Тропари, кондаки и величания - 29 марта 2025
Кондак свв. апп. от 70 Апеллию, Урвану, Аристовулу, Амплию, Наркиссу и Стахию
Яко священная сокровища Всесвятаго Духа, и Солнца Славы сияния, по долгу воспоим мудрыя апостолы: Апеллия, Урвана же и Аристовула, Амплия, Наркисса и Стахия: яже благодать собра Бога нашего.
Тропарь апостолов
Апостоли святии,/ молите Милостиваго Бога,/ да прегрешений оставление// подаст душам нашим.
Кондак апостолов
Яко священная сокровища Всесвятаго Духа/ и Солнца Славы сияния,/ по долгу воспоим мудрыя апостолы,/ Апеллия, Урвана же и Аристовула,/ Амплия, Наркисса и Стахия,// яже благодать собра Бога нашего.
Кондак мученика Савина
Божественная прозябения,/ цвет неувядающий,/ розга многоплодная, богоносе Савине,/ иже верою чтущих память твою/ веселия твоего исполни// и молися непрестанно о всех нас.
Тропарь святителя Серапиона, архиепископа Новгородского
Твердый адамант воистину, отче, показался еси, во всем подобяся владыце своему святителю, неправедная изгнания, радуяся, претерпел еси: темже и Христос святителем и мучеником сликовна тя сотвори и дарова тя стаду твоему, яко сокровище неотъемлемо, чудесы всех обогащающа. Темже и мы, сошедшеся к раце мощей твоих, любовию вопием ти: моли о нас, пречестный архиерею Серапионе, отче наш!
Кондак святителя Серапиона, архиепископа Новгородского
Яко венцем, пресветлым украсися днесь великий Нов град, и ликует в память пастыря своего и учителя, яко диадиму царскую возложши, великая же она лавра светло радуется, идеже прослави Бог Своего угодника, и прояви последнему роду нашему цельбоносныя мощи твоя, святителю Серапионе, и Церкви Божия веселитися созывающи на славословие, велегласно вопиющи: радуйся, граду твоему и обители похвала и всея Русския земли пресветлый светильниче!