Тропарь благоверной Тамары, царицы Грузинской
Вышния красоты желая,/ нижния сласти телесныя далече от себе отгнала еси/ и, в чертозе царском пребывающи,/ ангельское житие препровождала еси,/ царице Тамаро блаженная,/ моли Христа Бога спастися душам нашим.
Ин тропарь благоверной Тамары, царицы Грузинской
Во святых дивная,/ Иверии светило,/ благоверная царице Тамаро,/ на горах высоких храмы воздвигшая,/ да в них моления возсылают ко Господу,/ мольбами твоими крепость даровавшая воем христолюбивых людей страны Иверския,/ десницею же своею полчища агарянская низпровергшая,/ моли Христа Бога/ спастися душам нашим.
Тропарь пророка Иеремии
Пророка Твоего Иеремии память, Господи, празднующе,/ тем Тя молим:// спаси души наша.
Кондак пророка Иеремии
Очистив духом, великий пророче и мучениче,/ твое светозарное сердце,/ славнее Иеремие,/ пророчествия дар свыше приял еси/ и возопил еси велегласно во странах:/ се Бог наш, и не приложится ин к Нему,/ Иже, воплощся, на земли явился есть
Тропарь преподобного Пафнутия Боровского
Жития светлостию просветив твое отечество,/ в молитвах и постех дарований Божественнаго Духа исполнился еси,/ и, во временней сей жизни добре подвизався,/ милость благоутробия всем скорбящим отверзл еси,/ и нищим был еси заступник./ Тем молим тя, отче Пафнутие,/ моли Христа Бога, да спасет души наша.
Кондак преподобного Пафнутия Боровского
Божиим светолитием просвещен, отче,/ постническое стяжал еси жительство, преподобне,/ иноком предобрый наставниче и постником благое украшение./ Сего ради Господь, труды, твоя видев,/ чудес даром обогати тя,/ источавши бо исцеления./ Мы же, радующеся, вопием ти:/ радуйся, отче Пафнутие.
Тропарь священномученика Макария, митрополита Киевского
Божественныя Безкровныя совершая Жертвы,/ кровь твою, от безбожных агарян излиянную,/ в жертву непорочную принесл еси Владыце твоему, Пастыреначальнику Христу./ Егоже моли, молим тя,/ пролити гнев на языки, хотящия браней;/ христолюбивое воинство наше на враги укрепи/ и стадо твое от всяких бед неврежденно соблюди,/ тебе бо крепкаго заступника почитаем,/ новый свяшенномучениче российский,/ святителю блаженный Макарие.
Кондак священномученика Макария, митрополита Киевского
Веселится град Киев,/ великое сокровище стяжав,/ твое тлению непричастное тело,/ святителю блаженный Макарие,/ твой бо престол даже до крове от лютых врагов нашествия хранил еси./ И ныне Небесному предстоиши Престолу,/ идеже молитвенно пред Творцем поминай нас, отче наш,/ да во всех бедах имеем тя прибежище и тобою хвалимся, зовуще:/ радуйся, Макарие, архиереом честное украшение.
Тропарь преподобному Герасиму, Болдинскому чудотворцу
Божественною любовию от юности своея распаляем, Преподобне, мир и вся яже в мире оставил еси, в пустыню вселился един. И в ней собрал еси ученик множество на Божие славословие, в молитвах и в посте и в трудах своих обителях добре подвизался во временней жизни. И ныне не остави посещая чад своих, Отче Герасиме, моли Христа Бога спастися душам нашим.
Кондак преподобному Герасиму, Болдинскому чудотворцу
Яко преобидев тленная и долу влекущее мудрование, весь Христов быв и Того честный крест на рамо взем, последовал Ему невозвратно, в молитвах и постех бых, делех же и злостраданиях, образ быв своим учеником: но яко имея дерзновение ко Святей Троице, молися, блаженне, яко да святое успение твое празднующе вопием: радуйся преподобие Герасиме, отче наш.
