Каноны - 23 февраля 2025
Песнь 1
Ирмос: Яко по суху, пешешествовав Израиль по бездне стопами, гонителя фараона видя потопляема, Богу, победную песнь поим, вопияше.
С лики шествуя весело в мысленных Небесных селех и сияя светом невечерним, избави мя от страстей молитвами твоими, мудре, яко да пою тя.
Светоносная твоя память солнечная облистает дарования и просвещает верно в ней чтущия тя, радости пресветлыя воистину, мучениче тезоимените.
Кровей твоих каплями сланое неверия море потопил еси, река благочестия был еси, Христову напояющи воистину Церковь присно.
Богородичен: Грехов буря, и помышлений противныя волны, и страстей нашествия на мне преидоша, но Твоею, Богородице Дево, державною молитвою спаси мя.
Песнь 3
Ирмос: Несть свят, якоже Ты, Господи Боже мой, вознесый рог верных Твоих, Блаже, и утвердивый нас на камени исповедания Твоего.
Несть отнюд изрещи чудес множества, яже соделал еси, еще в жизни ходя и к Богу прешед, страстотерпче мучениче досточудне.
Силою Божественною укреплься, некрепкую наглость беззаконных низложил еси, якоже воин крепок, Харалампие страдальче, яко оружник Божественнаго ополчения.
Кровей истекшия токи твоего телесе весь нечестия пламень и лютое запаление угасиша, сладости же поток тебе исходатаиша.
Богородичен: Святых Святаго Бога родила еси, Всесвятая, святости храм явльшися чист и дверь, еюже Един Христос пройде, спасаяй человечество.
Седален, глас 3.
Столп незыблен Церкве, светильник неугасимый вселенныя, страстотерпче, явился еси, Харалампие, и, просияв солнца светлее, идольскую отгоняеши тьму, мучениче славне, Христа Бога моли даровати нам велию милость.
Песнь 4
Ирмос: Христос моя сила, Бог и Господь, честная Церковь Боголепно поет, взывающи, от смысла чиста о Господе празднующи.
Красен был еси, помазався кровию честнаго мучения и добротами сего украсився, Харалампие, страдальцев украшение и утверждение.
Демонская капища твоим сокрушил еси, страстотерпче, мужеством, храм тебе самаго Святаго Духа и терпения неложнаго столп показал еси и образ.
На высоту вознесше руце, славне, тьмы предстателе твоя ребра строгаху ноготьми, вечное истинно исходатаивше тебе наслаждение.
Богородичен: Крепость моя и пение мое, Христос Бог, из Тебе возсиявый, премножеством, Чистая, благости избави ны перваго преступления.
Песнь 5
Ирмос: Божиим светом Твоим, Блаже, утренюющих Ти души любовию озари, молюся, Тя ведети, Слове Божий, истиннаго Бога, от мрака греховнаго взывающа.
Божественную страсть нас ради страсти претерпевшаго твердо, мучениче Христов, подражав, терпиши во всем теле, славне, гвоздей пригвождения доблественне.
Безсловесие гонителей, Слово, Собезначальное Отцу, исправляя, премудре, слово безсловесным яве влагает, разрешити от юз тя повелевающа.
Рожны пронзен, уязвил еси сердце лютаго земнородных борителя копием мужества и терпения твоего, Богомудре страстотерпче досточудне.
Богородичен: Божественным сиянием Твоим, Благая, омраченную мою душу сластьми просвети, и ко спасения стезям настави, яже Едина, Спаса Христа рождшая.
Песнь 6
Ирмос: Житейское море, воздвизаемое зря напастей бурею, к тихому пристанищу Твоему притек, вопию Ти: возведи от тли живот мой, Многомилостиве.
Светильник был еси, страданий твоих светом просвещая концы: исповедуеши имя Христово пред мучители, страстотерпче Христов преславне.
Божественныя распаляемь огнем любве, росою веры злочествующих угасил еси запаление, Христова чудеса неверным показуя, досточудне.
Жизни желая безсмертныя, плотская, Харалампие, умертвил еси страстная движения и молитвою мертвыя возставил еси, воспевающия во всех тя прославльшаго.
Богородичен: Страстей мя колеблющася сопротивными прилоги, Мати Божия, утверди, яко безстрастия рождши Источник, к Тебе бо прибегох, человеком великому прибежищу.
Кондак, глас 8
Подобствовав благодатию священства, славне, Церковь светло украсил еси Божественным страданием, еже за Христа приял еси доблественно, радуяся, Харалампие, честный светильниче всемирный, осияваяй концы, яко непобедимый.
Икос
Пастыря, Христа Бога нашего, яко Агнца, на землю благоволившаго приити, грехи вземлющаго и недуги всех понесшаго, равнообразовав, мучениче святе, душу за овцы положил еси, возвещая Его страсти. Тем днесь вси поем тя песньми, яко непобедима.
Песнь 7
Ирмос: Отроцы в Вавилоне пещнаго пламене не убояшася, но, посреде пламене ввержени, орошаеми, пояху: благословен еси, Господи Боже отец наших.
Приобщаяся мукам и огнем опаляемь, страстотерпче Христов, яко злато чисто, быв и священно возложение Христово был еси.
Молитв твоих росою пребеззаконнующих пещь угасе, мудре, и избавлен был еси, песнопоя Сотворшему: благословен еси, Господи Боже отец наших.
Ополчением страданий древо явился еси высокораслено, соосеняющо верныя от пламеннаго греха, зовущия: благословен еси, Господи Боже отец наших.
Богородичен: Радость приемшая в Пречистем чреве Твоем, Богородице Чистая, веселия сердце мое исполни, печаль отгонящи страстей, Приснодево.
Песнь 8
Ирмос: Из пламене преподобным росу источил еси и праведнаго жертву водою попалил еси, вся бо твориши, Христе, токмо еже хотети. Тя превозносим во вся веки.
Течении кровей накапаемь, ран добротою украшаемь, победительным благолепно венцем удобрен, Богу предстал еси, мучениче.
Мук облацы не покрыша мужества твоего, мучениче, и доблестей, гонителей не омрачи сопротивление твоего пресветлаго, Богомудре, терпения.
Священник же и мученик непобедим, воин добль и столп непоколебим, утверждение верных, нечестия противоборец, воистину явился еси, Богомудре страстотерпче.
Богородичен: Всяческая сотворивый Божественным хотением, восхотев, во чреве Твоем вселися, Чистая, истлевшия ны обновити хотя. Егоже превозносим во вся веки.
Песнь 9
Ирмос: Бога человеком невозможно видети, на Негоже не смеют чини Ангельстии взирати. Тобою же, Всечистая, явися человеком Слово воплощенно, Егоже величающе, с Небесными вои Тя ублажаем.
Ни огнь, ни меч, но ниже смерть, ни гонение, ни скорбь, ни глад, ниже беда, ни мук всяких умышление возможе от любве Божия воистину отлучити тя сотворшаго, страдальче досточудне.
Строганьми ногтей умерщвления совлек ризы, одеждами от кровей тебе, страстотерпче, украсил еси, темже со дерзновением, мучениче непобедиме, всех Владыце и Богу, радуяся, предстоиши.
Радости полна и Божественныя светлости подательна, Харалампие, память твоя миру возсия, страстей зиму отгонящи, вся просвещающи, юже празднующе, обретаем прегрешений очищение молитвами твоими.
Богородичен: Страстей буря смущает мя, и сластей погружает треволнение, Всенепорочная, Кормчия Христа рождшая, руку ми помощи простри и спаси мя, Едина спасение верно блажащих Тя.
Песнь 1
Ирмос: Воду прошед, яко сушу, и египетскаго зла избежав, израильтянин вопияше: Избавителю и Богу нашему поим.
Сый во мнозех напастех, губительстве и бедах всяческих, к тебе с верою вопию, да избавлюся молитвами твоими, Харалампие.
Капища идольская разрушив, церковь Божию узре, источниче ты чудотворный, гонителю пагубных и напастей отвергающий, Харалампие.
Яко жертва и мученик Христов, имея дерзновение, молитвами избави нас пагубных и зол, и бед, напасти отвергающий, Харалампие.
Богородичен: Едину Неискусомужную и Чистую молим Тя, раби Твои, губительства, вреда да избави.
Песнь 3
Ирмос: Небеснаго круга Верхотворче, Господи, и Церкве Зиждителю, Ты мене утверди в любви Твоей, желаний краю, верных утверждение, Едине Человеколюбче.
Лютых недуг и бед волнами от грех поистине вся ниспали есмы в лукавое, но теплыми молитвами нас свободи, Божественный Харалампие.
Изнемогающих от губительнаго — цельба, беду приявших — быстрое заступление и печалующихся радость. Темже нас молитвами свободи, Божественный Харалампие.
От болезней всяческих, помышлений бесовских, скорбей, пагубы лютой, бед злых всех нас своими молитвами свободи, Божественный Харалампие.
Богородичен: От погибели, зол, Пречистая, всяческаго вреда, пагубы и обстояния Харалампия мольбами и Твоими молитвами всех нас свободи, Дево Богоневестная.
Спаси от напастей раб своих, страстотерпче, яко вси тя присно нарицаем, яко молитвенника к Богу и избавителя.
Призри благосердием, Всепетая Богородице, на мое лютое телесе озлобление и исцели души моея болезнь.
Тропарь, глас 2
Молитвами твоими ко Господу от зол, бед, напастей свободи верно к тебе прибегающих и сетей избави вражиих, велий страстотерпче Харалампие.
Песнь 4
Ирмос: Услышах, Господи, смотрения Твоего таинство, разумех дела Твоя и прославих Твое Божество.
Слугу тя равноангельна и исповедника Христос тя показа и болезней целителя, велий Харалампие.
Изнемогающаго мя исцели, в напастех суща мя исхити и свободи твоими молитвами, велий Харалампие.
Возвеличи Господь тя в мире, благодать подал еси всем исцелити недуги, велий Харалампие.
Богородичен: Целительницу Тя разумеем, от зол, губительства и обстояния избави нас молитвами Твоими к Богу, Пречистая Богородице.
Песнь 5
Ирмос: Просвети нас повелении Твоими, Господи, и мышцею Твоею высокоюТвой мир подаждь нам, Человеколюбче.
Прибегаем к тебе от конец всего мира вси, иже в напастех суще, молитвами твоими избави от сих, мучениче Харалампие.
Со чины святых всех, святе, беседуя прямо Христу, от бед мя избави, мучениче Харалампие.
Весь в напастех, в пагубах и в зле пребываю, от всяких бед твоими мольбами мя избави, мучениче Харалампие.
Богородичен: Яко страшна нам тайна Суднаго дне, Владычице, трепетом велиим содержит и ужасает, но молитвами Харалампия избави, Пречистая, Всенепорочная, осуждения нас.
Песнь 6
Ирмос: Молитву пролию ко Господу и Тому возвещу печали моя, яко зол душа моя исполнися и живот мой аду приближися, и молюся, яко Иона: от тли, Боже, возведи мя.
Струями ты многими исцели злыя пагубы губительство, и из многих напастей и бед бури мя изыми и, молюся, твоими молитвами утиши ю, Харалампие.
Осени благодатию душу мою, святе, очеса разума и сердца к свету Христовых дел твоею молитвою, всеблаженне, приведи и, молюся, неистия тление утиши, мучениче Харалампие.
Нетленное сокровище тя ведахом и источник сый цельбы, всеблаженне, яко из тебе излияется благодать исцеляти недуги, и, молюся, твоими молитвами утиши я, Харалампие.
Богородичен: Неневестная Богородице, Госпоже, бед и напастей пагубу Харалампия теплыми мольбами разори и, молюся, злое тление утиши, Всепетая.
Избави от напастей раб своих, страстотерпче, и от пагубы страстей к тебе прибегающия, яко Божественный ко Христу молитвенниче.
Богородичен: Пречистая, яже чрез слово Слово неистолкованно напоследок ден рождшая, яко имущая матернее дерзновение, моли Христа Бога о нас.
Кондак, глас 6
Яко мученик и исповедник цвет, двойным венцем Христос тя увенча, возвеличив безчисленными чудесы на земли, но яко благодать Господню являя нам, верно к тебе прибегающим, даруй мир, помози в напастех и лютых бедах, святейший Харалампие.
Песнь 7
Ирмос: От Иудеи дошедше, отроцы в Вавилоне иногда верою Троическою пламень пещный попраша, поюще: отцев Боже, благословен еси.
Избавится невидимых и видимых враг, борющих нас, всеблаженне, умоли Христа твоими, священномучениче Харалампие, молитвами.
Трудами твоими благими разори идолом злое служение, Христос же тебе благодать чудес даровал есть исцеляти болезни твоими, священномучениче Харалампие, молитвами.
Множество православных, одержимии печальми от злых, к тебе с благочестием и с любовию возопиют, да избави лютых твоими, священномучениче Харалампие, молитвами.
Богородичен: Спасти от напастей, бед всюду и злых, нас, ближних своих, Христа Рождшую тихо умоли твоими, священномучениче Харалампие, молитвами.
Песнь 8
Ирмос: Царя Небеснаго, Егоже поют вои Ангельстии, хвалите и превозносите во вся веки.
Иже чудес у Господа благодать взявый, болезнь и пагубу изгони мольбами твоими, Харалампие треблаженне.
Вверг твоих раб лукавый в многоразличныя недуги лютыя, но сих изгони, Харалампие треблаженне.
Поток недуг, и пагуб, и напастей, и злое обстояние изгони мольбами твоими, Харалампие треблаженне.
Богородичен: Всяк вред душ и телес и всякую злую напасть изгони мольбами Твоими, Марие Богородице.
Песнь 9
Ирмос: Воистину Богородицу, Тя исповедуем, спасеннии Тобою, Дево Чистая, с Безплотными лики Тя величающе.
Всякими болезнями одержимыя и благочестно притекающии ко храму твоими молениями вся избави, мучениче Харалампие.
Пагубы губительныя, всякия немощи, помышления душетленнаго враг лукавых твоими молениями вся избави, мучениче Харалампие.
Иже вся спасаяй, тя призывающия, и ныне от разрушений и всякия погибели твоими молениями вся избави, мучениче Харалампие.
Богородичен: Погибели лютыя верных Твоих раб, бед злых Харалампия молитвами, Твоими молениями вся избави, Дево Преблаженная.
Молитва
О, священнейшая главо, пастырю добрый словесных овец Христовых, священномучениче Христов Харалампие, великий о нас заступниче в скорбех и бедах и во всех нуждах! Услыши нас, грешных и недостойных раб твоих, молящихся тебе, да твоими всесильными молитвами Всеблагий Господь избавит ны от всякаго злаго обстояния, простит вся согрешения, вольная и невольная, сподобит ны прочая лета жизни нашея скончати в соблюдении заповедей Его и покаянии. Испроси, угодниче Божий, да пребудет благословение Царя Небеснаго над благословенною им Россиею. Ты бо приял еси еще в житии своем от Господа силу всем притекающим к тебе с мольбою подавати потребное, темже и старцы, и возрастнии, и дети приимаху исцеления ради ходатайства твоего, угодниче, пред Престолом Господа. Егда же на мечное тя усечение осудиша, слышал еси превожделенный и сладчайший глас Господа, глаголющ к тебе сицевая: прииди, Харалампие, друже мой, многая ради Имене Моего претерпевый, проси у Мене, чесо хощеши, и дам ти. Ты же, великий светильниче, рекл еси Ему усты своими: Господи, аще угодно Тебе есть, молю Тя, даждь славу Имени Твоему, идеже положены будут моя мощи и память моя имать почитатися, да не будет на месте том глад и мор или тлетворный воздух, погубляющ плоды, но да будет паче на местех тех мир, телесем здравие и душам спасение, изобилие же пшеницы и вина и скотов умножение на потребу человеком. И тако по прошению твоему приял еси от Господа велию благодать. На твоя моления, на тя, священномучениче Христов Харалампие, уповаем, получити велию милость от Господа в безконечный век. Аминь.