Тропари, кондаки и величания - 21 января 2025
Кондак преподобному Георгию Хозевиту
Явился еси светило пресветлое, Георгие,/ озаряя Божественными зарями верно зовущия ти:/ моли о нас Владыку Христа,/ явльшагося во струях// и просвещшаго земнородныя.
Кондак святителю Емилиану
Добляго тя поборника по Троице явльшася/ Церковь славит, поющи, Емилиане,/ за нюже пострадал еси./ Сего ради почитаем память твою,// языческаго нашествия избави рабы твоя.
Тропарь преподобного Григория, чудотворца Печерского
Пещерный житель и в телеси Ангел и чудотворец явился еси, богоносе отче наш Григорие, постом, бдением, молитвою небесная дарования приим, исцеляеши недужныя и души верою приходящим ти. Слава Давшему ти крепость, слава Венчавшему тя, слава Действующему тобою всем исцеления.
Кондак преподобного Григория, чудотворца Печерского
Велием воздержанием и нощными молитвами, преподобне чудотворче отче Григорие, приял еси от Бога дар чудотворения исцеляти недужныя, с верою к тебе притекающия, темже и наша многия болезни исцели, молимся.
Тропарь священномученика Исидора пресвитера и с ним 72-х в Юрьеве Лифляндском пострадавших
Страстотерпцы Господни блаженнии, православную веру Христову со дерзновением проповедасте, и на судищи учения врагов неправая обличисте: того ради и ввержени бысте, святии, во глубину речную, души же ваши вселишася в Небесныя кровы, идеже со святыми предстояще Престолу Царя всех Бога, молитеся Ему за благовернаго императора нашего и за вся православныя люди, подвиги ваша честно почитающия.
Кондак священномученика Исидора пресвитера и с ним 72-х в Юрьеве Лифляндском пострадавших
Мученик Христовых лик песньми почтим, пострадавших крепко Христовы ради веры истинныя и вражию гордыню до конца низложивших: озарившеся бо благодатию несозданныя Троицы, славнии, со священномучеником Исидором пострадавшии, яко звезды сияете во всем мире, и ныне молитеся Христу непрестанно, и нас защищаете от враждебных язык нашествия, неусыпнии молитвенницы о душах наших.
Тропарь преподобного Паисия Угличского
Христовы ради любве отечество и род оставил еси,/ и, ангельскому житию поревновав,/ в пустыню вселился еси,/ в нейже многотрудное житие явил еси/ и чудес дарования от Бога приял еси,/ Паисие преподобне,/ моли Христа Бога спастися душам нашим.
Ин тропарь преподобного Паисия Угличского
Христовы ради любве отечество и род оставил еси/ и, ангельскому житию поревновав,/ духовному отцу твоему преподобному Макарию, подражатель быв,/ града Углеча достигл еси,/ и близ того при водах в пустыню, Ангелом показанную, вселился еси,/ и обитель прекрасну Матери Божией воздвигл еси,/ и множество монахов собрал еси,/ имже и наставник ко спасению быв,/ и чудес дарования от Бога приял еси,/ Паисие преподобне,/ моли Христа Бога спастися душам нашим.
Ин тропарь преподобного Паисия Угличского
Слез твоих теченьми пустыни безплодное возделал еси/ и, иже из глубины воздыханьми, во сто трудов уплодоносил еси,/ и был еси светильник вселенней, сияя чудесы, Паисие, отче наш,/ моли Христа Бога/ спастися душам нашим.
Кондак преподобного Паисия Угличского
Чистотою душевною божественно вооружився/ и непрестанный молитвы, яко копие, имый,/ крепко ссекл еси бесовское ополчение,/ Паисие, отче наш,/ моли непрестанно о всех нас.
Ин кондак преподобного Паисия Угличского
Украшен добродетельми, преподобне Паисие Богодухновенне,/ Церкве Христовы красота был еси,/ подвиги бо иноческими украси ю, блаженне./ Темже молим тя:/ молися ко Господу свободити нас от всякия брани борителя, вопиющих ти:/ радуйся, отче преблаженне.
Тропарь священномученику Виктору Усову
Мученик Твой Господи, Виктор во страдании своем венец прият нетленный от Тебе Бога нашего; имеяй бо крепость Твою, мучителей низложи, сокруши и демонов немощные дерзости. Того молитвами спаси души наша.
Кондак священномученику Виктору Усову
Звезда светлая явился еси непрелестная мирови, Солнца Христа возвещающи зарями твоими, страстотерпче Викторе, и прелесть погасил еси всю,нам же подаеши свет, моляся непрестанно о всех нас.