Акафисты - 26 января 2025
Кондак 1
Избранный угодниче Христов и преславный чудотворче Иринарше, дивно на земли в чине ангельстем пожил еси и ныне, яко имеяй велие дерзновение ко Господу, буди теплый о нас пред Богом заступник, да с любовию зовем ти: Радуйся, Иринарше преподобне, пустынножителей светлое украшение.
Икос 1
Ангел земный и человек небесный явился еси преподобне Иринарше: от юности бо твоея Господеви благоугождая, все житие твое в добровольном подвизе страдальчествования проводил еси и Рая присноблаженнаго достигл еси, идеже ныне ликуя, услыши и нас, на земли поющих ти таковая: Радуйся, православныя церкве Христовы превеликое украшение. Радуйся, отечествия твоего светильниче пресветлый. Радуйся, любовию ко Господу сердце твое от юности уязвивый. Радуйся, и сам от Него возлюблен бывый. Радуйся, воине Христов добропобедный. Радуйся, силою свыше облеченный. Радуйся, Царствия Небеснаго наследниче. Радуйся, о всех чтущих тя усердный молитвенниче. Радуйся, Иринарше преподобне, пустынножителей светлое украшение.
Кондак 2
Видевше рождшии тя и знаемии, яко Благодать Божия почи на тебе, блаженне, радостию Святою радовахуся, и Христа о сем славляху, поюще Ему: Аллилуиа.
Икос 2
Разума Божественна исполнився, познал еси, преподобне, яко благо есть мужу, иже возмет ярем Господень на ся от юности своея, и сего ради во след Христа со усердием потекл еси. Темже зовем ти: Радуйся, иго Господне на себе вселюбезно приявый.Радуйся, в терпении спасения души своея искавый. Радуйся, во смирении твоем Сыну Божию, смирившемуся до рабия образа, подражавый. Радуйся, Бога и ближняго твоего паче себе возлюбивый. Радуйся, слезами на земли сеявый. Радуйся, притекающих к заступлению твоему послушателю скорый. Радуйся, Иринарше преподобне, пустынножителей светлое украшение.
Кондак 3
Сила Вышняго от юности даровася ти, блаженне: далече бо сый, кончину отца твоего умныма очима узревый, и братиям своим по плоти о сем возвестивый, сим удивил еси тыя и научил еси звати Богу: Аллилуиа.
Икос 3
Имый всеусердное о спасении души твоея попечение, во обитель страстотерпцев Христовых Бориса и Глеба притекл еси, и тамо, пред игуменом пад, о вчинении себе в лик иноков всеусердно молил еси, еже и улучил еси приемый постриг главы твоея во отвержение мира и сует его. Мы же сия зряще, таковая поем ти: Радуйся, мирская возненавидевый, да Христов раб будеши. Радуйся, постниче терпеливейший, хлебом живота вечнаго душу твою питавый. Радуйся, во плоти небесный жителю. Радуйся, наставниче великий к путем спасения. Радуйся, трудолюбием твоим во обители Борисоглебстей просиявый. Радуйся, страстотерпче Христов долготерпеливе. Радуйся, постников похвало и славо. Радуйся, воздержания подвижников чистейшее зерцало. Радуйся, Иринарше преподобне, пустынножителей светлое украшение.
Кондак 4
Бурю велию напастей воздвиже на тя ненавидяй добра диавол, обаче не поколеба доблести души твоея, посреди пещи искушений немолчно Богови зовущаго: Аллилуиа.
Икос 4
Слышав Господа в Евангелии своем глаголюща, яко многими скорбьми подобает нам в Царствие Небесное внити, уготовал еси плещи твоя на раны и ланите на заушения, всякое озлобление ради Христа претерпети готовый. Мы же, сицевую высоту духовныя жизни твоея зряще, ублажаем тя похвалы таковыми: Радуйся, всего себе в волю Господню предавый. Радуйся, Христа Распятаго паче всего возлюбивый. Радуйся, терпением злостраданий Иову себе уподобивый. Радуйся, язвы Господа Иисуса на теле твоем носивый. Радуйся, узы Христовы на ся возложивый. Радуйся, ужема железныма коварства вряжия связавый. Радуйся, величием подвигов своих ангелы возвеселивый. Радуйся, жестоким твоим житием человеки удививый. Радуйся, Иринарше преподобне, пустынножителей светлое украшение.
Кондак 5
Боготечней звезде подобяся, протекл еси земное поприще твое, Иринарше, всемогущею Благодатию Божиею покрываем, и небесных видений сподобляем, в нощех и во днех поя Владыце: Аллилуиа.
Икос 5
Видевше тя иноцы обители, в ней же подвизался еси, земная презирающа, и в рубех и необувенныма ногама ходяща,вознегодоваша и двакраты из ограды своея извергоша. Ты же, незлобив сый, во град Ростов текл еси, о изгнавших тя молитвы возсылая. Сего ради приими от нас сицевая: Радуйся, терпением скорбей всяческих просиявый. Радуйся, вольною нищетою вечное богатство стяжавый. Радуйся, всяцем образом Владыце всех угодивый. Радуйся, равноангельное житие на земли поживый. Радуйся, веры светлый светильниче. Радуйся, ко грядущему граду верный наставниче. Радуйся, вся земная во уметы вменивый. Радуйся, незлобием твоим ризы души своея убеливый. Радуйся, Иринарше преподобне, пустынножителей светлое украшение.
Кондак 6
Проповедницы воли Божественныя о тебе явишася самобратия Святая Роман с Давидом, и в видении тебе представше, во обитель свою, из неяже изгнан был еси, паки тя глашаху. Ты же от видения воспрянув, и радости исполнься, Богови воззвал еси: Аллилуиа.
Икос 6
Возсиявша благодатна светильника, яви тя Господь, егда не ведомыми судьбами своими из ограды обители святых мучеников во град Ростов тя изведе, да и во обителех Авраамиевой и Лазаревой прославится о тебе имя Его. Мы же таковому о тебе Божию смотрению удивльшеся, глаголем ти таковая: Радуйся, орудием воли Божия бывый. Радуйся, во смиренномудрии поживый. Радуйся, страсти в души твоей искоренивый. Радуйся, явлением ти преподобнаго Авраамия почтенный. Радуйся, союзом любве со блаженным Иоанном себе связавый. Радуйся, прозорливым глаголом уст его внимавый. Радуйся, стогны ростовския подвиги твоими освятивый Радуйся, о всех притекающих к тебе усердный молитвенниче. Радуйся, Иринарше преподобне, пустынножителей светлое украшение.
Кондак 7
Хотяй всем спастися Владыка Господь чудным гласом воспяти тя от намерения твоего оставити пределы ростовския и к северу уклонитися. Ты же, послушлив сый, всего себе воли Его предав, воззвал еси Ему: Аллилуиа.
Икос 7
Новый воистинну Даниил явился еси, преподобне, в дивнем видении твоем узревый грядущия судьбы Царства Российскаго, и повеление от Бога прием, потекл еси ко граду Москве, идеже царю Василию небоязненно рекл еси о всех, хотящих быти. Мы же, тайнозрению твоему дивящеся, сицевая тебе приносим: Радуйся, провидче дивный, будущая яко настоящая, узревый. Радуйся, духом твоим о сих вельми возскорбевый. Радуйся, веления Божия послушниче усердный. Радуйся, небоязненно повеленная ти цареви явивый. Радуйся, словесы твоими сего укрепивый. Радуйся, беззаконий сынов ея твердейший обличителю. Радуйся, о спасении Царства Российскаго богоугодный молитвенниче. Радуйся, о мире Державы Российския пред Господем предстателю. Радуйся, Иринарше преподобне, пустынножителей светлое украшение.
Кондак 8
Странен и дивен путь спасения протекл еси, блаженне, егда от иконы Распятия Христова повеление восприим, в затвор вшел еси, в нем же тело твое ужема железныма связав и множество железных крестов на ся возложив, во дни и нощи Владыце твоему звал еси: Аллилуиа.
Икос 8
Весь был еси умом и сердцем в горнем, аще и в хижине малей заключився, преподобне. Тем же и ныне водворяяся на небеси, заступаеши всех, верою и любовию вопиющих ти таковая: Радуйся, в терпении и злострадании житие твое препроводивый. Радуйся, волю свою заповедем Господним покоривый. Радуйся, благодатию Духа Святаго осиянный. Радуйся, источниче чудес богодарованный. Радуйся, исцелений независтный подателю. Радуйся, немудрых богомудрый наказателю. Радуйся, правды Божия нелицеприемный возвестителю. Радуйся, обидимых многомощный защитителю. Радуйся, Иринарше преподобне, пустынножителей светлое украшение.
Кондак 9
Во всяких напастех и скорбех всем был еси утешитель благодатный, тугу сердечную страждущих словесы и молитвами твоими прогоняя, и во уповании на помощь Вышняго тех укрепляя, и научая пети Ему: Аллилуиа.
Икос 9
Витии многословесныя по достоянию восхвалити не возмогут мужества души твоея, богомудре отче наш Иринарше: варваром бо на обитель твою находящим и иноком ю оставльшим, ты един пребыти зде не убоялся ecи, Богу себе вручая. Темже любовию восхваляем тя сице: Радуйся, убивающих тело, души же убити не могущих, не устрашивыйся. Радуйся, воине Христов непоколебимый. Радуйся, жизнь будущаго века паче временнаго жития возлюбивый. Радуйся, силою словес твоих, благодати исполненных, врагов обличивый. Радуйся, теми ярость сих в кротость преложивый. Радуйся, пред военачальники вражиими православна и верна быти Царю своему исповедавый. Радуйся, хищений их небоязненный обличителю. Радуйся, грядущаго на них гнева Божия верный возвестителю. Радуйся, Иринарше преподобне, пустынножителей светлое украшение.
Кондак 10
Спастися хотящим человеком, добр вождь явился еси, преподобне, от египта страстей в земли обетованней тех путеводствуя и ученьми своими наказуя, во еже пети Творцу всех: Аллилуиа.
Икос 10
Стену необоримую и ограждение нерушимое не точию обители твоей и стране ростовстей, но и всей Державе Российстей дарова тя Господь, всеблаженне, ибо благоприятными твоими молитвами оныя ограждаеши и от нахождения иноплеменных свобождаеши. За сия убо приими от нас похвалы сицевыя: Радуйся, российстей земли Богом дарованный защитителю. Радуйся, святыя обители твоея неусыпный хранителю. Радуйся, любовь твою ко отечествию земному в житии своем явивый. Радуйся, туюжде любовь к нему и по смерти сохранивый. Радуйся, князя Димитрия Крестом Христовым благословивый. Радуйся, небоязненно тещи на освобождение царствующаго града Москвы глаголы своими того утвердивый. Радуйся, свобождению царскаго града предивный помощниче. Радуйся, светом небесным, приходящия к тебе озаряяй. Радуйся, Иринарше преподобне, пустынножителей светлое украшение.
Кондак 11
Пение непрестанное во всем житии твоем Богови приносил, еси, преподобне отче наш Иринарше. Ныне же от нас воспеваемый и по достоянию ублажаемый на земли, тамо, на небеси, купно со ангелы прославльшему тя дивно Господеви зовеши: Аллилуиа.
Икос 11
Светозарна светильника яви тя, блаженне, Христос Бог, егоже сиянием людие просвещаются, и тебе, яко спасения их виновнику, приносят таковая: Радуйся, доблий подвижниче, враги спасения победивый. Радуйся, изгнания благодушно приявый. Радуйся, изриновение из затвора твоего и биения злых человек претерпевый. Радуйся, душу твою дарованьми небесными украсивый. Радуйся, в воздаяние трудов твоих и болезней силу прозрения и чудодействия получивый. Радуйся, мучительства злых бесов человеки свобождаяй. Радуйся, даровании Божиих всем подателю. Радуйся, ко грядущему Граду Небесному верный наставниче. Радуйся, Иринарше преподобне, пустынножителей светлое украшение.
Кондак 12
Благодатию, данною ти от Бога, отче, преведи ны безбедно по бурному морю житейскому, и в тихое пристанище Небеснаго Царствия сподоби достигнути, да тамо, вкупе с Тобою, в безконечныя веки Владыце нашему поем: Аллилуиа.
Икос 12
Поем дивное твое житие, блажим великия и преславныя твоя подвиги, почитаем честную и достохвальную кончину твою, величаем небесную славу твою и от избытка сердец наших похвальная зовем ти сице: Радуйся, в чертозе небеснем лику святых сопричтенный. Радуйся, христианом скорый помощниче. Радуйся, нищету совершенную до конца сохранивый. Радуйся, тягчайшия вериги твоя, яко утварь драгую, на плещех своих носивый. Радуйся, врачеваний безмездных всемилостивый подателю. Радуйся, ленивых к подвигом возбудителю. Радуйся, исправления грешников поручителю. Радуйся, обители твоея и страны ростовския славо. Радуйся, Иринарше преподобне, пустынножителей светлое украшение.
Кондак 13
О всехвальный угодниче Христов и чудотворче предивный, преподобне и преблаженне отче наш Иринарше, с верою и любовию вопием тебе всеусердно: приими ныне малое моление сие наше, и умоли Милостиваго Бога, да избавит нас от всяких бед и напастей, и будущия свободит муки, вопиющих Ему: Аллилуиа, Аллилуиа, Аллилуиа.
(Этот кондак читается трижды, затем икос 1 и кондак 1)
Молитва
О предивный и преславный чудотворче, преподобне и достоблаженне отче Иринарше! Величающе труды твоя и болезни и прославляюще великое твое дерзновение ко Господу, тебе, яко отца чадолюбива, молим: ходатайствы твоими испроси нам у Господа, яже на пользу душам и телесем нашим: веру праву, надежду несомненну, любовь нелицемерну, во искушеиих мужество, в злостраданиих терпение, в благочестии преспеяния, и благословение свыше на вся благая дела и начинания наша. Испроси угодниче Христов у Всемогущаго Бога: страждущую страну Российскую от лютых безбожник и власти их да свободит, и да воставит престол православных царей: верных рабов Его, в скорби и печали день и нощь вопиющих к Нему, многоболезный вопль да услышит и да изведет от погибели живот наш. Не забуди, чудотворче святый, милостивно присещати обитель твою, вся грады и веси страны нашея, сохраняя и соблюдая молитвами твоими от всякаго зла. Помяни всех, веру к тебе имущих и имя твое на помощь призывающих, и вся во благих прошения их милостивно исполни. Ей, святче Божий, не лиши и нас грешных твоего заступления, сподобляя нас кончину жития благую улучити и Царствия Небеснаго наследники быти, да воспоем и прославим дивнаго во святых своих Бога, Отца, и Сына и Святаго Духа, в безконечныя веки веков. Аминь.
Кондак 1
Избранный угодниче Божий, светлостию жития твоего и чудес благодатию просиявый в пустыни севернаго Помория, преподобне отче наш Елеазаре! Хвалебныя песни приносим ти, подвиги твоя воспевающе. Ты же, яко благоприятный молитвенник ко Господу, от всяких нас бед свобождай, да зовем ти: Радуйся, преподобне отче наш Елеазаре.
Икос 1
Ангел житием и путеводитель многим ко спасению был еси, преподобне отче Елеазаре. Темже и мы ныне к твоему предстательству прибегающе, приносим ти хваления сицевая: Радуйся, единаго Господа измлада возлюбивый; радуйся, чистоту душевную от юности сохранивый. Радуйся, равноангельно поживый на земли; радуйся, яко со ангелы ликуеши на небеси. Радуйся, на демоны мужественно ополчивыйся; радуйся, небесных видений сподобивыйся. Радуйся, смирение сердца до конца сохранивый; радуйся, безмолвное житие тепле возлюбивый. Радуйся, преподобне отче наш Елеазаре.
Кондак 2
Видевше благочестивии родители твои усердие твое ко иноческому житию, на сей спасительный путь тя благословити не отрекошася. Ты же, преподобне, из дому отеческаго абие изшед, во обитель Соловецкую устремился еси, еяже достиже, радостно воспел еси Богу: Аллилуиа.
Икос 2
Разум богопросвещенный стяжав, мирскаго пристрастия избегл еси, пречудне Елеазаре, и подвиги плоть умертвив, образ добраго жития иноком преподал еси. Сего ради восхваляем тя сице: Радуйся, отечество и род твой оставивый; радуйся, богатство и славу возненавидевый. Радуйся, суровое житие возлюбивый; радуйся, Христу последовати возжелавый. Радуйся, яко пристанища тихаго достигл еси; радуйся, яко спасению многих послужил еси. Радуйся, грядущая прозираяй; радуйся, далече сущая провидяй. Радуйся, преподобне отче наш Елеазаре.
Кондак 3
Сила Божия укрепляше тя на подвиги, блаженне Елеазаре, егда из обители преподобных Зосимы и Савватия изшед, в пустыню Анзерскаго острова вселился еси, идеже в безмолвии воспевал еси Богу: Аллилуиа.
Икос 3
Имея молитву и крестное знамение яко щит непобедимый, досточудне Елеазаре, мужественно прогонял еси вражия ополчения, страховании многообразными на тя воюющая. Мы же яко воина Христова ублажаем тя сице: Радуйся, темных духов прогонителю; радуйся, злокозненных их сетей разрушителю. Радуйся, именем Иисусовым враги невидимыя отражавый; радуйся, мудрость духовную стяжавый. Радуйся, на невидимую брань верою и молитвою вооруживыйся; радуйся, воин Христов непобедимь явивыйся. Радуйся, полунощныя страны светильниче; радуйся, неусыпный о людех молитвенниче. Радуйся, преподобне отче наш Елеазаре.
Кондак 4
Бурю искушений и бед враг рода человеческаго воздвизая на тя, доброподвижниче Елеазаре, аки от игумена посланный льстивно тебе является. Ты же молитвою Господнею того обличил еси и в бегство обратил еси, воспевая Богу: Аллилуиа.
Икос 4
Слышав христолюбивый царь Михаил слух богоугоднаго твоего жития, преподобне Елеазаре, лице твое видети возжела: ты же, повелению цареву повинуяся, во стольный град притекл еси и о рождении первенца ему прорекл еси. Сего ради глаголем тебе сице: Радуйся, дерзновение ко Господу стяжавый; радуйся, пророческаго дара исполненный. Радуйся, христолюбиваго царя веру умноживый; радуйся, на хвалу Господню того подвигнувый. Радуйся, честию царевою не превозносивыйся; радуйся, о славе единаго Бога возвеселивыйся. Радуйся, яко твоею молитвою неплодие царицы прекратися; радуйся, яко плод благословен земли Российстей молитвою твоею даровася. Радуйся, преподобне отче наш Елеазаре.
Кондак 5
Боготечная звезда иноком Соловецким являешися, отче Елеазаре, к небесному отечеству тех путеводящая, такожде и всех притекающих к раце мощей твоих умилением и верою просвещающая, вопиющих к Богу: Аллилуиа.
Икос 5
Видеша ученицы твои, преподобне Елеазаре, царево к тебе благоволение, и повеление его к построению храма во обители твоей приемше, радовахуся. Мы же, Господне на то благословение уведевше и видения чудесная тебе явленная воспоминающе, глаголем: Радуйся, Христовы словесныя овцы ко спасению подвизаяй; радуйся, нерадивыя от сна греховнаго возбуждаяй. Радуйся, ученики твоя неленостно в житии назидавый; радуйся, и по преставлении писаньми твоими тех сердца умиляяй. Радуйся, словеса и учения святоотеческая в сердце твоем запечатлевый; радуйся, теми души ко спасению наставляяй. Радуйся, верный подражатель богоносным учителем бывый; радуйся, искусный иноков наставник явивыйся. Радуйся, преподобне отче наш Елеазаре.
Кондак 6
Провидец и провозвестник будущих и далече отстоящих яко близ сущих был еси, преподобне Елеазаре: темже и преставление духовнаго друга твоего за тридесять поприщ прозрел еси. Сего ради Богу, дивно прославляющему святыя Своя, поим: Аллилуиа.
Икос 6
Возсияваше лице твое небесною радостию и духовным веселием, ангелоподобне Елеазаре, егда сподоблялся еси Божественных откровений и видений. Сего ради сице тебе зовем: Радуйся, глас Божественный многажды слышавый; радуйся апостолу Павлу собеседник в видении бывый. Радуйся, Христов лик присно во уме твоем предносивый; радуйся, многострадальнаго о Христе жития благий образ явивый. Радуйся, на демоны воинствующим присный споборник бывый; радуйся, братию твою козни демонския прозирати научивый. Радуйся, правыя веры добрый учителю; радуйся, сомнящихся вере мудрый наказателю. Радуйся, преподобне отче наш Елеазаре.
Кондак 7
Хотяще злии человецы досаду тебе сотворити, и того ради глубокое море преплывше, дерзостно к келлии твоей с прещением приближишася; но Божественною силою во изступление ума впадше, окрест жилища твоего в недоумении блуждаху. Ты же, незлобив сый, молитвою тати оныя от таковаго помрачения исцелил еси и научил еси пети Богу: Аллилуиа.
Икос 7
Дивно от Царицы Небесныя на подвиги наставляемь, преподобне отче, непоколебимь во твоем изволении блазе пребыл еси, и небесную славу улучити сподобился еси. Темже ублажающе тя, глаголем: Радуйся, небесных видений достойный зритель бывый; радуйся, сосуде, Божия благодати преисполненный. Радуйся, путь спасения ясно познавый; радуйся, житием твоим путь сей нам указавый. Радуйся, безмолвия и молитвы учителю; радуйся, заповедей Господних верный блюстителю. Радуйся, ангелоподобный человече; радуйся, монашескаго жития наставниче. Радуйся, преподобне отче наш Елеазаре.
Кондак 8
Странствие досточудно совершил еси, чудотворче Христов Елеазаре, егда море преплывал еси с братиею, ладию твою молитвою от крушения посреде плавающаго леда избавил еси и спасл еси сущия в ней люди, воспевающия Богу песнь: Аллилуиа.
Икос 8
Весь пламенем Божественныя любве объят был еси, преподобне Елеазаре, егда во острове пусте богомыслием непрестанным и плоти умерщвлением подвизался еси, душу убо молитвою питая, тело же веригами удручая. О сем хваляще тя, зовем таковая: Радуйся, ветхаго человека в себе не пощадивый; радуйся, силою креста в подвизех себе утвердивый. Радуйся, пустынное лишение доблественне претерпевый; радуйся, память смертную присно имевый. Радуйся, власяницею и веригами плоть свою смиривый; радуйся, все плотское мудрование духу покоривый. Радуйся, богодухновенных книг списатель бывый; радуйся, мудрость духовную возлюбивый. Радуйся, преподобне отче наш Елеазаре.
Кондак 9
Вси жительствующии в богоспасаемой обители сей к раце честных мощей твоих сошедшеся днесь, приснопамятне Елеазаре, и памятию добродетелей твоих сердца умиляюще, приносим ти хвалебную песнь, ангельски поюще Богу: Аллилуиа.
Икос 9
Витийственных словес плетение не довлеет восхвалити достойно чудотворения твоя, преподобне Елеазаре. Обаче любовию движими, восписуем ти сицевая: Радуйся, вождю духовных воинов; радуйся, беснуемых свободителю. Радуйся, приемый от Господа власть на духи нечистыя; радуйся, и по смерти твоей низлагаяй вражия на нас ополчения. Радуйся, яко мощей твоих духи злобы устрашаются; радуйся, яко предстательством твоим всякия болезни исцеляются. Радуйся, в пучине морстей плавающим помощниче; радуйся, обидимых защитниче. Радуйся, преподобне отче наш Елеазаре.
Кондак 10
Спасения подвигом добре подвизался еси, приснопамятне Елеазаре. Темже от Господа венец нетления тебе сплетеся, егда святую душу твою предал еси в руце Вседержителя, воспевая ангельскую песнь: Аллилуиа.
Икос 10
Царю превечному в Небеснем Царствии предстал еси, святе Елеазаре, отшед от временныя жизни. Мы же, молитвенника тя тепла пред Престолом Господним имуще, зовем сице: Радуйся, от трудов временных к покою вечному славно прешедый; радуйся, и нас труды богоугодныя возлюбити научаяй. Радуйся, на земли Пресвятую Троицу присно славити обыкнувый; радуйся, Святей Троице ныне со ангелы предстояй радостно. Радуйся, дерзновение молитвенное ко Господу стяжавый; радуйся, дар чудотворения свыше восприемый. Радуйся, здравие болящим подаваяй; радуйся, во всякой нужде и беде сущим скоро помогаяй. Радуйся, преподобне отче наш Елеазаре.
Кондак 11
Пения хвалебная угоднику Божию приносяще, о празднолюбцы, всечестную память его духовно торжествуим; подвиги же его и чудесная деяния прославляюще, воспоим Богу песнь: Аллилуиа.
Икос 11
Светозарная звезда явился еси, отче Елеазаре, во мраце страстей нас сущих озаряющая и ко свету спасения приводящая всех вопиющих тебе таковая: Радуйся, обитель твою и по смерти не оставляяй; радуйся, живущия в ней невидимо назираяй. Радуйся, пищею духовною нас удовляяй; радуйся, на потребу телесную вся от Господа нам подаваяй. Радуйся, в житии твоем молитве деннонощней братию научивый; радуйся, и по преставлении твоем в молитве нас укрепляяй. Радуйся, скорбящих тайный утешителю; радуйся, страдальцев незримый посетителю. Радуйся, преподобне отче наш Елеазаре.
Кондак 12
Благодать приял еси от Христа Бога, угодниче Христов Елеазаре, еже за ны, во обители твоей жительствующия, молитися. Темже ныне память твою любезно почитающия благослови и удовли нас ко славословию Бога с песнию: Аллилуиа.
Икос 12
Поюще твоя чудеса и пророческий дар твой благоговейно почитающе, все же богоугодное твое житие и многая исцеления, от раки твоея святыя болящим подаваемая, любовию воспоминающе, молим тя, угодниче Христов Елеазаре, твоего предстательства и нас грешных не отщетити, но прияти от нас хваления сицевая: Радуйся, благодатию Пресвятыя Троицы освященный; радуйся, благодатию Пресвятыя Богородицы осененный. Радуйся, в лице преподобных ублажаемый; радуйся, к великим чудотворцем Соловецким сопричтенный. Радуйся, со всеми святыми прославляемый; радуйся, со ангелы Пресвятей Троице предстояй. Радуйся, еще на земли Господа зрети сподобивыйся; радуйся, ныне Того лицем к лицу созерцаяй. Радуйся, преподобне отче наш Елеазаре.
Кондак 13
О преподобне и богоносне отче наш Елеазаре! Приими ныне приносимая тебе хваления наша и святыми твоими молитвами в жизни сей нас от всякаго злаго обстояния сохрани, в будущей же вечнаго осуждения избави, да сподобимся купно с тобою и со всеми святыми воспевати в Троице славимому Богу: Аллилуиа.
(Этот кондак читается трижды, затем икос 1 и кондак 1)
Молитва
О преподобне отче наш Елеазаре, безмолвнаго иноческаго жития в пустыни Анзерстей богоизбранный начальниче и основателю! Молим тя мы, смиреннии и недостойнии, обстояще священный гроб твой во храме Пресвятыя Троицы, имже место сие освятися и, сущия ради в тебе благодати пророческия, прославися; испроси, угодниче Божий, у Вседержителя Бога, в Троице покланяемаго, Емуже в дерзновении с лики святых предстоиши, да дарует православному народу нашему на враги победу и одоление, державе Российстей мир и утверждение, церквам благостояние и всем людем тишину, и благоденствие, и изобилие плодов земных. Угаси молитвами твоими разжженныя на ны стрелы диавольския, да не прикоснется нам злоба вражия, да благочестно скончавше временное житие, сподобимся наследовати Царствие Небесное и купно с тобою славити Отца и Сына и Святаго Духа во веки веков. Аминь.