Тропарь священномученика Харалампия
Яко столп избранный Церкве Христовой/ и светильник присносветлый всея вселенныя,/ премудре показася, Харалампие,/ возсия в мире мучением,/ разруши идольское мракобесие, блаженне,/ сего ради явися предстатель Христу,/ молися спастися нам.
Тропарь священномученика Харалампия, поемый на молебне
Страстотерпцу Харалампию приступим/ и образу его поклонимся, от сердца вопиюще:/ мучениче Харалампие и отче,/ от всякаго обстояния и всех бед своих раб избави нас,/ в церкве твоей выну пребывающих.
Ин тропарь священномученика Харалампия, поемый на молебне
Пострадавый мужески и мученический надевый венец,/ священномучениче преславне Харалампие, / свобода раб твоих от губительства и всякаго зла,/ напастей и бед, святе,/ с любовию твое призывающих чудное имя.
Ин тропарь священномученика Харалампия, поемый на молебне
Молитвами твоими ко Господу/ от зол, бед, напастей свободи/ верно к тебе прибегающих/ и сетей избави вражиих,/ велий страстотерпче Харалампие.
Ин тропарь священномученика Харалампия, поемый на молебне
Яко столп избранный Церкве Христовой/ и светильник присносветлый всея вселенныя,/ премудре показася, Харалампие,/ возсия в мире мучением,/ разруши идольское мракобесие, блаженне,/ сего ради явися предстатель Христу,/ молися спастися нам.
Кондак священномученика Харалампия, поемый на молебне
Яко мученик и исповедник цвет,/ двойным венцем Христос тя увенча,/ возвеличив безчисленными чудесы на земли,/ но яко благодать Господню являя нам, / верно к тебе прибегающим, / даруй мир, помозй в напастех и лютых бедах,/ святейший Харалампие.
Кондак священномученика Харалампия
Подобствовав благодатию священства, славне,/ Церковь светло украсил еси Божественным страданием,/ еже за Христа приял еси доблественно, радуяся, Харалампие,/ честный светильниче всемирный, осияваяй концы,// яко непобедимый.
Тропарь благоверной княгини Анны Новгородской
От запада возсиявши, яко звезда небосветлая,/ прияти Православную веру сподобилася еси,/ в нейже плод благославный Русской земле принесши,/ святая благоверная княгине Анно,/ Христа всем сердцем возлюбила еси,/ Того оправдания и законы хранящи;/ темже днесь всесвятую твою память празднующе,/ грехов оставление молитвами твоими приемлем.
Кондак благоверной княгини Анны Новгородской
Днесь в светлой памяти твоей/ Великий Новград веселится,/ созывая всех верных светло праздновати память твою,/ и мы ныне, духовно ликовствующе,/ радостно славим тя и молим:/ святая благоверная княгине Анно,/ предстоя Святей Троице/ моли избавити Великий Новград и всю землю Русскую/ от всяких бед и обстояний и всем нам спастися.
Тропарь преподобного Прохора Печерского, в Ближних пещерах
Преподобне и чудотворче, отче Прохоре,/ препитавый во гладе алчущия хлебом от былия и солию от пепела,/ напитай и нас пищею духовною,/ моля Христа Бога/ о душах наших.
Кондак преподобного Прохора Печерского, в Ближних пещерах
Велиим воздержанием удручая плоть свою, святе,/ лишився пищи человеческия,/ зелием и травою вместо хлеба, пепелом же, аки солию, питался еси,/ чудодейственне Прохоре./ Еже видя, Господь преложи зелие во хлеб и пепел в соль,/ имиже ты множество гладных препитал еси,/ тем тя чтем и ублажаем.
Тропарь преподобному Лонгину Коряжемскому
От мятежа мирскаго удалився, / к немерцающему Свету притекл еси, преподобне отче Лонгине, / и ныне чисте зриши Святую Троицу, / Юже моли за ны недостойныя, / да спасет души наша.
Кондак преподобному Лонгину Коряжемскому
По словеси Учителя Христа,/ крест на рамо твое приял еси,/ вся житейская отринув,/ и образ Животворящаго Древа в пустыню принесл еси,/ идеже доныне исцеления неоскудно источаются/ с верою приходящим к тебе.
Тропарь священномученику Константину Верецкому
Зако́на Бо́жия учи́телю/ и заповедей евангельских верный исполни́телю,/ священномучениче Константи́не,/ му́ченичества кровьми́ зе́млю Донскýю ороси́л еси,/ темже моли́твами твои́ми/ в лю́дех любо́вь к Це́ркви Христо́вой возрасти́// и в житии доброде́тельнем утверди.
Перевод: Закона Божия учитель и заповедей евангельских исполнитель, священномученик Константин, мученической кровью землю Донскую оросил, потому молитвами твоими в людях любовь к Церкви Христовой возрасти и в жизни добродетельной укрепи.
Кондак священномученику Константину Верецкому
Равноапо́стольному царю́ тезоимени́тый,/ постоя́нство в ве́ре Христу́ дáже до сме́рти яви́л еси́,/ те́мже и нам, на моли́твы твоя́ упова́ющим,/ тве́рдое стоя́ние в ве́ре испроси́// и душа́м на́шим ве́лию ми́лость.
Перевод: Равноапостольному царю соименный, постоянство в вере Христу даже до смерти показал, потому и нам, на молитвы твои надеющимся, твердое стояние в вере испроси и душам нашим великую милость.
