Молитва святым равноапостольным Кириллу и Мефодию
О преславнии просветителие словенских язык, святии равноапостольнии Мефодие и Кирилле, ваших письмен и учений светом просветившеся и в вере Христовой наставльшеся, яко чада ко отцем, усердно ныне прибегаем и сокрушением сердечным молимся: аще и завет ваших не соблюдохом, о угождении бо Богу небрегохом и от братняго единомыслия в вере отпадохом, обаче якоже древле в земном житии вашем, сице и ныне грешных и недостойных не отвратите тщи, но, яко имуще велие ко Господу дерзновение, прилежно Того молите, да обратит нас в путь спасения, да умирит раздоры единоверных, да приведет к единомыслию отпавших и всех нас духом любве да соединит Единей Святей, Соборней и Апостольстей Церкви! Вемы бо, яко много может молитва праведных по благосердию Владыки. Не оставите убо нас, унылых и недостойных, чад ваших, ихже ради грехов паства ваша, враждою разделяема и соблазнами инославных прельщаема, умалися, овцы же словесныя, разрываемы, восхищаются волки губительными. Подаждьте убо нам молитвами вашими ревность Православия, яко да отеческая предания добре сохраним, каноны церковные верно соблюдем, всяких лжеучений странных отбежим и, тако в житии богоугодном преспевающе, жизни райския на Небеси сподобимся, идеже купно с вами прославим в Троице Единаго Бога во веки веков. Аминь.
Молитва святому преподобному Марону, пустыннику Сирийскому
О, возлюбленная и священная главо, преподобне и Богоносне отче наш Мароне! Назирай свыше милостивно нас грешных, и молися Всещедрому Владыце и всех благ Подателю Богу о соблюдении державы нашея, и да сохранит ее от всех врагов цело и неврежденно, во Господе нашем Иисусе Христе. Буди же молебник и о нас недостойных. Ко Всеблагому Господу честнеи твои руце простри, и от Него милость и щедроты испроси, имиже от всех бед и лютых болезней нас сохрани, и от всяких страстей свободи, такожде от нестерпимыя и неутишимыя огневицы и трясавицы молитвами твоими избави нас и от нападения бесов; от видимых и невидимых врагов соблюди, и согрешениям нашим прощение испроси, и спасены Христу нас представи, во еже в день страшнаго суда, с радостию предстати нам пред лицем неизреченныя славы Его, и милостивное призвание в Царство Небесное от Него услышати, и в неизреченной радости преславную Его лица доброту узрети, благодатию и человеколюбием Господа Бога и Спаса нашего Иисуса Христа: яко держава Его благословена и препрославлена, со Безначальным Его Отцем и с Пресвятым и Благим и Животворящим Его Духом, ныне и присно и во веки веков. Аминь.
