Избранной от Господа во образ спасения всем грешным и отчаянным, из глубины греха востекшей на высоту безстрастия, похвальная пения приносим ти, мати преподобная, ты же, яко имея дерзновение к щедрому Богу, молитвами твоими настави на стезю твоего покаяния любовию тебе зовущих:
Радуйся, чудо милосердия Божия, Марие равноангельная.
Ангела во плоти узрев тя в пустыни Иорданской великий Зосима, на воздусе стоящую и о мире молящуюся, со удивлением и ужасом одержим весь трепетом быв, слезами обливаяся, вопияше тебе таковая:
Радуйся, благодати и света исполненная; радуйся, прозрения даром украшенная.
Радуйся, в молитвах твоих к Богу на воздусе вземлемая; радуйся, пустынное сокровище, от мира утаенное.
Радуйся, безплотных сожительнице; радуйся, Духа Святаго селение.
Радуйся, чудо милосердия Божия, Марие равноангельная.
Видяще старца благоговейнаго ужаса исполнена, тихим гласом рекла еси тому преподобная: не бойся, авво Зосимо, несмь дух, но земля, прах, и пепел, и всячески плоть, ничтоже духовное когда помыслившая и ни единыя добродетели имущая. Жена есмь грешница, недостойная взирати на небо, и со страхом грешными усты зову Богу: Аллилуиа.
Разумети ища дивную тайну, в тебе сокровенную, старец паде пред ногама твоима, глаголя: заклинаю тя именем Господа нашего Иисуса Христа, Егоже ради наготу носиши сию, не скрый от мене жития твоего, да величия Божия яве сотвориши. С нимже и мы дерзаем ублажити тя сице:
Радуйся, смирения светлая высото; радуйся, дарований духовных богатство неисчерпаемое.
Радуйся, любве ради Божия тело свое умертвившая; радуйся, в пустыни непроходней едина, с единым Богом пребывшая.
Радуйся, райскою красотою сияющая; радуйся, безстрастия светом озаренная.
Радуйся, чудо милосердия Божия, Марие равноангельная.
Силою Вышняго укрепляема, исповем ти, человече Божий, грехи и беззакония моя, - отвещала еси Зосиме, - стыжуся, отче, прости мя, но понеже тело мое наго видел еси, обнажу ти и дела моя, обаче молю тя первее: не бежи от мене, не терпя слышати безместная, яже аз содеях; но, милосердствуя о мне, молися за мя, блудную, и Богу, не возгнушавшуся мною, зови: Аллилуиа.
Имея милосердие неизреченное, с мытари и грешники вечерявый, Той и мне, в глубину погибели падшей, простре руку Свою Божественную, егда бо возжелах аз внити в храм Господень, некая сила возбрани ми вход, сердца же моего коснувыйся свет разума, показа ми тину дел моих; и начат плакатися о гресех, в перси биющи и горько рыдающи; мы же, покаянию твоему веселящеся, пение приносим ти сицевое:
Радуйся, яко нощи прешедшей возсиявает ти заря спасения; радуйся, яко глас Христов призывает овча заблуждшее от дебрей далеких греха.
Радуйся, яко слезными токи омываеши вся твоя скверны; радуйся, яко слезами твоими очищаеши одеяние души твоея.
Радуйся, яко Отец щедрот объятия Своея любве тебе отверзает; радуйся, яко ведый твоя тайная рукописания грехов твоих раздирает.
Радуйся, чудо милосердия Божия, Марие равноангельная.
Бурею скорбных помыслов одержима, узрела еси во угле притвора церковнаго икону Причистыя Богоматери и, стеня, воззвала еси к Ней: повели, о Владычице, да и мне, недостойной, отверзутся божественныя входы, и буди Ты ми Споручница, яко егда узрю Крест Сына Твоего, мира и иже в мире отвергуся и изыду, аможе Ты повелиши мне, зовущи Богу: Аллилуиа.
Слышавше глас, издалеча глаголющ: ащи Иордан прейдеши, добре покой обрящеши, на колена падши пред Приснодевою, рекла еси: о Владычице! Не гнушается девственная чистота Твоя моея недостойныя молитвы, буди мне спасения Учительница, руководствующая на путь покаяния! Тем убо Ангели Божии, написующе исповедание твое, возглашаху тебе в той час сицевая:
Радуйся, от тьмы греха к чистому свету покаяния преходящая; радуйся, неистовство страстей и любовь плотскую отринувшая.
Радуйся, вся узы и сети врага растерзавшая; радуйся, тяжкое бремя студныя работы диавола во благое и легкое иго Христово пременившая.
Радуйся, от смерти греховныя к вечному животу возстающая; радуйся, от врат погибели к вратам рая восходящая.
Радуйся, чудо милосердия Божия, Марие равноангельная.
Богосветлыми лучами благодати просвещает тя Пресвятая Дева, Та бо Споручница грешных к Богу сущи, отверзает тебе двери милосердия Божия и врата храма святаго, в оньже внитши, со многими слезами поклонилася еси Живоносному Древу, имже мир спасен бысть, и распеншемуся Господу, Кровь Свою за твое избавление излиявшему, благодарственно воспела еси: Аллилуиа.
Видев тайны Божия и како готов есть приимати кающихся, всехвальная Мария, воззвала еси всем сердцем: Владычице Богородице! Не остави мене! - и устремилася еси в пустыню обонпол Иордана, мы же, почитая бегство твое, сретаем тя пении сими:
Радуйся, яко всепрощающею любовию Спаса уранися сердце твое; радуйся, яко сокровище благодати, тобою приятое, потщалася еси сокрыти в пустыни.
Радуйся, яко мира греховныя сладости скоротечно и невозвратно отбегла еси; радуйся, яко бегством твоим демоны огнем попалила еси.
Радуйся, яко тем бегством Небеса возрадовала еси.
Радуйся, чудо милосердия Божия, Марие равноангельная.
Проповедуеши всем падшим и отчаянным, всечестная, Божие человеколюбие и силу покаяния, како грешную душу омывает, очищает, светлит и возводит горе и веселие творит Ангелом Божиим, с нимиже и мы бренными усты зовем: Аллилуиа.
Возсия мирови от пустыни Иорданской свет великих подвигов твоих, Марие приснославная, многия бо лета, аки адамант тверд и столп непоколебим, пребыла еси, яко со зверьми лютыми, с похотьми твоими борющися и оружием креста отражая разжженныя стрелы лукаваго, сего ради дивящеся пачеестественному терпению твоему, любовию зовем ти:
Радуйся, яко злострадания и труд в пустыни четыредесят и осмь лет понесла еси; радуйся, яко солнечнаго зноя опаление, наготу и мраз нощный претерпела еси.
Радуйся, яко гладом и жаждою истаявала еси; радуйся, яко всякое пожелание плоти конечно умертвила еси.
Радуйся, яко в борьбе со грехом, в тебе живущим, до крове подвизалася еси.
Радуйся, чудо милосердия Божия, Марие равноангельная.
Хотя препятие сотворити твоему светлому к небеси шествию, всеблаженая, исконный враг рода человеческаго не престаяше влагати ти помыслы нечистыя, огнь греховный в удесех твоих разжигая и предлагая тебе на память прежняго жития твоего; ты же, многострадальная, повергалася еси на землю, слезами обливаяся и призывая в помощь Приснодеву, и не воставала еси от земли день и нощь, дондеже сладкий свет осияваше тя, воздвизая благодарственно пети Богу: Аллилуиа.
Новый человек, по Богу созданный, явилася еси, преподобная, умертвив бо всеконечно ветхаго человека, во Христа облеклася еси, всечудная, седмьнадесят лет безчисленныя беды пострадах. Зосиме рекла еси: «Оттолеже и до днесь сила Божия грешную мою душу и тело смиренное соблюде». Приими убо и от нас, недостойных, похвалы сицевыя:
Радуйся, яко умертвила еси страстей взыграния; радуйся, яко самое естество победила еси.
Радуйся, яко всякий грех от души и плоти твоея потребила еси; радуйся, яко в сердце и умерщвленных удесех твоих носиши Иисуса, тобою любимаго.
Радуйся, яко облеклася еси в одежду веселия духовнаго; радуйся, яко вошла еси в вечный покой Сына Божия.
Радуйся, чудо милосердия Божия, Марие равноангельная.
Странное и преславное изменение твое, преподобная, видяще, демонов темныя полки горько рыдаху, вся же силы небесныя радостию играюще, песнь Христу воспеваху, прославляюще Божие милосердие, грехами людскими не преодоленное, велиим гласом зовуще: Аллилуиа.
Вся была еси в Бозе, Марие всебогатая, егда Зосима, обходя пустыню, видети тя сподобися. «Заклинаю тя, отче, Спасителем Богом, да никомуже речеши, яже слышал еси от мене, дондеже Бог от земли возмет мя», - вещала еси тому - ныне с миром отыди, в посте же грядущаго лета причасти мя Святых Христовых Таин на брезе Иорданстем, то рекши, аки горлица пустыннолюбивая и неудержимая, от очию старца скрылася еси, той же поклонися до земли и целова место, идеже стоясте стопы ног твоих, зовый таковая:
Радуйся, яко обнажившися студа греховнаго, паче снега убелилася еси; радуйся, яко паче лучей солнечных просветилася еси.
Радуйся, яко вся грехи твоя забвенны и прощенны суть у Бога; радуйся , яко часть твоя со святыми.
Радуйся, яко первее блудница, днесь невеста Христова сотворилася еси.
Радуйся, чудо милосердия Божия, Марие равноангельная.
Всяк помысл и ум ужасают болезни твоя, всехвальная, како труд пустыни любве ради Божией претерпела еси, взываше превеликий во отцех Зосима, рыдая: О мати духовная! Ты Богу приблизилася еси, хотел бых, аще бы можно было, во след тебе ходити и зрети честное лице твое и купно с тобою немолчно пети: Аллилиуиа.
Витийство земнородных не довлеет достойно похвалити твоя подвиги, всесветная, кто же доволен изрещи слезныя токи, яже пролияла еси в молитвах к Богу! Кто болезни твоя изочтет, кто исповесть всенощныя бдения, борения и тесноту жития твоего! Пустыню всю чудесы просветивши, яко солнце, просияла еси, всечудная, тем убо молим тя: озари лучами света твоего наши сердца и испроси оставление грехов всем вопиющим тебе таковая:
Радуйся, помраченный образ Божий в светлости велицей в себе возобразившая; радуйся, небесными ароматы благоухающая.
Радуйся, звездами чудес украшенная; радуйся, лучами добродетелей сияющая.
Радуйся, величия Божия всем концем земли благовествующая; радуйся, небо и землю к пению славы Господа твоего призывающая.
Радуйся, чудо милосердия Божия, Марие равноангельная.
Спасителя Бога животворящее Тело и Кровь вземше, в день таинственныя Христовы вечери, авва Зосима, по завещанию твоему, в вечер зело поздень изыде на брег Иордана, неуклонно в пустыню лунным светом осияваемую, зря, и моляшеся к Богу, глаголя: покажи ми, Господи, сокровище Твое, еже в пустыни сокрыл еси! Покажи ми ангела во плоти, да не отыду тощ, нося моя грехи на обличение, но да радуяся, зову Тебе: Аллилуиа.
Стену непроходну мысляше старец быти Иордану реце, между ним и тобою, преподобная: обаче ты, став на одной стране реки, знамением крестным Иордан знаменала еси и купно с тем знамением взошла еси на воду; Зосима же, видев идущу тя к себе верху воды, ужасеся и радостию вопияше тебе:
Радуйся, горняго рая Божия обитательнице; радуйся, яко тварь повинуется велению твоему.
Радуйся, яко волны стелются под честныя нозе твоя; радуйся, яко Иордан тебе служит, луна и звезды небесныя дивятся святыни твоей.
Радуйся, силы Божией дивное проявление; радуйся, храм одушевленный Бога Живаго.
Радуйся, чудо милосердия Божия, Марие равноангельная.
Пение подобаше тебе приносити Всемогущему Богу, авво, по воде шествующи, рекла еси тому: что твориши, священник сый, како дерзаеши кланятися мне, убозей, сам носяй страшныя Таины Христа Бога! Имже верою и любовию, прах и земля покланяющися, со страхом зову: Аллилуиа.
Светом небесным блистаяся, причастилася еси Божественных Таин и радости премирныя исполнися, на небо руце воздевши, рекла еси: ныне отпущаеши рабу Твою, Владыко! Обращися к старцу, вещала еси: прости, авво Зосимо! В грядущее же лето узриши мя паки в пустыни, якоже хощет Господь, моли Его о мне, отче мой, моли, поминая всегда мое окаянство. И паки Иордан знаменавши, прешла еси верху той воды, старец же, не смея надолзе держати тя, стеня и рыдая, взываше в след тебе таковая:
Радуйся, мертвость Иисуса в теле носящая; радуйся, Воскресения Его славою сияющая.
Радуйся, благодатию, яко ризою света, облеченная; радуйся, яко ангели Божии дивятся чистоте твоей.
Радуйся, яко силы адския ужасаются и трепещут от славы твоея; радуйся, светозарная обитель Всесвятыя Троицы.
Радуйся, чудо милосердия Божия, Марие равноангельная.
Благодатию Божественною окриляема во един час долготу пустыни прешла еси и в нощь спасительныя Христовыя страсти, по причащении Божественныя Тайныя вечери, сном святым уснула еси, о мире моляся, дух твой Господу предала еси, Емуже со ангелы в неисповедимой радости зовеши ныне: Аллилуиа.
Поюще надгробное пение, богомудрый Зосима, нозе твои честныя слезами омываше, и много молився тебе, покрыв тело твое землею, наго сущее и ничтоже имеющее, точию ветхую мантию, юже исперва тебе даде, радостию и страхом многим одержим, величию Божию дивяся, стояше, зовый к тебе таковая:
Радуйся, яко чадо света сущи, прешла еси к Свету невечернему; радуйся, яко дух твой с веселием прияша селения святых.
Радуйся, яко тело твое упокоися в могиле, юже лев от пустыни тебе ископа; радуйся, яко тобою показа мне Господь, колико отстою от меры совершенства.
Радуйся, о всем мире к Богу ходатаице; радуйся, постников высото, преподобных славо, страдальцев красото.
Радуйся, чудо милосердия Божия, Марие равноангельная.
О преподобная мати, богоблаженная Марие! Приими от нас ныне приносимое тебе моление и, Свету неприступному предстоя, молися Всещедрому Богу, да милостив быв, ниспослет светозарную благодать покаяния всем заблуждшим чадом Небеснаго Отца и от греха к отеческому дому востекших в райских селениих сподобит вкупе с тобою во веки благодарственно пети Ему: Аллилуиа, Аллилуиа, Аллилуиа.
Этот кондак читается трижды, затем 1-й икос «Ангела во плоти…» и 1-й кондак «Избранной от Господа …».
О великая Христова угоднице, преподобная Марие! На Небеси Престолу Божию предстоящи, на земли же духом любве с нами пребывающи, имеющи дерзновение ко Господу, моли спасти рабы Его, к тебе с любовию притекающия. Испроси нам у Великомилостиваго Владыки и Господа веры непорочное соблюдение, градов и весей наших утверждение, от глада и пагубы избавление, скорбящим — утешение, недугующим — исцеление, падшим — возстание, заблуждщим — укрепление, в делах благих преспеяние и благословение, сиротам и вдовицам — заступление и отшедшим от сего жития — вечное упокоение, всем же нам в день страшнаго Суда одесную страны общники быти и блаженный глас Судии мира услышати: приидите, благословеннии Отца Моего, наследуйте уготованное вам Царствие от сложения мира, и тамо пребывания во веки получити. Аминь.
Избранней в Предвечнем Совете Богоотроковице Марии послужити велию таинству Боговоплощения, сияющей девственною чистотою паче высшия небесныя чистоты, благоговейная пения принесем Тебе, Богородице, о всерадостном от Архангела Благовещении Твоем. Ты же, яко обрадованная и радость падшим людем подати могущая, избави нас от всяких бед и греховныя печали, и возведи нас к небесней радости, да с Гавриилом вопием Тебе:
Радуйся, Благодатная, Господь с Тобою.
Архангел Гавриил, предстояй Престолу Божию, выну зрит неприступную Божественную славу; егда же прииде время избавления человеков, прият повеление Господне: Буди служитель страшному чудеси и таинству сокровенному. Милосердием бо Моим подвигся ко взысканию Адама заблуждшаго, снити тщуся. Гряди убо во град Назарет, в немже Отроковица Мария обитает, да прелюбезную красоту девства узриши. Гряди к сему одушевленному Божию кивоту, ко второму Небеси, на земли сущему. Иди к сей Обители воплощения Моего и возвести нетленное Мое от Нея пришествие. Блюди же, да не смутиши и да не устрашиши душу Девы, да в радости будет, а не в печали благовестие твое. Сего ради приступи к Ней кротце, и первый твой глас радость Ей да принесет, и да возопиеши Ей сице:
Радуйся, Благодатная, Еюже радость возсияет; радуйся, Обрадованная, Еюже клятва исчезнет.
Радуйся, Благословенная, Еюже тварь обновляется; радуйся, Препрославленная, Еюже весь мир спасается.
Радуйся, Богоизбранная Отроковице, падшаго Адама воззвание; радуйся, Пренепорочная Дево, слез Евиных избавление.
Радуйся, Благодатная, Господь с Тобою.
Видев Архангел Гавриил, яко Человеколюбец Господь умилосердися, гиблющий зря род человеч, удивися зело, како Бог, Егоже небеса вместити не могут, в девичестей хощет вместитися утробе, како не опалит Ю огнь Божества, како Бог, на Негоже Херувими и Серафими взирати не смеют, хощет во образе раба явитися на земли, да с человеки поживет. Сему неизреченному таинству чудящеся, со страхом возопи Богу: Аллилуиа.
Разум недоразумеваемый страшнаго таинства открывая, рече Владыка Ангелов ко Архистратигу: Что смущаешися, Гаврииле, о новости вещи? Аще не опали огнь купину, в пустыни горевшую и не сгоравшую, не опалит всячески утробу Девичу огнь Божества Моего, но паче оросит Ю и освятит благодать Моя. Идеже бо хощет Бог, побеждаются естества уставы. Гавриил же, сия слышав, радости исполнися Божественныя, и отыде в Назарет, исполняя повеление Господне, помышляя в себе, како внидет к Отроковице и како возвестит Ей таинство чудесное, во еже не смутити Ея девический помысл, и рече к себе: Возвещу убо Ей первее радость и, целуя, воспою глас таковый:
Радуйся, Радосте всему миру, Тебе бо единей подобает радоватися; радуйся, Сладосте Ангелов, от Тебе единыя благоволи Господь воплотитися.
Радуйся, Неувядаемый Цвете чистоты, Ты бо небесное благоухание всему миру явила еси; радуйся, белоснежный крине девства, Ты бо райское девство на земли насадила еси.
Радуйся, Сокровище паче всего дражайшее, Твоея бо доброты возжела Царь Небесный; радуйся, утро всему миру светлейшее, Твоим бо светом разгонится мрак греховный.
Радуйся, Благодатная, Господь с Тобою.
Силою Божественною укрепляемый слете с небесных высот великий Архангел и в Назарет-град прииде, и обрете Святую Деву во внутреннем чертозе Своем, не о житейских пекущуюся, но в молитве и чтении книжнем пребывающую. Та бо, разгнувши книгу Исаии пророка, читаше словеса его: Се, Дева во чреве приимет, и родит Сына, и нарекут имя Ему Еммануил. И распаляшеся Сия серафимскою любовию не точию к имущему скоро приити Христу, но и к Девице оной, Яже имать родити Того, и помышляше, коль неизреченно есть таинство сие и коль велико есть достоинство Девицы Тоя, и моляшеся, о еже увидети Ю, и аще возможно, последнейшею быти рабынею Тоя, да с радостию воспоет Богу: Аллилуиа.
Имея страх велий и благоговение к Богоотроковице, Юже Бог избра быти Владычицу неба и земли, великий Архангел приближися ко внутренним дверем чертога Тоя, и се абие внезапу предста Преблагословенней с кротостию великою, предста Пренепорочней небесный Вестник, да радость всему миру благовестит, предста безплотный Чистой Деве, да безчестие женское в честь преложит, и между Создателем и созданием уневещение да сотворит, и светлым гласом абие глагола Неискусобрачней:
Радуйся, Благодатная, ликуй ныне и веселися, яко Господь с Тобою; радуйся, Благословенная, слыши ныне и приклони ухо Твое, яко возжела Царь доброты Твоея.
Радуйся, Обрадованная, яко благословенна Ты в женах; радуйся, Препрославленная, яко велия слава Твоя на небесех.
Радуйся, Богоизбранная Отроковице, яко спасется Тобою от прелести весь род человеческий; радуйся, преизящная Девице, яко возвеселится о Тебе весь превысочайший собор Ангельский.
Радуйся, Благодатная, Господь с Тобою.
Бурю внутрь имущи помышлений сумнительных, смятеся Пресвятая Дева, таковое небесное благовестие услышавши, помысливши же в Себе, каково будет целование сие, рече ко Архангелу: Ева, праматерь Моя, приемши разум змиин, лишися пищи Божественныя и изгнана бысть из рая, темже и Аз боюся целования страннаго твоего, стыдящися поползновения. Сего ради отступи от дверей Моих, и не вещай глаголов, ихже сбытая никакоже можеши показати, да не обольщена буду. Чесо ради ум Мой и душу смущаеши? Аз же в тишине духа Моего воспевати буду: Аллилуиа.
Слыша Архангел смиренных глагол Пресвятыя Девы высоту, рече к Ней: Что мене боишися, Всенепорочная, паче Тебе боящагося? Что мене благоговееши, Владычице, Тебе честно благоговеющему? Не удивляйся странному моему зраку, не ужасайся, Архангел бо есмь. Змий прельсти Еву иногда, аз же Божий предстатель, послан есмь Божественный Совет Предвечный поведати Тебе. Не бойся, Мариам, обрела бо еси благодать у Бога безмерныя ради девственныя чистоты Твоея. Сего ради зачнеши во чреве, и родиши Сына, и наречеши имя Ему Иисус. Сей будет Велий и Сын Вышняго наречется. И даст Ему Господь Бог престол Давида, отца Его, и воцарится в дому Иаковли во веки, и царствию Его не будет конца. Благовествующе же сие велие благочестия таинство, со страхом вопию Тебе сицевая:
Радуйся, звездо незаходимая, вводящая в мир Великое Солнце - Христа; радуйся, заре присносияющая, являющая человеком всего мира Творца.
Радуйся, паче утра светлейшая, всем во тьме греха седящим свет благодати облистающая; радуйся, паче злата дражайшая, всем не ведущим Бога сокровище веры показующая.
Радуйся, Лествице небесная, Еюже Бог нисходит с небес; радуйся, мосте, к небесем приводяй, Имже мир исполняется чудес.
Радуйся, Благодатная, Господь с Тобою.
Богодухновенныя глаголы Архангеловы слышавши, Пресвятая Дева смутися паче бывшаго, зане тии Рождество Ей возвещаху. Сего ради рече ко Архистатигу: Глаголи Мне явственнейше, како зачну, Дева сущи Отроковица, браку не причастная? Како будет сие, идеже мужа не знаю? Како убо глаголеши, яко рожду, боюся, еда лесть глаголеши? Сия рече не неверия ради, но яко не веде, како может родити, естества законы превосшедши. Сего ради рече ко Ангелу: Скажи Ми образ рождения, во еже не повредитися девству Моему, и тогда обрящеши сердце Мое к Божию изволению готовое, да с радостию воспою Богу: Аллилуиа.
Видев Архангел величие веры Пречистыя, рече к Ней: Глаголы, яже мне вещаеши, обычай есть рождества человеков смертных, законом же естества не работает Иисус, Содетель естества, Отроковице. Ты ищеши уведети от мене образ зачатия Твоего, но той несказанен есть: Дух Святый найдет на Тя и Сила Вышняго осенит Тя. От Того во чреве приимеши, и Той совершит в Тебе недоведомое зачатие, о Пресвятая Дево, темже и Раждаемое Свято наречется Сын Божий. Сего ради прославляю Тя сице:
Радуйся, Духа Пресвятаго Невесто Богоизбранная и преднареченная; радуйся, Бога Отца Дщи прелюбимая и превожделенная.
Радуйся, свитче Божественный, в Немже перстом Отчим написуется в Тебе Божие Слово; радуйся, златый светильниче, Имже огнь Божества возсияет всему миру.
Радуйся, глубино неисчерпаемая, неудобозримая и ангельскима очима; радуйся, высото неизглаголанная, неудобовосходимая человеческими помыслы.
Радуйся, Благодатная, Господь с Тобою.
Проповедника Божественнаго и Вестника небеснаго тя верую быти,— рече Пресвятая Дева ко Ангелу.— Вижду бо тя ангельскою облистаема светлостию, обаче стыждуся скоро веровати словесем Твоим, не уведевши первее со всякою известностию. Слышах бо Священную некую Деву, Иммануила раждающую, пророком древле предреченную. Сего ради хощу разумети, како естество человеческое претерпит Божества срастворение, да познаю таинства силу и с верою воспою Богу: Аллилуиа.
Возсиявает ныне, Пречистая, Тобою всему миру велие таинство воплощения Божия,— рече Архангел к Богородице.— Ты бо еси оная Святая Дева, о Нейже предрече Исаия. Ты еси Дверь Божества, чистотою запечатленная и девством хранимая, Юже Иезекииль предвиде. Господь пройдет Тобою, якоже солнечная луча стекло или кристал проходит, просвещая и освящая Тя Божественною славою, во еже быти Тебе истинною Материю Божией, раждающей совершеннаго Бога и совершеннаго Человека, и Девою Нетленною, якоже прежде Рождества, такожде в Рождестве и по Рождестве Твоем, родиши бо Сына, соблюдающа Твое девство неврежденно. Сего ради, прославляя величие тайны Твоея, вопию Тебе сице:
Радуйся, купинбо неопалимая, Юже не опалит огнь Божества, Моисеем предзримая; радуйся, двере затворенная, Еюже пройдет Бог, Иезекиилем предреченная.
Радуйся, скиние предивная, Яже Невместимаго Бога не тесно вместит, Авраамом прообразованная; радуйся, руно орошенное, на Негоже Владыка, яко капля дождевная, тихо снидет, Гедеоном предвещанное.
Радуйся, земле ненасеянная, Слово Небесное, яко пшеницу плодоносную, чисто прозябающая; радуйся, ниво неоранная, Сына Божия, яко клас Божественный, яве произращающая.
Радуйся, Благодатная, Господь с Тобою».
Хотящи веровати страшней тайне, Архангелом возвещенной, Пресвятая Дева смутися, помышляющи высоты сия величество, и вся стыдящися, глаголаше: Рцы Ми, Гаврииле, истиннейше, како нетленней бывши чистоте Моей, рожду с плотию Безплотнаго? Чудеса всегда быша множицею Божественною силою чудодействуемая, дева же неискусомужне никогдаже роди. Сего ради како может всеми Невместимый и всеми Невидимый во чрево девичие вселитися, еже Сам созда? Рцы Ми сия, да с верою воспою Богу: Аллилуиа.
Нова, и страшна, и чудна Твоя таинства,— рече Ангел Богородице,— и новую тварь показа Тобою всех Творец Господь, Ты бо едина Царя воплощаема приимеши во утробе, да едина Мати Сына Божия пронаречешися, Чистая. Сего ради не дивися чудеси и да не сумнишися: Бог идеже хощет, побеждается естества чин, вся бо возможна суть Всемогущему. И якоже от ребр Адамовых создана бысть Ева без матере древним Богозданием, тако и ныне от Твоего девства воплощается без отца всех Господь. И да уверит Тя жезл Ааронов, невлажно прозябший, и руно Гедеоново, зане, яко росу, зачатие приимеши, Нетленная Дева сущи. Такожде и купина, во огни неопальна пребывшая, да возвестит Ти, яко приимеши огнь Божества, Приснодево, и по Рождестве пребудеши Чистая. Сего ради приими целование мое, да вси племена земная с радостию воспоют Тебе:
Радуйся, жезле Ааронов, нетление всему миру прозябший; радуйся, финикс Давидов, безсмертие падшим людем процветший.
Радуйся, скиние небесная, от Херувимов осеняемая и ублажаемая; радуйся, Святая Святых большая, от Серафимов почитаемая и приснославимая.
Радуйся, чаше Безсмертнаго Царя, в нейже растворяется от Святаго Духа всемирная радость; радуйся, стамно Божественныя манны, от Неяже верным уготовляется неизреченная сладость.
Радуйся, Благодатная, Господь с Тобою.
Страннаго Рождества сего величество смущает Мя,— рече Пресвятая Дева ко Ангелу,— понеже Всеблагий благоволи паче ума вселитися в Мя, да храм чист душею и плотию соблюден буду Ему. Глас радования глагол твоих приемши, веселия Божественнаго исполняюся, да упразднится ныне Мною древнее Евино осуждение и да воздастся Мною днесь долг человеков, да вси светлому Благовещению сему радующеся, благодарственно воспоют Богу: Аллилуиа».
Вся тварь ныне о Тебе радуется, Благодатная, Ангельский собор и человеческий род,— рече Архангел,— яко дадеся Тебе радость Божественная и яко всякое обетование Божие Тобою ныне приемлет конец. Тобою днесь благословися Авраам о семени своем. Тобою ныне свободися Ева от древния печали. Тобою ликует Адам, яко днесь исполняется первое благовестие падшим людем: семя Жены сотрет главу змия. Тобою вся тварь ныне начинает свобождатися от рабства тлению в свободу славы чад Божиих. Тобою ныне дадеся всему роду человеческому всякая радость и веселие вечное, да вси во веки восхвалят Тя сице:
Радуйся, обрадованная Дево, от древних патриархов прообразованная; радуйся, Святая Богоневесто, всеми пророки древле предвозвещенная.
Радуйся, вертограде заключенный, в Негоже Царь Небесный возжела внити; радуйся, кладезю запечатленный, от Негоже никтоже возможет испити.
Радуйся, саде Божественный, в Немже от всех цветов Святаго Духа райское благоухание во весь мир изнесеся; радуйся, раю новонасажденный, в Немже Божественное Древо Жизни посреде Тебе к прозябению уготовися.
Радуйся, Благодатная, Господь с Тобою.
Всякое естество ангельское удивися ныне о Тебе, Пречистая, слышаще дивное Твое со Архангелом Гавриилом собеседование и наипаче моление Твое сие: Душу очисти, тело освяти, Церковь сотвори Мя вместительну Божию и скинию Богоукрашену, да наитием Пресвятаго Духа сотворюся храм одушевлен и Мати Чистая Жизни. Егда же по молитве сей изрекла еси из глубины смиреннаго сердца Твоего: Се, Раба Господня, буди Ми по глаголу твоему, да вселится Бог в Мя,— вся Силы Небесныя прославиша Бога, видяще, яко готово сердце Твое к приятию Божественному, и со страхом и радостию воспеша Ему: Аллилуиа.
Вития Божественный, святый Архангел Гавриил бысть в страсе и в молчании глубоцем и прекрати глаголы своя, егда, Пресвятая Дево, Ты изрекла еси смиренное слово Свое: Се, Раба Господня, буди Ми по глаголу твоему. В начале мирскаго бытия творческим словом сим: «да будет», Творцем изреченным, создана быша всяческая видимая и невидимая. Ныне же слово сие, Девою изреченное, низведе Творца твари в мир сей, и тако открывается днесь еже от века таинство великое: Сын Божий Сын Девы бывает, да бога Адама соделает. Соприсносущное Слово Отчее, не разлучився от горних, сниде на землю, и бысть Плоть, и вселися в ны, неизреченно же истощается и во утробу Девичу вселяется. Да радуется убо небо и земля и со Архангелом да поет Пречистей Деве сице:
Радуйся, небо земное, до горних высот смиренным духом возшедшее; радуйся, селение небесное, Слово Божие неизреченно вместившее.
Радуйся, Благословенная, зачатие Превечнаго Бога нетленно приемшая; радуйся, Благодатная, чертог девства Твоего в зачатии едина сохраньшая.
Радуйся, Чистая Дево, естества уставы в Боговоплощении преславно победившая; радуйся, Богоневесто, естество Ангельское в Благовещении Твоем предивно возвеселившая.
Радуйся, Благодатная, Господь с Тобою.
Спасти хотяй мир, Человеколюбец Господь сниде, яко дождь на руно, в Пречистую утробу Твою, о Богомати, и абие неизреченным наитием Святаго Духа содеяся недоведомое зачатие, и Превечное Слово Божие Плоть бысть, и вселися в Тя, восприяв ю от Пречистых кровей Твоих без услаждения плотскаго, но не без услаждения духовнаго: тогда бо девическое сердце Твое Божественным исполнися желанием и дух Твой, горя пламенем серафимския любве, ум же весь, аки вне себе быв, в Бозе углубляшеся. И тако услаждающися неизреченнаго Боголюбия сего и умнаго Боговидения, поклонилася еси воплощаемому от Тебе Господу Твоему и радостно воспела еси Ему: Аллилуиа.
Стена еси девам, Богородице Дево, ибо девственно от Духа Свята зачала еси Предвечнаго Бога, и Дева пребыла еси, и тако Еву от древний печали свободила еси. Днесь — радость Благовещения, девственное торжество и таинство великое, начало нашего спасения. Днесь веселится небо и радуется земля. Сего ради великий Гавриил первый от всея твари, разумев духом великое Боговоплощения таинство, поклонися со страхом велиим воплощшемуся в Девичей утробе Спасу мира и воплощшую Пречистую Деву почти подобающим поклонением, яко Царицу неба и земли, и с благоговением велиим воспе Ей таковая:
Радуйся, высокаго таинства воплощения Божия пречудное совершение; радуйся, неизреченнаго составления Плоти Христовы преславное явление.
Радуйся, чертоже безсеменнаго уневещения, в Немже Творец всего мира днесь вместися; радуйся, ковчеже Божественнаго воплощения, Имже радость велия всей вселенней ныне даровася.
Радуйся, Девице, Боготканную порфиру от пречистыя плоти Твоея Слову Божию исткавшая; радуйся, Отроковице, нетленную багряницу от девственных кровей Твоих Агнцу Божию взаимодавшая.
Радуйся, Благодатная, Господь с Тобою.
Пение всеумиленное принесла еси, Пречистая, егда по отшествии Архангелове посетила еси праведную Елисавету, южику Твою, и возвестила ей радость Благовещения, в веселии духа глаголющи: Величит душа Моя Господа и возрадовася дух Мой о Бозе Спасе Моем. Яко призре на смирение Рабы Своея, се бо отныне ублажат Мя вси роди. Сие посещение Твое возвесели праведную Елисавету, и взыграся радостию младенец Иоанн во чреве ея, и исполнися Духа Свята Елисавет, и рече: Откуду мне сие, да прииде Мати Господа моего ко мне. Да взыграется ныне и наш дух, ощущая в день Благовещения Твоего радость посещения Твоего. Сего ради с Елисаветою возопием Тебе: Благословенна Ты в женах и Благословен Плод чрева Твоего, Емуже выну да поем вси: Аллилуиа.
Свет велий и Божественный возсия в душе Твоей, Пречистая, егда по гласу Архангела Дух Святый сниде на Тя и Сила Вышняго осени Тя и егда абие зачала еси в Богоблагодатней девственней утробе Своей Творца светов, Егоже свет во тьме светит и тьма Его не объят. Той просвети Тя, яко солнце, светом Божества Своего, всю прослави и обожи, сего ради сияет доброта Твоя, блистает чистоты Твоея светлость, якоже предрече о Тебе в Песнех Дух Святый: Вся добра еси, ближняя Моя, и порока несть в Тебе. Вся избранна, вся преукрашенна явилася еси, Юже Бог возлюби, вся чистая и Божественныя славы исполненна. Сим Божественным Твоим Светом просвещаемии, да воспоим Тя и мы в песнех яко Матерь Света сице:
Радуйся, свеще Божественнаго Света, Свет Невечерний во утробе Твоей понесшая; радуйся, луче умнаго Солнца, весь мир светом Лица Божия просветившая.
Радуйся, Небесный Светильниче, на свещнице земном всей вселенней возжженный; радуйся, Живоносный Источниче, благодатию Духа Святаго преизобильно орошенный.
Радуйся, Светоносная Дево, Еяже ради свет Боговедения днесь нам всем возсия; радуйся, избранная Богоневесто, Еюже ныне радость неизреченная весь мир облиста.
Радуйся, Благодатная, Господь с Тобою.
Благодать Божественная и радость велия процвете днесь всему миру, Пречистая, в светоносный день Благовещения Твоего, яко Тебе ради в день он древняя печаль преста и начало спасения человеков положися: Сын Божий Сын Девы явися и земля, Евы ради проклята бывши, Тобою, Дево, днесь паки благословися. Херувим от древа жизни отступает, и врата райская верным днесь паки отверзаются, мир же весь исполнися радости, отнележе великий Гавриил «Радуйся!» Тебе, Дево, свыше возгласи. Сего ради небеса убо достойно днесь да веселятся, земля же да радуется, всякое же дыхание и тварь да поют о Тебе Богу: Аллилуиа.
Поюще всерадостное от Архангела Благовещение Твое, Богородице, восхваляем вси страшное, преславное и велие таинство чистаго и девственнаго от Духа Святаго зачатия Твоего, покланяемся нетленно зачатому от Тебе Сыну Твоему, Христу Богу нашему, и от всего сердца веруем и исповедуем, яко и в Божественном зачатии и по Рождестве Твоем пребыла еси Приснодева. Сего ради с Гавриилом принесем Тебе сицевый Архангельский глас:
Радуйся, Благодатная, облеченная в Солнце, сияющая благодатию и славою всей вселенней; радуйся, Благословенная, от восток солнца до запад препетая и превозносимая по всей поднебесней.
Радуйся, Ангельское великое удивление, Гавриила красотою девства Своего удивившая; радуйся, всему миру благое веселие, падшия люди радостию Благовещения Твоего возвеселившая.
Радуйся, смиренная Рабо Господня, высотою смирения Своего Бога на землю низведшая; радуйся, Милосердая Мати Бога Вышняго, Матерним заступлением Своим многия грешники ко Христу приведшая.
Радуйся, Благодатная, Господь с Тобою.
О, всепетая Параклита Невесто Чистая, брака не познавшая Дево, Архангела красотою Девства удивившая и Богу Слову Плоть нетленно днесь взаимодавшая, нынешняя наша приемши приношения о всерадостном от Гавриила Благовещении Твоем, Христу Богу обрученныя в девстве сохрани, всех же в чистоте укрепи и от бед избави, да свобождшеся Тобою от вечных мук, Тобою рай да обрящем, идеже вси да воспоем о Тебе Богу: Аллилуиа.
Этот кондак читается трижды, затем 1-й икос «Архангел Гавриил …» и 1-й кондак «Избранней в Предвечнем Совете …».
О, Пресвятая, Богоизбранная Дево, Святаго Утешителя Духа Всенепорочная Невесто, Пребожественнаго же Отца Небеснаго Дщи превожделенная, посреде терния мира сего Тем обретенная, яко крин пресветлый, добротою девства блистающийся, да Сыну Божию чистая Мати Неискусобрачная будеши! Что убо воздадим Тебе в пресветлый день сей Благовещения, воньже Архангела Гавриила красотою безмернаго девства Своего удивила еси и от того неизреченное обрадование восприяла еси? Что принесем Тебе за вся утешения Твоя, имиже возвеселила еси в день сей весь мир видимый и невидимый, наипаче же падший древле род человеч?
Днесь спасения нашего начало и еже от века таинства явление: ныне убо Слово Божие тихо сниде с небес, яко капля, каплющая на землю, и вселися в Твою Богоблагодатную Девственную утробу и бысть Плоть спасения нашего ради. Сего ради днесь Ангели ликуют на небесех и вся тварь веселится и радуется, празднующе начало свобождения своего от работы истления в свободу славы чад Божиих. Ныне радуется женское естество, Евы ради падшее. Та бо повинувшися змию, печаль роди женам и неудержанно введе смерть. Ты же, Дево, разрешила еси от горькия работы весь род человеч и свободою Христовою естество женское почтила еси, зане девством чистым паки истинную жизнь ввела еси, и сего ради жены, девство держаще, врага яве побеждати начинают. Ныне Адам ликует, видев, яко в пресветлый день сей исполнися на Тебе первое райское благовестие, яко Семя Жены сотрет главу змия. С нимже ликовствует ныне весь род человеч, понеже Тобою, Пречистая, упразднися днесь древнее отвращение Божие к человеком, Бога бо паки привела еси к нам. Сего ради зрим Тя ныне, якоже древле Иаков, яко лествицу высокую, Еюже сниде Бог на землю, и яко мост пречуден, имже сущих от земли паки возводиши на небо.
Что воздадим Тебе, Царице неба и земли, за вся сия, имиже радость несказанную подала еси падшим и заблуждшим людем Твоим? Вся наша жертвы и приношения ничтоже суть пред величеством благодеяний Твоих. Единое точию угодно Тебе: сердце сокрушенно и смиренно, егоже и Сын Твой и Господь наш не уничижит. Сего ради молим Тя: исполни нас от превосходящия высоты смирения Своего, елика вместити возможем, да принесем Ти во всесвятый день Благовещения Твоего Твоя от Твоих, во еже во всяцем деле блазе не мыслити высокая, но выну во смирении духа пребывати. Сею первейшею добродетелию украшени, в пресветлый день сего праздника Твоего в кротости и чистоте сердца со Архангелом Гавриилом возопием Тебе:
Радуйся, Благодатная, радуйся, Обрадованная, радуйся, Преблагословенная, Господь с Тобою и Тобою с нами во веки веков. Аминь.