Каноны - 10 февраля 2025

Песнь 1

Ирмос: Поим Господеви, проведшему люди Своя сквозе Чермное море, яко Един славно прославися.

Озари, Христе Боже Превечный, Свете от Света, омраченнаго мя, да Богомудраго пою Феодосия.

Света сподоби, отче, принесшаго тебе пение невечерняго улучити, в немже ликуеши.

Любве Божественныя теплотою разжегся, преподобне, изсушил еси потоки страстнаго взыграния.

Богородичен: Во утробе Твоей вмещши Невместимаго, всех Творца, избави от лютых поющия Тя, Всенепорочная.

Песнь 3

Ирмос: Ты еси утверждение притекающих к Тебе, Господи, Ты еси Свет омраченных, и поет Тя дух мой.

Возлюбил еси от юности усердно Христови работати, Егоже ради вся презрел еси, долу влекущая.

Очистив ум, тело и дух, треблаженне, дом был еси Трисолнечнаго Света, украшен добродетельми.

Естество плоти воздержанием утончил еси, Христа имея, Феодосие, укрепляюща тя к подвигом.

Богородичен: Моли, Всечистая и Неискусобрачная Марие, Сына Твоего и Бога нашего, послати нам велию милость.

Седален, глас 8

Премножеством добродетелей от младенства житие украсил еси, помыслив от земных на Небесная, и, делом совершив, отче Феодосие, славу и богатство тленное ни во что же вменил еси; постом и власяным одеянием плоть твою изнурял еси, всенощным же стоянием и молитвами собеседник ангельским ликом показался еси. Моли Христа Бога согрешений оставление даровати чтущим любовию святую память твою.

Песнь 4

Ирмос: Услышах, Господи, смотрения Твоего таинство, разумех дела Твоя и прославих Твое Божество.

Силою Владычнею лестца коварство разрушил еси, прешед немятежно в райская селения.

Паче будущаго ничтоже ино предпочтил еси и сего ради наследовал еси вечное блаженство, отче наш Феодосие.

Слезными потоки омыл еси нечистоту греховную, бдением же и молитвами ликом святых сопричтен был еси.

Богородичен: Едину Тя поем и по рождестве Деву, Богородице: Ты бо Слово плотию нетленно родила еси мирови.

Песнь 5

Ирмос: Просвети нас повелении Твоими, Господи, и мышцею Твоею высокою Твой мир подаждь нам, Человеколюбче.

Око сердца управив ко Творцу всех, Феодосие, и разсмотрив, козни вражия твоим твердым смыслом низложил еси.

Мудрования плоти покорил еси духови, умом к Вышнему возревновав, и от Него приял еси духовную благодать.

Основание, егоже противник не подвиже, крепко положив в души твоеи, живуща имел еси Святаго Духа.

Богородичен: Щедрот бездну имущи, Дево Богородице, призри на мя, озлобленнаго грехми, и в ров падша возведи к покаянию.

Песнь 6

Ирмос: Ризу мне подаждь светлу, одеяйся светом, яко ризою, Многомилостиве Христе Боже наш.

Аврааму подобяся, оставив земнаго отечества град, многим тщанием Христу последовал еси.

Богатство и славу презрев, одеяние жестокое носил еси, сим исткав себе одежду нетления.

Удобрил еси себе, Богомудре, красными восхождении к Небесным востек, Божественными крилы.

Богородичен: Девство чисто соблюдши и Безлетное Слово под конец летом рождши, Твоим молением спаси поющия Тя.

Кондак, глас 8

Воздержанием плоть изнурил еси и непрестанными молитвами, яко Ангел, возвысился еси, струями же слезными бесовския полки погрузил еси. И ныне во Свете невечернем ликуеши у Христа Бога и приходящим ко святому твоему гробу неоскудно исцеление подаеши, верою вопиющим тебе: радуйся, отче Феодосие Богомудре.

Икос

Возревновав о Божественных бдениих и тесным на земли шествовав путем, Небесных пространствия радостне достигл еси, идеже зриши Пресвятую Троицу, дарованьми чудес обогащаемь. Мы же, терпению твоему дивящеся, сице вопием: радуйся, чистое Святаго Духа приятелище; радуйся, земный Ангеле и Небесный человече; радуйся, любве ради Христовы град отечества земнаго оставивый и в междоречии жити изволивый; радуйся, древо добродетелей, при водах насажденное; радуйся, яко плод принесл еси благоцветущ послушания; радуйся, яко терпением твоим страсти плотския умертвил еси; радуйся, яко оружием крестным мысленнаго Амалика посекл еси; радуйся, столпе, непоколебимый житейскими ветры; радуйся, лукавых духов прогонителю; радуйся, яко исцелений источаеши реку; радуйся, яко страждущих от бед избавляеши; радуйся, иноком исправление; радуйся, отче Феодосие Богомудре.

Песнь 7

Ирмос: Ангелом отроки из огня спасый и гремящую пещь преложивый на росу, благословен еси, Боже отец наших.

Плотию обложен, безплотныя победил еси, непрестанно Христови зовый: благословен еси, Боже отец наших.

Огнем Божественным терние греховных страстей попалил еси, Богомудре, поя: благословен еси, Боже отец наших.

Юности рачения оплевав разумно, всего себе Богови возложил еси, поя: благословен еси, Боже отец наших.

Богородичен: Небесе ширшую Деву показа правды Солнце, из Нея возсияв, Спас поющих: благословен еси, Боже отец наших.

Песнь 8

Ирмос: Богоглаголивии отроцы в пещи, со огнем пламень попирающе, пояху: благословите, дела Господня, Господа.

Славословием всенощным присно соодолел еси страстем, преблаженне, поя: благословите, дела Господня, Господа.

Неприкосновеннаго улучив света, с лики святых водворяешися, отче, поя: благословите, дела Господня, Господа.

Горняго Иерусалима достигнути сподоби, отче Феодосие, поющия: благословите, дела Господня, Господа.

Богородичен: Обожил есть, из Тебе воплощен, Господь, Владычице, земных существо, поющих: благословите, дела Господня, Господа.

Песнь 9

Ирмос: Чистую славно почтим, людие, Богородицу, огнь Божества приимшую во чреве неопально, песньми величаем.

Любезно подвиг скончав и возделав ниву душевную, плод сторичный пожал еси, отче Феодосие, тя чтущих.

Вечныя достигл еси жизни крайним воздержанием и Свет Присносущныя Троицы зрети сподобился еси, отче Богомудре.

Ко Владыце имея дерзновение, точиши исцеления, и всем, чтущим память твою, отче, милость испроси.

Богородичен: Адамовым вкушением приставленное оружие Тобою, Пречистая, вход дает, стыдяся копия, прободшаго Рождшагося из Тебе.

Светилен

Умертвил еси долу влекущая мудрования, и, мирскаго пристрастия удалився, яко скверны, процвел еси, яко финикс, давидски, отче Феодосие и Небесною славою со Ангелы обогатился еси от Бога, Егоже в песнех восхваляем.

Песнь 1

Ирмос: Сеченое, сечется море Чермное, волнопитаемая же изсушается глубина, таяжде купно безоружным бывши проходима и всеоружным гроб. Песнь же Богокрасная воспевашеся: славно прославися Христос Бог наш.

Агнче Пречисте, Божий Слове, низпосли мне слово, недостойному, воспети чудеса преподобнаго Твоего Феодосия, егоже в подвизех прославил еси, усердно к Тебе воспевающа: славно прославися Христос Бог наш.

Весь возложся Зиждителеви и славу временную презрети желая, железы тело твое стягнув, к подвигу устремился еси, Божественною разжегся ревностию, в молитвах же к Богу воспевая: славно прославися Христос Бог наш.

Гордаго змия смирением твоим поправ, плотская взыграния умертвил еси, и житейския сласти терпением, аки мечем, посекл еси, преподобне Феодосие, Господеви вопия: славно прославися Христос Бог наш.

Богородичен: Девство сохранивши некрадомо, от Духа Свята заченши, родила еси Бога Слова и по Рождестве пребыла еси, якоже и прежде, Богоневесто Владычице. Темже спаси нас, вопиющих: славно прославися Христос Бог наш.

Песнь 3

Ирмос: Господь Сый всех и Зиждитель Бог, созданное Безстрастный, обнищав, Себе соедини, и Пасха, за яже хотяше умрети, Сам Сый, Себе предпожре: ядите,—вопия,— Тело Мое и верою утвердитеся.

Единаго возлюбил еси Христа, преподобне Феодосие и во плоти безплотных полки посрамил еси и по преставлении твоем чудеса точиши: явлением бо со иконою Пречистыя Богоматере девицу разслабленную от одра возставил еси.

Житие непорочно на земли совершил еси, преподобне, ныне же страсти недужных исцеляеши: страждущему бо на новый месяц от лукаваго духа трилетное время здравие подал еси, пришедшу ко святому гробу твоему.

Зиждителю предстоиши и к Нему дерзновение имаши, отче. К раце бо твоей пришедшая жена, шум, и двоицы глаголание, и пения убо слышавши, ужасеся; манием же касания очес прозрение подал еси ей, назнаменуя святыя воды кропление.

Богородичен: Из корене Иессеова израстши жезл, цвет носящий — Христа, Содетеля всякия твари, увядившаго сады неплоднаго разума, Дево Богородице, спаси ны от греховных страстей, прибегающия в кров Твой с верою.

Седален, глас 8

Премножеством добродетелей от младенства житие украсил еси, помыслив от земных на Небесная, и, делом совершив, отче Феодосие, славу и богатство тленное ни во что же вменил еси; постом и власяным одеянием плоть твою изнурял еси, всенощным же стоянием и молитвами собеседник ангельским ликом показался еси. Моли Христа Бога согрешений оставление даровати чтущим любовию святую память твою.

Песнь 4

Ирмос: Удивися Твой разум от мене, услышавшу преславная веления смотрения Твоего, укрепися же возлюблением Твоего схождения, Ты бо моея нищеты не отверглся еси.

Феодосие блаженне, воздержанием во плоти страсти чувственныя умертвил еси и по успении твоем страсти недужных разрешаеши: одержимаго бо трясавицею свободил еси от недуга.

Источники слезными напоив ниву души твоея, отче, чудесы просиял еси, яко звезда, многосветлая: болезнующаго очима уврачевал еси, младенца же спасл еси, мучима от лукаваго духа.

Ко Творцу о нас молишися, преподобне, и даруеши цельбы неоскудно припадающим к раце твоей: хромаго от болезни уврачевал еси и ходити непреткновенно устроил еси

Богородичен: Людем явися обновление, Владычице: Ты бо родила еси во времени от Отца рожденнаго прежде век, нас же ради от Тебе воплотившагося и спасшаго от первыя клятвы род человеческий.

Песнь 5

Ирмос: Богоявления Твоего, Христе, к нам милостивно бывшаго, Исаия Свет видев Невечерний, из нощи утреневав, взываше: воскреснут мертвии, и востанут сущии во гробех, и вси земнороднии возрадуются.

Многое имея дерзновение к Зиждителю, отче Феодосие, многими мя, лютыми страстьми содержимаго, исцели, якоже и девицу, всеми уды разслабленную, прикоснувшуюся раце твоей, исцелил еси.

Недреманно последуя Христу, плоть нас ради приемшу и очи слепаго отверзшу, Феодосие, жене слепей и оком невидящему прозрение подал еси, и нас просвети, поющих тя.

К Серафимом приобщився, преподобне Феодосие, всяческих Творца и Владыку преклонил еси на милосердие: седмолетное время не слышавшему ушима, даровал еси здравие.

Богородичен: Огнь Божественный во утробе понесши, Богоневесто Пречистая, попали наша страсти душетленныя и просвети сердца поющих, да вси Тебе прославляем, рождшую Господа, всю тварь содержащаго.

Песнь 6

Ирмос: Зверю бездны предается пророк Иона, глубине морской, прообразуя Твое, Слове, тридневное востание. Тем и взываше: из глубины преисподния возведи живот мой, Благоутробне.

Пресвятей Троице дом себе устроив, пустыню возлюбил еси и по преселении твоем к Богу посещаеши ученики твоя, старца разслабленнаго укрепил еси и младенцу разрешил еси слепоту.

Рака мощей твоих, отче Феодосие, неоскудно исцеления источает приходящим с верою: главную болезнь и разслабление тела жене разрешил еси, человека же одержимаго от лукаваго духа свободил еси.

Светом Божественным озаряемь свыше, чудесы просиял еси и мрак демонский разрушаеши; нас же, прегрешеньми объюродевших, уцеломудри, якоже изступльших ума уцеломудрил еси.

Богородичен: Тя провиде Даниил несеченную гору, из неяже отторжеся камень без руку, прообразуя от Тебе воплощение Безлетнаго в лето. Нас же, во глубине злых прегрешений труждающихся, спасаеши, Богородице, едина земным прибежище.

Кондак, глас 8

Воздержанием плоть изнурил еси и непрестанными молитвами, яко Ангел, возвысился еси, струями же слезными бесовския полки погрузил еси. И ныне во Свете невечернем ликуеши у Христа Бога и приходящим ко святому твоему гробу неоскудно исцеление подаеши, верою вопиющим тебе: радуйся, отче Феодосие Богомудре.

Икос

Возревновав о Божественных бдениих и тесным на земли шествовав путем, Небесных пространствия радостне достигл еси, идеже зриши Пресвятую Троицу, дарованьми чудес обогащаемь. Мы же, терпению твоему дивящеся, сице вопием: радуйся, чистое Святаго Духа приятелище; радуйся, земный Ангеле и Небесный человече; радуйся, любве ради Христовы град отечества земнаго оставивый и в междоречии жити изволивый; радуйся, древо добродетелей, при водах насажденное; радуйся, яко плод принесл еси благоцветущ послушания; радуйся, яко терпением твоим страсти плотския умертвил еси; радуйся, яко оружием крестным мысленнаго Амалика посекл еси; радуйся, столпе, непоколебимый житейскими ветры; радуйся, лукавых духов прогонителю; радуйся, яко исцелений источаеши реку; радуйся, яко страждущих от бед избавляеши; радуйся, иноком исправление; радуйся, отче Феодосие Богомудре.

Песнь 7

Ирмос: Три юноши не опали древле возвышаемый пламень, нещадно мя зной к тлению положи. Но, яко оныя избавил еси сиянием Твоим, поющаго с ними спаси мя: благословен еси, Боже отец наших.

У Владыки Творца предстоя в Вышнем Царствии, Феодосие преподобне, болезнующую очима исцелил еси; просвети и наша сердечная очеса светом Богоразумия и научи к Нему пети: благословен еси, Боже отец наших.

Фарисейское кичение отвергше, усердно приступим вси ко гробу Богомудраго Феодосия: источает бо нам неоскудную струю исцелений. Отроку страсть телесе и соуз языка разрешив, да отверзет и наши устне пети Христу: благословен еси, Боже отец наших.

Излиянием чудес от Бога обогатился еси, отче, темже приходящих облегчаеши болезни, растения утробы, и струп ноги, и крови течение уставил еси. Утверди убо и наша мысли звати Христу: благословен еси, Боже отец наших.

Богородичен: Христа рождши, Владыку и Врача всяческих, Богородице, ранами греховными нас, уязвленных люте от душетленнаго стрельца и неисцельно болящих, исцели, Владычице, молитвами Твоими и пластырь приложи покаяния Сыну Твоему зовущим: благословен еси, Боже отец наших.

Песнь 8

Ирмос: За законы отеческия блаженнии в Вавилоне юноши, предбедствующе, царюющаго оплеваша повеление безумное и, совокуплени имже, не сваришася огнем, Державствующему достойную воспеваху песнь: Господа пойте, дела, и превозносите во вся веки.

Псаломски процвел еси, яко финикс, в посте и подвизех, и бесовския полки прогоняеши, и даруеши цельбы независтно. Житейскими помышленьми мой ум мятущийся уцеломудри, да воспою: Господа пойте, дела, и превозносите во вся веки.

Цареви всех и Богу предстоя, отче Феодосие, нам испроси одоление на враги видимыя и невидимыя и движимая сердца наша утверди, да в радости душевней воспоем: Господа пойте, дела, и превозносите во вся веки.

Чисте зрети сподобився Пресвятую Троицу, до конца чисто житие сохранил еси и чистотою Ангелы удивил еси. Мене же, житейскими сластьми оскверненнаго, очисти молитвами твоими, да воспою: Господа пойте, дела, и превозносите во вся веки.

Богородичен: О Света приятелище, пресветлаго Солнца облаче, Богорадованная Владычице, лестнице мысленная, Небесная врата, спасения двери! Бог бо из Твоих ложесн пройде неизреченно, Егоже прославляем во веки.

Песнь 9

Ирмос: Странствия Владычня и Безсмертныя Трапезы на Горнем месте высокими умы, вернии, приидите, насладимся, возшедша Слова, от Слова научившеся, Егоже величаем.

Гражданин Вышний желая быти, земнаго отечества град оставил еси, пресельник явився, отче Феодосие, к Горним легко прешел еси, во свете праведных водворяяся, духом же неотступно с нами пребываеши, сохраняй убо нас, тя воспевающих.

Распростер преподобнии твои руце, принеси моление ко Всещедрому Богу, отче Богомудре Феодосие, сохранити град твой невредим от варварскаго нашествия и междоусобныя брани и спасти нас, тебе величающих.

Глагол моих недостойных грубое вещание, еже по силе принесох тебе, преподобне Феодосие, приими и не презри, но Творца нашего, Владыку и Господа, моли за мя, в день страшнаго испытания милость обрести и тамошняго мучения избавитися.

Богородичен: Рясны златыми преукрашена, одесную Царя Бога предстоиши, Богородице Дево, моли убо Сына Твоего и Владыку милость обрести нам в день последняго испытания, и стояния сподоби нас со избранными, и страшнаго мучения свободи, да вси Тебе величаем.

Светилен

Умертвил еси долу влекущая мудрования, и, мирскаго пристрастия удалився, яко скверны, процвел еси, яко финикс, давидски, отче Феодосие и Небесною славою со Ангелы обогатился еси от Бога, Егоже в песнех восхваляем.

тропарь, глас 8. Слезами твоих источников пустыни безъчадное напоил еси и, еже из глубины, воздыхании во сто труды уплодоносил еси - и бысть светильник вселенней, сияя чудесы, Ефреме-отче наш, моли Христа-Бога спастися душам нашим. Слава, и ныне. Иже нас ради Рождеи Ся от Девы и распятие претерпев, Благии, Испровергии смертию смерть и восресение Явлеи яко Бог
- не презри, их же созда рукою Своею,
- яви человеколюбие Свое, Милостиве,
- приими рождьшую Тя - Богородицу, Молящуюся за нас,
- и спаси, Спасе наш, люди согрешьшыя.
Канон, поем в глас 6. Песнь 1, ирмос: Яко по суху ходив израиль по бездне стопами, гонителя фараона видя потопляема - Богу победную песнь поем, вопияше.
ЗАПЕВ. Преподобне отче Ефреме, моли Бога о нас. Евъфратъским одождением - твоими молитвами душю мою напой, изъсохшую зноем страстей. И слово ми вдохни, твой восхваляющу праздник, преблаженне.
ЗАПЕВ. Свет мысленыи облистал еси - светло явился еси солнце: добродетельми светолучными и учении добротами, Ефреме, озаряя верных все исполнение.
СЛАВА. Струями слез пламень страстей погасив, был еси сосуд честен, Ефреме, Святаго Духа - источник источая учением, Богоблаженне.
И НЫНЕ. Нетленно Слово во утробе приимши, родила еси - Избавляющаго от тли Тому служащыя присно, Мати-Дево, Чистая, Двери - воистину - Живота.
Песнь 3, ирмос: Несть Свята, якоже Ты, Господи, Боже мой, - Вознесыи рог верных Си, Блаже, и Утвердивыи их на камени исповедания Ти.
ЗАПЕВ. Тины всякия страстныя себе очищь - явил ся еси приятилище добродетелем, воистину, и сосуд въмещен дарованиям Святаго Духа.
ЗАПЕВ. Никакоже сна очима подав - храм явил ся еси Святей Троице и Премудрости сокровище, мир обогащая златозарными учении, блаженне.
СЛАВА. Познавает другии Ефрат Христова честная Церкви: златыми течении напояюща мудрых учения водами - и тварь всю напояюща.
И НЫНЕ. Во двою естеству - единыи от Святыя Троицы - от чистых Твоих кровий воплощь Ся, Боголепно пройде, яже от Адама спасая благостию, О, Пречистая.
седален, глас 5. Сокровище Премудрости тайнам Христовем, чашю Божественаго умиления - воспоем вернии в памяти его: тезоименно бо всегда сердца верных веселит утешении Божествеными Ефрем, яко делатель и таиник Господним откровением. Слава, и ныне. Богородичен: Теплая Предстательнице, и Непобедимая, Упование известное и непостыдное, Стено и Покрове, и Пристанище притекающим Ти, присно Дево, Чистая, - Сына Своего и Бога моли со Ангелы Мир даровати мiрови и спасение и велию милость. Кресто-Богородичный: Крестом Сына Твоего, Богоблагодатная, идольская лесть вся упразднися и бесовъская крепость попрана бысть, сего ради вернии подолгу Тя присно поем и благословим и, Богородицу - воистину! - исповедающе, величаем.
Песнь 4, ирмос. Христос мне - Сила, Бог и Господь - честная Церкви Боголепно зовет, вопиющи от совести чисты, о Господе празднующи.
ЗАПЕВ. Сила глаголом твоим протече весь мир, высоко творя сиянием смирения, отгоня ослепление душам, блаженне.
ЗАПЕВ. Непорочно прошел еси житие, слезами себе омывая - и Судии всех Пришествие написуя словесы мудрыми, Богоявленне, досточюдне.
ЗАПЕВ. Видев твоего смирения преславную высоту Господь - дарует тебе слово высокотворно, имже ересем лютая возношения смиришася.
СЛАВА. Укрепль себя благодатию Вседержителя - ополчи себя къ началом бесовъским, отче, - и победил еси, о нас моляся тепле, восхваляющих тя.
И НЫНЕ. Яко Божественыи храм, яко Гору Святую, яко Источник Нетления, яко Избранну едину бывшую Зиждителю нашему Богу --- ДЕВУЮ (Ис. 7:14), ублажаем.
Песнь 5, ирмос. Божиим светом Твоим, Блаже, утренюющих Тебе душя любовию, просвети, молюся, Тебя ведети, Слове Божии, истиннаго Бога - от мрака греховнаго Изимающа.
ЗАПЕВ. Слезными каплями до конца, отче, изъсушил еси сластей пучину, а истечением твоих учении, блаженне, вся ересем потоки всяко потопил еси.
ЗАПЕВ. Отче, ум твой воззрением, еже к Богу, просвещаемь, Ефреме, Боговиден весь бысть, якоже зерцало Божественаго Духа, невеществено явления приемля.
СЛАВА. Отче - храм был еси, воистину, вместен Троице и испещрен благодатию и чистых добродетелей озарением и учением целостию.
И НЫНЕ. Умерщвлена мя показа во едеме вкушение древа лукавым наветом змия - Ты же, Живодавца-Христа рождьши, оживи мя, едина Богорадованная.
Песнь 6, ирмос. Житейскаго моря воздвизаема зря напастей бурею, в тихое пристанище Твое притек, вопию Тебе: возъведи от тли живот мой, Многомилостиве.
ЗАПЕВ. Не на песце основание, но на вере незыблеме Богоносец положи - от вражиих всяческих навет не преклоним пребысть, непобедимою Дланию окормляем.
ЗАПЕВ. Воистину, язык твой - «трость книжника скорописца» (Пс. 44:1) был еси, показующь разум всеблагочестив, начертающь на скрижалех сердечных, отче, закон Духоныи.
СЛАВА. Твоим плавающеи утешения учением, Ефреме Богомудре, пучины треволнения душевредныя и бурь ересей избавляются: възывающе - верою спасаются.

И НЫНЕ. Иже всякоя вышъши - яко Бог- разумныя и видимыя твари, воплощ Ся, пройде ис Твоея утробы, содела Тя нетленну, якоже бе прежде рожества, О, Мати-Дево.
кондак, глас 2. Час всегда провидя испытания, рыдаше горце, Ефреме, яко любя безъмолвие - делательник же был еси, в делех учитель Божественныи, темже, отче-всекрасне, ленивыя возъставляеши к покаянию. икос: От воды благодати твоея одожди в душю мою, омывая ю* от всякия скверны нечистыя, яко да от сих очистит ся и ревнительно житие по-всему Духовно в прочее лето скончавши - сладости Божественныя насладит ся, ея же насладился еси - и напоил еси вся, прежде страстьми исъсохшыя: се есть словесы твоими: ленивыя возъставляеши к покаянию.
Песнь 7, ирмос. Хладодательну убо пещь сотвори Ангел преподобным детем, халдеи же опали велением Божиим, мучителя увеща вопити: Благословен Бог отцев наших.
ЗАПЕВ. Законоположитель инокующим известен явился еси, пречестне, изиматель же от вражиих всяческих сплетении, темже, твою на земли почитают честную и священную, отче, память.
СЛАВА. Изряден Духу, преславне, орган был еси: всегда Того возглашая дохновения - и покаяния глас спасеныи нам поя, воспевающим тя.
И НЫНЕ. Паче слова Твое зачатие, Богоневесто: Бога бо Слова родила еси - Избавляющаго от безсловесия вся человеки и слово Подающаго вопити: Благословен Бог отцев наших.
Песнь 8, ирмос. Из пламене Святым росу источи, а праведнаго жертвы и воду попали - вся бо твориши, Христе, елико хощеши, тем, Тя превозносим - Господа! - во веки.
ЗАПЕВ. Яко светоносное явися другое солнце - учение яко зарю испущая во вся пределы вселенныя: светом покаяния, блаженне, отгнал еси тму несветлую всякаго греха. (дважды).
СЛАВА. Струями Божественных учении окружаемь, яко же другая река из едема текущи - лице земли напаяя чюдне, а нечестия плевелы подавляя.
И НЫНЕ. Истинную Богородицу исповедающе Тя, якоже Ангел: Радуися, - вопием Ти: едина бо Радость на земли родила еси, Обрадованная, Присноблаженная.
Песнь 9, ирмос. Бога человеком неудобь видети, на Него же не смеют чини Ангельстии зрети - Тобою бо, Пречистая, яви Ся нам Слово Воплощено, Его же величающе, съ Небесными вои Тя величаем.
ЗАПЕВ. Укрепль ся любовию Вседержителя, все свое житие - рыдая - скончал еси, О, преподобне, вопия со удивлением: послаби моря житейскаго волнам, О, Твоею, Спасе, благодатию, ею в будущей жизни мя богатно соблюдая.
ЗАПЕВ. Сладъко слово твое - умиления подательно, исполнь просвещения притекающим, О, Богоносне Ефреме, досточюдне, непорочно же житие - всеми украшаемь Богосиянными добродетельми и просвещаемь.
СЛАВА. Храм Духу был еси и - река вод животных исполняема; - Церкви основание непоколебимо; - утвержение инокующим; - источник всегда текущии Божественнаго умиления, Ефреме досточюдне.
И НЫНЕ. Разумети не может ум человеческии, еже паче ума рожества Твоего, Дево, таиньство: Бог бо всель Ся посреди Тебе,
ключь девьства не поколеба,
яко же весть един Сам,
Непостижимыи.