Тропари, кондаки и величания - 30 марта 2025

Пустынный житель и в телеси Ангел/ и чудотворец явился еси, богоносе отче наш Иоанне,/ постом, бдением, молитвою Небесная дарования приим,/ исцеляеши недужныя и души верою притекающих ти./ Слава Давшему ти крепость,/ слава Венчавшему тя,// слава Действующему тобою всем исцеления.

Слез твоих теченьми пустыни безплодное возделал еси,/ и иже из глубины воздыханьми во сто трудов уплодоносил еси,/ и был еси светильник вселенней,/ сияя чудесы, Иоанне, отче наш,/ моли Христа Бога спастися душам нашим.

На высоте Господь воздержания истинна тя положи,/ якоже звезду нелестную, световодящую концы,// наставниче Иоанне, отче наш.

Яко Божественную лествицу, обретохом, Иоанне преподобне,/ твоя Божественныя добродетели,/ к Небеси возводящия ны:/ добродетелей бо ты был еси воображение./ Тем моли Христа Бога, да спасет души наша.

Плоды присноцветущия,/от твоей книги принося учения, премудре,/ услаждавши сердца, сим с трезвением внемлющих, блаженне:/ лествица бо есть, души возводящая от земли к Небесней и пребывающей славе/ верою чтущих тя.

На высоте Господь воздержания истинна тя положи,/ якоже звезду нелестную, световодящую концы,/ наставниче Иоанне, отче наш.

Возвысився на добродетель и ум очистив,/ к Желанному и Крайнему достигл еси,/ безстрастием же украсив житие твое,/ и пощение изрядное восприим совестию чистою,/ в молитвах яко безплотен пребывая,/ возсиял еси яко солнце в мире,/ преблаженне Алексие.

Яко чистоты светильник пресветел показася,/ дивный Алексие,/ ибо тленный чертог/ на нетленное Божие Царствие пременив,/ яко целомудрил делатель преизряден./ Сего ради предстоиши Господеви, всех Царю./ Егоже моли, даровати нам мир и велию милость.

Плотская мудрования, отче Макарие,/ воздержанием и бдением умертвил еси,/ место бо, на немже поты твоя излиял еси,/ яко труба, вопиет к Богу,/ поведающи твоя исправления,/ и по смерти честныя твоя мощи источают исцеления./ Темже вопием ти:/ моли Христа Бога, да спасет души наша.

Вышних желая, воздержанием, и труды, и поты насладився,/ желание плоти твоей обуздав,/ чудес дар прием от Христа Бога,/ светильник явился еси пресветлый./ Темже Христова Церковь песньми славит тя,/ преподобне Макарие, отче наш.

Яко древо насаждено при водах воздержания,/ струями слез твоих напаяемь,/ преподобне отче Макарие,/ сеяв бо со слезами, в радости жнеши добродетельный рукояти,/ тем Великий Мздодавец плоды трудов твоих прият/ и в житницах Небесных тя сокровище положи,/ но поминай чтущих любовию пресветлую память твою/ и моли Святую Троицу, преподобне Макарие,/ спастися душам нашим.

Слез твоих теченьми пустыни безплодное возделал еси/ и иже из глубины воздыханьми во сто трудов уплодоносил еси,/ и был еси светильник вселенней, сияя чудесы,/ Макарие отче наш, моли Христа Бога/ спастися душам нашим.

Яко финике псаломский во удолиих постнических процвел еси,/ трудов своих поты, яко плоды духовными, возвеличил еси над всеми Бога,/ но яко имея дерзновение ко Святей Троице,/ поминай нас, чтущих любовию святую память твою, да зовем ти:/ радуйся, преподобне Макарие, отче наш.