Акафисты - 12 апреля 2025
Кондак 1
Возбранный Воеводо и ада Победителю, Ты, яко имеяй победу над смертию, Лазаря Четверодневнаго из мертвых воздвигл еси, и всем радость, свет и воскресение явил еси; мы же недостойнии Твоему нас ради снисхождению благодарение приносяще, от души вопием Тебе:
Иисусе, Лазаря прежде Твоея Cтрасти из мертвых воздвигнувый, яви нам Свое Воскресение.
Икос 1
Ангельския силы в радостный трепет приидоша, зря Твое, Сладчайший Иисусе, в Вифанию пришествие, идеже Ты, не имеяй где главу подклонити и злобою иудейскою везде гонимый, всегда обретал еси по трудех благовестия покой душевный, мир, любовь и тишину у друга Твоего Лазаря, егоже и Сам до конца возлюбил еси с сестры его Марфою и Марией, яко тии всегда с верою и любовию служаху Тебе, слушающе при ногу Твоею Слово Твое. Таковое человеколюбное снисхождение Твое воспоминающе, со умилением сердечным вопием Тебе:
Иисусе, Любы Предвечная, до любве к человеком до конца низшедый.
Иисусе, Милосте Безмерная, Лазаря с сестры его в любовь Свою приявый.
Иисусе, благословенный дом Лазаря во днех плоти Своея с любовию посещавый.
Иисусе, Божественным Словом Твоим любящая Тя души тамо в сладость, много насыщавый.
Иисусе, Вифанию, отечество Лазаря, местом покоя Твоего избравый.
Иисусе, велия дела силы и любве тамо прежде Креста Твоего явивый.
Иисусе, Лазаря прежде Твоея Страсти из мертвых воздвигнувый, яви нам Свое Воскресение.
Кондак 2
Видяще сестры праведнаго Лазаря Марфа и Мария, яко брат их лютою болезнию зело страждет, не предашася унынию, не впадоша в отчаяние, но к Тебе, Господи, Целителю недугов, со упованием посласте, с верою глаголюще: “Господи, се егоже любиши, болит”. Сему последующе, и мы во всяком обстоянии да не предадимся унынию, но с упованием да вопием Тебе: Аллилуиа.
Икос 2
Разум чист имеша ученицы Твои, Господи, обаче не разумеша, почто абие не пошел еси в Вифанию к другу Твоему Лазарю исцелити его, егда приял еси весть о лютем недузе его, но рекл еси пришедшим от Марфы и Марии: “сия болезнь несть к смерти, но к славе Божией, да прославится Сын Божий ея ради”. Мы же ныне ведуще, яко хотел еси сокровенную глубину веры и любве их явити, и большее чудо пред страданиями Своими совершити, с любовию зовем:
Иисусе, любве полный, любящия Тя сердца святых сестер Лазаревых испытуяй.
Иисусе, Всеблагий, болезнию братнею к чаянию велия Славы Божия тех обращаяй.
Иисусе, велий в чудесех Своих, хотяй над Лазарем всему миру Славу Свою явити.
Иисусе, Дивный в советех Своих, положивый в Вифании величия Своя совершити.
Иисусе, смерти не сотворивый, скорбящим сестрам Лазаревым не боятися смерти брата повелевый.
Иисусе, к смерти волею грядый, сомнящимся учеником победу над смертию явити восхотевый.
Иисусе, Лазаря прежде Твоея Страсти из мертвых воздвигнувый, яви нам Свое Воскресение.
Кондак 3
Силою Божества Твоего ведуще, яко належит Ти прежде Креста Твоего, Всеблагий Господи, явити над Лазарем силу Свою, да сущии с Тобою ученицы не устрашатся страданий Твоих и уразумеют из мертвых Воскресение Твое. Сего ради, услышав, яко болит Лазарь, друг Твой, не поспешил еси исцелити его, пребыл на немже бе месте два дни, да боголюбивыя сестры его и пред лицем смерти брата своего пребудут верою и любовию горяще, поюще Тебе: Аллилуиа.
Икос 3
Имуще предведение Божественное, Всеблагий Господи, Ты рекл еси учеником Твоим: “Идем в Иудею паки”, и потом: “Лазарь друг наш успе, но иду, да возбужу его”. Егдаже ученицы не разумеша, мняще, яко о успении сна его глаголеши, тогда необинуяся рекл еси: “Лазарь умре. И радуюся вас ради, да веруете, яко не бех тамо, но идем к нему”. Тогда Фома, видев, яко ученицы страх имут во Иудею идти, яко ныне уже искаху Иудеи камением побити Тя, со дерзновением рече им: “идем и мы, да умрем с Ним”, научающе и нас без страха последовати Тебе и воспевати тако:
Иисусе, друже Лазарев, друга Твоего от смертнаго успения возставити грядый.
Иисусе, Вифании похвало, и весь Лазареву радость и воскресение несый.
Иисусе, Любы Неизреченная, плач и рыдания сестер Лазаревых услышавый.
Иисусе, Милосте Безконечная, овча свое бездыханное оживити изволивый.
Иисусе, с Лазарем в Вифании погребенным, погреби моя лютыя прегрешения.
Иисусе, с Марфиными и Марииными слезами приими о гресех моих тяжкая воздыхания.
Иисусе, Лазаря прежде Твоея Страсти из мертвых воздвигнувый, яви нам Свое Воскресение.
Кондак 4
Бурю внутрь имуще помышлений сумнительных, Марфа и Мария горько проливаху слезы над гробом Лазаря, поминающе со скорбию обетование Твое, яко болезнь Лазарева не к смерти есть, но к славе Божией, зане тыя лишени уже быша прежния надежды, зряще брата своего во гробе пребывание и тела его разрушение и смердение. Ты же, Господи, об ону страну Иордана ходяще, глаголал еси учеником Своим: Радуются, друзи мои, вас ради, яко не бых тамо, да увесте, яко вся могу, Бог сый. Идем убо оживити его, яко да смерть яве ощутит сего победу и совершенное разрушение, да воспоете со всеми верными: Аллилуиа.
Икос 4
Слышав святая праведная Марфа, яко Ты, Господи, в Вифанию грядеши, четыре дни Лазарю во гробе уже бывшу, изыде во сретение Тебе, Марии же дома сидевшей, и глаголаше Тебе, утешения ищущи: “Господи, аще бы еси зде был, не бы брат мой умерл. Но и ныне вем, яко елика аще просиши у Бога, даст Тебе Бог”. Сию веру скорбныя сестры Лазаревы в велицей печали ея видевше, со умилением в души зовем Тебе:
Иисусе, к четверодневному мертвецу стопы Своя направивый, посети и мене во гробе отчаяния сущаго.
Иисусе, в Вифанию пришедый прияти в любовь Свою скорбящия сестры, приими и мене заблудшаго.
Иисусе, Марфу многотрудную беседою Своею утешивый, утеши и мене о гресех скорбящего.
Иисусе, Марию с чаянием дома сидевшую не забывый, не забуди и мене во уныние впадшаго.
Иисусе, смерть, трепетати начинающую, пришествием в Вифанию устрашивый, смерти вечней не предаждь мя.
Иисусе, ад горький топтанием ног Твоих, к Вифании грядущих, страха исполнивый, адских мук избави мя.
Иисусе, Лазаря прежде Твоея Страсти из мертвых воздвигнувый, яви нам Свое Воскресение.
Кондак 5
Боготечней звезде нощный мрак разгоняющей подобно бысть предречение Твое, Господи, егоже, яко Владыка живота и смерти, изрекл еси Марфе, глаголющи: “Воскреснет брат твой”. Она же, яко еще немощная в вере, колеблющеся веровати, яко брат ея может ныне по слову Твоему из мертвых возстати, глагола Тебе: “Вем, яко воскреснет в воскрешение, в последний день”. Мы же недостойнии Тебе Победителю смерти с верою вопием: Аллилуиа.
Икос 5
Видев, яко сердце святыя Марфы, печалию пораженное о смерти Лазаря, не может еще веровати, яко и ныне, Господи, Ты силен еси из мертвых воскресити его, Ты рекл еси со властию, яко животом и смертию повелеваяй, желающи возбудити ю от таковаго малодушия: “Аз есмь Воскресение и Живот. Веруяй в Мя, аще и умрет, жив будет”. Мы же сему Божественному обетованию внемлюще, и живот вечный улучити хотяще, со упованием зовем Ти:
Иисусе, пришедый в Вифанию проповедати Воскресение, воскреси мя во страстех всего истлевшаго.
Иисусе, предвозвестивый Марфе Лазарево воскрешение, воззови мя от многих грехов возсмердевшаго.
Иисусе, обновивый веру Марфы в Воскресение, обнови душу мою умершвленную грехми.
Иисусе, призвавый всех нас уповати о умерших, просвети жизнь нашу омраченную страстьми.
Иисусе, живыми и мертвыми обладаяй, не предаждь мя горькой смерти в преисподней вечно мною обладати.
Иисусе, живот вечный нам даровавый, подаждь ми наследие блаженное на небесех восприяти.
Иисусе, Лазаря прежде Твоея Страсти из мертвых воздвигнувый, яви нам Cвое Воскресение.
Кондак 6
Проповедница Твоего, Христе, Божества явися святая Марфа, во исповедании своем Петру, Верховному Апостолу Твоему, равная: сия бо, егда вопрошена бысть от Тебе, емлет ли веру, яко всяк веруяй в Тя, аще и умрет, жив будет, глагола Тебе: “Ей, Господи, аз веровах, яко Ты еси Христос, Сын Божий, Иже в мир грядый”. Мы же сему исповеданию с благоговением внемлюще, с верою и любовию вопием Тебе: Аллилуиа.
Икос 6
Возсия новый свет веры и надежды у святыя праведныя Марии, дома в скорби сидевшей, егда прииде к ней сестра ея Марфа и тайно от пришедших ко ея утешению иудей возвести ей о Твоем, Святый Господи, пришествии, глаголюще: “Учитель пришел есть и глашает тя”. Та же, слышавши сие, возста и скоро пришедше падше, поклонися Тебе и лобызающе пречистии нози Твои и утешения ищущи, глаголаше Тебе со слезами:
“Иисусе, живота Начальниче, аще был бы еси зде, не бы умерл мой брат”.
Иисусе, смерти Разрушителю, аще бы пришел еси семо, не бы лежал Лазарь четверодневный во гробе.
Иисусе, Утешителю Добрый, утеши в скорби сущую душу мою.
Иисусе, Учителю Благий, научи мя творити волю Твою.
Иисусе, Наставниче безнадежных, настави мя с надеждою и терпением нести крест мой.
Иисусе, Прибежище сирых, даждь ми при ногу Твоею обрести в скорби моей покой Твой.
Иисусе, Лазаря, прежде Твоея Страсти из мертвых воздвигнувый, яви нам Свое Воскресение.
Кондак 7
Хотящей Марии излити при ногу Твоею вся чувствия своя о Лазареве лишении и любовь к Тебе, Господи, Ты же увидев ю плачущуюся, и пришедшии с нею иудеи плачущия, огорчился еси духом и возмутился еси, человеческое показуя, и прослезился еси Сам, да и мы немощнии, в скорбех суще со дерзновением припадше к Тебе, изливаем в немощи из глубины души слезы своя, и со умилением вопием Тебе прослезившемуся о наших скорбех: Аллилуиа.
Икос 7
Новое и неизреченное снисхождение и человеколюбие крайнее явил еси, Сладчайший Иисусе, егда зря Мариины слезы, прослезился еси Сам. Иудеи же неции, видяще, яко о Лазаре плачеши, глаголаху: “Виждь, како любляше его”. Друзии же, в окаменении душ и сердец суще, не восхотеша разумети Божественное сострадание Твое немощем нашим, мняху самому Тебе немощну быти и глаголаху в Твое посмеяние: “не можаше ли Сей, Отверзый очи слепому, сотворити, да и сей не умрет”. Мы же прославляя человеколюбие Твое, от души вопием Тебе:
Иисусе, слезы о Лазаре с сестры его источивый, струями слезными очисти грехи мои.
Иисусе, Марфины и Мариины слезы утоливый, плачем Своим утоли печали моя.
Иисусе, трости сокрушенныя не преломивый, богозданный храм души моея не сокруши во мне.
Иисусе, льна курящася не угасивый, горящий светильник веры и любве не погаси во мне.
Иисусе, долготерпеливый, немощем нашим даже до конца спострадавый, в немощи моей укрепи мя.
Иисусе, человеколюбивый, даже до возскорбения за ны и до слез снизшедый, вечнаго плача исхити мя.
Иисусе, Лазаря прежде Твоея Страсти из мертвых воздвигнувый, яви нам Свое Воскресение.
Кондак 8
Странно бе вопрошание Твое, Христе Спасе, егда всем плачущим, Ты о Лазаре вопрошал еси: “Где положисте его?”, зане, яко Бог вся ведый, Ты предрекл еси смерть его, како же ныне, бездна сый ведения, не веси где погребен есть друг Твой? Обаче ныне вопрошаеши не неведый, уведети хотяй, но яко человек, человечески глаголя, хотяй скорбящия сестры Лазаря утешити и сего ради гроб его посетити. Таковое человеколюбное снисхождение Твое славяще, поем Тебе: Аллилуиа.
Икос 8
Весь сый Любовь, Весь сый желание наше, Господи Иисусе, Ты, пришед на гроб Лазарев, паки претя в себе о жестосердии тамо бывших, повелел еси взяти камень от гроба, да возсмердением смерти заградятся уста неверных. Марфа же, паки являющи немощь естества человеческаго, глаголюще Тебе: “Господи, уже смердит, четверодневен бо есть”. Обаче Ты паки укрепил еси ю в малодушии ея, глаголюще: “не рех ли ти, яко аще веруеши, узриши Славу Божию”. Мария же, зряще камень отвален от гроба, в притрепетном чаянии пребываше, веру в молчании соблюдающи, и точию в сердце глаголюще:
Иисусе, ко гробу друга Лазаря пришедый, очисти ум мой от сумнений неверных.
Иисусе, Славу Божию явити восхотевый, сохрани сердце мое от похотей скверных.
Иисусе, камень от гроба Лазаря отвалити повелевый, отвали камень жестосердия от гроба души моея.
Иисусе, глаголом уст Твоих вся силы ада устрашивый, не устраши мя явлением обетованныя Славы Твоея.
Иисусе, Кротчайший, кротко гробу Лазаря представый, кроткою душею сподоби мя Твое пришествие ощутити.
Иисусе, Сладчайший, мертвеца смердяща во гробе узревый, смиренным нравом подаждь ми Твою благодать лицезрети.
Иисусе, Лазаря прежде Твоея Страсти из мертвых воздвигнувый, яви нам Свое Воскресение.
Кондак 9
Все естество Ангельское смятеся, егда Ты, Чудотворче Господи, являя Славу Свою, яко Единородного от Отца, пред лицем множества народнаго хвалу воздал еси Небесному Отцу, глаголя: “Отче, благодарю Тя, яко услышал еси Мя”, и сия рек, гласом велиим воззвал еси: “Лазаре, гряди вон” и егда бездыханный повеление Твое послушав, абие одушевлен от смерти возста и изыде укроем рукама и ногама обязан, да чудо сие зряще, вся колена небесных и земных и преисподних Тебе Победителю смерти преклонятся, вопиюще: Аллилуиа.
Икос 9
Витии богоглаголивии, аще и много глаголют, но не возмогут достойно прославити велие и страшное чудо Твое, Господи, егда Ты Лазаря Четверодневнаго от мертвых воздвигл еси, да Марфу и Марию, с нимиже и всех нас в вере и надежде Воскресения и безсмертия души утвердиши. Сего ради мнози от иудей к Марии пришедших, видевше, яже Ты сотворил еси в Вифании, вероваша в Тя, яко в Сына Божия и радостно принесоша Тебе похвалы сицевыя:
Иисусе, Лазаря мертва Четверодневна воскресивый, и мене умерша страстьми воскреси.
Иисусе, друга Твоего повойми связана разрешивый, и мене связана узами греха разреши.
Иисусе, мертвеца смердяща от гроба свободивый, и мене из гроба отчаяния изведи.
Иисусе, агнца любимаго от пропастей ада исхитивый, и мене от вечныя тьмы кромешныя сохрани.
Иисусе, повелением Живоноснаго гласа Твоего воздвигнувый смердящаго, и мене истлевшаго страстьми Словом Твоим оживи.
Иисусе, всесильною крепостию Твоею Лазаря Четверодневна возставивый, и мене общника тридневнаго Воскресения Твоего покажи.
Иисусе, Лазаря, прежде Твоея Страсти из мертвых воздвигнувый, яви нам Свое Воскресение.
Кондак 10
Спасти восхотел еси вся, Христе Спасе, обаче, сынове тьмы, зряще умершаго Лазаря, гласом Твоим от тления возставша, не восхотеша в ожесточении сердец своих уверовати в Тя, и нецыи от них поидоша к первосвященником и фарисеям, и возвестиша им, яже Ты сотворил еси в Вифании. Мы же безумию их не вдающеся, но в общее Воскресение по обетованию Твоему верующе, Тебе, Живодавцу и Спасителю нашему велегласно вопием: Аллилуиа.
Икос 10
Царю Превечный, Иисусе! Стены каменныя тверде быша первосвященницы иудейстии, егда услышавше, каковое страшною чуди сотворил еси в Вифании, совет восприяша на Тя, глаголюше: “Что сотворим, яко Человек Сей многа знамения творит”. Един же от них, Каиафа, архиерей сый лету тому, рече, яко уне есть, да Един Человек умрет за люди своя, а не весь язык погибнет. И от того убо дне совещаша, да убиют Тя, Христа Своего и Владыку, вкупе же и Лазаря, яко мнози его ради прихождаху от иудей и вероваху в Тя. Сего ради вопием Ти сице:
Иисусе, Сыне Божий Безсмертный, Лазаря ради, яко агнец незлобивый на заклание приуготовленный.
Иисусе, Спасе наш, человеки судимый, от Каиафы за люди умрети неволею предреченный.
Иисусе, на беззаконном соборище вкупе с Лазарем на смерть осужденный, не осуди нас на судище Твоем.
Иисусе, в верной Вифании, в дому Лазаря печаль на радость преложивый, помяни нас во Царствии Твоем.
Иисусе, Креста предначинание в Вифании совершивый, силою Креста Твоего сохрани нас.
Иисусе, льстивых фарисеев чудесы своими устрашивый, воскресением Лазаря возвесели нас.
Иисусе, Лазаря прежде Страсти Твоея из мертвых воздвигнувый, яви нам Свое Воскресение.
Кондак 11
Пение всеумиленное да принесет Тебе, Христе Спасе наш, Вифания верная и Тобою любимая, яко в радость Ты преложил еси печаль ея, Лазаря, воспитание ея, из гроба воздвизая, и да не сетует, яко на малое время Ты отшел еси во Ефрем порицаемый град близь пустыни, идеже ходил еси со ученики Своими, первосвященником заповедь давшим, да имут Тя. Мы же, удивляюшеся Твоему о ученицех пред страдании Твоими попечению, поем Тебе: Аллилуиа.
Икос 11
Свет велий и неизреченный осия Вифанию, егда прежде шести дней бытия Пасхи Ты паки пришел еси в весь сию, Сладчайший Иисусе, идеже любящия Тя сотвориша Тебе преславную вечерю, Лазарево воскрешение с радостию и благодарением воспоминающе. Бе же ту и Лазарь един от возлежащих, Марфа же с любовию многою паки служаше Тебе, Мария же от избытка радости, любве и благодарения, приемше литру мира нарда чиста многоценна, помаза пречистии нози Твои, и власы своими отираше я, и храмина исполнися вся от вони масти благовонныя. Мы же недостойнии, в радость оных блаженных сообедников Твоих проникнути желающе, со умилением многим вопием Тебе таковая:
Иисусе, с мертвецем воскресшим разделивый трапезу, даждь ми выну наслаждатися вечныя Твоея вечери на небеси.
Иисусе, Лазаря по воскрешении его небесною радостию исполнивый, сподоби мя небесныя мыслити на земли.
Иисусе, Марфу трудолюбную се уже второе на вечери послужити Тебе удостоивый, приими мя на Твое служение.
Иисусе, Марию, Божиею любовию горящую, нози Твои миром помазати сподобивый, даждь ми духа любве пламенение.
Иисусе, Вифанию странноприятием Тя на вечери зело возвеселивый, возвесели мя посреде трудов отдохновением.
Иисусе, Марфины слезы и Мариин плач Лазаревым возстанием скоро утешивый, утеши мя в скорбех Твоим посещением.
Иисусе, Лазаря прежде Твоея Страсти из мертвых воздвигнувый, яви нам Свое Воскресение.
Кондак 12
Благодать велию даровал еси, Христе, воскрешением Лазаря благословенней Вифанийстей веси, восприявшей Тя. Наутрие сретают Тя в Иерусалиме крест, злохуление, и поношения от злобных фарисей, завистию дышащих, здесь же Ты обрел еси прежде креста любовь, радость, и мир о Дусе Святе. Сего ради да будет Тебе похвала вечная, Вифание, яко Зиждителя странноприяти сподобилася еси: благоуготовися, украси божественне твоя входы, расшири преддверия твоя, да и мы с тобою воспоем прославившему тя Господу: Аллилуиа.
Икос 12
Поюще Твое из мертвых Лазарево воскрешение, поклоняемся величию дел Твоих, Христе, прославляем вседержительство Твое и крайнее снисхождение с неизреченным человеколюбием Твоим и веруем с Марфой, яко воистину Ты еси Христос, Сын Божий, Иже в мир грядый, с Марией же приседим при ногу Твоею, внимающе единому на потребу Божественному Слову Твоему, и сподоби нас молитвами праведнаго Лазаря, друга Твоего, видети Твою светлую над смертью победу, и живоносное Воскресение Твое вопиюшим Тебе тако:
Иисусе, ада Победителю, с Лазарем Четверодневным из тьмы кромешныя греха изведи мя.
Иисусе, смерти Низложителю, с другом Твоим умершим к жизни и воскресению паки воззови мя.
Иисусе, Лазаря на острове Крите от злобы фарисейския спасый, имиже веси судьбами спаси мя.
Иисусе, тамо его от Апостол во епископа поставивый, от Церкви Твоея не отлучи мя.
Иисусе, томуже омофор рукама Богоматери истканный вручивый, под кровом Ея сохрани мя.
Иисусе, Лазаря посещения Пречистыя во днех плоти Ея удостоивый, Тоя предстательства не лиши мя.
Иисусе, Лазаря прежде Твоея Страсти из мертвых воздвигнувый, яви нам Свое Воскресение.
Кондак 13
О, Сладчайший Иисусе, всех Радосте, Свете Тихий, Живот мира и Воскресение наше! Приими от нас, якоже от Марфы и Марии сие малое благодарение наше о Воскрешении Лазаря от всея души Тебе приносимое, и сотвори ны общницы быти того из гроба возстания, да всесильным Словом Твоим воздвигнеши и нас от всякаго падения греховнаго и смерти вечныя, и сподобиши ны получити наследие неувядаемое на небесех, идеже со всеми святыми да воспоем Тебе: Аллилуиа.
Молитва Лазареву Воскрешению
Молитва святому праведному Лазарю
Кондак 1
Возбранный воеводо, Творец веков, Господь, Царь славы, глубиною мудрости промышляя полезное в роде родов о Церкви Своей, видев наше маловерие, греховный сон и охлаждение, чудес действо сугубо даде по сгорении мощей угоднику Своему, сим показуя велие дерзновение его ко Господу, да вся люди страны Сибирския, возгорающеся верою и любовию, воспоют новому чудотворцу и цельбоподателю, и молитвеннику своему, от всяких бед свободи ны, отче, зовущия ти: Радуйся Софроние, горящий к Богу огнем любве неугасимыя!
Икос 1
Ангелов Творец, Господь наш Иисус Христос, благостию Своею возвышая человеки в первое достоинство на небеси, извед тя отче Софроние, да служишн Ему во Ангельском чину и монашествуеши на земли. Мы же, воспоминающе юность и подвиги твоя, глаголем ти сице:
Радуйся, духовных родителей духовное чадо;
Радуйся, от юности положивший доброе начало;
Радуйся, носяй имя соименно перводиакону Стефану;
Радуйся, сподобивыйся слышатн небесный глас во храме;
Радуйся, премудрости Божней сын возлюбленный;
Радуйся, в пострижении Софронием нареченный;
Радуйся, еще юн сын, бывый монашествующим наставник;
Радуйся, отче любвеобильный и строгий подвижник;
Радуйся, Софроние, горящий к Богу огнем любве неугасимыя!
Кондак 2
Видя Елисавета, венчанная Царица, благонравие твое и святость жития, изволением Божиим избра тя в предстоятеля Лавры Невския, да якоже славил еси Бога, на юге России, тако и в стольном граде, на севере, монахи и бельцы научиши непрестанно пети Богу Ангельскую песнь: Алилуия!
Икос 2
Разум от премудрости Божией дарованный, не можаше укрытися в тебе, но яко пресветлая звезда возсия на высоте архиерейства и учительства, даряя светом учения всю страну пространныя Сибири, внушая верным чадам церкви благодарственно вопити просветителю своему:
Радуйся, Святителю богоизбранный и трудолюбивый;
Радуйся, не устраши бо тя путь с лишениями многоскорбный;
Радуйся, мы бо тя приемлем яко друга Божия;
Радуйся, имел бо и ты друга душе инока житием свята Синесия;
Радуйся, мужу желаннй духовных и благодати носителю;
Радуйся, архипастырю Иркутский, Иннокентия святаго заместителю;
Радуйся, иерарше богоизбранный и людем благоприятный;
Радуйся, от священнаго собора и от житель града Иркутска радостно приятый;
Радуйся, Софроние, горящий к Богу огнем любве неугасимыя!
Кондак 3
Силою свыше облечен быв, Святителю Софроние, обходя грады и веси паствы твоей, отечески наказуя клирики и иереи, да служат Богу со страхом по достоинству сана своего, да учат же и дети, отцы и матери разумно пети небесную песнь: Аллилуия!
Икос 3
Имея ревность по Бозе, якоже и пророк Илия, всякого власть имущаго учил еси право ходити в законе Господнем, правду и cyд творити, заступати немощныя, сирых и вдовиц от напасти избавляти, к нищим милостивым быти, за еже мы ублажающе тя, тако глаголем:
Радуйся, отче, правых путей любителю;
Радуйся, злокозненных нравов искоренителю;
Радуйся, истин евангельских провозвестниче;
Радуйся, злаго властелина усмирителю;
Радуйся, яко града Нерчинска первый быв посетителю;
Радуйся, своим служением оставивый память чадом и родителям;
Радуйся, от сосуда сердца своего благодать всем изливаяй;
Радуйся, земли нерчинской благословенне подаваяй;
Радуйся, Софроние, горящий к Богу огнем любве неугасимыя!
Кондак 4
Бурю внутренних волнений не мощи стерпети, ревнителю благочестия, яко не воздается честь благовестом церковному песнопению в Литургии, вечерни и утрени: таже горя любовию ко славе Божией, повелел еси на Достойно, на Господи возвах и на Честнейшую ударяти в кампан, да христиане, в домах и на пути слышавше глас Церкви, воспоют хвалу Богу: Аллилуия!
Икос 4
Слышав речение Господне, иже сотворит и научит, сей велий наречется в царствии небеснем. Делом слово исполняя: молитву, пост, поклоны, и всяко томление восприял еси, к сим же и человеколюбия не оставляя к меньшей братии, яко прежде кончины возмогл еси святость стяжати, за еже приими от нас похвалу сию:
Радуйся, отче любве ради Христовы земная вся оставивый;
Радуйся, ея ради красная мира нивочтоже вменивый;
Радуйся, блаженство облобызавый нищеты духовныя;
Радуйся, страхом Божиим попаливый страсти греховныя;
Радуйся, приявый иго Христово на рамена нзмлада;
Радуйся, неуклонно шествовавый узким путем до вышняго града;
Радуйся, нетленных благ на небеси обладателю;
Радуйся, дивныя славы во светлости святых созерцателю;
Радуйся, Софроние, горящий к Богу огнем любве неугасимыя!
Кондак 5
Боготочною кровию обновившему род человеческий, Христу последовал еси, блаженне, принося Ему бескровную жертву во оставление грехов людей твоих, та же и всего себе принесл еси во всесожжение, являяся источником исцелений, бесов прогонитель и зритель тайн сердечных, возбуждая люди, видевшия чудеса, пети Богу: Аллилуия!
Икос 5
Видевше сынове великия Сибири пречудное твое житие, како в последняя лета возсиял еси в новопросвещенной стране, отче Софроние, обаче древних отец сподобляяся чести равное дарование приял еси от Бога, Его же благодаряще, тя величаем приветствии сими:
Радуйся, Иерарше, Николая Чудотворца ревнителю;
Радуйся, дивному Иннокентию верный подражателю;
Радуйся, соделателю в вышних всем святителем;
Радуйся, и земным являяся от искушений хранителем;
Радуйся, благочестие и веру соблюдый нескверну;
Радуйся, в венце славы предстоя свету невечерню;
Радуйся, свет явивыйся, егда Христос родися;
Радуйся, ты бо в светлые дни Пасхи преставися;
Радуйся, Софроние, горящий к Богу огнем любве неугасимыя!
Кондак 6
Проповедник бывый веры Христовой и познания истины в Монголех и во всяком языце ближняя и дальняя Сибири, пришел еси и ко своему пределу, еже есть: земля еси и в землю отидеши, отдав убо дух Богу, тело же оставив верным на много лета в пещере, да, приходяще, людие поют надгробную песнь: Аллилуия!
Икос 6
Возсиявшее солнце в земли Иркутстей, святый Софроний в старости преклонней позна запад свой, оставив земная, восприял есть от руки Господни вечная благая, еже мы познахом от чудес и целебные силы, присущия святым мощем его, и, удивляяся, поем ему таковая:
Радуйся, пастырю неусыпно пасый Христово стадо;
Радуйся, надеждо ненадежных и в сердечной туге отрадо;
Радуйся, ты бо отшел еси прияти венец славы;
Радуйся, ибо на тебе оправдася суд Божией правды;
Радуйся, твоя бо душа вчинена есть в святителей лики;
Радуйся, яко блаженство сие пребудет в бесконечныя веки;
Радуйся, тело бо твое остася нетленно;
Радуйся, яко чудо сие бысть всей церкви явленно;
Радуйся, Софроние, горящий к Богу огнем любве неугасимыя!
Кондак 7
Хотя Господь утешити нзбранныя люди Своя, междоусобным искушением угнетаемыя, волною неверия колеблемыя и вкупе с пастырьми гонимыя, открыл есть славу угодника Своего преблаженнаго Софрония, юже иматъ со святыми на небеси, да притекающе людие к его молитвенной помощи, поют Христу Богу: Аллилуия!
Икос 7
Дивная знамення начаша являтися у раки святых мощей твоих, отче преподобне. Уврачевал бо еси первее языкоболие, та же зубов возболение. Таже силу огневицы отрочам угасил еси, за еже благодарственно приносим ти песни сия:
Радуйся, врачу безмездный и цельбоподателю;
Радуйся, помазанием елея болезней облегчителю;
Радуйся, изливаяй милость на книжных, разумных и простых;
Радуйся, обновляяй веру искушением колеблемых;
Радуйся, явлением своим от позорныя смерти избавляяй;
Радуйся, молитвою твоею и кони свирепыя укрощаяй;
Радуйся, теплое утешение всех гонимых и скорбящих;
Радуйся, предстателю Господень за всех, к тебе прнбегающих;
Радуйся, Софроние, горящий к Богу огнем любве неугасимыя!
Кондак 8
Странно чудо, како святых мучеников кости наги источают исцеления: се видим и ныне: кости святителя Софрония, огнем изнурены и от нас грешных сокровенны, раны и вред врачуют, и всяко томление души скорбящей на радость прелагают. Воистину чудо преславно. Сего ради чудес дателю, Богу поем: Аллилуия!
Икос 8
Весь еси ты, отче, водворяешися в вышних, но и нижних, нас грешных, от скорби и от духа уныния долу поникших, не оставляеши, присно во притекающим к тебе помоществуешн, печаль на радость и скудость в довольство прелагаеши. За вся сия, ублажающе тя, глаголем сице:
Радуйся, источниче приснотекущий благодатных исцелений;
Радуйся, облегчителю жен от тяжких рождений;
Радуйся, умом изумленным разум возвращаяй;
Радуйся, явлением во сне изломленне костей исправляяй;
Радуйся, избавляяй от страха нощнаго боязливыя;
Радуйся, прогонителю блудного беса и подателю целомудрия;
Радуйся, твоим оком свыше на нноческня обители призирающий;
Радуйся, огненным столпом в возгорении града твоя мощи показующий;
Радуйся, Софроние, горящий к Богу огнем любве неугасимыя!
Кондак 9
Всякий естества закон превосходит, еже ты твориши, великий Чудотворче! Из под спуда бо земнаго являяся, глаголеши избранным: прославите мя и аз вас прославлю, и повелеваеши, да сотворят ограждение над гробом твоим, да не попирается ногами место святое, но со страхом ходяще людие окрест, поют: Аллилуия!
Икос 9
Ветии многовещаннии неразумеюще тайны Божией, яже о Софронни, егда узреша дым запаления, от святых мощей его велинм гласом на стогнах града и в домах велемудренно кричаху православным: «Уа! Где есть вера ваша? Где святость? Где мощи? Аще Софроний бе свят, почто не противися огню?» И ругахуся вере Христовей. Таже видевше множество чудес паче прежняго познаша, яко Бог поругаем не бывает: зазираху себе, возжигаху свещи, припадаху к честным останкам святых мощей, бияху в перси своя и, в глубоком молчании уст, сердцем вопияху:
Радуйся, Софроние, чудес делателю новоявленный;
Радуйся, подаяй прощение в покаянии просящим смиренно;
Радуйся, имеяй от Господа власть вязати и решити;
Радуйся, мощем своим ниспославый множайшую силу благодати;
Радуйся, огнеопальным действом лику сочетавыйся священномучеников;
Радуйся, отче милостивый, вразумителю мощей твоих хульников;
Радуйся, ограждаяй паству твою от диавольских умышленнй;
Радуйся, подателю благословения вначале добрых начинаний;
Радуйся, Софроние, горящий к Богу огнем любве неугасимыя!
Кондак 10
Спасти хотя град свой от кровопролитныя брани, миротворный отче, явился еси прослявляющему тя архипастырю Иоанну: «Мужайся», - рекл еси ему. Такожде и прежде явлейся, показуя гроб свой и глаголя: гроб сей ветхий, непотребен ми есть, еже знаменова самоприношение во умилостивительную жертву о граде. Тогда тайну сию познати Иоанн не можаше. Егда же сбыстся реченное, он и вся люди со умилением воспеваша хвалу Богу: Аллилуия!
Икос 10
Стена каменна прямо, стена одесную, стена ошуюю в пещере, идеже бе хранимо тело твое, угодниче Христов, яко несть возможно проникнути тамо пламени. Обаче Христос Господь премудростью Своею устрояяй полезное церкви, попустил есть, да сгорит гроб твой и тело твое, показуя сим, яко догмат святаго Православия несть чувственное и осязаемое, но сердечною верою постигаемое, надеждою возмогаемое и любовию пети научающее:
Радуйся, мысленный изъявителю православия;
Радуйся, смотрительно предавый своя мощи на сожжение;
Радуйся, венцем священномученнка украсивыйся по преставлении;
Радуйся, кротчайший отче, никаго же обличивый в запалении;
Радуйся, правды и премудрости Божией местное орудие;
Радуйся, предваривый Иоанну во сне быти имущее;
Радуйся, яко ты по сгорении сугубивый чудодействия;
Радуйся, сими бо чудесы возвеселил еси люди Иркутския;
Радуйся, Софроние, горящий к Богу огнем любве неугасимыя!
Кондак 11
Пение всеумиленное и горячую молитву вознесл еси к Богу в годину междоусобныя брани о граде твоем, великий наш Заступниче, яко ни единому гласу оружному слышатися во граде в день прославления твоего, и тако священный собор и множество верных возмогоша в мирной тишине – воспевати тебе хвалу и Богу: Алиллуия!
Икос 11
Церкви третияго спископа Иркутскаго устрой тя Бог, в триех ипостасях славимый, богоблаженне Софроние. Всесвятый же Дух всемогущий, всепремудрый, самовладычный, самоповелительный, исполни тя есть духа
премудрости, духа разума, духа страха Божия, да сими дарами Святаго Духа приведеши ко спасснию, люди вопиющия ти:
Радуйся, вместилище даров Духа Святаго;
Радуйся, очистилище человеческаго злаго нрава;
Радуйся, от страсти пиянственныя люди свобождаяй;
Радуйся, от боли главы, зубов и стомаха избавляяй;
Радуйся, течение крови и воды в теле, прикосновением уставляяй;
Радуйся, срачицею возложенною на гроб твой, здравие подаваяй;
Радуйся, устрояяй бедствюущим жилища к пребыванию;
Радуйся, неимущим где главу подклонитн кров дающий и пропитание;
Радуйся, Софроние, горящий к Богу огнем любве неугасимыя!
Кондак 12
Благодать, данною ти от Бога ведуще, прилежно просим тя, отче Софроние, пролей ныне теплую твою молитву о нас ко Господу, да презрев вся наша согрешения, дарует нам мирное житие, друг ко другу любве исполненное. Грады и Церкви неразоримы да сохранит, обилие всяких плодов земли да дарует и всех нас да спасет и помилует, мы же благодарным сердцем воспоем Ему: Аллнлуия!
Икос 12
Поюще дивнаго во святых Своих, Царя небеснаго прославльшаго тя, вернаго раба Своего, милостивое твое, скорое нам во всяких нуждах, поможение прославляем и, Бога благодаряще, радостно ти глаголем:
Радуйся, великославный Сибирскнй наш заступниче;
Радуйся, совершенный в добродетелех человече;
Радуйся, подражателю святых и священномучеников;
Радуйся, благнй и добрый наставниче иноков;
Радуйся, Пресвятыя Богородицы известный умилостивителю;
Радуйся, молитвенниче за град сей и сея страны покровителю;
Радуйся, света евангельского всесветлое сияние;
Радуйся, во тьме греховней сущим, просвещающее озарение;
Радуйся, Софроние, горящий к Богу огнем любве неугасимыя!
Кондак 13
О, Чудотворче преславный и заступниче наш, богомудре Софроние, приимн малое сие моление наше якоже Христос приял вдовицы две лепты, и благоприятным твоим ходатайством умоли Господа сил, силу свыше нам подати на исправление жития, да Того благодатию от грехов очистшеся, геенны избавимся и грядущая на небесех благая улучим, вопиюще Ему: Алиллуия (трижды).
Этот кондак читается трижды, затем икос 1 и кондак 1.
Молитва святителю Софронию
О Святче Божий, Святителю Христов, добрый Пастырю словеснаго стада, человече Божий, новый Чудотворче и неусыпный к Богу молитвенниче за страну сию, отче Софроние, призри с высоты небесныя на нас, с верою и любовию поклоняющихся образу твоему. Призри Святче Божий и виждь наше нестроение и раздоры, нашу тугу, скорбь и сердечную болезнь, от лишения братския любве прибывающия. Испроси у Христа Бога коемуждо нам благодати смирения, познания своея греховности и самоукорения, да внимающе кийждо своей совести, престанем осуждати ближняго, клеветати и поношати, но, соеденившеся друг ко другу любовию, сподобимся мирно во смирении прочее время живота нашего пожити и улучити христианскую кончину. Да совокупльшеся в будущей жизни со всеми святыми и с тобою, пастырю наш, прославнм Единаго в Троице славимаго Бога, Отца и Сына и Святаго Духа во веки веков. Аминь.