Акафисты - 16 марта 2025
Кондак 1
Избраннии и Духа Святаго исполненнии, преподобнии и богоноснии отцы наши, Антоние и Феодосие Печерстии, преизящная Российския земли прозябения. пречудная российскаго народа украшения, хотящу мне, недостойному, похвальное вам совершити пение, смиренно вас молю: потемненный мой разум светом данныя вам от Бога благодати озарите, мрак неведения просветите, неудобства и препоны разрушите, мою немощь укрепите, нас же всех, сынов российских, от всех бед и напастей, скорбей и болезней отечески свободите, да в теплоте сердца из глубины души вси купно вопием вам:
Радуйтеся, Антоние и Феодосие, монашескаго в России жития первоначальницы.
Икос 1
Ангелом подобнаго желающе жития, абие в юности своей вся красная мира разсудне пренебрегосте, и аки сметие от себе отвергше, детскими попрасте ногами, вас же всецелых, в дар Христу Богу и приношение освятисте, тем таковое ваше святое и богоприятное разсуждающе произволение, сицевое вам приносим пение:
Радуйтеся, отцы богоноснии, вся земная, благая и красная мира презревшии; радуйтеся, Христа от юности всем сердцем и всею душою возлюбившии.
Радуйтеся, дом, имения и вся родителей стяжания ни во чтоже вменившии; радуйтеся, благое и сладкое иго Христово на рамена, в детстве еще суще, вземшии.
Радуйтеся, яко уподобистеся праведнаго Авеля богоприятному приношению; радуйтеся, яко подражателие бысте боголюбиваго Ноя в благодарном его по изшествии из ковчега жертвоприношении.
Радуйтеся, ваша телеса, вместо тучных агнцев и тельцов, Создателю своему принесшии; радуйтеся, души ваша, вместо благовоннаго фимиама, Христу Спасителю вознесшии.
Радуйтеся, сердца ваша во всегдашнее Богу и Божией Матери служение добре уготовавшии и всецело предавшии; радуйтеся, все ваше житие, подобне Самуилу, на служении Божии даже до последняго издыхания красно и богоугодно препроведшии.
Радуйтеся, многое множество мужей и жен, юношей и дев вашему подражати житию научившии; радуйтеся, благий и легкий ярем Христов многим усладившии.
Радуйтеся, Антоние и Феодосие, монашескаго в России жития первоначальницы.
Кондак 2
Видя всевидящее око Отца Светов таковое ваше Богу вельми благоугодное начинание и душеспасительное намерение, аще и не абие вас купно жительствовати устрои, обаче не в долгом времени сице вас соедини и совокупи, якоже соедини и совокупи Павла Петру, да един ярем понесше, многих в Небесная введете обители: чесому мы удивляющеся, благодарственно Богу, тако устроившему, поем: Аллилуиа.
Икос 2
Разум богоприятен, Антоние всехвальне, тебе же самому и прочим душеполезен стяжати усердствуя, сего днем и ношию от всемилостиваго Бога с теплыми слезами прилежно просил еси, пророчески вещая: скажи ми, Господи, путь, воньже пойду. Темже человеколюбивый Бог, вняв твоему слезному молению, вложи в твое сердце, да не медля в Афонскую гору идеши, ты же, аки вторый Авраам, ялся еси пути с велиим тщанием, Божие исполняя веление, чесо ради вопием тебе таковая:
Радуйся, отче Антоние, древнему уподобивыйся Аврааму, по слову Божию, доброхотно и послушно, без скорби и сетования от сродник и южик своих удаляющемуся; радуйся, в далечайшую неведомую страну, обретения ради монашескаго жития, от своих си нескорбно удаливыйся.
Радуйся, долгий, трудный и прискорбный путь скоротечно без смущения прешедый; радуйся, ангела Божия в том пути спутника, якоже иногда Товиа, имевый.
Радуйся, Афонския горы, по твоему желанию, Божию же изволению, благополучно достигнувый; радуйся, многая тамо духовная благая и душеполезная сокровища стяжавый.
Радуйся, многих тамо своим любомудрым житием в посте и молитве, неустаннем труде и бдении, и безответнем, Господа ради, послушании удививый; радуйся, в иноческих трудех и подвизех великим старцем Святыя горы тебе сравнивый.
Радуйся, Антоние, аки Богомудрая пчела, от труждающихся тамо отец, аки от различных цветов, сладость иноческую собравый; радуйся, туюжде сладость во Отечество сохранно принесый, и зде благоуспешно насадивый и возрастивый сторицею.
Радуйся, яко в монашество тоюжде сладостию многих, с нимиже и Феодосиа Великаго в слове и деле привлекл еси; радуйся, яко собранную братию твою духовною сладостию изобильно насытил и в добродетелех укрепил еси.
Радуйтеся, Антоние и Феодосие, монашескаго в России жития первоначальницы.
Кондак 3
Сила Вышняго в чистоте твое и непорочное всельшися сердце, преблаженне Феодосие, тако всего тебе Божиею любовию разжже, яко всех земных и временных удалятися, вечных же и нескончаемых выну искати тебе научи и вразуми, тем таковое твое о спасении души зряще тщание и усердие, умильно Всесильному Богу поем: Аллилуиа.
Икос 3
Имел еси, отче преблаженне Феодосие, превеликое желание, еже святая в Иерусалиме посетити места, и к сему делу желаемую обрел еси удобность, ко грядущим в Иерусалим приобщився, но злобный враг спону тебе и препятие содела, наусти бо матерь твою, яже вслед тебе гнавши, и достигши, аки злодея связана, в дом привлекши, по многом биении, твердо в храмине заключи, ты же, аки адамант, сия злострадания терпеливо понесл еси, посем от заключения испущен, паки на хлебопечение церковному литургисанию приличное вдался еси, чесому удивляющеся, сице тебе вопием:
Радуйся, отче Феодосие, непоколебимый и нерушимый терпения столпе; радуйся, пречудный и прекрасный смирения и кротости образе.
Радуйся, тяжкая матерняя биения и ногами попирания благодушно и мужественно терпевый; радуйся, тояжде ласкания и лобзания аки смертоносный вред себе вменивый.
Радуйся, служение Богу и Божией Матери паче всего вседушно возлюбивый; радуйся, церковному служению со всяким усердием от детства прилежавый.
Радуйся, сверстников поругания и посмеяния в честь себе вменивый; радуйся, всем старым и юным образ смирения и кротости тебе представивый.
Радуйся, всем обидяшим тебе вседушно погрешения простивый; радуйся, всеми добродетельными человеки паче сверстник твоих хвалимый, любимый и почитаемый.
Радуйся, добронравием и благочестием краснее, неже светлыми ризами, тебе украсивый; радуйся, матерняя и властительская одеяния, яко скверное блато, вменивый.
Радуйтеся, Антоние и Феодосие, монашескаго в России жития первоначальницы.
Кондак 4
От богомерзких сластей и волнений непреодоленен явился еси, преподобне отче наш Феодосие: ибо твое, еже непрестанно работати Господеви всегда имущи в уме и в сердце произволение, на кийждо день на большия простирался еси труды, и на кийждо день приятнейшим и любезнейшим Богу быти усердствовал еси, всякое же мира сладострастие и любочестие побеждая, Единому Богу выну воспевал еси: Аллилуиа.
Икос 4
Слышав, преблаженне отче Феодосие, жестокое святаго Антония и острое в пещернем затворе житие, скоротечно, аки елень на источники водныя, к нему тай от матере твоея текл еси, идеже доспев прилежно его молил еси, да тя в свое сожительство приимет и в число иночествующих впишет, он же, провидев в тебе живущую благодать Божию, неотлагательно повеле на тя иноческий возложити образ, ты же за то благодаривши Бога благодетеля, обоеручно иноческаго явился еси жития, и со Антонием купно непрестанно труждался еси, о чесом мы помышляюще, тако взываем к вам:
Радуйтеся, Антоние и Феодосие, иноческаго жития основатели; радуйтеся, первейшии новоначальных иноков в России наставницы.
Радуйтеся, в монашеское отишие, аки в некий корабль безопасный, к вам приходящих вводители; радуйтеся, предобрии в пучине мира сего влающихся управители.
Радуйтеся, мирския бури, волнения и мятежи в тишину мудре прелагающии; радуйтеся, всех любезно в доброе и спасительное пристанище наставляющии.
Радуйтеся, свирепеющия врагов шатания мудре усмиряющии; радуйтеся, от всех неприязненных обуреваний к вам притекающих удобно спасающии.
Радуйтеся, всех под ваш покров и защищение отечески приемлющии; радуйтеся, всех без лицеприятия от всех напастей и бед защищающии.
Радуйтеся, бедствующим всегда и во всем, и на коемждо месте добре предстательствующии; радуйтеся, за обидимых, озлобляемых и уничижаемых присноходатайствующии.
Радуйтеся, Антоние и Феодосие, монашескаго в России жития первоначальницы.
Кондак 5
Богоявленныя звезды, ихже на тверди Российстей яви Солнце Премирное, лучами высокия вашея святыни многих просвещающия, многих на путь боговедения наставляющия, многих к иночествованию приводящия, многих же в добродетелех, остром же и прискорбном житии утверждающия и укрепляющия, сие Божие изволение в вас добре исполнившееся зряще, поем благодарно всемилостивому Богу: Аллилуиа.
Икос 5
Видевше мнози богоугодное ваше в пещерах, аки во гробех, заключенное житие, умиляхуся душами, сердцы же сокрушающеся, спешно к вам, спасения ищуще, притекаху, смиренно просяще, да и их таковаго жития общниками соделавше, во всегдашнее Богу служение освятите: вы же помняще Рекшего: Грядущаго ко Мне не иждену вон, всех приходящих любезно приимасте, и отечески поучасте; темже сицевым вас венчаем песнопением:
Радуйтеся, преблаженнии отцы, многих от работнаго ига мирскаго в сладкую духа свободу изведшии: радуйтеся, многих истинно Христу работати и искренно Ему служити научившии.
Радуйтеся, вашими добродетельми многим ко спасению, якоже иногда Моисей в землю обетованную, путь открывшии; радуйтеся, многих не уже в землю обетованную, но в самая Небесная жилища введшии.
Радуйтеся, не словом точию, но множае паче делом и усердною к Богу молитвою своих учеников и последователей поучающии; радуйтеся, ваша купножители монашескими правилы красно и боголепно управляющии.
Радуйтеся, различными искушениями и напастьми отягченным скоро пособствующии; радуйтеся, от супостат боримым и тяжко насильствуемым всегда помоществующии.
Радуйтеся, одолеваемых от сопротивных, но не отчаивающихся и богонадежно в молитве вас призывающих, внезапным вашим пособием подкрепляющии; радуйтеся, всякое враждебное устремление сильно воспящающии.
Радуйтеся, собранное вами духовное стадо бодренным оком выну назирающии; радуйтеся, ваших учеников и наследников непрестанно на путь Божиих заповедей наставляющии.
Радуйтеся, Антоние и Феодосие, монашескаго в России жития первоначальницы.
Кондак 6
Проповедуемо и везде попремногу похваляемо бе ваше, преподобнии отцы, богоугодное и безмолвное житие, кто бо точию нестяжательное и в пещерных затворех продолжаемое сие видев или слышав, Ангелов вас паче, нежели человеков быти не мняше; терпению же вашему и различному тела умерщвлению кийждо удивляяся, Богу приличное воздая благодарение, купно с вами пояше песнь: Аллилуиа.
Икос 6
Возсиясте на круге Российския церковныя области, преблаженнии, аще бо и самих себе в темных пещерах, аки под спудом, заключисте, обаче лучами ваших подвигов и добродетелей, такожде вся окрестныя страны озаристе и просветисте, якоже чувственное солнце мир озаряет и просвещает, и тако многих сердца к богоугодному житию возбудисте и согреясте, и удобна к добродеянию сотвористе, яко и солнце, согревая землю, удобну творит ю к прозябению различных древ, и плодов, и былий сельных, и всякаго злака на службу человеком и скотом. О сем благодаряще Бога, сицевое вам приносим пение:
Радуйтеся, просветители в омрачении страстей пребывающих; радуйся, вразумители в суете и самозабвении жительствующих.
Радуйтеся, руководители в недоумении и заблуждении сущих; радуйтеся, управители добре житие начинающих.
Радуйтеся, укрепители в благом изнемогающих и малодушием и унынием колеблемых; радуйтеся, возбудители в небрежении спящих.
Радуйтеся, бодрости и трезвения предобрии учители; радуйтеся, нерадения и праздности известнии прогонители.
Радуйтеся, трудолюбия, еже всякому благу начало и утверждение, теплейшии рачители; радуйтеся, чистаго и непорочнаго жития неусыпающии хранители.
Радуйтеся, всех ко спасению изящнии и вернии путеводители; радуйтеся, всех благочестно и богоугодно жити хотящих мудрии наставницы.
Радуйтеся, Антоние и Феодосие, монашескаго в России жития первоначальницы.
Кондак 7
Хотя всезлобный враг доброму вашему начинанию спону и препятие сотворити, тако князя противу вас гневом разжже и яростию распали за пострижение в иночество слуг его, паче прочих любимых, некоего евнуха и сына болярска, яко нужда вам бе своя пещерная оставити жилища и инуде преселитися: обаче не долго сим своим ухищрением враждебник веселяшеся, ибо благодушный князь, вразумлен сый своею богобоящеюся супружницею, вскоре познав ваше незлобие и вражию разсмотрев хитрость и коварство, с молением посла к вам, да на свое паки возвратитеся прежнее местопребывание, о чесом возрадовавшеся, благодарно воспесте Богу: Аллилуиа.
Икос 7
Новый труд и новый подвиг по возвращении в пещерная ваша жилища воспряли есте, отцы преподобнии: на разширение бо монашеских келий и на устроение молитвеннаго храма неленостно устремистеся, да злокозненнаго врага гордыню поперете и его безстудное безумие посрамите, собранную же братию к богоугодному и добродетельному житию вящше возбудите и на усерднейшее Христу Богу служение подвигнете, на что мы, умныма взирающе очима, сице взываем к вам:
Радуйтеся, пещернаго иноческаго пребывания трудолюбнии обретатели и ревнители; радуйтеся, теплии монашескаго жития и преславнии защитницы.
Радуйтеся, обителей ваших бодрии и неусыпающии хранители; радуйтеся, княжескаго гнева и ярости смиреннейшии укротители.
Радуйтеся, врагов и неприятелей ваших истиннии и нелицемернии любители; радуйтеся, обиды вам творящих и напасти деющих праведнии рачители.
Радуйтеся, заповедей и советов Божиих усерднейшии исполнители; радуйтеся, к чистому и непорочному житию предводители благопоспешнии.
Радуйтеся, добронравия и благоговения учители преизящнии; радуйтеся, подвизающихся в благочестии и труждающихся в благотворении всесильнии силою Христовою помощницы.
Радуйтеся, в иноческих трудех неутружденнии подвижницы; радуйтеся, собранному вами стаду непреоборимии во всем поборницы.
Радуйтеся, Антоние и Феодосие, монашескаго в России жития первоначальницы.
Кондак 8
Странное ваше и вельми скорбное житие не токмо человеков на земли, но и ангелов на Небеси удиви: вы бо, заключившися в пещерах, аки в темных гробех, всеусердно в теплоте сердца и души Единому Богу работасте, да та, яже во дни и в нощи Создателю вашему приносимая служения, неведома и незнаема будут мирови, ведома же и знаема Самому Творцу явятся. Сего ради мы Богу, тако вас научившему и вразумившему, присно поем: Аллилуиа.
Икос 8
Все ваше, преблаженнии и богоноснии отцы, тщание и все о том бяше попечение, да выну всезлобному рода христианскаго врагу сопротивляетеся и гордую его главу попираете и стираете, общаго же всем Творца, купно со ученики своими в душах и телесех ваших прославите и в сем благом изволении вашем и богоугодном подвиге укрепляемии силою свыше, толико преуспесте, яко вся возмогосте о укрепляющем вас Христе Иисусе. Темже и слава Божия возсия из пещер ваших и озари вся концы земли, чесо ради таковое вам похвальное воздаем пение:
Радуйтеся, неутомимии хвалы и чести Божия в мире ревнители и проповедницы; радуйтеся, высокоумные вражия гордыни крепцыи смирители.
Радуйтеся, враждебных наветов и стужений достохвальнии упразднители; радуйтеся, неприязненных сетей и пагубных козней мужественнии воспятители.
Радуйтеся, глубоким смирением и кротостию, аки драгоценными бисерами себе украсившии; радуйтеся, в тех же боголюбезных добродетелех многих утвердившии.
Радуйтеся, в постничестве и воздержании древним пустынножителем поревновавшии; радуйтеся, в неустанней молитве, без всякаго стужения и уныния, дни и нощи проводившии.
Радуйтеся, в тойже пребывати молитве ваших последователей добре научившии; радуйтеся, како бодрствовати противо вражиим наветом и оных одолевати образ и путь нам показавшии.
Радуйтеся, на мысленныя враги пост, молитвы и коленопоклонения, вместо оружия, употреблявшии; радуйтеся, сицевым вашим тесным и скорбным житием Божию в мире славу умножившии.
Радуйтеся, Антоние и Феодосие, монашескаго в России жития первоначальницы.
Кондак 9
Всякий человеческаго естества чин, нищих и богатых, худородных и высокородных на убогое, смиренное и вельми острое житие ваше взирая, велие Богу воздаваше благодарение и попремногу прославляше Его благостыню и неизреченное милосердие, яко сице тесное и прискорбное проходити житие вас устрои, да вы многих от душегубительныя изведше стези, пастырски на стезю спасения наставите, поучающе их присно пети Создателю и Промыслителю: Аллилуиа.
Икос 9
Витии избраннии явистеся, преславнии отцы наши, но не по образу мира сего витийствовавшии, ибо яже мир сей любит, вы всем усердием возненавидесте, и яже блажит и вельми почитает, вы презресте, и далече от себе отвергше, аки непотребное и неполезное сметие, ногама своима попрасте, темже от всех таковое похвальное приемлете почитание:
Радуйтеся, мира и всех его сластей, красот и прелестей доблестнии презрители; радуйтеся, иноческаго нестяжания и нищеты теплейшии любители.
Радуйтеся, тела вашего и всех телесных чувств суровии умертвители; радуйтеся, кротости, смирения и воздержания приснии рачители.
Радуйтеся, все ваше утешение и блаженство в нищете и нестяжании положившии; радуйтеся, безмолвием и от мира устранением зело себе удобрившии.
Радуйтеся, всецело самих себе на Божий промысл и попечение возложившии; радуйтеся, сладких брашен и гортаноугодных питий никогдаже похотевшии.
Радуйтеся, мягких и светлых одеяний на ся никакоже возложившии; радуйтеся, многошвенныя рубища, аки драгоценныя украшения, во всецелом вашем житии всегда с любовию носившии.
Радуйтеся, вместо избранныя пищи, постом многодневным и острым тела умерщвлением вас питавшии; радуйтеся, вместо сладкаго пития, сердечными слезами себе самих напоевавшии.
Радуйтеся, Антоние и Феодосие, монашескаго в России жития первоначальницы.
Кондак 10
Спасти хотя многих, всех обращения и спасения милостивно ожидаяй Премилосердый Бог, других вас апостолов России яви, да вами многих вразумит и на правый спасения путь наставит, в чем вы апостольски потруждшеся, в неведении сущих евангельской истине неленостно поучая, к правоверию приведосте и к хранению Божиих заповедей и богоугодному и чистому житию словом и делом непрестанно возбуждасте, поя Богу Помощнику: Аллилуиа.
Икос 10
Стена тверда и крепкое ограждение явистеся, всехвальнии отцы, к вам прибегающим, не точию бо иночествовати с вами хотящим руку помощи милостивно подавасте, но и различными мирскими делы, напастьми и скорбьми отягченных и утесненных тако утешасте, якоже родители чада своя, во обстоянии скорбей и болезней сущия, утешают, отраду им своим попечением подающе и отеческою ласкою тяжесть скорбей облегчающе. За каковое ваше благодетельство сицевое вам благодарственное воздаем пение:
Радуйтеся, бедствующим и различными напастьми боримым скории помощницы; радуйтеся, обидимых и озлобленных известнии защитницы.
Радуйтеся, обуреваемых тяжкими мира сего прилоги предобрии кормчии; радуйтеся, убожествующих и в скорбней нищете сущих всещедрии обогатители.
Радуйтеся, алчущих и гладствующих милостивии кормители; радуйтеся, нестерпимою палимых и утесняемых жаждою предивнии прохладители.
Радуйтеся, одежды и крова лишенным в недрах милосердия Божия покров и убежище открывающии; радуйтеся, слепотствующих, наипаче же в законе Господни заблуждающих, пречуднии руководители.
Радуйтеся, болезньми и тяжкими недуги одержимых и томимых премудрии уврачеватели; радуйтеся, всех напастей, бед и скорбей сильнии и крепцыи прогонители.
Радуйтеся, всякаго добра временнаго и вечнаго податели; радуйтеся, с верою к вам притекающих от всех скорбных обстояний теплии защитители.
Радуйтеся, Антоние и Феодосие, монашескаго в России жития первоначальницы.
Кондак 11
Пение еже приносим вам, богоноснии отцы, несть довольно к похвалению преславных ваших подвигов и трудов вышечеловеческих, яко бо житие бе превосходящее житие человеческое, ангельскому же подобящееся, сице и похвалам от Ангел паче нежели от человек вам приносимым быти достоит: обаче усердное наше зряще произволение, любезно приносимое нами приимите пение, нас же от грех и всяких скверн и нечистот вашими молитвами очистите, да на всяк день и час чистым сердцем поем Богу: Аллилуиа.
Икос 11
Светоподательная на земном крузе явистася светила, Божия благодати исполненная, отцы преблаженнии, всю вселенную, из подземнаго пещернаго спуда, пресветлыми вашими добродетельми ясно просвещающия, дела бо ваша из подземных возсиявше заключений, тако всему миру во уведение и познание приидоша, яко и Восток оная ублажает, и Запад величает, и Юг восхваляет, и Север попремногу прославляет. Темже и мы сице вам от любве припеваем:
Радуйтеся, всех добродетелей неленостнии исполнители; радуйтеся, многих монашеских обителей предобрии соградители.
Радуйтеся, всяких добродетелей пресветлая зерцала; радуйтеся, крепкая и непреодолимая ваших обителей забрала.
Радуйтеся, прекрасная и пречудная Духа Святаго жилища; радуйтеся, всех богоугодных и благоприятных дел преудобренная вместилища.
Радуйтеся, Творцу и Богу вашему во временнем житии добре угодившии; радуйтеся, к исходу от сея временныя и многотрудныя жизни прекрасно себе уготовившии.
Радуйтеся, ваших учеников, аки истинных чад, не точию в животе сем, но и при исходе наипаче на богоугодное житие наставившии; радуйтеся, темже учеником, по отшествии отсюду, невидимое спребывание и всегдашнее содействие и помощь обещавшии.
Радуйтеся, в небесная жилища богопоспешно без всякаго препятия вшедшии; радуйтеся, мзду велию за ваша иноческая злострадания от Всещедраго Мздовоздаятеля восприемшии.
Радуйтеся, Антоние и Феодосие, монашескаго в России жития первоначальницы.
Кондак 12
Благодать, юже Всемилостивый и Всещедрый Бог от Своих неистощимых подаваше сокровищ, никогдаже в вас тща и праздна бываше, но выну обилен плод творяше, аки зерно доброе в добрую вверженное землю, вы бо верным и мудрым рабом, от своего господина таланты вземшим, уподобившеся, тако силами, свыше вам подаваемыми, трудолюбне деласте, яко да и Богу приятни и любезни явитеся, и себе в небесных селениях нескончаемое приобрящете воздаяние, непрестанно поюще Богу: Аллилуиа.
Икос 12
Поюще ваше безмолвное и весьма от житейских и мирских попечений удаленное, со Единым Богом житие, похваляем многоболезненныя труды и подвиги ваши, почитаем дневныя и всенощныя бдения и молитвы, славим частыя долулегания и коленопреклонения, и вся та чтим плоти умерщвления и духа сокрушения, яже любве ради Христовы благодушно подъясте, воспоминаем купно и мздовоздаяния, яже от праведнаго Судии и Мздовоздаятеля Бога обильно восприяли есте, сице воспевающе:
Радуйтеся, в небесней нескончаемей славе Ангелом уподобившиися; радуйтеся, честь равную патриархом приемшии.
Радуйтеся, в чине пророков, яко дар пророчества имущии, вписаннии; радуйтеся, к лику апостолов и евангелистов, яко словом и делом Христа благовестившии, сопричтеннии.
Радуйтеся, в сонме мучеников, яко много Христа ради претерпевшии, благочестно восприятии; радуйтеся, в собрании исповедников саном исповедничества почтеннии.
Радуйтеся, с девствующими, яко девственницы, возвеличеннии; радуйтеся, со всеми святыми добре Богу угодившими, участие и наследие обретшии.
Радуйтеся, пресладким и блаженным Пресвятыя Троицы лицезрением выну насыщающиися; радуйтеся, по иноческих подвизех и постнических трудех нескончаемым упокоением наслаждающиися.
Радуйтеся, неизреченных благ, преподобным от века уготованных, наследия праведно удостоившиися; радуйтеся, Царствия Небеснаго, вся в себе сладости и красоты, вся величия и блаженства, ум человеческий превосходящия, содержащаго, общницы и обладатели явившиися.
Радуйтеся, Антоние и Феодосие, монашескаго в России жития первоначальницы.
Кондак 13
О преблаженнии и всякия чести достойнии, отцы богоноснии, Антоние и Феодосие Печерстии, малое сие моление, нами, недостойными, вам от любве приносимое, любезно приимше, ваше купно же и наше Отечество от всех неприязненных нападений и вражиих наветов непоколебимо и невредимо соблюдите, нас же, сыновне с верою и любовию к вам притекающих, от всяких бед, скорбей и напастей отечески избавите, да выну благодарно поем о вас Богу Спасителю: Аллилуиа.
Этот кондак читается трижды, затем 1-й икос «Ангелом подобнаго...» и 1-й кондак «Избраннии и Духа Святаго...».
Молитва
Преподобнии и богоноснии отцы наши Антоние и Феодосие, к вам мы грешнии, яко к теплым заступником и скорым помощником и известным предстателем, усердно прибегаем, смиренно просяще вашея помощи и заступления в бездне зол и бед погружаемии, яже на всяк день и час нам и от человек лукавых приключаются и от духов злобы поднебесныя, всегда и везде и всякими образы погибели душ и телес наших ищущих, находят на ны. Известны бо есмы несумненно, коль великое к милосердному Богу имате дерзновение: еще бо на земли между странствующими к Горнему Отечеству пребывающе, велию силу благодати Божия, устами и руками вашими чудодействующия, в себе показасте, яко и огнь с небес, по подобию Илиину, на показание места, на немже имяше быти основана, на честь и всегдашнее Бога и Божия Матере славословие, великая церковь Печерская, и росу, по образу Гедеонову, на очищение и вечное прославление тогожде святаго места низведосте: такожде вемы, коль многое множество мужей и жен, из разных стран и народов, скорбящих и напаствуемых, или различными тяжкими болезнями одержимых, или под бременем насилия и притеснения неудобь носимым упадающих и жития своего отчаявающихся, вашими молитвами и заступлением получиша скорое себе облегчение и избавление. Аще убо вся та помоществования, еще в смертном суще странствовании, бедствующим милостивно подавасте, кольми паче днесь, егда уже Всемогущей предстасте Троице, и большее приясте дерзновение, во еже молити Ю о нашем недостоинстве, и нас в бедах и печалех сущих утешати, в тяжких нуждах и напастех по нас ратовати, в злоключениях и бедствиях нас заступати и защищати. Сего ради и мы, столь многими враждебными наветами, озлоблениями и коварными злоумышлениями отвсюду угрожаемии и теснимии, вашему теплому и сильному по Бозе вручаем себе покровительству и защищению, и усердно молим благостыню вашу: сохраните нас неврежденных от всех бед и зол, наипаче же от бесовских козней и хитростей, льстивых подступов и наглых нападений, да не будем им в поругание и посмеятельство, но тако их крепкою вашею помошию от нас отжените, якоже во дни оны от обители отгнасте их, многая пакости иногда деющих. Сицевая же их неполезная укротивше на ны востания и устремления, тако нас, утвержденных в вере, надежде и любви постоянных соделайте, да николиже нами каковое возобладает недоумение, или сумнение в тех, яже Святая Мати Церковь веровати поучает, и исповедати дерзновенно повелевает. Надежду нашу на Господа Бога в душах наших весом и мерою правды и милости Божия сице устройте, яко да ниже излишне уповаем обещанная от Бога без труда и подвига восприяти, ниже, зряще великая прегрешения и тяжкая законопреступления, весьма Божия милосердия отчаиваемся. Любовь в сердцах наших сице утвердите, и достойну соделайте, да ничтоже земное и скорогибнущее паче Бога, вся сотворшаго и вся в Себе содержащаго, ниже помышляем, ниже желаем, ниже предпочитаем. Чувства наша душевная вкупе и телесная в таковом благоустроении и благолепной мерности на всяк день и час удерживайте и снабдевайте, да теми никогдаже Благаго, Человеколюбиваго Бога прогневаем. Разум уцеломудрите, да он паче о Бозе, Его вездеприсутствии и благопромышлении помышляет, неже о временных и ничтоже сущих печется. Развращенную волю нашу выну исправляйте, да николиже хощет, еже хотению Божию сопротивляется, но теми да уловляется, и в сих безмятежно и безпечально да пребывает, яже суть Богу угодна и приятна, человеку же спасительна и полезна. Память истрезвляйте, да та непрестанно представляет уму и сия, имиже Всемилостиваго прогнева Бога и Его благоутробие раздражи и оная, яже всякаго человека, кроме всякаго сумнения, по временной сей жизни ожидают; к симже и Отечества вашего не забывайте, но в мирном устроении пребывати ему у Престола Величества Божия непрестанно ходатайствуйте. Вся люди, сущыя в стране нашей, мирных и безпечальных сохраните, и от всякаго злаго обстояния вскоре избавите. Егда же приспеет наше от временнаго сего жития отшествие и к вечности преселение, сице нам в помощь предстаните и от насилий вражиих свободите, якоже предстасте иногда Еразму монаху в тяжком смертном бедствии обретавшемуся, и сице сердца наша к истинному покаянию и жалению о грехах подвигните, якоже и онаго сердце подвигосте, иже в истинном покаянии от здешних к Богу отъиде, да и мы, в сицем совести нашея свидетельстве, Пресвятей и Неразделимей представше Троице, прославляем Ю купно с вами и всеми святыми в безконечныя веки. Аминь.
Кондак 1
Избранный угодниче Христов, иноков русских первоначальниче и великий чудотворче, преподобне отче наш Антоние, с любовию приносим ти сия хвалебныя песни, яко небесному предстателю нашему; ты же, имеяй дерзновение ко Господу, молися о спасении нас, грешных, да зовем ти благодарно:
Радуйся, Антоние, монашескаго на Руси жития первоначальниче.
Икос 1
Ангел во плоти был еси, преподобне отче Антоние, аще и на земли родился еси во граде Любечи, но вышний град, Иерусалим прекрасный, гражданина тя стяжа: обитаеши бо в нем со Ангелы и святыми и чудес лучами озаряеши выну Отечествие твое земное, от нас же, чтущих тя, услыши похвальное пение сицевое:
Радуйся, родителей благочестивых сыне; радуйся, града Любеча святое прозябение.
Радуйся, рая Иисусова ветве многоплодная; радуйся, делы благими Христу благоугодивый.
Радуйся, от младенчества Богом избранный; радуйся, от юности Бога всею душею возлюбивый.
Радуйся, вся заповеди Господни верно сохранивый; радуйся, во оправданиях Владычних непорочно ходивый.
Радуйся, чистое вместилище добродетелей; радуйся, красное селение Духа Святаго.
Радуйся, целомудрия рачителю; радуйся, смирения любителю.
Радуйся, Антоние, монашескаго на Руси жития первоначальниче.
Кондак 2
Видев Господь душу твою, отче Антоние, пламенем Божественныя любве объятую, в юношеском возрасте научи тя богоугождению истинному, Егоже промыслом наставляем, пещеру в Любечи ископал еси и в ней в молитвах усердных пребывал еси, подвизался сокрушити главу адскаго змия и победити вся его искушения, да возможеши достойно и праведно воспевати Триединому Богу ангельскую песнь: Аллилуиа.
Икос 2
Разум небесный свыше тебе даровася, преподобне отче Антоние, и в юных летех мудростию старческою процвел еси, вся тленная в уметы вменив, единому же Богу благоугождати вожделев, чесому свидетель неложен пещера, в юности тобою ископанная в Любечи для подвигов духовных, яже яко труба всем возвещает, каков подвижник был еси в юности твоей. О сем дивящеся, вопием ти:
Радуйся, юноше, Богом возлюбленный; радуйся, отроче десницею Всевышняго освященный.
Радуйся, пророка Божия Илии, в пещере жившаго, благий подражателю; радуйся, Крестителя Христова Иоанна, в пустыни обитавшаго, ревностный последователю.
Радуйся, пещерное подвижническое житие усердно возлюбивый; радуйся, многая благодатная дарования стяжавый.
Радуйся, закон Бога твоего на скрижалех сердца твоего написавый; радуйся, заповеди Евангелия Христова свет стезям твоим имевый.
Радуйся, Христа премного возлюбивый; радуйся, непорочно и свято на земли поживый.
Радуйся, мир и вся красная его презревый; радуйся, о горних благах выну помышлявый.
Радуйся, Антоние, монашескаго на Руси жития первоначальниче.
Кондак 3
Силою Божиею укрепляемый, Отечествие твое земное оставил еси, Антоние богомудре, и в жребий Богоматере, Святую Афонскую гору, удалился еси, да тамо обрящеши пристанище тихое ко спасению и навыкнеши иноческому равноангельному житию, егоже возжелел еси, да сподобишися благоприятно славословити Творца всяческих Бога и пети Ему: Аллилуиа.
Икос 3
Имея помысл чист и душу непорочну, отче Антоние, яко овча кроткое, на пажить Богоматернюю, Святую Афонскую гору, притекл еси и к доброму пастырю иноческия обители обратился еси, прося его, да причтет тя к стаду словесных своих овец; тот же, провидев в тебе сосуд избран Духу Святому, с любовию тя прия и во иноческий чин облече. Мы же ублажаем тя звании сими:
Радуйся, иноче боголюбезный; радуйся, постниче нелицемерный.
Радуйся, воине духовный, не обязавыйся куплями житейскими; радуйся, куплю небесную совершивый.
Радуйся, Христа, бисера драгаго, обретый; радуйся, Того ради Отечествие земное оставивый.
Радуйся, Того ради странник и пришлец на земли чуждей бывый; радуйся, любовию крепкою с Ним навеки соединивыйся.
Радуйся, Афонския горы жителю добрый; радуйся, жребия Богоматерняго прозябение благодатное.
Радуйся, преподобных отец Афонских духовный учениче; радуйся, богоносных пустынножителей Святыя горы неленостный сподвижниче.
Радуйся, Антоние, монашескаго на Руси жития первоначальниче.
Кондак 4
Бури страстей избежав, в пустыни Афонстей безстрастия благодатнаго достигл еси, преподобне отче Антоние, и духовно возрасл еси в мужа совершенна о Христе; темже безмолвия крайняго возжелев, с благословения игумена твоего, в горе, в пещере вселился еси и тамо в молитве и посте безмолвно подвизался еси, вопия немолчно Богу: Аллилуиа.
Икос 4
Слышав игумен твой глас небесный, повелевающ ему, да послет тя, отче Антоние, в страну Русскую на подвиги духовныя, призва тя и благослови, да идеши туде, идеже рожден был еси, и устроиши обитель иноческую на месте, свыше Богом на то предызбраннем. Сего ради тебе зовем:
Радуйся, светильниче Божия благодати, на Афоне возжженный и Россию духовно просветивый; радуйся, яко свет добрых дел твоих немерцаемо светится присно.
Радуйся, заре невечерняя Солнца Правды Христа; радуйся, послушания рачителю, безпрекословно волю игумена твоего исполнивый.
Радуйся, святое благословение горы Афонския в наследие стране Русской принесый; радуйся, в волю Божию всего себе предавый.
Радуйся, мудрый странниче, иский Отечествия горняго; радуйся, краснеи нозе твои в путь, спасительный для многих, направивый.
Радуйся, вся дольняя презревый, о горних же выну воздыхавый; радуйся, нищету духовную себе совершенно усвоивый.
Радуйся, смирения святаго преисполненный; радуйся, слезами молитвенными себе орошавый.
Радуйся, Антоние, монашескаго на Руси жития первоначальниче.
Кондак 5
Боготечней звезде подобен быв, отче Антоние, от Афона на Русь притекл еси, и во граде Киеве, в пещере варяжстей, вселился еси, обиталище разбойников в храм молитвы претворив, идеже день и нощь в молитве неусыпно подвизался еси и благоумиленно воспевал еси Господу: Аллилуиа.
Икос 5
Видевше тя людие киевстии, Антоние богоносне, яко Ангела Божия, всеми добродетельми украшена и равноангельное житие в пещере провождавша, прихождаху к тебе усердно, ови благословения и молитв от тебе ищуще, ови же подвизатися с тобою хотяще; ты же, по глаголу Христову, приходивших к тебе не отгонял еси, но спасению человеков радостно служил еси, и основание славней лавре Печерстей положил еси, яже красуется тобою, яко краеугольным камнем своим, и воспевает ти песни таковыя:
Радуйся, подвижничество духовное в Русской стране насадивый; радуйся, слез твоих теченьми оное во сто крат уплодоносивый.
Радуйся, делателю добрый винограда небеснаго; радуйся, водительству твоему себе вдавших управителю.
Радуйся, в подземных кровех пространство царствия небеснаго получивый; радуйся, к нему бодренно и неуклонно ученики твоя путеводивый.
Радуйся, правило веры истинныя; радуйся, образе кротости духовныя.
Радуйся, верховный отче иноков русских; радуйся, зерцало светлое всех добродетелей иноческих.
Радуйся, о немже радуются Ангелы на небеси; радуйся, о немже Бога славят человецы на земли.
Радуйся, Антоние, монашескаго на Руси жития первоначальниче.
Кондак 6
Проповедник смирения святаго был еси братии твоей пещерней, преподобне отче Антоние; смирения бо ради игуменства и священства уклонился еси, любя паче поучати братию не толико властию и словом, колико примером святоподвижнаго жития твоего, по глаголу Господню, всем быв слугою. Темже ныне прославляешися со Ангелы и сладце поеши Пресвятей Троице: Аллилуиа.
Икос 6
Возсиял еси на горах Киевских яко столп утверждения верных, Антоние богомудре, и яко денница светлая, от мрака пещернаго востекл еси на гору небесную, отонудуже озаряеши Церковь православнорусскую, в нейже почитаешися по достоянию первоначальником иноческаго жития и слышиши от верных чад ея пение сицевое:
Радуйся, прославльший горы Печерския добродетельми твоими духовными; радуйся, претворивый пещерное жилище разбойников в храмы Господа славы.
Радуйся, в подземных кровех главу глубиннаго змия крепко сокрушивый; радуйся, богомыслием непрестанным еще во плоти небесная блага созерцавый.
Радуйся, утешения Божественнаго сподобивыйся; радуйся, умиления молитвеннаго преисполненный.
Радуйся, многих чад о Христе стяжавый; радуйся, подражатели жития твоего святаго отечески возлюбивый.
Радуйся, яко семя твое духовное не оскуде в земли Русской; радуйся, яко веселишися со чады твоими во обителех райских.
Радуйся, яко плод благокрасный, предивнаго Феодосия, духовно возрастил еси; радуйся, яко с ним вкупе во славе небесней пребывая, Бога выну о нас, грешных, умоляеши.
Радуйся, Антоние, монашескаго на Руси жития первоначальниче.
Кондак 7
Враг спасения человеческаго хотя скорбь тебе сотворити, преподобне отче наш Антоние, вооружи гневом на тя великаго князя Киевскаго Изяслава; ты же, гневу его место уступая, в область Черниговскую удалился еси и, в горе Болдиней пещеру себе ископав, тамо люботрудно подвизался еси, и тем начало обители Свято-Ильинския положил еси, яже благоговейно чествует ныне твою пещеру, чудесы многими прославленную, о нихже вернии прославляют дивнаго во святых Своих Бога, зовуще: Аллилуиа.
Икос 7
Новаго тя Антония Великаго дарова Господь стране Русской, преподобне отче; якоже бо той древле всю Церковь вселенскую светом добродетелей и чудес своих просвети и первоначальник всех иноков явися, тако и ты ныне всю Церковь Русскую подвиги твоими и чудесы духовно облистал еси и по достоянию первоначальник иноков русских именуешися. Темже зовем ти:
Радуйся, во смирении твоем великих дарований Божиих удостоенный; радуйся, нищетою духовною богатство небесное стяжавый.
Радуйся, древним пророком Божиим равночестный; радуйся, прозорливости благодатныя преисполненный.
Радуйся, будущая яко настоящая созерцавый; радуйся, тайная помышления человеческая прозревавый.
Радуйся, вся искушения духов тьмы победоносно отражавый; радуйся, велию власть на диавола от Господа получивый.
Радуйся, от мучительства демонскаго многая человеки молитвою твоею свободивый; радуйся, яко исцеления благодатная от гроба твоего верным подаеши.
Радуйся, победивый враги невидимыя глубоким твоим смирением; радуйся, низложивый и посрамивый гордыню злобнаго велиара.
Радуйся, Антоние, монашескаго на Руси жития первоначальниче.
Кондак 8
Странное и безмолвное житие провождал еси, богоносне отче, егда от Чернигова паки в Киев возвратился еси и от Дальния пещеры твоея в Ближнюю преселился еси, юже со ученики твоими ископав, яко рай красный удобрил еси подвиги твоими и чудесы, и в ней безмолвно пребывая, умиленно воспевал еси Царю Славы Христу: Аллилуиа.
Икос 8
Весь в Бозе быв богомыслием непрестанным, преподобне отче Антоние, в светлом видении в Цареграде, во Влахернстей церкви, вкупе с преподобным Феодосием, таинственно виден был еси каменоздательми великия печерския церкве, егда Пресвятая Владычица Богородица посылаше их в Киев сооружати церковь ту и вручаше им божественную икону Успения Своего. Слышавше таковая превелия чудеса Божия, тебе, чудотворцу преславному, вопием:
Радуйся, изрядный слуго Пресвятыя Богородицы; радуйся, присный прославителю Ея милости и чудес.
Радуйся, обитель славную во имя Ея святое на Руси основавый; радуйся, икону Ея чудотворную, от рук Ея дарованную, радостно приявый.
Радуйся, сим образом Ея божественным обитель твою духовно обогативый; радуйся, с Нею вкупе молитися за ны ко Господу дерзновение получивый.
Радуйся, верный исполнителю заповедей Сына Ея и Бога; радуйся, преславный совершителю многих великих чудес.
Радуйся, пещерный жителю, всю Русь исполнивый славою подвигов твоих; радуйся, от темных мест подземных светивый миру равноангельным житием.
Радуйся, безмолвниче дивный, вне житейских сует поживый; радуйся, затворниче благоумиленный, молчаливая уста имевый.
Радуйся, Антоние, монашескаго на Руси жития первоначальниче.
Кондак 9
Всем сердцем Бога возлюбив, отче Антоние, Богом возлюблен был еси, Иже послушаше благоутробно молитвы твоя и исполняше милостиво вся прошения твоя. В указание тебе места, идеже име создатися великая печерская церковь, просил еси, преподобне, у Господа: да будет по всей земли роса, на месте же том суша; и паки: да будет по всей земли суша, на месте же том роса; и бысть тако по прошению твоему. Темже радостно воспел еси чудес Богу: Аллилуиа.
Икос 9
Витий человеческих похвалы превосходит святоподвижническое житие твое, преподобне отче Антоние: кто бо достойно может восхвалити тя, чудотворца преславнаго, огнь с небес сведшаго молитвою твоею, якоже пророк Илия древле, и огнем тем все хврастие попалившаго на месте, идеже име создатися великая церковь печерская, в знамение велией благодати Божией, яже тамо обитати будет. О сем дивящеся, смиренно глаголем:
Радуйся, одушевленной церковию Бога Живаго бывый; радуйся, в храме Триипостаснаго Господа душу твою освятивый.
Радуйся, огнедохновенныя дары Духа Святаго в сердце твое приемый; радуйся, духоносцем, апостолом Христовым, единонравный.
Радуйся, низводителю предивный огня с небесе; радуйся, удостоверителю чудотворный Божия благоволения к месту великия печерския церкве.
Радуйся, адаманте, блистаяй дарами Божия благодати и не сокрушимый прилоги вражиими; радуйся, столпе непоколебимый святыя православныя веры.
Радуйся, чудотворче преславный и богоприятный; радуйся, молитвенниче крепкий и скороуслышанный.
Радуйся, руце твои преподобнеи со дерзновением многим горе воздевавый; радуйся, прошения твоя со слезами теплыми Господеви приносивый.
Радуйся, Антоние, монашескаго на Руси жития первоначальниче.
Кондак 10
Спасителя душ наших, Господа Иисуса Христа, видети сподобился еси в видении дивнем, преподобне отче Антоние, и обетования благая от уст Его Божественных услышал еси, яко верный Его раб и угодник. Молися убо Ему, преподобне, да и нас, убогих, не отринет от сладкаго лицезрения Своего, но сподобит со святыми выну видети лице Его пресветлое и пети Ему: Аллилуиа.
Икос 10
Царя Небеснаго Христа верный раб и последователь был еси, отче преподобне, сего ради чудотворения даром от Него обогатился еси. Мы же, тя целебника благодатнаго ведуще, усердно ныне к святому гробу твоему приходим, и цельбы безмездныя душам и телесем нашим от него приемлюще, благодарственно глаголем ти:
Радуйся, величием подвигов твоих древним богоносным отцем уподобивыйся; радуйся, глубиною смирения твоего превозшедый сподвижники твоя.
Радуйся, сети вражия яко паучину сокрушивый; радуйся, в царствие горнее яко орел воспаривый.
Радуйся, во след себе многия ученики ко Христу приведый; радуйся, чада твоя духовная от искушений диавольских бодренно хранивый.
Радуйся, ленивыя подвигнувый ко исправлению христоподражательным твоим житием; радуйся, грешныя к покаянию приведый богомудрыми твоими словесы.
Радуйся, наказателю любвеобильный; радуйся, увещателю пресладкий.
Радуйся, отче, отцев красото; радуйся, пастырю добрый тобою собраннаго словеснаго стада.
Радуйся, Антоние, монашескаго на Руси жития первоначальниче.
Кондак 11
Пение всеумиленное Господеви приносил еси, преподобне отче Антоние, и, возлежа на одре смертнем, молился еси усердно об обители твоей и ученицех; таже прощение и благословение твоей братии преподав, с миром почил еси, к лику святых и преподобных отец приложився, с нимиже ныне сладце поеши Христу Богу: Аллилуиа.
Икос 11
Светоподательный светильник являешися по смерти, преподобне отче Антоние, из-под спуда пещернаго поставленный на версех небесных, отонудуже светлостию чудес просвещаеши Церковь Христову. Просвети, угодниче Божий, и наша мрачныя души светом Христовым и молитвами твоими помози нам тьмы греховныя избавится, лучи благодати Божия в сердца наша восприяти и неосужденно пети тебе:
Радуйся, светильниче, благодатию сияяй; радуйся, зерцало пресветлое иноческаго жития.
Радуйся, вторый Моисее, мысленныя скрижали, добродетели твоя, нам от горы Святыя принесый; радуйся, вертоград духовный на горах Печерских насадивый.
Радуйся, яко розги его от юга и до севера прострошася; радуйся, яко листвия его присно зеленеют.
Радуйся, оляденевшую в язычестве землю Русскую духовно оплодотворивый; радуйся, садоделатель добрый в ней бывый.
Радуйся, новосаждения богоугодная в ней возрастивый; радуйся, от пещерных затворов в рай Иисусов цветы многая пресадивый.
Радуйся, Ангеле земный; радуйся, человече небесный.
Радуйся, Антоние, монашескаго на Руси жития первоначальниче.
Кондак 12
Благодать Божия хранит священный гроб твой, Антоние, отче наш, огня исхождением и воды излиянием от него возбранивши хотевшим обрести мощи твоя; ты бо, смирен сый, и по смерти не восхотел еси явити мощей твоих миру, сим поучая нас благодатному смирению, да во умилении смиренномудренно поем Богу: Аллилуиа.
Икос 12
Поюще святоподвижное и равноангельное житие твое, преподобне отче, хвалим, славим и величаем укрепившаго тя Господа, даровавшаго нам в тебе образ святый и достоподражательный. Приими убо, угодниче Христов, от нас, смиренных, с любовию всем сердцем тя почитающих, сия нелестныя похвалы:
Радуйся, Пресвятыя Живоначальныя Троицы благоволением увенчанный; радуйся, Пресвятыя Владычицы Богородицы милостями ущедренный.
Радуйся, ангельских воинств содружества сподобивыйся; радуйся, блаженства святых удостоенный.
Радуйся, сонаследниче преподобных; радуйся, постников благодатное удобрение.
Радуйся, пещерножителей славо и похвало; радуйся, всея православныя русския страны крепкое ограждение.
Радуйся, Святыя Лавры твоея непостыдное упование; радуйся, подвизающимся тамо спасения вечнаго ходатаю.
Радуйся, телеса наша безмездно врачуяй чрез прикосновение к честному твоему гробу; радуйся, души наша возводяй к наследию блаженства райскаго святыми твоими молитвами.
Радуйся, Антоние, монашескаго на Руси жития первоначальниче.
Кондак 13
О великий первоначальниче иноков русских и преславный чудотворче, преподобне отче наш Антоние! Мы, чада твоя духовная и овцы пажити твоея, сия малыя песни хвалебныя усердно тебе приносяще, молим тя: яви нам любовь твою отеческую и умоли Господа Бога избавити нас геенны и удостоити Царствия Небеснаго, да поем Ему со святыми: Аллилуиа.
Этот кондак читается трижды, затем икос 1-й «Ангел во плоти был еси...» и кондак 1-й «Избранный угодниче Христов...».
Молитва
О пастырю наш добрый и наставниче, приснопоминаемый иноков русских первоначальниче, преподобне и богоносне отче наш Антоние! Ты горе, на небеси, мы низу, на земли, удаленнии от тебе не толико местом, колико греховною нечистотою нашею, обаче памятующе отеческую любовь твою к людем, ти сродным, припадаем и молим ти ся со умилением и верою: помози нам, грешным, покаянием очиститися и достойными быти помилования и прощения от Господа и Создателя нашего.
Умоли благость Его даровати нам великия и богатыя милости: земли плодоносие, воздуха благорастворение, мир глубок, братолюбие искреннее, благочестие нелицемерное, житейских потреб довольство, и да не во зло обратим благая, даруемая нам от щедродательныя Его десницы, но во славу имене Его святаго и во спасение наше. Сохрани, угодниче Божий, предстательством твоим святым всех нас. Соблюди, чудотворче святый, благомощными твоими молитвами обитель твою и всю страну нашу невредимыми от всякаго зла, и вся люди, жительствующия в обители твоей и на поклонение семо приходящия, осени небесным твоим благословением, и в скорбех, бедах и болезнех утешение, избавление и исцеление им подаждь, да благодарно славим, хвалим и величаем прославльшаго тя Господа, чрез тебе дивно благодетельствующаго нам, Безначальнаго Отца, Единороднаго Его Сына и Единосущнаго Его Духа, Троицу Живоначальную и Нераздельную, и твое святое заступление, во веки веков. Аминь.
Кондак 1
Избранников Божиих сожителю, иноче честный и летописче преславный, отче преподобне Несторе, приими приносимыя с любовию смиренныя похваления наша. Ты же, яко имея велие дерзновение на небеси, молися тепле о стране нашей и людех ея, во еже избавитися нам от всякаго зла, да зовем ти: Радуйся, Несторе, земли Русския первый летописателю.
Икос 1
Ангельскому иноческому житию поревновав и суету мира тленнаго презрев, во юности ранней притекл еси, отче преподобне, во обитель Печерскую града Киева, к стопам основателей ея Антония и Феодосия миренно припадая и о сопричтении тя ко братии усердно моля. Того ради взываем ти:
Радуйся, от юности твоея Богу служити вожделевый.
Радуйся, благую часть от утра жития твоего избравый.
Радуйся, мир и вся его прелести оставивый.
Радуйся, Господа всем сердцем возлюбивый.
Радуйся, Несторе, земли Русския первый летописателю.
Кондак 2
Видя благое произволение сердца твоего и провидяще в тебе сосуд благодатный добродетелей христианских, преподобный Феодосий с радостию велиею сопричисли тя ко братии обители своея и чина иноческаго тя удостои, умиленно поюще Богу: Аллилуиа.
Икос 2
Разумом богопросвещенным возлюбил еси, Богомудре Несторе, научение книжное и зело к сему прилежа, аки пчела трудолюбивая, собирая сладчайший мед премудрости и умножая в души твоей во спасение сокровище неиждиваемое познания. Сего ради достоин явился еси похвалы сицевыя:
Радуйся, Премудрость просвещения книжнаго во младости стяжавый.
Радуйся, к собиранию многоценнаго бисера зело прилежавый.
Радуйся, медом познания истины от юности усладивыйся.
Радуйся, сокровищем негиблемым мудре обогативыйся.
Радуйся, Несторе, земли Русския первый летописателю.
Кондак 3
Силу духовную от Владыки своего восприяв, преподобне, Тому жизнь свою безраздельне посвятил еси, воспевая благих Подателю Богу: Аллилуиа.
Икос 3
Имея дарование духовное от Господа твоего, талант тебе данный не скрыл еси, аки раб нерадивый, но Господу помогающу ти многажды, добродетели в житии твоем умножил еси, рабе благий и верный, да прославится в тебе Творец всяческих, темже зовем ти:
Радуйся, вверенное тебе сокровище мудрости в земли не скрывый.
Радуйся, добродетелей вертоград богатый духовно возрастивый.
Радуйся, благий собирателю богатства нетленнаго.
Радуйся, обретый блаженство Рая вожделеннаго.
Радуйся, Несторе, земли Русския первый летописателю.
Кондак 4
Бури страстей житейских уклонился еси, угодниче Христов, во утишное пристанище святыя обители Печерския достигши, идеже с честными насельники сея не преставал еси пети Спасителю твоему: Аллилуиа.
Икос 4
Слыша наставление душеспасительное, от Богоноснаго Феодосия и иных честных отец, тебе неоскудно подаваемое, сему со тщанием последовал еси в пещерном затворении твоем, молитвою, пощением и о плоти нерадением укрепляемь в подвизе многотрудном жития иноческаго. Сего ради слышиши ныне хваления сицевая:
Радуйся, от юности во мрак пещерный, спасения ради, вселивыйся.
Радуйся, тамо непрестанною молитвою от треволнения житейскаго оградивыйся.
Радуйся, яко в подвизе твоем наставника богомудраго Феодосия имел еси.
Радуйся, наставлением сего послушливо внимал еси.
Радуйся, Несторе, земли Русския первый летописателю.
Кондак 5
Боготечною стезею текл еси, отче преславный, ничесоже суетнаго желая, но града горняго, вечнаго взыскуя, Господу же неустанно поя: Аллилуиа.
Икос 5
Видя неустанныя труды твоя, ко спасению души направляемыя и радующеся братски о преуспеянии твоем в подвизе жития монашескаго, вси иноцы обители Печерския восхваляху тя сице:
Радуйся, трудниче неустанный, яко мзды благия достоин явился еси.
Радуйся, подвижниче добрый благочестия, яко в подвизех твоих не изнемогал еси.
Радуйся, образ честный жития иноческаго братии являяй.
Радуйся, в смирении и кротости душевней всех присно наставляяй.
Радуйся, Несторе, земли Русския первый летописателю.
Кондак 6
Провозвестника славы отеческия обрете тя, Несторе досточудне, страна Русская, уведев бо минувшия судьбы ея, письмены предал еси вся в научение, наставление и назидание родом грядущим, да тии уведевше промышление Божие к языку Словенску, воспоют Благому Промыслителю своему: Аллилуиа.
Икос 6
Возсил еси, яко солнце светоносное, в Русстей земли, Богоблаженне отче, неведения бо мрак глубочайший, от века ю покрывающий, твоими писаньми первее озарил еси, к свету ведения и Богопознания соотчичи твоя призывая, от нихже сицевое похваление достойно восприял еси:
Радуйся, мглу неведения варварскаго в народе нашем разгнавый мудрости сиянием.
Радуйся, просвещению отечества послуживый твоим летописанием.
Радуйся, над сим усердно до кончины живота твоего труждаяйся.
Радуйся, ко труду писания теплою молитвою уготовляяйся.
Радуйся, Несторе, земли Русския первый летописателю.
Кондак 7
Хотяй свидетелем дивнаго чудеси тебе, отче, явити Господь Вседержитель, внуши тайно игумену Печерскому Иоанну, да вверено ти будет, купно со иным от братии, ископати погребенное в земли тело наставника твоего преподобнаго Феодосия, по симинадесятех летех от кончины сего, во уверение благодати Божия, на нем явленней. Темже узревши того во гробе нетленна суща и чудеса велия источающа, радуяся воспел еси со иноки Печерскими чудес Содетелю Богу: Аллилуиа.
Икос 7
Новый труд на пользу и в научение христианом подъял еси, преподобне Несторе, во еже списати житие великаго угодника преподобнаго Феодосия, иже бе купно со богоносным Антонием, первоначальником богоугоднаго иноческаго жития в земли Русстей и строитель обители Печерския, ейже устав от славныя киновии Студийския восприяв, той во веки соблюдати в ней заповеда. Темже и мы, благодарни суще за таковое твое к нам недостойным попечение, единодушно славим тя, отче, тако:
Радуйся, жития преподобнаго Феодосия благоговейный сказателю.
Радуйся, сему в подвизе твоем ревностный подражателю.
Радуйся, повестию твоею верныя утешивый.
Радуйся, тою ко иноческому подвигу многия подвигнувый.
Радуйся, Несторе, земли Русския первый летописателю.
Кондак 8
Странник и пришлец был еси, Несторе, на земли, ко временному и тленному бытию никакоже прилепляяйся, но ум и сердце устремляя ко блаженству нескончаемому Отечества Небеснаго, идеже ныне со Ангелы в веселии зовеши: Аллилуиа.
Икос 8
Все житие твое, Боголюбезне отче, Спасителю твоему и ближним посвящено бысть. Сердцем бо чистым заповедь Христову восприим, любве закон благодатный исполнил еси, в меру сил труждаяся на пользу братий твоих и выну прославляя Возлюбленнаго тобою Господа. Темже от Того прославление на небеси улучив, слышиши на земли блажащих тя похвалы сими:
Радуйся, светлый образе братолюбия и смирения.
Радуйся, благий наставниче трудолюбия и терпения.
Радуйся, спасению ближних крепце поревновавый.
Радуйся, похвалы от сих достойно приявый.
Радуйся, Несторе, земли Русския первый летописателю.
Кондак 9
Всякое наслаждение плотское возненавидел еси, преподобне отче Несторе, и житие иноческое возлюбил еси, темже и Господь возлюби тя, прослави и дарова нам, яко молитвенника усерднаго, выну поющаго Ему: Аллилуиа.
Икос 9
Витий многословных паче краткими словесы твоими землю Отечества нашего прославил еси, мудре наставниче, от «Повести временных лет»: уведехом бо откуду есть пошла Русская земля, юже велиею сыновнею любовию возлюбил еси. Сего ради сынове словенорусстии во вся роды и до ныне восхваляют тя, глаголюще:
Радуйся, риторы славныя в простоте слова твоего превосходяй.
Радуйся, мудростию научения твоего нас любовию озаряяй.
Радуйся, Отечества земнаго верный любителю.
Радуйся, о благе земли твоея усердный ревнителю.
Радуйся, Несторе, земли Русския первый летописателю.
Кондак 10
Спасения путь узкий и многотрудный волею избрал еси, Богоносне, и лица твоего николиже вспять обратил еси, к светозарному Солнцу правды Христу Богу выну очи твоя обращаяй и Того прославляя песнию хвалебною: Аллилуиа.
Икос 10
Стеною упования несумненнаго оградил еси, преподобне, душу твою от всякаго искушения и соблазна, верою крепкою познавая полноту благодати и милосердия Создателя твоего. Того ради слышиши от нас, недостойных и отчаянием колеблемых, таковая:
Радуйся, в души возрастивый благоуханный цвет добродетели.
Радуйся, верою невидимых, аки видимых, чаемых и ожидаемых, яко сущих, истинный свидетелю.
Радуйся, благочестия христианскаго неленостный поборниче.
Радуйся, изнемогающих в тягостном сомнении благий укрепителю и помощниче.
Радуйся, Несторе, земли Русския первый летописателю.
Кондак 11
Пение хвалебное от сынов Русских по достоянию приемлющи, отче досточудне, любовию твоею не престай заступати от всех бед и скорбей землю отеческую нашу, в нейже выну, прославляется имя Господне песнию: Аллилуиа.
Икос 11
Светолучными сиянии любви Божественныя уязвивыйся, летописче преславне, образы сея явил еси житием страстотерпец святых благоверных братий Бориса великодушнаго и Глеба кроткаго, да им последующе, добродетели братолюбия, отечестволюбия, смирения и послушания приобрящем, тебе же, деяний сих списателя богомудра, восхвалим сице:
Радуйся, яко благодать Божественная на тебе неоскудно почиваше.
Радуйся, яко тою умудряемь, угодники Божия с любовию прославил еси.
Радуйся, о благе земли твоея неустанный молитвенниче.
Радуйся, отечестволюбцем и мудрости познания искателем присный помощниче.
Радуйся, Несторе, земли Русския первый летописателю.
Кондак 12
Благодатный источник наставлений Богоугодных обретохом в тебе, отче Несторе, житием бо и списаньми твоими вся утверждаеши шествовати неуклонно во след Единому Человеколюбцу и Спасителю нашему Богу, зовуще Ему: Аллилуиа.
Икос 12
Поюще Богоугодное житие твое, Несторе преславне, со умилением прославляем труды и подвиги твоя, имиже Христу Спасу зело угодил еси, и восхваляем дивное смотрение Божие на тебе, в нетлении мощей твоих доныне являемое. Почитая же мирную и непостыдную кончину твою, поклоняемся неизследимому Промыслу Всевышняго, сподобльшаго тя причастника быти неизреченныя славы Своея в селениих праведных, отонюдуже приклони ухо твое ко гласом нашим, взывающим ти сице:
Радуйся, козни, коварства и злобы демонския расторнувый.
Радуйся, духом твоим невозбранно в горняя обители востекший.
Радуйся, во мраце пещернем телом твоим нетленно до днесь почиваяй.
Радуйся, от мощей твоих многую помощь чтущим тя неоскудно подаваяй.
Радуйся, Несторе, земли Русския первый летописателю.
Кондак 13
О преславный угодниче Божий, Богомудре отче Несторе! Призри любовию твоею с высоты небесныя на скорбь и слезы собратий твоих земных и умоли Всемилосерднаго Господа избавити землю Русскую и чад ея от бед и напастей, да восхвалим человеколюбие и щедроты Его, воспевающе выну: Аллилуиа.
(Этот кондак читается трижды, затем икос 1 и кондак 1)
Молитва
О преподобне отче, премудре наставниче и Боголюбезне подвижниче Несторе Летописче! Предстояй со дерзновением престолу Вечныя Славы, не забуди нас грешных и недостойных, бурями страстей отягченных, и ходатайством твоим непрестанным защити страну нашу, тебе присную, и соотчичи твоя от всяких зол и скорбей. Утверди сердца наша в православней вере, отечество свое научи любити и в братолюбии крепце пребывати. Настави нас на стези спасения, да молитвами твоими, заступниче наш, внидем в вечное Царство славы, восхваляюще Господа и прославляюще твое заступление во веки веков. Аминь.
Кондак 1
Избранный учениче великаго учителя, преподобнаго и богоноснаго отца нашего Антония, и дивный подражателю жития его святаго, святе отче Агапите, песнью восхвалим тя с любовию, заступника нашего- ты же, яко имеяй дерзновение ко Господу, молися выну о спасении нас, грешных, от всяких бед избавляя зовущих ти:
Радуйся, Агапите, душевных и телесных недугов скорый целителю.
Икос 1
Ангелов любезную чистоту от юности твоея возлюбив, блаженне Агапите, к добродетелей подвижнику, преподобному Антонию притекл еси и, от него во иночество облеченный, подражатель ревностный подвигов его был еси- темже славим тя воззвании сими:
Радуйся, богоноснаго Антония добродетелей и даров наследниче- радуйся, на высоту совершенства духовнаго возшедый.
Радуйся, молитвами усердными дар врачевания и чудотворения от Господа получивый- радуйся, из глубины души воздыханиями чистоту душевную стяжавый.
Радуйся, Агапите, душевных и телесных недугов скорый целителю.
Кондак 2
Видев Всевидец Господь благое души твоея изволение, блаженне Агапите, еже поработати Ему безленостно, внуши преподобному Антонию благословити тя на жестокое в пещернем затворе житие. Ты же, благословение святое с верою прием, в пещере покой вечный обрел еси, Единому Богу работая в пениих, бдениих и пощениих, немолчно воспевая Ему: Аллилуиа.
Икос 2
Разумев преподобный Антоний произволение Божие возсияти в сем иноце вельми благоугодным начинанием и душеспасительным намерением, изобильно насытил духовною сладостию и в добродетелех укрепил еси, сего ради вопием ему таковая:
Радуйся, преподобнаго Антония нравы себе усвоивый- радуйся, того житию усердно поревновавый.
Радуйся, сыновию любовь к нему стяжавый- радуйся, и от него зело возлюбленный.
Радуйся, самовидче его подвигов- радуйся, во врачевании недугов ему споспешествующий.
Радуйся, Агапите, душевных и телесных недугов скорый целителю.
Кондак 3
Силою Божиею укрепляемый, святе Агапите, великия иноческия труды подъял еси- сего ради благословися дело руку твоею во славу имени Господня на спасение и врачевание всех, с верою и надеждою к тебе притекающих и неленостно возносящих песнь Пресвятей Троице: Аллилуиа.
Икос 3
Имея помысел чист и непорочну совесть и памятуя Рекшаго: «Болен бех, и посетисте Мене… понеже сотвористе единому сих братий Моих менших, Мне сотвористе», недугующих иноков под свой покров отечески приемля, якоже родители чада своя, утешал еси, отраду своим попечением подающе и отеческою ласкою тяжесть болезни облегчающе, молитвою с одра болезни воздвизал еси. Сего ради приими от нас благохваления таковая:
Радуйся, в добродетелех благоискусный подвижниче- радуйся, во Христе всю братию монашескую возлюбивый.
Радуйся, недужных иноков смиренный и неусыпный служителю- радуйся, за подвиги временнаго жития покой вечный обретший.
Радуйся, Агапите, душевных и телесных недугов скорый целителю.
Кондак 4
Бурю многомятежнаго житейскаго моря безбедно прошел еси, блаженне, и в пристань безстрастия достигл еси, окормляем заповедями Христа Бога, яже быша светильник ногама твоима и свет стезям твоим. Темже ныне в горних обителех водворяешися, сладце поя Триединому Богу: Аллилуиа.
Икос 4
Слышавше мнози о благоугоднем житии твоем, блаженне Aгапите, прихождаху к тебе: ови послушати поучений твоих, ови исцелений от различных недугов прияти- ихже ты, с отеческою любовию приемля, руководствовал еси ко спасению, отгоняя всяк недуг и всяку немощь. Сего ради и мы прибегаем к тебе, великому помощнику и целителю, славяще тя сице:
Радуйся, безмолвия любителю, обитель Печерскую подвиги своими украсивый- радуйся, спасения многих душ человеческих виновниче.
Радуйся, болезнующих грехми врачу благоискусный- радуйся, воине Христов, полки невидимых врагов победивый.
Радуйся, ближния твоя искренне возлюбивый- радуйся, спасению их душевному и исцелению телесному усердно послуживый.
Радуйся, Агапите, душевных и телесных недугов скорый целителю.
Кондак 5
Боготечное светило быв, угодниче Божий, всех к Солнцу Правды — Христу путеводил еси примером жития твоего святаго, иже все бысть посвящено на служие Богу и ближним твоим. Нищия и убогия милостивно питал еси, темже блаженство милостивых унаследовал еси и со святыми поеши вечно хвалебную песнь: Аллилуиа.
Икос 5
Видим тя, блаженне отче Агапите, достигшаго в меру мужа совершенна о Христе и преисполненна дарований Божественных, в Евангелии Христове обетованных верным последователем Бога Слова. Темже, чудящеся твоим подвигом, поем ти хвалебно:
Радуйся, в глубине сердца бисер драгий - Господа Иисуса Христа - обретый- радуйся, имя Его Божественное во устех и в сердце своем выну имевый.
Радуйся, на земле алкавый и жаждавый, ныне же нетленныя пищи на небеси насыщаяйся- радуйся, нищету хранивый, нищих от глада избавляяй.
Радуйся, иго Христово благое и легкое искренне возлюбивый.
Радуйся, Агапите, душевных и телесных недугов скорый целителю.
Кондак 6
Проповедник быв житием твоим Евангельских добродетелей, отче блаженне, плоть твою постом и молитвою поработил еси и во славу Божию пожил еси- лучами своих подвигов всезлобнаго врага, армянина нечестиваго, завистию и гневом палимаго и своими злостными ухищрениями веселящагося, не токмо посрамил еси, но и к свету Христовой истины привел еси, поучая за все благодарити и славословити Господа, поя Ему: Аллилуиа.
Икос 6
Возсияв в пещере святыя обители сия, яко богоносное светило, блаженне Агапите, светом добрых дел и врачеваний умилил еси души и сердца человеков, а нечестиваго врача и завистника и его безстудное безумие посрамил еси. Тем убо тебе, святому и блаженному угоднику, умильно зовем:
Радуйся, врачевание нечестиваго армянина посрамивый- радуйся, обреченнаго на смерть тем же армянином недугующаго со одра болезни воздвигнувый.
Радуйся, осужденнаго на смерть и напоеннаго смертным ядом чудесно исцеливый и от смерти избавивый- радуйся, испивый смертный яд от врага и, по слову Господню: «Аще что и смертно испиют, не вредит их», — живот невредимый сохранивый.
Радуйся, злобу и коварство врагов своих посрамивый.
Радуйся, Агапите, душевных и телесных недугов скорый целителю.
Кондак 7
Хотение единое имел еси, блаженне отче, еже Богу угождати и спасению душевному и здравию телесному ближних твоих благочестно служити. Темже келлия твоя пещерная бысть врачебница благоотишная всякому человеку — нищему и богатому, князю и убогому. Ты же, единое в сердце имея: «Всем бых вся», врачевал еси, не взирая на лица, призывая всех вкупе сердцем и усты немолчно возглашати Богу: Аллилуиа.
Икос 7
Новаго тя чудотворца великаго позна славный князь Владимир Мономах, на одре болезни возлежа, пребывая при кончине своей, слезно молил еси тя притещи и исцелити его. Но ты, монашеский обет соблюдая - николиже стен обители оставляти, послал еси зелие от трапезы своея, и князь, вкусив его, здрав восташа. Таковой силе твоего чудотворения и нелицеприятия дивящеся, вопием ти хвалебно:
Радуйся, крине пещернаго прозябения- радуйся, мира Христова благоухание.
Радуйся, не скрывый талант врачевания, тебе Домовладыкою врученный- радуйся, ради сильных мира сего обета иноческаго не нарушивый.
Радуйся, славы ради высшняго звания славу человечскую ни во чтоже вменивый- радуйся, Великаго князя Владимира Мономаха с одра смертнаго недуга былием, тобою благословенным, и молитвою подъял еси.
Радуйся, Агапите, душевных и телесных недугов скорый целителю.
Кондак 8
Странника и пришельца в мире сем помышлял еси себе быти, Агапите блаженне, темже о богатстве земнем всякое попечение отложил еси. Всякое стяжание суетное возбраняя, приходящих к тебе разделяти достояние свое с нищею братиею и в ия лице самому Христу служити поучал еси, немолчно воспевая хвалебную песнь: Аллилуиа.
Икос 8
Весь в Бозе быв, отче блаженне, о Бозе и угождении Ему присно поучал еси, умоляя ничтоже предпочитати паче любве Христовы и, памятуя реченное Христом: «Не собирайте себе сокровищана на земли, идеже моль и ржа истребляют, но собирайте себе сокровища на небеси», - не пожелал ради благ временных лишитися благ вечных, отвергал еси вся дары, тебе князем приносимыя, поучая раздавати их нищей братии и убогим. Темже и мы, таковое твое нищелюбие восхваляя, зовем ти сице:
Радуйся, блаженство нищих духом унаследовавый- радуйся, нищету паче богатства возлюбивый.
Радуйся, мзду за свое врачевание отвергий и раздати ю нищим и убогим повелевый- радуйся, последния укрухи хлеба своего с неимущими разделяти поучавый.
Радуйся, любовь к Богу любовию к ближним своим свидетельствовавый- радуйся, похвалами молитвенными до днесь в обители Печерской зело почитаемый.
Радуйся, Агапите, душевных и телесных недугов скорый целителю.
Кондак 9
Всем приходившим в обитель молитв и врачевания ради, блаженне отче, дивно бысть видети тебе, нищетно в келлии твоей пребывающаго, обаче ты, всех равною любовию приемля, коемуждо слово утешения или исцеление подавал еси, научая пети виновнику всех благих Богу: Аллилуиа.
Икос 9
Вития многовещанныя не возмогут достойно воспети подвиги и чудотворения твоя, блаженне Агапите, мы же, таковому житию твоему дивящеся, дерзаем венчати тебе, аще и недостойнии, похвалами таковыми:
Радуйся, на скрижалех сердца твоего Закон Христов написавый- радуйся, от глубины сердечныя добрая и душеспасительная наставления человеком износивый.
Радуйся, пещерный гражданине, грады и веси наполнивый славою твоих чудотворений- радуйся, Богом возлюбленный и ближними твоими благословляемый.
Радуйся, образ совершенства о Христе в себе явивый- радуйся, иго Христово, благое и легкое, искренне возлюбивый.
Радуйся, Aгапите, душевных и телесных недугов скорый целителю.
Кондак 10
Спасения надежу стяжал еси при исходе твоем, блаженне отче Агапите, и яко пшеница зрелая, вовремя пожатия, кончиною благою преселился еси в день, тебе прежде указанный Господом, во обители горния, прияти мзду от руки праведнаго Мздовоздаятеля Христа, Иже вчини душу твою со духи святых, немолчно возглашающих пред Престолом славы Его победную песнь: Аллилуиа.
Икос 10
Царя Небеснаго Христа верный раб и последователь был еси, отче Агапите, темже по неложному Его глаголу: «Идеже есмь Аз, ту и слуга Мой будет», мы, чтуще тя, веруем несумненно, яко ты со Христом во обителех блаженства вечнаго водворяешися и радости нетленныя наслаждаешися, яко истинный Того угодник- от нас же слышиши благохваления сия:
Радуйся, предсказания нечестиваго армянина о твоей смерти посрамивый- радуйся, о дне твоея блаженныя кончины oт Господа извещенный.
Радуйся, душу твою в руце Господа радостно предавый- радуйся, откровенным лицем славу Трисияннаго Божества созерцаяй.
Радуйся, телом смертным в пещере погребенный- радуйся, душею безсмертною к Сиону горнему воспаривый.
Радуйся, Агапите, душевных и телесных недугов скорый целителю.
Кондак 11
Пение Пресвятей Богородице приносиши, блаженне отче наш Агапите, о обители твоей святей и подвивающихся в ней, и о всех с любовию к тебе притекающих присно ходатайствуеши, прося мира свыше и благопоспешения всем, возносящим достодолжная похвалы Триединому Богу, воспевая Ему: Аллилуиа.
Икос 11
Светильника тя добрых дел, блаженне отче, исповедуем быти и прославляем прославльшаго тя Господа, Иже чудесы многими мощи твоя ознаменована: струи бо исцелений благодатных источаеши от них недужным и подвизаеши верныя вопити тебе:
Радуйся, земный ангеле и небесный человечe- радуйся, безмезднаго врачевания источниче.
Радуйся, мира многоцелебнаго преисполненный фиале- радуйся, от раки твоея святыя исцеления обильно пoдаваяй.
Радуйся, скорбящих утешителю- радуйся, унывающих ободрителю.
Радуйся, Агапите, душевных и телесных недугов скорый целителю.
Кондак 12
Благодать Господню испроси нам, отче Агапите, почитающим с любовию святую память твою и усердно притекающим к честней раце мощей твоих, от неяже чудесныя исцеления подаеши недужным. Темже тебе, чудотворения даром от Бога прославленному, прилежно молимся: исцели наша недуги душевныя и телесныя и помози нам предстательством твоим спасение вечное получити, да вкупе с тобою воспоем дивному во святых Своих Богу: Аллилуиа.
Икос 12
Поюще подвиги твоя, блаженне отче, ублажаем равноангельское житие твое, дивимся чудотворением твоим, молитвенно почитаем святую намять твою и, припадающе к раце мощей твоих, умильно взываем:
Радуйся, Пресвятыя Богородицы достойный молитвенниче- радуйся, пещерожителей славо и похвало.
Радуйся, святыя обители Печерския, вкупе с Антонием и Феодосием, присное охранение- радуйся, подвизающихся в ней благонадежное заступление.
Радуйся, приходящих в ню на поклонение благий предстателю- радуйся, почитающих память твою небесный покровителю.
Радуйся, Агапите, душевных и телесных недугов скорый целителю.
Кондак 13
О, преблаженне отче Агапите! Ты - горе на небеси, мы же - долу на земли, удаленныя от тебе не толико местом, колико греховною нечистотою нашею, обаче дерзаем приносити тебе сие малое похвальное пение, егоже милостивно прием, моли Господа и Владыку нашего избавити нас погибели вечныя и сподобити блаженства святых, вопиющих Ему выну хвалебную песнь: Аллилуиа.
Этот кондак читается трижды, затем 1-й икос: «Ангелов любезную…» и 1-й кондак: «Избранный учениче…».
Молитва первая
О, всеблаженне Агапите, земный ангеле и небесный человече! Припадаем к тебе с верою и любовию и молим ти ся прилежно: яви нам, смиренным и грешным, святое свое заступление- се бо грех ради наших не имамы свободы чад Божиих просити о потребах наших Господа и Владыку нашего, но тебе, молитвенника благоприятна, к Нему предлагаем и просим тя со усердием многим: испроси нам от благости Его благопотребныя дары душам и телесем нашим: веру праву, любовь ко всем нелицемерну, в злостраданиих - терпение, тяжкими болезнями одержимым — от недугов исцеление, под бременем скорбей и напастей неудобоносимых падающим и жития своего отчаявшимся твоими молитвами получити скорое облегчение и избавление. Не забуди, блаженне отче, и обитель твою святую, присно тя чтущую, и соблюди ю и всех, живущих и подвизающихся в ней и на поклонение в ню приходящих, невредимыми от искушений диавольских и всякаго зла. Егда же приспеет наше от временнаго сего жития отшествие и к вечности преселение, не лиши нас помощи твоея небесныя, но молитвами твоими всех нас приведи в пристанище спасения и наследники яви нас быти всесветлаго Царствия Христова, да поем и славим неизреченныя щедроты Человеколюбца Бога, Отца и Сына и Святаго Духа, и твое вкупе с преподобными Антонием и Феодосием отеческое зaступление во веки веков. Аминь.
Молитва вторая
Преподобне отче Агапите! Воззри на нас милостивно и к земли приверженных возведи к высоте небесней. Ты – горе на небеси, мы – на земли низу, удалены от тебе не толико местом, елико грехами своими и беззаконии, но к тебе прибегем и взываем: настави нас ходити путем твоим, вразуми и руководствуй нас. Вся твоя святая жизнь бысть зерцалом всякия добродетели. Не престани, угодниче Божий, о нас вопити ко Господу. Испроси предстательством своим у Всемилостиваго Бога нашего мир Церкви Его, под знамением креста воинствующей, согласие в вере и единомудрие, суемудрия же и расколов истребление, утверждение во благих делех, больным исцеление, печальным утешение, обиженным заступление, бедствующим помощь. Не посрами нас, к тебе с верою притекающих. Вси православнии христиане, твоими чудесы исполненнии и милостями облагодетельствованнии, исповедают тя быти своего покровителя и заступника. Яви древния милости твоя, ихже отцем вспомоществовал еси, не отрини и нас, чад их, стопами их к тебе шествующих. Предстояще всечестней иконе твоей, яко тебе живу сущу, припадаем и молимся: приими моления наша и вознеси их на жертвенник благоутробия Божия, да приимем тобою благодать и благовременную в нуждех наших помощь. Укрепи нас, малодушных, и утверди в вере, да несомненно уповаем получити вся благая от благосердия Владыки молитвами твоими. О, превеликий угодниче Божий! Всем нам, с верою притекающим к тебе, помози предстательством твоим ко Господу и всех нас управи в мире и покаянии скончати живот наш и преселитися со упованием в блаженныя недра Авраамова, идеже ты радостно ныне почиваеши, прославляя со всеми святыми Бога, в Троице славимаго, Отца и Сына и Святаго Духа, ныне и присно и во веки веков. Аминь.
Тропарь, глас 5
Богоноснаго Антония ревнуя смиренномудрию, аки некиим врачевством, зелием снедным исцелял еси болящия, преподобне Агапите, тем и врача неверна уверив, наставил еси на путь спасения. Уврачуй и наша болезни и молися Господеви о воспевающих тя.
Ин тропарь, глас 2
Велия веры исправления, в пещернем затворе, яко на воде упокоения, преподобне отче Агапите, радовался еси, огнем бо любве Божественныя распаляем, бдением и молитвою безстрастия достигл еси и явился еси равноангельный на земли. Того молитвами, Христе Боже, спаси души наша.
Кондак, глас 6
Врач сый изряден, чудне, являя несумненную твою веру, обличая же армениново неверие и приводя его к благочестию, себе, близ смерти бывшу, испросил еси от Бога продолжение живота и, сим чудом того уверив, привел еси Христови, Емуже в веселии предстоя, молися о нас, преподобне.