Тропарь преподобного Кирилла Новоезерского (Новгородского) чудотворца
Божиим Духом подвизаемь,/ слез твоих тучами изсохшее напоил еси,/ и безплотное в пустыни житие показал еси,/ и еже из глубины сердца бодренными молитвами и постом/ благодеяния труды уплодоносил еси,/ и вселенную всю просветил еси сиянием чудес твоих,/ отче наш Кирилле./ Моли Христа Бога, спастися душам нашим.
Тропарь на обретение мощей преподоного Кирилла Новоезерского (Новгородского)
Яко светильник явился еси всесветел/ во отоце Нова езера на Красном острове,/ преподобне отче Кирилле,/ ты бо крест Христов на рамо взем,/ усердно Тому последовал еси,/ чистотою Богови приближився,/ от Негоже и силами чудес обогатися,/ тем и мы любезно прибегаем к раце честных мощей твоих, умильно глаголем:/ о, преподобне отче Кирилле!/ моли Христа Бога спастися душам нашим.
Кондак преподобного Кирилла Новоезерского (Новгородского) чудотворца
Взбранному и крепкому адаманту,/ прогонителю бесов, новому чудотворцу/ победительная, страстей злых свободившеся,/ благодарственная восписуем ти, отче наш Кирилле./ Но яко имея дерзновение у престола Христова,/ верою чтущих тя, град же и люди, молитвою твоею сохраняй,/ ты бо еси стаду твоему похвала и утверждение.
Кондак на обретение мощей преподоного Кирилла Новоезерского
Христов ярем на рамо взем,/ усердно Тому последова,/ чистотою Богови приближився,/ отче преподобне Кирилле,/ молим тя, посещай милостивно чад своих,/ и моли непрестанно о всех нас.
Тропарь благоверного великого князя Георгия (Юрия) Всеволодовича Владимирского
На высоте великаго княжения седя,/ явился еси, благочестием и верою сияя отечеству своему, яко солнце;/ по Святей Троице ревностию разжегся/ и за веру крепко пострадав, кровь твою пролиял еси./ Тем и отсеченая твоя за Христа глава свидетельствует яве о тебе,/ прилепшая по смерти к телеси твоему,/ с неюже и до днесь нетленны пребывают мощи твоя,/ от нихже источаеши исцеления душам и телесем нашим./ Но яко дерзновение имея ко Христу, страстотерпче Георгие,/ непрестанно моли державу твою и сродник твоих/ безвредну сохранити молитвами твоими.
Кондак благоверного великого князя Георгия
Христове смерти подобяся/ и Того испити чашу возжелев, яко Живота,/ за Негоже мужески подвизался еси, презрев земное царство,/ от безбожных варвар пострадав до смерти,/ Георгие Богомудре./ Тем моли, спастися верным людем молитвами твоими.
Кондак благоверному великому князю Георгию (Юрию) Владимирскому
Христове смерти подобяся, и Того испити чашу возжелев, яко живота, за Него же мужески подвизався, презрев земное царство, от безбожных варвар пострадав до смерти, Георгие богомудре; тем моли спастися христолюбивому императору нашему молитвами твоими.
Тропарь священномученику Николаю Кандаурову
Церкве Русския столпе непоколебимый,/ благочестия правило,/ жития евангельскаго образе,/ священномучениче Николае,/ Христа ради пострадавый даже до крове,/ Егоже моли усердно,/ яко Начальника и Совершителя спасения,/ Русь Святую утвердити в Православии// до скончания века.
Кондак священномученику Николаю Кандаурову
Восхвалим, вернии,/ изряднаго во священницех/ и славнаго в мученицех Николае,/ Православия поборника и благочестия ревнителя,/ земли Русския красное прозябение,/ иже страданием Небес достиже/ и тамо тепле молит Христа Бога// спастися душам нашим.
Тропарь преподобномученице Екатерине Симбирской (Декалиной)
От юности Христа Бога возлюбивши, / в смирении и милосердии Тому угодила еси, / Христа со дерзновением проповедающи, / твердостию веры безбожных посрамила еси, / землю Симбирскую кровию своею освятивши, / Царства Небеснаго достигла еси. / Темже по долгу восваляем тя, / богомудрая преподобномученице Екатерино, / моли Человеколюбца Христа, // Спастися душам нашим.
Кондак преподобномученице Екатерине Симбирской (Декалиной)
Новоявленная веры звезда, / возсиявает днесь в Симбирстей земли: / восхвалим ныне преподобномученицу Екатерину достославную. / Та бо во дни гонений на Церковь Русскую, / Христа исповедати не убояся, / образ людем верным являющи, / и мученический крест на рамена своя восприимши: / кровьми же яко багряницею украсившися, / в небесныя чертоги вселися. / Темже со дерзнивением вопием ей: // молитвами твоими спаси души наша.
