Молитва преподобномученику Илариону (Цурикову)
О священная и многострадальная главо, преподобномучениче Иларионе приснопамятне, воине Христов добропобедный, Православныя Русския Церкве сыне верный! Ты, первее труды постническими душу твою очистив, демонская ополчения посрамил еси, в годину же гонений безбожных терпением мужески облеклся еси и, яко жертва непорочная и благоприятная за грехи народа нашего, Богу принеслся еси. Темже, яко благий раб и верный, в радость Господа твоего вшел еси. О преподобне и достохвальне страдальче, не остави ныне и нас, сродник твоих, благодарною любовию подвиг твой почитающих и заступления твоего просящих. Моли тепле Всеблагаго Господа нашего Иисуса Христа, да утвердит в Православии до скончания века Церковь нашу, Отечество и люди, да сохранит обители монашеския, верныя обетом иноческим, да дарует нам покаяние и прощение грехов и да поможет во всяцем чине и звании Ему угождати и во всех обстояниих на Него Единаго уповати. Емуже подобает всякая слава, честь и поклонение со Отцем и Святым Духом ныне и присно и во веки веков. Аминь.
Молитва преподобному Савве Крыпецкому
О преподобне отче Савво, пустынный подвижниче, в телеси Ангеле, воине Христов доблественне, веры правило, Церкви утверждение, благочестия образе, добродетелей светило, трудов, поста, воздержания, чистоты и целомудрия предводителю, помощниче всем нуждающимся, странствующим вождю, плавающим кормчию, обуреваемым пристанище, ослабевающим помоще, обидимым заступление, печальным утешение, вдовицам и сирым покрове, алчущим питание, нагим одеяние, плачущим утешение, болящим исцеление, ненадеющимся надеяние, христиан всех ходатайство, предстательство и защищение! Призри милостивно на ны, припадающия к святым мощем твоим, внемли молитвам нашим и подаждь коемуждо от нас благопотребная, просимая от тебе. Вемы, святче Божий, яко имаши дерзновение ко Владыце Христу Богу, и елико аще воспросиши у Него, подаст нам. Аще же и недостойни есмы благодати Его, обаче твоя же молитва да сотворит ны ея достойны, много бо может прилежная молитва праведнаго, якоже рече апостол. Сам убо ты воздвигни нас из глубины греховныя, неверныя просвети, еретики обрати, заблудшия в нас от Православия к познанию истинныя веры настави, всей же Церкви исходатайствуй мир и святыню, единомыслие в вере, умов благопостояние, соревнование в благочестии, единодушие в братолюбии, верность к отечеству, преданность предержащей власти, начальствующим — правду и ум, подчиненным же — безропотное повиновение, господствующим — кротость и человеколюбие, рабом же — нестроптивость, родителем — благопопечение о чадех, чадом же — страх и послушание, девствующим — чистоту и целомудрие, брачным же — верность и непорочность ложа; всем же грешным — покаяние, кающимся — прощение, в злоключениих же — терпение и упование, в надежде же спасение даруй. Избави же всех нас от глада, губительства, от труса и потопа, от огня и меча, от нахождения иноплеменных и междоусобныя брани, и от нападения вражия, и от тлетворных ветр, и от смертоносныя язвы, и от напрасныя смерти, и от всякаго зла, да, тако вси тобою просвещаеми, наставляеми, утешаеми, утверждаеми и сохраняеми, славим прославльшаго тя Бога Отца, и Сына, и Святаго Духа, и твое предстательство всегда, ныне и присно и во веки веков. Аминь.
Молитва преподобному Антонию Киево-Печерскому
О добрый наш пастырю наставниче, приснопоминаемый иноков российских первоначальниче, преподобне и богоносне отче наш Антоние! Ты горе на небеси пребываеши, мы низу на земли, удалени суще от тебе не толико местом, колико греховною нечистотою нашею; обаче памятующе отеческую любовь твою к людем, ти сродным, припадаем и молимтися с умилением и верою: помози нам, грешным, покаянием очиститися и достойным быти помилования и прощения от Господа и Создателя нашего. Умоли Его благость даровати нам великия и богатыя милости: земли плодоносие, воздуха благорастворение, мир глубок, братолюбие искреннее, благочестие нелицемерное, житейских потреб довольство, и да не во зло обратим благая, даруемая нам от щедротодательныя Его десницы, но во славу имене Его святаго и во спасение наше. Соблюди, чудотворче святый, благомощными твоими молитвами российския грады, обитель твою и всю страну православнороссийскую невредимы от всякаго зла, и вся люди, жительствующия в обители твоей и на поклонение в ню приходящия, осени небесным твоим благословением, и в скорбех, бедах и болезнех утешение, избавление и исцеление им подаждь, да благодарно славим, хвалим и величаем прославльшаго тя Господа, чрез тебе дивно благодетельствующаго нам, Безначального Отца, Единороднаго Его Сына и Единосущнаго Его Духа, Троицу Живоначальную и Нераздельную, и твое святое заступление во веки веков. Аминь.
Молитва святителю Киприану
О святителю Христов Киприане, от Афона возсиявый и в Царьграде процветый, изволением Божиим на Русь пришедый и на престол святительский поставленный, болгарская отрасле и украшение предивное! Приими ныне молитву нашу, притекших ко гробу твоему российских и болгарских чад твоих, и принеси Богу усердная моления, да сохранит предстательством твоим веру православную, церквей православных единение да укрепит, грады наша и люди от всяких бед и напастей, искушений и скорбей да избавит, да дарует нам неотъемлемый мир, да утвердит любовь христианскую посреде нас и да соберет всех нас в Царствие Свое, идеже прославим пречестное и благословенное Имя Отца и Сына и Святаго Духа, ныне и присно, и во веки веков. Аминь.
Молитва преподобному Кукше Одесскому
О преподобне и богоносне отче наш Кукшо, обители Успения Божией Матери похвало, богоспасаемаго града Одессы неувядаемый цвете, кроткий пастырю Христов и великий за нас молитвенниче. Усердно к тебе прибегаем и с сокрушенным сердцем просим: не отыми покров твой от обители нашей, в нейже подвигом добрым подвизался еси. Буди помощник благий всем благочестно живущим и добре труждающимся в ней. О добрый наш пастырю и богомудрый наставниче, преподобне отче Кукшо, призри милостивно на предстоящия люди, умиленно молящиеся и просящие от тебе помощи и заступления. Помяни всех, веру и любовь к тебе имущих, имя твое молитвенно призывающих и на поклонение мощем твоим святым приходящих, и вся во благих прошения их милостивно исполни, осеняя их святоотеческим твоим благословением. Избави, святый отче, от всякаго навета вражия Церковь нашу святую, град сей, обитель и землю нашу, и не остави заступлением твоим нас немощных, грехами и скорбями многими обремененных. Озари, преблаженне, ум наш светом лица Божия, укрепи благодатию Господней жизнь нашу, да в законе Христове утвердившеся, неленостно по пути заповедей святых потечем. Осени твоим благословением нас, и всех в скорбех сущих, болезньми душевными и телесными одержимых, исцеление, утешение и избавление даруя. Над всеми же сими испроси нам свыше дух кротости и смиренномудрия, дух терпения и покаяния, отступившим от православныя веры и погибельными ересьми и расколами ослепленным вразумление, во тьме неверия блуждающим светом истиннаго богопознания просвещение, раздоров и нестроений утоление. Умоли Господа Бога и Пресвятую Богородицу даровати нам тихое н безгрешное житие. Поминай нас недостойных у престола Вседержителя, и испроси мирную христианскую кончину, и сподоби нас помощию твоею спасение вечное улучити и Царствие Небесное унаследовати, да славословим велия щедроты и неизреченныя милости Отца и Сына и Святаго Духа, в Троице поклоняемаго Бога, и твое отеческое заступление во веки веков. Аминь.
Молитва первая преподобному Савве Вишерскому, чудотворцу
О великий угодниче, преславный чудотворче и обители сея богодухновенный наставниче, Савво всеблаженне, душею на небеси Престолу всех Царя предстоящий, телом же во святей обители сей почивающий, и различная чудеса повсюду молитвами твоими совершаяй, призри милостивно на предстоящия и твоего ко Господу Богу ходатайства во обдержащих нуждах люди просящия: вси бо мы, по множеству грехов наших, не точию смеем принести когда молебный глас, но ниже возвести очес своих на небо; ты же, яко стяжавый дерзновение, принеси за всех, к честней раце твоей притекающих, теплыя молитвы к Господу, еже избавитися нам от глада, потопа, труса, огня, меча и брани, от людей и от диавола бывающия, и от всякия душевныя и телесныя болезни; да избавившеся сих и работая Господу, Ему же предстоиши, внидем в некончаемый покой и прославим тамо с тобою всех благих подателя Бога, всегда, ныне и присно, и во веки веков, аминь.
Молитва вторая преподобному Савве Вишерскому, чудотворцу
О преизящный и великий угодниче Господень Савво, похваляем твоя славная чудотворения, прославляем житие твое святое; никтоже возможет изчести терпение и подвиги твои святыя; ты бо отечество и род оставил еси, в пустыню достиг и, ученики собрав, составил обитель, воздвигнув столп, и на нем подвизался еси, сохраняя стадо твое словесное; иже неправедно иногда нашедших разбойнически на обитель твою увидел еси и токмо жезла ударением устрашил еси, и ныне устраши, отче преподобный, всех врагов, возстающих на нас; умоли милостиваго Бога, да отпустит нам прегрешения наша и сподобит нас купно радости вечныя наслаждатися со всеми святыми, ныне и присно, и во веки веков, аминь.
Молитва святителю Савве Сербскому
О священная главо, преславный чудотворче, святителю Христов Савво, Сербския земли первопрестольниче, хранителю и просветителю, всех же христиан благонадежный пред Господем предстателю, тебе припадаем и молимся: даждь нам быти причастником любве твоей к Богу и ближнему, еюже при жизни святая душа твоя преисполнена бысть. Озари нас истиною, просвети ум и сердце наше светом Божественнаго учения, научи нас тебе подражати верно, Бога и ближняго нашего любити и заповеди Господни совершати непогрешительно, да будем и мы чада твой не по имени токмо, но всем житием нашим. Молися, святый архиерею, о Святей Православней Церкви и отечестве твоем земном, присно тя любовию чтущем. Призри благоутробно на всяку душу верных твоих чтителей, милости и помощи твоея ищущих, буди всем нам в болезнех целитель, в скорбех утешитель, в печалех посетитель, в бедах и нуждах помощник, в час же смертный милостивый покровитель и защититель, да, при помощи молитв твоих святых, сподобимся и мы, грешнии, спасение верное получити и Царствие Христово унаследовати. Ей, святче Божий, не посрами упования нашего, еже на тя крепко возлагаем, но яви нам твое многомощное заступление, да славим и поем дивнаго во святых Своих Бога, Отца и Сына и Святаго Духа, всегда, ныне и присно и во веки веков. Аминь.
Молитва святителю Афанасию, патриарху Цареградскому
О святителю Христов, угодниче Божий Афанасие! Велением Божиим жребий служения святительскаго восприим и крест Христов на рамена своя возложив, был еси пастырь добрый, светильник веесветлый, столп непоколебимый, Церкве служитель верный, иерархов начальник, Православия защитник, нечестия искоренитель, сего ради и водворился еси в дому Господа твоего. Тебе убо просим: молися о нас, с верою и любовию притекающих к честным и многоцелебным мощем твоим, не отрини просящих у тебе помощи в скорбех и болезнех. Молитвою твоею предстани ко Всевышнему Владыце, исходатайствуй яже на пользу душ и телес наших и отверзи нам двери милосердия Божия. Ходатайством твоим сохрани Церковь Святую тверду и непоколебиму от навет вражиих. Моли Господа и Владыку, да тихое и безмолвное житие поживем во всяком благочестии и чистоте. Соблюди храм сей, в немже вселился еси, от всяких бед и напастей и от всех враг видимых и невидимых, и, якоже в жизни критския люди от неправеднаго агарянскаго убиения избавил еси, тако и ныне на Небесех непрестанно молися ко Господу избавитися нам от всякаго злаго обстояния. Подаждь руку помощи и всем православным христианом, притекающим к честным и нетленным мощем твоим и в молитвах своих тя призывающим. Ускори на молитву и потщися на помощь, имиже веси судьбами, да вси, безприкладное Божие милосердие видяще и чаемую помощь прлучивше, славят подавшаго тебе силу и славу Отца и Сына и Святаго Духа, во Единем Существе славимаго Бога, ныне, и присно, и во веки веков. Аминь.
Молитва преподобному Нилу Сорскому
О преподобне и богоблаженне отче Ниле, богомудрый наставниче и учителю наш! Ты любве ради Божия удаляяся мирских смущений, в непроходней пустыне и в дебрях изволил еси вселитися и яко лоза благоплодна, умножив чада пустыни, явил еси себе им словом, писанием и житием образ всякия иноческия добродетели, и, яко Ангел во плоти пожив на земли, ныне в селениих небесных, идеже празднующих глас непрестанный, водворяешися и, с лики святых Богу предстоя, Тому хвалы и славословия непрестанно приносиши. Молим тя, богоблаженне, настави и нас, жительствующих под кровом твоим, непреткновенно ходити по стопам твоим: любити Господа Бога всем сердцем своим, Того единаго вожделети и о Том едином помышляти, мужественно же и благоискусно пратися с долу влекущими нас помыслы и прилоги вражиими и тех всегда побеждати; возлюбити всякую тесноту монашескаго жития и возненавидити красная мира сего любве ради Христовы и насадити в сердцах своих всякую добродетель, в нейже сам потрудился еси. Моли Христа Бога, да и всем православным христианом, в мире живущим, просветит ум и очи сердечныя, еже ко спасению, утвердит их в вере и благочестии и в делании заповедей Своих, сохранит от лести мира сего и дарует им и нам оставление грехов и к сим приложит, по неложному обетованию Своему, и вся потребная нам ко временному животу. Да в пустыне и в мире жительствующе, тихое и безмолвное житие поживем во всяком благочестии и чистоте и Того усты и сердцем прославим купно со Безначальным Его Отцем, и Пресвятым и Благим и Животворящим Его Духом всегда, ныне и присно, и во веки веков. Аминь.
Молитва преподобному Давиду Гареджийскому
О, всесветле, богохвальне авва Давиде, святче Божий! Ты силою благаго Законоположителя явился еси нам, кознями лукавого связанным и обуреваемым, яко наставник в покаянии и помощник в молитве. Того ради дано тебе много даров благодати и чудотворения, разрешения грехов наших и прегрешений оставление, болезней исцеление и диавольских наветов отгнание. Темже твоею отеческою милостию в богоцарственном разумении, многотрудными молитвами и моленьми твоими, наипаче же непрестанным твоим заступлением о нас, да возставит Господь Бог ны, во грех впадшия, силою Своею непобедимою на всякаго видимаго и невидимаго врага, дабы благодаряще совершая святую память твою, желанием возжелали мы покланятися Превечному Богу в Троице Единому, Отцу и Сыну и Святому Духу, ныне и присно и во веки веков. Аминь.
Молитва преподобному Арсению Коневскому
О всеблаженне и Богоносе Арсение, отче наш! Сый во славе Небеснаго Царя Христа Бога, предстоя Престолу Его со всеми Его святыми, не презри нас, долу сущих, грешных и недостойных, со слезами тебе молящихся, но приими сердечное стенание и бренных устен моление сие наше. Тебе бо вси молимся, о преподобне отче, и тебе умиленно просим: буди о нас ходатай и молитвенник теплейший ко Всеблагому Богу Моли благость Его, еже спасти нас от прегрешений наших, имиже весть судьбами. Молися щедротам Его, еже подавати щедро всему миру потребная. Молися Дающему всем мир низпослати мир церквам, собирая расточенныя воедино, сохранити землю Русскую в мире и тишине, и всем верным в доме, и на пути, и на мори, и повсюду дни благи и безмятежны даровати; благословити труды отцев и братии наших и простити всех согрешения вольная и невольная, яко да сподобимся и мы, грешнии, вкупе с тобою славити Отца и Сына и Святаго Духа в безконечныя веки. Аминь.
Молитва преподобному Моисею Угрину
О, пречудный и богоносный отче Моисее, изрядный угодниче Христов и великий чудотворче, к тебе смиренно припадаем и молимся: даждь нам быти причастником любве твоея ко Богу и ближнему, помози нам творити волю Господню в простоте сердца и смирении, заповеди Господни совершати непогрешительно, призри благоутробно на всякую душу верных твоих чтителей, милости и помощи твоея ищущих. Ей, всеблагий угодниче Божий, услыши нас, молящихся тебе, и не презри нас, требующих твоего заступления и достойную песнь тебе приносящих, тебе ублажаем, отче Моисее, тя воспеваем, чистоты светильниче, прославляюще милостиваго Бога, во Святей Безначальней Троице славимаго Отца и Сына и Святаго Духа, ныне и присно и во веки веков. Аминь.
Молитва преподобному Гавриилу Афонскому
О, преподо́бне и богоно́сне о́тче на́ш Гаврии́ле, уго́дниче Христо́в, те́плый о на́с моли́твенниче и ско́рый помо́щниче! Се́ ны́не мы́, гре́шнии и недосто́йнии, с благогове́нием притека́юще к ра́це моще́й твои́х, усе́рдно мо́лим тя́: я́ко име́яй дерзнове́ние ко Христу́ Бо́гу, потщи́ся богоприя́тным твои́м хода́тайством испроси́ти у Го́спода си́л, я́ко да проба́вит вели́кия и бога́тыя ми́лости Своя́ на на́с гре́шных, да пода́ст на́м ду́х пра́выя ве́ры, ду́х ве́дения и любве́, ду́х ми́ра и ра́дости о Ду́се Свя́те. Моли́, о́тче свяще́нне, милосе́рдаго Бо́га, да возсия́ет све́т благода́ти Его́ су́щим во тьме́ лжеве́рия, и да позна́ют Христа́, Бо́га и́стиннаго, да возсия́ет све́т се́й блужда́ющим на распутиях раско́ла, да вразумя́тся и прии́дут во огра́ду Правосла́вныя Це́ркве, в не́йже еди́ной несомне́нно содева́ется ве́чное спасе́ние ве́рных. Помози́ на́м, уго́дниче Бо́жий, да призове́т Госпо́дь наро́д на́ш к вели́кому покая́нию и пла́чу о гресе́х оте́чества на́шего, да не поги́бнем со беззако́нии на́шими, да утоли́т шата́ния и раздо́ры в земле́ на́шей, огради́т на́с от гне́ва, уби́йства, вражды́ и зло́бы, да па́ки возлю́бим дру́г дру́га и еди́но пребу́дем в Го́споде и Спаси́теле на́шем, Ему́же подоба́ет вся́кая сла́ва, че́сть и поклоне́ние, со Безнача́льным его́ Отце́м, и Пресвяты́м и Благи́м и Животворя́щим Его́ Ду́хом, ны́не и при́сно и во ве́ки веко́в. Ами́нь.
