Тропари, кондаки и величания - 20 мая 2025
Тропарь преподобномученику Илариону (Цурикову)
Верный ученик Христа даже до смерти быв,/ преподобномучениче Иларионе приснопамятне,/ подвиги бо поста и кровию мучений/ землю Русскую освятил еси./ Темже и мы, чада твоя, любовию вопием ти:/ слава Давшему ти крепость,/ слава Венчавшему тя,/ слава Прославльшему тя с новомученики Российскими.
Кондак преподобномученику Илариону (Цурикову)
Мирскаго мятежа удалився,/ добре Богу послужил еси,/ во дни же гонений на Церковь Русскую/ кровь твою за Христа пролиял еси/ и страданьми твоими землю нашу обагрил еси./ Темже молися, преподобномучениче Иларионе,/ сохранитися ей в Православии и благочестии/ до скончания века.
Тропарь преподобного Саввы Крыпецкого, Псковского
Пустыни явился еси доброе насаждение, преподобне,/ от юности бо и в мире изволил еси чистое житие;/ ревнуя же большему, и дом отеческий оставил еси,/ и, вся красная мира сего презрев,/ от чуждых стран пришел еси/ во обители Богоспасаемаго града Пскова,/ и послушанию преподобнаго Евфросина предался еси;/ таже простираяся умом еще к вящшему,/ вселился еси в пустыню,/ в нейже обитель пречестну воздвигл еси,/ и множество инок собрал еси,/ и их наставил еси на путь истинный./ Темже и Христос, Емуже в жертву себе принесл еси,/ видев твоя благия труды,/ яко пресветла тя светильника,/ и по преставлении чудесы обогати, Савво, отче наш./ Молися убо присно Ему о стране нашей,/ еже дароватися ей на враги победам,/ стаду же твоему от враг ненаветну пребыти,/ и всем нам спастися.
Тропарь преподобного Саввы Крыпецкого
От мирскаго жития изшед,/ отвержением же мира Христу последовал еси/ и, в пустыни вселься,/ равноангельное житие пожил еси,/ отонудуже, веселяся, прешел еси к Небесным чертогом,/ и ныне, со Ангелы Владычню Престолу предстоя,/ поминай нас, чад своих,/ яже собрал еси, Богомудре,/ да радостию от души вопием:/ радуйся, Савво,// отче преблаженнейший.
Кондак преподобного Саввы Крыпецкого
Возсия от пустыни славному граду Пскову/ новое светлое солнце,/ чудес лучами всех озаряющее/ и благодатне согревающее,/ тьму же всяких искушений и наветов/ и хлад греховный отженяющее./ Приидите убо, празднующе блаженную память/ сего светильника нашего, воспоим:/ слава Богу, тако промышляющему о нас,/ слава угоднику Его, сохраняющу нас!/ Ты же, преподобне отче Савво,/ о иже твою присно память почитающих/ моли Христа Бога,// яко да милостив будет нам и в День судный.
Тропарь преподобного Антония
От мирскаго мятежа изшед,/ отвержением же мира евангельски Христу последовал еси/ и, равноангельное житие пожив,/ в тихое пристанище Святыя Горы Афона достигл еси,/ отонудуже благословением отцев в гору Киева пришед/ и тамо трудолюбно жизнь совершив,/ Отечество твое просветил еси/ и, множеству монашествующих стезю, ведущую к Небесному Царствию, показав,/ Христу сия привел еси,/ Егоже моли, Антоние преподобне,// да спасет души наша.
Тропарь преподобных Антония и Феодосия
Звезды мысленныя,/ просиявшия на тверди Церковней,/ иноков Российских основание,/ песньми, людие, почтим,/ радостныя похвалы сим воздающе,/ радуйтеся, преблаженнии отцы, Антоние со Феодосием богомудрым,// присно молящиися о возследствующих и чтущих память вашу.
Кондак преподобного Антония
Возложив себе Богу, паче всех возлюбленному от юности, преподобне,/ Тому от всея души любовию последовал еси,/ мира же тленная ни во чтоже вменив, в земли пещеру соделал еси/ и, в ней добре противу невидимаго врага козней подвизався,/ яко светозарное солнце, во вся концы земли возсиял еси,/ отонудуже, веселяся, прешел еси к Небесным чертогом./ И ныне со Ангелы Владычню престолу предстоя,/ поминай нас, чтущих память твою, да зовем ти:// радуйся, Антоние, отче наш.
Ин кондак преподобного Антония Киево-Печерского, начальника всех русских монахов
В мире яко Ангел, отче, пожил еси,/ в земли пещеру себе соделав,/ в нейже добре подвизався противу невидимаго врага козней,/ и оттуду, веселяся, прешел еси к Небесным чертогом./ Поминай нас, чтущих память твою, да зовем ти:/ радуйся, Антоние, отче наш.
Кондак преподобных Антония и Феодосия
Двоицу великих отец и правило иноков светлое,/ умныя зари, онебесившия Российскую Церковь,/ кто по достоянию хвалами воспоет?/ Тии бо Престолу Божию предстоят./ Но яко имущии дерзновение к Святей Троице,/ Антоние преблаженне и Феодосие приснопамятне,/ молитеся о молебная вам приносящих// и любовию песньми вас ублажающих.
Ин тропарь преподобных Антония и Феодосия Печерских
Двоицу начальных российских светил почтим,/ Антония, Богом посланнаго, и Феодосия, Богом дарованнаго:/ тии бо первии, равноангельным в России житием просиявше от гор Киевских,/ осветиша отечествия нашего вся концы,/ и путь к Небеси правый многим показаша,/ и, первоотцы иноком бывше, лики спасаемых Богови приведоша,/ и ныне, предстояще в вышних немерцаемому Божества Свету, молятся о душах наших.
Ин кондак преподобных Антония и Феодосия Печерских
Твердыя столпы благочестия,/ недвижимая иноческих законоположений основания, и необоримыя стены Российския восхвалим:/ Антониа, возлюблыпаго Бога, и Феодосиа, возлюбленнаго Богом:/ труды бо онех и постническия подвиги прият паче всякаго всеплодия,/ Един во святых прославляемый.
Величание преподобному Антонию Киево-Печерскому
Ублажаем тя, преподобне отче Антоние,
и чтим святую память твою, наставниче монахов и собеседниче ангелов.
Перенесение мощей святителей Киевских и всея России чудотворцев Киприана, Фотия и Ионы. Тропарь
Яко Светлаго Солнца светозарныя звезды,/ Троическим Светом озаряете сердца верных,/ пренесением честных мощей ваших,/ Троицы сосуди явистеся чистии вашим житием,/ и научисте люди твердо вере Христове,/ и скверну отгнасте вашими святыми заповедьми,/ и упасосте добре Христово стадо, порученное вам,/ Богомудре Киприане, со славным Фотием и со Ионою твердым,/ молитеся Христу Богу, да спасет души наша.
Тропарь святителя Киприана, митрополита Московского
Иже от Бога свыше Божественною благодатию совершен/ и благими нравы украшен,/ Духом Святым просвещен,/ совершив святыню в страсе Божий,/ сподоблен бысть благодати Божественнаго Духа,/ пасый Церковь Божию Русския митрополии,/ постом вся поборая, волнение претерпе,/ гонение преминув, святаго Петра митрополита всегда себе в помощь призывая,/ и сего помощника имея,/ и того стопам последуя./ Служитель благоприятный,/ заповеди Божия соблюдая,/ Духом Божиим наставляемь,/ просвещая верныя люди учением словес твоих,/ пощением украси житие свое,/ ярем Господень измлада восприим,/ и паче всех Христа возлюби./ Того ради и архиерейским седалищем почтен,/ и, яко светозарное солнце, от Сербския земли происшед,/ и по вся концы русский земли добродетелию просияв,/ светило явися мирови,/ и преставися ко Господу от сея жизни в вечный покой,/ великий архиерею Божий, Киприане митрополите,/ учителю и наставниче Русския земли,/ всегда предстоя Престолу Пресвятыя Троицы,/ моли Господа прилежно об архиереех и о всех христианех,/ да спасет тебе ради души наша.
Перенесение мощей святителей Киевских и всея России чудотворцев Киприана, Фотия и Ионы. Кондак
Яко трие велицыи светила, явистеся,/ озаряюще всю подсолнечную/ богоданною вам благодатию чудес,/ и просветисте молитвами своими верных сердца,/ вашу память чтущих честнаго пренесения./ И Владыку Христа, всех Творца, молите/ стране нашей на враги победу подати,/ яко имуще дерзновение,/ и нам просите велия милости, вопиющим к вам:/ радуйтеся, поборницы по Христове Церкви/ и многочестная светила, святителие славнии.
Перенесение мощей святителей Киевских и всея России чудотворцев Киприана, Фотия и Ионы. Ин кондак
Яко крин, в пустыни давидски процветше, отцы святии,/ ныне явистеся и к Вышнему течению радостно устремистеся,/ идеже с лики святых Пресвятей Троице предстояще,/ молите сохранитися стаду вашему от враг видимых и невидимых./ Мы же, святое ваше обретение празднующе, вопием:/ радуйтеся, теплии наши заступницы.
Кондак святителя Киприана, митрополита Московского
Необорим столп Православия,/ вере Христове утверждение,/ церквам украситель, премудрый учитель,/ сербское воспитание, русское процветение,/ Господнею любовию распалаемь,/ Духу Пресвятому дом явися/ и душу, яко жертву непорочну, Господеви принесе,/ досточудне и всечестне Киприане, святителю Христов,/ сего ради вселися в широту райскую,/ предстоя Христу в лице святых,/ Емуже молися и спасай град и люди от поганых нахождения,/ яко да зовем ти:/ радуйся, отче Киприане,/ учителю премудрый.
Ин кондак святителя Киприана, митрополита Московского
Святителю Христов, пастырю добрый,/ учителю небесныя мудрости,/ светильниче света духовнаго,/ Киприане досточудне,/ не престай молитися за паству свою,/ за любящих и чтущих тя,// града нашего крепкий заступниче.
Тропарь преподобному Кукше Одесскому
От юности мир суемудренный и лукавый оставил еси, Божественною свыше просветився благодатию, преподобне, многим терпением во временней жизни подвиг совершил еси, темже источаеши чудес благодать всем с верою приходящим к раце мощей твоих, Кукшо, преблаженне отче наш.
Кондак преподобному Кукше Одесскому
Подвижника благочестия искусна, новаго исповедника веры отеческия преподобнаго Кукшу верно вси ублажим, яко пастыря истиннаго, старца благостнаго, иноков наставника, утешителя малодушных, целителя недужных, и по кончине показующаго светлость жития своего. И днесь в память его притекше, радостно возопием: яко имея дерзновение к Богу, многообразных нас избави обстояний, да зовем ти: радуйся, утверждение людем православным.
Тропарь преподобного Саввы Вишерского, Новгородского
От юности твоея весь Богу поработился еси, блаженне, / и Того ради любве отечество и род оставил еси, / в пустыню вселився / и в ней жестокое житие показав, / чудес дарования от Господа приял еси, / Савво преподобне, / моли Христа Бога спастися душам нашим.
Кондак преподобного Саввы Вишерского, Новгородского
Отечества, преподобне, удалився/ и вселився в пустыню,/ и тамо на столп вшед, идеже жестокое житие показал еси,/ и многих житием удивив,/ отнюдуже дарование чудес от Христа приял еси,/ поминай нас, чествующих память твою, да зовем ти:/ радуйся, Савво, отче наш.
Тропарь в честь обретения мощей преподобного Нила Мироточивого
Монашествовав богоугодно в Горе Афонстей,/ в молитвах и постех Бога взыскал еси/ и стал еси приятелище чистое Духа,/ облиставая верным добродетелей лучи,/ имиже осияваеши, Ниле, вопиющих тебе:/ слава прославльшему тя Богу,/ слава Венчавшему тя,/ слава Действующему тобою всем исцеления.
Кондак в честь обретения мощей преподобного Нила Мироточивого
Еже от земли явление/ священных мощей твоих, Ниле,/ совозсия сиянию Креста,/ того бо вожделел еси тепле от младенства,/ кости твоя, сораспявшияся Христови,/ воскресшему яко превечному Богу,/ Того пришла благодать.
Тропарь преподобного Паисия Величковского
Странен быв на земли,/ Небеснаго Отечества достигл еси/ преподобне отче Паисие,/ добротолюбия подвижниче,/ верных научил ум к Богу возводити/ и сердцем к Нему взывати:/ Господи Иисусе Христе, Сыне Божий,/ помилуй мя, грешнаго.
Кондак преподобного Паисия Величковского
Избранный иноческаго жития ревнителю, яко пчела многотрудная писаньми отеческими души наша снабдил еси, коегождо наставляя на путь спасения, сего ради зовем ти: радуйся, Паисие премудре, старчества духовнаго в стране нашей возродителю.
Тропарь святителю Савве, первому архиепископу Сербскому
Пути, вводящаго в жизнь,/ наставник, и первопрестольник, и учитель был еси:/ первее бо пришед, святителю Савво,/ отечество твое просветил есй/ и, породив тое Духом Святым,/ яко древа маслинная,/ в мысленнем рай насадил есй всеосвященная твоя чада./ Тем, яко апостолом и святителем сопрестольна/ чтуще тя, молим:/ моли Христа Бога/ даровати нам велию милость.
Ина служба святителя Саввы Сербскаго. Тропарь
Православия наставниче,/ благочестия учителю и чистоты,/ вселенныя светильниче,/ архиереов Богодухновенное удобрение,/ Савво премудре,/ ученьми твоими вся просветил еси,/ цевнице духовная,/ моли Христа Бога спастися душам нашим.
Тропарь общий преподобных Симеона Мироточиваго и сына его, святителя Саввы Перваго, архиепископа Сербскаго
Обители Хиландарския священных строителей / и Афона светильники, Сербии похвалу, / Симеона величайшаго, преподобных лепоту, / и род его чудный, святителя, - глаголю,- Савву,/ приидите согласно почтим, глаголя: / молите Христа Бога / о пастве вашей, блаженнии,/ и о еже Церкви свободней быти от обстояний.
Тропарь общий преподобных Симеона Мироточиваго и сына его, святителя Саввы Перваго, архиепископа Сербскаго
Иже теплыя заступники в скорбех и напастех имуще, / Симеона Богоноснаго и Савву первосвятителя,/ припадем к нима с верою,/ яко да молитвами их от напастей избавляеми,/ по долгу благоверно Спаса и Бога прославим, глаголюще: / слава Давшему вам крепость,/ слава Прославльшему вы чудесы,/ слава Избавлыпему нас от скорбей молитвами вашими.
Тропарь в честь перенесения мощей преподобного Саввы Сербского
Пути, вводящего в жизнь,/ наставник, и первопрестольник, и учитель был еси:/ первее бо пришед, святителю Савво,/ отечество твое просветил еси/ и, породив тое Духом Святым,/ яко древа маслинная,/ в мысленнем раи насадил еси всеосвященная твоя чада./ Тем, яко апостолом и святителем сопрестольна/ чтуще тя, молим:/ моли Христа Бога/ даровати нам велию милость.
Кондак святителю Савве
Яко первосвятителя великаго и апостолов сообщника,/ Церковь прославляет тя людей твоих, преподобне,/ но яко имея дерзновение ко Христу Богу,/ молитвами твоими от всяких нас бед спасай, да зовем ти:/ радуйся, отче Савво Богомудре.
Ина служба святителя Саввы Сербскаго. Кондак
Струями слез твоих, Богоносне Савво,/ церковь телесную очистив,/ слуга бысть Святыя Троицы,/ сохраняй отечество свое непобедимо,/ тому бо ты еси утверждение.
Кондак общий преподобных Симеона Мироточиваго и сына его, святителя Саввы Перваго, архиепископа Сербскаго
Горнюю жизнь возлюбивше, славнии,/ жизнь сущую на земли презресте./ Сего ради в вышних со Ангелы всегда ликующе,/ молите о всех нас.
Кондак в честь перенесения мощей преподобного Саввы Сербского
Заступниче скорбящим,/ в напастех помощниче,/ ко Владыце молебниче,/ не презри нас, смиренных, обремененных грехи,/ но предвари и исхити от мук вечных с верою молящихтися,/ ускори на заступление и потщися на помощь,/ заступи, святителю Христов Савво, поющия тя.
Ина служба святителя Саввы Сербскаго. Ин кондак
Избраннаго от пелен Христовою благодатию/ и возлюбленнаго от юности Божиим Духом,/ юностный цвет, Савву блаженнаго,/ похвальный венцы, вернии, днесь сплетше/ и Божественную главу его венчающе, воззовем:/ радуйся, отче, Божие жилище.
Ин кондак общий преподобных Симеона Мироточиваго и сына его, святителя Саввы Перваго, архиепископа Сербскаго
Днесь Симеон с Саввою, блаженнии, в дусе пришедше,/ спасают от обстояний паству их:/ сии бо Троицу проповедаша Единаго Бога,/ Церкве явишася утверждение,/ в преподобных Мироточивый и во святых чудотворец:/ сии бо и во бранех необоримии защитницы ноказашася,/ Афона похвала и народа Сербскаго крепость.
Тропарь преподобного Иннокентия Комельского, Вологодского
От юности сосуд избранен был еси/ и в житии Богу послужил еси,/ иноков наставниче Иннокентие,/ потщался еси хуждшее покорити лучшему,/ темже и страсти умертвив,/ возвысился еси к зрению красоты несозданныя,/ в Бозе Емуже предстоиши,/ моли, отче, Христа Бога/ спастися душам нашим.
Ин тропарь преподобного Иннокентия Комельского, Вологодского
От юности своей весь Богу поработился еси, блаженне,/ Того ради любве отечество и род оставил еси,/ и, в пустыню вселився,/ в ней жестокое житие показал еси,/ и чудес дарования от Господа приял еси,/ преподобне Иннокентие,/ моли Христа Бога спастися душам нашим.
Кондак преподобного Иннокентия Комельского, Вологодского
Мира и сродник удалився,/ в пустыни неустанною молитвою Богу угодил еси/ и в подвизе жития, отче, просиял еси,/ поминай нас, чтущих усердно память твою, да зовем ти:/ радуйся, Иннокентие преподобне.
Ин кондак преподобного Иннокентия Комельского, Вологодского
Отечества, преподобне, удалився/ и вселився в пустыню,/ тамо жестокое житие показал еси и многих людей житием своим удивил еси./ Помилуй нас, чтущих память твою, да зовем ти:/ радуйся, преподобне Иннокентие, отче наш.
Тропарь святителя Афанасия, патриарха Константинопольского, Лубенского чудотворца
Премудростию учений твоих царствующий град просветив,/ тьму неведения еретического разгнал еси, преблаженне;/ твое благословение земли Российстей принесл еси,/ отче наш, святителю Афанасие,/ идеже скончав течение твое,/ на крилех чистоты возлетел еси в Небесное Царство./ Моли Христа Бога непрестанно о душах наших.
Кондак святителя Афанасия, патриарха Константинопольского, Лубенского чудотворца
О всесвятейший пастырю и учителю вселенныя,/ преблаженне отче наш святителю Афанасие!/ К раце мощей твоих припадающе, усердно молим тя:/ приими от убогих душ наших любовию приносимая тебе моления/ и, яко имея дерзновение у Престола Владычня,/ испроси молитвами твоими чтущим тя/ со Ангелы и всеми святыми/ непрестанно Пресвятей Троице воспевати: аллилуйя.
Тропарь преподобного Нила Сорского
Удалився бегая Давидски мира,/ и вся яже в нем яко уметы вменив,/ и в месте безмолвне вселився,/ духовныя радости исполнился еси, отче наш Ниле:/ и Единому Богу изволив служити,/ процвел еси яко финикс,/ и яко лоза благоплодна умножил еси чада пустыни./ Темже благодарственно вопием:/ слава Укрепившему тя в подвизе пустынножительства,/ слава Избравшему тя в России отшельником уставоположника изрядна,/ слава молитвами твоими и нас Спасающем.
Ин тропарь преподобного Нила Сорского
Мирскаго жития отвергся/ и мятежа житейскаго бегая,/ преподобне и Богоносне отче наш Ниле,/ не обленился еси собрати цветы райския от писаний отеческих/ и, в пустыню вселився,/ процвел еси, яко крин сельныи,/ отонюду же прешел еси и в Небесныя обители;/ научи и нас, честно почитающих тя,/ твоим царским путем шествовати/ и молися о душах наших.
Кондак преподобного Нила Сорского
Любве ради Христовы удалився мирских смущений,/ радостною душею вселился еси в пустыни,/ в нейже подвизався добре,/ яко Ангел на земли, отче Ниле, пожил еси:/ бдением бо и постом тело свое изнурил еси вечныя ради жизни./ Еяже ныне сподобився,/ во свете неизреченныя радости Пресвятей Троице со святыми предстоя,/ моли, молимтися, припадающе, чада твоя,/ сохранитися нам от всякаго навета и злых обстояний/ видимых и невидимых враг/ и спастися душам нашим.
Ин кондак преподобного Нила Сорского
Терпя, потерпел еси суетныя обычаи/ и мирския нравы братии твоих,/ обрел еси пустынное безмолвие, преподобне отче,/ идеже постом, бдением и непрестанною молитвою в трудех подвизався,/ ученьми твоими правыя стези указал еси нам/ шествовати ко Господу./ Темже и почитаем тя, всеблаженне Ниле.
Тропарь преподобному Давиду Гареджийскому
Слез твоих теченьми пустыни безплодное возделал еси, и иже из глубины воздыханьми во сто трудов уплодоносил еси, и был еси светильник вселенней, сияя чудесы, Давиде отче наш, моли Христа Бога спастися душам нашим.
Иной тропарь преподобному Давиду Гареджийскому
Подвигов потом сраствореннаго потоками слез, ныне в молении предстоиши Господеви нашему, яко слезами сеял и радостию пожинаеши плоды, в пустыне возрожденные. О, Давиде, сияние мира и предстателю душ наших.
Кондак преподобному Давиду Гареджийскому
От сирийских источников возшел еси, звездо пресветлая, и пустыню Гареджийскую сиянием Духа озарил еси; яко пришествием своим иноческий рай соделал еси, произрастив в пустыне словесный вертоград. Сего ради не оставляй хранити его, Давиде возлюбленный.
Иной кондак преподобному Давиду Гареджийскому
От Междуречья взошел еси, звездо всесветлая, и прешел в пустыню Гареджи, и отонуду явлением твоим, яко рай, от насаждений святых прозябают насаждения словесныя , о нихже не престай молитеся, Давиде блаженне.
Тропарь преподобнаго Арсения Коневского
Божественною любовию возгоревся,/ мирская пристрастия от души отвергше,/ тесным путем постничества во след Христа/ невозвратным умом шествовал еси, Арсение всеблаженне,/ от Негоже и мзду трудов твоих на Небесех восприим,/ поминай нас, чтущих святую память твою и вопиющих:/ слава Давшему ти крепость,/ слава Венчавшему тя,/ слава Действующему тобою всем исцеления.
Ин тропарь преподобнаго Арсения Коневского
Духом Божиим наставляемый,/ возлюбил еси безмолвие,/ в немже евангельски подвизающуся,/ пречудный Афонский дар -/ Богоматере икона, даровася ти, всеблаженне,/ и, образ добродетелей быв стаду твоему,/ Арсение отче наш,/ к Горнему торжеству возшел еси,/ идеже со Ангелы ликовствуя,/ моли Христа Бога/ спастися душам нашим.
Кондак преподобнаго Арсения Коневского
Трисиятельнаго Божества сиянием просветив сердце твое, преподобне,/ световиден весь явился еси добродетельми,/ яко и Гору Афонскую свет трудолюбия твоего озари,/ идеже святую икону Солнца истиннаго,/ Христа, и Его Пречистыя Матере в дар приим,/ на остров Нева езера пришед,/ обитель устроил еси, всеблаженне./ Тем, верою и любовию к тебе притекающе, радостно вопием:/ радуйся, пресветлый светильниче, Арсение, отче наш.
Тропарь преподобного Моисея Угрина
Другаго тя Иосифа,/ великий чистоты и целомудрия рачителю,/ всечестне и равноангельне Моисее,/ священными песньми восхваляюще, грешнии,/ молимтися прилежно:/ моли Христа Бога,/ яко да исцелит вся наша страсти// и подаст велию милость.
Кондак преподобного Моисея Угрина
В Вышних единаго Бога ища,/ земная вся презрел еси,/ о телеси своем нерадив,/ на муки мужески себе вдал еси,/ глад, жажду, узы, в темнице затворяемь, доблественно претерпел еси,/ биения, крове излияние и удов отрезание,/ чистаго ради девства твоего,/ мужески понесл еси./ И ныне с девственными лики предстоя Пресветей Троице,/ от всех искушений моли избавитися вопиющим ти:/ радуйся, Моисее, отче блаженнейший.
Ин тропарь преподобного Моисея Угрина, Печерского, в Ближних пещерах
Труды и подвиги со страстьми по чистоте твоей видя, святе,/ кто не удивится?/ Глад бо, темницу и раны приемля,/ не поработился еси сластем ляховицы,/ но, яко царь, страстьми обладаяй,/ ныне и тогда воспрославился еси от Всевидящаго человеческая сердца,/ от Негоже во искушениих всем пособствовати благодать прием,/ пособствуй и нам, твою память чтущим,/ Моисее преподобне
Тропарь преподобному Гавриилу Афонскому
От су́етнаго и многомяте́жнаго ми́ра удали́вся, к немерца́ющему све́ту го́ры Афо́нския прите́кл еси́, чистото́ю и гове́нием, моли́твами и трудо́м просла́вил еси́ Бо́га, хра́мы правосла́вныя во сла́ву Трисвята́го и́мене Его́ воздви́гл еси́, преблаже́нне Гаврии́ле, мы́ же святы́х моще́й твои́х обре́тение пра́зднующе, с ве́рою и любо́вию взыва́ем: моли́ Христа́ Бо́га, да сотвори́т на́с победи́тели греха́ и хра́мы Ду́ха Свята́го.
Перевод: От суетного и беспокойного мира удалившись, ты пришел к немерцающему свету Афонской горы, чистотой и говением, молитвами и трудом прославил ты Бога, храмы православные во славу Трисвятого имени Его воздвиг, преблаженный Гавриил, мы же святых мощей твоих обретение празднуя, с верой и любовью взываем: «Моли Христа Бога, да сделает нас победителями греха и храмами Духа Святого».
Кондак преподобному Гавриилу Афонскому
Стяжа́л еси́ ду́х ми́рен в житии́ твое́м,/ пожи́л еси́ жела́нием Боже́ственным и любо́вию Го́спода твоего́,/ Гаврии́ле преблаже́нне,/ от Него́ же вене́ц прия́л еси́,/ и Христу́ со а́нгелы предстоя́,// моли́ спасти́ся на́м.
Перевод: Обрел ты дух мирный в жизни своей, прожил с устремлением к Божественному и любовью ко Господу твоему, Гавриил преблаженный, от Него же принял венец ты, и Христу с ангелами предстоя, молись о спасении нашем.
Тропарь священномученику Никите Славянину