Тропарь праведным Симеону Богоприимцу и Анне пророчице
Радуйся, Богоприимче старче Симеоне, / во объятия приемый Спаса Господа. / Веселися и ты, честная пророчице Анно, / возвестивши пришествие в мир Христа Бога нашего, / сокрушившаго державу вражию // и подающего нам велию милость.
Кондак праведным Симеону Богоприимцу и Анне пророчице
Во избранных Божиих, блаженне старче Симеоне, / на Небеси предстоиши пред лицем Христа Бога, / Егоже во храме, яко Младенца руконосимаго, / во объятия своя от всепречистых рук приял еси / и со Анною пророчицею яко Бога исповедал еси. / Темже похвальными гласы ублажаем вас: / радуйся, Богоприимче старче Симеоне, / радуйся, пророчице честная Анно, // радуйтеся, Бога во Плоти познавшии.
Тропарь праведного Симеона Богоприимца
Симеон старец днесь веселится,/ восприят на руку свою Младенца Превечнаго Бога,/ от уз плоти разрешитися прося/ и вопия: видеста очи мои// спасение Твое мирови.
Кондак праведного Симеона Богоприимца
Старец днесь отрешитися/ от юз моляшеся/ сего жития тленнаго,/ Христа восприят на руки,// Зиждителя и Господа.
Тропарь равноапостольного Николая, архиепископа Японского
Апостолов единонравне и сопрестольне,/ служителю Христов верный и Богомудрый,/ цевнице избранная Божественнаго Духа,/ сосуде преизливающийся любве Христовы,/ Японския земли просветителю,/ святый Николае, иерарше равноапостольне,/ молися Живоначальней Троице/ о всем твоем стаде/ и о всем мире.
Ин тропарь равноапостольного Николая, архиепископа Японского
Яко апостолом сопричастника в трудех и возмездиих/ Церковь тя с любовию почитает,/ святителю отче Николае равноапостольне./ Положив бо многими подвиги начало Православия в Японии язычестей,/ умножил еси в ней чада спасения,/ и по кончине прият тя Бог во обители апостол Своих по достоянию./ Сего ради молим тя/ молися Господеви пребыти и в предняя делу твоему незыблему на веки,/ и ввестися в лоно Церкве Православныя всем погибнути имущим,/ умиритися мирови/ и спастися душам нашим.
Кондак равноапостольного Николая, архиепископа Японского
Странника и пришельца прият тя страна Японская,/ равноапостолъне святителю Николае,/ в ней же исперва познал еси себе яко чуждаго,/ обаче теплоту и свет Христов источая,/ прелагал еси враги твоя в сыны духовныя,/ имже раздай благодать Божию, созидал еси Церковь Христову,/ о ней же ныне молися,/ и тебе бо сынове ея и дщери взывают:/ радуйся, пастырю добрый наш.
Ин кондак равноапостольного Николая, архиепископа Японского
Твердаго и Боговещаннаго проповедателя Евангелия Твоего, Господи,/ возмездил еси Боголепно/, труды бо его и болезни приял еси паче всех жертв законных и всесожжении./ Того молитвами соблюди нас от неприязни.
Тропарь благоверного князя Романа Угличского
От младенства явился еси,/ правоверный княже Романе,/ избран от Бога/ благочестия столп необорим,/ веру непорочну соблюл еси,/ молитвами и милостынею и постом Богу угодил еси;/ темже и по смерти явися светлость жития твоего,/ исцелявши бо недуги немощствующих,/ верою притекающих ко святому твоему гробу./ Сего ради вопием ти:/ радуйся, угодниче Божий Романе,/ града Углеча похвало и утверждение.
Ин тропарь благоверного князя Романа Угличского
Измлада явился еси, Богомудре,/ княже Романе всеблаженне,/ Божественный сосуд избран Богови,/ и ныне точиши нам многая исцеления,/ и вся недуги потоплявши,/ и спаси град свой Углеч,/ и всех верных сохраняй от невидимых и видимых враг,/ верою, молим, блаженне княже Романе,/ моли Христа Бога спастися душам нашим.
Ин тропарь благоверного князя Романа Угличского
Явися, яко звезда пресветлая,/ благоверный княже Романе,/ в Богом порученном ти граде Углече,/ в животе своем просветився/ воздержанием и всенощным стоянием,/ постом, и молитвою, и слезами,/ моляся ко Всемилостивому Спасу за град свой/ и за вся страны Русския земли,/ и по преставлении твоем источаеши исцеления неоскудно/ приходящим с верою,/ тем же вопием ти:/ моли Христа Бога/ спастися душам нашим.
Кондак благоверного князя Романа Угличского
Яко многосветлая звезда,/ всепразднственная память твоя возсия днесь, благоверный княже Романе,/ созывающи к похвалению люди твоя,/ песньми славословити честное житие твое/ и верно торжествовати святое твое успение,/ в немже молися, святе, ко Христу Богу нашему,/ еже избавитися нам от всех наветов вражиих,/ да вси зовем ти:/ радуйся, Романе пребогате, новый Российский чудотворче.
Ин кондак благоверного князя Романа Угличского
Скончав добрый подвиг,/ и веру соблюде в сердцы своем,/ и венец нетленный от Бога приял еси,/ блаженный княже Романе,/ и славе Его сподобился еси,/ и Престолу предстал еси Спасову./ Молися Господеви спасти град Углеч и вся грады/ от нашествия иноплеменных, и междоусобныя брани, и поганых,/ и твое честное преставление почитающим/ грехов оставление даровати/ чтущим любовию святую память твою.
Ин кондак благоверного князя Романа Угличского
Красоту мира сего, княжение и славу/ яко временно помышляя,/ и сего ради благочестно в мире пожил еси,/ блаженне княже Романе,/ милостынею и молитвами Богу угодив,/ и по преставлении своем чудес дар приим от Христа Бога,/ и светильник явися пресветлый,/ просвещая своими чудесы, приходящим к тебе с верою здравие подавши и от бед избавлявши./ Тем же Христова Церковь песньми славит тя,/ благочестивый княже Романе,/ граду своему Углечу великий поборниче.
Тропарь священномученикам Адриану Троицкому и Михаилу Березину
Якоже плод красный спасительнаго сеяния Христова, новыя мученицы благоугодныя жертвы показашася Царю и Богу, священне Адриане, учителю веры и проповедниче Благодати, и Михаиле, образе смирения и незлобия: сего ради древних страстотерпцев венцы равночестныя приясте от Подвигоположника. Того, яко Блага, молите спастися, молимся, душам нашим.
Кондак священномученикам Адриану Троицкому и Михаилу Березину
Светила разумная приидите восхвалим, вернии, священномучеников Адриана и Михаила воспоем во гласе хваления, мученическою бо кровию омывше землю Марийскую во время отступничества и помрачения, яко багряницею тою преукрасишася, и ныне Святей Троице предстоят, моля о нас Единаго Человеколюбца.
Тропарь святителя Стефана, епископа Великопермского
Божественным желанием,/ от юнаго возраста, Стефане премудре, разжегся,/ ярем Христов взял еси/ и людей оляденевшая древле неверием сердца,/ Божественное семя в них сеяв,/ евангельски духовне породил еси./ Темже преславную твою память почитающе, молим тя:/ моли, Егоже проповедал еси,/ да спасет души наша.
Кондак святителя Стефана, епископа Великопермского
Самозванен не ищущим тебе, святителю, обрелся еси,/ люди, от идольския лести свободив, ко Христове вере привел еси/ и волхва пансотника посрамил еси,/ темже и первый епископ и учитель Перми был еси./ Сего ради духовная твоя чада,/ яко тобою избавльшеся от идол, благодарная тебе возопием:/ радуйся, Стефане, учителю премудрый.
Тропарь священномученику Вячеславу Луканину
«Пою Богу моему дондеже есмь», / – купно с Давидом воспеваше новомученик Вячеслав; / «Господи, прими дух мой», / – яко Стефан воззва, / да возрастает семя Церкви, / юже Господь на кро́ви мучеников назда, / мы же с ними вопием: // «Прими, Господи, жертву хвалы и воскликновения».
Кондак священномученику Вячеславу Луканину
«Богу сердцем пойте», / научал еси. / И, услышав твоя молитвы, Господь, / испытуя же тя яко злато в горниле, / до конца очистил еси. / Да принесеши Богови священный дар / – сердце любокрасное, диаконство неподкупное, / святый священномучениче Вячеславе, // моли со други – мучениками спастися нам.
Кондак Недели о блудном сыне
