Каноны - 30 марта 2025

Песнь 1

Ирмос: Во глубине постла иногда фараонитское всвоинство преоруженная сила, воплощшееся же Слово всезлобный грех потребило есть, препрославленный Господь славно бо прославися.

Теснейший шествовал еси путь, непорочное и преподобное житие, мудре, проходя от юности, темже мою тесноту разшири ума восхвалити тя, в райстей широте водворяяся, Алексие.

Тебе самаго весьма Богу возложив, блаженне, вне плоти и мира был еси, богатству текущу Небесное предпочел еси и пребывающее и обещанный град Сион вечнующий.

Ложесн ты матерних неплодие разрешил еси, рождся, якоже Самуил, пребогате, во чреве же сердца чистый зачен страх, родил еси дух спасения Божественных добродетелей верою.

Богородичен: Божий Собезначальный Сын име яко виновну Тя к нам, Дево, подобия, едину, паче всея твари, Чистая, чисту Тя обрет. Тем Тя поем, вси роди, и ублажаем.

Песнь 3

Ирмос: Процвела есть пустыня, яко крин, Господи, языческая неплодящая, Церковь пришествием Твоим, в нейже утвердися мое сердце.

Пронзаемь желанием чистоты, чертогом, иже на земли, Небесный пременил еси и жены любовию сладчайшее Ангельское подобие.

Молвы житейския и тяжесть богатства оставил еси и пресельник был отечества, блаженне Алексие, Христове нищете подобяся.

Слезами, и болезньми, и воздержанием, всемудре, благое взыскал еси, когда приидет свет разума, безстрастие дая сердцу твоему.

Богородичен: Горе невидимый Ангелом, Чистая, доле из Тебе раждаемь, зрится совершен Человек, погибающий мир обновляя.

Седален, глас 3.

Мира красоту, преподобне, оставил еси, пременив богатством текущим непроходимое яве и пребывающее, Алексие. Темже со всеми тя святыми славим и торжествуем светло в памяти твоей, просяще обрести молитвами твоими, блаженне, велию милость.

Слава, и ныне, Богородичен:

Недомысленно и непостижно есть, Владычице Богорадованная, еже соделанное о Тебе страшное Божие таинство, ибо Необыменнаго, заченши, родила еси, плотию обложена от пречистых кровей Твоих. Егоже всегда, Чистая, яко Сына Твоего моли спастися душам нашим.

Песнь 4

Ирмос: Пришел еси от Девы, не ходатай, ни Ангел, но Сам, Господи, воплощся, и спасл еси всего мя, человека. Тем зову Ти: слава силе Твоей, Господи.

Претерпел еси нищету, проситель быв, нищ, якоже Лазарь, желание бо Божественное утешаше, блаженне, сердце твое, пожелавшее богатства Небеснаго.

Безпечальнаго и тихаго жития возжелал еси, единощи ядый в седмице, Алексие, желанием ожидающаго тя не мимотекущаго, всеблаженне, наслаждения.

Храм Богу сердце ищай соделати, в дому возлюбил еси Богоматере, славне, всегда седети и Небесныя доброты созирати.

Богородичен: Воздоивши Дателя, Дево, млека, алчущее и утесняемое ныне сердце мое насыти всякаго разума и умиления Божественнаго, молю Тя.

Песнь 5

Ирмос: Ходатай Богу и человеком был еси, Христе Боже: Тобою бо, Владыко, к Светоначальнику Отцу Твоему, от нощи неведения приведение имамы.

Токи священными напаяя всегда слез твою душу, соделал еси клас, воистину сторичествующ, Делателю Безсмертному добре соблюдаемь.

Виден был еси на земли, житие Безплотных подражая, премногим твоим, отче, воздержанием, досточудне, и в молитвах прилежанием, имже, яко светом, просветился еси.

Огнем молитв греха попалил еси вещь, мудре, бденными же стояньми всякое сладострастие успил еси, уснув же, к сиянию преставился еси невечернему.

Богородичен: Иже, во Свете живый, во святое чрево Твое вселися, Чистая, мир, погибший тьмою неразумия, паки назидая, Егоже моли вся просветити, поющия Тя.

Песнь 6

Ирмос: В бездне греховней валяяся, неизследную милосердия Твоего призываю бездну: от тли, Боже, мя возведи.

Яко храм жив Божий, тя, бывша Христово селение, Неискусобрачная проявляет крыющася и прославляет утаитися тщащагося.

Молитвы твоя Богу, яко кадило, блаженне, приятны быша, отсюду житием твоим верных разумы облаговонил еси Духа благодатию.

Священным житием украшаема, паки Христос не хотяща, славне, тя отечеству дает, отбегающа славы привременныя.

Богородичен: Законы естества, Чистая Владычице, Зиждитель, новосоделавый создания, из Тебе неизреченно раждается и обожает мя безмерною милостию.

Кондак, глас 2

Дом родителей твоих, яко чужд, имев, водворился еси в нем нищеобразно и, по преставлении венец прием славы, дивен на земли явился еси, Алексие, человече Божий, Ангелом и человеком радование.

Икос

Житием и словесы украсился еси и Христову Церковь возвеличил еси твоим житием, отца и матерь, царя и люди торжествовати устроив, делы же соблюд, еже по образу Божию, Алексие преподобне, возсиял еси в мире твоим целомудрием. Темже благодать добродетелей твоих облиставает вся, верою празднующия, отче, память твою, явил бо ся еси Ангелом и человеком радование.

Песнь 7

Ирмос: Богопротивное веление беззаконнующаго мучителя высок пламень вознесло есть. Христос же простре Богочестивым отроком росу духовную, Сый благословен и препрославлен.

Претерпел еси, преподобне, пред родительными враты седя, и весьма непознаваемь, и от отрок ругания подъемля, и наругаемь люте, и нищетою многою оскорбляемь.

Плоти твоея мудрование умертвив, зря родители, и сими непознаваемь, естества покрывал еси нужду, преподобне, и презрение твоих неискусных отрок, оскорбляющих тя.

О, чудесе! Како пребыл еси, присно нищетствуя, в богатстве, Алексие, безмернаго смирения? Како претерпел еси ругания и укоризны от отрок, премудре, твоих, не ведевших жития твоего?

Богородичен: Великаго служительница Ты таинства была еси, Всенепорочная: Бога бо воплотила еси, великих зол нас избавльшаго, Тя величающия, Чистая Благословенная, Богорадованная.

Песнь 8

Ирмос: Пещь иногда огненная в Вавилоне действа разделяше, Божиим велением халдеи опаляющая, верныя же орошающая, поющия: благословите, вся дела Господня, Господа.

Неведом прежде родителем сый, во время отшествия твоего сим тайну открываеши, являемь в славу Бога нашего, славне, вельми тя и достойне прославльшаго.

Господь гласом велиим являет тя всему Риму, сокровенное сокровище, пребогате, в нищетне образе лежаща и дары врачеваний вся, верою к тебе приходящия, обогащающа.

Князи людстии, и царие снидошася, и священницы, блаженне, погребсти тя Божиим мановением и, видяще велие видение, дивишася чудесем, преподобне, яже творил еси Божественною силою Духа.

Богородичен: Истлевшия ны древле преступлением обновляя, Человеколюбец нетленно воплотися от нетленныя Твоея, Всенепорочная, утробы и избави всех греховныя тли, Богоневестная.

Песнь 9

Ирмос: Безначальна Родителя Сын, Бог и Господь, воплощся от Девы, нам явися, омраченная просветити, собрати расточенная, тем Всепетую Богородицу величаем.

Исцеления источил еси, ко гробу несом, Богу тя, блаженне, вельми славящу: свет бо невидящии видеша и глаголание прияша прежде суще немии, всеславне Алексие.

Виден был еси, предлежащ и к погребению несом, яко солнце, отче, испущая исцелений зари преславно, и темныя страсти отгоняя, и опаляя демоны, и просвещая Богомудрыя.

Прииде погребсти тя Патриархов первейший, царь же, вельми христолюбивейший, князи, старцы и юнии и монашествующих лицы, Божественным мановением освящающеся прикосновением твоим, блаженне.

Восхищен был еси, на колеснице добродетелей несом, и почиваеши, идеже преподобных чини, собор апостол и мучеников, патриархов и всех праведник, с нимиже нас помяни, почитающия тя, Алексие.

Богородичен: Глас Тебе приносим Гавриилов, Всенепорочная, радуйся, глаголюще, ниво неделанная; радуйся, клятвы разрешение; радуйся, источниче воды животныя, преподобных похвало, Богородице Приснодево.

Светилен

О, чудо: како во вратех родителей твоих, многолетне, якоже некий адамант, терпел еси, естества нуждею не преклонился, ни родителей же и супружницы, Алексие, горькими рыданьми.

Песнь 1

Ирмос: Воду прошед, яко сушу, и египетскаго зла избежав, израильтянин вопияше: Избавителю и Богу нашему поим.
Припев: Преподобне отче наш Макарие, моли Бога о нас.
Отверзи ми, Христе, устне воспети подвиги угодника Твоего, преподобнаго Макария, да молитвами своими облак разорит неведения моего.
Преподобне отче наш Макарие, моли Бога о нас.
Блаженное житие на земли пожив, преподобне, Небесное наслаждение достигл еси и ныне со Ангелы ликуеши.
Слава: Память твоя, Макарие преподобне, яко пресветлое солнце, возсия, в нюже нам испроси от Бога благодать и милость и согрешений избавление.
И ныне: Благословен Плод, Пречистая, чрева Твоего, Имже земнии вси клятвы избавихомся, Благословенная Всечистая, несказанное чудо, неведомое слышание, всех же верных спасение.

Песнь 3

Ирмос: Ты еси утверждение притекающих к Тебе, Господи, Ты еси Свет омраченных, и поет Тя дух мой.
Преподобне отче наш Макарие, моли Бога о нас.
Крепкою твоею молитвою, отче, возшел еси к премирному наслаждению и от честныя раки чудес сияния испущаеши, Макарие.
Преподобне отче наш Макарие, моли Бога о нас.
В Божественней памяти твоей днесь сошедшеся, воспеваем твоя подвиги, и болезни, и исправления, отче преподобне.
Слава: Чудно житие твое явися, преподобне, благодатию Божественнаго Духа обложен, блаженную кончину приял еси, отче, радуяся.
И ныне: От ложесн Твоих, Пречистая, правды Солнце возсия и мир просвети, Егоже Божественными зарями и мене просвети.

Господи, помилуй (трижды).
Седален, глас 8-й
Хранитель сый Божественных повелений Владыки, славне, чистое житие твое показа тя священнодетеля Божественна, каплями потов твоих прелести лютое углие погасил еси и в тихое пристанище достигл еси, зриши, блаженне, Егоже возжелел еси. Темже вопием ти: моли Христа Бога грехов оставление подати чтущим любовию святую память твою.
Слава, и ныне: Яко Деву и едину в женах, Тя, без семене рождшую Бога плотию, вси ублажаем, роди человечестии, Огнь бо вселися в Тя Божества, и яко Младенца доиши Зиждителя и Господа. Тем, Ангельский и человеческий род, достойно славим пресвятое Рождество Твое и согласно вопием Ти: моли Христа Бога согрешений оставление даровати покланяющимся верою пресвятому Рождеству Твоему.

Песнь 4

Ирмос: Услышах, Господи, смотрения Твоего таинство, разумех дела Твоя и прославих Твое Божество.
Преподобне отче наш Макарие, моли Бога о нас.
В простоте души, яко Ангел, пожив, блаженне, страстей разгнал еси душетленную прелесть Божественною благодатию.
Преподобне отче наш Макарие, моли Бога о нас.
Честен сосуд явился еси Божественнаго Духа, нося в сердцы твоем, блаженне, Божественныя ароматы, услаждая сердца верно память твою почитающих.
Слава: Пресветлым венцем обложен, предстоиши Престолу всех Царя: молися, преблаженне, с верою празднующих Божественную память твою.
И ныне: Законы в Тебе испразднишася естества, паче естества бо Слово родила еси. Темже Тя верою молю: паче естества человеча, Всенепорочная, много согрешша и Бога удальшася, обращшася, спаси мя молитвами Твоими.

Песнь 5

Ирмос: Утренююще, вопием Ти: Господи, спаси ны, Ты бо еси Бог наш, разве Тебе, иного не вемы.
Преподобне отче наш Макарие, моли Бога о нас.
Егда благодатию Духа смиренную стяжал еси мудрость, раждающему смерть врагу глубоку язву дал еси и высокоумный того нрав до конца низложил еси.
Преподобне отче наш Макарие, моли Бога о нас.
Возшед ко обителем вечным, лику преподобных причтился еси, Макарие, с нимиже нас поминай, на земли тебе поминающих.
Слава: Да ублажится достойно Макарий: пощением бо, и молитвами, и слезами Богу соединися и вся просвещает духовною благодатию.
И ныне: О Мати Дево Отроковице, яже необыменнаго Бога плотию рождшая, Ангелов слава и демонов язва, Богоневесто, мое сердце, уязвившееся грехом, цельбы Божественныя сподоби.

Песнь 6

Ирмос: Молитву пролию ко Господу и Тому возвещу печали моя, яко зол душа моя исполнися и живот мой аду приближися, и молюся, яко Иона: от тли, Боже, возведи мя.
Преподобне отче наш Макарие, моли Бога о нас.
На земли добре пожил еси, преподобне, и святых светлости, и вечных наслаждений блаженство видети сподобился еси.
Преподобне отче наш Макарие, моли Бога о нас.
Честна смерть явися блаженнаго Макария пред Тобою, Боже всяческих, егоже память почитающим врачество безмездно явил еси.
Слава: Духа благодать приял еси, отче, недуги от человек прогоняти и вред демонский истребляти, великий угодник показался Христа Бога нашего.
И ныне: Найде на Тя Вседетельный Дух, Всенепорочная, и Слово Божие в Тя вселися, и плоть бысть несказанно, пребыв неизменен.

Господи, помилуй (трижды). Слава, и ныне:
Кондак, глас 2-й
Вышних желая, воздержанием, и труды, и поты насладився, желание плоти твоея обуздав, чудес дар прием от Христа Бога, светильник явился еси пресветлый. Темже Христова Церковь песньми славит тя, преподобне Макарие, отче наш.
Икос
Ангел земный и человек Небесный, просиял еси в воздержании всяцем молитвою, и постом, и чистотою и, Божественное течение скончав, Вышняго нетления причастник был еси, Богоносе, дерзновение стяжав к Человеколюбцу Богу, Иже исцелений благодать на недуги различныя тебе дарова. Темже ти верою вопием: радуйся, всеблаженне отче, постников похвало; радуйся целомудрия столпе, имже демонския шатания искоренишася; радуйся, светильниче многосветлый, иже чудес сиянии вселенную просвещаеши; радуйся, яко стаду твоему подаваеши помощь и заступление; радуйся, крестоносному народу нашему похвала и утверждение, егоже соблюди молитвами твоими от враг ненаветна, да вси вопием ти: радуйся, преподобне Макарие, отче наш.

Песнь 7

Ирмос: Божия снизхождения огнь устыдеся в Вавилоне иногда. Сего ради отроцы в пещи, радованною ногою, яко во цветнице, ликующе, пояху: благословен еси, Боже отец наших.
Преподобне отче наш Макарие, моли Бога о нас.
К Свету Незаходиму возшед и, яко солнце, просвещаеши вселенную, Света бо дела совершил еси, Макарие преподобне, и ныне вопиеши: отец наших Боже, благословен еси.
Преподобне отче наш Макарие, моли Бога о нас.
Плотская движения, преподобне, воздержанием и на земли леганием умертвил еси и добродетелей просвещением просиял еси, вопия Христу: отец наших Боже, благословен еси.
Слава: Чудно житие твое, преподобне, явися, благодатию Божественнаго Духа обложен, блаженную кончину приял еси, о Христе радуяся, к Немуже и взывал еси: отец наших Боже, благословен еси.
И ныне: Ныне вся исполнишася Света Божественнаго Тобою, Пречистая, Ты бо дверь явилася еси, еюже миру Бог прииде, просвещая верою зовущия: отец наших Боже, благословен еси.

Песнь 8

Ирмос: Седмерицею пещь халдейский мучитель Богочестивым неистовно разжже, силою же лучшею спасены, сия видев, Творцу и Избавителю вопияше: отроцы, благословите, священницы, воспойте, людие, превозносите во вся веки.
Преподобне отче наш Макарие, моли Бога о нас.
Божественными добротами наслаждаяся, чудес сиянии вся просвещаеши и демонскую тьму разоряеши Божиею благодатию, поя: отроцы, благословите, священницы, воспойте, людие, превозносите во вся веки.
Преподобне отче наш Макарие, моли Бога о нас.
Блистаяся благодатию Божественнаго Духа, преподобне Макарие, честное твое творящим успение светлыми твоими молитвами испроси грехов отпущение, поющим: отроцы, благословите, священницы, воспойте, людие, превозносите во вся веки.
Слава: Зарями твердых подвиг твоих, яко солнце, возсиял еси: врачевания источаеши и всяку болезнь облегчаеши Христу вопиющим: отроцы, благословите, священницы, воспойте, людие, превозносите во вся веки.
И ныне: Яко разбойник, взываю ти: помяни мя, Человеколюбче. Плачу, яко блудница, и вопию: согреших, яко древле блудный, кающася приими мя, отчаяннаго, Богородицы ради, да усердно вопию: священнии, воспойте, людие, и превозносите Христа во веки.

Песнь 9

Ирмос: Ужасеся о сем Небо, и земли удивишася концы, яко Бог явися человеком плотски и чрево Твое бысть пространнейшее Небес. Тем Тя, Богородицу, Ангелов и человек чиноначалия величают.
Преподобне отче наш Макарие, моли Бога о нас.
Рака, идеже лежит честное тело твое, источник содевает чудес, к нейже притекающе, от всякия скверны и страстей избавляемся.
Преподобне отче наш Макарие, моли Бога о нас.
Огнем Божественнаго страха душу распалил еси, и к сиянию невечернему востекл еси, и ныне, блаженне, Трисолнечным Светом озаряемь.
Слава: Мирския сладости возненавидев, мужеским нравом к подвигом устремился еси и преподобным красота лепотна был еси, тем память твою почитаем, досточудне.
И ныне: Низложи вознесенныя и победи полки иноплеменных, Дево Чистая, хотящия бранем, и Твоя рабы невредны от них сохрани, Отроковице.