Тропари, кондаки и величания - 21 апреля 2025

Христос воскресе из мертвых, смертию смерть поправ, и сущим во гробех живот даровав.

Аще и во гроб снизшел еси, Безсмертне, но адову разрушил еси силу, и воскресл еси, яко Победитель, Христе Боже, женам мироносицам вещавый: радуйтеся, и Твоим Апостолом мир даруяй, падшим подаяй воскресение.

Яко сый нравом православных/ Восточныя Церкве преданий истинный защитник,/ сподобился еси великаго во отцех Феодосия/ видети по смерти яко жива,/ возвещающа тебе Царствия Небеснаго наследие,/ егоже неизреченных доброт/ ныне с ним неразлучно наслаждаяся,/ моли и о нас, чадех своих, Нифонте прехвальне.

От мирскаго мятежа из младых ногтей/ исшед в тихое пристанище,/ честный обители Печерския достигл еси/ и, тамо ярем Христов восприим на ся,/ равно Ангелом житие поживе,/ отнюду же пришед, святителю Христов Нифонте, в великий Новград,/ и архиерейский престол восприял еси/ и многи люди учением своим ко Христу привел еси,/ Егоже моли, святителю преподобне, спастися душам нашим.

Ревности древних отец/ в твердом истинных догмат хранении подобней,/ крепкоумне Нифонте,/ не восхотел еси восхитившему самовольне престол Митрополии Климу сослужитель быти,/ избранному же на се от всех, покорен,/ священнолепне с ним служил еси/ и, жизнь свою скончав,/ обрел еси безконечное Царство Христово.

Возложив себе от юности Богу, преподобне,/ мир тленных нивочтоже вменив/ и паче всех Христа возлюбив,/ Тому от всея души любовию последовал еси/ и, яко светозарное солнце,/ от Киева просил во вся концы Русский земли добродетелию,/ и бысть пастырь великому Новуграду,/ и, добре упас стадо Христово словесных овец на пажитех духовных,/ к Богу отшел еси,/ и ныне со Ангелы Владычню Престолу предстоя,/ нас поминай, раб своих, да зовем ти:/ радуйся, отче Нифонте,/ святителем изрядная похвало.