Молитвы - 05 мая 2025
О преславный Апостоле Христов Варфоломее, душу за Христа предавший и кровию твоею пажить Его удобривший! Услыши чад твоих молитвы и воздыхания, сердцем сокрушенным ныне приносимыя. Се бо беззаконьми омрачихомся, и того ради бедами, якоже тучами, обложихомся, елея же добраго жития обнищахом зело, и не возможем противитися волком хищным, иже расхищати наследие Божие дерзостно тщатся. О, сильный! Понеси немощи наша, не отлучайся духом от нас, да не разлучимся в конец от любве Божия, но крепким заступлением твоим нас защити, да помилует Господь всех нас молитв твоих ради, да истребит же рукописание безмерных грехов наших, и да сподобит со всеми сСвятыми блаженнаго Царствия и брака Агнца Своего, Емуже честь и слава, и благодарение и поклонение во веки веков. Аминь.
О всечестный учениче верховнаго апостола Петра, новый Петре веры Христовой, вторый Моисею, священномучениче Клименте, просвещенный учением великого апостола, венчанный венцем мученичества!
Испроси нам молитвами твоими благодать Святаго Духа, да научимся Святую Троицу богословити, сохраняти веру Христову и церковныя спасительныя обычаи, да расточится безбожие.
Умоли, угодниче Божий, Милосерднаго Творца, да излиется на нас благодать Святаго Духа, просвещающая наша души, да попалит Господь Бог страстей наших огнепальныя стремления, да сохранит нас от всякия злобы, да спасет от напастей, бед и скорбей, и да пребудем верными христианами до конца жизни нашея, сохраняя в сердцах наших памятование печалей, болезней и трудов твоих, во славу Бога Отца и Сына и Святаго Духа.
О, великий угодниче Божий и преславный чудотворче, святый благоверный княже Всеволоде Гаврииле, града Пскова и всея державы Российския небесный заступниче и покровителю, и всех нас усердный пред Богом предстателю и защитителю! Предстоя Престолу Великаго Царя и Бога нашего, в Троице Святей славимаго и покланяемаго, велие дерзновение имаши к нему, яко верный раб Его и угодник. К тебе убо, яко сроднему нам и многомощному пред Господем ходатаю, прибегаем мы грешнии и недостойнии и умиленно просим тя: моли Триединаго Бога, да отвратит от нас гнев свой, праведно по делом нашим на ны движимый, и презрев безчисленныя прегрешения наша, обратит нас на путь покаяния и спасения. Огради молитвами твоими в мире живот наш, и во всем благом благое поспешение и вся, яже к животу и благочестию потребная, нам даровати испроси. И якоже древле град твой Псков от пленения и разорения ратнаго дивно избавил еси, тако и ныне нас и вся грады и веси страны нашея от всяких напастей и бед, и напрасныя смерти, предстательством твоим избави, и от всех враг видимых и невидимых покровом твоим защити. Моли присно милостиваго Бога: страждущую страну Российскую от лютых безбожник и власти их да свободит, и да возставит престол православных правителей, верных рабов Его, в скорби и печали день и нощь вопиющих к нему, многоболезный вопль да услышит и да изведет от погибели живот наш, да тихое и безмолвное житие поживем во всяком благочестии и чистоте, и тако в мире временное сие житие прешедше, в вечный достигнем покой, и сподобимся Небеснаго Царствия, славяще Отца и Сына и Святаго Духа и твое святое заступление, во веки веков. Аминь.