Тропарь преподобной Марии Египетской
В тебе, мати, известно спасеся еже по образу,/ приимши бо крест, последовала еси Христу,/ и деющи учила еси презирати убо плоть, преходит бо,/ прилежати же о души, вещи безсмертней.// Темже и со Ангелы срадуется, преподобная Марие, дух Твой.
Ин кондак преподобной Марии Египетской
Греха мглы избежавши,/ покаяния светом озаривши твое сердце, славная,/ пришла еси ко Христу,/ Сего Всенепорочную и святую Матерь/ Молитвенницу милостивную принесла еси./ Отонудуже и прегрешений обрела еси оставление/ и со Ангелы присно срадуешися.
Кондак преподобной Марии Египетской
Блудами первее преисполнена всяческими,/ Христова невеста днесь покаянием явися,/ Ангельское жительство подражающи,/ демоны Креста оружием погубляет./ Сего ради Царствия невеста явилася еси,// Марие преславная.
Величание преподобной Марии Египетской
Величаем тя, преодобная мати Марие, и чтим святую память твою, наставнице монахов и собеседнице Ангелов.
Кондак на Великий Понедельник
Иаков рыдаше Иосифова лишения, / и доблий седяше на колеснице, яко царь почитаемь: / египтяныни бо тогда сластем не поработав, / воспрославляшеся от Ведущаго человеческая сердца, / и Посылающаго венец нетленный.
Тропарь на Великий Понедельник
Се, Жених грядет в полунощи, / и блажен раб, егоже обрящет бдяща, / недостоин же паки, егоже обрящет унывающа. / Блюди убо, душе моя, / не сном отяготися, / да не смерти предана будеши, / и Царствия вне затворишися, / но воспряни зовущи: / Свят, Свят, Свят еси, Боже, / Богородицею помилуй нас.
Тропарь преподобного Евфимия, архимандрита Суздальского, чудотворца
Яко светозарная звезда,/ пришел еси от востока на запад,/ оставив отечество твое, Нижний Новград,/ и, дошед богоспасаемаго града Суждаля,/ в нем обитель сотворил еси,/ и собрал еси монахов множества,/ и, прием дар чудес от Бога, отче Евфимие,/ был еси о Христе собеседник/ и спостник преподобному Сергию./ С нимже у Христа Бога испроси нам здравие, и спасение,/ и душам нашим велию милость.
Кондак преподобного Евфимия, архимандрита Суздальского, чудотворца
Волнений множество невлажно преходя,/ безплотныя враги струями слез твоих погрузил еси,/ Богомудре Евфимие преподобне,/ тем и чудес дар приял еси,/ моли непрестанно о всех нас.
Тропарь мученика Авраамия Болгарского
Днесь, благовернии людие, сошедшеся,/ восхвалим добляго сего мученика и страдальца Авраамия,/ сей бо, укрепляемь силою Божиею,/ душу свою положи за Христа,/ много пострадав от зловерных болгар./ Сего ради от Господа венец прият/ и ныне предстоит Ему/ и молится о граде сем/ и о всех нас, чтущих память его.
Ин кондак мученика Авраамия Болгарского
Укрепився, славне, любовию Господнею/ и Того честный Крест на рамо взем, иго Господне,/ посрамил еси диаволя коварствия/ и пострадал еси даже до смерти,/ и сего ради, досточудне, явися страдалец велик, Авраамие,/ и оружником храбротаинник/ и участник Божия благодати.
Кондак мученика Авраамия Болгарского
Яко многоценное сокровище,/ принесено бысть от Болгарский страны во град Владимир/ пречестное тело твое, мучениче Авраамие,/ имже подавши всем чтущим преславную память твою обилие исцелений,/ предстоя на Небеси Христу Богу/ и моля Его о спасении душ наших.
Тропарь преподобного Геронтия, канонарха Печерского, в Дальних пещерах
Всечестный канонарше Геронтие,/ правилоначальный бывый в церкви/ и в правиле иночестем возсиявший светло,/ моли Христа Бога,/ да прегрешений оставление/ подаст душам нашим.
Кондак преподобного Геронтия, канонарха Печерского, в Дальних пещерах
Канонаршествуя, честный канонарше Геронтие,/ и пение церковное поющим предводительствуя в церкви,/ уподобился воистинну Ангелом,/ поющим Бога на Небеси,/ ихже и житию подражая, и, с ними ликуя,/ поминай ны, любовию хвалящих тя.
Ин тропарь, общий, преподобным Геронтию и Леонтию канонархам, в Дальних пещерах почивающим
Двоице святая,/ правилоначальная, бывшая в церкви/ и в правиле иночестем возсиявшая светло,/ всечестнии канонарси,/ молите Христа Бога,/ да прегрешений оставление подаст душам нашим.
Ин кондак, общий, преподобным Геронтию и Леонтию канонархам, в Дальних пещерах почивающим
Канонаршествующе, честнии канонарси,/ и пение церковное поющим предводительствующее в церкви,/ подобистеся воистинну Ангелом,/ поющим Бога на Небеси,/ ихже житию подражавше, / и, с ними ныне ликующе, / поминайте ны, любовию хвалящих вас.