Акафисты - 13 мая 2025

Кондак 1

Избранному Апостолу Христову, иерарху преславному и мученику предивному, Иакову премудрому, брату Божию блаженному похвальная восписуем, яко ходатаю и скорому помощнику нашему. Ты же, предстояй Престолу Пресвятыя Троицы, не престай молитися за ны, сохраняющи от всяких бед и зол верою празднующих память твою и зовущих:
Радуйся, Апостоле Иакове, Церкви Иерусалимския первый иерарше.

Икос 1

Ангелов Творец и всея твари Содетель, яви тя, Иакове, яко звезду многосветлую, на тверди церковней возсиявшую, светом Богопознания мир просвещающую и тьму лжеверия прогоняющую. Мы же, к заступлению твоему прибегающе, радостно тебе приносим сицевая:
Радуйся, яко брат Господень по плоти сый, ученик и самовидец неизреченных таин Его показался еси;
Радуйся, Богом избранный, да людем верным тайну спасения премудро изъясниши.
Радуйся, велегласно словеса Божия иудеем провозгласивый;
Радуйся, сими народ Божий, от Христа отвергшийся, к покаянию призывавый.
Радуйся, Церкве Иерусалимския истинный управителю;
Радуйся, и всех христиан Богомудрый наказателю.
Радуйся, иерарше Иерусалима дольняго, ныне во Иерусалиме горнем пребываяй;
Радуйся, Жертву Безкровную принося, себе же в жертву чисту Творцу и Царю уготовавый.
Радуйся, Апостоле Иакове, Церкви Иерусалимския первый иерарше.

Кондак 2

Видящи, издалеча прозря твое жительство, Иакове, брата тя прия Христос Человеколюбец: ты бо, старший сын праведнаго Иосифа Обручника быв, издетска, яко назорей, Богу посвящен, воздержание возлюбил еси. Нравов же твоих благостию и ума чистотою Христов показался еси ученик искренний, сего ради сподобился еси у Престола Владычня вечно воспевати: Аллилуиа.

Икос 2

Разум всякий отвергше, Ирод царь искаше Младенца Иисуса, да погубит Его; и се Ангел Господень во сне явися Иосифу глаголя: «Возстав, поими Отроча и Матерь Его и бежи во Египет». Ты же, Иакове, яко сродник по плоти Иисусов сый, со Иосифом и Материю Его во Египте пребывал еси. Сего ради, приими от нас, Иакове, усердныя похвалы сия:
Радуйся, яко из колена Иудова процвел еси;
Радуйся, яко Иосифа праведнаго отрасль пречестная был еси.
Радуйся, яко чрез Христа лицем к лицу Бога узрел еси;
Радуйся, яко от Негоже благодать многу приял еси.
Радуйся, яко Христовым светолитием просвещен еси;
Радуйся, яко сугубыя почести от Христа сподобился еси.
Радуйся, яко Христа Пастыреначальника по плоти брат был еси;
Радуйся, яко Христом наследник обетований Отца Небеснаго явился еси.
Радуйся, Апостоле Иакове, Церкви Иерусалимския первый иерарше.

Кондак 3

Сила Вышняго постави тя, Иакове праведне, пастыреначальника и таинника, неизреченная священнодействующа Таинства в Сионе святем, егда лик Апостольский избра тя епископа перваго Церкви Иерусалимския. Ты же, Апостоле, иго Христово усердно взем, Евангелия благости Его и Царствия проповедник был еси, поя Вседержителю Богу песнь: Аллилуиа.

Икос 3

Имеяй мудрость Божественную во уме своем всегда, Иакове, служение апостольское приял еси, егоже тридесять лет совершая, ко Христу вся страждущия и обременненныя приводил еси, неустанно веру спасительную во граде Святем и земле Палестинстей проповедуя и к познанию истины вся приводя. Темже тя, яко избранника Спаса нашего, славословим тако:
Радуйся, Святый Град Иерусалим проповедию Слова Божия огласивый;
Радуйся, велию власть от Бога приемый.
Радуйся, благовестниче Агнца Божия, вземлющаго грехи мира;
Радуйся, многих от народа иудейскаго во имя Отца и Сына и Святаго Духа крестивый.
Радуйся, пастырю добрый и учителю святый, яко тобою Бог Церковь Свою украси;
Радуйся, кладезю, из негоже воды живыя напаяемся.
Радуйся, яко стопам Спаса Христа неуклонно последовал еси;
Радуйся, яко Духа Божественнаго сиянием верных сердца просветил еси.
Радуйся, Апостоле Иакове, Церкви Иерусалимския первый иерарше.

Кондак 4

Бурю нечестия разгоняя, множество иудеев и еллинов к Церкви Христовой обратил еси, отче праведный: словом бо и житием твоим любовь велию людей иерусалимских стяжал еси, и теми ко Христу вся приводил еси, научая пети Богу: Аллилуиа.

Икос 4

Слыша мудрыя слова твоя, «яко от дел оправдается человек, а не от веры токмо», гордии фарисее и книжницы распыхахуся сердцем, мнящи тя разорителя отеческих преданий быти. Мы же, учителя благочестия тя ведуще, вопием:
Радуйся, яко праведным житием твоим злословныя враги посрамил еси;
Радуйся, яко широтою Божественнаго разума пути вражия утеснил еси.
Радуйся, яко благодатию, из уст твоих изливающеюся, веровати в Троицу Единосущную верныя научал еси;
Радуйся, столпе благочестия непоколебимый и стено Церкве необоримая.
Радуйся, яко возсиял еси сущим во тьме неразумия, ко благочестию всех призываяй;
Радуйся, яко собранное стадо твое от волков лютых избавил еси.
Радуйся, яко брат Божий, Сына Бога Вышняго добльственне на земли исповедал еси;
Радуйся, Апостоле святе, мудростию обложенный и благодатию озаренный.
Радуйся, Апостоле Иакове, Церкви Иерусалимския первый иерарше.

Кондак 5

Боготечною звездою прошел еси житие твое, Апостоле Иакове, благоговейно служение в Церкви Иерусалимстей совершая и образ праведнаго святителя Божия собою являя. Мы же, Богу, премудрость велию тебе даровавшаму и благодатными дары преизобильно тя украсившему, немолчно воспеваем: Аллилуиа.

Икос 5

Видеша тя вернии людие Израилевы помощника и утешителя в скорбех и печалех: ты бо усердно молился еси о отпущении грехов народа Божия, якоже и колена твоя зело огрубеша непрестаннаго ради коленопреклонения твоего. Сего ради восхваляем тя по достоянию, яко молитвенника нашего пред Богом, взывая сице:
Радуйся, житием твоим добродетельным, яко солнце светозарное, вся просвещаяй;
Радуйся, презирати плоть свою и прилежати о души безсмертней научаяй.
Радуйся, Божественнаго Духа благодать приемля, плевелы лжеверия попаливый;
Радуйся, плоть свою духови совершенно поработивый.
Радуйся, вертограда Христова делателю усердный;
Радуйся, молитвенниче к Богу неустанный.
Радуйся, яко союзом любве стадо твое связал еси;
Радуйся, яко свет миру и соль земли явился еси.
Радуйся, Апостоле Иакове, Церкви Иерусалимския первый иерарше.

Кондак 6

Проповедник истинныя веры Христовы и ревнитель благочестия был еси, святителю Иакове: сего ради, Духом Святым просвещаемый, чин Божественныя Литургии мудре устроил еси, благодарению Богу за вся научаяй. И ныне с небеси на ны милостиво призираеши и преизобильно всем нам благодать подаеши от щедраго Христа Бога, Емуже со Ангелы у Престола славы Его поеши: Аллилуиа.

Икос 6

Возсиял еси яко звезда утренняя Церкви Христовой ревностию о славе Божией, и, Жизнеподательным Духом законополагая и вещая неизреченныя тайны Божия, паству свою таинствы церковными и служением Божественныя Литургии освящал еси и правилам веры научал еси. Мы же тебе, Святыя Троицы служителю верному, воспеваем таковая:
Радуйся, чина церковнаго благоукрасителю;
Радуйся, ученьми твоими мир просветивый.
Радуйся, яко Духом Святым чрез тебе свет Богопознания в мир излияся;
Радуйся, яко тобою Евангелие Царствия Божия проповедася.
Радуйся, яко дару совершенну от Отца светов человеком подаятися учиши яве;
Радуйся, яко Божественным проповеданием твоим свет благодатный седящим во тьме греховней возсиял еси.
Радуйся, яко умом чистым и святыми усты твоими спасение всем верным предложил еси;
Радуйся, яко Бог Слово богатно блистании Божественныя благодати тя просвети.
Радуйся, Апостоле Иакове, Церкви Иерусалимския первый иерарше.

Кондак 7

Хотя положити предел бывшей распре о законе Моисеове посреде благовествующих народом языческим слово Христово, на соборе Апостольстем во граде Иерусалиме главенствуя, ты, Апостоле преславне, словесы твоими богомудрыми о спасении души христианския паки мир в Церквах водворил еси. Мы же ублажаем тя, научившаго нас право разумети учение Христово и пети Тому: Аллилуиа.

Икос 7

Новаго избранника Божия видим тя, святе Иакове: ты бо мудре вразумлял еси на соборе Апостольстем о скончании времени Завета Ветхаго и о Промысле Божием о обращении и спасении народов языческих. Сего ради тебе, яко великому во иерарсех Христовых, взываем:
Радуйся, Мудрость Ипостасную — Христа всем проповедавый;
Радуйся, яко о спасении верою и делами благочестия не токмо иудеев, обаче и язычников научавый.
Радуйся, о Христе, яко о совершении пророчеств и преданий отеческих, свидетельствовавый;
Радуйся, яко седящия во тьме греховней к свету благоверия приводил еси.
Радуйся, яко просветил еси мудростию твоею вся;
Радуйся, кладезю истиннаго Боговедения.
Радуйся, реко богоглаголивая;
Радуйся, премудрости чаше, добродетельми исполненная.
Радуйся, Апостоле Иакове, Церкви Иерусалимския первый иерарше.

Кондак 8

Странно и предивно всем иерусалимляном бысть житие твое, священномучениче Иакове, ты бо миротворец и истолкователь Закона Божия явился еси, просвещая и вразумляя люди. Темже и нас научи пети от всего сердца Творцу и Зиждителю нашему: Аллилуиа.

Икос 8

Весь освящен благодатию Духа Святаго, Церковь Иерусалимскую добре упасл еси, святе Иакове, день и нощь укрепляя новопросвещенныя в благодати Христовой. Мы же восхваляем тя, горнюю премудрость стяжавшаго, пении сими:
Радуйся, яко Божественный разум стяжал еси;
Радуйся, яко словесы богомудрыми люди, от неведения избавляя, ко Христу руководил еси.
Радуйся, яко труды твоими к водам спасения овцы словесныя приводил еси;
Радуйся, яко жребий пастырскаго о душах попечения праведно ти дадеся.
Радуйся, коегождо к безропотному несению креста его наставляяй;
Радуйся, яко солнце миру учении твоими возсиявый.
Радуйся, искусный ловителю душ человеческих;
Радуйся, Божественныя благодати светило.
Радуйся, Апостоле Иакове, Церкви Иерусалимския первый иерарше.

Кондак 9

Всем сердцем возлюбивый Христа Бога, яко брат Его по плоти, и о спасении творения Его ревновавый, наставлял еси народ Божий в вере христианстей: яко быти во испытаниих терпеливу, на Бога уповающе и во смирении тяготы носяще. Мы же, тобою наученнии, милосердному Человеколюбцу Богу непрестанно взываем: Аллилуиа.

Икос 9

Вития многовещанныя не возмогут воспети твоея, богоблаженне Иакове, мудрости, егда вразумлял еси, яко не в единем книжнем научении и внешнем исповедании есть вера спасительная, а в вере, поспешествуемой любовию и делами во имя Христово. Мы же, тебе, яко Богомудрому наставнику, благодарно воспеваем:
Радуйся, яко тело без духа мертво есть, тако и вера без дел мертва есть, возвещаяй;
Радуйся, яко во искушения различная впадая, радость имети научаяй.
Радуйся, яко блажен муж, иже претерпит искушения, зане приимет венец жизни, рекий;
Радуйся, яко «искушение вашея веры соделовает терпение», — мудро нам глаголеши.
Радуйся, яко ведущему убо добро творити и не творящему — грех есть, нас умудряеши;
Радуйся, яко любы мира сего — вражда Богу есть, нас вразумляеши.
Радуйся, яко молитися друг за друга, много бо может молитва праведнаго поспешествуема, нас призываеши;
Радуйся, яко обративый грешника от заблуждения пути его, спасает душу от смерти, нам взываеши.
Радуйся, Апостоле Иакове, Церкви Иерусалимския первый иерарше.

Кондак 10

Спасти хотяй всякаго человека, грядущаго в мир, Всевидец Господь дарова ти, Иакове славне, благодать велию укрепляти обращенныя в вере: ты бо на страдания предстоящия коегождо приуготовляя, призывал еси всех к терпению и упованию на Бога, всех и вся содержащему в деснице Своей. И нас, недостойных, сподоби молитвами твоими разумно пети Богу: Аллилуиа.

Икос 10

Стена необоримая Церкви Иерусалимстей был еси, священномучениче преславне, и тако научал еси люди твоя спасительней вере Христовей: «Вера бо чиста и нескверна пред Богом есть, еже посещати сирых и вдовиц в скорбех их и нескверна блюсти себе от мира». Мы же, тебе, о нас молящемуся, неустанно взываем:
Радуйся, яко «суд без милости — не сотворшему милости», — рекий;
Радуйся, яко «гнев мужа правды Божия не соделовает», — вразумляяй.
Радуйся, яко «плод правды в мире сеется творящим мир», — научаяй;
Радуйся, яко «Господь гордым противится, смиренным же дает благодать», — глаголяй.
Радуйся, яко «смиритеся пред Господем, и вознесет вы», — взываяй;
Радуйся, путеводителю наш к Небеси.
Радуйся, слова Божия истолкователю неложный;
Радуйся, на подвиг деятельныя любве подвигаяй.
Радуйся, Апостоле Иакове, Церкви Иерусалимския первый иерарше.

Кондак 11

Пение всеумиленное приносил еси Пресвятей Троице во вся дни земнаго жития твоего; отпавшия же от благодати вожди иудейстии, видевше, яко множество мужей и жен к Церкви Христовой прилагается твоими, всеславне Апостоле, трудами, злоумыслиша конец положити сему: нестерпим бо бысть им праведник истинный, Господу верно служащий. Нас же, святителю Иакове, благослови, укрепи и настави в вере спасительней возрастати, поюще Богу: Аллилуиа.

Икос 11

Светло Пасху Христову празднуя, во дни тыя неустанно проповедал еси, Иакове, глаголы жизни вечныя во граде Иерусалимстем собравшимся коленом иудейским и язычником множеству; начальницы же иудейстии совет положиша убити тя, пастыря Града Святаго. Мы же, тебе, яко мужественному воину Христову, усердно вопием:
Радуйся, истину Христову пред вожди небоязненно вещавый;
Радуйся, блистанием твоим тьму неведения просветивый.
Радуйся, правил церковных нелицеприятный блюстителю;
Радуйся, яко тобою Церковь Христова дивно красуется.
Радуйся, яко Богомудрыми ученьми умы верных к небеси возводиши;
Радуйся, яко крепостию проповеди твоея прелесть лжеучителей разрушил еси.
Радуйся, святый иерарше и проповедниче, многия в послушание веры уловивый;
Радуйся, лучу, от Солнца Правды исходяй, всю землю просвещаяй.
Радуйся, Апостоле Иакове, Церкви Иерусалимския первый иерарше.

Кондак 12

Благодатию Божиею и силою, от Бога тебе дарованною, облеклся еси, страстотерпче Иакове, Христа ради готовый мучения всякия претерпети, егда лестию поставлен был еси на криле храма святаго нечестивыми, вопрошающими тя: «Рцы нам о Распятом». Мы же Богу, в мученичестем подвизе тебе укрепившему, гласом велиим воспеваем: Аллилуиа.

Икос 12

Поюще Пресвятей Троице хвалу и благодарение и исполнився Духа Святаго, ты, Богоносе Иакове, изрекл еси пред народом о Христе, яко Той «сидит на Небесех, одесную Силы Всевышняго и грядет на облацех небесных». Слышавше же сия, нечестивии скрежетаху зубы своими и устремишася на тя; быв же долу низвержен с криле храма, Апостоле святе, востав на колени, Творцу молился еси о прощении убивающих тя и, камением до смерти побиваем, душу свою в руце Божии предал еси. Мы же, предстоящему тебе пред Престолом Святыя Троицы, радостно зовем:
Радуйся, яко на криле святилища представ, Бога Слова проповедал еси;
Радуйся, яко от иудей низвержен быв, небесных чертогов сподобился еси.
Радуйся, Горняго Иерусалима Апостольское основание;
Радуйся, яко жертву чисту себе Царю и Творцу принесл еси.
Радуйся, яко кровию твоею в Церковь Небесную вшел еси;
Радуйся, яко тя заступника крепкаго пред Богом имамы.
Радуйся, яко нетленныя пищи наслаждаяся, Престолу Святыя Троицы предстоиши;
Радуйся, священномучениче непобедимый, иерарше прехвальный и светильниче всемирный.
Радуйся, Апостоле Иакове, Церкви Иерусалимския первый иерарше.

Кондак 13

О преславный Апостоле Иакове, брате Господень, Церкви Христовой светильниче многосветлый! Приими от благоговейных сердец наших с любовию тебе приносимое хвалебное пение сие и испроси нам у Христа Бога нашего в вере утверждение, прегрешений оставление и от вечнаго осуждения избавление, да сподобимся в Царствии Небеснем купно с тобою во веки пети Богу: Аллилуиа.

Этот кондак читается трижды, затем икос 1-й и кондак 1-й

Молитва апостолу Иакову, брату Господню

О великий богоизбранный и богопрославленный Апостоле Иакове, брате Господень! Ты еси великий архиерей Града Святаго, теплый наш заступник и ходатай, предстоящий Престолу Пресвятыя Троицы. Не отрини нас от твоего заступления, но воздвигни нас, низверженных грехи многими. Имеяй власть решити и вязати, разреши зол наших соузы, любве Божией причти нас и Царствия Небеснаго причастники, блаженне, соделай молитвами твоими. Моли Христа Спаса, да сподобит непреткновенно совершати странствие наше земное, да вечныя и блаженныя жизни на небеси сподобившеся, с тобою вкупе возможем выну восхваляти Троицу Нераздельную и воспевати Едино Божество Отца и Сына и Духа Всесвятаго во веки веков. Аминь.

Конда́къ 1

Возбра́нный воево́до и па́стырю свяще́ннѣйшій Вели́каго Новагра́да, Це́ркве утвержде́ніе, Христо́въ іера́рше Ники́то, пріими́ отъ на́съ усе́рдно приноси́мая тебѣ́ благохвале́нія и твои́ми моли́твами отъ бѣ́дъ и напа́стей избавля́й всегда́ лю́бовію тебѣ́ зову́щихъ:

Ра́дуйся, те́плый засту́пниче на́шъ Ники́то, святи́телю преди́вный.

Икосъ 1

Ангелъ во пло́ти на земли́ яви́лся еси́ вои́стинну чу́дный Ники́то, съ пло́тію бо я́ко безпло́тенъ пожи́лъ еси́, тѣ́мже, со безпло́тными ны́нѣ водворя́яся, пріими́ отъ на́съ земноро́дныхъ пѣ́снь сію́:

Ра́дуйся, Ники́то, а́нгеловъ равностоя́телю.

Ра́дуйся, іера́рше, преподо́бныхъ сожи́телю.

Ра́дуйся, вла́сть пасти́ слове́сныя о́вцы отъ Бо́га прія́вый.

Ра́дуйся, свѣ́томъ твои́хъ уче́ній па́ству твою́ осія́вый.

Ра́дуйся, преди́вный цѣлому́дрія храни́телю.

Ра́дуйся, по́стническаго житія́ и́стинный люби́телю.

Ра́дуйся, свѣтоза́рная мо́лніе, Но́вградъ Вели́кій ве́село озаря́ющая.

Ра́дуйся, луче́ свѣтосія́нная, де́монскую тму́ разгоня́ющая.

Ра́дуйся, ра́дости вѣ́рнымъ пода́телю.

Ра́дуйся, въ печа́лехъ и болѣ́знехъ на́шихъ ско́рый предста́телю.

Ра́дуйся, те́плый засту́пниче на́шъ Ники́то, святи́телю преди́вный.

Конда́къ 2

Ви́дяще стра́нный и чу́дный житія́ твоего́ о́бразъ, Христо́въ святи́телю Ники́то, велми́ удивля́емся, размышля́юще же твоя́ многотру́дныя по́двиги, пое́мъ Бо́гу на сія́ тебе́ укрѣпи́вшему: Аллилу́ія.

Икосъ 2

Ра́зумъ Боже́ственный пода́ждь на́мъ свы́ше, іера́рше, да возмо́жемъ по достоя́нію восхвали́ти добродѣ́тельное твое́ житіе́, тебѣ́ же любо́вію вопи́ти:

Ра́дуйся, мно́гими добродѣ́тельми просія́вый.

Ра́дуйся, пло́ти твоея́ жела́нія обузда́вый.

Ра́дуйся, ра́зумъ тво́й въ послуша́ніе вѣ́ры плѣни́вый.

Ра́дуйся, се́рдце твое́ чи́сто сохрани́вый.

Ра́дуйся, ра́зумомъ Христо́вымъ обогати́выйся.

Ра́дуйся, я́ко а́нгелъ въ житіи́ твое́мъ яви́выйся.

Ра́дуйся, разруши́телю страсте́й душетлѣ́нныхъ.

Ра́дуйся, сокро́вище слове́съ богодухнове́нныхъ.

Ра́дуйся, гро́зное бѣсо́вское устраше́ніе.

Ра́дуйся, пречу́дное въ человѣ́цѣхъ удивле́ніе.

Ра́дуйся, те́плый засту́пниче на́шъ Ники́то, святи́телю преди́вный.

Конда́къ 3

Си́ла Вы́шняго отъ ю́ности осѣни́ тя, богому́дре, и показа́ селе́ніе и до́мъ Ду́ха Всесвята́го, Ему́же и о на́съ помоли́ся, о́тче че́стне, тя́ ублажа́ющихъ, Бо́гу же зову́щихъ: Аллилу́ія.

Икосъ 3

Иму́ще вели́ка тя́, о Ники́то, засту́пника и ско́раго въ напа́стехъ помо́щника, моле́бно тебе́ призыва́емъ и съ весе́ліемъ къ па́мяти твое́й воспѣва́емъ:

Ра́дуйся, ско́рый послу́шателю къ тебѣ́ прибѣга́ющихъ.

Ра́дуйся, скорбя́щимъ душа́мъ утѣше́ніе.

Ра́дуйся, отча́янныхъ исправле́ніе.

Ра́дуйся, Судію́ Пра́веднаго за грѣ́шныя лю́ди умоля́яй.

Ра́дуйся, чту́щія тя́ отъ печа́ли и бѣ́дъ избавля́яй.

Ра́дуйся, уныва́ющихъ всежела́нный посѣти́телю.

Ра́дуйся, неду́жныхъ ми́лостивѣйшій цѣли́телю.

Ра́дуйся, уго́дниче Христо́въ преизря́дный.

Ра́дуйся, цвѣ́те ра́йскій прекра́сный.

Ра́дуйся, те́плый засту́пниче на́шъ Ники́то, святи́телю преди́вный.

Конда́къ 4

Бу́рю страсте́й многомяте́жнаго мíра возненави́дѣвъ, о́тче, всѣ́хъ красо́тъ его́ устрани́лся еси́, во оби́тель же всели́вся и а́нгельскій чи́нъ воспріи́мъ, со а́нгелы пѣ́лъ еси́ Христо́ви: Аллилу́ія.

Икосъ 4

Слы́шавъ христоподража́тельную жи́знь богоно́сныхъ и вели́кихъ оте́цъ, тѣ́мъ въ житіи́ уподо́битися возревнова́лъ еси́, сего́ ра́ди въ затво́ръ всели́вся, сугу́бымъ по́двигомъ себе́ предае́ши, тѣ́мже досто́йно слы́шиши:

Ра́дуйся, подви́жниче Бо́жій пре́усерднѣйшій.

Ра́дуйся, мона́шествующихъ превели́кая сла́во.

Ра́дуйся, святы́хъ пустынножи́телей добродѣ́тельными обогати́выйся нра́вы.

Ра́дуйся, равноа́нгельно Бо́гу послужи́вый.

Ра́дуйся, а́нгеломъ ра́вную и че́сть получи́вый.

Ра́дуйся, до́блій и́ноческихъ по́двиговъ ревни́телю.

Ра́дуйся, усе́рдный Христо́выхъ за́повѣдей исполни́телю.

Ра́дуйся, вра́жіихъ навѣ́товъ бо́дрый прогони́телю.

Ра́дуйся, соверше́нства христіа́нскаго изя́щнѣйшій учи́телю.

Ра́дуйся, те́плый засту́пниче на́шъ Ники́то, святи́телю преди́вный.

Конда́къ 5

Боготе́чнаго твоего́ житія́ не терпя́, человѣконенави́стникъ искуше́ніе льсти́вно тебѣ́ подлага́етъ, во о́бразѣ а́нгела тебѣ́ яви́вся и преста́ти моли́тися научи́въ: ты́ же а́ще и прельще́нъ бы́лъ еси́ хи́тростію его́, оба́че не до конца́ поги́блъ еси́ во искуше́ніи; моли́твами бо бра́тіи спасе́нъ, Христу́ вопія́лъ еси́: Аллилу́ія.

Икосъ 5

Ви́дяще и́ноцы стра́нную ве́щь на тебѣ́ явля́емую, я́ко отъ ве́тхихъ то́кмо Боже́ственныхъ Писа́ній къ тебѣ́ приходя́щихъ поуча́еши, отъ Но́ваго же Завѣ́та ничесо́же глаго́ля, уразумѣ́ша прельще́на бы́ти тя́, преподо́бне, сего́ ра́ди о́бщую о тебѣ́ моли́тву сотво́рше, діа́вола отгоня́ютъ и изъ затво́ра изво́дятъ тя́. Мы́ же тебѣ́, я́ко самому́ искуше́ну бы́вшу и на́мъ искуша́емымъ помога́ти могу́щу, не престае́мъ зва́ти:

Ра́дуйся, отъ врага́ человѣкоубíйцы лю́тѣ пострада́вый.

Ра́дуйся, всю́ глубину́ бѣсо́вкія ле́сти на себѣ́ испыта́вый.

Ра́дуйся, моли́твами подви́жниковъ отъ ро́ва поги́бели восхище́нный.

Ра́дуйся, отъ рабо́ты діа́воли Го́сподемъ освобожде́нный.

Ра́дуйся, на неви́димыя враги́ и на́мъ крѣ́пкій помо́щниче.

Ра́дуйся, во искуше́ніихъ жите́йскихъ всегда́шній на́мъ посо́бниче.

Ра́дуйся, прило́гъ вся́каго зла́ отъ чту́щихъ тя́ отража́яй.

Ра́дуйся, всѣму́ благо́му вхо́дъ отверза́яй.

Ра́дуйся, бѣсо́вскія си́лы крѣ́пкое низложе́ніе.

Ра́дуйся, грѣхми́ пове́рженныхъ тве́рдое возведе́ніе.

Ра́дуйся, те́плый засту́пниче на́шъ Ники́то, святи́телю преди́вный.

Конда́къ 6

Проповѣ́дницы твоего́ спасе́нія бы́вше и́ноцы Пече́рстіи, отъ діа́вола тя́ исхи́тивше, на и́стинный пу́ть наставля́ютъ: ты́ же, о́тче Ники́то, позна́въ го́рькое твое́ прельще́ніе, покая́ніе со слеза́ми Бо́гу прине́слъ еси́, моля́ся и зовы́й: Аллилу́ія.

Икосъ 6

Возсія́лъ еси́, я́ко свѣтоза́рное со́лнце на тве́рди церко́внѣй, діа́вола искуше́нія избѣ́гъ и по́стническими по́двиги укрѣпи́вся: тѣ́мже и на́съ навѣ́товъ лука́ваго свободи́, да зове́мъ ти́:

Ра́дуйся, кре́стъ тво́й терпѣли́вно на ра́мѣ носи́вый.

Ра́дуйся, мы́сленнаго тѣ́мъ Амали́ка низложи́вый.

Ра́дуйся, дарова́нія Боже́ственнаго Ду́ха прія́вый.

Ра́дуйся, въ житіи́ стра́ждущимъ ми́лостивно помога́яй.

Ра́дуйся, те́плѣ къ тебѣ́ притека́ющихъ треволне́нія страсте́й измѣня́яй.

Ра́дуйся, оби́димыхъ ско́рый засту́пниче.

Ра́дуйся, обурева́емыхъ благопопечи́тельный защи́тниче.

Ра́дуйся, бы́стрый спаси́телю въ напа́стехъ су́щимъ.

Ра́дуйся, скоропредста́тельный помо́щниче зову́щимъ.

Ра́дуйся, те́плый засту́пниче на́шъ Ники́то, святи́телю преди́вный.

Конда́къ 7

Хотя́ Христо́съ Госпо́дь, Вели́кій Архіере́й, святи́телскою украси́ти тя́ вла́стію, на свяще́нный престо́лъ Вели́каго Новагра́да возво́дитъ тя́, на не́мъ же возсѣ́дъ, свѣти́ло многосвѣ́тлое гра́ду твоему́ яви́лся еси́, всѣ́хъ просвѣща́я и зва́ти Бо́гу науча́я: Аллилу́ія.

Икосъ 7

Но́вградъ Вели́кій пріи́мъ тя́ отъ Го́спода па́стыря и учи́теля, ра́довашеся, преподо́бне, зря́ твои́хъ добродѣ́телей исправле́ніе, и въ пѣ́снехъ свяще́нныхъ доны́нѣ взыва́емъ тебѣ́:

Ра́дуйся, учи́телю свяще́ннѣйшій, отъ Бо́га на́мъ дарова́нный.

Ра́дуйся, архіере́ю Бо́жій святы́й предизбра́нный.

Ра́дуйся, усе́рдный благовѣ́рія побо́рниче, и у́ме высоча́йшій.

Ра́дуйся, Христо́выхъ велѣ́ній проповѣ́дниче сладча́йшій.

Ра́дуйся, Вели́каго Новагра́да пречу́дное украше́ніе.

Ра́дуйся, безкро́вныя же́ртвы непоро́чно Бо́гу приноси́вый.

Ра́дуйся, въ вѣ́рѣ Правосла́внѣй па́ству твою́ утверди́вый.

Ра́дуйся, я́ко мно́гія просвѣти́лъ еси́ твои́мъ архипа́стырскимъ сло́вомъ.

Ра́дуйся, святи́телю, и на́съ твои́хъ ча́дъ сподо́би ста́ти предъ Бо́жіимъ престо́ломъ.

Ра́дуйся, те́плый засту́пниче на́шъ Ники́то, святи́телю преди́вный.

Конда́къ 8

Стра́нно Бо́га вочеловѣ́чшася на́шего ра́ди спасе́нія па́ствѣ твое́й проповѣ́далъ еси́, Ники́то, и и́дольскихъ суевѣ́рій мра́къ разгна́лъ еси́, Ѵпоста́снѣй Прему́дрости зовы́й: Аллилу́ія.

Икосъ 8

Ве́сь бы́лъ еси́ всѣ́мъ въ па́ствѣ твое́й ско́рый помо́щникъ, святи́телю, засту́пникъ оби́димымъ, ни́щимъ пита́тель, си́рымъ и вдови́цамъ защи́тникъ, на похвалу́ всѣ́хъ подвиза́я вопи́ти тебѣ́:

Ра́дуйся, во вся́кихъ ну́ждахъ ско́рое поможе́ніе.

Ра́дуйся, въ печа́лехъ бы́строе утѣше́ніе.

Ра́дуйся, отъ оби́дъ и озлобле́ній свобожда́яй.

Ра́дуйся, о́гненнаго запале́нія гра́дъ тво́й избавля́яй.

Ра́дуйся, ми́лости сокро́вище многоцѣ́нное.

Ра́дуйся, бога́тство на́мъ подава́яй нетлѣ́нное.

Ра́дуйся, обурева́емыхъ приста́нище ти́хое.

Ра́дуйся, гони́мыхъ и оби́димыхъ прибѣ́жище вели́кое.

Ра́дуйся, мно́гія лю́ди отъ поги́бели исхи́тивый.

Ра́дуйся, о́вцы твоя́ отъ во́лка лю́таго сохрани́вый.

Ра́дуйся, те́плый засту́пниче на́шъ Ники́то, святи́телю преди́вный.

Конда́къ 9

Вся́кій ро́дъ и во́зрастъ вѣ́рныхъ Вели́каго Новагра́да усе́рдно чти́тъ свѣ́тлый де́нь твоея́ па́мяти, святи́телю Ники́то, въ о́ньже собра́вшеся моле́бно зове́мъ ти́: бу́ди на́мъ въ печа́лехъ утѣ́шитель, въ озлобле́ніихъ помо́щникъ, въ болѣ́знехъ вра́чь ско́рый, да тобо́ю злы́хъ изба́вльшеся ра́достно зове́мъ: Аллилу́ія.

Икосъ 9

Вѣтíйствующій язы́къ не мо́жетъ по достоя́нію изобрази́ти все́ вели́чіе любве́ твоея́ къ твоему́ слове́сному ста́ду, приснопа́мятне, не то́чію бо во вре́меннѣй твое́й жи́зни, но и къ небе́снымъ отше́дъ, оте́чески назира́еши всѣ́хъ вопію́щихъ къ тебѣ́ съ любо́вію такова́я:

Ра́дуйся, наста́вниче превели́кій спасе́нія.

Ра́дуйся, согрѣша́ющихъ исправле́ніе.

Ра́дуйся, земны́я сла́сти презрѣ́вый.

Ра́дуйся, въ го́рнія оби́тели возлетѣ́вый.

Ра́дуйся, Це́рковь Новагра́да святи́тельствомъ украси́вый.

Ра́дуйся, ча́дъ твои́хъ богому́дренными глаго́лы просвѣти́вый.

Ра́дуйся, лю́бящихъ тя́ неизрече́нныя исполня́яй ра́дости.

Ра́дуйся, я́ко твои́ми моли́твами вѣ́чныя сме́рти свобожда́емся.

Ра́дуйся, те́плый засту́пниче на́шъ Ники́то, святи́телю преди́вный.

Конда́къ 10

Спасти́ся хотя́ще вѣ́рніи отъ бѣ́дъ и скорбе́й, ко гро́бу твоему́ свяще́нному моле́бно притека́емъ. Ты́ же, о чудотво́рче святы́й, помози́ на́мъ, немощны́мъ, утоли́ ско́рбь на́шу и на пу́ть пра́вый заблужда́ющихъ наста́ви на́съ, да спасе́нніи тобо́ю, хвале́бными гла́сы зове́мъ: Аллилу́ія.

Икосъ 10

Стѣна́ необори́мая и покро́въ ты́ еси́, о́тче, всѣ́мъ человѣ́комъ съ вѣ́рою къ тебѣ́ прибѣга́ющимъ, тѣ́мже и на́мъ, прося́щимъ твоего́ заступле́нія, бу́ди огражде́ніе крѣ́пкое, да въ тебѣ́ утвержда́ющеся всегда́ вопіе́мъ:

Ра́дуйся, бѣды́ и печа́ли отъ лю́бящихъ тя́ отгоня́яй.

Ра́дуйся, всѣ́мъ тебе́ призыва́ющимъ ско́рую по́мощь подава́яй.

Ра́дуйся, крѣ́посте и огражде́ніе благочести́выхъ.

Ра́дуйся, гро́зный наказа́телю нечести́выхъ.

Ра́дуйся, отъ честны́хъ моще́й исцѣле́ніе неоску́дно источа́яй.

Ра́дуйся, жела́емыхъ на́мъ бла́гъ насади́телю.

Ра́дуйся, находя́щихъ напа́стей отгони́телю.

Ра́дуйся, надѣ́ющихся на тя́ защище́ніе.

Ра́дуйся, ду́шъ на́шихъ сла́дкое утѣше́ніе.

Ра́дуйся, те́плый засту́пниче на́шъ Ники́то, святи́телю преди́вный.

Конда́къ 11

Пѣ́нія всеумиле́нная приноша́ху тебѣ́ лю́діе Новогра́дстіи во обрѣ́теніи твои́хъ многоцѣле́бныхъ моще́й, святи́телю, отъ ни́хъ же и чудеса́ ве́лія съ вѣ́рою приходя́щимъ яви́лъ еси́, Бо́гу, во святы́хъ Свои́хъ Ди́вному науча́я пѣ́ти: Аллилу́ія.

Икосъ 11

Свѣтопріе́мную свѣщу́, на свѣ́щницѣ гра́да на́шего возсія́вшую, зри́мъ тебе́, всесвяще́ннѣйшій о́тче Ники́то, блиста́ніемъ бо чуде́съ всѣ́хъ озаря́еши, любо́вію тебѣ́ зову́щихъ:

Ра́дуйся, звѣздо́ небосвѣ́тлая, отъ ю́га Россíи возсія́вшая.

Ра́дуйся, Но́вградъ Вели́кій сія́ніемъ твои́мъ облиста́вшая.

Ра́дуйся, во свѣ́тѣ невече́рнѣмъ обита́яй.

Ра́дуйся, и на́мъ во мра́цѣ грѣхо́внѣмъ блужда́ющимъ просвѣще́ніе ниспосыла́яй.

Ра́дуйся, свѣще́, Боже́ственнымъ пла́менемъ возжже́нная.

Ра́дуйся, свѣти́льниче Христо́въ де́монскими вѣ́тры не угаше́нный.

Ра́дуйся, его́же восходя́ща на го́рняя а́нгели срѣто́ша.

Ра́дуйся, ему́же ра́йская врата́ съ весе́ліемъ отверзо́ша.

Ра́дуйся, со Христо́мъ ликовству́яй во сла́вѣ.

Ра́дуйся, Трисія́нныя Зари́ наслажда́яйся я́вѣ.

Ра́дуйся, те́плый засту́пниче на́шъ Ники́то, святи́телю преди́вный.

Конда́къ 12

Благода́ть Боже́ственную испроси́ на́мъ у Спа́са Христа́, о́тче преподо́бный, простри́ на́мъ ру́ку по́мощи, покры́й на́съ те́плымъ твои́мъ заступле́ніемъ, и вѣ́чныя ра́дости сподо́би дости́гнути, да съ тобо́ю во вѣ́ки вѣко́въ вопіе́мъ: Аллилу́ія.

Икосъ 12

Пою́ще твоя́ до́блественныя по́двиги, ублажа́емъ достохва́льную кончи́ну, торжеству́емъ же и па́мять твою́ свяще́нную, преподо́бне, и, чудя́щеся житію́ твоему́, похва́льная тебѣ́ вопіе́мъ:

Ра́дуйся, въ го́рнія оби́тели превознесе́нный.

Ра́дуйся, въ небе́сныя черто́ги со сла́вою введе́нный.

Ра́дуйся, сла́вы отце́въ преи́скреннѣ возжела́вый.

Ра́дуйся, премíрное наслѣ́діе бога́тно воспрія́вый.

Ра́дуйся, святи́тельскимъ вѣнце́мъ увѣнча́нный.

Ра́дуйся, за чту́щихъ тя́ моли́твенниче неуста́нный.

Ра́дуйся, посѣти́телю въ не́мощехъ лежа́щихъ.

Ра́дуйся, утѣ́шителю уны́лыхъ и скорбя́щихъ.

Ра́дуйся, съ небе́сныхъ круго́въ на моле́нія на́ша ми́лостивно призира́яй.

Ра́дуйся, чту́щихъ тя́ проше́нія ско́ро исполня́яй.

Ра́дуйся, те́плый засту́пниче на́шъ Ники́то, святи́телю преди́вный.

Конда́къ 13

О, всехва́льный и преди́вный святи́телю Христо́въ Ники́то! Пріими́ усе́рдно ма́лое сіе́, отъ на́съ грѣ́шныхъ приноси́мое, моле́ніе и потщи́ся ско́ро умоли́ти Бо́га и Влады́ку, да изба́витъ на́съ отъ вся́кихъ бѣ́дъ и озлобле́ній и бу́дущія му́ки свободи́тъ зову́щихъ: Аллилу́ія.

[Се́й конда́къ глаго́ли три́жды. И па́ки чте́тся 1-й и́косъ: Ангелъ во пло́ти... и конда́къ 1-й: Возбра́нный воево́до...]

Молитва святителю Никите, епископу Новгородскому, чудотворцу

О архиерею Божий, святителю Никито, услыши нас, грешных раб твоих, стекшихся днесь в священный храм сей, молящихся тебе и к священней твоей раце притекающих, и умиленно вопиющих: якоже седя на престоле святительства в Великом Новеграде сем, и единою належащу бездождию, дождь молитвами свел еси, и паки граду сему огненным пламенем обшедшу, молитвою пламень огненный угасил еси. И ныне молим тя: о святителю Христов Никито, молися ко Господу, еже избавити Великий град Новград сей и вся грады и страны христианския от труса, потопа, глада, огня, града, меча и от всех врагов видимых и невидимых, яко да избранных ради молитв твоих спасаеми, славим Пресвятую Троицу, Отца, и Сына, и Святаго Духа и твое милостивное предстателство, ныне и присно, и во веки веков. Аминь.

Кондак 1

Избранный Небесным Царем и от Него прославленный, святителю отче Игнатие, ныне всечестную твою память празднующе, молим тя усердно: путеводствуй нас на пути спасения, избави от врагов видимых и невидимых, от скорбей и болезней с любовию зовущих ти: Радуйся, святителю Игнатие, покаяния и молитвы делателю и учителю преизрядный.

Икос 1

Архангели и Ангели удивляхуся житию твоему, святителю отче Игнатие, како ты от лет малых к Богу велие рачение имел еси и по заповедей Его житие твое неуклонно проводил еси. Дивящеся таковому благоразумию твоему, со умилением взываем ти: Радуйся, скорбящих безчадных родителей твоих рождением своим утешивый; Радуйся, рода честнаго отрасль прекрасная. Радуйся, Ангела хранителя твоего непрестанное веселие; Радуйся, родителей и наставников твоих своею кротостию и покорностию удививый. Радуйся, от лет младенческих ко иноческому послушанию себе приуготовивый; Радуйся, душу свою младенческую к Богу устремивый. Радуйся, в молитве и богомыслии отроческия своя досуги проводивый; Радуйся, для меньших братии и сестер твоих пример молитвы и послушания бывый. Радуйся, святителю Игнатие, покаяния и молитвы делателю и учителю преизрядный!

Кондак 2

Видяще родители твои великая твоя дарования, направиша тя в царствующий град, да обучен будеши к восприятию воинскаго звания. Ты же, избранниче Божий, юн сый леты, стар же разумом, вся сия яко тленна и скоропреходяща почиташе, к Единей же Красоте и Сладости неизреченной — Господу Иисусу Христу умом и сердцем устремлялся еси, поя Ему: Аллилуиа!

Икос 2

Разум божественный от возлюбленнаго тобою Спаса Христа приял еси, Игнатие досточудне, егда, еще отрок сый, во всех видимых образех мира сего руку Небеснаго Творца и Промыслителя проразумевал еси. Темже прославляя тя, вопием ти сице: Радуйся, в видимых явлениях природы Невидимого Бога созерцавый; Радуйся, тишину и уединение лесное возлюбивый. Радуйся, от лет отроческих к Богу велие рачение имевый; Радуйся, вся красная и сладкая мира сего презревый. Радуйся, мзду небесную от Господа восприявый; Радуйся, молитву Иисусову усты непрестанно творивый и во уме содержавый. Радуйся, совершенную любовь ко Господу показавый; Радуйся, возлюбленнаго тобою Иисуса выну в сердце твоем носивый. Радуйся, святителю Игнатие, покаяния и молитвы делателю и учителю преизрядный!

Кондак 3

Силою Вышняго осенен был еси, отче преблаженне, егда вся, яже в мире сем за блага почитаются, отвергл еси и по заповеди Христа Спасителя, взем крест, невозвратно Ему последовал еси, непрестанно поя в сердце твоем: Аллилуиа!

Икос 3

Имея в души своей пламенное желание мир оставити и Христу последовати, не убоялся еси ни гнева царева, ни прещений отеческих и, еще в мире живый, иноческим житием себе украсил еси. Темже, почитая мужество твое и любовь к Сладчайшему Господу Иисусу, блажим тя сице: Радуйся, во младости твоей адамантову твердость духа проявивый; Радуйся, еженедельнаго приобщения Святых Христовых Тайн, яко величайшаго сокровища, желавый. Радуйся, на небесех ныне Христа приобщаяйся, якоже вожделел еси, еще сый на земли; Радуйся, яко семя Божие, всеянное в добрую землю сердца твоего, обильными слезами орошал еси. Радуйся, яко посреде мирских плевел, сторичный плод добродетелей Господу принесл еси; Радуйся, чистоты душевныя и телесныя усердный хранителю. Радуйся, целомудрия дивное украшение; Радуйся, яко благолепие лика твоего о душевней красоте твоей свидетельствоваше. Радуйся, святителю Игнатие, покаяния и молитвы делателю и учителю преизрядный!

Кондак 4

Буря помышлений сумнительных не поколеба Тя, Игнатие блаженне, егда гнева царева не убоявся, чин воинский оставил еси и, подъяв на ся иго Христово и мир с соблазнами его презрев, в пустыню вселился еси и тамо, желанный покой души своей стяжав, немолчно пел еси Богу: Аллилуиа!

Икос 4

Егда слышано бысть во Отечестве твоем, яко ты, юн сый леты, лепотою и дарованьми украшен, славу мира сего и сладости его возненавидев, в пустыню удалился еси, вси сродницы твои вельми удивляхуся, Ангели же на небеси возрадовашася зело и прославиша Бога, восхитившаго тя от суетнаго пути мирскаго и поставившаго на тесный путь иноческий, ведущий в Царство Небесное. Мы же, похваляюще святую ревность твою о Господе, зовем ти: Радуйся, званию воина царя земнаго звание воина Царя Небеснаго предпочтый; Радуйся, на искушения от мира, плоти и диавола находящая крепко ополчивыйся. Радуйся, оружием Божиим, Крестом Христовым, вся козни вражия победивый; Радуйся, бронею праведности облеченный. Радуйся, шлем спасения стяжавый; Радуйся, меч духовный, еже есть глагол Божий, паче всякаго человеческаго оружия возлюбивый. Радуйся, щитом веры от стрел лукаваго себе оградивый; Радуйся, чина ангельскаго блаженство неизреченное в чертозе небеснем получивый. Радуйся, святителю Игнатие, покаяния и молитвы делателю и учителю преизрядный!

Кондак 5

Боготечней звезде подобен был еси, Игнатие преподобне, егда предстал еси пред игуменом обители дальния и скудныя, прося прияти тя в число братии. Игумен же, испытав тя, ничтоже вопреки глаголаше, благослови тя на начало иноческаго пути твоего. Ты же, улучив чаяний твоих заветных сбытие, благодарне воспевал еси во умилении благодеющему тебе Богу: Аллилуиа!

Икос 5

Вся братия обители удивляшеся, зрящи великое тщание твое во исполнение послушаний, имиже испытоваше твое смирение духовный отец твой. Мы же, почитающе подвиги и труды твоя, во младых летех волею Христа ради подъятыя, умиленно вопием ти: Радуйся, крест свой на рамена подъявый и Христу последовавый; Радуйся, узкий и прискорбный путь жития монашескаго волею избравый. Радуйся, вспять николиже обративыйся; Радуйся, смирением своим духа гордыни низложивый. Радуйся, талант свой в земли не сокрывый; Радуйся, во славу Божию и на спасение душ человеческих его употребивый. Радуйся, богомудрыми писаньми твоими многия души, во гресех погрязшия, ожививый; Радуйся, сладкий глас Небеснаго Домовладыки: “Рабе благий и верный, вниди в радость Господа Твоего” услышавый. Радуйся, святителю Игнатие, покаяния и молитвы делателю и учителю преизрядный!

Кондак 6

Смирением, постом, наипаче же непрестанною молитвою на страсти плотския крепко ополчился еси, святителю, дондеже плоть твою духови поработил еси и сего ради ныне предстоиши с лики Ангел Престолу Пресвятыя Троицы, выну воспевая: Аллилуиа!

Икос 6

Возсия в тебе обильно благодать Божия, егда ты, чин ангельский восприяв, вскоре саном священства почтен был еси. Дух же твой, приятый во объятия Отча, тебе отверстая, блаженство неизреченное вкуси. Егда же избра тя Господь во игумена обители Пельшемския, ты о словесных овцах твоих, тебе Богом врученных, денно и нощно пеклся еси, да ни едина от них погибнет нерадения ради твоего. Таковому Божию о тебе промышлению радующеся, зовем ти: Радуйся, в приятии ангельскаго чина завершение чаяний твоих узревый; Радуйся, небесному покровителю своему, священномученику Игнатию Богоносцу, подражавый. Радуйся, якоже и он, Господа Иисуса Христа в сердце твоем выну носивый; Радуйся, сан священства, яко великий дар Божий, приявый. Радуйся, огню тезоименитый, огнем веры и любве к Богу и ближним пламеневый; Радуйся, с благоговением великим и страхом безкровную жертву приносивый. Радуйся, Пренепорочную Матерь Христа Бога нашего, яко чистейшую святыню и сокровище Славы Божия, благоговейно почитавый; Радуйся, храм благоукрашенный во имя Милостивыя Вратарницы во обители воздвигнувый. Радуйся, святителю Игнатие, покаяния и молитвы делателю и учителю преизрядный!

Кондак 7

Хотя, человеколюбец Господь, да не сокрыт будет светильник добродетелей твоих, но да светит всем, да прославят Отца Небеснаго вси человецы, видящии тя, изведе тя из обители пустыни на многотрудная послушания. Сему Божию промышлению дивящеся, со умилением зовем: Аллилуиа!

Икос 7

Новей обители преподобнаго Сергия близ царствующаго града дарова тя Господь, яко предстоятеля и добраго пастыря, неусыпно о словеснем стаде своем пекущагося и о благолепии обители ревнующаго. Сего ради и славяше тя братия твоя, взывающи: Радуйся, небесному покровителю обители твоея преподобному Сергию, игумену Радонежскому, подражавый; Радуйся, дивными храмы и строеньми сию украсивый. Радуйся, яко отец чадолюбивый, чад своих по пути спасения в Царствие Небесное ведый; Радуйся, жаждавших вступити на путь иноческий с любовию во обитель приимавый. Радуйся, провинившихся иноков увещеваньми своими к слезному раскаянию приводивый; Радуйся, яко пастырь добрый, житием своим и нравом всем братиям пример подвига иноческаго подававый. Радуйся, за спасение их душу свою положити готовый; Радуйся, монашествующих славо и похвало. Радуйся, святителю Игнатие, покаяния и молитвы делателю и учителю преизрядный!

Кондак 8

Странник и пришлец на земли был еси, святителю, якоже прочии человецы. Обаче Господь от лет младенческих избра тя, яко угодника Своего, житием бо и богодухновенными писаньми твоими Господу усердно послужил еси. Мы же, хвалу возсылающе ко Благодеющему тебе Богу, вопием Ему: Аллилуиа!

Икос 8

Весь добродетелей исполненный, воистину был еси во плоти Ангел, святителю Игнатие, всех притекавших к тебе с любовию приимая, скорби их утешая, на путь покаяния наставляя, непрестанней молитве и плачу сердечному научая. Сего ради богатии и беднии, знатнии и убогии людие, духовная чада твоя, взываху ти: Радуйся, новый Златоусте, огненными словесы твоими многия заблудшия путем покаяния к Богу приведый; Радуйся, писаньми твоими души и сердца всех чтущих тя просветивый. Радуйся, за враги своя молитися наставлявый; Радуйся, и сам за враги твоя с теплою любовию моливыйся. Радуйся, во враждующих на нас оружие Божие ко исправлению нашему разумети учивый; Радуйся, Езекиины слезы и Манассиины воздыхания духовным очесем кающихся представлявый. Радуйся, подвиги и труды подвижников древних в богомудрых творениях твоих изобразивый; Радуйся, в житии твоем всецело им подражавый. Радуйся, святителю Игнатие, покаяния и молитвы делателю и учителю преизрядный.

Кондак 9

Все воинство ангельское и святителей лик удивишася, зря тебе, новаго угодника Божия великими труды и подвиги просиявшаго. Мы же, ублажая тя, прославльшему тя Богу вопием: Аллилуиа!

Икос 9

На новое многотрудное послушание в дальний край Отечества нашего отшел еси, святителю Игнатие, егда жезл архиерейский от Предвечнаго Архиерея Господа нашего Иисуса Христа вручи тебе архипастырь царствующаго града в Казанском соборе Царицы Небесныя. Разумеюще в сем волю Божию, да и в чуждей стране проповестся тобою Евангелие Царствия Божия, смиренно зовем ти: Радуйся, в хиротонии обильно благодать божественную восприявый; Радуйся, апостольскаго учения исполненный и вся верныя спасительными струями его напаяяй. Радуйся, верный делателю винограда Христова; Радуйся, цевнице духовная, Духа Святаго исполненная. Радуйся, архиереев богодухновенное украшение; Радуйся, яко устами твоими провещаваше возлюбленный тобою Господь. Радуйся, духовных братий и чад твоих во обители преподобнаго Сергия, аще и телом оставивый, обаче в молитвах своих их николиже забывый; Радуйся, всем верным и неверным, призывающим тя на помощь, милостивый заступниче. Радуйся, святителю Игнатие, покаяния и молитвы делателю и учителю преизрядный!

Кондак 10

Немощию телесною и подвигами жития утружденный, во обитель святаго Николая на реце Волге удалился еси, святителю Игнатие, хотя душу свою ко отшествию от мира сего уготовати, идеже в богомыслии и молитве уединенней дни своя скончавая, пел еси немолчно Богови: Аллилуиа!

Икос 10

Скорый помощник и утешитель был еси, святителю Игнатие, не токмо к тебе приходящим, но и далече сущим, писаньми твоими их утешая, дух их ободряя и вразумляя. Сего ради и возглашают ти вси чтущии богомудрая творения твоя: Радуйся, пастырю наш добрый; Радуйся, приходящих к тебе николиже отвращаяйся. Радуйся, просящих твоея помощи ближних и дальних любовию своею объемляй; Радуйся, чтущих со тщанием писания твоя в теснейшее единение с душею твоею приемляй. Радуйся, чад своих духовных христианскому терпению учивый; Радуйся, в страданиях наших промышление Божие о спасении нашем видети наставляяй. Радуйся, всецело предатися промыслу Божию чада своя научивый; Радуйся, совершения над нами воли Его, яко милости великой, просити у Господа заповедавый. Радуйся, святителю Игнатие, покаяния и молитвы делателю и учителю преизрядный!

Кондак 11

Пение всеумиленное приносил еси Пресвятой Троице во вся дни земнаго жития твоего, Игнатие всехвальне. Ныне же предстоя Престолу Царя Славы, молися о нас, чтущих святую память твою, да молитвою и покаянием очистившеся, с тобою купно во веки веков воспоем Богу: Аллилуиа.

Икос 11

Светильник великий Святыя Православныя Церкве в житии своем был еси, святителю Игнатие, и сего ради дарова тебе Вседержитель Господь кончину чудну и прослави тя на небесех. Просим тя, святителю милостивый, испроси и нам грешным, твоея помощи и предстательства умоляющим, кончину жития нашего мирну и безболезненну, добрый ответ на Страшнем Судищи Христове и Царства Небеснаго наследие, да зовем ти радостно: Радуйся, праведною кончиною праведность жития твоего запечатлевый; Радуйся, близость отшествия твоего предуведевый. Радуйся, со светильником горящим Небеснаго Жениха души своея сретивый; Радуйся, в день кончины твоея с женами мироносицами воскресшаго Спасителя узревый. Радуйся, чтущих тя и по смерти николиже своего предстательства лишаяй; Радуйся, всех усердно тебе молящихся благодатию и попечением своим покрываяй. Радуйся, твердо держатися единыя истинныя святыя православныя веры чада своя учивый; Радуйся, вся прельщения еретическая приимати и увещаниям их лукавым внимати строго запретивый. Радуйся, святителю Игнатие, покаяния и молитвы делателю и учителю преизрядный!

Кондак 12

Благодать дадеся ти от Бога, святителю Христов Игнатие, молитися за ны и путеводствовати нас на пути спасения, да покаянием очищеннии, в чертог Спасов преукрашенный внидем и тамо с тобою и со всеми угодившими Богу радостно воспоем Ему: Аллилуиа!

Икос 12

Поюще Бога, дивнаго во святых Своих, хвалим тя, Игнатие блаженне, яко друга Христова, блаженство райское неуклонным творением заповедей Господних стяжавшаго. Моли о нас грешных, да и мы общники с тобою вечери Господней будем, умиленно зовуще ти: Радуйся, глубочайшим смирением твоим, нищетою духовною Царство Небесное обретый; Радуйся, добродетель сию во основание всех подвигов иноческих полагати заповедавши. Радуйся, во плаче о гресех своих Самим Господом утешенный; Радуйся, за кротость души твоея наследие жизни вечныя получивый. Радуйся, в земном житии правды Xpистовой, а на брашна тленнаго искавый, ныне же на небесех ею обильно насыщаяйся; Радуйся, за милосердие твое к ближним от Бога Щедродавца помилованный. Радуйся, за ангелоподобную чистоту сердца твоего Бога узревый; Радуйся, вся клеветы и поношения ненавидящим тя Господа ради прощавый и за сие, яко миротворец, великаго сокровища — усыновления Богу — сподобивыйся. Радуйся, святителю Игнатие, покаяния и молитвы делателю и учителю преизрядный!

Кондак 13

О предивный угодниче Христов, святителю отче Игнатие! Приими сие малое, обаче от любящих и чтущих тя сердец, приносимое ти моление и избави нас твоим всемощным предстательством от всякия скорби, болезни и печали, согрей охладевшия души наша огнем веры и любве к Богу, даруй нам прежде конца покаяние, буди нам к Царствию Небесному путевождь, да тамо с тобою и со всеми угодившими Богу во веки веков поем Ему: Аллилуиа, Аллилуиа, Аллилуиа!

(Этот кондак читается трижды и затем икос 1 и кондак 1)

 

Молитва святителю Игнатию Брянчанинову

О великий и пречудный угодниче Христов, святителю отче Игнатие! Милостиво приими молитвы наша, с любовию и благодарением тебе приносимыя! Услыши нас сирых и безпомощных, к тебе с верою и любовию припадающих и твоего теплаго предстательства о нас пред Престолом Господа Славы просящих. Вемы, яко много может молитва праведника, Владыку умилостивляющая. Ты от лет младенческих Господа пламенно возлюбил еси и Ему Единому служити восхотев, вся красная мира сего ни во чтоже вменил еси. Ты отвергся себе и взем крест твой, Христу последовал еси. Ты путь узкий и прискорбный жития иноческаго волею себе избрал еси и на сем пути добродетели великия стяжал еси. Ты писаньми твоими сердца человеков глубочайшаго благоговения и покорности пред Всемогущим Творцом исполнял еси, грешников же падших мудрыми словесы твоими в сознании своего ничтожества и своея греховности, в покаянии и смирении прибегати к Богу наставлял еси, ободряя их упованием на Его милосердие. Ты николиже притекавших к тебе отвергал еси, но всем отец чадолюбивый и пастырь добрый был еси. И ныне не остави нас, усердно тебе молящихся и твоея помощи и предстательства просящих. Испроси нам у человеколюбиваго Господа нашего здравие душевное и телесное, утверди веру нашу, укрепи силы наша, изнемогающия во искушениих и скорбех века сего, согрей огнем молитвы охладевшая сердца наша, помоги нам, покаянием очистившимся, христианскую кончину живота сего получити и в чертог Спасов преукрашенный внити со всеми избранными и тамо купно с тобою покланятися Отцу и Сыну и Святому Духу во веки веков. Аминь.