Тропари, кондаки и величания - 17 мая 2025
Тропарь мученицы Пелагии
Агница Твоя, Иисусе, Пелагия/ зовет велиим гласом:/ Тебе, Женише мой, люблю,/ и, Тебе ищущи, страдальчествую,/ и сраспинаюся, и спогребаюся Крещению Твоему,/ и стражду Тебе ради,/ яко да царствую в Тебе, и умираю за Тя,/ да и живу с Тобою,/ но яко жертву непорочную приими мя, с любовию пожершуюся Тебе./ Той молитвами,/ яко Милостив, спаси души наша.
Кондак мученицы Пелагии
Временная презревши/ и Небесных благ причастница бывши,/ венец страдания ради приимши,/ Пелагие всечестная,/ яко дар принесла еси кровныя потоки Владыце Христу./ Моли от бед избавити нас,/ твою память почитающих.
Тропарь священномученику Владимиру Амбарцумову, пресвитеру Московскому
Христовою верою из детска утвержденный / и живот свой проповедованию Слова Божия посвятивый, / истину в Церкви Православной обретший / и к пастырскому служению Божиим смотрением призванный, / в дни гонений семьи верных окормлял еси, / прещений от безбожных не убоявся. / Тем же и пострадал еси даже до крове, / отче священномучениче Владимире, / моли Милостиваго Бога // спастися душам нашим.
Кондак священномученику Владимиру Амбарцумову, пресвитеру Московскому
Оружием веры огражденный, / яко истинный воин Христов мучителем противустал еси: / привременно есть господство ваше, свидетельствуя, / и страдания за Христа приял еси мужески, / тем же вопием ти: / Радуйся, священномучениче Владимире, // во Царствии Небесном венцем нетленным увенчанный.