Акафисты - 11 февраля 2025
Кондак 1
Избраннии от Господа во преемники равноапостольному Стефану, первосвятителю и ангелу Церкве Великопермския, поборницы нашего спасения и теплии о нас к Богу молитвенницы, Герасиме, Питириме и Ионо, песньми духовными восхваляем вас с любовию, просветителей нашых. Вы же, яко имущии дерзновение ко Господу, со равноапостольным Стефаном предстательствуйте о спасении нашем, да зовем вам: Радуйтеся, Герасиме, Питириме и Ионо, теплии о нас пред Богом заступницы.
Икос 1
Ангели Церкве Великопермския, Герасиме, Питириме и Ионо, равноангельно на земли пожившии, со всеми святыми предстоите ныне Престолу Царя Славы, предстательствующе о пастве своей ко Господу. Сего ради ублажаем вас сице: Радуйтеся, Престолу Живоначальныя Троицы предстоящии. Радуйтеся, ангельскому житию на земли поревновавшии. Радуйтеся, дивнии ныне собеседницы святым. Радуйтеся, трисветлыя свещы, невечерним Троическим светом сияющыя. Радуйтеся, Духа Пресвятаго сосуди избраннии. Радуйтеся, велие дерзновение ко Христу Богу имущии. Радуйтеся, со равноапостольным Стефаном просветителие Пермстии. Радуйтеся, паству Пермскую, яко овча заблуждшее, ко Христу приведшии. Радуйтеся, Герасиме, Питириме и Ионо, теплии о нас пред Богом заступницы.
Кондак 2
Видев сердцеведец Господь ваше твердое изволение душу свою положити за други своя, поставляет вас во преемники равноапостольному Стефану на свешнице Церкве Великопермския, да свет святаго Евангелиа вами возсияет во тме и сени смертней седящым, и просвещеннии вами людие воспоют Богу хвалебную песнь: Аллилуиа.
Икос 2
Разумом светлым и сердцем чистым изволению Божию повинувшиеся, иго Христово благое вземшии, по стопам равноапостольнаго Стефана усердно последовали есте на нивы духовныя, отцы наши Герасиме, Питириме и Ионо, новыя бразды проводяще и обильно сеюще в них семена Слова Божия. О сем благодаряще Господа, славим вы, глаголюще: Радуйтеся, богопросвещеннии проповедницы веры Христовы. Радуйтеся, светила, во тме идолослужения сущих озарившая. Радуйтеся, семенем Слова Божия окаменевшая сердца людей духовне породившии. Радуйтеся, яко во всю страну Пермскую изыде вещание учения вашего. Радуйтеся, ловцы заблуждших, мрежею словес ваших Господеви сих уловившии. Радуйтеся, богатство духовное от сокровищ неистощимых изнесшии. Радуйтеся, глубиною безбожия погружаемых ко пристанищу спасения приведшии. Радуйтеся, апостолов преемницы, исполненнии дарований духовных. Радуйтеся, Герасиме, Питириме и Ионо, теплии о нас пред Богом заступницы.
Кондак 3
Силою Божиею укрепляеми, оружием Креста Христова вооружившеся, добропобеднии воини Царя Небеснаго, мужески противостали есте врагу спасения диаволу, изъемлюще из челюстей его душы спасенных вами и с ними взывающе Господу победную песнь: Аллилуиа.
Икос 3
Имуще в сердце своем твердое упование на всесильную помощь Божию, не устрашистеся, преподобнии, ярости духа злобы, искавшаго погубити вас; постом же и молитвою победивше сего, достойно ублажаетеся звании сими: Радуйтеся, благодать неоскудную от Бога приимшии. Радуйтеся, силою Божиею и благодатию укрепленнии. Радуйтеся, молитвою и пощением диавола победившии. Радуйтеся, божественных словес блистании тму идолослужения разнгавшии. Радуйтеся, тяжкий лед неверия теплотою Божественнаго Духа растопившии. Радуйтеся, Христа Единаго возлюбившии и Того Крест на рамена вземшии. Радуйтеся, мысленых врагов ополчения всеоружием креста погубившии. Радуйтеся, силою Божиею немощь многобожия разорившии. Радуйтеся, Герасиме, Питириме и Ионо, теплии о нас пред Богом заступницы.
Кондак 4
Бурю злобы и ненависти воздвиже на вы диавол, ищя конечныя погибели вашея, да не разорится царство его. Вы же, смирением и кротостию побеждающе козни его, волков злобных во агнцев кротких силою Божиею претворяли есте, богомудрии, вопиюще с ними всемогущему Богу: Аллилуиа.
Икос 4
Слышавше Великопермстии людие евангельское благовестие ваше, отцы преблаженнии, и любовию Божиею побеждаеми, ко истинней вере обращахуся, крещения просяще. Вы же, яко истиннии пастыре, с любовию приемлюще всех, спасения ищущих, купелию крещения возраждали ести сих, росою Духа Божия напаяюще и хлебом небесным питающе душы их. О сем веселящеся, воспеваем вам сице: Радуйтеся, неведущым Бога Христово Евангелие благовестившии. Радуйтеся, ученицы Христовы, банею крещения приведшии к нему люди многи. Радуйтеся, Божественным семенем житницу Христову умножившии. Радуйтеся, злобою змия обнаженных ризою благодати одеявшии. Радуйтеся, светила благосветлая, душы омраченных просветившая. Радуйтеся, якоже соль Божественная, гнилость прелести исцелившии. Радуйтеся, реки духовныя Божественныя благодати исполненныя. Радуйтеся, лучи Солнца правды Христа, страну нашу просветившыя. Радуйтеся, Герасиме, Питириме и Ионо, теплии о нас пред Богом заступницы.
Кондак 5
Яко боготечныя звезды на тверди церковней просиявше, святителие Христовы, просвещаемии от Солнца славы Христа Бога, тихим, немерцающим светом озарили есте страну идольскую, и якоже звезда Вифлеемская, путь ко Христу указали есте, да просвещеннии вами людие вопиют Ему боголепную песнь: Аллилуиа.
Икос 5
Видяще окрест себе духовная чада своя, и велиею радостию о спасении их исполненнии, отцы наши всеблаженнии, Господа всем сердцем прославили есте, и соузом любве с новопросвещенною паствою связуеми, слышите от всех похвалы сия: Радуйтеся, наставницы заблуждшым и пристанища спасаемым. Радуйтеся, столпи и утверждение Церкве Православныя. Радуйтеся, нищих питателие и убогим утешение. Радуйтеся, сирых и вдовиц заступницы и в бедах скорое вспоможение. Радуйтеся, милостиви всем, требующым милости, бывшии. Радуйтеся, в напастех сущым пристанище и от скорбей избавление. Радуйтеся, ниву неплодную паствы вашея плодоносну соделавшии. Радуйтеся, паству, от Бога врученную вам, изрядно упасшии. Радуйтеся, Герасиме, Питириме и Ионо, теплии о нас пред Богом заступницы.
Кондак 6
Проповедницы евангельскаго учения бывше, не словом точию, но и самым делом являли есте пастве своей образ добродетелей божественных, наставницы богомудрии, да вси, видяще добрая дела ваша, прославят Отца Небеснаго, вопиюще Ему: Аллилуиа.
Икос 6
Возсия свет истинныя веры Христовы во стране полунощней благовестием вашым, равноапостольнии просветителие, прогоняя лесть бесовскую — идоли падоша, и храмы Истинному Богу возвигошася. Мы же, спасение получивше, взываем вам сице: Радуйтеся, Троицы таинницы, мглу многобожия разгнавшии. Радуйтеся, светолучныя зари Святаго Духа сущии. Радуйтеся, православия наставницы и благочестия учителие и чистоты. Радуйтеся, научением книжным семена веры в сердца детей сеявшии. Радуйтеся, храмы идольския силою Божиею разрушившии. Радуйтеся, чрез храмы рукотворенныя храмы одушевленныя Пресвятей Троице создавшии. Радуйтеся, пастырие добрии, стадо свое на пажити духовныя приведшии. Радуйтеся, светильницы, на свещнице Церкве Пермския поставленнии. Радуйтеся, Герасиме, Питириме и Ионо, теплии о нас пред Богом заступницы.
Кондак 7
Хотяще укрепити паству свою во истинней вере Христове, пастыреначальницы воистину явистеся, святителие Божии, поставляюще всюду пресвитеры и отроки просвещающе научением книжным, да разумно вси людие поют Богу песнь: Аллилуиа.
Икос 7
Новаго винограда Христова, труды вашими насажденнаго во стране Великопермстей, истиннии делателие и хранителие явльшеся, плоды обильны Господу принесли есте, яко вернии раби Христовы, в радость Господа своего вшедше, на небесех вечно ликовствуете, от земных ублажаеми сице: Радуйтеся, яко плодовитыя маслины в дому Божии процветшии. Радуйтеся, ниву Христову серпом духовным от плевел очистившии. Радуйтеся, чистую пшеницу верующыя в житницу Христову собравшии. Радуйтеся, яко лозы винограда Христова мног плод возрастившии. Радуйтеся, вино божественнаго веселия всем верным источившии. Радуйтеся, цвети неувядаемии, душы верующих облагоухавшии. Радуйтеся, реки разума божественнаго, Церковь Божию напаяющыя. Радуйтеся, раби блазии, в радость Господа своего вшедшии. Радуйтеся, Герасиме, Питириме и Ионо, теплии о нас пред Богом заступницы.
Кондак 8
Странницы и пришельцы в земней жизни своей бывше, Пастыреначальнику Христу последующе, не имели есте где главы подклонити, ради неусыпных трудов ваших о пастве своей; покоя не имуще, назирали есте ю, взывающе к Богу: Аллилуиа.
Икос 8
Всем сердцем возлюбивше Господа и мирская вся яко уметы вменивше, жизни своея за паству свою не пощадели есте, Герасиме и Питириме, священномученицы Христовы, мученическою кончиною прославивше Господа. Дивящеся таковей ревности вашей о спасении людей, взываем к вам сице: Радуйтеся, всем умомом Господеви прилепившиися. Радуйтеся, всем сердцем своим Господа возлюбившии. Радуйтеся, яко злато в горниле огнем страданий искушеннии. Радуйтеся, благовонная жертва и приношение совершенное Богу бывшии. Радуйтеся, кровию мученическою землю паствы своея освятившии. Радуйтеся, священномучеников честное и светоносное украшение. Радуйтеся, душы своя за паству свою положившии. Радуйтеся, трудов возмездие от Бога богатно приимшии. Радуйтеся, Герасиме, Питириме и Ионо, теплии о нас пред Богом заступницы.
Кондак 9
Весь быв в Бозе, Ионо святителю, равныя труды и подвиги понесл еси о пастве твоей, совершая дело мучеников святителей, имже преемник во святительстве был еси; мученически, без крове, совершив дело твое, мирно почил еси о Господе, поя Ему радостно: Аллилуиа.
Икос 9
Ветийствующе величия Божия, богопросвещеннии проповедницы, струями слез ваших умягчили есте сердца неведущих Бога, теплотою молитвы согревающе я и уготовляюще в жилища Духа Пресвятаго, да от оживленных вами сердец благодарственная слышите сия: Радуйтеся, божественными сиянии тму страстей разгнавшии. Радуйтеся, струями слез ваших ниву Церкве Великопермския оросившии. Радуйтеся, злобу вражию подвиги любве угасившии. Радуйтеся, светом истины нас озаряющии и теплотою веры согревающии. Радуйтеся, яко пчелы трудолюбивыя, соты добродетелей собравшии. Радуйтеся, любовь совершенну к пастве своей и ко всем людем стяжавшии. Радуйтеся, к божественному познанию всех наставляющии. Радуйтеся, и ныне паству свою с высоты небесныя благодатно назирающии. Радуйтеся, Герасиме, Питириме и Ионо, теплии о нас пред Богом заступницы.
Кондак 10
Спасения надежду получивше, людие радовахуся о просветителех своих, и от плодов веры православныя обильно насыщающеся, хваляху Бога, единеми усты поюще Ему: Аллилуиа.
Икос 10
Стена и ограждение духовное пастве вашей бывше, архиерее Божии, небоязненно же пред цари и князи о нуждах земных тоя печалующеся, от многих бед духовная чада ваша соблюдали есте. Сего ради приносим вам похвалы сия: Радуйтеся, в напастех утешение и обидимых заступницы. Радуйтеся, друзи приискреннии всех, в скорбех сущих. Радуйтеся, пастыре добрии, от волков мысленных стадо свое защищающии. Радуйтеся, воини непобедимии, всеоружием Креста вооруженнии. Радуйтеся, царей наших укрепление и Отечества нашего ограждение. Радуйтеся, всех верных непоколебимое упование. Радуйтеся, якоже агнцы незлобивии, посреде волков лютых прошедшии. Радуйтеся, якоже стрелы небесныя, духов злобы уязвляющии. Радуйтеся, Герасиме, Питириме и Ионо, теплии о нас пред Богом заступницы.
Кондак 11
Пение хвалебное приносит Спасителю Богу Церковь Христова о всех благодеяниих и милостех Божиих, вами явленных, просветителие наши: укрепите и нас немощных, да непрестанно единеми усты и единем сердцем и мы поем Благодетелю Богу: Аллилуиа.
Икос 11
Светильники светозарныя, светом истинныя веры просветившыя страну нашу, зрим вас, угодницы Божии Герасиме, Питириме и Ионо, небесным предстательством вашым преемников архипастырскаго служения вашего укрепляющыя в совершении дела Христова, к созиданию Церкве Его, во славу Божию и спасении душ нашых. О сем верующе, вопием вам: Радуйтеся, к высоте добродетелей востекшии. Радуйтеся, непорочно в путех Господних ходившии. Радуйтеся, нищетою духовною сокровище некрадомое на небесех стяжавшии. Радуйтеся, чистотою в жилище Духа Божия себе устроившии. Радуйтеся, ризою спасения и одеждою нетления одеявшиися. Радуйтеся, кротостию и смирением Христу Спасителю подражавшии. Радуйтеся, безстрастием души и ума чистотою украсившиися. Радуйтеся, воздержанием яко безплотни явившиися. Радуйтеся, Герасиме, Питириме и Ионо, теплии о нас пред Богом заступницы.
Кондак 12
Благодать данную вам от Господа ведуще, вси верою притекающии ко гробу вашему, святителие Божии, неоскудно почерпают недугов исцеление и от страстей свобождение заступлением вашым, благодарными усты вопиюще о сем Богу: Аллилуиа.
Икос 12
Поюще священную память вашу, отцы наши богоноснии, припадаем с верою и умилением пред честною иконою вашею, и яко сущым с нами, вопием вам: Радуйтеся, верою просящым исцеление недугов душевных и телесных подающии. Радуйтеся, миром и любовию благочестивая семейства ограждающии. Радуйтеся, монашествующих утешение и труждающихся в проповеди евангельстей укрепление. Радуйтеся, Церкве Отеческия благолепное украшение. Радуйтеся, камение пречестное, во основание Церкве Пермския о Христе положенное. Радуйтеся, Отечества нашего и страны Пермския покровителие. Радуйтеся, на Страшнем Суде Божии наше защищение. Радуйтеся, ходатае нам вечнаго спасения. Радуйтеся, Герасиме, Питириме и Ионо, теплии о нас пред Богом заступницы.
Кондак 13
О пречуднии и преславнии святителие Христовы Герасиме, Питириме и Ионо, предстоящии присно Престолу Божию, приимите сие малое моление наше, яко усердную жертву сердец наших, и со равноапостольным Стефаном умолите Господа Вседержителя за вся люди земли Российския, да тихое и безмолвное житие поживше в нынешнем веце, сподобимся в радости вечней с вами воспевати Богу: Аллилуиа.
Этот кондак читается трижды, затем икос 1-й и кондак 1-й
Молитва святителям Герасиму, Питириму и Ионе, епископам Великопермским
О святителие Христовы Герасиме, Питириме и Ионо! К вам, яко чада ко отцем, во смирении сердца с верою и любовию вси притекаем и умиленно молимся: предстательством вашым со равноапостольным Стефаном испросите у Господа нам покаяние и прощение всех вольных и невольных согрешений наших, да преуспевающе во истинней вере и благочестии, явимся достойни милости Его неизреченныя. Будите, святителие Христовы, теплии о нас пред Богом заступницы, да умирит и укрепит Господь Святую Церковь Свою, да обратятся к вере неверующии, да вразумятся заблуждающиися, да престанут соблазны и нестроения. Ограждайте ходатайствы вашими государство Российское и молитеся выну ко Господу, страждущую страну нашу Российскую от лютых безбожник и власти их да свободит, и да возставит престол православных правителей; верных рабов Его, в скорби и печали день и нощь вопиющих к Нему, многоболезный вопль да услышит и да изведет от погибели живот наш, да тихое и безмолвное житие поживше в веце сем, христианскую кончину и добрый ответ на Страшнем Суде Божии улучим и наследницы будем Небеснаго Его Царствия во веки веков. Аминь.
Кондак 1
Избранный страстотерпче и избранниче Христов, святителю Игнатие, похвальная приносим ти пения. Ты же, предстояй со ангелы у Престола Всевышняго, не престай молитися о нас, усердно вопиюших ти: Радуйся, Богоносный Игнатие, великий и преславный страстотерпче.
Икос 1
Ангелом уподобился еси, егда Господь, прием тя на Свои пречистыя руце, постави тя посреде ученик Своих, и возложь руку Свою на твою главу, рече им: «Аще не обратитеся и будите яко дети, не внидите в Царствие Божие». Сего ради, преклоньше колена, вопием ти:
Радуйся, Богом носимый.
Радуйся, яко Бога выну в сердце своем имел еси.
Радуйся, рабе благий и верный.
Радуйся, мужу желаний.
Радуйся, яко от юности Христа всем сердцем возлюбил еси.
Радуйся, яко всецело Ему предался еси.
Радуйся, Богоносный Игнатие, великий и преславный страстотерпче.
Кондак 2
Видяще благочестное житие святаго Иоанна Богослова, учителя твоего, желанием возжелал еси вкупе с ним послужити Господу, проповедуя святое Евангелие людем, седящим во тьме и сени смертней, и научая их пети Единому истинному Богу: Аллилуиа.
Икос 2
Разумев духом, яко ангели на небеси славят Бога во Святей Троице, Творца неба и земли, друг ко другу взывающе: Свят, Свят, Свят Господь Саваоф, ты и в земной Церкви уставил еси такожде пети. Сего ради, со умилением взываем ти:
Радуйся, Церкви Божией столпе и утверждение.
Радуйся, светильниче православия.
Радуйся, яко был еси епископом Церкви, идеже первее имя христиан наречеся.
Радуйся, яко от апостолов первоверховных рукоположение прияти сподобился еси.
Радуйся, яко удостоился еси зрети святыя Ангелы, славящия Бога.
Радуйся, яко ныне и сам со Ангелы славиши Господа.
Радуйся, Богоносный Игнатие, великий и преславный страстотерпче.
Кондак 3
Сила Вышняго укрепи тя, святый Игнатие, егда представ Траяну, не убоялся еси прещения царева, но мужественно исповедал еси Христа Бога быти истинна, и нечестие языческое посрамил еси, верныя же научил еси Богу воспевати: Аллилуиа.
Икос 3
Имея благодать от Господа просвещати люди Божия, ты наставлял еси я к разуму Божественному словом, паче же житием, образ быв любовию, духом, верою, чистотою и смирением. Сего ради воспеваем ти:
Радуйся, яко имя Божие пронесл еси пред цари и языки.
Радуйся, яко добре упасл еси паству твою.
Радуйся, смирением стяжавый высокая.
Радуйся, нищетою приобретый богатая.
Радуйся, апостольских преданий хранителю.
Радуйся, Церкви Божией верный страже и мудрый строителю.
Радуйся, Богоносный Игнатие, великий и преславный страстотерпче.
Кондак 4
Бурю злобы имея в сердце своем Траян, призвав тя, с гневом вопроси: «Ты ли еси Богоносец? Почто люди моя развращаеши?» Ты же отвещал еси: «Аз есмь Богоносец, но люди твоя не развращаю, а спасаю». Кто не ублажит сие твое исповедание веры? Мы же, величающе тя, Богу воспеваем: Аллилуиа.
Икос 4
Слышавше людие вернии твое исповедание, славяху Бога, Траян же, скрежеща зубы своими, паки вопроси тя: «Почто зовешися Богоносец?» Ты же рекл еси: «Яко Бога моего в сердце своем ношу». Сего ради воспеваем тя сице:
Радуйся, верный воине Царя Небеснаго.
Радуйся, поборниче веры непобедимый.
Радуйся, пастырю добрый.
Радуйся, молитвенниче о душах наших.
Радуйся, яко Божественным Духом просвещен, свирепство мучителя пастырским дерзновением посрамил еси.
Радуйся, яко наставляя стадо Христово, многих светом Богоразумия просветил еси.
Радуйся, Богоносный Игнатие, великий и преславный страстотерпче.
Кондак 5
Вся красная мира в уметы вменяя, да Христа приобрящеши, «Кто ны разлучит от любве Божия», - вопиял еси, Игнатие, - «Сладка мне скорбь, любезны узы за Желаемаго, гонения ми сладша паче отечества, болезни - паче здравия телеснаго». Мы же, славную память твою чтуще, поем Богу: Аллилуиа.
Икос 5
Видя тя исповедника веры Христовы непобедима, осуди тя безбожный Траян на смерть: ты же, радуяся, возопил еси: «Сладка мне смерть, мне еже жити- - Христос, и еже умрети - приобретение есть: к Нему иду, Того люблю, Того получити надеюся». Сего ради ублажаем тя, святый Игнатие, сице:
Радуйся, желание имевый разрешитися и со Христом быти.
Радуйся, жертва Богу чиста.
Радуйся, подражателю Христовых страстей.
Радуйся, яко Христови сораспялся еси.
Радуйся, яко кровь за Христа излиял еси.
Радуйся, яко кровию своею святительскую одежду украсил еси.
Радуйся, Богоносный Игнатие, великий и преславный страстотерпче.
Кондак 6
Проповедник терпения, Богоносный Игнатие, явился еси, егда с радостию услышал еси осуждение свое на растерзание лютыми зверьми. Ублажая твое твердое и неустрашимое исповедание веры, и дивяшеся велией благодати, в тебе пребывающей, поем Богу ангельскую песнь: Аллилуиа.
Икос 6
Возсиял еси яко солнце, угодниче Божий, красотою души твоея, егда воины возлагаху на тя узы, ты же, яко ризу спасения и одежду веселия приял еси сие новое мучение, и на страдание в Рим, аки на брачный пир шествовал еси. Сего ради воспеваем ти:
Радуйся, Церкви Антиохийския славо.
Радуйся, Богомудрых отцев красото и удобрение.
Радуйся, цевнице Духа Святаго.
Радуйся, воине Христов непобедимый.
Радуйся, яко гордость Траянову низложил еси.
Радуйся, яко диавола посрамил еси.
Радуйся, Богоносный Игнатие, великий и преславный страстотерпче.
Кондак 7
Хотя, святителю Христов, изыти от Антиохи, прилежно молил еси Господа не оставити паствы твоея. Людие же плакаху и рыдаху, зряще тя на смерть ведома; ты же, благословляя их, воспевал еси Богу: Аллилуиа.
Икос 7
Дивный во святых Бог утеши тя, святый Игнатие, егда на пути в Рим, ведома тя десятию воинами, срете вы в Смирне святый Поликарп, муж праведный. Ты же, беседуя с ним, радовался еси о Бозе спасе твоем. Сего ради ублажаем тя:
Радуйся, яко веру во Христа сохранил еси.
Радуйся, яко надежду несумненну имел еси.
Радуйся, яко имя Христово во всей вселенней прославил еси.
Радуйся, яко уготовася тебе венец правды.
Радуйся, верный служителю Господень.
Радуйся, светильниче Божий, горяй и светяй.
Радуйся, Богоносный Игнатие, великий и преславный страстотерпче.
Кондак 8
Странно и чудно бе шествие твое в Рим на место мучения: воини яко преступника ведяху тя, людие же Божии со епископы и пресвитеры яко ангела Божия сретаху тя, и, сладостно послушая словес твоих, воспеваху Богу: Аллилуиа.
Икос 8
Желание имый разрешитися и со Христом быти, ты, шествуя в Рим на страдания, радостно воспевал еси: «Пшеница Божия есмь: да буду зубы зверей сотрен и чист хлеб Богу явлюся». Сего ради дивящеся терпению твоему и славяще Божие о тебе смотрение, воспеваем сице:
Радуйся, образе мужества и терпения.
Радуйся, непоколебимое правило веры и благочестия.
Радуйся, непобедимый исповедниче Христов.
Радуйся, яко не убоялся еси ни огня, ни меча, ниже зубов рыкающих львов.
Радуйся, яко терпением своим ангелов Божиих возвеселил еси.
Радуйся, яко мужеством своим имя христиан прославил еси.
Радуйся, Богоносный Игнатие, великий и преславный страстотерпче.
Кондак 9
Всего себя предав Богу, ты страшился еси, да не терпящии зрети твоих страданий воспретят тебе восприяти их. Сего ради писанием умолял еси: «О, возлюбленнии! Помозите ми сораспястися Христу, пострадати и умрети за него, да и царствую, и живу с Ним во веки, воспевая Богу: Аллилуиа.»
Икос 9
Вития многовещанныя не могут по достоянию воспети твоя страдания: сего ради и нам удобее любити молчание, но побеждаеми любовию твоею, от избытка сердца вопием ти:
Радуйся, яко многих ко Христу привел еси.
Радуйся, яко писаниями своими путь ко спасению уяснил еси.
Радуйся, яко жаждущия спасения напоил еси благочестия водами.
Радуйся, яко душевными очима ослепленных светом Богоразумия просветил еси.
Радуйся, яко грехом разслабленных воздвигл еси на путь спасения.
Радуйся, яко скорбящия и плачущия утешил еси.
Радуйся, Богоносный Игнатие, великий и преславный страстотерпче.
Кондак 10
Спасти хотя душу свою, ты, святый Игнатие, пламенел еси серафимскою любовию к Богу: «О, братия!», - молил еси христианы, - «желайте мне смерти: она приведет мя ко Христу: звери мне радостни, огнь - роса мне, тщуся умрети, да живу со Христом». Темже вселился еси в небесныя обители, идеже со Ангелы Богу воспеваеши: Аллилуиа.
Икос 10
Царь Небесный, Утешитель Благий, Дух истины постави тя пасти Церковь Христову, право правити слово истины, верныя люди поучати, противящияся обличати. Сего ради зовем ти:
Радуйся, учителю благочестия.
Радуйся, обличителю нечестия.
Радуйся, душу свою положивый за овцы своя.
Радуйся, стяжавый венец мученичества.
Радуйся, непрестанно в жизни моливыйся за христианы.
Радуйся, и по смерти за ны моляйся.
Радуйся, Богоносный Игнатие, великий и преславный страстотерпче.
Кондак 11
Воспевая Господа и непрестанно моляся Ему, ты, святый Игнатие, поучал еси и вверенныя тебе люди творити такожде: «Молитеся непрестанно, кротость ваша да будет известна всем. В братолюбии пребывайте, да не будут в вас распри. Подражайте за ны Распятому, веруйте в Него, Он есть живот вечный: веруяй в него, аще и умрет - оживет». Мы же, прославляя Бога, даровавшаго нам таковаго наставника, вопием Ему: Аллилуиа.
Икос 11
Яко солнце доблестно обтекл еси землю от восток до запад, и зашед незаходимо от земли ко Христу, просвещая мир своим учением. Сего ради взываем ти:
Радуйся, угодниче Христов.
Радуйся, мучениче и пастырю.
Радуйся, скорый в бедах помощниче.
Радуйся, гонимых за правду защитниче.
Радуйся, немощных врачу.
Радуйся, покров и заступление притекающих к тебе с верою.
Радуйся, Богоносный Игнатие, великий и преславный страстотерпче.
Кондак 12
Благодать велию и богатую милость приял еси от Христа Бога нашего молитися за всех, с верою призывающих тя. Темже молим тя: помози нам предстательством твоим у Господа сохранити в сердце своем веру несумненну, упование непреложно, любовь к Богу и ближнему нелицемерну, подвигом добрым подвизатися, воспевая Спасителю нашему: Аллилуиа.
Икос 12
Поюще подвиги твоя, почитаем страдания твоя, восхваляем мужество твое, ублажаем святую кончину твою, и прилежно молим тя: услыши ны, взывающия ти:
Радуйся, течение жизни славно скончавый.
Радуйся, кровию своею истину Христова учения запечатлевый.
Радуйся, получивый от Христа венец правды, уготованный всем возлюбившим явление Его.
Радуйся, во светлостех святых вселивыйся.
Радуйся, яко со Архангелы ликовствуеши.
Радуйся, яко лицезрением Божиим наслаждаешися.
Радуйся, Богоносный Игнатие, великий и преславный страстотерпче.
Кондак 13
О многострадальный и предивный мучениче, Богоносный Игнатие! Приими от нас недостойных сие малое хвалебное пение и умоли Бога, да сохранит ны и защищит Своею благодатию от всякаго зла в сей жизни, и во время кончины нашея не оставит нас, и по кончине сподобит Царствие Небесное наследовати и вечно воспевати Ему: Аллилуиа.
(Этот кондак читается трижды, затем икос 1 и кондак 1)
Молитва
О великий святителю, Богоносный Игнатие! К тебе припадаем и молим тя: призри на ны, грешныя, прибегающия к твоему заступлению, и умоли Господа, да простит нам вся согрешения наша. Ты мученически душу твою за веру положил еси, даруй и нам мужество во всем подражати тебе. Ничесо в жизни не возмогло отлучити тя от любви ко Господу: ни лестная обещания, ни прещения, ни угрозы, ниже самыя муки. Ты с радостию предстал еси пред зверьми на смерть лютую, и яко Ангел возлетел еси во оибтели Отца нашего Небеснаго. Сего ради и молитва твоя много может пред Господем. Буди же, святый угодниче, предстателем за ны пред Спасителем нашим. Помогай всем православным христианом святыми твоими молитвами ко всемогущему Богу, да избавит ны от глада, труса, града, бездождия и смертоносных болезней, и да дарует нам здравие и спасение. Буди же нам помощник скорый во всякой скорби, наипаче же в час кончины нашея явися нам светлым защитником и ходатаем, и умоли Господа сподобитися всем нам, тебе ныне тепле молящимся, получити по христианстей кончине Небесное Царствие, идеже вси святии вкупе с тобою славят Отца и Сына и Святаго Духа. Аминь.
Для келейного чтения
Кондак 1
Избрал еси, Господи, угодника Твоего Василиска, / из млада сердце чисто созиждя в нем, / и, дары духовными изрядно его украсив, / явил еси земли Сибирстей подвижника дивнаго, / иже, пустыни тяжкая волею претерпевая, / молитвы чистыя благодать воистинну стяжа, / темже подвигни и нас, Христе Боже, горняя помышляти, / предстательством блаженнаго отца нашего, да поем тому: / Радуйся, преподобне отче Василисче, умнаго безмолвия велий рачителю.
Икос 1
Ангелов крилами к Богу воспаряющих, образы святыя издетска с любовию зрел еси, отче Василисче, темже, возрастом еще младенствуя, к Вышнему вознестися помыслил еси, во еже телесныма очима славу Божию видети, отонудуже крилы духовныя Господь тебе дарова, имиже в Небесныя обители воистинну вознеслся еси. Мы же, сим поучаеми, приносим ти таковая:
Радуйся, издетска в служение Богу избранный;
радуйся, светом божественнаго разума осиянный.
Радуйся, от млада познавый нищету телесную;
радуйся, воистинну стяжавый нищету духовную.
Радуйся, кротостию и незлобием ангелом подобниче;
радуйся, истиннаго смирения верным наставниче.
Радуйся, монахом и мирским красоту восхождения явивый;
радуйся, богоугодными делы страну Сибирскую просветивый.
Радуйся, преподобне отче Василисче, умнаго безмолвия велий рачителю.
Кондак 2
Видя желание твое, токмо единому Богови работати, и нрав послушливый, Господь Всеведец умягчи жены твоея сердце, юже родитель твой избра тебе, и тако три леты воздержанием себе испытующа, супружества соуз согласно расторгли еста; ты же, отче, душу твою Христу уневестив, радостне воспел еси Богу: Аллилуия.
Икос 2
Разумея волю Божию и закону Христову кротко повинуяся, блаженне, тяготы брата твоего, подвижника тайнаго, с любовию понесл еси, в немощах его служа ему усердно; наипаче же вкупе в молитвах прилежаща, вашим изрядным в Боге радением многия нерадивыя к исправлению призвали еста. Мы же, братолюбие христианское твое зряще, сице тебе взываем:
Радуйся, Бога паче всего земнаго возлюбивый;
радуйся, Того Единаго в животе твоем взыскавый.
Радуйся, яко любовь божественную мирстей любви предпочел еси;
радуйся, яко житейскую радость на тяготы пустынныя пременил еси.
Радуйся, образе смиренномудрия и послушания;
радуйся, правило постническаго воздержания.
Радуйся, помысла чистотою просиявый;
радуйся, яко Мария, благую часть избравый.
Радуйся, преподобне отче Василисче, умнаго безмолвия велий рачителю.
Кондак 3
Силою любве ко Господу мира красная отвергл еси, отче Василисче, отшельническое житие избрав, идеже ревностно подвизаяся, к вящшему постничеству приступил еси, и тако тело твое поклоны и бдении зело утруждая, страсти плотския воздержанием крайним уставил еси, вопия в смирении Богу: Аллилуия.
Икос 3
Имущу велие стремление богоугодно жити, Подвигоположник Господь показа тебе ума самочиннаго пагубу, и в леса брянския стопы твоя направи, идеже старцу пустынному Адриану в послушание себе вдал еси, отче, и, яко лоза благораслена, в трудех пустынных зело преспев, иноческим одеянием достойно украсился еси. Мы же взываем ти тако:
Радуйся, в пустыню, яко в цветник, с радостию вшедый;
радуйся, подвиги твоими, яко крин сельный, процветый.
Радуйся, нестяжанием зело обогативыйся;
радуйся, воздержанием крепким украсивыйся.
Радуйся, обет пустынничества при постриге твоем давый;
радуйся, егоже в подвизе добром до конца исполнивый.
Радуйся, псалмы и молитвы Господу присно возлиявый;
радуйся, поклоны земными от сна себе воставлявый.
Радуйся, преподобне отче Василисче, умнаго безмолвия велий рачителю.
Кондак 4
Буря искушений и бесов наветы обступиша тя, хотяще унынием душу твою поборити, ты же, отче Василисче, болезньми воздержания силу вражию посрамил еси, на камени смирения терпением велием веру твою утвердив, и тако немощь естества о Господе укреплял еси, денно и нощно возывая к Тому: Аллилуия.
Икос 4
Слышавше людие о твоем, отче Василисче, благочестном житии пустынном, стекахуся к тебе, желающе с тобою купно жительствовати и во спасении тобою наставлятися, ты же, святе, смирения истиннаго исполненный, невежду себе пред всеми почел еси, во еже в безмолвии един с Единым всегда пребывати. Мы же, богомудре, глаголем тебе тако:
Радуйся, сердце твое мирови затворивый;
радуйся, воле Божией всего себе покоривый.
Радуйся, благоуветия и благочестия смиренный учителю;
радуйся, словесным и безсловесным кроткий благодетелю.
Радуйся, с усердием на врага спасения противоставый;
радуйся, постом и молитвою демоны отгнавый.
Радуйся, духа нищету паче славы человеческия возлюбивый;
радуйся, не в многословии твоем глубину мудрости показавый.
Радуйся, преподобне отче Василисче, умнаго безмолвия велий рачителю.
Кондак 5
Боготочный источник духовныя благодати зря в тебе юный Зосима, тепле моляше тя, да ученик тебе прилежен будет, ты же, отче, духовными очами промысл Божий в сем прозрев, яко друга искренняго любовию того приял еси; темже словесы и делы на путь иночества тобою наставляемый Зосима радостне воспе Богу: Аллилуия.
Икос 5
Видя помышление духовника твоего, хотяща во обитель Коневскую тебе, отче, преселити, тепле моля просил еси того, да в отшельстве своем недвижимо пребудеши; обаче послушания ради, яко воли Божией повинуяся, с Зосимою вкупе, егоже возлюби душа твоя, за старцем своим последовал еси. Мы же, кротость твою ублажающе, взываем ти сице:
Радуйся, Авраамле послушание познавый;
радуйся, Иовлю терпению поревновавый.
Радуйся, иноче, в смирении и кротости совершенный;
радуйся, в безстрастия ризу оболченный.
Радуйся, скудною пищею тело твое изнуривый;
радуйся, хлебом Живота вечнаго душу твою насытивый.
Радуйся, простоты жития монашескаго наставниче;
радуйся, чистоты души христианския хранителю.
Радуйся, преподобне отче Василисче, умнаго безмолвия велий рачителю.
Кондак 6
Проповедуемым словесем Христовым, яко кроток есмь и смирен сердцем, воистинну поучился еси, труженниче пустынный, темже и Господь тя зело утеши, благоволив чрез Зосиму открыти ти сокровище молитвы сердечныя учения; ты же, преподобне Василисче, благодарен сый воспел еси Богу о сем: Аллилуия.
Икос 6
Возсиял еси на острови Коневстем высотою жития твоего, отче досточудне, идеже в молитвы делании вельми возрастая, ум твой священным безмолвием просветил еси, и сладость молитвенную о имени Иисусове, рекою из сердца обильно изливаему, вкусил еси, богоблаженне. Мы же, толикое дарование в тебе зряще, смиренно взываем ти:
Радуйся, словес евангельских послушателю благодатный;
радуйся, ига Христова благаго носителю благодарный.
Радуйся, добродетель благую, трезвение, стяжавый;
радуйся, ума хранением сердце твое очистивый.
Радуйся, благодати Божией хранилище преисполненное;
радуйся, Духа Святаго жилище достойное.
Радуйся, высоты Христова разумения достигнувый;
радуйся, ум твой с сердцем в молитве срастворивый.
Радуйся, преподобне отче Василисче, умнаго безмолвия велий рачителю.
Кондак 7
Хотя, преподобне, в Бозе Единем всегда пребывати, ум твой памятованием Христовым от всякия страсти очистил еси, и Духа Святаго благодатию молитву самодвижиму в сердце твоем стяжал еси, темже непрестанно Господеви в любви предстоя, в умилении чистом вопиял еси Ему: Аллилуия.
Икос 7
Новую лествицу восхождения чтим тя, богомудре, ты бо любве ради благоволил еси, молитвенных твоих деяний рукописание, егоже сподвижник твой и сотаинник Зосима прилежный списатель бысть, по преставлении твоем на полезное мирови явити. Мы же, отче Василисче, молитвенно светильник сей приемлюще, в спасительной ревности взываем ти:
Радуйся, Христа Бога в сердце твоем вместивый;
радуйся, имя Его спасительное в уме всегда носивый.
Радуйся, молитвенную сладость сердцем твоим познавый;
радуйся, слез благодатных поток умилительный источивый.
Радуйся, к Богу пламеневый любовию великою;
радуйся, яко действом ея сердце твое взыграся.
Радуйся, молитвы чистыя священнодейства стяжателю;
радуйся, сокровенных Божиих предивный тайнозрителю.
Радуйся, преподобне отче Василисче, умнаго безмолвия велий рачителю.
Кондак 8
Странен быв всякия славы человеческия, единыя славы Божия иский, блаженне, в пустыню внутреннюю с Зосимою верным удалитися возжелал еси, Василисче, темже, старцем твоим благословенный, предел Сибирских достигл еси, идеже лишения многа претерпевая, Богу в надежде воспевал еси: Аллилуия.
Икос 8
Все упование возложив на промысл Божий и к Пречистей в молитвах всегда прибегая, пустынниче святый, яко птица небесная попечением малым о телесе твоем тщался еси, паче же воздержанием многим дух твой укрепив, красоту исправлений твоих верным уяснил еси, темже приими от нас сицевая:
Радуйся, узок путь во Царствие небесное избравый;
радуйся, пустынничества крест волею подъявый.
Радуйся, страны мразныя не убоявыйся;
радуйся, ветра хладнаго не устрашивыйся.
Радуйся, скорби и болезни мужественно понесый;
радуйся, Заступницею усердною всегда хранимый.
Радуйся, молитвы храм в сердце твоем воздвигнувый;
радуйся, труд, терпение и усердие в основание того положивый.
Радуйся, преподобне отче Василисче, умнаго безмолвия велий рачителю.
Кондак 9
Всего себе Господу освятив, отче Василисче, в болезнях жестоких Христу сраспялся еси воистинну, и в пустыни, яко во гробе, Тому спогреблся еси, блаженне, и Того ради многая злострадания претерпел еси, но любве Божия никако же отпал еси, присно поя Ему: Аллилуия.
Икос 9
Витии многоречивии умолкают, зряще твоего, отче Василисче, жития безмолвнаго подвиг, ибо яко пламя прилежит свещи, тако ты, блаженне, умом и сердцем твоим воистинну Христу в молитве срастворился еси. Мы же, таковое действо в тебе зряще, любовию взываем ти:
Радуйся, Богу в любви непрестанно предстоявый;
радуйся, благодать Богообщения стяжавый.
Радуйся, великих дарований небесных приятелю;
радуйся, духов поднебесных велий устрашителю.
Радуйся, на высоту добродетелей восшедый;
радуйся, Царствие Божие внутрь себе имый.
Радуйся, Владыки вышняго верный служителю;
радуйся, истинныя радости о Боге благий стяжателю.
Радуйся, преподобне отче Василисче, умнаго безмолвия велий рачителю.
Кондак 10
Спасения ради души твоея, отче Василисче, многая лета в пустыне неисходно подвизался еси, и тамо старости честныя достигнув, высоту добродетели стяжал еси, темже Господь на ину стезю направи тя, во еже ближних спасению послужити, отонудуже малую братию собрав, воспел еси Богу: Аллилуия.
Икос 10
Стена крепкая в молитве братии пустынней был еси, святый Василисче, духом сокрушенным, яко мечем, научал еси тех коварства вражии посекати, и нас ныне от сна лености житием твоим богозарным пробуждая, явился еси утешения духовнаго податель. Мы же, подвиги твоя ублажающе, воспеваем тя сице:
Радуйся, в горении духа ангелом уподобивыйся;
радуйся, в доброделании душею обновивыйся.
Радуйся, чистою молитвою изрядно благоукрашенный;
радуйся, во брани невидемей воине совершенный.
Радуйся, правды Божией всегда алкавый;
радуйся, рая сладости еще на земли вкусивый.
Радуйся, блаженнаго смирения доброту стяжавый;
радуйся, Иерусалим небесный воистинну наследивый.
Радуйся, преподобне отче Василисче, умнаго безмолвия велий рачителю.
Кондак 11
Пение умиленное тебе приносим, блаженне отче, и успению твоему с трепетом внимаем, ибо всельшагося в тя Святаго Духа действо благодатию обильно сердце твое напита, якоже и по изшествии души твоея ко Господу молитвы чистыя двизанием сердце твое исполненно бе. Мы же, сему дивящеся, вопием Богу о тебе: Аллилуия.
Икос 11
Светом божественным просвещенный, отче Василисче, внутренняго делания высоты молитвы непрестанныя достигл еси, отонудуже умными очами сердечными Свет присносущный воистинну сподобился еси зрети, имже вельми озаренный сам световиден верным показался еси, темже приими от нас таковая:
Радуйся, главо, о Господе присно любомудрствующая;
радуйся, заре, от нощи к Богу утреннюющая.
Радуйся, яко руце твоя в молитве многажды простирал еси;
радуйся, яко нозе твоя во бдениих зело претрудил еси.
Радуйся, заповеди Евангельския до конца совершивый;
радуйся, обетования Евангельския вправду восприемый.
Радуйся, яко житием твоим ко благочестию нас пробуждаеши;
радуйся, яко деянии твоими на путь спасения нас наставляеши.
Радуйся, преподобне отче Василисче, умнаго безмолвия велий рачителю.
Кондак 12
Блажен воистинну еси, отче Василисче, ибо в клеть сердца твоего вшед, собеседник любезен Господеви был еси, и яко Серафими любовию к Нему горел еси, и якоже Херувими всегда умно Его зрел еси; ныне же в нескончаемой радости пребывая, и нас научаеши славословити Бога: Аллилуия.
Икос 12
Поюще честную память твою, отче Василисче, благодарная приносим ти, и молитв благоухание от мощей твоих приемлюще, веселия духовнаго исполняемся, и твоя, пустыннолюбче, труды и болезни, Христа ради подъятыя, ублажающе, достойно величаем тя словесы таковыми:
Радуйся, звездо, спасения путь ко вратом небесным нам указующая;
радуйся, сокровищнице, пребезценный камень, Христа, в себе имущая.
Радуйся, кладезю, духовною влагою обильно нас напаяяй;
радуйся, столпе, несокрушимую силу молитвы во брани являяй.
Радуйся, стамно, чудесы доныне богатно преизливаемая;
радуйся, реко, деянии твоими души верных орошающая.
Радуйся, в скорбех пребывающим скорый и благий поспешниче;
радуйся, тебе чтущих теплый и верный к Богу молитвенниче.
Радуйся, преподобне отче Василисче, умнаго безмолвия велий рачителю.
Кондак 13
О, пустынниче дивный, преподобне отче Василисче, к тебе в смирении припадаем, яко стяжавшему велию Духа Святаго благодать: призри с высоты райския на нас, дольними обуреваемых, и подаждь душам нашим молитвами твоими возрастание духовное, во еже чистым умом и сердцем достойно пети Христу Богу нашему: Аллилуия, аллилуия, аллилуия.
Сей кондак чтется трижды, затем Икос 1 и Кондак 1.
Молитва
О, преподобне и богоблаженне отче наш Василисче, безмолвия доблий рачителю и пустынножителю ревностный, умнаго делания смиренный наставниче и послушания предивный образе! Ты мира сладости бегая, пустыни непроходныя достигл еси, в нейже многая лета, богомыслием озаряем, в трудех пустынных подвизался еси, смиренномудрия глубину ископав; сего ради, яко сокровище пребогатое, сердечныя молитвы сладость утешительную Господь тебе дарова, еяже действием великих дарований исполнился еси. Темже молим тя, отче Василисче, воззри на ны, унылыя и немощныя, и возгрей в сердцах наших истинную ревность о Христе Иисусе Господе нашем, Иже есть един источник спасения нашего. Буди нам поспешник к высоты духовныя восхождению: ум наш в трезвении бодренном укрепи и дух сокрушен в сердца наша вкорени; наипаче вразуми, научи и усердие неослабное в молитве непрестанней подаждь нам, во еже освятити уста, умы и сердца Христу Богу нашему, Егоже именем отбежит от нас всякая неправда и уныние, диавольским действом составляемыя, и да просветятся души наша светом любве Божественныя ко исправлению жития нашего, да не погибнем в огне аки плевелы, но, яко пшеницу чистую, соберет ны Господь в житницу Свою небесную, идеже вси любящии Его в радости нескончаемей пребывают, славяще Отца, и Сына, и Святаго Духа, во веки веков. Аминь.
Кондак 1
Возбранный святителю, учителю премудрый, равноапостольный Стефане, всем верою к тебе прибегающим источаяй многоцелебныя дары, похвальная восписуем ти любовию творящии память твою; ты же, имеяй дерзновение ко Господу, от всяких нас бед свободи, зовущих: Радуйся, Стефане, великий чудотворче.
Икос 1
Ангельское твое во плоти житие провидев всея твари Создатель, от юности твоея уготова тя в сосуд честен, темже научи вопити тебе сице: Радуйся, трехлетней сущей матери твоей, блаженным Прокопием святитель возвещенный; Радуйся, прежде рождения твоего великим прореченный. Радуйся, рождением своим родителей удививый; Радуйся, благочестивых родителей богоприятное испрошение. Радуйся, от благочестиваго корене отрасль святейшая; Радуйся, в научении книжнем паче сверстник просвещенный. Радуйся, в юности разум совершенный явивый; Радуйся, измлада Христа возлюбивший. Радуйся, ярем Его носивый; Радуйся, мир и благая его презревый. Радуйся, плоть свою духови покоривый; Радуйся, изрядное благодати жилище. Радуйся, Стефане, великий чудотворче.
Кондак 2
Видя тщету мирских попечений, блаженне Стефане, отшел еси от дому родителей твоих, водворяяся с работающими Богу во иночестем житии; тем же жизнь твою не мирови, но Богу посвятил еси, благоприятно Ему вопия: Аллилуиа.
Икос 2
Разум, плотскому человеку неуразуменный, от юности твоея стяжав, богомудре Стефане, удивил еси талантами любомудрия души твоея. Темже взываем ти сице: Радуйся, образе кротости духовныя; Радуйся, вместо временных благих вечная стяжавый. Радуйся, чистоты усердный хранителю; Радуйся, терпения богомудрый учителю. Радуйся, братолюбия зерцало; Радуйся, постников первостоятелю. Радуйся, молитвами твоими дивная сотворивый; Радуйся, иноком правило благочестия. Радуйся, святителей собеседниче; Радуйся, терпением видимых и невидимых врагов победивый. Радуйся, веры поборниче; Радуйся, апостолов подражателю. Радуйся, Стефане, великий чудотворче.
Кондак 3
Сила Вышняго, в душеспасительных подвизех чудно укрепившая тя, угодниче Христов Стефане, показа пермяном перваго проповедника Евангелия, потом перваго епископа и молитвенника, да вси, просвещаеми светом добродетелей твоих, дивному во святых Своих Богу взываем: Аллилуиа.
Икос 3
Имея данную ти от Бога благодать недуги отгоняти, был еси пастырь добрый, по горам нечестия заблуждающих обретаяй и на путь истинный направляяй. Сего ради, молитвами твоими врачуеми, взываем ти: Радуйся, богомерзкаго идолослужения искоренителю; Радуйся, ересей истребителю. Радуйся, правоверия насадителю; Радуйся, заблуждающих наставниче. Радуйся, миролюбцев обличителю; Радуйся, сластолюбцев наказателю. Радуйся, враждебных примирителю; Радуйся, малодушных утешителю. Радуйся, злобы и зависти исторгателю; Радуйся, к воздержанию путеводителю. Радуйся, к трезвенному житию наставниче; Радуйся, во унынии закосневающих исправителю. Радуйся, Стефане, великий чудотворче.
Кондак 4
Бурю злых помыслов прилежно от себе постом и молитвами отражая, явился еси храм Духа Святаго, о Немже непрестанно от юности твоея во всяком благочестии и чистоте пребывая, обвыкл еси воспевати Богу: Аллилуиа.
Икос 4
Слышав архиерей Ростовский Арсений целомудренное житие твое и тщание во славословии и воспевании дивных дел Божиих, действующу и наставляющу Святому Духу, призва тя и клир и града Устюга в соборнем храме проглагола тя чтецем; потом во иночестем житии паче иных потрудившася Коломенский архиерей Герасим, приосенением тогожде Святаго Духа, постави тя диакона и пресвитера, и в сем священнем достоинстве действием Божественныя благодати показался еси мирови добрый наставник монахов и мирских, да славяще Бога, в Троице покланяемаго, взываем и тебе: Радуйся, мудрости небесныя жилище; Радуйся, радости истинныя причастниче. Радуйся, миром небесным приосененный; Радуйся, долготерпения искус стяжавый. Радуйся, веры христианския правило; Радуйся, благости Божественныя струя. Радуйся, кротости духовныя доблий хранителю; Радуйся, воздержания учителю. Радуйся, соль мира; Радуйся, светильниче всесветлый. Радуйся, на свещнице нетления всем светити поставленный; Радуйся, граде, верху горы стояй. Радуйся, Стефане, великий чудотворче.
Кондак 5
Боготечная звезда северо-восточная явился еси, егда просвещения ради светом богопознания в идольския земли текл еси, да вси, познавше Творца вселенныя, с нами единеми усты и единем сердцем Ему вопиют: Аллилуиа.
Икос 5
Видев доброту души твоея, многими даровании свидетельствуему, архиерей Герасим, по твоему желанию снабдив для крещения людей и освящения церквей потребными с радостию отпусти тя в Великую Пермь. Мы же апостольство твое чествуем приветствии сими: Радуйся, апостолов единоревнителю; Радуйся, мудрости сосуде. Радуйся, разумное светило; Радуйся, таин Божиих вещателю. Радуйся, кротости Евангельския образе, Радуйся, боговедения рачителю. Радуйся, благочестия столпе; Радуйся, страха Божия приятелище. Радуйся, духовная труба Евангелия; Радуйся, органе псалмопения и славословия. Радуйся, премудрый наставниче; Радуйся, ко блаженству вечному путеводителю. Радуйся, Стефане, великий чудотворче.
Кондак 6
Проповедник боговедения неленостен был еси в неведущей Бога земли, и благим своим житием любовь и благоверие к вещанием твоим приобрел еси толикое, яко и невернии, чтуще добрая дела твоя, научишася тобою взывати Богу: Аллилуиа.
Икос 6
Возсия христианское благочестие в земли, растленней идолослужением, егда начал еси Божественное семя в безбожных сеяти, и утверждая их в вере истинней примером своим, всего себе посвятил еси Богу; мы же похвальная восписуем ти: Радуйся, волю, ищущую нетления, стяжавый; Радуйся, главу горния мудрости исполнивый. Радуйся, земная мудрования презревый; Радуйся, очи от мирския прелести отвративый. Радуйся, уста на хваление Господа употребивый; Радуйся, язык к божественней проповеди устроивый. Радуйся, руце прострый на молитву и подаяние милостыни; Радуйся, теми же множество книг душеспасительных написавый. Радуйся, сердце твое постом и молитвою в жилище Духа Святаго уготовавый; Радуйся, нозе ко бдению и благовествованию мира направивый. Радуйся, все твое тело воздержанием удручивый; Радуйся, непрестанным богомыслием душу и тело освятивый. Радуйся, Стефане, великий чудотворче.
Кондак 7
Хотя тайну вечнаго спасения пермяном поведати, потщался еси первее навыкнути несведомому их словеси и близкий к ним быти беседник; таже составив письмена и ими к назиданию их и службе Божественней потребная изобразив многая писания, даровал еси пособне пети: Аллилуиа.
Икос 7
Новое и спасительное слышавше учение пермстии людие, овии ругахуся, овии же крещения просяху, и чудящеся дивному житию твоему, с учением, из уст исходящим, согласному, прославиша Бога; ты же потщался ее крещением просвещати люди и к славословии Божию освящати храмы. Сего ради воспеваем тебе: Радуйся, пастырю добрый; Радуйся, Христов новый исповедниче. Радуйся, учителю премудрый; Радуйся, апостольство твое свято совершивый. Радуйся, идольскую лесть упразднивый; Радуйся, луче света Евангельскаго. Радуйся, тьмы заблуждения истребителю; Радуйся, неверных учением своим удививый. Радуйся, кротостию своею гордость мирскую поправый; Радуйся, овцы Христовы во едино стадо совокупивый. Радуйся, духовную паству твоими к Богу благоприятными молитвами оградивый; Радуйся, всем призывающим тя скорый помощниче. Радуйся, Стефане, великий чудотворче.
Кондак 8
Странное чудо показал еси, богомудре Стефане, предав огню скверную идольскую божницу, егда с разными орудии обступиша тя бесовстии чтителе, убити тя хотяще; ты же, моляся о обращении заблуждающих, молчаливою кротостию сих победил еси, воспевая Богу: Аллилуиа.
Икос 8
Весь, Стефане пречудне, телом и душею посвятился еси Богу, пребывая в непрестанных трудех Божественнаго богословия и презирая угрожения нечестивых, претящих ти проповедати славу Божию. Сего ради вопием ти: Радуйся, земный Ангеле; Радуйся, небесный человече. Радуйся, вития непобедимый; Радуйся, воине Христов неустрашимый. Радуйся, христианскаго благочестия истинный ревнителю; Радуйся, врагов Церкве Христовы обличителю. Радуйся, нечестивых витий посрамителю; Радуйся, столпе, от нощи неведения к Солнцу Правды приводяй. Радуйся, уста божественная, миру спасение возвещающая; Радуйся, гласе небесныя истины, буих умудряяй. Радуйся, неверных светом Евангелия Христова просветивый; Радуйся, подобно теплоте солнечней, оляденевшая сердца их согреявый и тем плод мног Церкви Божией принесый. Радуйся, Стефане, великий чудотворче.
Кондак 9
Все естество ангельское возвеселися о твоем благочестии и чистоте, о твоем мужестве, терпении, бдении в молитвах, пощении и по Бозе ревности; во онех бо претерпевая, яко безплотен явился еси. Мы же прославляющемуся чрез тебе Богу взываем: Аллилуиа.
Икос 9
Ветии многовещаннии безбожных, чары творящии, онемеша, сила бо крестная превозмогаше всем их волхвованием. Мы же, видевше на видимых и невидимых врагов победительная, усердно вопием ти: Радуйся, несумненною верою дивная сотворивый; Радуйся, живым на Бога Живаго упованием чтителей бесовских посрамивый. Радуйся, за любовь к Богу и ближнему душу твою положивый; Радуйся, крепости божественный приятелище. Радуйся, органе, возвещаяй славу Божию; Радуйся, громе, устрашаяй соблажняющия. Радуйся, идольския лести истребителю; Радуйся, диавольских козней обличителю. Радуйся, гордости его сокрушителю; Радуйся, плоды трудов твоих во сто уплодоносивый. Радуйся, неверных умудривый твоими нравы; Радуйся, погибающих руководствуяй ко приятию вечныя славы. Радуйся, Стефане, великий чудотворче.
Кондак 10
Спасти хотя Пермскую землю, всемерно потщался еси просветити ю святым Крещением; потом своима рукама идолов раздробляя и сокрушая богомерзкая капища, на развалинах их церкви христианския, монастыри и училища довольная воздвигл и научил еси Единому Триипостасному Богу пети: Аллилуиа.
Икос 10
Стена и укрепление в нечестии пермяном, пансотник волхв с велиею дерзостию в сонмищи глагол безумный утверди: кто пройдет в зимнее время невредим водою и кто огня не устрашится, того вера есть истинная и жертвоприношение Творцу неба и земли есть приятное. Ты же, смиренномудрия вещая глаголы, ко Всевышнему о помощи взывал еси, и верою, вся возмощи о имени Его, стяжав упование, повлекл еси суемудраго волхва в пламень огненный. Он же, силою Божиею устрашенный, исповеда пред всеми свое безсилие и малодушных обольщение. И тако всея Пермския страны в веру истинную сверится обращение. Сего ради блажим тя, премудре Стефане, сими: Радуйся, щите Православия; Радуйся, смиренномудрия зерцало. Радуйся, великаго упования образе; Радуйся, ковчеже чудес, Богом устроенный. Радуйся, злочестиваго волхва славно препревый и из земли тоя изгнавый; Радуйся, последователи его на путь истинный обративый. Радуйся, князя мира сего посрамивый; Радуйся, жертвоприношения идольская упразднивый. Радуйся, труды пермян от лова зверей им в пользу сотворивый; Радуйся, благая их, вместо душевреднаго пред идолы сожжения, в потребу им и на службу человеком показавый, и тако страну их умудривый. Радуйся, пределы российския проповедию слова Божия разширивый; Радуйся, не токмо временная, но и вечная благая пермяном открывый. Радуйся, Стефане, великий чудотворче.
Кондак 11
Пение молебное приносим ти, святителю Стефане, егоже, на возвратном из Перми пути молящася Святей Троице и благословляюща обитель, преподобный Сергий Радонежский умныма очима за несколько поприщ провидев, благодарным со братиею на трапезе почтил есть поклонением. Мы же, всегдашняго тя о душах наших стяжавше молитвенника и щедроты твоя изчести не могуще, благодарными сердцем и усты Богу, тобою действующему всем исцеления, взываем: Аллилуиа.
Икос 11
Светоподательный светильник сущим во тьме идолослужения, отче Стефане, явился еси, и до конца паству твою бодренно упасл еси, ограждая новопросвещенныя люди своими к Богу молитвами и поставляя из них самих пастырей и учителей Перми; посем, скончавая течение твое, о немже пророчески предсказал еси, мощи твоя многоцелебныя царствующему граду Москве в залог молитв твоих и теплаго ходатайства даровал еси, духом же со ангельскими чинми ликуеши. Сего ради восхваляюще тя, глаголем: Радуйся, духом везде верныя посещаяй; Радуйся, от адския погибели изымаяй. Радуйся, от сетей льстиваго избавляяй; Радуйся, вместо временных вечная блага нам подаваяй. Радуйся, врачу, раны греховныя исцеляяй; Радуйся, вместо смерти живота вечнаго ходатаю. Радуйся, недужных целителю; Радуйся, особенный России хранителю. Радуйся, всем прибегающим к тебе крепкое забрало; Радуйся, царствующаго града украшение. Радуйся, светило всероссийское; Радуйся, Ангелов собеседниче. Радуйся, Стефане, великий чудотворче.
Кондак 12
Благодать цельбы стяжавшаго, великаго во святителех Стефана почтим сердцем и усты; и да вящшее благим его подвигом воздадим чествование, потщимся всемерно подражати его добродетелем, да благоприятно Богу вопием: Аллилуиа.
Икос 12
Поюще твое, Стефане святителю, о призывающих тя в помощь теплое предстательство и от врагов видимых и невидимых скорое заступление, хвалим тя вси, равноапостольный богопроповедниче, и веруем, яко Господь и Бог, проповеданный тобою в Перми и прославляемый в телеси твоем, молитвами твоими вся нам дарствует. Темже вопием ти: Радуйся, нищетою духовною Царство Небесное получивый; Радуйся, покаяния и умиления слезами утешение вечное приявый. Радуйся, кротостию земли новыя наследие приявый; Радуйся, алкая и жаждая правды, ныне насыщаяйся. Радуйся, милостынями обретый помилование; Радуйся, чистотою сердца сподобивыйся зрети Бога. Радуйся, миротвореньми Богу усыновивыйся; Радуйся, терпением правды ради Царство Небесное стяжавый. Радуйся, поношеньми и претерпением всех зол Христа ради ублаживыйся; Радуйся, твоим примером нам путь ко спасению открывый. Радуйся, молитвами твоими труды и подвиги облегчаяй; Радуйся, предстательством твоим у Христа Бога вечное спасение нам подаваяй. Радуйся, Стефане, великий чудотворче.
Кондак 13
О великий святителю, равноапостольный Стефане, малое сие моление наше приемь, умоли Подвигоположника и Совершителя Иисуса, да избавит царствующий град и всякий град и страну христианскую от нахождения иноплеменных, от ересей и расколов и от всякия напасти, и да измет грядущия муки всех, Ему вопиющих: Аллилуиа.
(Этот кондак читается трижды, затем икос 1 и кондак 1)
Молитва первая
О Богоосвященный и равноапостольный Стефане, новый боговедения проповедниче и просветителю Крещением святым великопермских во идолопоклонстве живущих людей, ко истинному Евангельскому свету путеводителю, пастырю добрый и учителю премудрый, Духа Святаго сосуде избранный, Христоподражательный в небесный Сион наставниче и руководителю, образ благонравия всем благочестно жити желающим, благоискусный мысленнаго корабля, чрез море мира сего к небесному пристанищу плавающаго, правителю, дивный во иерарсех, увенчанный Божественною благодатию, всероссийский светильниче, великий чудотворче и молитвенниче теплый! К тебе во умилении души и сокрушении сердца моего, аз окаянный и грешный (имярек) благонадежно притекаю и пред чудотворным твоим гробом, в немже святыя мощи твоя почивают, вопию, прося смиренно помощи твоея и теплаго ко Преблагому Богу ходатайства, да твоими богоприятными молитвами испросиши ми от Него человеколюбную милость, оставление многих моих согрешений, души и телеси здравие со спасением; и, яко Благ и Человеколюбец, да благоволит безбедно в мире сем ходити ми до скончания живота моего, во время же разлучения моего от жизни сея дух мой в покаянии и мире Ангелом Своим святым милостивно прияти, и да даст ми мимо мрачных и злоковарных и лютых духов демонских на воздусе проити невозбранно и к Нему непостыдно предстати поклонитися, и безсмертныя и блаженныя жизни сподобитися со всеми святыми во веки. Аминь.
Молитва вторая
О равноапостольный святителю Христов Стефане! К тебе мы, окаяннии, благонадежно притекаем и пред святым твоим образом вопием, просяще помощи твоея и к Богу ходатайства, да твоими молитвами испросиши нам, рабам Божиим (имена), от Него милость: оставление многих наших согрешений, душам и телесем здравие со спасением; да благоволит же Господь твоими молитвами безбедно в мире сем ходити нам до скончания жития нашего, во время же разлучения нашего от жизни сея дух наш ангелы Своими в покаянии и мире милостивно да приимет, яко да от мрачных и злоковарных и лютых духов демонских на воздусе прошедше невозбранно, к Нему непостыдно предстанем и поклонимся, и безсмертныя и блаженныя жизни сподобимся, со всеми святыми, во веки веков.
Текст утвержден Священным Синодом
Русской Православной Церкви
10 октября 2009 года
(журнал № 95)
Конда́к 1
Избра́ннии ца́рственнии страстоте́рпцы,/ еди́на дома́шняя це́рковь Христо́ва,/ Нико́лае, Алекса́ндро, Алекси́е,/ О́льго, Татиа́но, Мари́е и Анастаси́е,/ вы, сою́зом любве́ связу́еми,/ я́ко а́гнцы, Христу́ Бо́гу ве́рою после́довали есте́/ и, в страда́ниих смерть претерпе́вше,/ Ца́рствия Небе́снаго насле́дницы яви́лися есте́./ Ны́не же, дерзнове́ние ко Го́споду иму́ще,/ моли́теся о земне́м оте́честве ва́шем, да прославля́ем вас си́це:
Ра́дуйтеся, ца́рственнии страстоте́рпцы,/ земли́ Росси́йския храни́телие и моли́твенницы.
И́кос 1
А́нгельскими си́лами укрепля́еми во и́стиннем пути́, седмочи́сленнии страстоте́рпцы, о житии́ пра́веднем и богоуго́днем ревнова́ли есте́, да я́вите наро́ду ру́сскому о́браз благочести́вых царе́й. Сего́ ра́ди прославля́ем вас си́це:
Ра́дуйтеся, страх Бо́жий в се́рдце, я́ко основа́ние, положи́вшии;
ра́дуйтеся, прему́дрость Бо́жию и́стинне возлюби́вшии.
Ра́дуйтеся, все упова́ние на Бо́га возложи́вшии;
ра́дуйтеся, оте́честву ва́шему ве́рно послужи́вшии.
Ра́дуйтеся, христиа́нскаго благоче́стия тве́рдое пра́вило;
ра́дуйтеся, ца́рственнаго ро́да Росси́йскаго похвало́.
Ра́дуйтеся, Правосла́вныя ве́ры кре́пкое испове́дание;
ра́дуйтеся, стра́ждущаго наро́да на́шего утеше́ние.
Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.
Конда́к 2
Ви́дя Госпо́дь покая́ние наро́да на́шего, егда́ сму́тная времена́ наста́ша, умилосе́рдися и яви́ ми́лость Свою́ во избра́нии Михаи́ла царя́, его́же ико́ною Пречи́стыя Богоро́дицы, Фео́доровская имену́емою, чрез роди́тельницу благослови́, да бу́дет ико́на сия́ покро́в и защище́ние ему́ и всему́ новоизбра́нному ца́рскому ро́ду и во утвержде́ние держа́вы Росси́йския. Сего́ ра́ди благода́рне вопие́м Бо́гу: Аллилу́ия.
И́кос 2
Разуме́ша лю́дие Росси́йстии, я́ко избра́нием на ца́рство но́ваго ро́да благочести́ваго, утиши́ Госпо́дь нестрое́ния и сму́ты в Земли́ на́шей, принесо́ша обе́т ве́рнаго служе́ния ро́ду сему́. Мы же, любви́ и ре́вности тех подража́юще, к вам, ца́рственнии страстоте́рпцы, я́ко насле́дником сего́ избра́ния со умиле́нием вопие́м:
Ра́дуйтеся, вене́ц и похвало́ ро́да ца́рскаго и свяще́ннаго;
ра́дуйтеся, ко́рене благочести́ваго пресла́вныя о́трасли.
Ра́дуйтеся, Патриа́рха Росси́йскаго Филаре́та свято́е прозябе́ние;
ра́дуйтеся, попече́нию его́ о Це́ркви и оте́честве подража́вшии.
Ра́дуйтеся, вели́кия ста́рицы и́нокини Ма́рфы благослове́нное насле́дие;
ра́дуйтеся, поко́рность во́ли Бо́жией от нея́ восприи́мшии.
Ра́дуйтеся, пред ико́ною Бо́жия Ма́тере Фео́доровския моли́твы при́сно возноси́вшии;
ра́дуйтеся, все упова́ние на по́мощь Богоро́дицы с ве́рою возлага́вшии.
Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.
Конда́к 3
Сила Бо́жия и промышле́ние Всевы́шняго яви́ся в рожде́нии твое́м, ца́рственный страстоте́рпче Нико́лае, вели́каго бо святи́теля и́мя восприе́м, засту́пник Росси́йския Земли́ показа́лся еси́. Мно́гия же ско́рби и боле́зни, подо́бне И́ову пра́ведному, в житии́ претерпе́в, ны́не с ли́ки страстоте́рпцев наслажда́ешися ра́йскаго блаже́нства, воспева́я Бо́гу: Аллилу́ия.
И́кос 3
Име́я сугу́быя засту́пники и покрови́тели в рожде́нии твое́м И́ова многострада́льнаго и Никола́я чудотво́рца, держа́вный страстоте́рпче, доброде́телем тех после́довал еси́. Мы же, дивя́щеся промышле́нию Творца́, во святы́х сих о́браз благоче́стия указа́вшаго ти, благогове́йне воспева́ем си́це:
Ра́дуйся, в моли́твах святи́теля Мир Лики́йских при́сно призыва́яй;
ра́дуйся, по́мощию того́ Росси́йскую Держа́ву пра́ведно окормля́яй.
Ра́дуйся, о́бразом кро́тости тому́ уподо́бивыйся;
ра́дуйся, милосе́рдие мно́гое, я́коже о́ный, яви́вый.
Ра́дуйся, терпе́ние И́овле в се́рдце твое́м име́вый.
ра́дуйся, ве́рность Бо́гу в житии́ твое́м до конца́ сохрани́вый.
Ра́дуйся, в тя́жких беда́х, я́коже о́ный, благодаре́ние Бо́гу приноси́вый;
ра́дуйся, вся находя́щая на тя со смире́нием прие́мый.
Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.
Конда́к 4
Бу́рю смуще́ния, воздвиза́емую от челове́к безбо́жных в стране́ на́шей, ви́дя, страстоте́рпче Нико́лае, не смути́лся еси́ в се́рдце твое́м и, все упова́ние на Бо́га возложи́в, не возропта́л еси́, егда́ отверго́ша тя лю́ди твоя́; оба́че с ве́рою воспе́л еси́ Бо́гу: Аллилу́ия.
И́кос 4
Слы́ша о мяте́жех, боле́знех и междоусо́бных бра́нех, наше́дших на зе́млю Ру́сскую, во у́зах сый, страстоте́рпче царю́ Нико́лае, моле́ние о лю́дех ея́ непреста́нне приноси́л еси́, милосе́рдие Бо́жие к ним призыва́я. Сего́ ра́ди мы воспева́ем тебе́ та́ко:
Ра́дуйся, от ю́ности оте́чество и наро́д твой возлюби́вый;
ра́дуйся, я́ко и во отверже́нии любо́вь сию́ сохрани́вый.
Ра́дуйся, пома́зание на ца́рство с благогове́нием прие́мый;
ра́дуйся, о́браз благочести́ваго царя́ ми́ру яви́вый.
Ра́дуйся, ца́рский вене́ц со смире́нием на ся возложи́вый;
ра́дуйся, венца́ страда́ний от Го́спода удосто́енный.
Ра́дуйся, ца́рское служе́ние, я́ко послуша́ние Бо́гу, разуме́вый;
ра́дуйся, поноше́ния, я́ко крест, взе́мый и с терпе́нием понесы́й.
Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.
Конда́к 5
Богосве́тлый свети́льник во мра́це скорбе́й благове́рней супру́жнице твое́й яви́лся еси́, ца́рственный страстоте́рпче Нико́лае, указу́я и возглавля́я путь ея́, я́коже повеле́ Госпо́дь. Мы же, прославля́юще ваш благослове́нный сою́з во Христе́, хвалу́ Бо́гу воздае́м, пою́ще: Аллилу́ия.
И́кос 5
Ви́дя ца́рственный страстоте́рпец ю́ницу Алекса́ндру, я́ко голуби́цу чи́сту, избра́ ю себе́ в благове́рную супру́жницу, Правосла́вную цари́цу и ма́терь наро́да Росси́йскаго. Мы же, ве́дуще усе́рдное служе́ние ея́, воспева́ем си́це:
Ра́дуйся, имени́таго ро́да благочести́вое прозябе́ние;
ра́дуйся, от лю́терския ве́ры к Правосла́вию о́бразе спаси́тельнаго прехожде́ния.
Ра́дуйся, всем се́рдцем моли́тву возлюби́вшая;
ра́дуйся, о слу́жбе Бо́жией серде́чно ревнова́вшая.
Ра́дуйся, сло́вом Бо́жиим и писа́нием святы́х оте́ц себе́ назда́вшая;
ра́дуйся, уста́вы церко́вныя благогове́йно соблюда́вшая.
Ра́дуйся, ру́сское благоче́стие досто́йне восприе́мшая;
ра́дуйся, и́стинныя жи́зни во Христе́ приобщи́вшаяся.
Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.
Конда́к 6
Пропове́дует житие́ ва́ше бра́ка свята́го чистоту́, благове́рнии Нико́лае и Алекса́ндро. Вы бо, благода́ть сего́ вели́каго та́инства досто́йно восприе́мше, да́же до му́ченическия кончи́ны ве́рность Христу́ и любо́вь друг ко дру́гу сохрани́ли есте́, при́сно воспева́юще Бо́гу: Аллилу́ия.
И́кос 6
Возсия́ в стране́ Росси́йстей, я́ко прекра́сная свети́ла, благове́рная ца́рственная чета́ Никола́й и Алекса́ндра, супру́зи, сою́зом любве́ Христо́вы связу́емии. Мы же, прославля́юще о́браз их целому́дреннаго и добронра́внаго жития́ в ми́ре сем, со благогове́нием воспева́ем си́це:
Ра́дуйтеся, всем се́рдцем Бо́га взыска́вшии;
ра́дуйтеся, в путе́х Госпо́дних непоро́чно ходи́вшии.
Ра́дуйтеся, дво́ице честна́я, свы́ше избра́нная;
ра́дуйтеся, дво́ице свята́я, сла́вою и че́стию от Бо́га венча́нная.
Ра́дуйтеся, целому́дрие супру́жеское многоча́дием просла́вившии;
ра́дуйтеся, ча́да ва́ша, я́ко новосажде́ния ма́сличная, о́крест трапе́зы Небе́сныя собра́вшии.
Ра́дуйтеся, супру́ги во благоче́стии и любви́ жи́ти науча́ющии;
ра́дуйтеся, мир Христо́в о́ным ми́лостивно низпосыла́ющии.
Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.
Конда́к 7
Хотя́ще ваш дом благоче́стно устро́ити, любо́вь, я́ко основа́ние, положили есте́ и брак че́стен до́бре соблюли́ есте́, благове́рнии супру́зи Нико́лае и Алекса́ндро. Те́мже, и дще́ри ва́ша, я́ко му́дрыя ева́нгельския де́вы, воспита́вше, в неве́сты Христу́ угото́вали есте́. С ни́миже ны́не вку́пе воспева́ете Бо́гу: Аллилу́ия.
И́кос 7
Но́вую ми́лость дарова́ Госпо́дь наро́ду ру́сскому, целому́дренныя дще́ри ца́рственныя четы́ О́льгу, Татиа́ну, Мари́ю и Анастаси́ю. Ты́я бо, жена́м мироно́сицам подража́ющыя, еле́ем милосе́рдия боля́щим и стра́ждущим послужи́ша и, сме́рть за Христа́ прие́мшя, ны́не Престо́лу Бо́жию предстоя́т. Сего́ ра́ди прославля́ем их си́це:
Ра́дуйтеся, дще́ри царе́вы, обетова́ний Бо́жиих сподо́бльшыяся;
ра́дуйтеся, за́поведь Бо́жию о почита́нии роди́телей соблю́дшыя.
Ра́дуйтеся, досто́инство ца́рственное свя́то сохра́ньшыя;
ра́дуйтеся, стихи́ями ми́ра сего не порабоще́нныя.
Ра́дуйтеся, лю́дем, су́щым в беда́х и ско́рбех, я́ко Христу́, послужи́вшыя;
ра́дуйтеся, за враго́в свои́х усе́рдно моли́вшыяся.
Ра́дуйтеся, а́гницы непоро́чныя, в же́ртву Бо́гу себе́ прине́сшыя;
ра́дуйтеся, неве́сты Христо́вы, в черто́зех Жениха́ Небе́снаго пребыва́ющыя.
Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.
Конда́к 8
Стра́нно и чу́дно бысть рожде́ние твое́, святы́й царе́вичу Алекси́е. Плод бо благосла́вен моли́тв Саро́вскаго чудотво́рца и ча́емый насле́дник ца́рственных роди́телей быв, сла́ва, наде́жда и упова́ние яви́лся еси́ всем конце́м Земли́ на́шея. Сего́ ра́ди лю́дие Росси́йстии с ра́достию благода́рственно воспе́ша Бо́гу:Аллилу́ия.
И́кос 8
К вы́шним душе́ю чи́стою устремля́яся, святы́й царе́вичу Алекси́е, измла́да боле́знь, я́ко крест от Го́спода да́нный, безро́потно поне́сл еси́, последи́ же, я́ко а́гнец незло́бивый, рука́ми злочести́вых убие́н, моли́твенник пред Бо́гом яви́лся еси́. Сего́ ра́ди воспева́ем ти си́це:
Ра́дуйся, отроча́, от утро́бы ма́тере Бо́гом предызбра́нное;
ра́дуйся, ча́до, моли́твами Саро́вскаго чудотво́рца Росси́и дарова́нное.
Ра́дуйся, страда́льче, измла́да ско́рби и неду́ги безро́потно понесы́й;
ра́дуйся, царе́вичу, в боле́знех сострада́ние к лю́дем обреты́й.
Ра́дуйся, насле́дниче, лише́ние ца́рства земна́го со смире́нием прие́мый;
ра́дуйся, страстоте́рпче, Ца́рствия Небе́снаго от Бо́га удосто́енный.
Ра́дуйся, а́гнче незло́биве, от безбо́жных закла́нный;
ра́дуйся, ца́рственный о́троче, венце́м нетле́нным от Царя́ ца́рствующих увенча́нный.
Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.
Конда́к 9
Всяк ум челове́ческий смути́ся, егда́ в земли́ на́шей беззако́ние умно́жися, и́стина помрачи́ся и ме́рзость запусте́ния на ме́сте святе́м ста. Ты же, царю́ Нико́лае, изгна́ние, поруга́ние и темни́чное заточе́ние му́жественне претерпе́в, сын ве́рный Святы́я Це́ркве и страстоте́рпец Христо́в яви́лся еси́. Сего́ ра́ди Це́рковь Ру́сская, прославля́ющи тя, Бо́гу вопие́т: Аллилу́ия.
И́кос 9
Вети́и злому́дреннии тща́шася оболга́ти тя клевето́ю, пома́занниче Бо́жий Нико́лае, ты же, ева́нгельски вся терпя́, о благоче́стии наро́да Правосла́внаго попече́ние сугу́бое прилага́л еси́. Сего́ ра́ди, па́мять твою́ све́тло пра́зднующе, воспева́ем ти си́це:
Ра́дуйся, прославле́ния уго́дников Бо́жиих до́брый рачи́телю;
ра́дуйся, па́стыря Кроншта́дтскаго благогове́йный почита́телю.
Ра́дуйся, Саро́вских торже́ств держа́вный возглави́телю;
ра́дуйся, и́ноческих оби́телей благочести́вый покрови́телю.
Ра́дуйся, духо́вных вертогра́дов усе́рдный попечи́телю;
ра́дуйся, Правосла́вных хра́мов боголюби́вый зда́телю.
Ра́дуйся, Святы́я Земли́ и Афо́нския Горы́ ще́дрый благотвори́телю;
ра́дуйся, устрое́ния Це́ркве Ру́сския му́дрый ревни́телю.
Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.
Конда́к 10
Спасти́ хотя́ лю́ди Росси́йския от ро́зни братоуби́йственныя, царю́ Нико́лае, престо́л земны́й оста́вил еси́, оба́че, на ми́лость Бо́жию упова́я, непоколеби́м в ве́ре и благоче́стии пребы́л еси́, воспева́я: Аллилу́ия.
И́кос 10
Стена́ и огражде́ние бысть Госпо́дь тебе́, царю́ Нико́лае, Ему́ же те́пле моли́лся еси́, да сохрани́т держа́ву Росси́йскую от наше́ствия иноплеме́нник и братоуби́йственныя бра́ни, наипа́че же лю́ди Правосла́вныя во благоче́стии да укрепи́т. Сего́ ра́ди благода́рне воспева́ем ти си́це:
Ра́дуйся, полко́в Росси́йских му́дрый предводи́телю;
ра́дуйся, ра́тных люде́й христолюби́вый попечи́телю.
Ра́дуйся, оте́чества на́шего держа́вный храни́телю;
ра́дуйся, слове́нских наро́дов ре́вностный защи́тителю.
Ра́дуйся, мечи́ на ора́ла прекова́ти наро́ды призва́вый;
ра́дуйся, мир име́ти со все́ми язы́ки преи́скренне жела́вый.
Ра́дуйся, благове́рным князе́м в благоче́стии подража́вый;
ра́дуйся, о́браз царя́ Правосла́внаго во смире́нии ми́ру яви́вый.
Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.
Конда́к 11
Пе́ния вся́каго досто́йна па́мять ва́ша, святи́и ца́рственнии страстоте́рпцы. Вы бо, о́браз испове́дничества и ре́вности по Бо́зе ве́рным лю́дем показа́вше, запове́дасте не мсти́ти злоде́ющим, па́че же проща́ти гоня́щим и моли́тву твори́ти за них, пою́ще Бо́гу: Аллилу́ия.
И́кос 11
Светоно́сный свети́льник седмочи́сленный ве́мы вас, святи́и ца́рственнии страстоте́рпцы, ца́рским бо путе́м ше́ствующе, угото́васте себе́ за Христа́ пострада́ти. Те́мже, просвети́те омраче́нная сердца́ на́ша и ева́нгельским путе́м ше́ствовати научи́те нас, прославля́ющих вас си́це:
Ра́дуйтеся, а́гнцы незло́бивии, А́гнцу Бо́жию в кро́тости подража́вшии;
ра́дуйтеся, о́браз терпе́ния в злострада́ниих ве́рным показа́вшии.
Ра́дуйтеся, во всем житии́ со́весть чи́сту храни́вшии;
ра́дуйтеся, убие́ние беззако́нное смире́нно восприе́мшии.
Ра́дуйтеся, седмочи́сленнии страстоте́рпцы, во еди́ном ду́се Бо́гу предста́вшии;
ра́дуйтеся, кро́вию му́ченическою зе́млю на́шу обагри́вшии.
Ра́дуйтеся, лик благове́рных царе́й и князе́й воспо́лнившии;
ра́дуйтеся, собо́р святы́х земли́ Росси́йския украси́вшии.
Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.
Конда́к 12
Благода́ть изря́дну Бог дарова́ Це́ркви Росси́йстей, просла́вив вас на Небеси́, ца́рственнии страстоте́рпцы, храни́телие и покрови́телие страны́ на́шея. Сего́ ра́ди и мы на земли́ почита́ем вас, Бо́гу вопию́ще: Аллилу́ия.
И́кос 12
Воспева́юще по́двиги ва́ша, ца́рственнии страстоте́рпцы, прославля́ем Триеди́наго Бо́га. Вы бо соизволе́нием Отца́ Безнача́льнаго, соверше́нием Сы́на Единоро́днаго и соде́йствием Свята́го Ду́ха Бо́жия прича́стницы Ца́рствия Небе́снаго соде́ластеся и засту́пницы оте́чества на́шего яви́стеся. Сего́ ра́ди дерза́ем взыва́ти вам си́це:
Ра́дуйтеся, я́ко прославле́нию ва́шему Це́рковь ра́дуется;
ра́дуйтеся, я́ко чудесы́ ва́шими ве́ра укрепля́ется.
Ра́дуйтеся, я́ко о́бразы ва́ши мироточе́нием прославля́ются;
ра́дуйтеся, я́ко в честь ва́шу хра́мы созида́ются.
Ра́дуйтеся, я́ко житие́м ва́шим лю́ди благоче́стию науча́ются.
ра́дуйтеся, я́ко терпе́нием ва́шим во страда́ниих ве́рнии назида́ются;
Ра́дуйтеся, я́ко ева́нгельския заве́ты исполня́ти нас наставля́ете;
ра́дуйтеся, я́ко бе́ды и ско́рби му́жественне нести́ нам помога́ете.
Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.
Конда́к 13
О, святи́и ца́рственнии страстоте́рпцы! Приими́те от нас похва́льное сие́ пе́ние и ми́лостивым ва́шим хода́тайством умоли́те Царя́ Сла́вы мир стране́ на́шей дарова́ти, Це́рковь в Правосла́вии и еди́нстве сохрани́ти, нас же во благоче́стии утверди́ти, да вопие́м Бо́гу: Аллилу́ия.
Сей конда́к глаго́лется три́жды.
И па́ки чте́тся 1-й и́кос и 1-й конда́к.
Моли́тва
О, свята́я седмери́це, ца́рственнии страстоте́рпцы, Нико́лае, Алекса́ндро, Алекси́е, Мари́е, О́льго, Татиа́но и Анастаси́е!
Вы, сою́зом любве́ Христо́вы связу́еми, дом ваш, я́ко ма́лую Це́рковь, благоче́стно устро́или есте́ и смире́нием себе́ посреде́ земна́го вели́чия украси́ли есте́. В годи́ну же братоуби́йственныя бра́ни и гоне́ний безбо́жных во оте́честве на́шем, все упова́ние на Бо́га возложи́вше, о́браз терпе́ния и страда́ния всей земли́ Росси́йстей яви́ли есте́ и, моля́щеся о мучи́телех, клевету́, у́зы и изгна́ние, глумле́ние, насмея́ние и оболга́ние, убие́ние и теле́с поруга́ние му́жественне претерпе́ли есте́. Сего́ ра́ди от земна́го ца́рствия к Небе́сному прешли́ есте́ и те́плии хода́таи о нас яви́лися есте́.
О, святи́и уго́дницы Бо́жии! Моли́теся о нас Бо́гу, да Це́рковь в единомы́слии и тве́рдей ве́ре соблюде́т, страну́ на́шу ми́ром и благоде́нствием огради́т и от междоусо́бныя бра́ни и разделе́ния изба́вит, власть предержа́щую умудри́т, во́инство му́жеством украси́т, супру́ги в ве́рности и любви́ укрепи́т, ча́да в благоче́стии и послуша́нии возрасти́т, и вся ны ку́пно с ва́ми сподо́бит воспева́ти Пречестно́е и Великоле́пое и́мя Живонача́льныя Тро́ицы Отца́ и Сы́на и Свята́го Ду́ха, ны́не и при́сно, и во ве́ки веко́в. Ами́нь.
И́на моли́тва, страстоте́рпцу царю́ Никола́ю
О, святы́й страстоте́рпче, царю́ му́чениче Нико́лае! Госпо́дь тя избра́ пома́занника Своего́, во е́же ми́лостивно и пра́во суди́ти лю́дем твои́м и храни́телем Це́ркве Правосла́вныя бы́ти. Сего́ ра́ди со стра́хом Бо́жиим ца́рское служе́ние и о душа́х попече́ние соверша́л еси́. Госпо́дь же, испыту́я тя, я́ко И́ова Многострада́льнаго, попусти́ тебе́ поноше́ния, ско́рби го́рькия, изме́ну, преда́тельство, бли́жних отчужде́ние и в душе́вных му́ках земна́го ца́рства оставле́ние. Вся сия́ ра́ди бла́га Росси́и, я́ко ве́рный сын ея́, претерпе́в, и, я́ко и́стинный раб Христо́в, му́ченическую кончи́ну прие́м, Небе́снаго Ца́рства дости́гл еси́, иде́же наслажда́ешися Вы́шния сла́вы у Престо́ла всех Царя́, ку́пно со свято́ю супру́жницею твое́ю цари́цею Алекса́ндрою и ца́рственными ча́ды Алекси́ем, О́льгою, Татиа́ною, Мари́ею и Анастаси́ею. Ны́не, име́я дерзнове́ние ве́лие у Христа́ Царя́, моли, да пода́ст нам Госпо́дь грехо́в проще́ние и на вся́кую доброде́тель наста́вит нас, да стяжи́м смире́ние, кро́тость и любо́вь, и сподо́бимся Небе́снаго Ца́рствия, иде́же ку́пно с тобо́ю и все́ми святы́ми новому́ченики и испове́дники Росси́йскими просла́вим Отца́ и Сы́на и Свята́го Ду́ха, ны́не и при́сно, и во ве́ки веко́в. Ами́нь.