Акафисты - 26 февраля 2025
Кондак 1
Избранный от мира, предивный угодниче Христов / веры православныя благовестниче / юже яко добрый сеятель на ниве Христове / в сердца чад Божиих усердно всеял еси / не престай молитися за ны ко Господу / даровати земли нашей мир и безмятежие / Церкви Святей от ересей и расколов ограждение / да твоими молитвами от бед избавляеми, благодарно зовем ти: / радуйся, священномучениче Сильвестре,/ земли Омския молитвенниче.
Икос 1
Ангела пламенеюща духом и во плоти суща человека, избра тя Господь быти служителя Церкви Святей и стаду Своему пастыря добра, от юности бо твоея Богу Единому сердцем и душею прилежал еси. Мы же имуще в тебе образ пастыря добра умильно взываем ти:
Радуйся, Богом избранный и освященный наш пастырю; радуйся, увенчанный архиерейскою благодатию. Радуйся, чистый разумом, всею душею Бога возлюбивый; радуйся, в житии твоем Тому усердно послуживый. Радуйся, в незлобии сердце твое соблюдый; радуйся, иго Христово от юности радуяся восприявый. Радуйся земли Омския благодатное прирастание; радуйся, со всеми в земли нашей просиявшими неба церковнаго украшение. Радуйся, свяшенномучениче Сильвестре, земли Омския молитвенниче.
Кондак 2
Видяще тя, пастыря, подвигом добрым подвизающася, и «аки елень на источники водныя» к Богу устремляющася, словесное стадо свое аки ангельским хлебом обильно питающа, святителю отче наш Сильвестре, умиляемся сердцем и душею, благодаряще Бога, даровавшаго нам тебе пастыря верна и стража добра, воспеваем дивную песнь: Аллилуиа.
Икос 2
От юности твоея, богомудре Сильвестре, орлу горнему уподобился еси, от мирския суеты к высоте небесней воспарив, да постигнеши глубины премудрости Божия и в свете истиннаго благочестия стадо твое мудре просветиши. Мы же наставляеми тобою покланятися Богу, в Троице славимому, воспеваем ти похвалы сия:
Радуйся, Бога во Святей Троице прославляемаго, познати нас просветивый; радуйся, Свет Истинный, просвещаяй всякаго человека, всем возвестивый. Радуйся, правды Божия ревностный искателю и Христа обретый; радуйся, неутомимый Ея глашатаю и провозвестниче. Радуйся, Закон Божий на скрежалех сердца твоего начертавый; радуйся, в слове, житии, любве, духе и вере образ нам показавый. Радуйся, в дому Божии, яко финикс процветый; радуйся, чистотою сердца богатый, верою и разумом Необъятнаго объявый.
Радуйся, священномучениче Сильвестре, земли Омския молитвенниче.
Кондак 3
Яко серна от тенет, от суеты мира сего отбегл еси и к иноческому подвигу потщался еси; Христу Богу непорочным житием благоугодил еси, достоблаженне священномучениче; в трудах же и бдениих, от стражи утренния до нощи дремания веждома твоима и сна очесем не давый. Сего ради жилище Духа Святаго быти сподобился еси и в Троице певаемому Богу, яко орган многострунный, непрестанно воспевал еси святую песнь: Аллилуиа.
Икос 3
Кедру ливанскому уподобился еси, святителю Христов Сильвестре, изрядно укрепивый душу твою святостию служения соборнаго в богоспасаемей Полтаве, идеже чистому нраву и благочестию церковному учил еси, Святителю, отроцы и отроковицы земли Полтавския; темже видяще тя, ревностию учительства пламенеюща, вопием ти сице:
Радуйся, Господа ради дом родительский оставивый; радуйся, путем тесным за Христом последовавый. Радуйся, Ангельское житие благодатно стяжавый; радуйся, яко юный Исаак смиренно в руце Божии себе цела отдавый. Радуйся, образе кротости и о молитве Иисусове присное памятование; радуйся, помощи Божия непрестанное призывание. Радуйся, сыновней любовию к небесным воспаривый; радуйся, молитвою твоею землю Омскую освятивый.
Радуйся, священномучениче Сильвестре, земли Омския молитвенниче.
Кондак 4
Видяще тя Пастыреначальник Христос, учительнаго подвига ревнителя, трудов же и миссионерских деланий неленастнаго исполнителя, постави тя юным отроком наставника и учителя. Ихже делом и словом к служению церковному мудре уготовлял еси и преуспевати в житии благонравнем отечески наставлял еси; да и тии, в возраст пришедши и поминающи благия заветы твоя, множицею воспоют дивную песнь Богу: Аллилуиа.
Икос 4
Слышаша и видеша людие православнии равноангельное житие твое, священномучениче Сильвестре, воодушевишася к подвигу служения Святей Церкви Божией, наипаче же узревши тя, ангельскаго образа сподобльшася и высокаго сана архимандрита достигша, со умилением сердечным пообещаша пред олтарем Господним, такожде послужити во священных олтарех Церкве Православныя, воспевши тебе похвалы сия:
Радуйся, Христа Бога возлюбивый, и с Ним за мир заклатися обещавый; радуйся, Христу спогребыйся, смерти жало славно поправый. Радуйся, теплотою души твоея затепливший и души верных твоих чад; радуйся, во мнозех скорбех и болезнех терпению Христову нас научивый. Радуйся, стада Христова пастырю верный; радуйся, молитвенниче усердный за народ наш и землю отцев и братий. Радуйся, обуреваемым тихое пристанище; радуйся, заблуждшим благостный наставниче.
Радуйся, священномучениче Сильвестре, земли Омския молитвенниче.
Кондак 5
Богосветлое светило, Духом Святым возжженное, воспламени Господь сердце твое, мучениче земли Омския, да упасеши и избавиши боголюбивыя люди наша от вражды с Богом и попрания Святых Заповедей Его, ихже дух злобы поднебесный низвергнути на сие тщашеся. Бурею безбожия испытуем ты, Святче, реши в сердце твоем многовидныя мучения прияти, да не умолкнет победная песнь Богови на земли Сибирстей: Аллилуиа.
Икос 5
Видяще гонители злочестивии, яко твердо твое упование на Господа и любовь к Нему, злобою распаляхуся, лютыя страдания измышляху, мнящи гладом и мразом и темничнии изнурении веру твою попрати, посмеяние диаволу явити, святый крестоносче Сильвестре и вси исповедницы земли Сибирския. Ты же, духовный пастырю страдальцев, новыя весны прозябение Христово явися и вся козни бесовския попраша; о сем приносим ти таковая:
Радуйся, трием отроком в Вавилоне верою единонравный; радуйся, Даниилу в рове львинем мужеством единославный. Радуйся, Церкве Христовы споборниче; радуйся, Православнаго вероучения неисчерпаемый источниче. Радуйся, славу мира сего, яко суетную презревый; радуйся, блага временныя нивочтоже вменивый. Радуйся, велие дерзновение к Богу имеяй; радуйся, пламенною любовию к Богу горяй.
Радуйся, священномучениче Сильвестре, земли Омския молитвенниче.
Кондак 6
Проповедание медоточивых уст твоих, якоже мука и елей в Сарепте Сидонстей никогдаже истощашеся, ниже заграждашеся, преславне исповедниче Христов Сильвестре; видим бо тя благовествующа людем богоспасаемаго града Киева и града святаго Петра, идеже в служении церковнем пребывая, учил еси взывати Богу дивную песнь: Аллилуиа.
Икос 6
Видяще подвизи всероссийскаго воинства на поле брани доблественне стоящаго за святое Отечество наше и народы его населяющия, возносил еси Святую Безкровную Жертву, за воины в подвизе своем кровь пролившия. Учил еси, святителю Божий, како подобает молитися и трудитися, возлагая на олтарь Отечества живот свой и кровь проливая безценную; страдания своя приявый, воеже освятити землю нашу в Дом Божий – Жилище Духа Святаго. Сему преславному подвигу удивишася, вопием немолчно сицевая:
Радуйся, в годину бед и испытаний отеческою любовию нас утешаяй; радуйся, оградо крепкая и надеждо Православнаго стада несокрушимая. Радуйся, лампадо светлая, в молитвеннем подвизе неугасимая; радуйся, пастырю, Веры Православныя истинный ревнителю. Радуйся, ересей и расколов нечестивых искоренителю; радуйся, православнаго благочестия насадителю. Радуйся, чистим сердцем твоим Господа славы созерцавый; радуйся, в волю Божию всего себе отдавый.
Радуйся, священномучениче Сильвестре, земли Омския молитвенниче.
Кондак 7
Ходатай пред Богом преизряден явился еси, священномучениче Сильвестре, егда дерзновенно подъял еси труд ежечаснаго крестнаго хождения. В немже просвещая и воодушевляя присных, высоко и победоносно воздвизал еси дивное и преславное знамение Креста Господня, усердно моляся Богу за люди твоя, воспевающия: Аллилуиа.
Икос 7
Новым и немеркнущим светилом явился еси, богомудре Сильвестре, и вся твоя духовныя чада, страстотерпцы Христовы, по всей земли нашей; в лесах тайги непроходней, в рудех подземельных, гладом и хладом томими, в поте кроваве изнуряеми суще. Обаче идеже умножишася страдания ваша, тамо преизобиловаша чада Христова, из злодеев и убийц кающихся. Тако бо от беззакония к повиновению Божию многия приведосте, о сем восхваляем вас сицевыми похвалы:
Радуйтеся, лесорубы, козни вражии низлагающии; радуйтеся, дровосеки, всякую лесть бесовскую пресецающии. Радуйтеся, в подземелии шахт светом Христовым сияющии; радуйтеся, зачерствелую совесть к покаянию побуждающии. Радуйтеся, алчущих правды Божия питателие; радуйтеся, нищих духом и опечаленных в унынии утешители. Радуйтеся, нераскаянныя грешники ко Христу приведшии; радуйтеся, с ними же в Царствие Небесное вшедшии.
Радуйся, священномучениче Сильвестре, земли Омския молитвенниче.
Кондак 8
Чудно соделавый пути нашего спасения Человеколюбец Господь, промыслительно, аки росу на руно Гедеоново, дарова тя Омской пажити, архипастыря прилежна и православнаго учения хранителя тверда; воеже в венец земнаго подвига твоего поставити тя пред Престолом Славы Своея, молитвенника о нас тепла и неусыпна. Сего ради Богу, во благо вся устрояющу, со умилением зовем: Аллилуиа.
Икос 8
Весь мир ужасом многим содрагашеся, слышавше, киими истязаньми и мученьми изнуряем был еси, достославный новомучениче Христов, егда тя люте истязавши пытки страшныя привменяху и гвоздьми острыми, яко стрелы израняху твое честное тело даже до крове. В сем стоянии адамантове за веру Православную пребывших зряху, умиляемся благодарным сердцем и ужасаемся, состраждуще душею вопием ти сице:
Радуйся, исповедниче новый и преславный; радуйся, кораблю веры непотопляемый. Радуйся, пред Богом за нас молитвенниче теплейший; радуйся, в скорбех грядущих на нас помощниче вернейший. Радуйся, во бранех со диаволом, терпению нас научаяй; радуйся, в стоянии за веру отеческую нас укрепляяй. Радуйся, богомудрых умов услаждение; радуйся, боголюбивых душ увеселение.
Радуйся, священномучениче Сильвестре, земли Омския молитвенниче.
Кондак 9
Вси людие паствы Омския видяще тя, архипастыря своего, смирением и кротостию сияюща, прославиша Бога, святителю отче Сильвестре. Ты же, Христовою любовию к ним исполненный, яко отец о чадех своих, слезныя молитвы Богу день и нощь излиял еси. Сего ради людие твои, умиляющеся сердцем и душею, воспеваху Богу, даровавшему им таковаго святителя дивна, возносяще песнь: Аллилуиа.
Икос 9
Проповедником славным явился еси, богомудре Сильвестре, всякую лесть бесовскую заграждаяй и посрамляяй, еюже дух злобы поднебесный мняше народы наша на путь нечестия совратити. Овых ересьми и расколы, овых же всякаго нечестия и безбожия насадители; тщашеся похулити Имя Пресвятыя Троицы. Ты же, вземше Крест Христов, имже благословил еси люди Божия, наставил еси их на стезю Заповедей Святых. О сем, в вере отцев наших спасаеми, поем тебе таковая:
Радуйся, огнь и воду прошедый; радуйся, веру православную кровию твоею утвердивый. Радуйся, Христа возлюбивый и к Нему прилепивыйся; радуйся, погубивый временная, Вечная же унаследовал еси. Радуйся, вдов и сирот усердный питателю; радуйся, гонимых за веру отеческую усердный попечителю. Радуйся, дольняго мира мудрейший узниче; радуйся, горняго мира вернейший соузниче.
Радуйся, священномучениче Сильвестре, земли Омския молитвенниче.
Кондак 10
Спасти хотя многия, попусти Господь беды велия на народы наша, да якоже плевелы от пшеницы злыя измет и сожжет, верныя же, яко пшеницу соберет в житницы Своя и прославит их, яко верных рабов Своих. Мы же волю Божию приемлюще, терпению и злостраданию их научишися, егда к испытаниям призовет нас Господь, да ублажая подвизи их, поем неложно песнь Богу: Аллилуиа.
Икос 10
Стена тверда и ограждение крепкое явился еси, многострадальне исповедниче, к тебе прибегающим и молитвеннаго предстательства твоего просящим в новых испытаниих веры сущих. Ты же, владыко святый, буди предстателем пред Богом за нас многогрешных, с верою и упованием вопиющих ти таковая:
Радуйся, врагом веры Христовы необоримая преградо; радуйся, от разорения храмов Божиих несокрушимая оградо. Радуйся, омраченныя зловерием, Светом Веры Христовы просвещаяй; радуйся, учителю кротости и воздержания. Радуйся, светильниче веры православныя; радуйся, от сетей вражиих верныя избавляяй. Радуйся, ходити по стопам Заповедей Божиих нас научаяй; радуйся, ко Пресвятей Богородице о нас непрестанно взываяй.
Радуйся, священномучениче Сильвестре, земли Омския молитвенниче.
Кондак 11
Пение, иже приносим тебе, в похваление преславных подвигов и чудес твоих, достоблаженне Сильвестре, несть довольно, обаче ведаем благое твое о нас тщание и любовь твою. Благоволи, святый владыко, прияти молитвы наша и избавити нас от прелести еретическаго зловерия и языческаго злонравия, да утренююще, чистым сердцем приносим о тебе песнь Христу Богу: Аллилуиа.
Икос 11
Светом Божественныя Любве объят был еси, Сильвестре досточудне, егда призывал еси соузники твоя кающиися, радоватися, понеже Благодать Божия изобильно пребывает со всеми очистившими совесть свою покаянием сердечным; яко чрез страдания временныя готовится верным радость вечная, юже уготова Бог любящим Его. Ублажая сия радости Тайну Велию, молим вас прилежно, страдальцы преславнии, купно со святителем Сильвестром, утешите нас немощных, да спасаеми зовем вам немолчно:
Радуйтеся, Духа Святаго священное жилище; радуйтеся, Благодати Христовы славное вместилище. Радуйтеся, яко орли к Солнцу Правды воспарившии; радуйтеся, к Свету Невечернему из юдоли плача возвысишася. Радуйтеся, Царствия Небеснаго наследницы; радуйтеся, вечныя славы сопричастницы. Радуйтеся, в селениих праведных упокоение обретшии; радуйтеся, честнии праведницы с нами воспевающии славословную песнь святителю:
Радуйся, священномучениче Сильвестре, земли Омския молитвенниче.
Кондак 12
Благодать Божия изобильно излияся на тебе, присный наш молитвенниче святителю Сильвестре, егда в темницу к безбожным, аки на пир веры православныя шел еси со иными страстотерпцы земли нашея. Воеже пребыти во блаженстве за Имя Господне, егоже вы пронесосте в житии вашем, и ныне сподоби вас Господь Венца Славы и Бессмертия, вопиющих: Аллилуиа.
Икос 12
Поюще многострадальныя подвизи ваша и пламенную любовь яже ко Господу, священномучениче Сильвестре и вси новомученицы Сибирстии, славно Христу сораспеншиися, и от земных в Небесная венценосно водворившиися, идеже Ангелом сликовствующе, нас немощных напастьми испытуемых, поминайте. Мы же молитвенную надежду на вас имуще, Волю Божию, яко всеблагую приимем и скорбми утешающеся зовем сицевая:
Радуйся, архиерею Божий, подобие Крестнаго Распятия претерпевый; радуйся, за Истину пострадавый, Бога прославивый. Радуйся, в заключении темничнем усердно Господеви послуживый; радуйся, путь Голгофских Страданий понесый. Радуйся, с сотаинницы предстояй у Креста, Христу сораспявыйся; радуйся, земный ангеле, за град и Отечество наше молитву приносяй. Радуйся, архипастырю града Омска, людем верным в покровение святыя мощи твоя даровавый; радуйся, явлением пречестных мощей твоих и неверных ко Господу приведый.
Радуйся, священномучениче Сильвестре, земли Омския молитвенниче.
Кондак 13
О, многострадальне и всехвальне страстотерпче Сильвестре с соузники, славно сораспеншиися за Церковь Святую Православную и кровьми своими в небесней со Христом священнодействовати сподобишася. Нынешнее наше моление приемши, от всех бед, скорбей и напастей нас избавите, наипаче же Церковь Святую, юже до крове возлюбисте; от всякаго лукавствия века сего миром оградите, да купно с вами вопием победную песнь Богу: Аллилуиа.
Сей Кондак читать трижды. Затем читается Икос 1 и Кондак 1
Молитва священномученику Сильвестру
О предивный угодниче Христов, священномучениче Сильвестре! Со умилением преклонше колена пред честными цельбоностными мощами твоими (святым образом твоим), хвалим, славим и величаем прославльшаго тя Бога, нам недостойным даровавшаго заступника тя и ходатая. Ему же ты с лики новомучеников Российских и всех Небесных Сил предстоиши. Умоли Господа, да утвердит во святей стране Российстей живый дух православныя веры и благочестия, да вселит в земли Сибирстей любовь пламенеющую к вере отечестей; наипаче же оградит нас всесильною рукою Своею от раскольнических лжеучений и ересей. Да подаст людем дух покаяния в богоотступлении и служении суетам мира сего; всем же нам дарует дух смирения, кротости и послушания. Да препояшет ны благодатию Своею и утвердит во брани за спасение наше. Емуже подобает всякая слава, честь и поклонение Отцу и Сыну и Святому Духу, ныне и присно и во веки веков. Аминь.
Кондак 1
Избранный от Бога архиерею и исповедниче Христов, в годину безбожия на подвиг стояния за веру Православную призванный и мученическим венцем преславно украшенный, восхваляем тя любовию, священномучениче Серафиме. Ты же, ходатайственно предстоя Престолу Божию, о нас присно молися, с любовию зовущих:
Радуйся, Серафиме, Церкве Русския похвало и украшение.
Икос 1
Ангелов Творец и всея твари Создатель от юности яви тя подвижника совершенна, священномучениче Серафиме, сильнаго словом и делом и уготова ти подвиг страдальческий, в немже венец мученический стяжал еси. Мы же, прославляюще тя новаго исповедника веры Христовы, со умилением взываем сице:
Радуйся, от младенства Богом возлюбленный;
радуйся, покровом Царицы Небесныя осененный.
Радуйся, путь девства и чистоты избравый;
радуйся, старцем Алексием Зосимовским воспитанный.
Радуйся, сокровища мира сего ни во чтоже вменивый;
радуйся, благое иго Христово на себе восприемый.
Радуйся, светом благодати Божия осиянный;
радуйся, росою Духа Святаго напоенный.
Радуйся, Серафиме, Церкве Русския похвало и украшение.
Кондак 2
Ведый Господь благочестие родителей твоих, святе Серафиме, дарова им тя, яко плод благославный. Ты же, яко доброе прозябение, добродетели их восприем, измлада веру Православную возлюбил еси и, от силы в силу восходя, в меру возраста Христова достигл еси, чрез все житие поя хвалебную песнь Богу: Аллилуиа.
Икос 2
Разум просвещен от Бога имея, святителю Серафиме, еще отрок сый, сердцем твоим к Богу прилепился еси. Темже, пастырскому служению родителя поревновав и путь подвига духовнаго избрав, благодати священства сподобился еси. Мы же, ведуще добродетельное житие твое, восхваляем тя сице:
Радуйся, родителей отрадо и утешение;
радуйся, благочестия и веры их наследниче.
Радуйся, от юности Христа всем сердцем возлюбивый;
радуйся, разумом Божественным просвещенный.
Радуйся, любовь к миру любовию Божиею победивый;
радуйся, чистоту сердца твоего издетска сохранивый.
Радуйся, совета благочестиваго отца твоего послушавый;
радуйся, путь служения Церкви избравый.
Радуйся, Серафиме, Церкве Русския похвало и украшение.
Кондак 3
Сила Вышняго осени тя, богомудре, к разумению божественных писаний. Ты же, благодатию Божиею укрепляемь, в учении книжнем пребывал еси и душу твою водами благочестия и мудрости напоил еси, воспевая Триипостасному Богу благодарственную песнь: Аллилуиа.
Икос 3
Имея в сердце твоем, отче всеблаженне, упование на всесильную помощь Божию и заступничество преподобнаго Серафима, тому воззвал еси, егда недуг смертный порази тя. Господь же молитвами Саровскаго чудотворца здравие ти подаде. Мы же, таковому промышлению Божию радующеся, вопием ти сице:
Радуйся, книжную премудрость возлюбивый;
радуйся, плоды учения Христова вкусивый.
Радуйся, преподобным Серафимом от болезни чудесно исцеленный;
радуйся, ко иноческому житию им направленный.
Радуйся, очи сердечная светом евангельским просветивый;
радуйся, в сердце твоем образ Христа непрестанно носивый.
Радуйся, на апостольское служение Богом призванный;
радуйся, на жатву духовную Им посланный.
Радуйся, Серафиме, Церкве Русския похвало и украшение.
Кондак 4
Бури страстей мира многомятежнаго хотя избегнути, святче Божий, предал еси себе в послушание духовному отцу, иже, провидев твое призвание, благослови тя путем иноческим шествовати. Имя же преподобнаго Серафима в постризе прием, радостию велиею возрадовался еси и чрез все житие потщался еси тому подражати, воспевая хвалебную песнь Богу: Аллилуиа.
Икос 4
Слышавше ближнии и знаемии, яко сподобился еси, богомудре, восприяти чин священнический, возрадовашася, ведуще тя, благочестием и разумом исполнена. Ты бо, подвигом добрым подвизався, сердца верных светом евангельским просветил еси и в вере Православней утвердил еси. Сего ради по достоянию восхваляем тя сице:
Радуйся, в послушание духовному отцу себе предавый;
радуйся, иноческому деланию им наученный.
Радуйся, имя Саровскаго чудотворца достойно носивый;
радуйся, во иноческих трудех и подвизех ему подражавый.
Радуйся, Церкви Христовой себе обручивый;
радуйся, благодати священства сподобивыйся.
Радуйся, серафимскою любовию к Богу пламеневый;
радуйся, ближним, яко же Христу, послуживый.
Радуйся, Серафиме, Церкве Русския похвало и украшение.
Кондак 5
Боголюбивое сердце имея, святе Серафиме, устремился еси к месту, идеже Господь за спасение мира вольную страсть претерпе и крестную смерть прият. Темже, паче любовию ко Христу распалився, в гонениих безбожным мужественне противостал еси и многоразличная страдания претерпел еси, возсылая Богу хвалебную песнь: Аллилуиа.
Икос 5
Видя, отче Серафиме, яко гонение богоборцев найде на Церковь Русскую, не убоялся еси их злобы и хуления, но, Божественною любовию укрепляемь, яко воин Христов, вышел еси на брань духовную и Христа исповедал еси даже до смерти. Мы же, почитающе исполненное веры мужество твое, воспеваем ти сице:
Радуйся, благословение святаго града приемый;
радуйся, силою Креста Господня укрепленный.
Радуйся, страстем Христовым благоговейне поклонивыйся;
радуйся, в Небесный Иерусалим страданьми вселивыйся.
Радуйся, угрозы гонителей безбожных презревый;
радуйся, веру Православную дерзновенно исповедавый.
Радуйся, князя тьмы века сего посрамивый;
радуйся, чада духовная в вере утвердивый.
Радуйся, Серафиме, Церкве Русския похвало и украшение.
Кондак 6
Проповедник евангельския любве и веры истинныя явился еси, отче Серафиме, егда избра тя Господь к служению святительскому града Дмитрова. Ты же, святче Божий, заповеди Пастыреначальника Христа исполнив, ныне во Царствии Небеснем пребываеши. Темже буди наставник всем, любящим тя и вопиющим Богу: Аллилуиа.
Икос 6
Возсиял еси, яко светило пресветлое, во граде Дмитрове, святителю отче Серафиме, светом Христова учения соблюдая паству твою от наветов вражиих, расколов и ересей. Темже, ведуще тя, яко пастыря и учителя богомудраго, теплаго молитвенника и пред Богом усерднаго ходатая, песньми духовными прославляем тя сице:
Радуйся, образ православнаго архипастыря верным явивый;
радуйся, подвиг служения твоего достойно совершивый.
Радуйся, града Дмитрова светильниче пресветлый;
радуйся, покровителю его благодатный.
Радуйся, Таин Божиих ревностный совершителю;
радуйся, паствы твоея верный хранителю.
Радуйся, слова Божия усердный благовестителю;
радуйся, расколов и ересей искоренителю.
Радуйся, Серафиме, Церкве Русския похвало и украшение.
Кондак 7
Хотя волю Божию о тебе открыти, святителю Серафиме, духовный отец твой благослови тя крестом червленым и пророчески воспе песнь церковную, яко, слово истины исправляя, веры ради пострадаеши даже до крове. Ты же, священномучениче, крест сей на персех носив, со всеми новомученики Российскими Христу сораспялся еси, воспевая Ему хвалебную песнь: Аллилуиа.
Икос 7
Новый сонм мучеников возсия в Церкви Российстей, егда попущением Божиим лютым безбожником власть предадеся, иже святыя храмы оскверниша, обители иноческия разориша, православныя христианы убиша. Обаче, идеже умножися беззаконие, тамо преизобилова благодать Божия. Еюже и ты, святителю Серафиме, укрепляемь, велия скорби и болезни, страдания и мучения претерпел еси. Темже с любовию восхваляем тя сице:
Радуйся, силою Божиею злобу диавольскую победивый;
радуйся, евангельскую любовь ко врагом явивый.
Радуйся, путь страдания за Господа избравый;
радуйся, мучений и смерти не убоявыйся.
Радуйся, сущих в темницех и узах утешивый;
радуйся, немощных в вере укрепивый.
Радуйся, поношения со смирением претерпевый;
радуйся, добрым исповеданием венец нетленный стяжавый.
Радуйся, Серафиме, Церкве Русския похвало и украшение.
Кондак 8
Странствия земнаго течение совершая, пастырь богомудрый явился еси, волков лютых от стада отгоняя. Сии же, злобою распалаеми, на тя восташа и неправедне оклеветаша. Тогда исполнися на тебе глагол Божий, яко вси хотящии благочестно жити о Христе Иисусе гоними будут. Ты же, смиренно страдания от богоборцев претерпевая, воспевал еси Богу ангельскую песнь: Аллилуиа.
Икос 8
Всем сердцем Богу предался еси, святителю Серафиме, с кротостию терпя заточение темничное, идеже утешения от Христа Бога нашего сподобился еси. Темже, радостию неизреченною озарився, воззвал еси к Нему: в несении креста спасительнаго, десницею Твоею мне низпосланнаго, укрепи мене, вконец изнемогающаго. Мы же, с любовию тя чтуще, восхваляем сице:
Радуйся, паствы твоея богомудрый окормителю;
Радуйся, уставов церковных присный блюстителю.
Радуйся, отступников веры мужественный обличителю;
радуйся, зловредных мудрований их искоренителю.
Радуйся, за веру Православную в темницу заключенный;
радуйся, Господом в страданиих укрепленный.
Радуйся, муки и болезни безропотно терпевый;
радуйся, смирением твоим козни диавола победивый.
Радуйся, Серафиме, Церкве Русския похвало и украшение.
Кондак 9
Всякия скорби, поношения и напасти Господа ради понесл еси, священномучениче Серафиме, в заточениих темничных и многолетных изгнаниих пребывая, не имый где главу подклонити. Темже исповедник веры истинныя явился еси, подражая долготерпению Божественнаго Страдальца и воспевая Ему в радости духовней: Аллилуиа.
Икос 9
Ветия многовещанныя дивятся добродетельному житию твоему, святителю Христов Серафиме, многая бо страдания от безбожных претерпевая, в усердней молитве и духовных подвизех пребывал еси. Темже и Пресвятая Дева явлением Своим во обители Дивеевстей утешение ти подаде. Мы же, ведуще тя усерднаго о нас молитвенника, с любовию вопием ти:
Радуйся, в скорбех течение жизни безропотно совершивый;
радуйся, заповеди Христовы до конца сохранивый.
Радуйся, яко злато в горниле, страданьми очищенный;
радуйся, благодатию Святаго Духа освященный.
Радуйся, яко все упование на Божию Матерь возложил еси;
радуйся, яко во дни и в нощи молитвы к Ней возносил еси.
Радуйся, видением Царицы Небесныя утешенный;
радуйся, покровом Пречистыя Богородицы осененный.
Радуйся, Серафиме, Церкве Русския похвало и украшение.
Кондак 10
Спасти хотя люди Своя, дарова тя Господь, святителю Серафиме, страждущим утешителя, болящим целителя, малодушным укрепителя. Темже и мы, молитвами твоими ограждаеми, Царя Небесе и земли прославляем, воспевающе Ему благодарственную песнь: Аллилуиа.
Икос 10
Стена тверда во исповедании веры Православныя явился еси пастве твоей, святителю Серафиме, ты бо, смиренномудрие стяжав, благодатных дарований от Бога сподобился еси и христоименитым людем путь в Небесныя обители указал еси, идеже ныне молишися о всех чтущих тя и зовущих таковая:
Радуйся, духом премудрости и разума озаренный;
радуйся, духом ведения и благочестия просвещенный.
Радуйся, древо, плодами благодатных дарований украшенное;
радуйся, звездо путеводная ищущим спасения.
Радуйся, сокровенных помышлений зрителю;
радуйся, страстей душевредных целителю.
Радуйся, источниче богомудрых писаний;
радуйся, проповедниче любве и покаяния.
Радуйся, Серафиме, Церкве Русския похвало и украшение.
Кондак 11
Пение Богу и Пречистей Его Матери непрестанно в сердце принося, священномучениче Серафиме, усердный совершитель Таин Божиих и Духа Святаго причастник явился еси. Егоже благодатию просвещаемь, семя слова Божия изобильно сеял еси и, верныя люди образом жития назидая, научал еси пети Богу песнь: Аллилуиа.
Икос 11
Светом любве Божественныя просвещен, соузники, во мраце темничнем страждущия, апостольски увещавал еси радоватися, глаголя: яко даровася нам не токмо еже во Христа веровати, но и по Нем страдати. Темже помози и нам вечныя радости достигнути, восхваляющих тя песньми таковыми:
Радуйся, священныя Литургии благоговейный совершителю;
радуйся, у Престола Божия теплый о нас предстателю.
Радуйся, словом и житием твоим Православие утвердивый;
радуйся, за Церковь Христову душу твою положивый.
Радуйся, чада твоя духовная в темницех утешивый;
радуйся, молитвами твоими их укрепивый.
Радуйся, светильниче, огнем Духа Святаго возженный;
радуйся, страдальче, Богом к лику новомучеников причтенный.
Радуйся, Серафиме, Церкве Русския похвало и украшение.
Кондак 12
Благодатию Божественною ограждаемь, священномучениче Серафиме, небоязненно во узах шествовал еси ко граду Омску, идеже уготова тебе Господь чашу горьких страданий до конца испити и мученическую смерть вкусити. Ты же, яко агнец незлобивый, любовь ко врагом являя, за вся Бога благодарил еси, взывая победную песнь: Аллилуиа.
Икос 12
Поюще и прославляюще подвиги новомучеников и исповедников Российских, ихже кровь Церковь Христову утверди, почитаем и тя, священномучениче Серафиме, яко единаго от собора их, славим долготерпение и ублажаем мученическую кончину твою, вопиюще сице:
Радуйся, даже до смерти Господу послуживый;
радуйся, путь мученический добре совершивый.
Радуйся, Царствия Божия и правды его проповедниче;
радуйся, веры истинныя и благочестия светильниче.
Радуйся, достойный Ангелов собеседниче;
радуйся, апостолом Христовым сопрестольниче.
Радуйся, новомучеников Российских красото и славо;
радуйся, отечества нашего освящение и благословение.
Радуйся, Серафиме, Церкве Русския похвало и украшение.
Кондак 13
О, преславный угодниче Божий, священномучениче Серафиме, скорый помощниче всем с верою к тебе прибегающим! Приими хвалебное пение сие и твоими святыми молитвами в Православии нас утверди, от бед и напастей избави, и научи творити волю Божию, да сподобимся в селениих небесных вкупе с тобою воспевати Христу ангельскую песнь: Аллилуиа.
Сей кондак глаголи трижды. Посем икос 1 и кондак 1.