Тропарь священноисповедника схиархимандрита Севастиана Карагандинского
Троицы Святыя служителю,/ земне ангеле и небесне человече,/ духовнаго Оптинскаго старчества преемниче,/ Христов священнотаинниче и исповедниче,/ Духа Святаго обитель всечестная,/ преподобне отче Севастиане, досточтиме,/ испроси мирови мир/ и душам нашим велию милость.
Величание святым равноапостольным Мефодию и Кириллу, учителем словенским
Величаем вас,/ святии равноапостольнии Мефодие и Кирилле,/ вся словенския страны/ ученьми своими просветившия// и ко Христу приведшия.
Тропари на Великую Субботу
Благообразный Иосиф, / с Древа снем Пречистое Тело Твое, / плащаницею чистою обвив, и вонями, / во гробе нове покрыв положи.
Слава: Егда снизшел еси к смерти, Животе безсмертный, / тогда ад умертвил еси блистанием Божества. / Егда же и умершия от преисподних воскресил еси, / вся Силы Небесныя взываху: / Жизнодавче, Христе Боже наш, слава Тебе.
И ныне: Мироносицам женам при гробе представ, Ангел вопияше: / мира мертвым суть прилична, / Христос же истления явися чуждь.
Кондак на Великую Субботу
Бездну заключивый мертв зрится, / и смирною и плащаницею обвився, / во гробе полагается, яко смертный, Безсмертный, / жены же приидоша помазати Его миром, / плачущия горько и вопиющия: / сия суббота есть преблагословенная, / в нейже Христос уснув, воскреснет тридневен.
Тропарь святителю Евтихию Константинопольскому
Правило веры и образ кротости,/ воздержания учителя/ яви тя стаду твоему/ яже вещей истина,/ сего ради стяжал еси смирением высокая,/ нищетою богатая./ Отче Евтихие,/ моли Христа Бога/ спастися душам нашим.
Кондак святителю Евтихию Константинопольскому
Божественнаго верно Евтихия вси поюще, людие,/ любовию да ублажим, яко пастыря велика и служителя,/ и учителя премудра, и прогонителя ересей,/ молит бо Господа о всех нас.
Тропарь равноапостольного Мефодия, архиепископа Моравского
Святителя Твоего, Христе,/ творящим светло торжество успения/ милость Твою свыше подаждь,/ отверзи же Царствия двери,/ разреши же узы наша многих грехов/ ходатайством святаго Твоего ученика,/ отца нашего.
Тропарь равноапостольных Мефодия и Кирилла
Яко апостолом единонравнии/ и словенских стран учителие,/ Кирилле и Мефодие богомудрии,/ Владыку всех молите,/ вся языки словенския утвердити в Православии и единомыслии,// умирити мир и спасти души наша.
Кондак равноапостольного Мефодия, архиепископа Моравского
Божественна и верна Мефодия/ вси воспоим, людие, и любовию ублажим,/ яко пастыря великаго словеном,/ служителя Троицы честна,/ прогонителя ереси,/ молит бо ся о всех нас.
Кондак равноапостольных Мефодия и Кирилла
Священную двоицу просветителей наших почтим,/ Божественных писаний преложением источник богопознания нам источивших,/ из негоже даже доднесь неоскудно почерпающе,/ ублажаем вас, Кирилле и Мефодие,/ Престолу Вышняго предстоящих// и тепле молящихся о душах наших.
Величание
Величаем вас,/ святии равноапостольнии Мефодие и Кирилле,/ вся словенския страны/ ученьми своими просветившия// и ко Христу приведшия.
