Тропари, кондаки и величания - 09 февраля 2025
Тропарь святителя Иоанна Златоуста
Уст твоих, якоже светлость огня возсиявши, благодать/ вселенную просвети:/ не сребролюбия мирови сокровища сниска,/ высоту нам смиренномудрия показа./ Но твоими словесы наказуя, отче Иоанне Златоусте,// моли Слова, Христа Бога, спастися душам нашим.
Кондак святителя Иоанна Златоуста
Возвеселися таинственно честная Церковь/ возвращением честных твоих мощей,/ и, сия сокрывши, яко злато многоценное,/ поющим тя неоскудно подавает/ молитвами твоими исцелений благодать,// Иоанне Златоусте.
Тропарь святителю Луке, исповеднику, архиепископу Крымскому
Возвестителю пути спасительного, /исповедниче и архипастырю Крымския земли, / истинный хранителю отеческих преданий, /столпе непоколебимый, Православия наставниче, /врачу богомудрый, святителю Луко, /Христа Спаса непрестанно моли / веру непоколебиму православным даровати /и спасение, и велию милость.
Кондак святителю Луке, исповеднику, архиепископу Крымскому
Якоже звезда всесветлая, добродетельми сияющи, / был еси, святителю, / душу же равноангельну сотвори, / сего ради святительства саном почется, / во изгнании же от безбожных много пострада, / и непоколебим верою пребыв, / врачебною мудростию многия исцелил еси. / Темже ныне честное тело твое от земленных недр обретенное дивно Господь прослави, / да вси вернии вопием ти: / радуйся, отче святителю Луко, // земли Крымския похвало и утверждение.