Тропарь Иоанну Предтече (Усекновение главы)
Память праведнаго с похвалами,/ тебе же довлеет свидетельство Господне, Предтече:/ показал бо ся еси воистинну и пророков честнейший,/ яко и в струях крестити сподобился еси Проповеданнаго./ Темже за истину пострадав, радуяся,/ благовестил еси и сущим во аде Бога, явльшагося плотию,/ вземлющаго грех мира// и подающаго нам велию милость.
Кондак Предтечи
Предтечево славное усекновение/ смотрение бысть некое Божественное,/ да и сущим во аде Спасово проповесть пришествие./ Да рыдает убо Иродия,/ беззаконное убийство испросивши:/ не закон бо Божий, ни живый век возлюби,// но притворный, привременный.
Тропарь Иоанну Предтече (Первое и второе обретение главы)
От земли возсиявши, Предтечева глава/ лучи испущает нетления верным исцелений,/ свыше собирает множество Ангел,/ доле же созывает человеческий род// единогласную возсылати славу Христу Богу.
Тропарь Иоанну Предтече (Третье обретение главы)
Яко Божественное сокровище, сокровенное в земли,/ Христос откры главу твою нам, пророче и Предтече./ Вси убо, сошедшеся в сея обретение,/ песньми богоглаголивыми Спаса воспоим,// спасающа нас от тления молитвами твоими.
Тропарь Иоанну Предтече (Зачатие)
Первее нераждающая неплоды, возвеселися,/ се бо зачала еси Солнца светильника яве,/ просвещати имуща всю вселенную, слепотою недугующую./ Ликуй, Захарие, вопия со дерзновением:// пророк Вышняго есть хотяй родитися.
Тропарь Иоанну Предтече (Перенесение из Мальты в Гатчину десной руки Иоанна Крестителя)
От запада возсиявши Предтечева рука,/ лучи испущает нетления верным исцелений,/ свыше собирает множество Ангел,/ доле же созывает человеческий род,// единогласно возсылати славу Христу Богу.
Тропарь Иоанну Предтече (Рождество)
Пророче и Предтече пришествия Христова, / достойно восхвалити тя недоумеем мы, любовию чтущии тя: / неплодство бо рождшия и отчее безгласие разрешися / славным и честным твоим рождеством,// и воплощение Сына Божия мирови проповедуется.
Кондак Предтечи
Плотскаго Твоего пришествия убоявся,/ Иордан страхом возвращашеся;/ пророческое же служение исполняя,/ Иоанн трепетом спряташеся;/ Ангельския чини ужасахуся,/ зряще Тя, во струях плотию крещаема;/ и вси, сущии во тьме, озаряхуся,// воспевающе Тя, явльшагося и просветившаго вся.
Кондак Предтечи
Пророче Божий и Предтече благодати,/ главу твою, яко шипок священнейший, от земли обретше,/ исцеления всегда приемлем,/ ибо паки, якоже прежде,// в мире проповедуеши покаяние.
Кондак Предтечи
Светоявленный и Божественный в мире столп,/ солнца светильник,/ Предтеча, главу светоносную и Божественную свою/ показавый в концех,/ освящает той верно покланяющихся/ и взывающих:// Христов премудрый Крестителю, спаси всех нас.
Кондак Предтечи
Веселится светло Захария великий/ со всеславною Елисаветию сопружницею,/ достойно зачинающе Иоанна Предтечу,/ егоже Архангел благовести, радуяся,/ и человецы достодолжно почтим,// яко таинника благодати.
Кондак на перенесение десной руки Иоанна Предтечи
Умнаго Солнца светильник Божественный Предтеча,/ показавый в концех светоносную свою десницу,/ ныне на севере озаряет ею блаженное Отечество наше,/ просвещая и освящая верно покланяющихся, и Христу вопиющих:/ спаси нас молитвами пророка Твоего, Царю Вышний.
Величание
Величаем тя,/ Крестителю Спасов Иоанне,/ и почитаем вси/ честныя твоея главы// усекновение.
Тропарь преподобному Еразму Печерскому, в Ближних пещерах
Благолепие дому Господня любя,/ расточил еси нещадно имение твое во украшение того,/ преподобне Еразме,/ тем ныне живя в дому Господни на Небеси,/ моли и нам освятитися в жилище Господне.
Кондак преподобному Еразму Печерскому, в Ближних пещерах
Украсивый церковь Богоматере/ расточением имения ти на сие иконами, Еразме славне,/ себе же о том нераскаянием;/ подаждь и нам расточением грехов своих/ и покаяния лепотою украсившимся/ церковию светлою Духови Святому явитися.
Величание Иоанну Предтече на обретение главы
Велича́ем тя,/ Крести́телю Спа́сов Иоа́нне,/ и почита́ем вси/ честны́я твоея́ главы́// обре́тение.
