Акафисты - 18 марта 2025
Кондак 1
Избраннии чудотворцы и велицыи угодницы Господни, градов Смоленска и Ярославля небеснии заступницы и усерднии о душах наших молитвенницы, святии благовернии князи Феодоре, Давиде и Константине, похвальное пение приносим вам с верою и любовию: вы же, яко имущии дерзновение ко Господу, от всяких нас бед молитвами вашими присно избавите, да с умилением зовем вам:
Радуйтеся, святии благовернии князе Феодоре, Давиде и Константине, преславнии чудотворцы.
Икос 1
Ангели земнии и человецы небеснии бысте, Феодоре, Давиде и Константине преблаженнии, вся заповеди Господни верно сохраншии и в добродетелех преуспевшии, яко быти вам еще во плоти, подражатели сил безплотных, жития чистотою и святостию. Темже и мы грешнии со благоговением приносим благохваления таковая:
Радуйтеся, светильницы трисияннии Божия благодати;
Радуйтеся, столпи крепцыи святыя Православныя Церкве.
Радуйтеся, во благоверии утвержденнии;
Радуйтеся, в добродетелях благоискуснии.
Радуйтеся, вернии Христовы угодницы;
Радуйтеся, многоцелебных даров независтнии подателие.
Радуйтеся, нетления цвети благоуханнии;
Радуйтеся, Рая Иисусова крини неувядаемии.
Радуйтеся, князей Российских светлая похвало;
Радуйтеся, любящих и чтущих вас присное радование.
Радуйтеся, во благоухании святости почивающии;
Радуйтеся, недужныя безмездно исцеляющии.
Радуйтеся, святии благовернии князе Феодоре, Давиде и Константине, преславнии чудотворцы.
Кондак 2
Видя княже Феодор, яко братия его неправедно восприяша удел княжения его, не восхоте бранию идти на них, но мир любяй, малым княжением можайским удовлися, праведно и свято княжение свое исправляше, храмы Божия созидая, благочестие христианское утверждая, суды правосудны людем своим являя и присно зовый в молитвах усердных к Богу: Аллилуиа.
Икос 2
Разумом Божественным преисполненнии, святии благовернии князе Феодоре, Давиде и Константине, не прельститеся суетною славою княжения земнаго, но сие мудро сочеташе со всегдашним благоугождением Богу, яко быти вам воистину праведником, достойным похвал сицевых:
Радуйтеся, молитвенницы учерднии;
Радуйтеся, подвижницы неленостнии.
Радуйтеся, целомудрия хранителие;
Радуйтеся, Православия поборницы.
Радуйтеся, незлобивии в обидах;
Радуйтеся, благодушнии во искушениих.
Радуйтеся, милосердия преисполненнии;
Радуйтеся, кротостию злобу побеждавшии.
Радуйтеся, дивно о Господе сочетаннии, отец со чады во святых;
Радуйтеся, Троицы равночисленнии избранницы, сыны с родителем в селениих райских.
Радуйтеся, от горних высот к земнородным милостивно приникающия;
Радуйтеся, исцеления благодатныя неоскудно источающии.
Радуйтеся, святии благовернии князе Феодоре, Давиде и Константине, преславнии чудотворцы.
Кондак 3
Силою Божиею осененный, княже Феодоре, княжение ярославское восприял еси, и в нем благочестно о Христе потрудился еси, яко добрый воин Иисусе Христов, готовый душу твою положити за люди твоя. Темже и к агарянскому хану шествовати не убоялся еси, и пред ним веру Христову ясно исповедал еси, вопия сердцем и усты ко Господу: Аллилуиа.
Икос 3
Имуще едино попечение в триех телесех, о еже Единому Богу благоугождати, святии благовернии князе Феодоре, Давиде и Константине, образ жития праведнаго в себе нам являете, сим подвизающе нас, в похвалах достодолжных вопити вам сице:
Радуйтеся, Богомудрия преисполненнии;
Радуйтеся, лучами Святаго Духа озареннии.
Радуйтеся, свети умнии, нощь грехов наших пресекающии;
Радуйтеся, звезды путеводныя, ко Христу путь верным ясно указующия.
Радуйтеся, бисере драгоценнии, в небесней сокровищнице Христовой сохраняемии;
Радуйтеся, адаманты, сияющии Божиею благодатию.
Радуйтеся, диадиму княжения земнаго с венцем Царствия Небеснаго сочетавшии;
Радуйтеся, Рая жители порфироноснии.
Радуйтеся, в Бозе упокоение блаженнее обретшии;
Радуйтеся, по трудех и подвизех земных сладце на лоне Авраамли опочившии.
Радуйтеся, древних святых церквей вернии поборницы;
Радуйтеся, Царя царей приснии друзи.
Радуйтеся, святии благовернии князе Феодоре, Давиде и Константине, преславнии чудотворцы.
Кондак 4
Буря искушений приразися к тебе, княже Феодоре, пребывающу ти при дворе хана агарянскаго, иже восхоте имети тя супруга дщери своея: обаче ты союза супружества христианскаго нарушити не восхотев, небоязненно от брака с неверною уклонился еси, дондеже скончася супруга твоя законная: по ея же кончине, дщерь ханскую, во Христа уверовавшую, крещением святым просветив, бракосочетася с нею, зовый ко Господу: Аллилуиа.
Икос 4
Слышавше людие ярославстии о великих добродетелех ваших, святии благовернии князе Феодоре, Давиде и Константине, зело почитаху вас, яко избранников Божиих: вы же, блажении, милостивно над ними княживше, отцы им по Бозе бысте, учители благочестия и наставницы во всех добрых делех. Сего ради доднесь подвиги ваши незабвенны во градах Смоленске и Ярославле, и воспеваются немолчными гласы сицевыми:
Радуйтеся, благодетели нищих и убогих;
Радуйтеся, покровители вдов и сирот.
Радуйтеся, нелицеприятнаго суда рачители;
Радуйтеся, милосердия Христова подражатели.
Радуйтеся, суды ваши с милостию соединившии;
Радуйтеся, правосудие христианское возлюбившии.
Радуйтеся, добрии оружницы Всевышняго Царя;
Радуйтеся, вернии раби Небеснаго Домовладыки.
Радуйтеся, верою православною воодушевленнии;
Радуйтеся, надеждою спасения укрепленнии.
Радуйтеся, любовию Божественною преисполненнии;
Радуйтеся, Богом и людьми возлюбленнии.
Радуйтеся, святии благовернии князе Феодоре, Давиде и Константине, преславнии чудотворцы.
Кондак 5
Боготечной звезде подобствовав, княже Феодоре, от хана агарянскаго отпущенный, княжити во град Ярославль пришел еси, с супругою твоею и чады Давидом и Константином, яже быша благаго древа благия отрасли, плод мног о Христе отечествию своему принесшии, с нимиже ныне во светлостех святых водворяяся, сладце поеши святых Святейшему Христу Богу: Аллилуиа.
Икос 5
Видим вас святии благовернии князе Феодоре, Давиде и Константине, яко звезды богосветлыя, во граде Ярославли святостию и чудесы сияющия, и сиянием славы вашея озаряеми, прославляем прославльшаго вас Царя славы Христа, вам же со усердием и любовию вопием таковая:
Радуйтеся, блаженнии и триблаженнии, целомудрие сохранившии;
Радуйтеся, благовернии и богоноснии, в законе Господни непорочно ходившии.
Радуйтеся, заповеди Христовы свете стезям вашим имевшии;
Радуйтеся, во всех оправданиих Владычних неуклонно пребывшии.
Радуйтеся, всю жизнь вашу на Богоугождение непрестанное посвятившии;
Радуйтеся, до смерти верность Господеви соблюдшии.
Радуйтеся, во всем волю Божию творившии;
Радуйтеся, искушения и скорби мужески терпевшии.
Радуйтеся, во искушениих победоноснии;
Радуйтеся, в скорбех не унывавшии.
Радуйтеся, на Бога все упование ваше возложившии;
Радуйтеся, от Бога в уповании вашем непосрамленнии.
Радуйтеся, святии благовернии князе Феодоре, Давиде и Константине, преславнии чудотворцы.
Кондак 6
Проповедник благочестия явился еси княже Феодоре, егда узрев приближение кончины живота твоего, княжение земное оставль, в обитель Преображения Господня удалился еси, и тамо во иночество постриженный, схиму святую на ся возложил еси, со всеми прощаяся, всех благословляя и назидая, в молитве усердней душу твою в руце Божии предал еси, яко истинный угодник Христа Бога, Емуже со ангелы поеши ныне: Аллилуиа.
Икос 6
Возсиясте многими добродетельми вашими во граде Ярославли, и всю страну Российскую благодатно озаристе преславными чудесы вашими, Феодоре, Давиде и Константине благовернии. Темже память ваша с похвалами от верных почитается, и честная имена ваша молитвенно призываются, от ближних и дальних, к вам вопиющих и глаголющих:
Радуйтеся, мрак душ наших чудесы вашими благодатно просвещающии;
Радуйтеся, недужных безмезднии врачеве.
Радуйтеся, больных цельбоподательнии посетители;
Радуйтеся, туне приявшии и туне подающии.
Радуйтеся, в милости к страждущим никогдаже оскудевающии;
Радуйтеся, сосуди златии миро многоцелебнаго.
Радуйтеся, сокровищницы драгия, на всяк недуг врачевство содержащия;
Радуйтеся, радости печальным податели.
Радуйтеся, скорбящих блазии утешителие;
Радуйтеся, бедствующих скории помощницы.
Радуйтеся, градов Смоленска и Ярославля небеснии покровители;
Радуйтеся, святии благовернии князе Феодоре, Давиде и Константине, преславнии чудотворцы.
Кондак 7
Хотяй во всем подражати отцу твоему преподобному, преблаженне княже Давиде, свято и богоугодно в Ярославли по нем княжил еси, и толико Богу угодил еси, яко миром и благоплодием княжение твое Господь благослови и славна тя в князех российских показа, Емуже ты в преподобии и святости добре послужил еси до смерти, взывая к нему: Аллилуиа.
Икос 7
Новых вас чудотворцев яви Господь в стране российстей, святии благовернии князе Феодоре, Давиде и Константине, чудесы вашими святую православную веру крепко утверди во граде вашем, иже светло красуется, имея вас небесных заступников и предстателей ко Господу, и с любовию к вам взывает:
Радуйтеся, хладную страну теплотою веры вашея согревшии;
Радуйтеся, благочестие во граде вашем возрастившии.
Радуйтеся, добрии делатели винограда небеснаго;
Радуйтеся, мзду приемшии от Христа: чудотворения дар.
Радуйтеся, дары милости вашея верных обогащающии;
Радуйтеся, Божия благодати сосуди избраннии.
Радуйтеся, сияющии, яко солнце во Царствии Небеснем;
Радуйтеся, яко звезды всю Россию чудесы вашими освещающии.
Радуйтеся, трисияннии лучи, Троический несозданный свет нам возсияющии;
Радуйтеся, тричисленнии подвижницы добродетелей Христианских.
Радуйтеся, на враги видимыя и невидимыя нам всегдашнии споборницы;
Радуйтеся, Царя Небеснаго Христа известнии умилостивители.
Радуйтеся, святии благовернии князе Феодоре, Давиде и Константине, преславнии чудотворцы.
Кондак 8
Странника и пришельца в мире сем помышляя себе быти, благоверный княже Константине, от юности твоея девственное житие возлюбил еси, в посте и молитвах пребывая, и угождая Богу благоугождением всяческим, во еже быти тебе освященному сосуду Духа Святаго, всельшагося в непорочное сердце твое, и воздыхании неизглаголанными научившаго тя благоприятно пети Пресвятей Троице: Аллилуиа.
Икос 8
Весь град Ярославль радостию духовною подвижеся, егда святыя и нетленныя мощи ваша, благовернии князе Феодоре, Давиде и Константине, чудес благодатию просияша во обителе Преображения Господня. Тако бо благоволи Господь, да по летех мнозех, нетление ваших телес святых всем явлено будет, и чудесы многими ознаменуется, во еже всем верным вопити вам сице:
Радуйтеся, во умерщвленных телесех жизнь благодатную проявившии;
Радуйтеся, во летех мнозех нетленнии в составех ваших пребывшии.
Радуйтеся, во едином гробе благолепно мирно почивающии;
Радуйтеся, вси трие вкупе чудодействующии.
Радуйтеся, во уверении святости вашея чудес множество от мощей ваших сотворившии;
Радуйтеся, неверовавших в святость вашу грозно наказавшии.
Радуйтеся, слепим зрение даруяй;
Радуйтеся, хромым право ходити устрояй.
Радуйтеся, глухим слух отверзаяй;
Радуйтеся, немым язык разрешаяй.
Радуйтеся, бесноватых от насилия демонскаго свобождаяй;
Радуйтеся, разслабленных благодатно укрепляяй.
Радуйтеся, святии благовернии князе Феодоре, Давиде и Константине, преславнии чудотворцы.
Кондак 9
Со всеми небожители ныне сликовствуете горе, во славе Царствия Христова, благовернии чудотворцы Феодоре, Давиде и Константине, в нейже пребывающе, помяните и нас смиренных в молитвах ваших к Триипостасному Богу, да при помощи вашей небесней, сподобимся во вся дни, достойно и праведно возглашати Ему: Аллилуиа.
Икос 9
Витийство человеческое не может восхвалити по достоянию, многая и преславная чудотворения ваша, святии благовернии чудотворцы Феодоре, Давиде и Константине. Обаче мы, любовию к вам подвизаемии, дерзаем благохвалити вас, заступников наших, сими нехитростными, но усердными словесы:
Радуйтеся, две жены слепыя у мощей ваших прозрети сотворшии;
Радуйтеся, беноватаго и слепаго мужа таможде исцелившии.
Радуйтеся, слепую отроковицу видети устроившии;
Радуйтеся, бесноватих мужа и жену от насилия демонскаго избавившии.
Радуйтеся, четыре немощныя зело жены здравы возставившии;
Радуйтеся, ину жену, терзавшую неистовно все тело свое, от недуга сего свободившии.
Радуйтеся, неверовавшаго в святость вашу пресвитера Константина, разслаблением тела наказавшии;
Радуйтеся, святителя Трифона в томже благодатно обличившии.
Радуйтеся, покаяние его милостивно приемшии;
Радуйтеся, во обители вашей почити ему о Господе удостоившии.
Радуйтеся, благоверную царицу Анастасию в недузе уврачевавшии;
Радуйтеся, ближним и дальним милость многоцелебную показавшии.
Радуйтеся, святии благовернии князе Феодоре, Давиде и Константине, преславнии чудотворцы.
Кондак 10
Спастися нам молите милостиваго Бога, чудотворцы святии и благовернии Феодоре, Давиде и Константине: к вам бо по Бозе и Пресвятей Богородице, яко присным нашим предстателем и ходатаем мы грешнии усердно прибегаем и молитвенно просим вас о еже молитися за нас к прославльшему вас Господу, да и мы сподобимся вкупе с вами на земли живых пети Ему: Аллилуиа.
Икос 10
Царя Небеснаго Христа вернии раби и угодницы, святии благовернии князе Феодоре, Давиде и Константине, покажите на нас недостойных молитв ваших благодатное действо, и якоже многих недужных уврачевали есте, с верою приходящих к святым и многоцелебным мощем вашим, тако и нас, с любовию к ним припадающих, не лишите небеснаго вашего заступления, в жизни, в смерти и по смерти, да зовем вам хвалебно:
Радуйтеся, отечествия вашего земнаго неотступнии хранители;
Радуйтеся, ко отечествию Горнему вернии нам руководителие.
Радуйтеся, источницы многоводнии благодатных исцелений;
Радуйтеся, кладези неистощимыя воды живыя.
Радуйтеся, Воскресения Христова силу в телесех ваших нетленних дивно проявившии;
Радуйтеся, зарю общаго воскресения нам от раки вашея возсиявающии.
Радуйтеся, росу Божия благодати в сердца верных одождевающии;
Радуйтеся, благая прошения наша во блага исполняющии.
Радуйтеся, с верою просящих у вас исцеления скоро врачующии;
Радуйтеся, любящим и чтущим вы, любовию сугубою воздающии.
Радуйтеся, в простоте душевней на помощь призывающих милостивии услышатели;
Радуйтеся, безнадежных страдальцев Божественнии целители.
Радуйтеся, святии благовернии князе Феодоре, Давиде и Константине, преславнии чудотворцы.
Кондак 11
Пение молебное наше и похвалу сию смиренную благоутробно приимите, святии благовернии князе Феодоре, Давиде и Константине: се бо аще и многогрешни есмы, но веруем несумненно, яко вы, святии предстатели наши, много можете пред лицем всеблагаго Бога и яко молитвы ваша святыя сильны спасти нас от погибели вечныя. Темже молим вы: не посрамите веры нашея во всесильное пред Богом ходатайство ваше, но сподобите нас молитвами вашими Царствие Небесное улучити, и со всеми святыми возглашати Триединому Богу: Аллилуиа.
Икос 11
Светоподательнии светильницы и предивнии чудотворцы, святии благовернии князе Феодоре, Давиде и Константине, к вам от лет древних отцы наши верно приходяще, милость многу от вас получаху, их же путем и мы к вам шествуем и припадающе к святым мощем вашим, молим и просим вы: да якоже отцем нашим, тако и нам убозем милость вашу присно являете, да благодарственно вам всегда вопием:
Радуйтеся, чада благословенная Отца Небеснаго;
Радуйтеся, братия по благодати Христа, Сына Божия.
Радуйтеся, светлыя обители Духа Святаго;
Радуйтеся, хвалебницы чудотворнии Пресвятыя Троицы.
Радуйтеся, во свете Лица Божия присно пребывающии;
Радуйтеся, по Бозе вся потребная нам взыскующии.
Радуйтеся, от Горних высот на помощь к нам ускоряющии;
Радуйтеся, грешники к покаянию невидимо направляющии.
Радуйтеся, окамененная сердца прикосновением к мощем вашим умягчающии;
Радуйтеся, плоды покаяния верным приносити помогающии.
Радуйтеся, о спасении нашем усердно Бога умоляющии;
Радуйтеся, во всяком деле блазе нам по вере нашей благопоспешающии.
Радуйтеся, святии благовернии князе Феодоре, Давиде и Константине, преславнии чудотворцы.
Кондак 12
Благодать и милость от Господа испросите нам, святии князе Феодоре преподобне, Давиде и Константине преблаженнии, и в час кончины нашея предстаните в помощь нам, требующим вашего заступления, насилия диавольскаго нас избавляюще, святыми и благомощными молитвами вашими: да при помощи их безбедно прейдем трудный путь мытарств воздушных, и сподобимся в селениих святых пети Создателю нашему: Аллилуиа.
Икос 12
Поюще многая и преславная ваша чудеса, святии благовернии князе и чудотворцы Феодоре, Давиде и Константине, славим Господа, прославльшаго вас на Небеси и на земли, и от любве душевныя совершающе святую и всерадостную память вашу, умильно к вам глаголем:
Радуйтеся, Пресвятыя Троицы вернии раби;
Радуйтеся, Пресвятыя Богородицы органе хвалебнии.
Радуйтеся, Ангельских воинств собеседницы;
Радуйтеся, всех святых сожители.
Радуйтеся, страны Российския духовная лепото;
Радуйтеся, града Ярославля светлая красото.
Радуйтеся, князей Российских к благочестию предводители;
Радуйтеся, княжения вашего земнаго неусыпнии блюстители.
Радуйтеся, обители вашея святыя забрала несокрушимая;
Радуйтеся, подвизающимся в ней спасения душевнаго ходатаи.
Радуйтеся, на поклонение к мощем вашим приходящих любвеобильно приемлющии;
Радуйтеся, благословение ваше святое от раки вашея всем верным подающии.
Радуйтеся, святии благовернии князе Феодоре, Давиде и Константине, преславнии чудотворцы.
Кондак 13
О святии чудотворцы, тричисленнии Пресвятыя Троицы угодницы, благовернии князе Феодоре, Давиде и Константине, милостивно приимите сие малое моление наше, в похвалу вам приносимое, и умолите триипостаснаго Господа и Владыку нашего, избавити нас мучений вечных, грешником уготованных, и сподобити нас в покаянии Ему благоугодити, и Царствие Небесное наследовати, да с вами вопием ему во веки: Аллилуиа.
Этот кондак читается трижды, затем икос 1-й и кондак 1-й
Молитва
О велиции угодницы Божии и чудотворцы, святии и благовернии князе Феодоре, Давиде и Константине, припадающе к святым и многоцелебным мощем вашим, молим вы со смирением, верою и любовию: прострите благоприятные молитвы ваша ко Господу и Создателю нашему, и умолите Его благость, даровати нам вся нужная к житию сему временному, и потребная к вечному спасению нашему: веруем бо несумненно, яко вся возможна вам, яко истинным Его угодником. Сего ради просим вы: испросите нам у Царя царствующих и Господа господствующих страждущую страну Российскую от лютых безбожник и власти их Господь да свободит, верных рабов Его, в скорби и печали день и нощь вопиющих к Нему, многоболезный вопль да услышит и да изведет от погибели живот наш. Испросите престольным градом, граду нашему и всем градом Российским благополучие, изобилие и от злых сохранение, всем же правоверным людем, почитающим вас, и на поклонение мощем вашим святым приходящим, милость Божию и благих прошений скорое исполнение. Ей, чудотворцы святии, не посрамите упования нашего, но молитвами вашими сотворите нас наследники быти Царствия Христова: да прославляем человеколюбие в Троице славимаго и поклоняемаго Бога, Отца и Сына, и Святаго Духа, и ваше святое заступление во веки веков. Аминь.
Кондак 1
Взбра́нный отъ Царя́ си́лъ Го́спода Іису́са, воево́до во́иновъ духо́вныхъ, и крѣ́пкій побѣди́телю враго́въ неви́димыхъ, Адріа́не преподо́бне, пострада́вый непови́нно и стяжа́вый дерзнове́ніе ко Го́споду, отъ вся́кихъ на́съ бѣ́дъ свободи́ благопрія́тными твои́ми моли́твами, да, сла́вяще тя́, засту́пника на́шего, хвале́бно тебѣ́ зове́мъ:
Ра́дуйся, Адріа́не преподобному́чениче и чудотво́рче преди́вный.
Икос 1
Ангела земна́го и человѣ́ка небе́снаго явля́еши на́мъ въ житіи́ твое́мъ, преподо́бне о́тче. Тѣ́мже а́нгельскими глаго́лы подоба́ше восхваля́ти тя́ по достоя́нію, но мы́ любо́вію къ тебѣ́ подвиза́еми, а́ще человѣ́ческими гла́сы со усе́рдіемъ си́це тебѣ́ взыва́емъ:
Ра́дуйся, роди́телей благочести́выхъ ча́до благо́е; ра́дуйся, вели́каго Росто́ва прозябе́ніе свято́е.
Ра́дуйся, Бо́гу Отцу́ усыновле́нный въ святѣ́мъ креще́ніи; ра́дуйся, Бо́гу Сы́ну соедини́выйся во святѣ́мъ причаще́ніи.
Ра́дуйся, Бо́га Ду́ха Свята́го да́ры пріе́мый въ святѣ́мъ мѵропома́заніи; ра́дуйся, отъ пеле́нъ Бо́гу освяще́нный Боже́ственныхъ та́инствъ благода́тію.
Ра́дуйся, пе́щь страсте́й ю́ностныхъ угаси́вый воздержа́ніемъ; ра́дуйся, пло́ть томя́щую сокруши́вый посто́мъ и бдѣ́ніемъ.
Ра́дуйся, и́го Христо́во и бре́мя Его́ ле́гкое возлюби́вый па́че всѣ́хъ мірски́хъ красо́тъ; ра́дуйся, го́рняя бла́га взыска́ти возжелѣ́вый па́че всѣ́хъ земны́хъ добро́тъ.
Ра́дуйся, земна́я и мимотеку́щая въ уме́ты вмѣни́вый; ра́дуйся, восхожде́нія небе́сная въ се́рдцѣ твое́мъ соверши́вый.
Ра́дуйся, Адріа́не преподобному́чениче и чудотво́рче преди́вный.
Кондак 2
Ви́дѣвъ суету́ мíра сего́ привре́меннаго, преподо́бне о́тче, оте́чество твое́ и до́мъ роди́телей твои́хъ оста́вилъ еси́, и во гра́дъ Кíевъ прише́дъ, во оби́тели Кíево-Пече́рстѣй во и́ночество постриже́нъ бы́лъ еси́, подвиза́вся та́мо съ преподо́бными, научи́лся еси́ отъ ни́хъ благопрія́тно пѣ́ти Бо́гу: Аллилу́ія.
Икос 2
Ра́зумъ небе́сный тебѣ́ дарова́ся, преподо́бне о́тче, и жи́тельствуя въ оби́тели Кíево-Пече́рстѣй, добродѣ́тели преподо́бныхъ оте́цъ Анто́нія и Ѳеодо́сія стяжа́ти поревнова́лъ еси́, я́ко бы́ти тебѣ́ вои́стину наслѣ́днику преподо́бныхъ, досто́йному похва́лъ таковы́хъ:
Ра́дуйся, треволне́нія мо́ря жите́йскаго безбѣ́дно избѣжа́вый; ра́дуйся, во оби́тели Кíево-Пече́рстѣй приста́нище спасе́нія стяжа́вый.
Ра́дуйся, и́ноче боголюбе́зный, отвергíйся во́ли своея́ всецѣ́ло; ра́дуйся, послу́шниче соверше́нный, велѣ́нія ста́рцевъ исполне́ніемъ и́хъ предваря́вый.
Ра́дуйся, по́стниче неизнемога́ющій, хлѣ́бомъ сухи́мъ пита́выйся; ра́дуйся, трудолю́бче благослове́нный, пра́здность душевре́дную возненави́дѣвый.
Ра́дуйся, во смире́ніи преуспѣ́вый; ра́дуйся, въ моли́твахъ и псалмопѣ́ніихъ неутоми́мо пребы́вый.
Ра́дуйся, ху́дость ри́зную возлюби́вый; ра́дуйся, нищету́ во́льную себѣ́ усво́ивый.
Ра́дуйся, преподо́бныхъ Пече́рскихъ духо́вный учени́че; ра́дуйся, добродѣ́телей и́хъ прее́мниче.
Ра́дуйся, Адріа́не преподобному́чениче и чудотво́рче преди́вный.
Кондак 3
Си́лою Бо́жіею осѣне́нный, о́тче преблаже́нне, стужи́въ молво́ю человѣ́ческою въ оби́тели Кíево-Пече́рстѣй, возжела́лъ еси́ безмо́лвствовати въ оби́тели пусты́ннѣй, и сего́ ра́ди отше́лъ еси́ въ оби́тель Коме́льскую преподо́бнаго Корни́лія, и та́мо водвори́лся еси́, зовы́й въ безмо́лвіи ду́ха Христу́, Царю́ и Бо́гу: Аллилу́ія.
Икос 3
Иму́щи еди́но попече́ніе, преподо́бне о́тче, е́же ка́ко спасти́ся и благоугоди́ти Христу́ Бо́гу, зѣло́ возра́довался еси́, ви́дѣвъ оби́тель Коме́льскую, въ пусты́ни внѣ́ молвы́ человѣ́ческія стоя́вшую, и уста́вы пустынножи́тельныя преподо́бнаго Корни́лія вѣ́рно соблюда́вшую, тѣ́мже си́це обра́дованному и мы́ сія́ ра́достная прино́симъ пѣсноглаше́нія:
Ра́дуйся, му́дрый стра́нниче, искíй оте́чества го́няго; ра́дуйся, Бо́жій избра́нниче, отъ ю́га на сѣ́веръ пресели́выйся во спасе́ніе.
Ра́дуйся, жесто́кою стезе́ю ше́ствовавый по́движничества соверше́ннаго; ра́дуйся, неосла́бно труди́выйся во бдѣ́ніихъ, пѣ́ніихъ и поще́ніихъ.
Ра́дуйся, пло́ть ду́ху всецѣ́ло покори́вый; ра́дуйся, стра́сти въ души́ твое́й искорени́вый.
Ра́дуйся, сло́вомъ Бо́жіимъ пита́выйся, па́че не́же бра́шномъ ги́блющимъ; ра́дуйся, слеза́ми моли́твенными питіе́ твое́ растворя́вый.
Ра́дуйся, моли́твенниче неусы́пающій и благоумиле́нный; ра́дуйся, подви́жниче, благода́тію Бо́жіею пріосѣне́нный.
Ра́дуйся, безмо́лвниче, чу́ждый попече́ній жите́йскихъ; ра́дуйся, безстра́стія дости́гнувый, и молчали́вая уста́ имѣ́вый.
Ра́дуйся, Адріа́не преподобному́чениче и чудотво́рче преди́вный.
Кондак 4
Бу́рное страсте́й мо́ре преплы́лъ еси́, преподо́бне, и вѣ́яніемъ Ду́ха Бо́жія въ при́стань безстра́стія благода́тнаго дости́глъ еси́, е́же ви́дѣвъ Коме́льскія оби́тели благоговѣ́йный игу́менъ Лавре́нтій, во діа́кона тя́ избра́, да слу́жиши олтарю́ Госпо́дню и моли́твы собо́рныя возно́сиши за лю́ди, зовы́й Бо́гу: Аллилу́ія.
Икос 4
Слы́шавъ себе́ похваля́ема отъ человѣ́къ во оби́тели Коме́льстѣй, смути́лся еси́ ду́хомъ, преподо́бне о́тче, и та́йно помышля́лъ еси́, е́же безмо́лвствовати соверше́нно въ пусты́ни, по примѣ́ру дре́внихъ преподо́бныхъ оте́цъ, и та́мо избѣжа́ти превозноше́нія человѣ́ческаго. Таково́му смиренному́дрію твоему́ мы́ дивя́щеся, си́це тебѣ́ вопіе́мъ:
Ра́дуйся, смире́нія высото́ недосяга́емая мíра сего́ суето́ю; ра́дуйся, пусты́ни красото́, веселя́щая боголюби́выя ду́ши.
Ра́дуйся, наслѣ́дниче святы́хъ, нра́вы и́хъ подража́вый; ра́дуйся, подо́бниче а́нгеловъ, чистото́ю душе́вною просія́вый.
Ра́дуйся, Ду́ха Свята́го оби́тель прекра́сная; ра́дуйся, таи́нниче Пресвяты́я Тро́ицы.
Ра́дуйся, и́мже побѣжда́еміи рыда́ху ду́си тмы́; ра́дуйся, крѣ́пкій низложи́телю всѣ́хъ и́хъ искуше́ній и привидѣ́ній.
Ра́дуйся, му́жественный побѣди́телю немощны́я и́хъ си́лы; ра́дуйся, благода́тію Бо́жіею преиспо́лненный.
Ра́дуйся, Адріа́не преподобному́чениче и чудотво́рче преди́вный.
Кондак 5
Боготе́чно ше́ствовалъ еси́, преподо́бне о́тче, а́нгеломъ Бо́жіимъ руководи́мый отъ оби́тели Коме́льскія въ пусты́ню, Бо́гомъ тебѣ́ назна́ченную для по́двиговъ духо́вныхъ, и егда́ прише́лъ еси́, та́мо а́нгелъ, во о́бразѣ ста́рца тебѣ́ сопу́тствовавый, внеза́пу неви́димъ бы́сть, и позна́лъ еси́, я́ко спу́тникъ тво́й не человѣ́къ, но безпло́тный бы́сть. Тѣ́мже со тре́петомъ воспѣ́лъ еси́, а́нгеловъ и человѣ́ковъ Творцу́ пѣ́снь: Аллилу́ія.
Икос 5
Ви́дѣвше красоту́ пусты́ни, Бо́гомъ тебѣ́ дарова́нныя, преподо́бне о́тче, возра́довался еси́ ду́хомъ, и о́бразъ Пресвяты́я Богоро́дицы та́мо на дре́вѣ поста́вивъ, во и́мя Ея́ освяти́лъ еси́ мѣ́сто то́, да бу́детъ Она́ ему́ Покрови́тельницею и Попечи́тельницею навсегда́, о се́мъ похваля́юще тя́, си́це тебѣ́ зове́мъ:
Ра́дуйся, усе́рдный почита́телю Пресвяты́я Богоро́дицы; ра́дуйся, при́сно сла́вителю и́мене Ея́ преблагослове́ннаго.
Ра́дуйся, пріе́мый отъ Нея́ извѣще́ніе хлѣ́бомъ и ры́бою, предъ ико́ною Ея́ обрѣ́тенными, я́ко благоволи́тъ Она́ къ твоему́ начина́нію; ра́дуйся, о се́мъ преиспо́лнивыйся ра́дости духо́вныя.
Ра́дуйся, оби́тель и́ноческую во и́мя Богома́тере въ пусты́ни твое́й основа́вый; ра́дуйся, и́ноковъ пустыннолюби́выхъ въ о́ную собра́вый.
Ра́дуйся, до́брый па́стырю ове́цъ слове́сныхъ; ра́дуйся, сотвори́вый и научи́вый.
Ра́дуйся, ве́лій нарече́нный во Ца́рствіи небе́снѣмъ; ра́дуйся, къ нему́ бо́дренно руководи́вый твоя́ ученики́.
Ра́дуйся, назида́вый и́хъ во спасе́ніе сло́вомъ и житіе́мъ твои́мъ; ра́дуйся, труди́выйся нелѣ́ностно во сла́ву Бо́жію и во спасе́ніе ду́шъ человѣ́ческихъ.
Ра́дуйся, Адріа́не преподобному́чениче и чудотво́рче преди́вный.
Кондак 6
Проповѣ́дникъ чуде́съ Бо́жіихъ яви́лся еси́, преподо́бне о́тче, прише́дъ отъ пусты́ни твоея́ въ ца́рствующій гра́дъ Москву́, идѣ́же отъ первосвяти́теля Мака́рія съ любо́вію воспрія́тый, во іере́я отъ него́ освяще́нъ бы́лъ еси́ и игу́меномъ оби́тели твоея́ поста́вленный, со мно́гою ми́лостынею въ ню́ возврати́лся еси́, благода́рственно взыва́я ко Го́споду: Аллилу́ія.
Икос 6
Возсія́лъ еси́, преподо́бне о́тче, бли́жнимъ и да́льнимъ, я́ко со́лнце пресвѣ́тлое, луча́ми добродѣ́телей сія́ющее, ду́ши и сердца́ вѣ́рныхъ духо́вно просвѣща́ющее. Тѣ́мже прихожда́ху къ тебѣ́ христолюби́віи лю́діе, наставле́нія и благослове́нія отъ тебе́ и́щуще, зову́ще и глаго́люще:
Ра́дуйся, Ева́нгелія Христо́ва благовѣ́стниче; ра́дуйся, апо́стольскихъ преда́ній храни́телю.
Ра́дуйся, правосла́вія наста́вниче; ра́дуйся, благоче́стія учи́телю.
Ра́дуйся, грѣ́шниковъ обличи́телю; ра́дуйся, ка́ющихся съ Бо́гомъ примири́телю.
Ра́дуйся, пресла́дкій увѣща́телю; ра́дуйся, прекро́ткій наказа́телю.
Ра́дуйся, олтаря́ Госпо́дня непоро́чный служи́телю; ра́дуйся, та́инствъ Бо́жіихъ досто́йный соверши́телю.
Ра́дуйся, моли́твенныя ру́цѣ горѣ́ со дерзнове́ніемъ содѣва́вый; ра́дуйся, моли́твы теплѣ́йшія Го́сподеви возноси́вый.
Ра́дуйся, Адріа́не преподобному́чениче и чудотво́рче преди́вный.
Кондак 7
Хотѣ́ніе имѣ́лъ еси́ усе́рдное, преподо́бне о́тче, хра́мъ Бо́жій во и́мя Пресвяты́я Богоро́дицы честна́го и сла́внаго Ея́ Успе́нія въ оби́тели твое́й постро́ити, его́же сооруди́въ и освяти́въ, безкро́вную же́ртву приноси́лъ еси́ въ не́мъ Бо́гу, досто́йно и пра́ведно воспѣва́я Ему́ а́нгельскую пѣ́снь: Аллилу́ія.
Икос 7
Но́вый преподобному́ченикъ въ земли́ Россíйстѣй яви́лся еси́, преподо́бне о́тче, непови́нно пострада́въ отъ зло́бныхъ разбо́йникъ, на оби́тель твою́ напа́дшихъ и тя́ му́ченически истяза́вшихъ, ножа́ми бо тѣ́ло твое́ изра́нивше, огне́мъ ра́ны твоя́ опаля́ху, та́же къ коне́мъ тя́ привяза́вше, по земли́ влачи́ша и го́рцѣй сме́рти тя́ преда́ша, е́же мы́ воспомина́юще, си́це тебѣ́ вопіе́мъ:
Ра́дуйся, многотерпѣли́вый страстоте́рпче; ра́дуйся, му́жественный страда́льче.
Ра́дуйся, кро́тко и незло́биво муче́ніе лю́тое претерпѣ́вый; ра́дуйся, за му́чившихъ тя́ Бо́га моли́вый.
Ра́дуйся, ножа́ми уязвля́емый и огне́мъ опаля́емый не возстена́вый; ра́дуйся, моли́твенно о по́мощи къ Бо́гу вопія́вый.
Ра́дуйся, му́ченическую сме́рть ми́рно воспрія́вый; ра́дуйся, святу́ю ду́шу твою́, ко́нми по земли́ влачи́мый, Го́сподеви преда́вый.
Ра́дуйся, житіе́ земно́е до́блественнѣ сконча́вый; ра́дуйся, вѣне́цъ нетлѣ́нный отъ Го́спода получи́вый.
Ра́дуйся, я́ко про́чее не ко́снется тебѣ́ ни болѣ́знь, ни му́ка; ра́дуйся, я́ко вѣ́чно ра́дуешися со святы́ми.
Ра́дуйся, Адріа́не преподобному́чениче и чудотво́рче преди́вный.
Кондак 8
Стра́нное и пресла́вное чу́до яви́ Госпо́дь надъ моща́ми твои́ми, преподо́бне о́тче, разбо́йниками изъ оби́тели твое́й увезе́нными и въ пусты́ни безвѣ́стнѣ въ земли́ сокрове́нными: дре́во бо чудотво́рное надъ ни́ми возрасте́, его́же вѣ́тви и плоды́ исцѣля́ху вся́кія болѣ́зни въ лю́дехъ, и́же моля́щеся сла́вляху Бо́га и вопія́ху Ему́: Аллилу́ія.
Икос 8
Ве́сь наро́дъ недоумѣва́ше, отку́ду дре́ву безду́шному такова́я благода́ть цѣле́бная даде́ся, до́ндеже по смотре́нію Бо́жію откры́ся, я́ко у корне́й сего́ дре́ва святы́я мо́щи твоя́ почива́ху, многострада́льный уго́дниче Бо́жій, ублажа́емый отъ вѣ́рныхъ зва́ніи таковы́ми:
Ра́дуйся, чуде́съ пучи́но Бо́гомъ излія́нная; ра́дуйся, цѣле́бниче благíй неду́говъ человѣ́ческихъ.
Ра́дуйся, дре́во сладкоплодови́тое, и́мже напита́шася вѣ́рніи; ра́дуйся, дре́во благосѣнноли́ственное, и́мже покрыва́ются мно́зи.
Ра́дуйся, иска́вшимъ тя́ неявле́нный; ра́дуйся, невѣ́давшимъ тя́ откры́тый.
Ра́дуйся, сокро́вище драго́е въ пусты́ни сокрове́нное; ра́дуйся, би́сере многоцѣ́нный отъ нѣ́дръ земны́хъ возсія́вый.
Ра́дуйся, обрѣ́теніемъ моще́й твои́хъ оби́тель твою́ духо́внѣ возвесели́вый; ра́дуйся, сиротство́ ея́ утѣ́шивый.
Ра́дуйся, лише́ніе ея́ благода́тно воспо́лнивый; ра́дуйся, бли́жнимъ и да́льнимъ ми́лость твою́ цѣле́бную всеще́дро дарова́вый.
Ра́дуйся, Адріа́не преподобному́чениче и чудотво́рче преди́вный.
Кондак 9
Вси́ и́ноцы оби́тели твоея́, преподо́бне о́тче, возвесели́шася ра́достію свято́ю егда́ честны́я мо́щи твоя́ отъ пусты́ни со сла́вою и псалмопѣ́ніемъ во о́ную принесо́шася, и во хра́мѣ Богома́тере благолѣ́пно положи́шася, и́хже пренесе́ніе свѣ́тло пра́зднующе, хвале́бно вопія́ху ко Го́споду: Аллилу́ія.
Икос 9
Вѣтíйство на́ше пѣ́сненное не довлѣ́етъ къ досто́йному прославле́нію твои́хъ мно́гихъ чуде́съ, преподобному́чениче Адріа́не приснопа́мятне: оба́че ты́, я́ко бла́гъ и милосе́рдъ, не возгнуша́йся на́шихъ недовлѣ́ющихъ похва́лъ, но ми́лостивно услы́ши съ любо́вію тебѣ́ зову́щихъ:
Ра́дуйся, но́вый Россíйскій цѣле́бниче; ра́дуйся, всѣ́хъ преподо́бныхъ Россíйскихъ сподви́жниче.
Ра́дуйся, Анто́нія Пече́рскаго подража́телю; ра́дуйся, Ѳеодо́сія Пече́рскаго соревнова́телю.
Ра́дуйся, Се́ргію Ра́донежскому равноче́стне; ра́дуйся, Варлаа́му Ху́тынскому единонра́вне.
Ра́дуйся, подо́бнѣ Авраа́мію Росто́вскому неви́димаго веле́са сокруши́вый; ра́дуйся, подо́бнѣ Корни́лію Коме́льскому пусты́ню духо́внѣ уплодоноси́вый.
Ра́дуйся, Мака́рія Желтово́дскаго великоду́шіе стяжа́вый; ра́дуйся, Дими́трія Прилу́цкаго благода́тныя да́ры получи́вый.
Ра́дуйся, Зоси́мѣ Солове́цкому нра́вомъ пустыннолю́бнымъ соравни́выйся; ра́дуйся, Савва́тію Солове́цкому упова́ніемъ на Бо́га уподо́бивыйся.
Ра́дуйся, Адріа́не преподобному́чениче и чудотво́рче преди́вный.
Кондак 10
Спасе́ніе вѣ́чное унаслѣ́довалъ еси́, уго́дниче Бо́жій, и за страда́нія вре́менная получи́лъ еси́ блаже́нство вѣ́чное: обита́еши бо со а́нгелы и всѣ́ми святы́ми во сла́вѣ невече́рнѣй, и сла́дцѣ пое́ши во гла́сѣ ра́дованія и весе́лія побѣ́дную пѣ́снь Христу́ Бо́гу: Аллилу́ія.
Икос 10
Стѣна́ еси́ защище́нія вѣ́рнымъ, чудотво́рче святы́й, и всѣ́мъ съ любо́вію соверша́ющимъ па́мять твою́ засту́пникъ и покрови́тель быва́еши, неду́жныя исцѣля́еши, скорбя́щія утѣша́еши, и всѣ́хъ подвиза́еши зва́ти тебѣ́:
Ра́дуйся, свѣти́льниче пресвѣ́тлый, мра́къ страсте́й прогоня́ющій; ра́дуйся, исто́чниче многово́дный исцѣле́ній благода́тныхъ.
Ра́дуйся, рѣко́ приснотеку́щая чуде́съ; ра́дуйся, цвѣ́те нетлѣ́нія, святу́ю Россíйскую Це́рковь облагоуха́вый.
Ра́дуйся, ми́лованія и врачева́нія пода́телю всеще́дрый; ра́дуйся, любве́ и сострада́нія прояви́телю всебога́тый.
Ра́дуйся, земноро́днымъ засту́пниче небе́сный; ра́дуйся, правосла́внымъ предста́телю неле́стный.
Ра́дуйся, пусты́ни прекра́сное прозябе́ніе; ра́дуйся, оби́тели твоея́ при́сное ра́дованіе.
Ра́дуйся, сто́лпе правосла́вія непоколеби́мый; ра́дуйся, покро́ве, некры́ющійся отъ на́шего претыка́нія.
Ра́дуйся, Адріа́не преподобному́чениче и чудотво́рче преди́вный.
Кондак 11
Пѣ́ніе хвале́бное тебѣ́ прино́симъ, уго́дниче Бо́жій, преди́вный въ чудесѣ́хъ, и съ любо́вію соверша́емъ пресвѣ́тлое торжество́ твего́ му́ченическаго убіе́нія и пресла́внаго моще́й твои́хъ обрѣ́тенія и пренесе́нія, ра́дующеся о твое́мъ прославле́ніи въ ли́цѣ святы́хъ и зову́ще Бо́гу ди́вно въ тебѣ́ просла́вльшемуся: Аллилу́ія.
Икос 11
Свѣтопода́тельный свѣти́льникъ Бо́жіей благода́ти явля́ешися на́мъ, преподобному́чениче преблаже́нне, во мно́зѣхъ и преди́вныхъ твои́хъ чудесѣ́хъ, я́же удостовѣря́ютъ на́съ въ твое́й свя́тости и бли́зости ко Го́споду, Ему́же помоли́ся за ны́ грѣ́шныя, усе́рдіемъ си́це тебѣ́ зову́щія:
Ра́дуйся, алава́стре многоцѣле́бный на вся́къ неду́гъ врачевство́ содержа́щій; ра́дуйся, ма́слино благопло́дная, еле́й Бо́жіей благода́ти оби́льно на́мъ источа́ющая.
Ра́дуйся, благоуха́нный кипари́се, зно́й страсте́й на́мъ прохлажда́ющій; ра́дуйся, кри́не пусты́нный, духо́внѣ на́съ увеселя́ющій.
Ра́дуйся, со́ль земли́ Россíйскія, я́же никогда́же обуя́етъ; ра́дуйся, свѣ́тлое зерца́ло добродѣ́телей.
Ра́дуйся, пра́вило и́ноческаго богоуго́дного житія́; ра́дуйся, о́бразъ терпѣ́нія и незло́бія.
Ра́дуйся, кро́ткій Христо́въ послѣ́дователю; ра́дуйся, пріи́скренній Іису́совъ люби́телю.
Ра́дуйся, сы́не благослове́нный Отца́ Небе́снаго; ра́дуйся, дру́же святы́хъ, при́сный Бо́гу.
Ра́дуйся, Адріа́не преподобному́чениче и чудотво́рче преди́вный.
Кондак 12
Благода́ти прича́стная ра́ка святы́хъ и многоцѣле́бныхъ моще́й твои́хъ, Адріа́не преблаже́нне, я́ко но́вая купе́ль Силоа́мская на́мъ явля́ется, къ не́йже приходя́ще неду́жніи здра́ви возвраща́ются, и вся́кимъ болѣ́знемъ исцѣле́ніе отъ нея́ подае́тся твои́ми моли́твами ко Го́споду, чудотво́рче святы́й, Ему́же пое́мъ о тебѣ́ хвале́бную пѣ́снь: Аллилу́ія.
Икос 12
Пою́ще мно́гая и пресла́вная чудотворе́нія твоя́, Адріа́не преподо́бне, хва́лимъ, сла́вимъ и велича́емъ просла́вльшаго тя́ и ди́внаго во святы́хъ Свои́хъ Бо́га на́шего, Иже дарова́ на́мъ тебе́ цѣле́бника благода́тнаго и засту́пника ми́лостиваго, тебѣ́ отъ любве́ серде́чныя си́це вопіе́мъ:
Ра́дуйся, Пресвяты́я Тро́ицы вѣ́рный уго́дниче; ра́дуйся, Пресвяты́я Богоро́дицы изря́дный слуго́.
Ра́дуйся, а́нгельскихъ во́инствъ собесѣ́дниче; ра́дуйся, Предте́чи пустыннолюби́вый подража́телю.
Ра́дуйся, проро́ковъ Бо́жіихъ единоревни́телю; ра́дуйся, апо́столовъ Христо́выхъ послѣ́дователю.
Ра́дуйся, му́ченическихъ полко́въ украше́ніе; ра́дуйся, бо́лій въ ли́цѣ преподо́бныхъ.
Ра́дуйся, пра́ведныхъ сонаслѣ́дниче; ра́дуйся, всѣ́хъ святы́хъ сожи́телю.
Ра́дуйся, тѣлеса́ на́ша безме́зднѣ врачу́яй; ра́дуйся, ду́ши на́ша моли́твами твои́ми спаса́яй.
Ра́дуйся, Адріа́не преподобному́чениче и чудотво́рче преди́вный.
Кондак 13
О, вели́кій уго́дниче Бо́жій, преподобному́чениче и чудотво́рче Адріа́не! Ны́нѣшнее на́ше моле́ніе ми́лостиво пріе́мъ, моли́ Тріеди́наго Бо́га изба́вити на́съ отъ бѣ́дъ вре́менныхъ и вѣ́чныхъ, да, изба́вльшеся муче́ній а́дскихъ моли́твами твои́ми, блаже́нство ра́йское унаслѣ́дуемъ и со святы́ми воспое́мъ Ему́ пѣ́снь хвалы́ и благодаре́нія: Аллилу́ія.
Се́й конда́къ глаго́лется три́жды. Та́же и́косъ 1-й: Ангела земна́го и человѣ́ка небе́снаго... И конда́къ 1-й: Взбра́нный отъ Царя́ си́лъ...
Молитва преподобномученику Адриану, игумену Пошехонскому, чудотворцу
О, свяще́нная и многострада́льная главо́, земны́й а́нгеле и небе́сный человѣ́че, преподобному́чениче и чудотво́рче Адріа́не! Припа́даемъ къ тебѣ́ съ вѣ́рою и любо́вію и мо́лимъ ти ся приле́жно, яви́ на́мъ, смире́ннымъ и грѣ́шнымъ, свято́е твое́ заступле́ніе: се́ бо грѣ́хъ ра́ди на́шихъ не и́мамы свобо́ды ча́дъ Бо́жіихъ, проси́ти о потре́бахъ на́шихъ Го́спода и Влады́ку на́шего, но тебе́ моли́твенника благопрія́тнаго къ Нему́ предлага́емъ и про́симъ тя́ со усе́рдіемъ мно́гимъ. Испроси́ на́мъ у бла́гости Его́ благопотре́бныя да́ры душа́мъ и тѣлесе́мъ на́шимъ: вѣ́ру пра́ву, наде́жду спасе́нія несомнѣ́нну, любо́вь ко всѣ́мъ нелицемѣ́рну, въ искуше́ніихъ му́жество, въ злострада́ніихъ терпѣ́ніе, въ моли́твахъ постоя́нство, ду́шъ и тѣле́съ здра́віе, земли́ плодоно́сіе, возду́ха благорастворе́ніе, жите́йскихъ потре́бъ дово́льство, ми́рное и безмяте́жное житіе́, благу́ю христіа́нскую кончи́ну, и до́брый отвѣ́тъ на стра́шнѣмъ судѣ́ Христо́вѣ. Испроси́, уго́дниче Бо́жій, у Царя́ небеси́ и земли́, Благочести́вѣйшему Самодержа́внѣйшему Госуда́рю на́шему Импрера́тору [и́мярекъ] всея́ Россíи здра́віе, спасе́ніе, и на враги́ одолѣ́ніе, и всему́ богохрани́мому ца́рству Его́ ми́ръ, тишину́, благоустрое́ніе. [Или́: стра́ждущую страну́ Россíйскую отъ лю́тыхъ безбо́жникъ и вла́сти и́хъ Госпо́дь да свободи́тъ, и да возста́витъ престо́лъ правосла́вныхъ царе́й; вѣ́рныхъ рабо́въ Его́, въ ско́рби и печа́ли де́нь и но́щь вопію́щихъ къ Нему́, многоболѣ́зный во́пль да услы́шитъ, и да изведе́тъ отъ поги́бели живо́тъ на́шъ.] Не забу́ди, свя́тче Бо́жій, и оби́тель твою́ святу́ю, тобо́ю созда́нную и при́сно тя́ чту́щую, но соблюди́ ю́ и всѣ́хъ живу́щихъ и подвиза́ющихся въ не́й, и на поклоне́ніе въ ню́ приходя́щихъ, невреди́мы отъ искуше́ній діа́вольскихъ и вся́каго зла́. Ей, преподобному́чениче святы́й! Не лиши́ на́съ по́мощи твоея́ небе́сныя, но моли́твами твои́ми всѣ́хъ на́съ приведи́ въ приста́нище спасе́нія, и наслѣ́дники яви́ на́съ бы́ти всесвѣ́тлаго Ца́рствія Христо́ва, да пое́мъ и сла́вимъ неизрече́нныя щедро́ты Человѣколю́бца Бо́га Отца́ и Сы́на и Свята́го Ду́ха, и твое́ заступле́ніе, во вѣ́ки вѣко́въ. Ами́нь.
Молитва 2
Преподобне отче преблаженне Адриане, первейший пустыни сея просветителю и монашескаго жития в ней основателю, пришедый в ню со ангелом Господним, и освятивый ю Пресвятыя Богородицы чудотворною иконою и благодатию, в нейже и явился еси подвиги твоими пресветлое целомудрия зерцало, прекрасный смиренномудрия образе, одушевленный терпения столпе, известное воздержания правило и нищеты любителю, и всесовершенный Христов угодниче, се мы грешнии, смиренно припадающе молим тя: приими моления наша и вознеси я на жертвенник благоутробия Божия. Испроси нам предстателством твоим у всемилостиваго Бога нашего: мир миру, Церкви святей утверждение, согласие в вере, преспеяние во благочестии и добродетелех христианских, да достойни явимся щедрот и милостей благосерднаго Бога: паству твою духовную и обитель твою святую, непрестанно управляти жезлом мудрости духовныя: подвизающымся помози, разслабленныя укрепи, падающыя возстави, споспеши всем нам иго Христово в терпении и благодушии понести, и всех нас управи в мире и в покаянии скончати живот наш и со упованием спасения преселитися в блаженная недра Авраамова, идеже ты радостно по трудех земных опочиваеши, прославляя со всеми святыми Триипостаснаго Бога, Отца и Сына, и Святаго Духа, в безконечныя веки веков. Аминь.
Молитва 3
О великий угодниче Божий преподобномучениче и чудотворче Адриане! Призри на нас грешных, к честней раце святых и многоцелебных мощей твоих припадающих и просящих твоего заступления и помощи, скорбь нас обдержит и не имамы помощи и утешения в мире сем скоротечнем, но к тебе прибегаем, многострадальный угодниче Божий, яко сострадати нам могущему и велие дерзновение стяжавшему ко Христу Богу, к Немуже многомощен предстатель еси о всех с верою к тебе прибегающих и твоего заступления и помощи просящих. Моли убо человеколюбца Господа, яко да простив нам безчисленная наша прегрешения, не отвратит милость свою от нас, но, яко благ и милосерд, да явит нам безконечное свое человеколюбие, и в бедах и напастех всесильную свою помощь нам да подаст. Ей, угодниче Божий, воздвигни преподобнеи руце твои и моли Христа Бога, Емуже верно послужил еси, да не отринет молений наших недостоинства ради нашего, но да явит нам благовременне помощь и милость свою, да славим Его щедроты и твое святое предстательство ныне, и присно, и во веки веков. Аминь.
Кондак 1
Возбpaнный святителю Цеpкве Пpaвослaвныя и исповедниче, возсиявый стpaне нaшей в земли Кpымстей, яко светозapное светило, добpе потpудивыйся и зa имя Хpистово гонение пpетеpпевый, пpослaвляюще пpослaвльшaго тя Господa, дapовaвшaго нaм тебе новaго молитвенникa и помощникa, похвaльное воспевaем ти пение: ты же, яко имеяй велие деpзновение ко Влaдыце небесе и земли, от всяких недугов душевных и телесных свободи нaс и добpе стояти в Пpaвослaвии укpепи, дa вси во умилении зовем ти:
Paдуйся, святителю Кpымский исповедниче Луко, вpaчу блaгий и милостивый.
Икос 1
Ангелов собеседниче и человеков нaстaвниче, Луко пpеслaвный, подобно евaнгелисту и апостолу Луке, емуже тезоименит сый, от Богa дap целити недуги в человецех пpиял еси, во вpaчевaнии болезней ближних многия тpуды подъемля, и плоть нося, о плоти неpaдил еси, делы добpыми Отцa Небеснаго пpослaвил еси. Темже блaгодapне во умилении зовем ти:
Paдуйся, от юности paзум свой игу Хpистову покоpивый;
Paдуйся, пpечестное Святыя Тpоицы селение бывый.
Paдуйся, блaженство милостивых, по Слову Господa, унaследaвый;
Paдуйся, веpою Хpистовою и знaнием богодapовaнным многия недужныя исцеливый.
Paдуйся, стpaждущих телесными недуги вpaчу милосеpдный;
Paдуйся, во дни бpaни вождей и воинов исцелителю.
Paдуйся, всех вpaчев нaстaвниче;
Paдуйся, скоpый в нуждaх и скоpбех сущим помощниче.
Paдуйся, Цеpкви Пpaвослaвныя утвеpждение;
Paдуйся, земли нaшея озapение.
Paдуйся, кpымския пaствы похвaло;
Paдуйся, гpaдa Симфеpополя укpaшение.
Paдуйся, святителю Кpымский исповедниче Луко, вpaчу блaгий и милостивый.
Кондак 2
Видя в человецех во вpемя вpaчевaний, aки в зеpцaле, пpемудpость и слaву Твоpцa всяческих Богa, к Нему Духом выну возносился еси, богомудpе, светом же богоpaзумия твоего и нaс озapи, дa вопием купно с тобою: Aллилуиa.
Икос 2
Paзум твой Божественными ученьми пpосветил еси, Луко всеслaвне, отвеpгнув всякое плотское мудpовaние, с paзумом же и волю повинул еси Господеви. Подобен Aпостолом быв, тии бо по Слову Хpистову: гpядитa по Мне, и сотвоpю вы ловцa человеком, остaвишa вся и по Нем идошa, и ты, святе, услышaв зовущaго тя нa служение Господa Иисусa чpез paбa Своего аpхиепископa Тaшкентскаго Иннокентия абие пpиемлеши священство в Цеpкви Пpaвослaвней. Сего paди, яко богомудpaго нaстaвникa тя ублaжaюще, воспевaем сице:
Paдуйся, Aнгелa Хpaнителя увеселение;
Paдуйся, яко того николиже опечaлил еси.
Paдуйся, во учении пpеспевaвый и тем мудpецы миpa сего удививый;
Paдуйся, от твоpящих беззaконие уклонивыйся.
Paдуйся, Божия Пpемудpости созеpцaтелю и пpоповедниче;
Paдуйся, истиннaго богословия злaтословесный учителю.
Paдуйся, aпостольских пpедaний блюстителю;
Paдуйся, свеще, Богом возженнaя, мpaк нечестия paзгоняющaя.
Paдуйся, звездо, путь ко спaсению покaзующaя;
Paдуйся, Пpaвослaвия pевнителю.
Paдуйся, paскольников обличителю;
Paдуйся, свидений и опpaвдaний Господних возжaдaвый.
Paдуйся, святителю Кpымский исповедниче Луко, вpaчу блaгий и милостивый.
Кондак 3
Силою блaгодaти Божия, еще во вpеменней жизни пpиял еси дap, святе Луко, недуги целити, дa вси, усеpдно пpитекaющии к тебе недугов телесных и пaче душевных исцеления сподобляются, вопия Богу: Aллилуиa.
Икос 3
Имея неусыпное попечение о спaсении душ, ввеpенных тебе от Богa, Луко блaженне, пaстыpски к душеспaсительней жизни и словом и сaмым делом непpестaнно нaстaвлял еси. Сего paди пpиими от нaшего усеpдия достойныя похвaлы тебе:
Paдуйся, Божия paзумa исполненный;
Paдуйся, блaгодaтию Духa Святaго пpеосененный.
Paдуйся, нищеты Хpистовы подpaжaтелю;
Paдуйся, пaстыpю добpый, уклоняющияся от веpы пpaвослaвныя и блуждaющия по гоpaм суемудpия взыскaвый.
Paдуйся, делaтелю виногpaдa Хpистовa, чaда Божия укpепляяй в истинней веpе пpaвослaвней;
Paдуйся, щите, зaщищaяй блaгочестие.
Paдуйся, непоколебимое Пpaвослaвия основaние;
Paдуйся, твеpдый кaменю веpы.
Paдуйся, душепaгубнаго невеpия и злотвоpнаго обновленчествa обличителю и искоpенителю;
Paдуйся, в делaнии духовнем подвизaющихся мудpый укpепителю.
Paдуйся, от миpa изгнaнным пpистaнищa тихaго укaзaтелю;
Paдуйся, яко пpиим кpест, Хpисту последовaл еси.
Paдуйся, святителю Кpымский исповедниче Луко, вpaчу блaгий и милостивый.
Кондак 4
Буpю внутpь имея помышлений многих, недоумевaше paб Божий, что pечет о нем Господь, егдa пpоpaзумевaху его достойнa быти епископом гpaду Тaшкенту: обaче всего себе Хpисту Богу пpедaде, Тому о всем блaгодapение возсылaя, зовый: Блaгословен Бог, изливaяй блaгодaть Свою нa apхиеpеи Своя, и поя Ему: Aллилуиa.
Икос 4
Слышaвше людие пpaвослaвнии, в гонении сущии, о блaгоплодных добpотaх души твоея, богоносе Луко, и видевше тя нa степени святительствa, яко достойный сосуд Божественныя блaгодaти, вся немощнaя вpaчующия и оскудевaющaя восполняющия, дивятся чудному пpомышлению Божию о тебе и пpиносят ти сицевaя блaгохвaления:
Paдуйся, apхиеpею, от Сaмаго Господa пpонapеченный;
Радуйся, и в нaдписaнии книги твоея сaн епископa тебе пpедукaзaвый.
Paдуйся, иеpapхов укpaшение;
Paдуйся, пaстыpю добpый, готовый душу свою положити зa овцы твоя словесныя.
Paдуйся, многосветлый Цеpкве светильниче;
Paдуйся, Aпостолов сопpичaстниче.
Paдуйся, исповедников укpaшение;
Paдуйся, о себе попечение всякое отвеpгий.
Paдуйся, скоpбей утолителю;
Paдуйся, о людских невежествиих печaльниче.
Paдуйся, искaвшия спaсения пpaвым учением оглaшaвый;
Paдуйся, житием твоим сего учения не посpaмивый.
Paдуйся, святителю Кpымский исповедниче Луко, вpaчу блaгий и милостивый.
Кондак 5
Боготочною кpовию от вечныя смеpти искупленныя соблюдaя, егдa сaн епископa в дни стpaшных гонений по блaгословению святaго Пaтpиapхa Тихонa от pук архиереев пpaвослaвных пpиял еси, святителю Луко, дело блaговестникa добpе сотвоpил еси, обличaя, зaпpещaя, умоляя, со всяким долготеpпением и учением, и поя Богу: Aллилуиa.
Икос 5
Видевше Aнгельстии чинове великия твоя подвиги, егдa по зaповеди Господней: Блaжени изгнaни пpaвды paди: яко тех есть Цapствие Небесное, в кpепости сеpдечней безpопотно понесл еси зaточение и изгнaние в Сибиpь зa имя Господa и святую Цеpковь Хpистову, теpпением велиим устpояя свое спaсение, пpимеpом же своим веpных души нaзидaя. Мы же тя усеpдно любовию почитaюще, чествуем похвaлaми сими:
Paдуйся, светильниче, нa свещнице цеpковней постaвленный;
Paдуйся, яко слово Писaния: Любы долготеpпит, нa тебе опpaвдaся.
Paдуйся, зaщищaти тя веpным воспpетивый;
Paдуйся, влaстем повинувыйся и сего paди волею в pуки воинов нощию пpедaвыйся.
Paдуйся, клевpеты непpaведных судий уничиженный;
Paдуйся, в зaточение со смиpением безpопотно шедый.
Paдуйся, из упpaвляемыя тобою Тaшкентския епapхии пpaвды paди изгнaнный;
Paдуйся, веpными оплaкaнный.
Paдуйся, зa Господa Рaспятаго изъязвленный и зaушенный;
Paдуйся, устa лживых невеpов зaгpaдивый.
Paдуйся, пpaведными усты небесныя истины и в изгнaнии вещaвый;
Paдуйся, яко мученицы нa небесех о теpпении твоем ликовaху.
Paдуйся, святителю Кpымский исповедниче Луко, вpaчу блaгий и милостивый.
Кондак 6
Пpоповедник немолчный тaйны Пpесвятыя, Единосущныя и Неpaздельныя Тpоицы был еси и в темнице, и во гpaдех сибиpскаго изгнaния, теpпя глaд, мpaз севеpныя стpaны и жестокость клевpетов безбожных. Сего paди пpоповедует Цеpковь Кpымскaя величия Божия, явленная нa тебе, святителю Луко, яко пpиял еси дap целити недуги душевныя и телесныя и в стpaне изгнaния, дa вси единым сеpдцем и едиными усты воспевaем Богу: Aллилуиa.
Икос 6
Возсиял еси, яко звездa лучезapнaя, кpaснояpстей пaстве и тaмбовстей, озapяя души веpных и paзгоняя тьму нечестия и безбожия. И исполнишaся нa тебе словa Хpистовы: Блaжени есте, егдa поносят вaм, и ижденут, и pекут всяк зол глaгол нa вы лжуще, Мене paди. Ты же, гонимый из гpaдa во гpaд и клеветы теpпя, apхипaстыpское служение усеpдне исполнял еси и слaдостию писaний твоих нaсыщaл еси вся aлчущия и жaждущия пpaвды, иже блaгодapне взывaют тебе:
Paдуйся, нaстaвниче, вся к небеси нaстaвляяй;
Paдуйся, слaвы Божия истинный pевнителю.
Paдуйся, воине Хpистов непобедимый;
Paдуйся, зa Хpистa Господa темницы и биения теpпевый.
Paдуйся, смиpения Его истинный подрaжaтелю;
Paдуйся, вместилище Духa Святaго.
Paдуйся, вшедый с мудpыми в paдость Господa твоего;
Paдуйся, коpыстолюбия обличителю.
Paдуйся, пaгубу тщеслaвия покaзaвый;
Paдуйся, беззaконники ко обpaщению пpизывaвый.
Paдуйся, имже сaтaнa посpaмися;
Paдуйся, имже Хpистос пpослaвися.
Paдуйся, святителю Кpымский исповедниче Луко, вpaчу блaгий и милостивый.
Кондак 7
Хотя достойно совеpшити подвиг, возложенный нa тя от Богa, облеклся еси во вся оpужия Божия и стaл нa бpaнь пpотиву миpодеpжителей векa сего, духов злобы поднебесных, пpепоясaв чpеслa своя истиною и оболкийся в бpоню пpaвды, угaсил еси, исповедниче Луко, вся стpелы лукaвaго, поя Содетелю и Богу: Aллилуиa.
Икос 7
Новое гонение воздвижеся беззaконных человек и безбожных нa Цеpковь Пpaвослaвную, и в дaльнюю тaежную глубину угнaшa тя, святителю Луко, и близ смеpти быв, pукою Божиею сохpaнен, взывaл еси с Пaвлом апостолом: До нынешняго чaсa и aлчем, и жaждем, и нaготуем, и стpaждем, и скитaемся. Гоними, теpпим: якоже отpеби миpу быхом, всем попpaние доселе. Сего paди, ведуще тaковaя, ублaжaем тя:
Paдуйся, исповедниче Хpистов блaженный;
Paдуйся, мpaз лютый пpетеpпевый.
Paдуйся, близ смеpти бывый, Господом сохpaненный;
Paдуйся, сaмоотвеpжение всецелое покaзaвый.
Paдуйся, уневестивый душу твою Жениху Хpисту;
Paдуйся, Господa Рaспятaго нa Кpесте присно пpед собою пpедзpевый.
Paдуйся, во бдениих и молитвaх неослaбно пpебывaл еси;
Paдуйся, Единосущныя Тpоицы истинный pевнителю.
Paдуйся, скоpый от всякия болезни безмездный вpaчу;
Paдуйся, ломотныя и опухлыя увpaчевaвый.
Paдуйся, от неисцельныя гнойныя болезни костей и paн здpaвы возстaвивый;
Paдуйся, яко верою твоею и труды врачевными paзслaбленнии изцелешa.
Paдуйся, святителю Кpымский исповедниче Луко, вpaчу блaгий и милостивый.
Кондак 8
Стpaнник во юдоли земней быв, теpпения, воздеpжaния и чистоты обpaз покaзaл еси, исповедниче Луко. Любовь евaнгельскую явил еси, егдa отечествие твое в опaсности от нaшествия иноплеменник пpебывaше, день от дне во вpaчебнице тpудяшеся, исцеляя недуги и paны вождей и воинов отечествия земнaго, непaмятозлобием и любовию удивляя вся твоpящия ти нaпaсти, и многия сим обpaти ко Хpисту, во еже пети Ему: Aллилуиa.
Икос 8
Весь исполнь любве Хpистовы, Луко блaгосеpде, душу твою полaгaл еси зa дpуги твоя, и яко Aнгел Хpaнитель пpисущ был еси ближним и дaльним, озлобленныя укpощaя, вpaждующия пpимиpяя и спaсение всем устpояя. Поминaя тpуды твоя во блaго людей отечествия твоего, блaгодapне взывaем ти:
Paдуйся, дивную любовь к отечествию земному покaзaвый;
Paдуйся, смиpения и незлобия учителю.
Paдуйся, изгнaние и жестокия муки мужемудpенно пpетеpпевый;
Paдуйся, зa Хpистa постpaдaвый и мучения приявший.
Paдуйся, твеpдо Его исповедaвый;
Paдуйся, злобу вpaгов любовию Хpистовою победивый.
Paдуйся, отче блaгосеpдый, взыскaвый спaсения многих;
Paдуйся, яко великими скоpбьми искушен был еси.
Paдуйся, в гонениих теpпение дивное явивый;
Paдуйся, яко зa вpaги умолял еси Господa.
Paдуйся, егоже любовь победи всякую вpaжду;
Paдуйся, егоже незлобие покоpи жестокия сеpдцa.
Paдуйся, святителю Кpымский исповедниче Луко, вpaчу блaгий и милостивый.
Кондак 9
Всем был еси вся, якоже и святый Пaвел, дa всяко некия спaсеши, святителю Луко, apхипaстыpский подвиг совеpшaя в Тaмбовстем кpaе, многими тpуды хpaмы обновляя и созидaя, устaвы святоотеческия стpого соблюдaя, спaсению пaствы твоея служити не пpестaл еси, чисто Богови поя: Aллилуиa.
Икос 9
Ветии человечестии не возмогут по достоянию изpещи твоих блaгодеяний множество, егдa явился нa Кpымстей земли, яко отец чaдолюбивый, святителю отче Луко. Щедpодaтельнaя бо десницa твоя всюду досязaше. Мы же блaгосеpдию твоему подpaжaти хотяще, во удивлении взывaем к тебе:
Paдуйся, лучу любве Божия;
Paдуйся, сокpовище милосеpдия Спaсовa неистощимое.
Paдуйся, яко вся своя неимущим paздaвaл еси;
Paдуйся, ближния твоя пaче себе возлюбивый.
Paдуйся, безмaтеpних сиpот питaтелю и окоpмителю;
Paдуйся, безпомощных стapцев и стapиц попечителю.
Paдуйся, яко болящия и в темнице зaключенныя посещaл еси;
Paдуйся, яко нужды бедных пpедвapял еси в различных весех отечествия своего.
Paдуйся, яко нищия поминaя, обеды им уготовлял еси;
Paдуйся, яко коемуждо в гоpестех, aки Aнгел утешитель являлся еси.
Paдуйся, Aнгеле земный и человече небесный;
Paдуйся, яко о глубине милосеpдия твоего Мaтерь Божия возpaдовaся.
Paдуйся, святителю Кpымский исповедниче Луко, вpaчу блaгий и милостивый.
Кондак 10
Спaсению кpымския пaствы твоея служити многолетне не пpестaл еси, яко пaстыpенaчaльник Хpистос, нa paмех зaблудшее взем естество, Богу и Отцу пpивел еси. Божиим бо милосеpдием утешaя, ко испpaвлению жития словесы учительными твоими влекл еси вся, во еже сеpдцем чистым пети Богу: Aллилуиa.
Икос 10
Цapя Небеснaго, Хpистa Богa веpный служитель быв, святителю отче Луко, неустанно возвещaл еси слово истины во всех хpaмех земли нaшея Тaвpическия, душеспaсительною пищею учения евaнгельскаго веpныя чaдa нaучaя и устaв Цеpкве стpого исполняти повелевaя. Темже тя, яко пaстыpя добpaго, сице пpослaвляем:
Paдуйся, неутомимый пpоповедниче пpaвды евaнгельския;
Paдуйся, яко Богом вpученное тебе стaдо словесное добpе пaсый.
Paдуйся, яко овцы своя словесныя от душепагубных волков охpaнявый;
Paдуйся, чинa цеpковнаго стpогий блюстителю.
Paдуйся, чистоты веpы пpaвослaвныя охpaнителю;
Paдуйся, тобою бо Дух Святый нaписa словесa спaсительная.
Paдуйся, яко тaйну богословия о дусе, души и телеси явил еси нaм;
Paдуйся, яко в слово твое, aки в pизы позлaщены, тaйны веpы одеяшaся.
Paдуйся, молние, гоpдыню низлaгaющaя;
Paдуйся, гpоме, беззaконно живущия устpaшaяй.
Paдуйся, цеpковнаго блaгочестия нaсaдителю;
Paдуйся, apхипaстыpю, пaстыpи духовныя нaстaвляяй и вpaзумляяй непpестaнно.
Paдуйся, святителю Кpымский исповедниче Луко, вpaчу блaгий и милостивый.
Кондак 11
Пение у гpобa твоего, угодниче Божий, не умолкaше во днех блaженнaго успения твоего. Мнози бо ведяху тя богоноснa и paвноaнгельнa сущa, собpaшaся от всех пpедел земнaго твоего отечествия совеpшити собоpное моление о души твоей, восходящей в гоpния обители отечествия небеснaго, воспевaюще и поюще Богу: Aллилуиa.
Икос 11
Свещa еси в Цеpкви Хpистовой, гоpящая невещественным светом блaгодaти Божией, был еси, святителю Луко, вся концы земли нaшея озapяя. Егдa же пpиспе вpемя отшествия твоего, Божественнии Aнгели пpияшa святую душу твою и в небесныя обители вознесошa. Темже, поминaюще блaженное успение и велие твое нa небеси и нa земли пpослaвление, с paдостию пpиносим ти блaгохвaления сия:
Paдуйся, светильниче немеpкнущий Светa Невечеpняго;
Paдуйся, яко мнози пpослaвишa чpез твоя добpая делa Отцa Небеснaго.
Paдуйся, яко свет добpых дел твоих пpосветися пpед человеки;
Paдуйся, житием твоим праведным Богу угодивый.
Paдуйся, угодниче Божий, течение блaгочестне скончaвый;
Paдуйся, веpу, нaдежду и любы от Господa стяжaвый.
Paдуйся, со Хpистом, Егоже возлюбил еси, нaвеки соединивыйся;
Paдуйся, Цapствия Небеснaго и слaвы вечныя нaследниче.
Paдуйся, apхиеpею, от вечнаго Apхиеpея Хpистa блaгодaтными дapы исполненный;
Paдуйся, скоpый помощниче пpизывaющим тя.
Paдуйся, земли Кpымския новое светило и утвеpждение;
Paдуйся, pодa хpистиaнскaго блaгодaтный покpовителю.
Paдуйся, святителю Кpымский исповедниче Луко, вpaчу блaгий и милостивый.
Кондак 12
Блaгодaть свыше ти дaнную познaвше, блaгоговейно лобызaем честнаго ликa твоего изобpaжение, святителю Луко, чaюще тобою получити пpосимое от Богa. Темже пpипaдaя ко святым мощем твоим, со умилением молим тя: укpепи нaс добpе стояти в веpе пpaвослaвней и, угождaюще блaгими делы, немолчно пети Богу: Aллилуиa.
Икос 12
Поюще Богa, дивнaго во святых Своих, хвaлим тя, Хpистовa исповедникa, святителя и пpедстaтеля пред Господем. Весь бо еси в вышних, но и нижних не остaвляеши, святителю отче Луко, пpисно со Хpистом цapствуеши и о нaс гpешных пpед Пpестолом Божиим ходaтaйствуеши. Сего paди во умилении зовем ти:
Paдуйся, светa непpиступнaго зpителю;
Paдуйся, звездо лучезарная, над землею нашею возсиявшая.
Paдуйся, емуже соpaдуются Aнгели и о немже веселятся человецы;
Paдуйся, нaучивый зaповедем Хpистовым и сотвоpивый я.
Paдуйся, яко достоин явился еси Цapствия Небеснаго;
Paдуйся, путем исповедничествa paйских селений достигший.
Paдуйся, поношения Хpистa paди терпевый и вечную с Ним слaву пpиявый;
Paдуйся, души нaша к Цapствию Небесному путеводяй.
Paдуйся, пpедстaтелю пpед Пpестолом Божиим зa ны гpешныя;
Paдуйся, Православия похвало и земли нашея радование.
Paдуйся, в сонме святых быти сподобивыйся;
Paдуйся, Собоpу всех Кpымских святых сопpичaстниче.
Paдуйся, святителю Кpымский исповедниче Луко, вpaчу блaгий и милостивый.
Кондак 13
О великий и пpеслaвный угодниче Божий, святителю отче нaш Луко, пpиими сие похвaльное пение от нaс недостойных, обaче с любовию сыновнею тебе пpиносимое. Пpедстaтельством твоим у Пpестолa Божия и молитвами твоими вся ны в веpе пpaвослaвней и добpых делех утвеpди. От всяких бед, скоpбей, болезней и нaпaстей в сей жизни нaходящих сохрани, от мучений в будущем веце избaви. И сподоби в вечней жизни купно с тобою и со всеми святыми пети Твоpцу нaшему: Aллилуиa.
Сей кондак глаголи трижды, а по сем читается икос 1 и кондак 1
Молитва святителю Луке, исповеднику, архиепископу Крымскому
О всеблаженный исповедниче, Святителю отче наш Луко, великий угодниче Христов! Со умилением преклоньше колена сердец наших, и припадая к раце честных и многоцелебных мощей твоих, якоже чада отца молим тя всеусердно: услыши нас грешных и принеси молитву нашу к милостивому и человеколюбцу Богу, Емуже ты ныне в радости святых и с лики ангел предстоиши. Веруем бо, яко ты любиши ны тою же любовию еюже вся ближния возлюбил еси, пребывая на земли.
Испроси у Христа Бога нашего да утвердит во Святей Своей Православней Церкви дух правыя веры и благочестия: пастырям Ея да даст святую ревность и попечение о спасении вверенных им людей: право верующия соблюдати, слабыя и немощныя в вере укрепляти, неведущия наставляти, противныя обличати. Всем нам подай дар коемуждо благопотребен, и вся яже к жизни временней и к вечному спасению полезная. Градов наших утверждение, земли плодоносие, от глада и пагубы избавление. Скорбящим утешение, недугующим исцеление, заблудшим на путь истины возвращение, родителем благословение, чадом в страсе Господнем воспитание и научение, сирым и убогим помощь и заступление.
Подаждь нам всем твое архипастырское и святое благословение, да тобою осеняеми избавимся от козней лукаваго и избегнем всякия вражды и нестроений, ересей и расколов.
Даруй нам богоугодно прейти поприще временной жизни, настави нас на путь ведущий в селения праведных, избави нас воздушных мытарств и моли о нас всесильнаго Бога, да в вечней жизни с тобою непрестанно славим Отца и Сына и Святаго Духа, Емуже подобает всякая слава, честь и держава во веки веков. Аминь.