный Иоанн Владыку твари в водах погружаема, да грехи всего мира погрузиши, и, обнажившагося, да Адамову наготу паки облечеши во одежду славы, вострепета душею и возопи Тебе, Агнцу Божию, очищающему согрешения мира: «Не смею прикоснутися верху Твоему, Владыко, Сам мя освяти и просвети, яко Ты еси Живот и Свет и Мир мирови». Обаче по глаголу Твоему со страхом возложи десницу свою на Божественную главу Твою, и крестив Тя, Безгрешна суща, с радостию возопи Тебе сице:

Слава Тебе, Агнче Божий, грехи всего мира взяти на Себе пришедый. Слава Тебе, Спасе милосердый, грехи всех человек потопити в водах Иорданских восхотевый. Слава Тебе, нас от скверны греховныя омывый. Слава Тебе, преступление Адамово разрешивый. Слава Тебе, Твоим на земли Богоявлением всех человек возвеселивый. Слава Тебе, Твоим во Иордане Крещением весь мир просветивый. Слава Тебе, нас ради до образа рабскаго обнищавшему. Слава Тебе, Твоею нищетою нас Обогатившему. Слава Тебе, вражие владычество Твоим смирением до конца низложившему. Слава Тебе, Царство Божие во Твоем крещении яве на земли созидати начавшему. Слава Тебе, путь Спасения на Иордане падшим людем показавшему. Слава Тебе, Свет Боговедения тамо верным Твоим возсиявшему.

Слава Тебе, Сыне Божий, во Иордане крестивыйся и весь мир просвещей, слава Тебе.

Кондак 6

Проповедник дивный и Предтеча Иоанн многая изрече приходящим людем, во еже уготовати Тебе путь, Господи, обаче умолче, Тебе на Иордан пришедшу, зане Ты Сам рекл еси ему: «Не глаголю тебе: рцы Ми, яже глаголеши беззаконным и учиши грешники, точию крести Мя молча». Не подобаше бо гласу человеческому возглашатися, пришедшу Слову Божию и толикому таинству совершающуся, егда Ангели Божии со страхом предстояху и вся тварь вострепета. Сего ради и мы в молчании глубоцем и со многим благоговением вопием в сердце своем: Аллилуия.

Икос 6

Возсия на Иордане всему миру просвещение велие и таинство страшное егда, Владыко Христе, крестився от Иоанна, Ты абие восшел еси от воды, «совозводя с Собою мир», и се отверзошася Тебе небеса, яже древле Адам затвори себе и сущим от него, да паки возрожденнии Тобою человецы восхождение улучат в райские обители, идеже с радостию да воспоют Тебе сице:

Слава Тебе, Царю мира, средостение вражие разрушившему. Слава Тебе, милости Подателю, рай преслушанием затворенный, паки отверзшему. Слава Тебе, небо грехом заключенное, на Иордане паки отверзсто показавшему. Слава Тебе, Ангелы восходящия и нисходяшия отселе явити обетовавшему. Слава Тебе, схождением Твоим небеса до земли приклонившему. Слава Тебе, крещением Твоим землю до небес возведшему. Слава Тебе, откровением небес неизреченный тайны Божия всему миру открывшему. Слава Тебе, явлением горняго мира Святейшее благословение Божие всем верным преподавшему. Слава Тебе, небеса при Илие заключившему, не заключай нам двери милосердия Своего. Слава Тебе, небеса на Иордане отверзшему, отверзи нам входы Божественнаго Чертога Твоего. Слава Тебе, бездну человеколюбия при крещении Твоем нам явившему, возведи от бездн земли всех до вражия отчаяния дошедших. Слава Тебе, восход до третьяго небесе избранным Твоим сотворившему, вознеси в небесныя обители и нас, до глубины греха ниспадших.

Слава Тебе, Сыне Божий, во Иордане крестивыйся и весь мир просвещей, слава Тебе.

Кондак 7

Хотяй Человеколюбец Господь спасти мир во гресех погибающий, яви Троическаго Богоявления Своего великое таинство, и якоже в начале мирскаго бытия Дух Божий ношашеся верху воды, яко жизни Податель, тако и при крещении Твоем, Господи, егда на реце Иорданстей восхотел еси обновити и просветити погибающий род человечь и всю тварь с нами совоздыхающую, Той же Дух Святый паки сниде с небеси отверста в виде голубине и почи над Тобою, Господи, яко над новым Адамом, во еже пребывати отныне в новых людех банею водною возрожденных, да тако силою свыше облеченнии во обновление духа ходити начнут, поюще Богу: Аллилуия.

Икос 7

Новую показал еси тварь, Владыко твари, в Твоем от Иоанна спасительном крещении, зане яко при Нои потопил еси грехи перваго мира, тако и в водах Иорданских паки потопил еси всего мира грехи, новотвориши бо земнородныя огнем и Духом и водою, странное совершая возрождение и обновление чудное. Духом бо новотвориши души, водою же освящаеши тело, назидая человека, и тако таинственно от воды соделоваеши Духом многочадну Церковь, да присно вопием Тебе таковая:

Слава Тебе, Создателю твари, небеса приклонившему и на Иордан снисшедшему. Слава Тебе, Спасителю мира, небеса отверзшему и Духа Божественнаго нам явившему. Слава Тебе, Всеблаже, яко Дух Твой Благий наставит нас на землю праву. Слава Тебе, Всещедре, яко Тойже Дух Твой очистит нас от всякия скверны. Слава Тебе, водою и Духом, обветшавшее грехом естество наше обновившему. Слава Тебе, огнем Божества в струях Иорданских многосветлое просвещение даровавшему. Слава Тебе, Христе, вся Божественныя силы, яже к животу и благочестию, Духом Твоим Святым при крещении верным преподавшему. Слава Тебе, Иисусе, нисшествием Духа Твоего Святаго причастники нас Божественнаго естества сотворившему. Слава Тебе, почившим на Тебе Духом премудрости и разума чистое Боговедение людем открывшему. Слава Тебе, схождением на Тя Духа Божия дух совета и крепости, ведения и благочестия и дух страха Божия нам излившему. Слава Тебе, Иорданскою струею змиевы главы опалившему. Слава Тебе, явлением Духа Божия в виде голубине к голубиной кротости и чистоте девственной нас призвавшему.

Слава Тебе, Сыне Божий, во Иордане крестивыйся, и весь мир просвещей, слава Тебе.

Кондак 8

Странно и дивно бысть явление святыя Троицы на Иордане: первее Сын Возлюбленный явися во плоти от раба крещаемый, абие Дух Святый сниде в виде голубине, последи же Пребожественный Отец возгласи с небесе, свидетельствуя: «Сей есть Сын Мой Возлюбленный, о нем же благоволих». О, велие и преславное таинство: «Возгреме с небесе Господь и Вышний даде глас Свой», да сбудется Давида праотца предречение: «Глас Господень на водах, Бог Славы возгреме, Господь на водах многих. Глас Господень в крепости, Глас Господень в великолепии». Сего ради и мы недостойными устами вопием Тебе из глубины души: Аллилуия.

Икос 8

Весь еси в вышних, Иисусе, выну со Отцем на небесех соседяй, но и от нижних никакоже отступаеши, плотию от Чистыя Девы в Вифлееме рожденный, ныне же на Иордане всему миру явивыйся, да сущии во тьме и сени смертней сидящия просветиши светом Твоего Богоявления. Сего ради, просветившеся светом Троическаго Откровения, вопием Тебе, явившемуся Богу, и на земли виденному и просветившему мир:

Слава Тебе, Сыне Божий, в вышних со Отцем и Духом покланяемый. Слава Тебе, Сыне Отечь, Предтечею от нижних славословимый. Слава Тебе, седый одесную Отца, Отеческим гласом с небеси проповеданный. Слава Тебе, воплотивыйся нас ради, возлюбленным Сыном Божиим от Того всему миру наименованный. Слава Тебе, во Иорданских струях явленный, Троицы Свет незаходимый в крещении Твоем показавый. Слава Тебе, дланию раба крещенный, нас рабов сущих банею пакибытия сыны Божия сотворивый. Слава Тебе, Источниче жизни и безсмертия, паки рождением водою и Духом к первому благородию райскому нас приведый. Слава Тебе, Творче неба и земли, огненным крещением новое небо и землю правды Твоея устроити грядый. Слава Тебе, Восточе востоков, во тьме и сени спящия крещением Твоим просветивый. Слава Тебе, Свете от Света, Свет незримый Духа Твоего в душах наших возсиявый. Слава Тебе, Царю безначальный, чистыми струями крещения Твоего прародительский грех всеконечне омывый. Слава Тебе, Владыко твари, жаждущия люди водою жизни вечныя всебогатно напоивый.

Слава Тебе, Сыне Божий, во Иордане крестивыйся и весь мир просвещей, слава Тебе.

Кондак 9

Все естество Ангельское удивися великому Твоего, Христе, Богоявления таинству: Адама бо грехом истлевшаго обновил еси Иорданскими струями и главы гнездящихся тамо невидимых змиев сокрушил еси во Твоем крещении, и тако «глубины бездны сатанинския» открыл еси «дно», да избавиши ны от тоя «глубоких вод», и да начнеши созидати Царство Твое, не от мира сего сущее, о нем же пророк Давид предрече, глаголя: «Царство Твое – царство всех веков и Владычество Твое – во всяком роде и роде», егоже и мы прославляюще с вои небесными вопием Тебе: Аллилуия.

Икос 9

Вития Божественный и Ангел Божий, Малахией предреченный, великий Предтеча един точию от человек сподобися, Господи, во Твоем крещении Духа пришествие видети и глас Отеческий с небесе слышати, свидетельствующий Твое Богосыновство, да будет первый всему миру проповедник Троическаго Богоявления. Той во утрий день свидетельствова людем, глаголя: «Видех Духа сходяща, яко голубя с небесе, и пребысть на Нем... И аз видех и свидетельствовах, яко Сей есть Сын Божий». Мы же сему богооткровенному свидетельству внемлюще, прославляем Богоявление Твое, Христе, поюще Тебе таковая:

Слава Тебе, Боже предвечный, явлением Святаго Духа свидетельствованный с небесе. Слава Тебе, Агнче непорочный, гласом Предтечи проповеданный на земли. Слава Тебе, Крепосте высочайшая, отверзстыми над Иорданом небесными враты затворенный рай нам открывшему. Слава Тебе, Милосте предвечная, крещением Твоим новый мир от вод Иорданских человеком явившему. Слава Тебе, Царю мира, мир и спасение на земли возвестившему. Слава Тебе, Солнце правды, свет правды Твоея в душах наших возсиявшему. Слава Тебе, Святаго Духа в Твоем Богоявлении явившему, да чистым духом в небесный чертог Твой совнидем. Слава Тебе, Небеснаго Отца в крещении Твоем нам показавшему, да вси право в Тя верующии сынове Его будем. Слава Тебе, в Дусе и огне, очерневшее грехом естество наше преславно просвещающему. Слава Тебе, водою и Духом истлевшее страстьми неможение наше пресветло очищающему. Слава Тебе, Богу явльшемуся плотию, весь мир в струях Иорданских обновившему. Слава Тебе, вземльшему на себе грехи мира, прародительский грех в водах Крещения потопившему.

Слава Тебе, Сыне Божий, во Иордане крестивыйся, и весь мир просвещей, слава Тебе.

Кондак 10

Спасти хотяй падшее и обнищавшее естество наше, Христе Спасе, на Иорданскую реку пришел еси ко грешником и мытарем и восприял еси крещение от Иоанна, егда крестишася вси людие, да возмеши на Себе вся, погруженныя тамо в водах, человеков грехи, яко Агнец Божий и да готов будеши отселе волею на заклание тещи искупити всего мира грехи драгоценною кровию Твоею. Сего ради и погрузился еси в Иорданския струи, да спогребшися тамо, ко смертному крещению Себе уготовиши, о немже рекл еси ко страданию грядый: «Крещением имам креститися и како томлюся, дондеже истяжут». Сего ради благодарственно поем Тебе: Аллилуия.

Икос 10

Царю Превечный Христе Иисусе! Ты пришел еси на Иордан во явление всему миру, да разрешиши осуждение Адама первозданнаго, яко Судия всемилостивый, Един сердца всех испытуяй, и да подаси новую жизнь человеком. Сего ради чистительную лопату рукою прием, всемирное гумно всемудре очистил еси, разлучая, яко Пастырь, овцы от козлищ. Сподоби и нам, во имя Пресвятыя Троицы крещенным, десныя части спасаемых в жизни сей всемерно искати, да угодно Тебе будет наше глашение Тебе сицевое:

Слава Тебе, Архиерею, небеса прошедый, в крещении Твоем всю землю онебесивый. Слава Тебе, Пастырю овцам великий, ко стаду Твоему на Иордан пришедый. Слава Тебе, землю на водах основавый, всю землю нашу на водах Иорданских благодатию Духа обновивый. Слава Тебе, над водами небо утверждей второе, новое небо Церковь Твою водами крещения сотворивый. Слава Тебе, Источниче жизни нашея, на источники спасения жаждущия люди Твоя призвавый. Слава Тебе, Проповедниче правды вечныя, духовную жажду нашу без цены и сребра утоливый. Слава Тебе, яко богат Сый в милости, за премногую любовь нас возлюбил еси. Слава Тебе, яко мертвых нас сущих грехми, водами крещения оживотворил еси. Слава Тебе, струям Иорданским спогребшемуся, да и мы в крещении в смерть и воскресение Тебе спогребемся. Слава Тебе, водами Иорданскими, яко ризою облекшемуся, да и мы в светлыя ризы правды и чистоты Тобою облечемся. Слава Тебе, средостение вражды плотию Твоею разрушившему, да и нас, далече в море сущих, близь Себе устроиши. Слава Тебе, твоих человек во единем теле Твоем примирившему, да и нас странных и пришельцев во единую Церковь Божию созиждеши.

Слава Тебе, Сыне Божий, во Иордане крестивыйся и весь мир просвещей, слава Тебе.

Кондак 11

Пение новолепное да поет Тебе, Христе, вся тварь, от Девы рождшемуся и днесь во Иордане крестившемуся, людие же вси духовно да возвеселятся, прославляюще светлое просвещения нашего торжество и с божественным Григорием да воспоют, глаголюще: «Возрождения время – возродимся свыше, возсоздания день – облецемся в новаго Адама, просвещения праздник – просветимся божественне», да во обновлении духа ходити начнем, выну со Ангелы поюще небесную песнь: Аллилуия.

Икос 11

Светлый и самосиянный Свете, Христе, соприсносущный Свете Единосущнаго Отца! Возжег посреди Иордана, яко светильник, пречистую плоть Твою, Ты возсиял еси, яко солнце и даровал еси вселенней в крещении Твоем велий и незримый свет Твоея благодати и истины, просвещаяй всякаго человека грядущаго в мир, да людие сидящие во тьме и сени смертной узрят свет велий и пойдут по нему. Просвети убо в великий день светов и нас во тьме греха еще блуждающих, да просветляяся, обновляяся и возвышаяся горе, воспоем Тебе таковая:

Слава Тебе, Просветителю мира, Духом Святым и огнем крестити пришедшему. Слава Тебе, Спасителю грешных, из глубины греха нас воздвигнути восхотевшему. Слава тебе, безначальный и присносущный Свете, скверну душ наших водами крещения очищаяй. Слава Тебе, Свете превысший всех светлостей, во светлостях святых Твоих верныя озаряяй. Слава Тебе, Славы Отчия Сияние, тьму неведения явлением Твоим разгнавшему. Слава Тебе, во свете живый неприступнем, свет боговедения крещением Твоим возсиявшему. Слава Тебе, Свете от Света во тьме возсиявый, от тьмы грехов очисти нас. Слава Тебе, Солнце правды, утро спасения возвещающее, во свете добрых дел настави нас. Слава Тебе, невечерний Свете, во Иордане возсиявый, во свете Твоем свет незаходимый Пресвятыя Троицы облистай нам. Слава Тебе, образе пресветлый ипостаси Отчия, к чудному нестареемому животу банею пакибытия приведи нас. Слава Тебе, смерти Низложителю, от вечныя смерти избави нас. Слава Тебе, живота Начальниче, к вечней жизни настави нас.

Слава Тебе, Сыне Божий, во Иордане крестивыйся и весь мир просвещей, слава Тебе.

Кондак 12

Благодать Божия спасительная всем человеком явися днесь во Твоем крещении, Христе Спасе: пришел бо еси на Иордан, Едине Чистый, очистити человеческая согрешения и сокрушити главы гнездящихся тамо змиев, да даруеши благодать крещения решительную душ и телес наших. Сего ради с благочестием притецем прилежно к пречистым источником, да почерпнем с веселием воду жизни, благодать бо Духа невидимо подается всем верно почерпающим ю, и тайная дарования и Дух познания, Спасе, та вси благодарственно воспоем Тебе: Аллилуия.

Икос 12

Поюще, Христе, Твое спасительное Богоявление, прославляем вси во Иорданских водах от Иоанна Божественное крещение Твое, поклоняемся неизреченному к падшим человеком снисхождению Твоему и веруем со Предтечею, яко Ты воистину – Агнец Божий, вземляй на Себе от вод Иорданских грехи всего мира, да омыеши и искупиши их Пречистою Кровию Твоею. Сего ради молим Тя: понеси и наши безчисленныя грехопадения и не лиши нас в великий день Светов благодатного возрождения Твоего, да чистым сердцем благодарственно вопием Тебе сице:

Слава Тебе, Сыне Божий, велий свет к просвещению всего мира в водах Иорданских возсиявшему. Слава Тебе, предвечный Боже, велию благодать и человеколюбие в Крещении Твоем всем человеком явившему. Слава Тебе, Спасителю заблуждших, заблуждшия безпутием человеки ко Иорданским струям искати пришедшему. Слава Тебе, Победителю жизни, новую чистую жизнь не по плоти, но во обновление духа даровати благоволившему. Слава Тебе, Владыко живота и смерти, жало смерти притупившему и нетленную жизнь явлением своим возсиявшему. Слава Тебе, Творче неба и земли, горнее небо и землю на брегах Иордана в крещении Твоем возвеселившему. Слава Тебе, Царю царствующих, яко царство мира сего отселе в Царство Твое начинает прелагатися. Слава Тебе, Господи господствующих, яко днесь всем хотящим спастися небеса отверзаются и все естество наше начинает убелятися. Слава Тебе, Спасе наш, на Иордан пришедый, спаси нас не от дел праведности, но по велицей Твоей милости. Слава Тебе, Христе Боже, водное естество освятивый, жаждущую душу мою благочестия напой водами по неизреченней Твоей благости. Слава Тебе, Единородный Сыне и Слове Божий, напитай сердце мое явлением словес Твоих. Слава Тебе, Всесильный Боже, творяй чудеса Един, согрей хладную душу мою разумением чудес Твоих.

Слава Тебе, Сыне Божий, во Иордане крестивыйся и весь мир просвещей, слава Тебе.

Кондак 13

О, Иисусе Христе, Агнче Божий, пришедый на Иордан подъяти всего мира грехи! Приими малое сие от всея души приносимое Тебе моление наше, и просвети нас во тьме грехов седящих спасительным Твоим от Иоанна крещением, да искупленнии Тобою от болезней душевных и телесных, во обновлении жизни право ходити начнем и со всеми святыми да воспоем Тебе: Аллилуия.

Этот кондак читается трижды, затем икос 1 и кондак 1

Молитва

Господи Иисусе Христе, Сыне Божий Единородный, от Отца прежде всех век рожденный, Свете от Света, просвещаяй всяческая, в последняя же лета от Пресвятыя Девы Марии нетленно воплощенный и в мир сей на спасение наше пришедый! Ты бо не потерпел еси видети от диавола мучима рода человеча и сего ради в пресветлый день Богоявления Твоего пришел еси на Иордан ко грешником и мытарем креститися от Иоанна, безгрешен сый, да исполниши всякую правду и да возьмеши в водах Иорданских грехи всего мира, яко Агнец Божий, во еже понести я на Себе и искупити Крещением крестным, пречистою Кровию Твоею. Сего ради погрузившуся Тебе в водах, отверзошася Тебе небеса Адамом заключенная и Дух Святый сниде на Тя в виде голубине, просвещение и обожение носяй естеству нашему, и Пребожественный Отец Твой возвести Тебе небесным гласом благоволение Свое, зане сотворил еси волю Его и человек грехи восприял еси и Себе на заклание уже предуготовал еси, якоже Сам рекл еси: «Сего ради любит Мя Отец, яко Аз душу Мою полагаю, да паки прииму ю», и тако во всесветлый день сей, Ты, Господи, положил еси начало искупления нашего от грехопадения прародительскаго. Сего ради вся силы небесныя радуются и вся тварь веселится, чающе свобождение свое от работы истления, глаголюще: Прииде просвещение, благодать явися, избавление наста, мир просветися и людие радостию исполняются. Да веселится ныне небо и земля и мир весь да играет; реки да плещут; источницы и озера, бездны и моря да срадуются, яко Божественным Крещением освятися днесь естество их. Да радуются днесь и человеков собори, яко естество их взыде ныне паки к первому благородию и вси с радостию да поют: Богоявления время. Приидите мысленно на Иордан, видение велие в нем узрим: Христос ко Крещению грядет. Христос ко Иордану приходит. Христос наши в воде погребает грехи. Христос овча похищеннаго и заблуждшаго приходит искати и обрет е вводит в рай.
Сего Божественнаго таинства воспоминание празднующе, усердно молимся Тебе, Человеколюбче Господи: сподоби нам жаждущим по гласу Твоему приити к Тебе, Источнику присноживотныя воды, да почерпем воду благодати Твоея и оставления грехов наших и да отвергшеся нечестия и мирских похотей; целомудренно и девственно, и праведно и благочестно поживем в нынешнем веце, ждуще блаженнаго упования и явления славы Твоея, Великаго Бога и Спаса нашего, да не от дел наших спасеши нас, но по Твоей милости и по обновлению Святаго Духа Твоего банею пакибытия, Егоже обильно излиял еси, да оправдившеся благодатию Его, наследницы будем вечныя жизни во Царствии Твоем, идеже со всеми святыми сподоби нам прославити всесвятое Имя Твое со Безначальным Твоим Отцем и со Пресвятым и Благим и Животворящим Твоим Духом ныне и присно и во веки веков. Аминь.