Тропари, кондаки и величания - 24 марта 2025
Кондак мученика Епимаха
Многообразныя раны претерпел еси/ и венец прием от Христа Бога,/ Емуже о нас молися, блаженне Епимаше,/ верно совершающих память твою,// да спасет души наша.
Кондак святителя Софрония, патриарха Иерусалимского
Иже Божественною ревностию подвигся/ и истинных повелений устне распростер,/ церковная основания благоузаконив/ и тамо сущим монашеским составом предав,/ премудрый в Патриарсех Иерусалимский Софроние,/ всемудрая словеса во свет извел еси,/ имиже наставляемы, зовем ти:/ радуйся, светлая православных похвало.
Тропарь святителя Евфимия, архиепископа Новгородского, чудотворца
Избран быв Богови от юности,/ святителю Евфимие,/ и, сего ради архиерейства саном почтен быв,/ упасл еси люди, иже тебе Богом врученный;/ темже и по преставлении чудес дарования от Господа приял еси/ исцеляти различный недуги./ Того моли о нас,/ совершающих честную память твою,/ да тебе вси непрестанно ублажаем.
Кондак святителя Евфимия, архиепископа Новгородского, чудотворца
Яко архиереем сопрестольник/ и святителем изрядный поборник был еси, святителю Евфимие,/ не престай сохраняя отечество твое,/ град же и люди, иже тебе верою почитающия/ и честным мощем твоим покланяющияся,/ да велегласно тебе вси вопием:/ радуйся, святителю Богомудре.
Тропарь святителю Софронию, епископу Врачанскому
Щитом веры вооружився,/ мечем словесе безбожныя агаряны посекая,/ стадо твое упасл еси на земли./ В Небесней же обители вселився,/ Христа моли даровати народу нашему/ мир и велию милость.
Кондак святителю Софронию, епископу Врачанскому
Архиереев похвала и страдальцев украшение быв,/ святителю Софроние,/ добродетельми прославився,/ возсиял еси, яко солнце,/ нас просвещая и греховную тьму неведения отгоняя./ Но, яко имея дерзновение к Богу,/ мир испроси душам нашим и велию милость.