Акафисты - 20 апреля 2025
Кондак 1
Возбранный Воеводо, Господи Небесе и земли, победно благодарственное пение приносим Тебе, раби Твои, во ад ныне сшедшему и с Собою вся воскресившему, и наше избавление празднующе, светло вопием: Христос воскресе из мертвых, смертию смерть поправ и сущим во гробех живот даровав.
Икос 1
Ангел Господень, в вечер субботний в трусе велии сошед с Небесе, отвали камень от дверий гроба Иисусова и седяще на нем. От страха его сотрясошася стрегущии и быша яко мертви. Мы же Воскресшему Живому Богу с мироносицами покланяемся и Пасху тайную благовествуем, вопиюще: Христос воскресе, и князи адстии падоша. Христос воскресе, и устрашишася вратницы адовы. Христос воскресе, и сокрушишася врата медная. Христос воскресе, и твердыни адовы положишася в запустение. Христос воскресе, и смерть рыдает. Христос воскресе, и ад, стеня, вопиет: Христос воскресе из мертвых, смертию смерть поправ и сущим во гробех живот даровав.
Кондак 2
Видяще Мария Магдалина, и Мария Иаковля, и Саломия юношу во гробе Иисусове, одеяна во одежду белу и седяща в десных, ужасошася. Он же глагола к ним: “Иисуса Распятаго ищете? Несть зде, воста бо, якоже рече. Приидите, видите место, идеже лежа Господь, и скоро шедше рцыте учеником Его: Христос воскресе из мертвых, смертию смерть поправ и сущим во гробех живот даровав”.
Икос 2
Разум неразумеваемый разумети ищуще, Петр и другий ученик течаста ко гробу и, вшедше в онь, видеша ризы едины лежаща и сударь, иже бе на главе Иисусове, не с ризами лежащъ, но особь свит на единем месте, веровавше же, возопиша с веселием: Христос воскресе, и вся тварь радуется. Христос воскресе, Небеса да веселятся. Христос воскресе, и сликовствуют нам Ангели. Христос воскресе, и просветишася преисподняя. Христос воскресе, воскликнем с веселием, от смерти спасеннии. Пойте же Господеви вся земля: Христос воскресе из мертвых, смертию смерть поправ и сущим во гробех живот даровав.
Кондак 3
Силою свыше облече Господь Своя ученики по Воскресении. Тии же идоша в Галилею, в гору, аможе повеле им Иисус, и пришедшим им глагола Иисус: “Дадеся Ми всяка власть на Небеси и на земли. Шедше убо, научите вся языки, крестяще их во имя Отца и Сына и Святаго Духа, учаще их блюсти вся, елика заповедах вам”. Тии же поклонишася Ему, зовуще: Христос воскресе из мертвых, смертию смерть поправ и сущим во гробех живот даровав.
Икос 3
Имущи в сердце своем любовь к Учителю, Мария Магдалина стояще у гроба вне, плачущи, и Воставшаго из мертвых видящи, яко вертоградаря, вопрошаше: “Аще Ты еси взял Его, повеждь ми, где еси положил Его, и аз возьму Его”. Обаче, паче чаяния, слышавши: “Марие, восхожду ко Отцу Моему и Отцу вашему и Богу Моему и Богу вашему”, прииде ко учеником, глаголющи: Христос воскресе, и жало греховное притупися. Христос воскресе, и мир от потопа греховнаго спасеся. Христос воскресе, и мы от работы врагу свободихомся. Христос воскресе, и диаволе прельщение упразднися. Христос воскресе, и бывшее на нас рукописание загладися. Христос воскресе, и вся тварь обновися, зовущи: Христос воскресе из мертвых, смертию смерть поправ и сущим во гробех живот даровав.
Кондак 4
Бурю помышлении сумнительных внутрь имея, Фома учеником, глаголющим, яко видехом Господа, рече им: “Аще не увижу на руку Его язвы гвоздиныя и вложу перста моего в язвы гвоздиныя, и вложу руку в ребра Его, не иму веры”, но, уверився, с веселием возопи: Христос воскресе из мертвых, смертию смерть поправ и сущим во гробех живот даровав.
Икос 4
Слышав Фома ученик, видевших Господа, и очима своима хотяй Того зрети, рече: “Не иму веры”. По днех же осьмих прииде Иисус затворенным дверем, ста посреде ученик и глагола Фоме: “Принеси перст твой семо, и виждь руце Мои, и принеси руку твою, и вложи в ребра Моя: и не буди неверен, но верен”. И отвеща Фома, и рече: Христос воскресе, Ты еси Господь мой. Христос воскресе, Ты еси Бог мой. Христос воскресе, и вси нетление и жизнь восприяхом. Христос воскресе, и мертвии восташа. Христос воскресе, и избавихомся осуждения и муки. Христос воскресе, и жизнь из гроба возсия мирови поющему: Христос воскресе из мертвых, смертию смерть поправ и сущим во гробех живот даровав.
Кондак 5
Божества огнем не опалися Фома, ребро Спасово дерзновенно осязав. Паче же просветися, Бога, на спасение наше воплотившася и паки с плотию воскресшаго, познав. Темже неверием своим блаженный близнец церковную веру утверждает, юже исповедующе согласно вопием: Христос воскресе из мертвых, смертию смерть поправ и сущим во гробех живот даровав.
Икос 5
Видевше Иисуса воскресша, ученицы убояхуся, мняще дух видети. Иисус же, хотя уверити их, показа им руце и нозе и ребра Своя, таже рыбы печены часть прием и от пчел сот пред ними яде. Тем уверившеся и страх свой и печаль свою отложивше, в радости пояху: Христос воскресе, хуждшая восприим, и подаде нам лучшая. Христос воскресе, и ад умертвися блистанием Божества Его. Христос воскресе, и тьма разрушися, и мрачнии демони отгнашася. Христос воскресе, и истлевшее страстьми человеческое естество обновися. Христос воскресе, и беззакония наша туне очистишася. Христос воскресе, и мы веи, в нетление облекшеся, песнь сию Ему приносим: Христос воскресе из мертвых, смертию смерть поправ и сущим во гробех живот даровав.
Кондак 6
Проповедники по Воскресении Твоем в мир посылая, богоносныя апостолы Твоя, Христе, рекл еси им, дунув: “Приимите Дух Свят. Имже отпустите грехи, отпустятся им; и имже держите, держатся”. Темже даждь и до днесь во всем мире чада церковная, от грехов разрешаеми, славят непрестанно Твое милосердие и душами чистыми в радости поют: Христос воскресе из мертвых, смертию смерть поправ и сущим во гробех живот даровав.
Икос 6
Возсиял еси, Христе, и во мрачных удолиях ада свет Твоего Воскресения, прощение и ослабу, и избавление благовествуя, Многомилостиве, душам от века тамо содержимым. Темже от змия, человекоубийцы, исхищаеми, играюще, к свету Твоему устремишася, поюще: Христос воскресе, и узы наша разтерзашася. Христос воскресе, и сень смертная в вечную жизнь преложися. Христос воскресе, и держава смерти уже не возможет держати человека. Христос воскресе, и мучителева дерзость низложися. Христос воскресе, и рай вместо ада жити нам даровася. Христос воскресе, и мир воспевает присно: Христос воскресе из мертвых, смертию смерть поправ и сущим во гробех живот даровав.
Кондак 7
Хотяй падшему Адаму послужити, Спасе наш, на земли явился еси, и на земли того не обрет, даже до ада низшел еси ища, да, сретив Тя долу, в преисподних земли, со всеми спасемыми поет: Христос воскресе из мертвых, смертию смерть поправ и сущим во гробех живот даровав.
Икос 7
Новыя жизни начало положил еси мирови, Господи, Твоим славным Воскресением. Ветхая бо вся мимоидоша: и ад, и смерть, и властительство диавола. Свободна убо вся тварь познавается, и прежде омраченнии, ныне яко сынове Божии, ликуют, поюще: Христос воскресе, бездну милости и щедрот излияв на род наш. Христос воскресе, в ров низпадших нас воздвигнувый с Собою. Христос воскресе, и мы от сетей демонских избавихомся. Христос воскресе, и горесть греха в сладость райския жизни преложися. Христос воскресе, и древом умерщвленнии ожихом. Христос воскресе, и нас возведе в прежнее достояние, да зовем: Христос воскресе из мертвых, смертию смерть поправ и сущим во гробех живот даровав.
Кондак 8
Странствуя с Клеопою и Лукою в весь, отстоящую стадий шестьдесят от Иерусалима, и не познан быв има, поносил еси, Спасе, неверствию их и жестосердию, глаголя: “Не сия ли подобаше пострадати Христу и внити в славу Свою?” И, начен от Моисея и от всех пророк, научил еси их пети: Христос воскресе из мертвых, смертию смерть поправ и сущим во гробех живот даровав.
Икос 8
Всего Себе, Бога суща и человека совершенна, преподал еси, Спасе, двема ученикома Твоима во Еммаусе, егда приимь хлеб, благословил еси и, преломив, дал еси има. Онема и отверзостеся очи, и познаста Тебе, Ты же невидимь бысть има, и рекоста к себе: Христос воскресе, и жизнь воцарися. Христос воскресе, и диаволя лесть обличися. Христос воскресе, и преста жертва идольская. Христос воскресе, и вся земля приносит Ему жертву хваления. Христос воскресе, и мы, вкусивше древле преслушаннаго брашна, ныне вкушаем пищи вечныя. Христос воскресе, и мы радости присносущныя причастницы бываем, поющии: Христос воскресе из мертвых, смертию смерть поправ и сущим во гробех живот даровав.
Кондак 9
Вси Ангели, Христе Спасе, твое Воскресение поют на небеси. Сподоби и нас на земли чистым сердцем в веселии воспевати: Христос воскресе из мертвых, смертию смерть поправ и сущим во гробех живот даровав.
Икос 9
Ветия всемирный и учитель языков Павел богоглаголивый, яко труба, вопиет: “Христос воскресе от мертвых, Начаток востания умерших бысть. Якоже во Адаме вси умирают, такожде и о Христе вси оживут”. Темже Воскресение Христово видевше, в радости вопием: Христос воскресе, и князь мира низложися. Христос воскресе, и трепещет преисподняя. Христос воскресе, и смерть пожерта бысть победою. Христос воскресе, и ад пленен бысть Того державою. Христос воскресе, и свободихомся от адовых нерушимых уз. Христос воскресе, и мы, из нетления избавльшеся, сыны воскресения явихомся, и поем: Христос воскресе из мертвых, смертию смерть поправ и сущим во гробех живот даровав.
Кондак 10
Спасти хотя род человеческий от работы вражия, распятие и смерть претерпел еси, Господи, погребен же быв, в третий день от мертвых востал еси. Тем же Ангел, блистаяйся во гробе, благовествует женам, глаголя: Христос воскресе из мертвых, смертию смерть поправ и сущим во гробех живот даровав.
Икос 10
Третие по Воскресении явися Иисус на мори Тивериадстем рыбу ловящим Симону Петру, и Фоме, и Нафанаилу, и сыном Зеведеевым со инема от ученик Его двема и, яко Владыка всех, повелевает мрежу одесную страну корабля воврещи, и бысть слово дело вскоре, и многое рыб множество, и вечеря странна готова на земли. Ея же ныне мысленно насладитися и нас сподоби, Господи, поющих: Христос воскресе, и дадеся Ему власть на небеси и на земли. Христос воскресе, и Царство Божие наста. Христос воскресе, и Тело Его, яко Хлеб Жизни, вси приемлем. Христос воскресе, и Крови Его, яко Источника Безсмертнаго, вкушаем. Христос воскресе, и Адам, свобожден, с нами ликует. Христос воскресе, и Ева, от уз избавляема, радуется, зовущи: Христос воскресе из мертвых, смертию смерть поправ и сущим во гробех живот даровав.
Кондак 11
Пение всеумиленное приношаше Воскресшему Тебе, Петр, трищи бо отвержеся Тебе, трищи же и исповедуя: “Господи, Ты вся веси, Ты веси, яко люблю Тя”. Трищи и слышит от Тебе сладчайшее на паству паки призвание: “Паси агнцы Моя, паси овцы Моя”. Темже и зовет: Христос воскресе из мертвых, смертию смерть поправ и сущим во гробех живот даровав.
Икос 11
Света Подателю, якоже солнце, возсиял еси тридневно от гроба и вся просветил еси светом истиннаго богопознания. Темже седящии во тьме неверия и сомнения уверихомся со апостолы, яко Господь еси, и не истязуем уже: “Ты кто еси?” Но Воскресшаго Тя славяще; во умилении зовем: Христос воскресе, и всяческая просвети Воскресением Своим. Христос воскресе, и свет вечный возсия во тьме и сени смертней седящим. Христос воскресе, и верным подаде тайно осеняющее свыше Духа сияние. Христос воскресе, и духовная очеса прежде слепых отверзошася. Христос воскресе, и мы Отца светов познахом. Христос воскресе, да посрамятся вси отвергшиися Господа славы и с нами да воспоют: Христос воскресе из мертвых, смертию смерть поправ и сущим во гробех живот даровав.
Кондак 12
Благодатию Твоею всякому человеку удобнейший путь спасения указуя, Христе, глаголал еси Симону Петру: “Егда состареешися, воздежеши руце твои, и ин тя пояшет и ведет, аможе не хощеши”, назнаменуя, коею смертию прославит Бога. Возлюбленному же ученику повелел еси пребывати, дондеже приидеши. Темже, аще и разлучившеся апостоли, обаче союзом любве связуеми, согласно воспеваху: Христос воскресе из мертвых, смертию смерть поправ и сущим во гробех живот даровав.
Икос 12
Поюще Твое тридневное Воскресение, Христе, радуемся Твоему непреложному обещанию. С нами бо до скончания века быти обещался еси, от всякаго зла нас избавляя и к жизни вечней руководствуя. Сего ради, славяще Тя, вопием: Христос воскресе, и мы вреда всякаго избавляемся ныне. Христос воскресе, и нас одесную Отца с Собою посадил есть. Христос воскресе, и нас причастники вечныя славы Своея содела. Христос воскресе, и древле сокрушивый праотца сильный враг сокрушися. Христос воскресе, и со Ангелы мы, прежде отриновеннии, водворяемся. Христос воскресе, и с Собою вся воскресит, зовущия: Христос воскресе из мертвых, смертию смерть поправ и сущим во гробех живот даровав.
Кондак 13
О Пасха велия и священнейшая, Христе Иисусе, Спасителю наш, благодарно исповедуем спасительную великую милость Твою, яко и паки сподобил еси нас, недостойных, ныне вкусити радости Светлаго Воскресения Твоего. Подавай нам в невечернем дни Царствия Твоего истее и совершеннее Тебе, Сладчайшаго, причащатися, да со Ангелы и всеми святыми во веки веков поем вси радостно: Христос воскресе из мертвых, смертию смерть поправ и сущим во гробех живот даровав.
(Этот кондак читается трижды, затем икос 1 и кондак 1)
Молитва Воскресшему Спасителю
Слава Тебе, Господи Иисусе Христе, Боже мой, яко паки сподобил мя еси недостойного, прешедша поприще святаго поста, поклонитися Божественным Страстем Твоим и видети всерадостный день преславнаго из гроба Воскресения Твоего, воньже свободил еси сущия во аде от век связанныя души праведных. Тоя Божественныя свободы духа и плоти, дражайший Спасителю мой, и аз желаю, да разреши мя, связана суща многими грехи, и да сотвориши возсияти живоносному свету Воскресения Твоего во мрачней души моей: вижду бо безчисленныя щедроты и неизреченное человеколюбие Твое, яко не точию от небытия в бытие мя приведеси, и образа Твоего подобием украсив, всеядольния твари владыку поставил мя еси, но и посем падша с высоты и врагу поработившася, не оставил еси, но, искупив мя безценною Кровию Твоею, благодатию крещения снабдил мя еси, да востеку на первое достояние. Аз же, окаянный, запят быв умом плотским, обратихся вспять и паки раб сотворихся греха и страстей, донедеже един по единому погубих вся дары благодати Твоея. И ныне убо, что сотворю, не вем: обаче помянув глаголы пречистых уст Твоих, яко не пришел еси призвати праведники, но грешники в покаяние, и аз, яко един от сих, с верою и смирением прихожду к Живоносному Гробу Твоему, не ароматы и воню мира носяй (наг бо есмь и пуст благих дел), но паче надежду имый обрести в нем прощение грехом моим и обновление нечистому житию моему. Призри убо на мя, кающася и служити Тебе хотяща, и не отрини от благодати Воскресения Твоего! Живоносною смертию Твоею и погребением умертви моя лютыя страсти, да яко мертв и погребен живу в мире сем. Преславным востанием Твоим воздвигни мою душу, умерщвленную грехи, и оживи совесть, еяже ничтоже в мире нужнейше есть. Вознесением Твоим отторгни мя от суетных и душетленных благ земных, и сотвори мя горняя мудрствовати, яко да не ктому себе живя и угождая, но Тебе, Господу и Богу моему, служа и работая, якоже сподобихся поклонитися Воскресению Твоему на земли, тако сподоблен буду видети Тебе, дражайшаго Искупителя моего, и на Небеси, за приятие смерти крестныя славою и честию венчанна, и став одесную величествия Твоего, со Архангелы и Ангелы, и со всеми искупленными Тобою братиями моими, во веки веков пою Тебе: Аллилуиа. Аминь.
Кондак 1
Возбранному Воеводе, разрушителю смерти и ада, победную песнь Тебе, Всецарю Христе, приносим, яко востал еси, Всесильне, со славою тридневен от гроба и вся умершыя от века совоскресил еси: мы же страданием Твоим вечныя тли избавльшеся, к самому месту погребения Твоего с веселием и радостию зовем: Радуйся, живоносный гробе, из негоже Христос воскресе!
Икос 1
Ангел предстатель с небесе низшед, камень от гроба Твоего отвали, Христе Боже, и мироносицам благовести востание Твое, глаголя: шедше, рцыте учеником Его, яко воста от мертвых: они же, вразумленные чудным явлением, зряще ко гробу Твоему, с верою и любовию возглашаху: Радуйся, живоносный гробе, в немже Христос, яко человек, почи, и яко Бог, воскресе тридневен! Радуйся, яко из тебе Спас мира, яко Жених из чертога изшед, смерть попра и ада пленил есть! Радуйся, яко востанием Того, от века умерший, в жизнь нестареемую восташа! Радуйся, яко в тебе Христу возлегшу, проклятая в делех человека земля освятися! Радуйся, яко тобою первозданный Адам паки в ризу безсмертия облекается! Радуйся, яко в тебе образ всемирнаго воскресения начертавается! Радуйся, живоносный гробе, из негоже Христос воскресе!
Кондак 2
Яко прииде на гроб Мариа Магдалина и другая Мариа помазати Тело Твое, Христе Боже, обретоша Ангела на камени седяща, и глаголюща к ним: не бойтеся! Вем бо, яко Иисуса распятаго ищете: несть зде, но воста, якоже рече вам. Сия убо слышавше святыя жены, текше вспять, благовестиша учеником о востании Твоем, да вси, яко Творцу и воскресшему Владыце Ангельское пение воспоют, глаголюще: Аллилуиа!
Икос 2
Бурю внутрь имеяху сумнительных помышлений ученицы Твои, Христе, в час смерти Твоея, не ведуще Писания, яко подобает Тебе из мертвых воскреснути: темже Петр, весть прием о востании Твоем, тече ко гробу, хотя видети бывшее: приник же и видев едины ризы Твоя в нем лежаща, с верою возгласи: Радуйся, живоносный гробе, яко в тебе, посреде земли, всемирное спасение содеяся! Радуйся, яко Царю царей одр, и Владыке владык покоище был еси! Радуйся, яко тобою беззаконное сонмище иудейское всеконечне посрамися! Радуйся, яко пред тобою ересь саддукеев, глаголющих не быти воскресению, низложися! Радуйся, гробе, паче храма Соломонова честнейший! Радуйся, паче скинии свидения и ковчега завета святейший! Радуйся, живоносный гробе, из негоже Христос воскресе!
Кондак 3
Слышавше, иже от кустодии, суетнии стражи гроба Твоего, Христе, трус велий бывший, и камень отвален и гроб празден видяще, от страха быша яко мертвы, и текше во град, возвещаху архиереем и старцем вся бывшая: они же, пребеззаконнии, аще и умыслиша утаити велие чудо, но не возмогоша сокрыти истины, ниже воспятити верующым пети Тебе: Аллилуиа!
Икос 3
Иже иногда страха ради иудейска потаен сый ученик Твой, Христе, Иосиф, иже от Аримафеа, испроси у Пилата Божественное Тело Твое и с Никодимом, смешением смирны и алоя помазав е и плащаницею чистою обвив, во гробе нове положи, в немже никтоже от человек погребен бысть, токмо Ты един, да освятиши земное естество: увидев же по сих Твое из мертвых воскресение, пришед ко гробу Твоему, со умилением возгласи: Радуйся, живоносный гробе, не кустодиею, паче же Архангелами и Ангелами стрегомый! Радуйся, яко от тебе Христос со славою изшед, безумныя стражы Пилатовы недоумением и ужасом порази! Радуйся, яко печатей гробных не вредив, богопротивнаго Каиафу посрами! Радуйся, яко из тебе воскресшу Христу, светлый день всемирнаго Боговедения наста! Радуйся, яко тобою идолы и кумиры по всем концем земли сокрушатся! Радуйся, яко на тебе храмы Бога истиннаго по всей вселенней утвердятся! Радуйся, живоносный гробе, из негоже Христос воскресе!
Кондак 4
Воспоминающе ученицы Твои пресладкое обетование, еже, грядый на вольную страсть, провещал еси пред ними, варяти их по воскресении в Галилеи, поспешшеся идоша в Галилею, в гору, аможе повелел еси, и видевше Тя тамо, Егоже прежде обыкоша зрети, истинна человека, не привидением, но самою вещию плоть нашу носяща, с верою и любовию, яко Богу поклонишася, зовуще: Аллилуиа!
Икос 4
Разум неуразуменный был еси иудеом, неразумевшым пророческих о Тебе сказаний, ниже искавшым познати истину воскресения Твоего, како печати не рушив, из гроба изшел еси: темже безумие наущаху кустодию возвестити людем, Пречистое Тело Твое украдено быти: мы же преславному воскресению Твоему дивящеся, похвальная живоносному гробу Твоему восписуем, глаголюще: Радуйся, всебогатый гробе, яко имел еси в тебе всем жизнь Подающаго! Радуйся, яко оскверненная беззакониями человеческими земля пречистою Плотию Христовою, в тебе, возлежавшею, освящается! Радуйся, яко Воскресший из тебе прия всяку власть на небеси и на земли, да всех и вся к Богу Отцу приведет! Радуйся, яко каменю от тебе Ангелом отвалену бывшу, святыя жены мироносицы уразумеша Христово воскресение! Радуйся, яко Спасу мира из тебе воставшу, во всю землю изыде апостольское вещание! Радуйся, в немже благодать воскресшаго Жизнодавца до днесь невидимо почиет! Радуйся, живоносный гробе, из негоже Христос воскресе!
Кондак 5
По днех осмих от востания Твоего, Господи, пришел еси ко учеником Твоим, дверем заключенным, дарование Святаго Духа подая им: тогда убо и Фоме рекл еси: прииди, осяжи язвы Моя, и не буди неверен, но верен: темже познав Тебе истинно воскресша быти, с прочими ученики радостне возопи: Аллилуиа!
Икос 5
Ветия суемудренныя, книжники иудейстии, якоже рыбы безгласныя видим, недоумеющыя глаголати о преславном востании Твоем, Христе, и неразумеющыя, яко подобаше Тебе пострадати за род человечь и из мертвых воскреснути: мы же, совоскресшие Тебе верою и любовию, с веселием самому гробу Твоему зовем: Радуйся, живоносный гробе, яко тобою жизнь вечная всем концем земли познася! Радуйся, яко в тебе смертию Начальника жизни смерти жало и держава сокрушися! Радуйся, яко от севера и моря к тебе приходяще, воскресшаго Жизнодавца прославляют! Радуйся, яко от запада и востока текуще, вси в тебе залог безсмертия обретают! Радуйся, яко по образу Твоему все гробы издадут своих мертвецев в день последний! Радуйся, веры христианския утверждение и пророческих сказаний печате! Радуйся, живоносный гробе, из негоже Христос воскресе!
Кондак 6
Егда по воскресении Твоем, Христе, явился еси учеником Твоим на мори Тивериадстем, повелевая воврещи мрежу одесную корабля: тогда возлюбленный ученик Твой, познав Тя от ловитвы рыб, Петрови глаголаше: Господь есть! Изшедше убо на землю, обретоша огнь и рыбу лежащу и хлеб, от нихже вкусивше и познавше в Тебе своего Учителя и Господа, единеми усты и единем сердцем возопиша: Аллилуиа!
Икос 6
Утру сущу глубоку, жены приидоша на гроб Твой, Иисусе, но желаемаго Тела Твоего не обретше, недоумением и печалию одержими бяху: Ты же, Утешителю скорбящих, явлься им посреди вертограда, единым гласом: Марие! плач их на радость преложил еси: темже познавше воскресение Твое, с веселием восклицаху: Радуйся, живоносный гробе, в немже Христу всельшуся, адова оскудеша царствия! Радуйся, яко тебе от первосвященников запечатлену бывшу, владыка сени смертныя с трепетом издаде узники, яже от века содержал есть! Радуйся, яко в трусе, при востании из тебе со славою Искупителя человеков, вся тварь обрете вечное успокоение! Радуйся, яко в тебе образ всемирнаго воскресения Боголепно предъизобразися! Радуйся, яко тобою лик апостольский в вере и любви утвердися! Радуйся, и ты, Иосифе, толикое сокровище в твоем вертограде стяжавый! Радуйся, живоносный гробе, из негоже Христос воскресе!
Кондак 7
В страдании Твоем, Христе, не терпя солнце беззаконных неистовства, свет свой скры, и завеса церковная раздрася: в живоносном же гробе Тебе положену бывшу, земля потрясеся, аки хотя поглотити законопреступных: но Ты, яко Бог, воскрес еси со славою, и всероднаго Адама воздвигл еси с Тобою: темже достойно и праведно воскресению Твоему зовем: Аллилуиа!
Икос 7
По преславном востании Твоем, Христе, Лупе и Клеопе явился еси, яко странник, на пути в Еммаус, и беседующым им о приключшихся в Иерусалиме, зазираем был еси от них, яко един неведый бывшаго: Ты же, яко Всеведущий, пророчествия открыв и неверствие их обличив, познался еси има в преломлении хлеба: темже убо с радостию великою возвратившеся во Иерусалим, и узревше вертоград Иосифов, возгласиша: Радуйся, живоносный гробе, из негоже, яко Иона из чрева китова, Христос тридневен произыде! Радуйся, яко последнее виталище был еси Тому, Иже на земли не име где главу подклонити! Радуйся, яко тобою положися предел вольному уничижению нас ради Спасителя мира! Радуйся, яко в тебе предначася торжество Победителя ада и смерти! Радуйся, яко не ктому могут законопреступнии оклеветати лжею востание из гроба Сына человеческаго! Радуйся, яко тобою небо и земля и преисподняя обретоша радость! Радуйся, живоносный гробе, из негоже Христос воскресе!
Кондак 8
Все естество Ангельское и человеческое удивися великому Твоему, еже о нас, смотрению: неприступнаго бо, яко Бога, зряще всем приступив человека, зрак раба приимша, распята же и погребенна, но воскресша в третий день во славе и вознесшася с плотию на небо, тем убо яко Спасителю и Владыце воспеваем: Аллилуиа!
Икос 8
Новое и преславное чудо показал еси воскресением Твоим, Христе Боже наш, печати гроба не вредив, якоже и Девы в рождестве Твоем: темже почитаем вольная страдания Твоя, славословим Крест и погребение, и преславному воскресению Твоему покланяющеся, к живоносному гробу Твоему с веселием зовем: Радуйся, всесвятый гробе, из негоже Христос, якоже прорече, воскресе и Собою весь мир обнови! Радуйся, от негоже всезлобный враг рода человеческаго лютейший удар во главу прия! Радуйся, яко от тебе отваленный камень адова врата сокруши и вереи железныя сотре! Радуйся, яко из тебе всемирное Солнце правды возсия и мглу неверия разгна! Радуйся, яко в тебе Христу возлегшу, вся концы земли вони безсмертия исполнишася! Радуйся, яко тебе открывшуся, источник нашего тления заключися! Радуйся, живоносный гробе, из негоже Христос воскресе!
Кондак 9
Проповедницы востания Твоего, богоноснии апостоли, послани бывше, от конец до конец земли проповедаша Тебе истиннаго Бога, идолы сокрушиша, беззаконные обычаи языческие попраша, храмы и жертвенники Богу истинну воздвигоша, и всех верных научиша воспевати Тебе: Аллилуиа!
Икос 9
По востании Твоем из гроба, дверем заключенным, ко учеником Твоим вшел еси, и вкуш от хлеба и сота, сладость церковная, не привидение пред ними, но истиннаго их Учителя и Господа быти уверил еси: темже свобождшеся от недоумении и страха, с радостию неизреченною посещаху место погребения Твоего, глаголюще: Радуйся, живоносный гробе, в немже Бог Слово, плотию уснув, священнотайне тридневнова! Радуйся, яко Тойже востанием Своим вся от века уснувшыя возбудил есть! Радуйся, яко в тебе Солнцу правды, Христу, зашедшу, сущым во аде и сени смертней Свет жизни возсия! Радуйся, яко из тебе Произшедый, воскресение и живот вечный всем дарова! Радуйся, яко Ангелу о тебе благовествующу, плач и рыдание Адамово преста! Радуйся, яко каменю от тебе отпадшу, каменносердечнии языцы навыкнут веровати в жизнь вечную! Радуйся, живоносный гробе, из негоже Христос воскресе!
Кондак 10
Земля убояся и умолче, Тебе, Творца своего, зрящи во гробе мале положена: ад, вострепетав от неприступныя славы воскресения Твоего, издаяше мертвыя, от века содержимыя, небеса же восход ко Отцу готовяху, Егоже николиже отлучался еси: темже и мы, искупленнии Крестом Твоим, вси Тебе зовем: Аллилуиа!
Икос 10
Мариа Магдалина, яко теплейшая к Тебе, Христу Богу, верою, зело рано пришедши на гроб Твой, сподобися узрети Тя, Жизнодавца, и желаше облобызати пречистыя нозе Твои: но Ты убо, яко Владыка всяческих, не прикасайся Мне, рекл еси: не убо взыдох ко Отцу Моему, иди же к братии Моей и рцы им о востании Моем: темже, яко благовестие носящая, небо и землю оглашаше, вопиюще: Радуйся, живоносный гробе, в немже Христос Пречистою Плотию, усну и почи яко лев, никимже возбудимый! Радуйся, из негоже яко Бог, самовластие воста, ничимже удержимый! Радуйся, яко о бывшем в тебе ад неволею истинствует глаголя: уне мне бяше, аще бы от Марии Рождшагося не приял! Радуйся, яко тобою посрамлен, князь тьмы рыдает! Радуйся, яко тобою обрадован, лик Ангельский торжествует! Радуйся, новыя благодати хранилище и непрестающих чудес источниче! Радуйся, живоносный гробе, из негоже Христос воскресе!
Кондак 11
Представ, по воскресении, учеником Твоим, Христе Боже, мир Твой подал еси им и власть отпущати грехи, да проповедуют востание Твое от гроба, крестяще во имя Отца и Сына и Святаго Духа: они же изшедше, яко облеченные силою свыше, научиша вся языки воспевати Тебе, яко Богу: Аллилуиа!
Икос 11
По востании Твоем из мертвых, являя Себе учеником Твоим, Христе, Симоне Ионин, любиши ли Мя: рекл еси Петру, и по трикратном любве его к Тебе извещении, Церкви Твоей паки того учителя и апостола даровал еси: мы же, проповедию его наученнии, покланяющеся живоносному гробу Твоему, тако глаголем: Радуйся, всесвятый гробе, в немже, яко в ковчезе Ноеве, от разлияния греховнаго и тли смертныя весь род человеческий спасеся! Радуйся, из негоже, яко из святаго святых, мир и благословение всем падшым сынам Адама изнесеся! Радуйся, любве Христовы к нам, во днех плоти Его, последний краю и пределе! Радуйся, и нас всех братию нашу по плоти до смерти и гроба любити научивый! Радуйся, мрак и страхи сени смертныя для верующих разгнавый! Радуйся, странником земли путь жизни вечный в небесный Иерусалим указавый! Радуйся, живоносный гробе, из негоже Христос воскресе!
Кондак 12
Божественное, еже о нас, смотрение Твое славяще, страсти Твоя почитаем, предивному воскресению Твоему покланяемся, и от земли к Небесному Родителю преславное вознесение воспеваем и молимся: Пресвятаго Твоего Духа не отъими от нас, да вси зовем Тебе во веки: Аллилуиа!
Икос 12
На гору Елеонскую егда возшел еси, Отчее сияние, тогда пресветлый облак подъят Тя, зрящим учеником Твоим, и Ангели апостолом глаголаху: мужие Галилейстии, что стоите зряще на небо; се бо, Егоже видите возносящася, Той паки приидет с плотию: они же с радостию возвратившеся во Иерусалим, хваляху Тебе, истиннаго Бога, и живоносному гробу Твоему, в немже тридневно положен был еси, с веселием возглашаху: Радуйся, живоносный гробе, собывшимся в тебе всех нас в вере во Христа утвердивый! Радуйся, пред мучители и враги истины, надеждою воскресения непобедимы нас сотворивый! Радуйся, в немже священнотайне, в купели крещения, вси верующие Христу спогребаются! Радуйся, из негоже крещеннии, умерши греху, к новей жизни со Христом совостают! Радуйся, яко пред тобою от благодати воскресения, в тебе почиющей, вся крепость ада исчезает! Радуйся, яко из тебе, от полноты силы Божией, на тебе явльшейся, заря жизни вечныя незаходимо сияет! Радуйся, живоносный гробе, из негоже Христос воскресе!
Кондак 13
О пресвятый и живоносный гробе Христов, утешение рода человеческаго и всея земли украшение, тебе, яко чертогу Царя Славы, мысленне с верою предстояще, молимся к тридневно воскресшему из тебе Христу Богу нашему, во еже избавитися нам от враг видимых и невидимых, от бед временных и вечных, паче же от страстей и грехов наших, да, совоскресше Ему покаянием, в обновлении правыя жизни ходити начнем, благодарне зовуще: Аллилуиа!
(Этот икос читается трижды, затем икос 1 и кондак 1)
Молитва ко Господу Воскресшему
Слава Тебе Господи, Иисусе Христе, Боже мой, яко паки сподобил мя еси недостойнаго, прешедши поприще святаго поста, поклонитися Божественным страстем Твоим и видети всерадостный день преславнаго из гроба Воскресения Твоего, в онь же свободил еси сущыя во аде от век связанныя души праведных. Тоя Божественныя свободы духа и плоти, дражайший Спасителю мой, и аз желаю, да разрешиши мя, связана суща многими грехи, и да сотвориши возсияти живоносному свету Воскресения Твоего в мрачней души моей: вижду бо безчисленныя щедроты и неизреченное человеколюбие Твое, яко не точию от небытия в бытие мя привел еси, и образа Твоего подобием украсив, всея дольней твари владыку поставил мя еси, но и посем падша с высоты и врагу поработившася, не оставил еси, но искупив мя безценною Кровию Твоею, благодатию крещения снабдил мя еси, да востеку на первое достояние. Аз же окаянный, запят быв умом плотским, обратихся вспять и паки раб сотворихся греха и страстей, донележе един по единому погубих все дары благодати Твоея. И ныне убо, что сотворю, не вем: обаче помянув глаголы пречистых уст Твоих, яко не пришел еси призвати праведники, но грешники в покаяние, и аз, яко един от сих, с верою и смирением прихожду к живоносному гробу Твоему, не ароматы и воню мира носяй, (наг бо есмь и пуст благих дел), но паче надежду имый обрести в нем прощение грехам моим и обновление нечистому житию моему. Призри убо на мя кающася и служити Тебе хотяща, и не отрини от благодати Воскресения Твоего! Живоносною смертию Твоею и погребением умертви моя лютыя страсти, да, яко мертв и погребен, живу в мире сем. Преславным востанием Твоим воздвигни мою душу, умерщвленную грехми, и оживи совесть, еяже ничтоже в мире нужнейши есть. Вознесением Твоим отторгни мя от суетных и душетленных благ земных, и сотвори мя горняя мудрствовати, яко да не ктому себе живя и угождая, но Тебе, Господу и Богу моему, служа и работая, якоже сподобихся поклонитися Воскресению Твоему на земли, тако сподоблен буду видети Тебе, дражайшаго Искупителя моего, и на небеси, за приятие смерти крестныя славою и честию венчанна, и став одесную величествия Твоего, со Архангелы и Ангелы, и со всеми искупленными Тобою братиями моими, во веки веков пою Тебе: Аллилуиа! Аминь.
Кондак 1
Избранный от дней — сей нареченный и святый день, праздников Праздник и Торжество есть торжеств, воньже Христос воскресе тридневен от гроба, ад пленивый и человеки воскресивый, Его же прославляюще да зовем вси: Христос воскресе, смерть поправый, лю-дие веселитеся.
Икос 1
Ангели, Христе Спасе, днесь поют на небесех Твое из мертвых Воскресение, и нас на земли сподоби чистым сердцем Тебе с радостию славити и пети: Христос воскресе, — Ангели ликовствуйте на небеси. Христос воскресе, — людие торжествуйте на земли. Христос воскресе, — воскликните Господеви вся земля. Христос воскресе, — воспойте Богу нашему новую песнь. Христос воскресе, — праведницы днесь да возвеселятся. Христос воскресе, — врата адовы днесь да расточатся. Христос воскресе, — смерть поправый, людие веселитеся.
Кондак 2
Видевше воскресшаго Сына Своего и Бога, Богоблагодатная Чистая, Едина добрая в женах и Непорочная, и еже радуйся слышавши от Него первая, всех радость восприя, Богомати Всенепорочная, и радующеся, в сердце своем возгласи: Аллилуиа.
Икос 2
Разумно небеса да веселятся, земля же да радуется, да празднует же мир весь, видимый же и невидимый, востание Христово, поюще Ему: Христос воскресе, — веселие вечное. Христос воскресе, — скорби уже да не будет ктому. Христос воскресе, — да празднует убо вся тварь. Христос воскресе, — вся поднебесная да радуется с нами. Христос воскресе, — днесь спасение миру. Христос воскресе, — днесь Солнце красное из гроба всем возсия. Христос воскресе, смерть поправый, людие веселитеся.
Кондак 3
Силою Божественною Адама праотца спасый, смертное жилище Своею смертию днесь разори, и вся Божественными блистаньми Воскресения озари, возбудил еси мертвыя от века, Христе Спасе наш, начаток усопшим быв, да слышит от всех: Аллилуиа.
Икос 3
Имея безмерное благоутробие, снисшедый с небеси и воплотивыйся паче ума, Христос Бог наш сниде в преисподняя земли, и воздвиже с Собою Адама, и вси адовыми узами содержимии зряще, к свету идяху, Христе, веселыми ногами, Пасху хваляще вечную сице: Христос воскресе, — где твоя, аде, победа? Христос воскресе, — где твое, смерте, жало? Христос воскресе, — мертвый ни един во гробе. Христос воскресе, — жизнь да жительствует ныне. Христос воскресе, — пленися ад, дерзайте мертвии. Христос воскресе, — гробы отверзошася, возстаните от ада. Христос воскресе, — смерть поправый, людие веселитеся.
Кондак 4
Буря скорби уже ныне преста, женский же лик со ароматы притече зело заутра ко гробу Жизнодавца, взыскующе прежде солнца Солнце зашедшее иногда во гроб, пречистаго же тела Твоего, Христе, не обретоша глаголаху: кто взят мертва, нага и погребенна? Светоноснаго же Ангела зряще на гробе седяша, со страхом возопиша Богу: Аллилуиа.
Икос 4
Слышаху от Ангела мироносицы девы: Что ищите Живаго с мертвыми? Что плачите Нетленнаго во тли? Радующеся же, поклонишася Живому Богу, Пасху тайную уразумевше, и друга ко друзей вопияху весело: Христос воскресе, — Пасха велия нам днесь возсия. Хрмстос воскресе, — рыдания время нам ныне преста. Христос воскресе, — днесь Евино осуждение разрешися. Христос воскресе, — днесь плач наш, на радость преложися. Христос воскресе, — вместо мира песнь принесем Владыце. Христос воскресе, — вместо слез — очистим чувствия и Его узрим. Христос воскресе, смерть поправый, людие веселитеся. Боголепно воскресшу Христу из мертвых, Магдалина Мария притече ко гробу Жизнодавца, видев же, яко камень отвален бе от гроба, с плачем глагола селящим Ангелом: Где убо скрыся Вечный Живот? Или Господа моего дадите, или со мною Емуже вси с верою возопийте: Аллилуиа.
Икос 5
Видевше Христа Магдалина у гроба, яко вертоградаря, Того вопроси глаголя: Повеждь ми, где положил еси Его, да аз возьму Его? Познавше же Воскресение Твое, Христе, всему миру тако благовести: Христос воскресе, — жены престаните от слез. Христос воскресе, — девы внидите в радость Господа своего. Христос воскресе, — Апостоли радостию Божественною взыграйте. Христос воскресе, — людие вси насладитеся сего добраго торжества. Христос воскресе, — первии и последнии день почтите. Христос воскресе, богатии и убозии друг с другом ликуйте. Христос воскресе, смерть поправый, людие веселитеся.
Кондак 6
Проповедницы девы девственнику благовести, яко Жизнодавец Господь днесь от гроба возсия. Тойже, скоро возстав, притече ко гробу скорее Петра и приник внутрь, виде ризы едины лежащия. И вниде во гроб и виде и верова. И еще не видев Христа телесныма очима, увиде Его сердечною любовию и с верою возопи Ему: Аллилуиа.
Икос 6
Возсия Христос из гроба, явися прежде женам, яко теплую любовь явиша Ему у Креста. Видев же Петра, в скорби ко гробу пришедша, явися Ему, яко милосерд, прежде других ученик. Той же радости неизреченныя исполнився, всему миру тако благовести: Христос воскресе, — днесь падшим подадеся воскресение. Христос воскресе, — днесь всему миру возвестися спасение. Христос воскресе, — днесь овцы заблуждшия ко Пастырю возвратитеся. Христос воскресе, — днесь людие Божии от печали свободитеся. Христос воскресе, — радуйтеся вси радостию неизреченною. Христос воскресе, — целуйте друг друга лобзанием святым. Христос воскресе, смерть поправый, людие веселитеся.
Кондак 7
Хотяй Жизнодавец Господь исполнити весь мир радости Воскресения своего, посла жены возвестити Апостолом, яко возста умертвивый смерть, тии же Ангелы светлостию душ удививше, веселыми ногами ко Апостолом течаху, глаголюще: Воистину Христос воскресе и живет во веки, с радостию воспойте Ему: Аллилуиа.
Икос 7
Дивную радость Воскресения Твоего, Христе, Апостоли от святых жен с радостию восприявше, яко волею за всех заклан был еси, живое и жертвенное заколение, яко единолетный агнец, Пасха чистительная, и тако всему миру благовестиша: Христос воскресе, — Новая Пасха. Христос воскресе, — Жертва живая. Христос воскресе, — Агнец Божий вземляй грехи мира. Христос воскресе, — язвою Своею всех исцеливый. Христос воскресе, — днесь всяка тварь веселится и радуется. Христос воскресе, — днесь Церковь Божия торжествует и празднует. Христос воскресе, смерть поправый, людие веселитеся.
Кондак 8
Страшное таинство и преславное Воскресения Твоего, Христе, яко возстав от мертвых, не разрушил еси печатей гроба, яко же врата Девы не разверзл еси в Рождестве твоем. Ныне же в Воскресении Своем отверзл еси нам райския врата, да с разбойником внидем с Тобою в Чертог, поюще Тебе, яко Богу: Аллилуиа.
Икос 8
Всем верным, Христе, Пасха Священная нам днесь возсия, и всем отверзл еси нам райския врата, да вси пойдем к свету Воскресения Твоего, яко Богосветлая светила, от запада, севера и юга, и востока чада Твоя, Пасху благословяще вечную тако: Христос воскресе, — прощение от гроба нам всем возсия. Христос воскресе, — избавление от скорби всем верным наста. Христос воскресе, — вси насладитеся сего пира веры. Христос воскресе, — вси восприимите богатство благодати. Христос воскресе, — никтоже да плачет прегрешений. Христос воскресе, — никтоже да убоится смерти. Христос воскресе, смерть поправый, людие веселитеся.
Кондак 9
Вся ныне исполнишася света, небо же и земля и преисподняя: небо, яко восходит ко Отцу Жизнодавец Господь, земля-же, яко возсия из гроба Солнце красное днесь, преисподняя-же, яко сниде в тамо сущий мрак Единородный Божий Сын, вся исполняяй неописанный. Да поклонится Ему вся земля, да празднует возстание Его вся тварь, поюще Ему: Аллилуиа.
Икос 9
Ветия Божественный Исаия да станет с нами и покажет, како предзре светоносный день Воскресения Твоего, ясно глаголюще о Тебе, Христе: Пожерта будет смерть победою и воскреснут мертвии и возстанут, иже во гробех. Мы же, образов сбытие зряще, веселимся божественне, поюще Тебе: Христос воскресе, — днесь смерти празднуем умерщвление. Христос воскресе, — днесь вечнаго жития возвещаем начало. Христос воскресе, — днесь весна благоухает и новая тварь ликует. Христос воскресе, — днесь отгнася мрачная буря греха и новые людие церковнии торжествуют. Христос воскресе, — древняя мимоидоша, и се быша вся нова. Христос воскресе, — небо днесь отверсто и узрит всяка плоть Лице Его. Христос воскресе, смерть поправый, людие веселитеся.
Кондак 10
Спасти хотяй всяческая, с нами неложно обещался еси быти, Христе, до скончания века сего. Сему Божественному Твоему гласу внемлюще, утверждение же надежды имуще, радуемся Воскресению Твоему, поюще Тебе яко Богу: Аллилуиа.
Икос 10
Царя Христа узрев из гроба яко Жениха происходяща, жены с миры богомудрыя вслед Тебе течаху. Мы же свещи носяще, изыдем во сретение Жениху и спразднуем с любопразднственными чинми Пасху Божию спасительную, ясно глаголюще Ему сице: Христос воскресе, — исходите, яко девы, во сретение Жениху. Христос воскресе, — грядите свещеноснии, со светильники ко Христу. Христос воскресе, — исполните души ваши Божественныя красоты. Христос воскресе, — возжги-те свещи своя от елея чистоты. Христос воскресе, — возвеселимся Божественно яко с нами Жених. Христос воскресе, — возрадуемся пресветло, яко уготовися невесте Чертог. Христос воскресе, смерть по-правый, людие веселитеся.
Кондак 11
Пение всерадостное вместо мира днесь принесем и всепразд-нственное настоящее торжество совершим в сию священную и спасительную и светозарную нощь, в нейже безлетный Свет из гроба плотски всем возсия, юже, яко провозвестницу светоноснаго дне не-вечерняго Царствия Твоего, Христе, ублажаем и поем, вопиюще Тебе: Аллилуиа.
Икос 11
Свет неизмеримый всем во тьме сидящим нам днесь возсия паче солнца светлее из гроба Твоего, Христе, вселенную всю просвети, сего ради ликуют мира концы, веселящеся же поет Христова Церковь, прославляюще Воскресение Твое: Христос воскресе, — воистину священна и светозарна сия спасительная нощь! Христос воскресе, — воистину праздников праздник сей нареченный и святый день! Христос воскресе, — ликуй ныне и веселися Сионе Святый. Христос воскресе, — светися и красуйся ныне Церковь Божия. Христос воскресе, — слава бо Господня на Тебе возсия. Христос воскресе, — радость вечная исполни вся чада Твоя. Христос воскресе, — смерть поправый, людие веселитеся.
Кондак 12
Благодать веселую Твою, Христе, всем верным туне источил еси днесь в нарочитый день Воскресения Твоего, егоже преславно сотворил еси. Приидите возрадуемся и возвеселимся в онь, Божественнаго веселия Царствия Христова приобщимся, поюще Ему, яко Богу: Ал-лилуиа.
Икос 12
Поюще всесветлое Твое, Христе, Воскресение, поклонимся Тебе Воскресшему, и с верою и любовию к Твоим стопим припадем и едиными усты Тебе, яко братия, возопием: Христос воскресе, — радостию друг друга обымем. Христос воскресе, — и ненавидящим нас простим. Христос воскресе, — вся чувствия внутрь себе очистим. Христос воскресе, — лобзаем друг друга лобзанием святым. Христос воскресе — во дворы Твоя с пением внидем. Христос воскресе — в дому Твоем во вся светлыя дни пребудем. Христос воскресе, смерть поправый, людие веселитеся.
Кондак 13
О, Пасха Велия и священнейшая, Христе, о, Мудросте и Слове Божий и Сило! Вместо мира песнь сию нашу приими, и яко Бог Крепкий совозстави нас и обожи, да сподобимся истее Тебе причащатися в невечернем дни Царствия Твоего на небеси и тамо со всеми святыми воспевати Тебе будем: Аллилуиа.
Этот кондак читается трижды, затем икос 1 и кондак 1
Молитва
О, Священнейший и Величайший Свете Христе, Возсиявый всему миру паче солнца в Воскресении Твоем! В сей пресветлый и преславный и спасительный день Святыя Пасхи, ликуют вси ангели на небеси и всяка тварь веселится и радуется на земли и всякое дыхание прославляет Тя, Творца своего. Днесь отверзошася райския врата, и свободишася умершия во ад сошествием Твоим. Ныне вся исполнишася света, небо же земля и преисподняя. Да приидет убо Твой свет и в наши мрачныя души и сердца и да просветит нашу тамо сущую нощь греха, да и мы сияти будем светом правды и чистоты в пресветлыя дни Воскресения Твоего, яко же новая тварь о Тебе. И тако просвещеннии Тобою изыдем свещеноснии во сретении Твое, исходящему Тебе из гроба, яко Жениху. И яко возвеселил еси в пресветлый день сей явлением Своим святых дев зело заутра с миры ко гробу Твоему пришедших, тако и ныне просвети нощь глубокую страстей наших и возсияй нам утро безстрастия и чистоты, да узрим Тя сердечными очесы краснаго паче солнца Жениха своего и да услышим паки вожделенный глас Твой: Радуйтеся!
Кондак 1
Избранный угодниче Божий Данииле, от юности своея Крест на рамо взял еси, и по мнозех трудех и подвизех иноческих, обитель красну во славу Пресвятыя Троицы воздвиг, в ней выну по успении своем пребываеши, и наша моления к Богу возносиши; мы же, чтуще святую память твою, с верою и любовию взываем ти:
Радуйся, угодниче Божий, Данииле чудотворче.
Икос 1
Равноангельно житие твое преподобне, измлада показася, и был еси сосуде честен Божия благодати. Достойно блажити тя сице:
Радуйся, от юности всего себе Господеви предавый.
Радуйся, ревность многу имый, о еже чести и слушати от Божественных Писаний.
Радуйся, плоть свою со страстьми и похотьми распинавый.
Радуйся, ради Бога оставль дом свой и родители, и братию.
Радуйся, во всем волю Божию соблюдый.
Радуйся, в иноческом образе строгий подвиг благочестия показавый.
Радуйся, без воли и благословения старец иноческих ничтоже творивый.
Радуйся, яко на монастырския службы со всяким усердием текл еси.
Радуйся, яко в трудех, бдениих и пощениих непрестанно пребывал еси.
Радуйся, яко елень на источницы, к церковному пению спешивый.
Радуйся, чистоту душевную и телесную усердно хранивый.
Радуйся, яко юн сый, паче сверстник, многими добродетельми процвел еси.
Радуйся, угодниче Божий, Данииле чудотворче.
Кондак 2
Видя суетное мирское житие, и слыша единаго от вельмож читающа житие Симеона Дивногорца, како он смиряше похоть плоти своея, и предаяше тело свое страданию, восхотел еси и сам, преподобне, подражати того житию, и пострадати такожде, якоже и той, да прославиши Бога в телеси своем, воспевая Ему: Аллилуиа.
Икос 2
Разума духовнаго от юности исполнен был еси, преподобне: измлада бо поревновал еси тяжкому и многоскорбному примеру умерщвления греховныя плоти. Сего ради вопием ти:
Радуйся, зело рано вшедый в путь узкий и прискорбный.
Радуйся, иго Христово усердно понесый.
Радуйся, поста и молитвы николиже отлучивыйся.
Радуйся, неувядаемый цвете целомудрия.
Радуйся, прилежныямолитвы Богу с благоговением и страхом приносивый.
Радуйся, яко день и нощь закону Господню поучавыйся.
Радуйся, яко выну в трудех и бдениих пребываяй.
Радуйся, яко любовь нелицемерну ко всем являл еси.
Радуйся, яко о братии своея всем и во всем угождал еси.
Радуйся, всех смирению, чистоте и воздержанию научаяй.
Радуйся, сердце свое горе выну возносивый.
Радуйся, благодать священства не вотще приемый.
Радуйся, угодниче Божий, Данииле чудотворче.
Кондак 3
Сила Вышняго осени тя, еже взяти ярем в юности твоей, но родители не домышляхуся, что есть болезнь чаду; ты же, во спасение души своея умерщвляя плоть, да угоден будеши Богови, воспевал ему духом непрестанно: Аллилуиа.
Икос 3
Имея всяко тщание ко всякому делу благу готовым быти, обхождаше преподобный иноческия обители, и внимаше благим обычаем и мудрости святых подвижников: егда же прииде последи во обитель Пресвятыя Богородицы, яже на Горицех, зде волею Божиею водворися, не себе ради точию, но ради спасения многих. Чтуще подвиги преподобнаго Даниила, прославим его вопиюще:
Радуйся, молитвами и мудрыми словесы наказателю мужем и женам.
Радуйся, от многих прегрешений во отчаянии погруженныя, яко искусный врач, исцеливый.
Радуйся, многих от грех престати научивый, и к покаянию обративый.
Радуйся, безчинно ходящыя в разум истины приводивый.
Радуйся, о всяцем страннице, и наипаче о поверженных на распутиих усердно промышлявый.
Радуйся, в дебрех измерших от мраза, и от разбойников убиенных, якоже Товит, взыскавый.
Радуйся, мертвыя поверженныя на снедение зверем, на раменах своих в скудельницу приносивый.
Радуйся, напрасною смертию почивших с великим плачем лобызавый.
Радуйся, пение над ними церковное Богу возносивый.
Радуйся, по вся дни Божественную Литургию о блаженней памяти их совершавый.
Радуйся, яко о создании церкве Божия на скудельницах ради поминовения тамо погребенных, усердно потрудился еси.
Радуйся, страннолюбче, питателю нищих, друже умерших от напрасныя смерти.
Радуйся, угодниче Божий, Данииле чудотворче.
Кондак 4
Бурю сумнительных помышлений разгоняя упованием на Промысл Божий, и в нощных бдениих пребывая, исхождаше преподобный из келлии своея, на место скудельниче смотряше; видев же над ним некая дивная знамения, умиляшеся о прославлении от Бога места того, и со слезами Ему взываше: Аллилуиа.
Икос 4
Слышав от Священных Писаний, яко велия есть польза душам умерших, егда приносится за них святая и страшная жертва, непрестанно моляшеся Богу и по вся дни промышляше, Данииле, имже образом устроити храм Божий на скудельницех. Темже вопием ему:
Радуйся, любовь, яже к Богу, с любовию к ближнему сочетавый.
Радуйся, равную любовь к ближним, к живым и почившым простиравый.
Радуйся, наипаче о почивших напрасною смертию прилежавый.
Радуйся, о тех, ихже имена никомуже ведомы, выну мольбы приносивый.
Радуйся, яко тверду веру имел еси в молитвы Церкви о упокоении их.
Радуйся, молитвами избавлявый их от вечныя смерти.
Радуйся, совершавый безкровныя жертвы, да вселит Господь почившыя в месте светле и покойне.
Радуйся, утешение скорбящих и плачущих о них.
Радуйся, молитвенниче о богате и убозе, нищи и страннице.
Радуйся, о всех умерших усердный рачителю.
Радуйся, угодниче Божий, Данииле чудотворче.
Кондак 5
Яко боготечную звезду прият преподобный совет триех странных мужей, не начинати строения церковнаго ранее триех лет, да не хотение человеческо, но Божие действует изволение, и предав всего себе Богови, вопияше Ему: Аллилуиа.
Икос 5
Видевше бояре, сущии во опале царстей, како гнев царев молитвами преподобнаго преложен бысть на милость, и яко в прежнюю честь и сан приведени быша, дивляхуся о силе молитв его, и взываху:
Радуйся, во плоти ангеле Божий, благую весть подаваяй в печале сущым.
Радуйся, молитвами своими утоляяй гнев царев.
Радуйся, сильный ходатаю и верный молитвенниче.
Радуйся, Христово благоухание, тайно веселящее скорбная сердца.
Радуйся, благотворяй всем, и ничтоже за то требуяй.
Радуйся, туне приемый дары Духа Святаго, и туне их раздаваяй.
Радуйся, богатая стяжавый нищетою духа.
Радуйся, ни во что себе вменяяй, но всегда во всем славу Богу воздаваяй.
Радуйся, благовременне и безвременне научавый веровати в Бога, и соблюдати заповеди Его.
Радуйся, душы ближних к единому на потребу обращаяй.
Радуйся, и в скорби, и в радости сущих к покаянию приводяй.
Радуйся, от сея жизни к вечному животу всех устремляяй.
Радуйся, угодниче Божий, Данииле чудотворче.
Кондак 6
Проповедницы силы молитв святаго угодника, бояре обещахуся исполнити желание сердца его, и о поставлении церкве на скудельнице умолити самодержца и первосвятителя, да поется на сем месте надгробная песнь: Аллилуиа.
Икос 6
Возсия новый свет желанию преподобнаго, егда обещахуся бояре промыслити еже о церковнем здании: последи же и сам востече к царствующему граду, и испроси грамату цареву, во еже строити нову церковь. Сего ради вопием:
Радуйся, яко о церкви Божией усердно печашеся.
Радуйся, яко и за немощию плоти не оставляше дела богоугоднаго.
Радуйся, яко с радостию ради того совершаше трудное шествие к царствующему граду.
Радуйся, яко и пред лицем царя о блазе и спасении усопших промышляше.
Радуйся, яко и пред первосвятителем Церкви Российския едино попечение имеяше, еже о церковнем здании.
Радуйся, яко и благословение первосвятителя, и повеление царево приял еси со смиренномудрием.
Радуйся, яко ничтоже имея к созданию церкве, подвиглся еси к оному во уповании точию на Бога.
Радуйся, яко отец о чадех промышлявый о умерших.
Радуйся, ревностный молитвенниче о тех, иже имена забвени быша.
Радуйся, явивыйся просветителем места того, идеже они положени быша.
Радуйся, радование умерших.
Радуйся, утешение и отрадо живущих на земли.
Радуйся, угодниче Божий, Данииле чудотворче.
Кондак 7
Хотящу преподобному изыскати место, на немже строити церковь, узре его жена, плачущи по родителех и сродницех своих, иже бяху положени на скудельницех, и сребреницы давши ему, моляше, да сотворит память о них; разумев же преподобный, яко от Господа бысть начинание сие, вопияше Ему: Аллилуиа.
Икос 7
Новое чудо слыша преподобный от рыболова, како той многажды виде со езера над скудельницами овогда свет в нощи светящийся, овогда же свещы многи горящы, удивися Божию промышлению. Мы же, чудо слышаще, вопием:
Радуйся, Промыслом Божиим управляемый.
Радуйся, сподобивыйся чудных видений, яже о церкви Божией.
Радуйся, егоже желание исполняет Бог.
Радуйся, в устроении церкве обрадованный Божиим соизволением. Радуйся, во всем повинуяйся воли Божией.
Радуйся, всякое благо на пользу приемляй, Благодаря Бога.
Радуйся, с любовию творяй поминовение усопших по прошению живущих.
Радуйся, не ищай мзды, моляся о них, ревнуя точию о спасении их.
Радуйся, не имый больши радости, еже творити и слышати в церкви поминовение усопших.
Радуйся, споспешествуяй спасению живых и вечному упокоению умерших.
Радуйся, иже друг бяше и зде пребывающым, и отшедшым отсюду.
Радуйся, живыя и умершыя в сердце своем вмещаяй.
Радуйся, угодниче Божий, Данииле чудотворче.
Кондак 8
Странное видение воин некий поведа преподобному: яко егда спешити ему на торжище до утренняго света, слыша на скудельницах яко шум пения некоего; преподобный же познав, яко Пресвятая Троица благословляет желание сердца его, со слезами вопияше песнь: Аллилуиа.
Икос 8
Во вся оружия Божия облекийся, яко возмощи стати противу кознем диавольским, со всяким смиренномудрием приступи к созданию церкве Божия на скудельницах. Мы же, церковь славну видяще, возопиим:
Радуйся, крестным знамением и именем Христовым бесов прогонявый.
Радуйся, вражия коварства разрушавый.
Радуйся, церковь во имя Всех Святых устроивый, да имена погребенных на скудельницах поминаются.
Радуйся, церковь во имя Похвалы Пречистыя Богородицы воздвигнувый, яко Ея ходатайством помощь Божия к тебе прииде.
Радуйся, в память триех видений и триех первых жертв, храм во славу Пресвятыя Троицы создавый.
Радуйся, не по своему хотению, но по воли Божией обитель иноческу устроивый.
Радуйся, яко добрый пастырь, пекийся о устроенней обители.
Радуйся, строгий блюстителю чина богослужебнаго, и иноческих уставов.
Радуйся, иже подвизавыйся в непрестаннех трудех, блага ради обители.
Радуйся, иже оскорбления и гонения с радостию претерпевый, и о ненавидящих молитву творивый, да укротит Бог сердца их.
Радуйся, иже братию в монастырстей скудости утешавый, и ко упованию на Промысл Божий возбуждавый.
Радуйся, во время смущения душевнаго советов матере своея послушавый, подавая чадом образ послушания своим родителем.
Радуйся, угодниче Божий, Данииле чудотворче.
Кондак 9
Всякое попечение прилагая о устроенней обители, утешен бысть преподобный видениями двух старцев тоя обители, иже видеша в нощех множество свещей светящихся, и множество священнаго чина людей, поющих и кадящих. Он же сия слышав, прослави Бога, вопия: Аллилуиа.
Икос 9
Витии многовещаннии не возмогут воспети всех дел твоих, преподобне: ибо, старец сый, о обители вельми печашеся, и мирским людем подаяше вся, яже на пользу душевную; но елико есть произволение, даждь нам воспевати тебе:
Радуйся, о обители своей и о упокоении братии неусыпный попечителю.
Радуйся, яко болий сый, бяше всем слуга и раб смиренномудрый.
Радуйся, яко немощи других нося, на немощных не возлагал еси бремене неудобоносимаго.
Радуйся, старцев благолепие, и иереев благочиние.
Радуйся, иноков, старостию одержимых, умиление.
Радуйся, избыточествуяй в богатство простоты сердца своего.
Радуйся, егоже беседы в сладость послушаша бояре и князи.
Радуйся, восприемниче от святыя купели сына царева.
Радуйся, добрый кормителю всех алчущих во время глада.
Радуйся, молитву церковную учивый творити со страхом.
Радуйся, ведый тайная деяния людей и обличавый их на исправление.
Радуйся, проповедниче безсмертия и наследия живота вечнаго.
Радуйся, угодниче Божий, Данииле чудотворче.
Кондак 10
Спасение себе содевая, спасаше преподобный Даниил и братию свою, и всех приходящых к нему, словом, житием непорочным, любовию, верою, чистотою, да вси прославят Бога, и вопиют Ему: Аллилуиа.
Икос 10
Стена был еси, преподобне, всем скорбным и напаствуемым, призывающым тебе в помощь: ибо Небесе и земли Бог показа тя храм Духа Святаго, да научимся возглашати тебе:
Радуйся, верный наставниче иночествующих, и помощниче им во всякой нужде душевней яже ко спасению.
Радуйся, молитвами своими отгоняяй козни вражия, смущающыя иноков в житии благочестнем.
Радуйся, молитвами своими и благословением простыя снеди в сладостныя претворявый.
Радуйся, яко друг царев, повинных от смерти свобождавый.
Радуйся, путьшествующих от напрасныя смерти избавляяй.
Радуйся, устрашение разбойников, иже молитвами твоими, яко воинством отгоними беша.
Радуйся, врачу неисцельных болезней.
Радуйся, исцеление подаваяй в скорби и тузе душевней.
Радуйся, радость родителем подаваяй исцелением чад их от болезней.
Радуйся, радость чадом подаваяй исцелением болящих родителей их.
Радуйся, скорое заступление обидимых.
Радуйся, утешение боящихся часа смертнаго.
Радуйся, угодниче Божий, Данииле чудотворче.
Кондак 11
Пение хвалебное приносим ти, преподобне, но скудными песньми хвалим тя: яко аще отрочество твое, аще юность, аще старость, вся исполнена суть дел благих и любве, яже к Богу и ближнему, вся вещают едину песнь Богови: Аллилуиа.
Икос 11
Светоприемную свещу зрим тебе, преподобне, сияющу лучами Божия благодати, аще и крепость твоя оскуде, и исчезаше тебе свет временныя жизни сея: твоим бо промышлением открыты беша святыя мощи благовернаго князя Андреа. Сего ради радуяся вопием:
Радуйся, усердный чтителю Бога, дивнаго во святых Своих.
Радуйся, распространение Царствия Божия благодати.
Радуйся, прославление святых.
Радуйся, яко гром устрашаяй искушающих Духа Святаго.
Радуйся, обличителю сумнительных помышлений.
Радуйся, из неверия в веру несумненну приводяй.
Радуйся, и в старости добрей прежде всех на церковное пение приходивый.
Радуйся, до конца жизни своея наставляяй соблюдати божественныя заповеди и предания святых отец.
Радуйся, до последняго часа смертнаго попечение о немощных, нищих и странных имевый.
Радуйся, даров благодати Божией обилие.
Радуйся, яко и по скончании своем, обещался еси никогдаже отлучен быти от обители своея.
Радуйся, проповедниче Божия благодати, яже имать во веки быти во обители.
Радуйся, угодниче Божий, Данииле чудотворче.
Кондак 12
Благодать Божию зряще в честных и многоцелебных мощех преподобнаго, прославим вернии Бога, дивнаго во святых, и возопиим Ему: Аллилуиа.
Икос 12
Поюще честное житие преподобнаго, прославим и та чудная дела, яже соверши по скончании своем, и яже от честных мощей его его даровася:
Радуйся, и по преставлении своем многим людем на пользу являяйся.
Радуйся, молитвами своими споборствуяй царю Иоанну на покорение града Казани державе Российстей.
Радуйся, подаваяй исцеление от болезней чтущым святыя мощи твоя.
Радуйся, исцеляяй пиющих с верою воду от кладезя, егоже ископал еси рукама своима.
Радуйся, здравие болящым отроком подаваяй.
Радуйся, от болезней лютыя огневицы и трясавицы избавляяй.
Радуйся, спасавый бесноватых от гибели, и смысл им подаваяй.
Радуйся, являяйся забывшым данныя Богу обеты, и к исполнению их побуждаяй.
Радуйся, помощь и силу подаваяй служителем и пастырем Церкви.
Радуйся, угодниче Божий, Данииле чудотворче.
Кондак 13
О пречудный и преславный угодниче Божий, преподобне Данииле, приими ныне сие малое моление наше, и якоже обещался, призирай милостивно с высоты небесныя славы на обитель твою и молящихся в ней, да вси в нынешнем веце поживем во славу Пресвятыя Троицы, и в будущем купно с тобою, откровенным лицем Славу Господню узревше, воспеваем во веки Богу: Аллилуиа.
Этот кондак читается трижды, затем икос 1-й и кондак 1-й
Молитва преподобному Даниилу Переяславскому
О, преподобне и богоносне отче наш Данииле, всесмиренно к тебе припадаем и тебе молимся: не отступи от нас духом твоим, но всегда поминай нас во святых и благоприятных молитвах твоих ко Господу нашему Иисусу Христу; молися Ему, да не потопит нас бездна греховная, и да не будем врагом, ненавидящым нас, в радование; да простит Христос Бог наш твоим предстательством за нас вся согрешения наша, и Своею благодатию водворит посреде нас единодушие и любовь, и да избавит нас от козней и наветов диавольских, от глада, губительства, огня, всякия скорби и нужды, от болезней душевных и телесных и от внезапныя смерти; да сподобит Он нас, притекающих к раце мощей твоих, в истинней вере и покаянии пожити, христианския, непостыдныя и мирныя кончины жития нашего достигнути, и наследовати Царство Небесное, и славити пресвятое имя Его со Безначальным Отцем и Пресвятым Духом во веки веков. Аминь.