Акафисты - 08 марта 2025
Кондак 1
Избранному поборнику и великомученику Феодору Тирону, Святыя Троицы исповеднику, заступнику веры Христовой и язычества низложителю, благодарственно воспоем мы вернии в веселии радования, взывая ему от всея души: радуйся, великомучениче Феодоре Тироне.
Икос 1
Ангели с небес, придите с нами юнаго воина, Феодора Тирона в радости воспоем, ибо он Христа пламенно возлюбив, исповедал Его Господом и Богочеловеком. Сего ради воззовем ему тако:
Радуйся, яко тобою Бог прославлен,
Радуйся, яко тобою сатана посрамлен,
Радуйся, пламенный глашатаю Святыя Троицы,
Радуйся, бездушных идолов великий поборниче,
Радуйся, двух естеств во Христе проповедниче,
Радуйся, истолкователю несмешения их.
Радуйся, возвещающий Марию Девой,
Радуйся, Богородицей Ее (исповедующий) именующий.
Радуйся, испивший чашу Христову,
Радуйся, правыя веры исправление.
Радуйся, яко тобою ко Христу обратися множество.
Радуйся, победителю, увенчанный Христом.
Радуйся, великомучениче Феодоре Тироне.
Кондак 2
Взирая на мужество твоея души, Господь указует тебе богомудрому знамение поспешати к мученичеству: ты же, вся земная отвергши, Богу взывал: Аллилуиа.
Икос 2
В месте, идежде чудище пребывало, родился еси Феодоре, и подвигом твоим сразил еси его; жена же Евсевия обрадовашеся смерть его узрев, и в песнех взываше к тебе тако:
Радуйся, Христа моего грядущий мучениче,
Радуйся, моея родины славо,
Радуйся, дракона губительнаго победителю,
Радуйся, в мужестве неодоленный,
Радуйся, избранниче Христов в мире,
Радуйся, подвижниче ради славы Его.
Радуйся, Православной веры утверждение.
Радуйся, юных в благочестии наставление.
Радуйся, веры великое ограждение,
Радуйся, над безбожием великая победо,
Радуйся, благодати Божией сосуде,
Радуйся сокровищнице читыя добродетели.
Радуйся, великомучениче Феодоре Тироне.
Кондак 3
Гряди же Феодоре, взывал ненавистник Христа Вринка и принеси жертвы идолом якоже и мы; аще же не покоришися, мукам предам тя; ты же, преславне, вознес Богу хвалу: Аллилуиа.
Икос 3
Божественное пламя положил еси, великомучениче, на идольский жертвенник и опалил еси идолов, пламенем любви Божией пречудно движимый к подвигу, посему взываем к тебе тако:
Радуйся, юный воине Царя царей,
Радуйся, словом твоим покоривый Вринку.
Радуйся, подвигом Христа прославивший,
Радуйся, огнем истребивший идолов.
Радуйся, победивший силу пламени.
Радуйся, преславне мучеников красото,
Радуйся, великомучениече, ангелов радование.
Радуйся, сладчайший защитниче церкви.
Радуйся, православных неусыпный престателю.
Радуйся, Феодоре, от Бога нам посланный дар.
Радуйся, великомучениче Феодоре Тироне.
Кондак 4
Диавольское содружество Публия и Вринки посрамил еси мужеством твоим, великомучениче, и исповедуя Христа Сыном Божиим, осудил еси язычество, взывая Богу: Аллилуиа.
Икос 4
Ангели воспеша Христа Спасителя, в темнице посетившего тебя. Исполнив тя веселия небеснаго, Господь заповедал тебе: радуйся и не убойся, великомучениче, ибо со мною победиши и венца сподобишися. Сего ради и от нас услыши:
Радуйся, Христа Бога друже,
Радуйся, мужественный исповедниче.
Радуйся, хлебе сладкий Христа.
Радуйся, юных вразумление,
Радуйся, грешных исправление.
Радуйся, яко посетил тебя Христос во узех сущаго,
Радуйся, яко узрел еси небесный свет в темнице.
Радуйся, светлое явление разума.
Радуйся, премудрое обличение безумия.
Радуйся, яко на образ твой взирающе, в нашей вере утверждаемся,
Радуйся, яко твоим заступлением православие ограждается,
Радуйся, великомучениче Феодоре Тироне.
Кондак 5
Восхотев Христос преподати тебе, Феодоре, познание благодати, заповеда ти не приятии оскверненныя пищи, ибо благодать Божия обильно напитает тебя. Ты же воспел Богу: Аллилуиа.
Икос 5
Видя тя мукам преданнаго, Феодоре Тироне, нечестивый Публий исполнися ярости и удивися твоему долготерпению; дети же, славяще Бога, в веселии взываху:
Радуйся, Христа Бога мучениче,
Радуйся, страстем Его ревнителю,
Радуйся, темницу за Него приявший,
Радуйся, узами окованный ради Господа,
Радуйся, яко хлеб сладкий Троице принесеся.
Радуйся, в мужестве не принявший оскверненныя пищи.
Радуйся, плети нечестиваго Публия ради Бога потерпевший.
Радуйся, православных похвало.
Радуйся, от глада нас хлебом жизни снабдевающий,
Радуйся, усердно призывающим тя помогаяй.
Радуйся, заре, сияющая в нощи греховной блуждающим,
Радуйся, яко верою твоею сокрушаются языческие боги.
Радуйся, великомучениче Феодоре Тироне.
Кондак 6
Сокрушите пламенем насмешника над идолами, взывал тиран своим воинам, они же ввергоша тя в пещь огненную, преславне, да приимеши блаженную кончину поющее: Аллилуиа.
Икос 6
Дух Святый просвети твое сердце, великомучениче, и даде тебе показание подвига Клеоника. Он же укрепившись в исповединии твоем, взывал тако:
Радуйся, огня угасителю,
Радуйся, сподвижниче великих мучеников,
Радуйся, сообщниче святых Ангелов.
Радуйся, яко твоими подвигами прославился Христос.
Радуйся, в росу обративший силу пламени.
Радуйся, возвышающийся над общею смертию.
Радуйся, наследниче Царствия Христова.
Радуйся, в девстве сохранивший тело.
Радуйся, душу просветивший подвигами.
Радуйся, пламенный ревнителю православия.
Радуйся, защитниче его от еретических козней.
Радуйся, великомучениче Феодоре Тироне.
Кондак 7
Приял еси муки и ко Христу преставился еси богомудре; твоим предстательством и молением у Престола Всевышняго возжигаешь пламень любве к Богу верующих и воспевающих: Аллилуиа.
Икос 7
Ревнуя мироносиц подвигу, смиренная Евсевия мироносицей соделалась. Тии о мире пещась, купиша миро, она же, купив твои честные останки, пламенно взываше:
Радуйся, мучениче истины,
Радуйся,славо евхаитов,
Радуйся, нашей Церкви благолепие.
Радуйся, родителей твоих радование.
Радуйся, вселивыйся в небесных чертозех,
Радуйся, яко обитаеши ныне в небесном царствии.
Радуйся, яко разумно храм воздвигну тебе,
Радуйся, яко останки твои в него положу.
Радуйся, моего дома освящение,
Радуйся, души моея веселие.
Радуйся, звездо среди мучеников Христа,
Радуйся, наше прославление и любовь.
Радуйся, великомучениче Феодоре Тироне.
Кондак 8
Укрепивый всяческая Иисус Вседержитель возлюбил красоту души твоея и ты соблюл еси ее непорочной. Преславне, освятив потоком крови твоей, взывая Богу: Аллилуиа.
Икос 8
Принесл еси яко жертву все сердце и разум и тело Господу. Он же прослави тя на небеси и на земли, Феодоре, даровав Тебе силу чудес. Сего ради услыши от нас:
Радуйся, обогативыйся приятством Бога,
Радуйся, исполнивший землю чудесами,
Радуйся, высокое восприятие благочестия,
Радуйся, славящих тя величайший защитниче.
Радуйся, прошедший преславный путь жизни.
Радуйся, победивый со Христом лукаваго.
Радуйся, мужественно соблюдший веру,
Радуйся, неувядаемый венец правды,
Радуйся, исполненный неизреченной славы.
Радуйся, наш неусыпный предстателю,
Радуйся, ныне хвалящий Бога со ангелы.
Радуйся, собеседниче лика мучеников.
Радуйся, великомучениче Феодоре Тироне.
Кондак 9
Одержимый злобою диавольскою, отступник Богоборец Юлиан решение нечестивое приял: ко греху подвигнути вкушением оскверненныя пищи верующих, поющих песнь Богу: Аллилуиа.
Икос 9
Познав лукавство отступника, своим престательством, великомучениче Феодоре, Христовых чад от соблазна избавил еси. Презревый диавольский соблазн, услыши от нас:
Радуйся, православных избавление,
Радуйся, Столпе Христовой Церкве,
Радуйся, врагов Христа победителю,
Радуйся, безбожнаго отступника обличителю.
Радуйся, отгонителю греховных желаний,
Радуйся, посрамление нечестиваго царя.
Радуйся, содетелю преславных чудес,
Радуйся, обличителю лукавства царя.
Радуйся, исполненный божественных даров.
Радуйся, светлый сосуде Святаго Духа.
Радуйся, прославивший Христа в мире,
Радуйся, прославленный Им на небеси.
Радуйся, великомучениче Феодоре Тироне.
Кондак 10
Восхотев по велицей милости Своей чисты соблюсти от осквернения чада Своя, посла тя Спаситель, великомучениче Феодоре, ко святителю Царя града возвестити ему волю Свою, юже познав, он с тобою воспел: Аллилуиа.
Икос 10
Повеждь верным, о святителю, не прикасатися пищи на торжищи, яко осквернил ю велением своим нечестивый отступник. Сего ради возглашаем ти сице:
Радуйся, исполнителю неписаннаго закона,
Радуйся, вестник божественныя воли.
Радуйся, святительскаго града ограждение,
Радуйся, яко объявил ему божественную волю.
Радуйся, вестниче Христа Бога.
Радуйся, яко победил еси Юлиана безумие.
Радуйся, яко отвергл еси оскверненную пищу,
Радуйся, яко соблюл еси пост верных.
Радуйся, божественное радование мучеников,
Радуйся, нам Богом данный даре.
Радуйся, служителю Всевышняго.
Радуйся, великомучениче Феодоре Тироне.
Кондак 11
Восхвалил святитель Всевышняго, егда познал козни лукаваго отступника, вопрошая тебя, Феодоре: кто еси ты и како верных и бедных будеши питать, да поем Богу: Аллилуиа.
Икос 11
Та же ответсвовал святителю: О, Пастыре, уготовав коливо, преподай в снедь верным людем; имя же мученик Христов Феодор от Бога вам помощник посланный. Сего ради взываем сице:
Радуйся, великий наш попечителю,
Радуйся, Православия покровителю.
Радуйся, нечестия искоренителю,
Радуйся, Христианства опора и утверждение.
Радуйся, помощниче от бога нам посланный,
Радуйся, наставление нам давый о неоскверненной пище.
Радуйся, научивый нас потребляти коливо.
Радуйся, яко присно прославляется явления твоего чудо,
Радуйся, неусыпный Христов посланниче,
Радуйся, мучеников Христовых сожителю.
Радуйся, им же Христос воспевается,
Радуйся, им же верные возвышаются.
Радуйся, великомучениче Феодоре Тироне.
Кондак 12
Восхотев Господь явити благодать, юже дарова тебе, показа тя избавителя пленных, целителя немощных, спасителя плавающих, наставника согрешающих, изобличителя крадущих, да поем Богу: Аллилуиа.
Икос 12
Воспевая подвиги и чудеса твои, великомучениче Феодоре, поем тебе во смирении, ибо Господь, приявший страдания твои, вселися в душу твою, наставляя нас взываши тебе тако:
Радуйся, Феодоре, непорочно свою душу соблюдший,
Радуйся, освятивший ее страданиями твоими,
Радуйся, плененных избавителю и предстателю.
Радуйся, ран телесных врачу и болящих целителю.
Радуйся, спасателю в беде на море сущих.
Радуйся, свирель сладкозвучная.
Радуйся, отроческих молений исполнителю,
Радуйся, бедных верное богатство.
Радуйся, вселивыйся в небесныя обители,
Радуйся, немощных укрепление.
Радуйся, старцев утешение.
Радуйся, со ангелы воспевающий трисвятую песнь.
Радуйся, великомучениче Феодоре Тироне.
Кондак 13
О, Предивный великомучениче Феодоре Тироне, Богом данный даре воспевающим тя с любовию. Милостиво приими сие приножение, избави нас от всякия скорби и печали твоим предстательством и будущия изми муки, о тебе вопиющих Богу: Аллилуиа.
Сей кондак читай трижды, затем икос 1, кондак 1.
Молитва святому великомученику Феодору Тирону
О, Преславне, великомучениче Феодоре Тироне. Услыши моление нас верных, величающих тя и в смирении своем взывающих к тебе от всея души. От юности показавый пламенную веру во Христа Господа и ради нея жизнь свою положивый, подаждь и нам молящимся тебе душевныя силы, во еже блюсти во вся дни чистоту правыя веры. Запечатлевый мученичеством исповедание веры в пещи огненней, буди нам образом в ревности проповедывания Истины Христовой. Оградивый верных от греха язычества и отступничества, соблюди и нас чистыми от еретических козней и всякого диавольскаго навождения. О, Преблаженне, великомучениче Феодоре, своим предстательством у Престола Всевышняго умоли Господа Бога, да подаст нам благодатныя силы, во еже направити пути жизни нашея по Слову Божию во спасение душ наших. Яко да твоими молитвами получивше благодать и милость, прославим всех благих Источника и Дароподателя Бога, Единаго, в Троице Святей Славимаго, Отца и Сына и Святаго Духа, ныне и присно и во веки веков. Аминь.
Текст утвержден Священным Синодом
Русской Православной Церкви
20 апреля 2000 года
(журнал б/н)
Кондак 1
Избра́нная Ду́хом Бо́жиим от пеле́н младе́нческих, блаже́нная ста́рице Матро́но, слепоту́ и не́мощь теле́сную ко очище́нию духо́вному от Бо́га прия́вшая, да́ром прозре́ния и чуде́с обогати́лася еси́ и венце́м нетле́нным от Го́спода украси́лася еси́. Сего́ ра́ди и мы благода́рне вене́ц похва́льный прино́сим ти, вопию́ще:
Ра́дуйся, пра́ведная ма́ти Матро́но, те́плая о нас к Бо́гу моли́твеннице.
Икос 1
А́нгел во пло́ти яви́лася еси́ на земли́, Матро́но блаже́нная, исполня́ющи во́лю Бо́жию. А́ще рождество́ твое́ в слепоте́ теле́сней бысть, но Госпо́дь, умудря́яй слепцы́ и любя́й пра́ведныя, просвети́ духо́внии о́чи твои́, да послужи́ши лю́дем и дела́ Бо́жии явя́тся чрез тебе́. Мы же с любо́вию вопие́м ти такова́я:
Ра́дуйся, от младе́нчества Бо́гом избра́нная; ра́дуйся, благода́тию Ду́ха Свята́го от пеле́н осене́нная.
Ра́дуйся, да́ром чуде́с измла́да обогаще́нная; ра́дуйся, прему́дростию от Бо́га свы́ше испо́лненная.
Ра́дуйся, мы́сленныма очи́ма во́лю Бо́жию прозира́ющая; ра́дуйся слепо́тствующих умо́м мудрецо́в ве́ка сего́ посрамля́ющая.
Ра́дуйся, ду́ши заблу́ждшия к Бо́гу приводя́щая; ра́дуйся, ско́рби и печа́ли утоля́ющая.
Ра́дуйся, пра́ведная ма́ти Матро́но, те́плая о нас к Бо́гу моли́твеннице.
Кондак 2
Ви́дяще лю́дие и иере́й, егда́ креща́ше тя, блаже́нная, чу́дный столп о́блачный над главо́ю твое́ю и обоня́вше благоуха́ние ве́лие, дивля́хуся, что у́бо сия́ отрокови́ца бу́дет, пою́ще Бо́гу: Аллилу́иа.
Икос 2
Ра́зум име́я просвеще́нный, иере́й Бо́жий Васи́лий позна́, я́ко креща́емая от него́ сосу́д благода́ти Бо́жия есть, и тя, пра́ведная Матро́но, отрокови́цу свя́ту нарече́. От на́шего же усе́рдия прино́сим ти похвалы́ сия́:
Ра́дуйся, во святе́й купе́ли благода́тию Свята́го Ду́ха облагоуха́нная; ра́дуйся, на пе́рсех твои́х крест запечатле́нный име́вшая.
Ра́дуйся, моли́твеннице, от Бо́га лю́дем дарова́нная; ра́дуйся, свеще́ неугаси́мая, пред Го́сподем сия́ющая.
Ра́дуйся, да́ром чудотворе́ния от Бо́га просла́вленная на земли́; ра́дуйся, венце́м неувяда́емым от Го́спода увенча́нная на Небеси́.
Ра́дуйся, ми́лости Бо́жия гре́шным возвеща́ющая; ра́дуйся, от исто́чника воды́ живы́я жа́ждущия напая́ющая.
Ра́дуйся, пра́ведная ма́ти Матро́но, те́плая о нас к Бо́гу моли́твеннице.
Кондак 3
Си́лу Бо́жия благода́ти ощуща́ющи, еще́ во младе́нчестве су́щи, Матро́но блаже́нная, ко ико́нам святы́м устремля́лася еси́, и чи́стым се́рдцем и младе́нческими усты́ хвалу́ Бо́гу возглаша́ла еси́: Аллилу́иа.
Икос 3
Иму́щи от Бо́га дар прозре́ния изде́тска, блаже́нная ма́ти, сокрове́нная серде́ц приходя́щих к тебе́ ве́дущи, и о́ным бу́дущая, я́ко настоя́щая сказу́ющи, мно́гия лю́ди на путь благоче́стия направля́ла еси́. Те́мже прославля́юще Бо́га, умудря́ющаго слепцы́, вопие́м тебе́ си́це:
Ра́дуйся, ди́вная прови́дице; ра́дуйся, сокрове́нных грехо́в обличи́тельнице.
Ра́дуйся, помраче́нных душе́ю пресве́тлая наста́внице; ра́дуйся, заблу́ждших ми́лостивая путеводи́тельнице.
Ра́дуйся, звездо́, ве́рным путь указу́ющая; ра́дуйся, свеще́, во тьме ве́ка сего́ светя́щая.
Ра́дуйся, еди́ному Бо́гу послужи́вшая; ра́дуйся, ко́зни диа́вольския благода́тию Ду́ха Свята́го попра́вшая.
Ра́дуйся, пра́ведная ма́ти Матро́но, те́плая о нас к Бо́гу моли́твеннице.
Кондак 4
Бу́ря недоуме́ния и смяте́ния о чудесе́х твои́х в лю́дех разве́яся, ма́ти блаже́нная, и ти́и, вразуми́вшу их Го́споду, ди́вному во святы́х Свои́х, просла́виша и восхвали́ша тя, Бо́гу же с благодаре́нием воспе́ша: Аллилу́иа.
Икос 4
Слы́шавше лю́дие, ма́ти Матро́но, я́ко по́мощь в неду́зех душе́вных и теле́сных подае́ши, прихожда́ху к тебе́ со упова́нием, и, сове́т благоприя́тен и исцеле́ние получи́вше, благодаря́ще Бо́га, воспева́ху тебе́:
Ра́дуйся, я́ко боле́знующих и стра́ждущих душе́ю прие́млеши; ра́дуйся, я́ко мир душа́м скорбя́щим да́руеши.
Ра́дуйся, в заблужде́ниих су́щих вразуми́тельнице; ра́дуйся, благоче́стия учи́тельнице.
Ра́дуйся, печа́лей на́ших утоли́тельнице; ра́дуйся, в ско́рбех уте́шительнице.
Ра́дуйся, блага́я безсре́бренице; ра́дуйся, неду́гов вся́ческих безме́здная врачева́тельнице.
Ра́дуйся, пра́ведная ма́ти Матро́но, те́плая о нас к Бо́гу моли́твеннице.
Кондак 5
Боготе́чная звезда́ возсия́ла еси́, ма́ти блаже́нная Матро́но, во дни лихоле́тия во Оте́чествии на́шем, я́ко но́вая испове́дница, и́го Христо́во дерзнове́нно и безбоя́зненно чрез все житие́ пронесла́ еси́, и благода́тию Бо́жиею укрепля́ема, подава́ла еси́ недоумева́ющим вразумле́ние, стра́ждущим осла́бу, больны́м исцеле́ние, благода́рственно зову́щим Бо́гу: Аллилу́иа.
Икос 5
Ви́девше мно́зи Росси́йстии лю́дие чудеса́ и исцеле́ния, Бо́жиею благода́тию от тебе́ подава́емая: хромы́м — хожде́ние, разсла́бленным и на одре́ лежа́щим — исцеле́ние, бесну́ющимся — духо́в зло́бы отгна́ние, устреми́шася к тебе́, ма́ти, я́ко к исто́чнику неисчерпа́емому, от него́ же испи́вше оби́льно, умиле́нным се́рдцем возопи́ша тебе́ такова́я:
Ра́дуйся, на путь пра́вый от младе́нчества призва́нная; ра́дуйся, пра́веднице, от Бо́га нам дарова́нная.
Ра́дуйся, цели́тельнице, неду́ги на́ша исцеля́ющая; ра́дуйся, в ну́ждах на́ших ско́ро помога́ющая.
Ра́дуйся, душеполе́зными сове́ты нас вразумляющая; ра́дуйся, недоуме́ния на́ша ско́ро разреша́ющая.
Ра́дуйся, ду́хи нечи́стыя от челове́к отгоня́ющая; ра́дуйся, от вся́каго зла моли́твою твое́ю огражда́ющая.
Ра́дуйся, пра́ведная ма́ти Матро́но, те́плая о нас к Бо́гу моли́твеннице.
Кондак 6
Провозве́стник свя́тости и пра́ведности жития́ твоего́, блаже́нная ма́ти, яви́ся святы́й и пра́ведный оте́ц Иоа́нн Кроншта́дтский, егда́ узре́ тя во хра́ме и наименова́ тя свою́ прее́мницу та́же и осмы́й столп Росси́и. Вси же, слы́шавше сие́, просла́виша Го́спода, возглаша́юще Ему́ песнь: Аллилу́иа.
Икос 6
Возсия́ моли́твами твои́ми, ма́ти Матро́но, свет благода́ти Бо́жия в сердца́х, не ве́дущих Бо́га и грехми́ мно́гими прогневля́ющих Его́. Ти́и же, ви́дяще чудеса́, тобо́ю соверша́емая, обраща́хуся ко Го́споду, ублажа́юще тя си́це:
Ра́дуйся, по́двиги твои́ми Бо́га прославля́ющая; ра́дуйся, сла́ву Бо́жию нам явля́ющая.
Ра́дуйся, неве́рныя на путь пра́вый наставля́ющая; ра́дуйся, грехми́ оскверне́нныя моли́твами твои́ми очища́ющая.
Ра́дуйся, к покаянию нас призыва́ющая; ра́дуйся, за вся благодари́ти Го́спода нас вразумляющая.
Ра́дуйся, храм Бо́жий люби́ти нас науча́ющая; ра́дуйся, во огра́ду церко́вную расточе́нныя о́вцы собира́ющая.
Ра́дуйся, пра́ведная ма́ти Матро́но, те́плая о нас к Бо́гу моли́твеннице.
Кондак 7
Хотя́щи Пресвяту́ю Влады́чицу на́шу Богоро́дицу досто́йно ублажи́ти, ма́ти Матро́но, повеле́ла еси́ лю́дем написа́ти всечестны́й о́браз Ея́, «Взыска́ние поги́бших» имену́емый, и в хра́ме Бо́жием ве́си твоея́ водвори́ти, да вси взира́юще на све́тлый лик Пречи́стыя, со умиле́нием восхва́лят Ю, Го́споду же возопию́т: Аллилу́иа.
Икос 7
Но́вую тя засту́пницу, моли́твенницу и хода́таицу к Бо́гу дарова́ Госпо́дь в годи́ну тя́жкую лю́дем Росси́йским, мно́зи бо отпада́ху от Святы́я Це́ркве, ты же, ма́ти, малове́рныя и заблу́ждшия наставля́ла еси́ сло́вом и де́лом, явля́ющи ди́вная чудеса́ Бо́жия. Те́мже воспева́ем ти си́це:
Ра́дуйся, страны́ на́шея Росси́йския неусы́пная печа́льнице; ра́дуйся, спасе́ния на́шего хода́таице.
Ра́дуйся, Бо́га, Судии́ праведнаго, умилостиви́тельнице; ра́дуйся, неду́жных и оби́димых покрови́тельнице.
Ра́дуйся, немощны́х и безнаде́жных помо́щнице; ра́дуйся, проти́ву духо́в зло́бы непреста́нная вои́тельнице.
Ра́дуйся, я́ко трепе́щут тя кня́зи бесо́встии; ра́дуйся, я́ко ра́дуются о тебе́ а́нгелы и челове́цы.
Ра́дуйся, пра́ведная ма́ти Матро́но, те́плая о нас к Бо́гу моли́твеннице.
Кондак 8
Стра́нно малове́рным и неразу́мным бысть, ка́ко слепорожде́нная ви́дети и ве́дети мо́жет не то́чию настоя́щая, но и бу́дущая, не ве́дяху бо си́лы Бо́жия в не́мощи челове́честей соверша́емыя. Мы же, блаже́нная ма́ти, прему́дрость Бо́жию, в тебе́ явле́нную зря́ще, вопие́м Бо́гу: Аллилу́иа.
Икос 8
Вся́ческия досажде́ния и оби́ды, изгна́ния и укоре́ния претерпе́ла еси́, блаже́нная ма́ти, не се́тующи о сем, но за вся благодаря́щи Бо́га. Сим же и нас науча́еши терпели́вно нести́ крест свой, тебе́ же благохвали́ти та́ко:
Ра́дуйся, в моли́тве непреста́нно пребыва́вшая; ра́дуйся, духо́в зло́бы посто́м и моли́твою отгна́вшая.
Ра́дуйся, мир благода́тный стяжа́вшая; ра́дуйся, любо́вию твое́ю мно́гия о́крест тебе́ спаса́вшая.
Ра́дуйся, житие́м твои́м изря́дно лю́дем послужи́вшая: ра́дуйся, и по кончи́не твое́й лю́дем непреста́нно помога́ющая.
Ра́дуйся, и ны́не на́шим проше́нием те́пле внима́ющая; ра́дуйся, упова́ющих на по́мощь твою́ не оставля́ющая.
Ра́дуйся, пра́ведная ма́ти Матро́но, те́плая о нас к Бо́гу моли́твеннице.
Кондак 9
Вся́кия ско́рби и боле́зни а́ще и претерпе́ла еси́, ма́ти Матро́но, непреста́нно веду́щи брань с си́лами тьмы, облича́ющи ко́зни и кова́рства их, и изгоня́ющи бе́сы от одержи́мых, оба́че до кончи́ны дний твои́х помога́ла еси́ стра́ждущим, неду́гующим и скорбя́щим, при́сно пою́щи Бо́гу: Аллилу́иа.
Икос 9
Вити́и многовеща́ннии не возмо́гут досто́йно просла́вити свято́е житие́ твое́ и чудеса́, си́лою Бо́жиею тобо́ю твори́мая, преди́вная ста́рице. Мы же, хотя́ще псало́мски хвали́ти Бо́га во святы́х Его́ и подвиза́емии серде́чною любо́вию, дерза́ем пе́ти тебе́ такова́я:
Ра́дуйся, у́зкий путь и те́сная врата́ избра́вшая; ра́дуйся, доброде́тельми мно́гими просия́вшая.
Ра́дуйся, вся тле́нная в житии твое́м отве́ргшая; ра́дуйся, смире́нием, я́ко венце́м драги́м, украше́нная.
Ра́дуйся, ева́нгельски, я́ко пти́ца небе́сная, на земли́ пожи́вшая; ра́дуйся, Сы́ну Бо́жию, не име́вшему, где главу́ подклони́ти, после́довавшая.
Ра́дуйся, ны́не во оби́телех ра́йских веселя́щаяся; ра́дуйся, и нас, гре́шных, моля́щихся тебе́, ми́лостию твое́ю не оставля́ющая.
Ра́дуйся, пра́ведная ма́ти Матро́но, те́плая о нас к Бо́гу моли́твеннице.
Кондак 10
Спасти́ хотя́щи мно́гия лю́ди от страда́ний теле́сных и душе́вных неду́г, всено́щно пребыва́ла еси́, пра́веднице Бо́жия, в моли́тве, прося́щи им по́мощи и укрепле́ния от Го́спода на́шего Иису́са Христа́, пою́щи Ему́: Аллилу́иа.
Икос 10
Стена́ и покро́в была́ еси́ во дни жития́ твоего́, блаже́нная ма́ти, всем к тебе́ прибега́ющим, и по сме́рти не престае́ши хода́тайствовати пред Бо́гом о лю́дех, с ве́рою притека́ющих ко гро́бу твоему́. Те́мже у́бо, услы́ши ны́не и нас, гре́шных, скорбьми́, боле́зньми и мно́гими печа́льми одержи́мых и потщи́ся на по́мощь твои́ми моли́твами, всем, к тебе́ вопию́щим:
Ра́дуйся, оби́димых ско́рая предста́тельнице; ра́дуйся, терпя́щих лише́ния уте́шительнице.
Ра́дуйся, честна́го супру́жества охране́ние; ра́дуйся, всех, во вражде́ су́щих, умире́ние.
Ра́дуйся, непра́во на суд влеко́мых защи́тительнице; ра́дуйся, и о вино́вных пред судо́м земны́м к Бо́гу ми́лостивая хода́таице.
Ра́дуйся, лиши́вшихся кро́ва приста́нище; ра́дуйся, о всех к тебе́ взыва́ющих, засту́пнице.
Ра́дуйся, пра́ведная ма́ти Матро́но, те́плая о нас к Бо́гу моли́твеннице.
Кондак 11
Пе́ние а́нгельское слы́шала еси́, ма́ти честна́я Матро́но, еще́ на земли́ живу́щи. Научи́ и нас, недосто́йных, ка́ко подоба́ет сла́вити Бо́га, в Тро́ице почита́емаго, Отца́ и Сы́на и Свята́го Ду́ха, Ему́же непреста́нно во́инства небе́сная велегла́сно воспева́ют: Аллилу́иа.
Икос 11
Светоза́рным све́том сия́ет житие́ твое́, блаже́нная Матро́но, освеща́я мрак многосу́етнаго ми́ра сего́, и влече́т к себе́ ду́ши на́ша, я́ко да и мы луче́ю благода́ти Бо́жия озари́мся и ско́рбный путь привре́менныя жи́зни богоуго́дно про́йдем и Ца́рствия Бо́жия дости́гнем, иде́же ты, ма́ти, ны́не всели́лася еси́, слы́шащи глас наш, тебе́ зову́щих:
Ра́дуйся, свеще́ Бо́жия, при́сно горя́щая; ра́дуйся, би́сере честны́й, блиста́нием святы́ни Твоея́ нас озаря́ющий.
Ра́дуйся, цве́те благово́нный, Ду́хом Святы́м нас облагоуха́ющий; ра́дуйся, ка́меню ве́ры, малоду́шныя в благоче́стии утвержда́ющий.
Ра́дуйся, звездо́ пресве́тлая, пра́вый путь нам указу́ющая; ра́дуйся, до́брая вои́тельнице Христо́ва, мече́м моли́твы де́монския полки́ устраша́ющая.
Ра́дуйся, я́ко все житие́ твое́ свя́то и непоро́чно; ра́дуйся, я́ко и смерть твоя́ пред Го́сподем че́стна.
Ра́дуйся, пра́ведная ма́ти Матро́но, те́плая о нас к Бо́гу моли́твеннице.
Кондак 12
Благода́ть Бо́жию оби́льно еще́ от пеле́н восприя́ла еси́, ма́ти блаже́нная, я́же вы́ну пребы́сть с тобо́ю по вся дни жи́зни. Ве́руем несумне́нно, я́ко и по успе́нии твое́м благода́ть сия́ пребога́тно пребыва́ет с тобо́ю. Сего́ ра́ди припа́дающе мо́лимся: не лиши́ и нас, еще́ стра́нствующих на земли́, по́мощи твоея́ и заступле́ния, прося́щи Го́спода поми́ловати всех, пою́щих Ему́: Аллилу́иа.
Икос 12
Пою́ще мно́гая и ди́вная твоя́ чудеса́, ма́ти Матро́но, восхваля́ем Бо́га, дарова́вшаго гра́ду Москве́ и Оте́честву на́шему во дни безбо́жия и гоне́ния тя, непоколеби́мый столп благоче́стия и ве́ры. Ны́не же, блаже́нная ма́ти, благода́рным се́рдцем воспева́ем тебе́ си́це:
Ра́дуйся, мир Христо́в в душе́ твое́й стяжа́вшая; ра́дуйся, сего́ ра́ди мно́гия лю́ди о́крест тебе́ к Бо́гу приве́дшая.
Ра́дуйся, в немощно́м те́ле су́щи, си́лу Бо́жия благода́ти показа́вшая; ра́дуйся, во обрете́нии честны́х моще́й твои́х Бо́жию ми́лость нам яви́вшая.
Ра́дуйся, со́нма святы́х Моско́вских изря́дное процвете́ние; ра́дуйся, гра́да Москвы́ пресла́вное украше́ние.
Ра́дуйся, Оте́чества на́шего при́сная пред Бо́гом печа́льнице; ра́дуйся, к покаянию и моли́тве о земли́ Росси́йстей всех призыва́ющая.
Ра́дуйся, пра́ведная ма́ти Матро́но, те́плая о нас к Бо́гу моли́твеннице.
Кондак 13
О блаже́нная ма́ти, услы́ши ны́не воспева́емое тебе́ хвале́бное пе́ние и испроси́ нам у Го́спода Иису́са Христа́ грехо́в оставле́ние, христиа́нския ми́рныя кончи́ны и до́браго отве́та на Стра́шнем Суди́щи Его́, да и мы с тобо́ю сподо́бимся в селе́ниих ра́йских сла́вити Святу́ю Тро́ицу, вопию́ще: Аллилу́иа.
Этот кондак читается трижды, зате́м икос 1-й «А́нгел во пло́ти…» и кондак 1-й «Избра́нная Ду́хом Бо́жиим…».
Моли́тва
О блаже́нная ма́ти Матро́но, душе́ю на Небеси́ пред Престо́лом Бо́жиим предстоя́щи, те́лом же на земли́ почива́ющи, и да́нною ти свы́ше благода́тию разли́чные чудеса́ источа́ющи, при́зри ны́не ми́лостивным твои́м о́ком на ны, гре́шныя, в ско́рбех, боле́знех и грехо́вных искуше́ниих дни своя́ иждива́ющия, уте́ши ны, отча́янныя, исцели́ неду́ги на́ши лю́тыя, от Бо́га нам по грехо́м на́шим попуща́емыя, изба́ви нас от мно́гих бед и обстоя́ний, умоли́ Го́спода на́шего Иису́са Христа́ прости́ти нам вся на́ша согреше́ния, беззако́ния и грехопаде́ния, и́миже мы от ю́ности на́шея да́же до настоя́щаго дне и ча́са согреши́хом, да твои́ми моли́твами получи́вше благода́ть и ве́лию ми́лость, просла́вим в Тро́ице Еди́наго Бо́га, Отца́ и Сы́на, и Свята́го Ду́ха, ны́не и при́сно и во ве́ки веко́в. Ами́нь.