Акафисты - 10 февраля 2025
Кондак 1
Возбранный чудотворче и изрядный угодниче Христов, всем с верою приходящым источаяй многоцелебные дары, похвальная восписуем ти творящии всечестную память твою: ты же, яко имея дерзновение ко Господу, моли спастися душам нашым, да зовем ти:
Радуйся, Феодосие, великий чудотворче.
Икос 1
Ангельское твое во плоти житие провидев всея твари Создатель, от юности уготова тя в жилище себе, Егоже тя обителищем быти уведевше похвальная восписуем ти:
Радуйся, благочестивых родителей богоприятное испрошение:
радуйся, от благочестиваго корене отрасль святейшая.
Радуйся, от юности твоея Богу послуживый:
радуйся, воздержанием Ангелов удививый.
Радуйся, в молитвах теплый предстателю:
радуйся, скорбящих сладкое утешение.
Радуйся, просящым скорый помощниче:
радуйся, болящым скорый и безмездный врачу.
Радуйся, земный ангеле:
радуйся, небесный человече.
Радуйся, сосуде изабранный Духа Святаго:
радуйся, телес наших здравия и душ спасения ходатаю.
Радуйся, Феодосие, великий чудотворче.
Кондак 2
Видя тщету мирских попечений, блаженне Феодосие, жизнь твою не мирови, но Богу посвятил еси: сего ради оставив дом родителей твоих, водворился еси с работающими Богу во иноческом житии, во еже непрестанно и благоприятно вопити Ему: Аллилуиа.
Икос 2
Разум плотскому человеку неразуменный от юности твоея стяжавый, преподобне отче Феодосие, горняя мудрствовал еси, а не земная, темже взываем ти:
Радуйся, мудрости небесныя жилище:
радуйся, терпения адаманте.
Радуйся, братолюбия зерцало:
радуйся, иноков правило.
Радуйся, на скрижали сердца твоего закон Божий написавый:
радуйся, сам себе и весь живот твой Христу Богу предавый.
Радуйся, ум твой к небеси вперивый:
радуйся, страх Божий в сердце твоем до конца сохранивый.
Радуйся, вместо тленных нетленная стяжавый:
радуйся, гордость мирскую поправый.
Радуйся, Духом Святым наученный:
радуйся, некнижный паче книжных просвещенный.
Радуйся, Феодосие, великий чудотворче.
Кондак 3
Сила Вышняго осени твое сердце, преподобне отче Феодосие, яко тебе, в Спасителевой обители Бога ради неусыпно потрудившася, и к чудотворной раце преподобнаго Димитрия неленостно прибегавша, яви соучастника святыни его, с нимже и ныне водворяешися в горней обители, дивному во святых своих Богу всегда вопия: Аллилуиа.
Икос 3
Имуще тя, отче Феодосие, преподобный Димитрий Прилуцкий, паче прочих избранна и любезна, предуготова тя к вящшым подвигом спасительным, егда от междоусобия Российских вельмож, и от Казанских татар и черемис, многия скорби, имущия быти предрече, таже победу над оными и конечное раззорение царства Казанскаго провозвести, да и ты с ним предстанеши ко Господу с теплым своим предстательством: мы же ведуще вся сбывшаяся, и уразумевше тя крепка молитвенника о душах наших, вопием ти:
Радуйся, во плоти удостоенный собеседования со святым Димитрием:
радуйся, великий благочестия столпе.
Радуйся, зерцало совершеннаго терпения:
радуйся, миролюбцев обличителю.
Радуйся, сластолюбцев наказателю:
радуйся, враждебных исправителю.
Радуйся, малодушных утешителю:
радуйся, к воздержанию путеводителю.
Радуйся, к трезвенному житию наставниче:
радуйся, во унынии закосневающих исправителю.
Радуйся, многих ко Господу обративый:
радуйся, козни лукаваго победивый.
Радуйся, Феодосие, великий чудотворче.
Кондак 4
Буря ярости и зверство безбожных, многих братии твоея зле исторгая жизнь при очесех твоих, велия причини тебе скорби и тесноту: обаче ты, яко доблий воин Христов, мужественно молитвою себе вооружая, под ударами злобы не изменился еси, всегда вопия Богу: Аллилуиа.
Икос 4
Слышав игумен от братии твое терпеливодушное в безмолвии житие, преблаженне, по разхищении погаными, аще и нехотяща отлучитися святыя обители, восхоте послати тя во град Тотьму на строение соленаго варения, ты же Апостольскими стопами послушания ради шествовав, путь твой добре совершил еси, сего ради сретаем тя приветствии сими:
Радуйся, иго Христово и бремя Его понесший измлада:
радуйся, не обративыйся вспять в шествии до горняго града.
Радуйся, во умерщвлении страстей добре подвизавыйся:
радуйся, в духовном мужестве с древними отцами сравненный.
Радуйся, молитвами твоими дивная сотворивый:
радуйся, господствию духа плоть покоривый.
Радуйся, миром небесным приосененный:
радуйся, долготерпения искус стяжавый.
Радуйся, земная мудрования презревый:
радуйся, единаго Господа вседушно поискавый.
Радуйся, сохранивый невредно целомудрие:
радуйся, яко верный раб пред Господем во вся дни благочестно шествовавый.
Радуйся, Феодосие, великий чудотворче.
Кондак 5
Боготечная звезда явился еси в стране Тотемстей, всеблаженне, на путь спасительный к вечному небесному отечеству ведущая, егда примером верных душы назидая, научил еси я благодарно пети Богу: Аллилуиа.
Икос 5
Видевый, преподобне отче, в варницах соли огненный жар велий, мысленно представлял еси себе жестокость огня в грядущем веце, на грешников нераскаянных уготованнаго, и внегда пребывал при варении пищныя соли, имея служащыя люди, яко присныя себе чада, всегда внушал еси им страх Божий, растворяя солию слова Божия, сам же на большыя подвиги к добродетели поучался еси, темже вопием ти:
Радуйся, образе кротости духовныя:
радуйся, умертвивый плоть твою постом и бдением.
Радуйся, умертвивый язык твой на глаголание тщеты:
радуйся, умертвивый ушы твои на слышание глагол душевредных.
Радуйся, умертвивый руки на грабление и творение зла:
радуйся, умертвивый чрево на объядение и пиянство.
Радуйся, трудами мертва соделавый чресла своя на нечистоту:
радуйся, умертвивый ноги к течению на совет нечестивых.
Радуйся, на камени Христовою верою утвержденный:
радуйся, Божиим свидетельством возвышенный.
Радуйся, не прением, но верою возмогати научивый:
радуйся, некнижный, многих книжных посрамивый.
Радуйся, Феодосие, великий чудотворче.
Кондак 6
Проповедник немолчный явился еси всем зрящим тя, Преподобне, премудроси Евангельския, всегдашния чистоты и мужественнаго терпения, аще и в безмолвии хранил еси в сердце твоем сокровище веры, надежды и любви, и воспевал еси Богу: Аллилуиа.
Икос 6
Возсия богохранимой души твоей истинный боговедения свет, егда начал если помышляти о создании новыя обители при граде Тотьме, и вселитися ту, знаменуя тем Божие людем благословение, а о благоденственной их жизни могущественное к Богу предстательство: мы же, видевше твое, Преподобне, не точию о себе, а паче о спасении ближних попечение, воспеваем тя сице:
Радуйся, сродники по плоти Христа ради оставивый:
радуйся, всю надежду на Него возложивый.
Радуйся, любве нелицемерныя хранителю:
радуйся, служителю Божий, о верных Бога умоляяй.
Радуйся, наставниче грешных к небесным направляяй:
радуйся, и словом и житием поучаяй.
Радуйся, образе агнцем и пастырем:
радуйся, блаженныя вечности искателю.
Радуйся, непостижимыя славы Святых созерцателю:
радуйся, струя напаяющая благочестием церковь.
Радуйся, светильниче, непрестанным богомыслием сияющий:
радуйся, свещнице, любовию к Богу и ближнему светящий.
Радуйся, Феодосие, великий чудотворче.
Кондак 7
Хотя обещанное Богу исполнити, приял еси путь ко игумену и братии, они же, и не хотяще разлучитися с тобою, с честию из обители тя проводиша. Шедше убо в путь свой радуяся, егда достигл еси места, к сооружению обители, назначаемаго на брегу Ковды реки, водрузив крест, Богу с радостными слезами возопил еси: Аллилуиа.
Икос 7
Новыя радости и благодарения Богу излиял еси слезы, Преподобне отче, егда прешед реку и возшед на гору, поставил еси кущу и водрузив крест не месте, назначаемом для сооружения храма, с коленопреклонением и со слезами моляся, рекл еси: «благословен Бог, иже показа ми место, идеже вселюся в век века» сего ради вопием ти:
Радуйся, от горы сея возшедый на гору небесную:
радуйся, древним общежития начальником уподобивыйся.
Радуйся, истинный Богу поклонниче:
радуйся, великий Ему угодниче.
Радуйся, делателю винограда Христова неленостный:
радуйся, благий и верный Его рабе.
Радуйся, данный ти талант благочестия возрастивый:
радуйся, в мале быв верен, над многими ныне поставленный.
Радуйся, горлице пустыннолюбная:
радуйся, древо, посреде происходящих вод насажденное.
Радуйся, грядущая яко настоящая предсказавый:
радуйся, душевныма очима выну Господа созерцаяй.
Радуйся, Феодосие, великий чудотворче.
Кондак 8
Странно бе видети, како убогий старец един обитает в пустыне на горе, презирая видимых и невидимых врагов, возлюбленный же им град обитель тому устроити и святынею обогатити тщится, мы же очима нашима вся по воле его от Бога совершаемая зряще, благодарно Ему вопием: Аллилуиа.
Икос 8
Весь, пречудный Феодосие, душею и телом посвятил еси себе Богу, пребывая в непрестанных трудах, молитвах, постех и бдениих, еже видевше окрестнии людие, кротости и терпению твоему дивящеся, начаша служити потребными к построению святыя обители: о чесом ходатайствовати трудолюбно потекл еси в град царствующий к великому Князю. Мы же подвиги твоя восхваляем сице:
Радуйся, совершенный в добродетелех человече:
радуйся, ленивых подвигнувый твоими нравы.
Радуйся, кротости навыкнувый от Агнца вземлющаго грехи мира:
радуйся, за подвиги получивый вечная благая.
Радуйся, щитом веры стрелы лукаваго разжженныя угасивый:
радуйся, молитвою и постом главу ему сокрушивый.
Радуйся, предводителю добрый в пути спасения:
радуйся, преспевавый добродетельми и трудами.
Радуйся, умерщвлением страстей миру умерый:
радуйся, возделыванием добродетели живый Богови.
Радуйся, себе самаго, яко юнца в жертву Богу посвятивый:
радуйся, светильниче, елеем благодати кипящий.
Радуйся, Феодосие, великий чудотворче.
Кондак 9
Всякое естество Ангельское удивися твоим подвигом и Христоподражательному житию твоему: почитаху бо тя и на земли во время трудов твоих жившии, не яко проста человека, но яко Ангела Божия посреде их светящася и премудростию учения в добродетели всех превосходяща, мы же прославляющемуся чрез тебе Богу взываем: Аллилуиа.
Икос 9
Витийство человеческое твое о Христе мужество, всеблаженне, изрещи не может, яко преуспевая во бдениих и пощениих, веригами тяжкими и власяницею облеклся еси, претерпевая болезни любве ради Божия, плоть твою духови поработил еси. Сего ради вопием ти:
Радуйся, алкая и жаждая правды, ныне насыщаешися:
радуйся, в послушание Богу Отцу себе отдавый.
Радуйся, нищетою твоею Богу Сыну подражавый:
радуйся, чистоту твою Богу Духу сохранивый.
Радуйся, во плоти ангельски поживый:
радуйся, воине Христов непобедимый.
Радуйся, куплями житейскими не обязавыйся, да Воеводе угоден будеши:
радуйся, не восхотевый двема господинома работати.
Радуйся, от юности на плоть, мир и диавола вооруживыйся:
радуйся, сих врагов славно победивый.
Радуйся, отец по духу чадолюбивый:
радуйся, обитель дивну насадивый.
Радуйся, Феодосие, великий чудотворче.
Кондак 10
Спасти хотя душу твою, славы мирския всемерно бегал еси, и егда окрестнии народи начаша тя яко велия о Христе подвижника почитати, ты во граде пред всеми явно сладкими питался еси, и от безумных людей укорения и биения с радостию претерпевал еси, Богу яко в тимпане, во умерщвлении телесе непрестанно вопия: Аллилуиа.
Икос 10
Стена ограждающая от всех прилогов диавольских был еси братии, паче по кончине твоей, в ней же о прославлении обители и заступлении требующих твоих молитв предрекл еси, ныне убо, по предречению исполняемая зряще, благодарно вопием ти:
Радуйся, душу свою за человеки положивый:
радуйся, от обители земныя в небесную преселивыйся.
Радуйся, душею тамо, телом зде пребываяй:
радуйся, от мощей твоих недугов целения источаяй.
Радуйся, в великих подвизех течение совершивый:
радуйся, розго мног плод о Христе сотворшая.
Радуйся, грозд винный питающий и веселящий нас:
радуйся, омраченныя просветивый.
Радуйся, просвещенныя утвердивый:
радуйся, отрада к тебе прибегающым.
Радуйся, России на сопротивныя победу содевающий:
радуйся, всем правоверным прошения исполняющий.
Радуйся, Феодосие, великий чудотворче.
Кондак 11
Пение немолчное принося Святей Троице о сохранении и укреплении Всероссийскаго царства, и всей державе Российстей от силы в силу приходящей, моли спастися, да с радостию вопием Богу: Аллилуиа.
Икос 11
Светозарный светильник явился еси, егда мощей твоих просветился еси нетлением, источая свет благодати Божия целебными дары твоими: сего ради мы яко чада церкве Христовы стекающеся, благодарственная принося Богу, вопием к тебе:
Радуйся, преисполненный всякия благостыни:
радуйся, милости превеликия сокровище.
Радуйся, промышления о людех приятелище:
радуйся, крине райскаго селения.
Радуйся, миро Христова благоухания:
радуйся, древо чудоточное рая Иисусова.
Радуйся, чаше, изливающая токи милосердия Божия:
радуйся, чудес пучино, свыше излиянная.
Радуйся, иноков удобрение:
радуйся, всея России укрепление.
Радуйся, Тотемская похвало:
радуйся, всех смиренномудрствующих славо.
Радуйся, Феодосие, великий чудотворче.
Кондак 12
Благодать цельбы стяжавшаго, преподобнаго Феодосия почтим сердцем и усты, и да вящшую воздадим почесть святым его мощам, потщимся всемерно подражати вере его, всегда вопия прославляющему Святых своих Богу: Аллилуиа.
Икос 12
Поюще твое, святе Феодосие, теплое предстательство, от врагов видимых и невидимых скорое заступление, призывающе тя умильно просим, не возгнушайся нас грешных, но услыши вопиющих тебе:
Радуйся, всякий недуг телесный и душевный врачующий:
радуйся, в невечернем дни царствия Божия приснопочивающий.
Радуйся, злых помыслов прогонителю:
радуйся, беснуемых скорый целителю.
Радуйся, закосневающих грешников исправление:
радуйся, немолчный наставниче.
Радуйся, ломотныя и опухольныя болезни уврачевавый:
радуйся, трясавичныя и огневичныя недуги отгнавый.
Радуйся, слепым прозрение даровавый:
радуйся, хромым и разслабленным хождение исправляяй.
Радуйся, в Бозе нам потребная созерцающий:
радуйся, многим прошения предваряющий.
Радуйся, Феодосие, великий чудотворче.
Кондак 13
О великий чудотворче Феодосие! Моление наше приемши, умоли подвигоположника Иисуса, да избавит царствующыя грады и всякий град и страну Христианскую от нахождения иноплеменных, от ересей и расколов, от болезней и грехов и от всякия напасти, да с тобою в селении праведных сподобимся пети триипостасному Богу: Аллилуиа.
Кондак 13 глаголи трижды. А по сем читается Икос 1 и Кондак 1
Молитва Преподобному отцу нашему Феодосию, Тотемскому чудотворцу
О добрый наш пастырю и богомудрый наставниче, преподобне отче Феодосие! услыши нас грешных, молящихся тебе, и призывающих в помощь скорое предстательство твое: виждь нас грешных в толицех обстояниих сущих, виждь нас немощных отвюду уловляемых, всякаго блага лишенных и умом от малодушия помраченных: потщися, угодниче Божий, не оставити нас в греховном плену быти, да не будем в радость врагом нашым, и не умрем в лукавых деяниих нашых. Моли о нас недостойных Спаса Господа, Емуже ты со безплотными лики предстоиши. Милостива к нам сотвори Содетеля нашего в нынешнем веце и в будущем, да не воздаст нам по делом нашым, и по нечистоте сердец нашых, но по Своей благости воздаст нам: на твое бо ходатайство уповая, твоим предстательством хвалимся, твое заступление на помощь призываем и к цельбоносному гробу твоему припадая недостойнии исцеления просим: избави нас, угодниче Христов, от злых находящих на нас, и укроти волны страстей и бед возстающих на нас, да ради святых твоих молитв не обимет нас напасть, и не погрязнем в пучине греховней и в тине страстей наших. Моли, преподобне отче Феодосие, Христа Бога нашего, да подаст нам мирное жительство, оставление грехов, душам нашым спасение и велию милость. Аминь.
Тропарь, глас 1
От юности, преподобне Феодосие, желание твое ко Христу Богу вперил еси, егоже ради град и отечество оставль и славу суетную, яко прах, вменив, последовал еси преподобному Димитрию и обители его сожитель был еси, преселився ко граду Тотьме и в междоречие вселився, постом и бдением, и власяным одеянием, и веригами тело твое удручил еси. Сего ради Бог, видев твоя труды, по преставлении твоем чудесы обогати тя: бесы изгоняеши и слепыя просвещаеши, от всяких недуг и бед избавляеши приходящия к тебе с верою и вопиющия: слава Давшему ти крепость, слава Венчавшему тя, слава Дающему тобою всем исцеление.
Ин тропарь, глас 2
От мирскаго мятежа изшед, преподобне отче наш Феодосие, и в тихое пристанище достиг, преподобному Димитрию сожитель был еси, и оттуду, Божиим Духом направляемь, во град Тотьму преселился еси, и во отоцех водных обитель себе воздвигл еси, идеже равноангельное житие пожив, последовал еси Христу, Егоже ради власяну ризу и вериги на теле твоем носил еси. Смирением и нищелюбием украсився, славу суетную презрел еси и отеческое имение добре расточил еси, молением же к Богу и слезными струями бесы посрамил еси, темже по успении твоем Христос даром чудес обогати тя. Имея убо дерзновение ко Господу, преподобне отче наш Феодосие, моли Христа Бога, да спасет души наша.
Кондак, глас 8
Воздержанием плоть изнурил еси и непрестанными молитвами, яко Ангел, возвысился еси, струями же слезными бесовския полки погрузил еси. И ныне во Свете невечернем ликуеши у Христа Бога и приходящим ко святому твоему гробу неоскудно исцеление подаеши, верою вопиющим тебе: радуйся, отче Феодосие Богомудре.
Кондак 1
Избранный чудотворче, преславный угодниче Христов, скорый помощниче и теплый молитвенниче о всех, с верою и любовию просящих твоего заступления, восхваляем тя любовию, Ефреме преподобне. Ты же яко имеяй дерзновение ко Господу, со Аркадием блаженным, моли о спасении нас поющих ти: Радуйся, Ефреме чудотворче, преподобне отче наш.
Икос 1
Ангелов подражатель явился еси, преподобне и богоносне отче наш Ефреме, ангельски поживый на земли, и нам оставивый образ совершенства духовнаго. Сего ради прослави тя нетлением и чудесы Христос Бог, Емуже предстоиши ныне во славе невечерней Царствия Небеснаго, от нас же, чтущих тя, слышиши пение таковое: Радуйся, яко любве ради Господа твоего, всякое наслаждение земное оставил еси. Радуйся, яко вся блага мира сего Христа ради презрел еси. Радуйся, яко богатство нетленное обрел еси. Радуйся, яко иго Христово благое и легкое возлюбил еси. Радуйся, яко во плоти аки безплотен пожил еси. Радуйся, яко честную и боголюбезную чистоту непорочно сохранил еси. Радуйся, яко узкими враты в пространство Царствия Небеснаго возшел еси. Радуйся, яко равноангельскую честь достойно приял еси. Радуйся, яко венец неувядаемый от Господа восприял еси. Радуйся, яко на небеси и на земли прославлен еси. Радуйся, Ефреме чудотворче, преподобне отче наш.
Кондак 2
Видя брата своего Георгиа, со благоверным князем Борисом убиенна, главу братню, яко сокровище многоценно восприяв, хранил еси, и взирая на ню, суету благ мира сего, и час свой смерный выну помышлял еси. Темже мир и вся благая его оставив, инок был еси, да единому Богу живеши, поя Ему: Аллилуиа.
Икос 2
Разумом свыше просвещенным наставлял еси духовная чада твоя к богоугождению истинному, и любезно принимал еси желавшыя подвизатися вкупе с тобою во спасение, преподобне отче Ефреме, спасительнаго пути наставниче предобрый. Приими убо и нас под твой отчий покров, и молитвами твоими помози нам спасение вечное унаследовати, да тебе восхваляем сице: Радуйся, алчущым и жаждущым правды, глаголов живота вечнаго возвестителю. Радуйся, ищущым пути спасительнаго указателю. Радуйся, мудрый к горнему царствию предоводителю. Радуйся, обуреваемых страстьми добрый кормчию. Радуйся, во благочестии труждающихся великий помощниче. Радуйся, немудрых благоискусный учителю. Радуйся, теплый о всем мире предстоятелю. Радуйся, усердный и богоприятный о душах наших молитвенниче. Радуйся, Ефреме чудотворче, преподобне отче наш.
Кондак 3
Силою Господа, умудряющаго во спасение, просвещенный, гору высоку, яко место богоизбранна селения иноческаго обрел еси: на нейже обитель во славу богопрославленных страстотерпцев Бориса и Глеба создав, ревнующыя о восхождении от веры в веру, и от добродетели к добродетели собрал еси, купно с тобою пети в Троице славимому Богу: Аллилуиа.
Икос 3
Имуще тя, отче Ефреме, скораго в бедах помощника благовернии людие, в напастех и скорбех тя на помощь молитвенно призывают, и дары благости Божией молитвами твоими от Щедродавца Бога обильно приемлюще, тебе от любве теплыя хвалебно вопиют: Радуйся, верно тебе молящихся скорый послушателю. Радуйся, многажды прошения наша исполнением их предваряяй. Радуйся, болящих врачу благоискусный и безмездный. Радуйся, скорбящих благоприятное утешение. Радуйся, унывающих благодатное ободрение. Радуйся, душетленных страстей прогонителю. Радуйся, бесноватых от насилия демонскаго свободителю. Радуйся, безпомощных скоропредстательный помощниче. Радуйся, иноков богомудрый руководителю. Радуйся, полка духовных воинов воеводо изрядный. Радуйся, Ефреме чудотворче, преподобне отче наш.
Кондак 4
Бурею страстей и треволнений многомятежнаго мира непоколебимь, в тихое пристанище спасения душу твою управил еси, преподобне отче: вся бо благая и красная мира презрев, и странника в мире себе помышляя, имение твое нищым раздал еси, и странноприимство возлюбил еси. Темже Аврааму подобник быв, на лоне его во Царствии Небеснем ныне пребываеши, поя Богу: Аллилуиа.
Икос 4
Слышавше пастырие Христовы Церкве, яко обитель изрядну воздвигл еси, и иноков лик тамо собрал еси, освятиша тя быти архимандритом, достойную почесть трудом твоим воздающе, и тем подвизающе нас благохвалити тя звании сими: Радуйся, Агнца и Пастыря верный служителю. Радуйся, олтаря Господня непорочный предстоятелю. Радуйся, богомудрый иноков начальниче. Радуйся, истиннаго смирения наставниче. Радуйся, совершеннаго терпения подвижниче. Радуйся, слезнаго умиления преисполненный. Радуйся, даров Святаго Духа честное вместилище. Радуйся, Пресвятыя Троицы избранное жилище. Радуйся, благочестия утверждение. Радуйся, Православия похвало. Радуйся, Ефреме чудотворче, преподобне отче наш.
Кондак 5
Боготечную звезду узрев тя, преподобне отче Ефреме, ученик твой Аркадий, учением и житием светло сияюща, последова зари светлаго жития твоего, и яко светильника держася тебе, приведеся к неприступному свету, достиже непостижимаго Бога, и возрадовася, вопия Ему купно с тобою: Аллилуиа.
Икос 5
Видев тя, преподобне отче Ефреме, святый ученик твой Аркадий, яко ангела Божия облеченнаго в преподобие и святыню, в юностных летех поревнова многотрудному твоему житию, и добродетельми достиже в мужа совершенна в подвизех духовных. Темже ныне вкупе с тобою предстоит Престолу Вседержителя во славе вечней, с нимже помолися ко Творцу о спасении нас грешных, поющих тебе: Радуйся, правило веры и благочестия. Радуйся, образе целомудрия и воздержания. Радуйся, постническаго лика украшение. Радуйся, сияющая зевездо в сонме преподобных. Радуйся, иноков пастырю и учителю. Радуйся, и в мире живущих заступниче и покровителю. Радуйся, яко тесный и прискорбный путь паче пространнаго возлюбил еси. Радуйся, яко и возлюбленнаго ученика твоего Аркадиа, тем путем ко Христу привел еси. Радуйся, яко жертву непорочну юношу святаго, Cладчайшему Иисусу посвятил еси. Радуйся, яко с ним славу небесную унаследовал еси. Радуйся, Ефреме чудотворче, преподобне отче наш.
Кондак 6
Проповедуя слово Божие братии твоей, отче Ефреме, всех поучал еси словом и житием твоим, безмолвию, братолюбию, странноприимству, смирению, посту, молитве, и страху Божию, иже есть начало премудрости небесныя, еюже осененный, до старости маститыя не изменил еси правила своего иноческаго, неленостно подвизаяся в молитвах деннонощных и воспевая укрепляющему тя Богу: Аллилуиа.
Икос 6
Возсия нам, яко звезда путеводная, воздержное постническое житие твое, преподобне отче: не тужил бо еси о брашне, еже не поставит нас пред Богом, нерадел еси о доброте ризной, предпочитая благоукрашати душу твою добродетельми. Сего ради нетлением и чудесы прославлен еси от Подвигоположника Христа, от нас же приемлеши сия песненныя хвалы: Радуйся, истинный Евангелиа Христова последователю. Радуйся, не брашно делаяй гиблющее, но приводящее в живот вечный. Радуйся, благодатию Божиею паче, нежели хлебом насыщенный. Радуйся, от источника жизненнаго слова Божия напоенный. Радуйся, потоком слез спасительных орошенный. Радуйся, в ризу спасения облеченный. Радуйся, одеждею нетления одеянный. Радуйся, прежде кончины твоея вся страсти воздержанием умертвивый. Радуйся, прежде умертвия твоего мертв бывый греху. Радуйся, прежде общаго всех Воскресения, от Господа нетлением прославленный. Радуйся, Ефреме чудотворче, преподобне отче наш.
Кондак 7
Хотя верен быти подражатель Агнца Божия, вземшаго грехи мира, кротость и смирение Его себе усвоил еси, отче наш Ефреме, всякия скорби и обиды безропотно терпел еси, ведый, яко скорбьми временными искупуется вечное спасение, и совершеннаго безстрастия достигл еси, во еже пети тебе еще на земли достойно и праведно ангельскую песнь Вседержителю: Аллилуиа.
Икос 7
Дивный воистинну победоносец показался еси на страсти плотския, преподобне отче Ефреме, вся разжженныя стрелы врага спасения человеческаго постом и слезными молитвами угасил еси, и во плоти ангельское житие без преткновения проходил еси, Божиею благодатию укрепляемый. Темже вопием тебе: Радуйся, всякое сладострастие в себе искоренивый. Радуйся, плоть твою духу любомудренно покоривый. Радуйся, бдении всенощными ополчивыйся противу искушений вражиих. Радуйся, пощении неослабными всякое нечистое желание обуздавый. Радуйся, молитвами непрестанными от всякия скверны очистивыйся. Радуйся, всего себе Богу посвятивый. Радуйся, за словеса Господня пути жестоки сохранивый. Радуйся, сеявый слезами, да радость пожнеши присносущную. Радуйся, трезвением неусыпным совершенство духовное стяжавый. Радуйся, Ефреме чудотворче, преподобне отче наш.
Кондак 8
Странника и пришельца помышлял еси себе быти в мире сем не постояннем, преподобне отче, и грядущаго града Иерусалима Небеснаго взыскуя, вся помышления твоя к нему выну возносил еси, ум твой на божественная возложив, и распинал еси плоть твою со страстьми и похотьми, сладце воспевая, яко в тимпане, во умерщвленнем телеси, победную песнь Христу Богу: Аллилуиа.
Икос 8
Весь облеклся еси во вся оружия Божия, яко воин Христов, препоясав чресла твоя истиною, оболкся в броня правды, и обув нозе твои во уготование благовествования мира, восприял еси щит веры и шлем спасения и мечь духовный, иже есть глагол Божий, имже и возмогл еси вся наветы лукаваго победити. Помози убо и нам, отче преподобне, твоими молитвами, противитися искушением вражиим, и подражати тебе в побеждении страстей наших, да тебе зовем: Радуйся, смирением святым гордыню душепагубную поправый. Радуйся, кротостию совершенною ярости пламень погасивый. Радуйся, нищым богатство твое расточивый, и сребролюбие возненавидевый. Радуйся, всякия досаждения и обиды без гнева претерпевый. Радуйся, яко молитвами непрестанными уныние прогнал еси от себе, и достигл еси о Господе радования. Радуйся, яко воздержанием и бдением целомудренно душу и тело твое соблюл еси. Радуйся, яко не леностно всяку добродетель исправил еси. Радуйся, яко победныя почести от Христа Бога свыше приял еси. Радуйся, при жизни и по смерти от Господа чудес даром обогащенный. Радуйся, во благоухании святыни нетленно почиваяй. Радуйся, Ефреме чудотворче, преподобне отче наш.
Кондак 9
Всякое наслаждение плотское возненавидел еси, Ефреме преблаженне, и единаго Бога всем сердцем возлюбил еси: темже и Господь тя возлюби, и чудесы прослави, даровав нам тебе молитвенника благоприятнаго пред благостию Его. Смиренно молим тя, егда имамы предстати пред Судиею Праведным, умоли Его за нас, да не помянет беззаконий наших, и сподобит нас блаженной участи одесную стоящих и вопиющих Ему: Аллилуиа.
Икос 9
Ветии многовещаннии не довлеют изглаголати вся подвиги твоя и чудеса, богомудре отче Ефреме: ибо доброта жития твоего воистину превосходит похвалу человеческую. Обаче мы, любовию к тебе побеждаеми, дерзаем смиренномудренно благохвалити тя пением таковым: Радуйся, святыя Православныя Церкве светильниче немерцаяй. Радуйся, Российсия страны ограждение несокрушимое. Радуйся, Тферския области удобрение благодатное. Радуйся, граду Торжку покрове Богом данный. Радуйся, обители твоея утверждение и похвало. Радуйся, иночествующих ликов пречудная красото. Радуйся, христианскому роду присное утешение. Радуйся, любящым и чтущым тя ходатаю спасения. Радуйся, приводяй грешных ко исправлению. Радуйся, известный умилостивителю Царя Небеснаго. Радуйся, Ефреме чудотворче, преподобне отче наш.
Кондак 10
Спастися нам от погибели вечныя, умоли Всевышняго Творца, угодниче Божий Ефреме, и не лиши нас помощи твоея святыя в час кончины нашея, егда скорби лютыя объимут грешную нашу душу, и дуси нечистии смутят нас привидении своими: тогда явися нам заступник усерден, молитвами твоими избавляя нас от их наветов, и сподобляя лицезрения ангел, и пения с ними Богу: Аллилуиа.
Икос 10
Стену заступления, и молитвенника благоприятна к Богу обретше тя отче Ефреме, благодарение Отцу Небесному усердно возсылаем за вся благодеяния Его, тобою нам обильно являемыя, тебе же предстателю нашему сицевое приносим пение: Радуйся, угодниче Господень, предивный в чудесех. Радуйся, избранниче Христов неутомимый в подвизех. Радуйся, слуго добропослушливый Всевышняго Домовладыки. Радуйся, благий и верный рабе Царя царей. Радуйся, сильный обидимых заступниче. Радуйся, сирых и убогих благонадежное пристанище. Радуйся, душевных и телесных недугов благий целителю. Радуйся, радости нам вечныя известный ходатаю. Радуйся, грешников кающихся с Богом примирителю. Радуйся, небесный наш покровителю. Радуйся, Ефреме чудотворче, преподобне отче наш.
Кондак 11
Пение хвалебное воспеваем тебе, преподобне отче Ефреме, и с любовию припадаем к раце святых и многоцелебных мощей твоих, прославляюще терпеливое житие твое, безмолвие твое высокое, смирение нелицемерное, молитву непрестанную, воздержание совершенное, и чистоту боголюбезную души и тела: ты же, всеблаженне, помози и нам подражати твоим добродетелем, да возможем богоугодно пети Создателю нашему: Аллилуиа.
Икос 11
Светильник добрых дел был еси при жизни, отче преподобне, светильник лучезарный Божия благодати явился еси и по смерти, чудесы сияя и исцеления источая от нетленных мощей твоих, яже по пяти сот девятинадесятих летех, яко сокровище драгоценное, из недр земных целы и благоуханны обретены быша. Тебе убо, сице прославленному от Господа, дары песней духовных приносяще, умиленно зовем: Радуйся, нетления цвете благоуханный и прекрасный. Радуйся, святопроцветший крине рая Иисусова. Радуйся, светлостию чудес твоих мрак душ наших озаряяй. Радуйся, от болезней многоразличных благодатно телеса наша исцеляяй. Радуйся, ран греховных врачу благоискусный. Радуйся, скорбящих сердец утешителю радостотворный. Радуйся, грозный карателю обидящих. Радуйся, обители твоея страже неусыпный. Радуйся, жезл настоятельства в ней до ныне невидимо содержащий. Радуйся, Ефреме чудотворче, преподобне отче наш.
Кондак 12
Благодать великих чудес от Господа приял еси, преподобне отче Ефреме, и по достоянию чудотворец наречен был еси: ибо не токмо при жизни, но и по смерти, величием твоих чудес всех удивляеши, и к славословию всемогущества Христова подвизаеши, во еже пети за тя Верховному чудес Творцу, и святых Святейшему Слову: Аллилуиа.
Икос 12
Поем доблественныя подвиги твоя, добропобедный воине Христов, отче наш Ефреме, ублажаем блаженную кончину твою, и молитвенно торжествуем святую память твою, тебе усердно воспевающе: Радуйся, яко свято и праведно на земли пожил еси. Радуйся, яко воистину ангел земный и человек небесный был еси. Радуйся, яко память твоя с похвалами, и успение со святыми. Радуйся, яко отверзошася тебе врата райская, и вшел еси в радость Господа твоего. Радуйся, яко душу твою Жизнодавец Христос прият в небесная селения. Радуйся, яко и тело твое на земли прославися нетлением и чудесы. Радуйся, яко со безплотными силами горе трисвятую песнь Богу немолчно поеши. Радуйся, яко со пророки и ангелы светло торжествуеши. Радуйся, со святители и мученики прославленный. Радуйся, со преподобными и праведными безсмертия венцем увенчанный. Радуйся, Ефреме чудотворче, преподобне отче наш.
Кондак 13
О преподобне и богоносне отче Ефреме! Тебе молимся, и тебе просим: вонми похвальному пению нашему, тебе от усердия приносимому, и со учеником твоим Аркадием, моли Господа Бога, всея твари создателя, да простит нам согрешения наша вольная и невольная, и сподобит нас Царствия Своего Небеснаго, вопиющих Ему: Аллилуиа.
Этот кондак читается трижды, затем икос 1-й, и кондак 1-й
Молитва святому преподобному Ефрему, Новоторжскому чудотворцу
О священная главо, великий и предивный чудотворче, отче наш Ефреме! К тебе скорому помощнику и усердному о нас молитвеннику смиренно прибегаем, и молитвенно просим тя: нас скорбных и обремененных грехи многими, не остави помощию твоею и заступлением благодатным. Не забуди нас чад твоих, отче священнейший, но поминай нас присно в небесных богоприятных молитвах твоих у Престола Пресвятыя Троицы, идеже со ангелы и всеми святыми предстоиши, и зриши вся наша нужды и беды, яко обуреваемся страстьми и не имамы дерзновения ко Творцу, просити Его о помиловании и спасении. Темже тебе предлагаем яко умилостивителя пред Господом, и тобою уповаем милость Божию и прощение грехов наших от Вседержителя получити, и спасение вечное унаследовати, да славим и поем величие, и благодать и человеколюбие Отца и Сына и Святаго Духа, и твое отеческое заступление, ныне и присно, и во веки веков. Аминь.