Загрузка...

Календарь Молитвослов Библия

Акафисты - 23 мая 2025

Акафист блаженному Симону, Юрьевецкому чудотворцу

Кондак 1

Избранный чудотворче и изрядный угодниче Христов, града Юрьевца хранителю, о душах нашых усердный молитвенниче, Симоне блаженне, Христа ради юродивый, Юрьевецкий чудотворче! Восхваляем тя с любовию, изряднаго заступника и неустаннаго молитвенника нашего: ты же яко имеяй дерзновение ко Господу, паки и паки молися выну о спасении душ нашых и от всяких бед избавляй нас, зовущих ти:
Радуйся, блаженный и праведный Симоне, Христа ради юродивый, Юрьевецкий чудотворче.

Икос 1

Ангелов подражателю и человеков житием своим наставниче, блаженне Симоне, в глубину сердца своего чистая приял еси словеса Господа нашего Иисуса Христа: «Блажени нищии духом, яко тех есть Царствие Небесное; блажени кротции, яко тии наследят землю; блажени есте, егда поносят вам, и ижденут, и рекут всяк зол глагол на вы лжуще, Мене ради». Ты, святче Симоне, услышал еси и словеса святаго апостола Павла о юродстве Христа ради: «Кто из нас думает быти мудре в веце сем, той буди безумен». Ты, блаженне, свято и богоугодно пожил еси, неустанно подвизаяся в нищете, посте и молитве. Темже слышиши от нас благохваления таковая:
Радуйся, яко от утробы матерния предуготованный в чистое и непорочное жилище Духа Святаго.
Радуйся, града Юрьевца сокровище.
Радуйся, Богом Отцем предизбранный.
Радуйся, Богом Сыном искупленный.
Радуйся, Богом Духом Святым освященный.
Радуйся, Господа Бога паче всего возлюбивый.
Радуйся, отца и матерь свою ради Христа нашего оставивый.
Радуйся, зову Духа Благодати повинувыйся.
Радуйся, себе отвергийся ради Христа Иисуса, Крест Христов на себе вземый.
Радуйся, вслед Христа последовавый.
Радуйся, до конца жизни своея в терпении и подвизех неослабно пребывый.
Радуйся, яко претерпевая мужественно временная и настоящая мира сего, веселился еси будущими и вечными.
Радуйся, блаженный и праведный Симоне, Христа ради юродивый, Юрьевецкий чудотворче.

Кондак 2

Видя всевидящим оком Царь Небесный таковое твое богоугодное начинание и душеспасительное намерение, яко вся земная и благая мира сего за уметы вменил еси, преисполни тя, блаженне Симоне, Своея великия помощи божественныя, посла ти Духа Святаго, Егоже божественными лучами озарився славно подъял еси великий и тяжкий подвиг самоотвержения и юродства, непрестанно поя Богу: Аллилуиа.

Икос 2

Разум неразумеваемый мудрствующым плотская стяжал еси, все сердце свое внедрил еси, блаженне Симоне, в небесная. Сего ради вопием ти:
Радуйся, от юности навыкий богоугодному добронравию.
Радуйся, возлюбивый красоту Дома Божия и место селения славы Господни.
Радуйся, изволивый приметатися в Дому Божии паче, нежели жити в селениих грешничих.
Радуйся, в чисту жертву Богови не тело точию, но и душу всю свою принесый.
Радуйся, всего себе в служение Богу вдавый.
Радуйся, всего себе на служение Богу предавый.
Радуйся, яко заповеди Божия имел еси паче меда и сота души твоей.
Радуйся, блаженне, яко уподобился еси древу насажденному при исходищих вод, приносящему плоды благочестия и святости.
Радуйся, горькую жестокость вольнаго юродства паче всех сладких и мягких полюбил еси.
Радуйся, гласа апостольскаго верный послушателю.
Радуйся, яко рачением горним возгрелся еси.
Радуйся, яко святии очи Христа Бога нашего на тя милостивно призреша.
Радуйся, блаженный и праведный Симоне, Христа ради юродивый, Юрьевецкий чудотворче.

Кондак 3

Силою Духа Святаго сердце свое согревая, блаженне Симоне, возлюбил еси Отца нашего Небеснаго паче родителей своих, изшел еси из дома отеческаго в дебри лесныя, в пустынь дикую ради Господа Бога Иисуса Христа, нас ради обнищавшаго, да и мы нищетою Его обогатимся и неустанно, и велегласно вопием выну: Аллилуиа.

Икос 3

Имуще в себе сосуд избранный Святому Духу, блаженне Симоне, поревновал еси житию чистому и святости велией, подвигом мужественным древних Российских блаженных и Христа ради юродивых. Почитающе сие, вопием ти тако:
Радуйся, образе чистоты душевныя.
Радуйся, вельми подвиги своими плоть умертвивый.
Радуйся, кротости и смирению от самыя своея юности научивыйся.
Радуйся, холмы и долы Юрьевецкия исходил еси в зимнюю стужу и в зной летний босыма ногама, в ветсем рубищи, в дебрех же лесных питаяйся дикими плоды, сими дары божиими.
Радуйся, яко нищетою своею духовною посрамил еси богатства мира сего тленная.
Радуйся, посрамивый всю гордыню льстиваго диавола.
Радуйся, терпением убо паче естественным Христу подражаяй.
Радуйся, среде молвы некрадомо соблюдый к Богу добродетели своя.
Радуйся, яко в смирении твоем и немощех Христос прославися.
Радуйся, приявый от Подвигоположника Христа, Бога нашего, священный дар чудотворения.
Радуйся, многовременне болящыя во мгновение ока преславно исцелеваяй.
Радуйся, и очесем болезнующым здравие подаваяй.
Радуйся, блаженный и праведный Симоне, Христа ради юродивый, Юрьевецкий чудотворче.

Кондак 4

Бурю страстей победил еси, блаженне Симоне, своим велиим подвигом и нас научил еси неустанно пети Господу Богу нашему: Аллилуиа.

Икос 4

Слышавше, блаженне Симоне, ближнии и дальнии, яже о юродствующем житии твоем, удивляхуся и готови быша еще при жизни твоея прославити тя. Ты же, яко ищай славы Единаго Бога, бегал еси славы, яже от человек, скрывался еси в лесех темных и дремучих. Вся же на пользу строяй Бог прослави тя, вернаго раба своего, и призва тя во град Юрьевец, да сосуд с солию и светилник света не останется под спудом. Темже радующеся и благоговеюще, вопием ти сице:
Радуйся, яко соль еси, житие наше и веру нашу благостно осолеваяй.
Радуйся, возсиявый в о граде Юрьевце, яко звезда пресветлая.
Радуйся, яко в сем граде Христос в тебе преславно прославися.
Радуйся, яко пророк Божий Иеремиа о граде Иерусалиме, такожде и ты рыдаше над градом Юрьевцем, нещадным огнем пожираемом.
Радуйся, отонуду же повиновася ти огнь, запаливый град твой Юрьевец.
Радуйся, и ныне посещаяй град твой, почитающий тя любовию неусыпающей.
Радуйся, освятивый стопама твоима тропы древняго града Юрьевца.
Радуйся, входивый в домы юрьевецких людий, потомци коих живут в мире и благополучии под теми же кровлями, освященными твоим преславным пребыванием.
Радуйся, обильныя воды Волжския немокренно, яко по суху, чудодейственно преходил еси.
Радуйся, яко хотящая быти прозорливо предрекал еси.
Радуйся, прозревый погибель супружницы воеводы Юрьевецкаго, жестоко изгнавшаго тя из дому своего.
Радуйся, прославльшему тя тако Господу Богу.
Радуйся, блаженный и праведный Симоне, Христа ради юродивый, Юрьевецкий чудотворче.

Кондак 5

Боготечная звезда всему нашему краю Волжскому явился еси, блаженне Симоне, всем быв образ житием, беззлобием, духом, верою, душевною чистотою и святостию, научая всех нас сердечно вопити Господу Богу: Аллилуиа.

Икос 5

Видевше многия подвиги твоя и чудесы твоя преславная, блаженне Симоне, вопием ти сице:
Радуйся, многая исцеления верно чтущым тя многомилостивно подаваяй.
Радуйся, добрыми делы твоими всех чтущих тя подвизаяй к прославлению Отца, Иже есть на Небесех.
Радуйся, твердый столпе подвижничества.
Радуйся, яко младенцев приведый многих из чтущих тя к вечному спасению.
Радуйся, подвижничества, юродства, жажды и алчбы, и наготы образе предивный.
Радуйся, благое иго и бремя легкое Креста Христова от млада возлюбивый.
Радуйся, на земли ангельски поживый.
Радуйся, земный ангеле и небесный человече.
Радуйся, кротостию и благостию победивый сердца многих.
Радуйся, злобу людий на милость преложивый.
Радуйся, благочестивыя люди в любве к Богу укрепивый.
Радуйся, многия люди от тяжких напастей и скорбей, и болезней избавивый.
Радуйся, блаженный и праведный Симоне, Христа ради юродивый, Юрьевецкий чудотворче.

Кондак 6

Проповедуемо и попремногу похваляемо бысть имя твое, блаженне Симоне, житие бо твое, яко звезда возсия пред Богом и всеми человеки, наученными тобою пети Господу. Прославльшему тя: Аллилуиа.

Икос 6

Возсия, яко свет неугасимый, подвиги своими тяжкими и преславными, блаженне Симоне, темже восхваляюще тя, вопием ти сице:
Радуйся, яко единою умерый мирови не о себе токмо, но и о ближних печалился еси.
Радуйся, яко научил еси люди, зряще подвиги твоя, возложити всю надежду свою в мире сем тленном на единаго нетленнаго Бога Отца Вседержителя и Отца нашего Небеснаго.
Радуйся, яко ты в пути нашем земнем и грешнем учитель, образ и пример служения Богу безкорыстием и самоотвержением явился еси.
Радуйся, яко подвиги своими укрепляеши люди твоя в терпении и нестяжании.
Радуйся, яко от юности своея навыкий пощению и нас научаеши воздержанию в питии и пище.
Радуйся, яко светильник явился еси горяй и светяй верным сыном Церкве Христовы.
Радуйся, яко маслина, в Дому Божии насажденная.
Радуйся, удостоенный стояти у Престола Господа Сил в едином лице со блаженными и праведными Всероссийскими Василием, Максимом и Иоанном Московскими, Николой блаженным, Иеремиею и Матфеем прозорливыми, Тихоном Лухским и Макарием Унженским.
Радуйся, животворную росу благодати Божия в сердцах наших одождеваяй.
Радуйся, благая прошения наша скоро исполняяй.
Радуйся, скоро врачуяй недугующих, с верою просящих у тебе исцеления.
Радуйся, скорый услышателю нас, тя на помощь призывающих.
Радуйся, блаженный и праведный Симоне, Христа ради юродивый, Юрьевецкий чудотворче.

Кондак 7

Хотяй диавол, сей всезлобный враг спасения кияждо души человеческия, доброму и святому житию твоему помешати, блаженне Симоне, часто насылал на тя злобныя люди, побивавшыя тя и ругавшыяся над тобою. Ты же странника и пришельца в мире сем временнем помышляя себе быти, от самых юных лет возлюбил еси подвиги богоугодныя. И всельшийся в чистое сердце твое Дух Святый научи тя, чрез тебе и нас же пети Богу и Творцу нашему: Аллилуиа.

Икос 7

Дивный о нас молитвенниче, заповеди Господни сохранивый и в велиих добродетелех преуспевый, ты, блаженне Симоне, был еси еще во плоти подражатель сил безплотных жития своего чистотою и святостию. Темже и мы со благоговением приносим ти благохваления таковая:
Радуйся, терпеливый душею и разумом целомудренный.
Радуйся, велий тружениче, скоро всем еще при жизни своей помогаяй.
Радуйся, все свое тщание, желание и попечение вложил еси не в заботу о себе, а во всяческия услуги своим согражданом.
Радуйся, и по отходе своем нас молитвенною помощию не оставляяй.
Радуйся, глубочайший кладезю драгоценнейшаго смирения.
Радуйся, чистоту души своея в велием подвизе соблюдый.
Радуйся, яко не имеяй где главу подклонити, пространныя обители в райских селениих обрел еси.
Радуйся, в алчбе и жажде всю свою земную жизнь проведый и обретый безконечное насышение в лицезрении Божием.
Радуйся, сосуде Духа Святаго избранный.
Радуйся, яко тебе молитвенное бдение бысть сон, и слезы о людех бысть сердечное упокоение.
Радуйся, яко Юрьевецкий Богоявленский монастырь избрал еси излюбленнейшим местом своея благодатныя молитвы.
Радуйся, яко от самыя юности своея распялся еси Господу, нас ради Распятому на Кресте Животворящем.
Радуйся, блаженный и праведный Симоне, Христа ради юродивый, Юрьевецкий чудотворче.

Кондак 8

Странное житие твое, блаженне Симоне, видяще, устранимся и мы суетнаго мира. Ты же со всеми небожители ныне сликовствуеши у Престола Божия. Там же пребывая, сподоби и нас неустанно пети Господу Богу: Аллилуиа.

Икос 8

Все житие твое Богу посвятил еси, блаженне Симоне, и тем обрел еси Царство Небесное. Дивящеся великим подвигом твоим, приносим ти похвалы сия:
Радуйся, яко Господа Иисуса Христа всем сердцем своим возлюбил еси.
Радуйся, яко душу свою молитвенным бдением о людех одождил и оживил еси.
Радуйся, яко тебе земля бысть ложе мягкое, и рубище бысть желанная одежда.
Радуйся, яко не гневатися на ближняго своего нас научаеши.
Радуйся, горняго Иерусалима сыне пречистый и праведный.
Радуйся, благую нищету познавый и ныне на велием ложи Авраамли почиваяй.
Радуйся, кротостию своею и смирением своим злобу людскую побеждаяй.
Радуйся, незлобивый в несправедливых обидах.
Радуйся, язвы Христовы на себе носивый.
Радуйся, подвижниче неленостный.
Радуйся, молитвенниче о нас усердный.
Радуйся, добродетельным житием душу свою просветивый и тем нас научивый.
Радуйся, блаженный и праведный Симоне, Христа ради юродивый, Юрьевецкий чудотворче.

Кондак 9

Всякое естество человеческое, блаженне Симоне, дивяся неземным твоим подвигом, пение хвалебное приносим ти, да испросиши нам у Престола Божия оставление грехов наших тяжких. Да скончаем мы в покаянии и добром исправлении временное житие сие наше. Да сподобимся молитвами твоими нескончаемо пети Господу Богу и Творцу нашему: Аллилуиа.

Икос 9

Витии сладкозвучныя не возмогут по достоянию восхвалити подвиги твоя, блаженне Симоне. Тем паче мы, убозии словом и немощнии разумом, недоумеем киими похвальными песнми восхвалити тя. Подвизаемии же горячею любовию к тебе, дерзаем венчати тя сими слабосильными похвалами:
Радуйся, яко из детства и юности своея в подвижническое служение Господу Богу предназначен был еси свыше.
Радуйся, божественными лучами Духа Святаго озаренный.
Радуйся, тем укрепленный, благодатныя исцеления нам источаяй.
Радуйся, по трудех и подвизех земных сладце на лоне праведных опочивый.
Радуйся, в Бозе упокоение блаженное обретый.
Радуйся, бисере драгоценный, сохраняемый в небесней сокровищнице Христовой.
Радуйся, от горних высот к нам земнородным милостивно приникаяй.
Радуйся, верный рабе Божественнаго Домовладыки.
Радуйся, искушения бесовския и скорби людския мужески терпевый.
Радуйся, заповеди Христовы яко свет стезям твоим имевый.
Радуйся, всем земным и временным пренебрегий и все свое упование на Творца нашего и Бога Вечнаго возложивый.
Радуйся, в уповании своем святем от Отца Небеснаго не посрамленный.
Радуйся, блаженный и праведный Симоне, Христа ради юродивый, Юрьевецкий чудотворче.

Кондак 10

Спасти хотя многия, блаженне Симоне, явился еси образ любве к Богу, образ молитвы, смирения и терпения. Аще и по премногу грешнии есмы мы, веруем же несумненно, яко много может молитва твоя пред Богом о спасении душ наших, да и мы воспеваем в горнем мире Всеславному Богу нашему во Святей Троице славимому сладкозвучное и ангельское: Аллилуиа.

Икос 10

Стена еси всем похваляющым тя, блаженне Симоне, Царя Небеснаго и Бога нашего верный рабе и угодниче. Покажи на нас молитв твоих благодатное действо, не лиши нас небеснаго твоего заступления в жизни нашей земной, в час кончины нашея и по кончине нашей да зовем ти всехвалебно:
Радуйся, града нашего неусыпный молитвенниче и защитителю.
Радуйся, яко болящым и тебе молящымся юлагодатию Святаго Духа исцеления источаеши и здравие даруеши.
Радуйся, яко красная мира сего презрел еси, и обрел еси небесное злато.
Радуйся, телесныя страсти огнем воздержания попаливый.
Радуйся, нищеты и нестяжания любителю.
Радуйся, яко святая пшеница божественнаго гумна Христова в житницы небесныя от самаго своего рождения предопределен был еси.
Радуйся, яко суеты мирския избегл еси и соблюл еси в чистоте душу свою.
Радуйся, нижняя земная презревый и всею душею своею прилепивыйся вышнему небесному.
Радуйся, яко душа твоя богобоязненная и смиренная Престолу Божию предстоит.
Радуйся, яко тебе земному страдальцу райский покой даровался еси.
Радуйся, яко тебе, не имущему где главы подклонити, уготовася небесное жилище.
Радуйся, яко за скитания твоя в юродстве проводимая, венец от Господа получил еси.
Радуйся, блаженный и праведный Симоне, Христа ради юродивый, Юрьевецкий чудотворче.

Кондак 11

Пение всеумиленное приносим ти, блаженне Симоне, яко во светлостех святых водворився, сладце поеши Христу Богу нашему: Аллилуиа.

Икос 11

Светлая чудеса восхваляюще, восхваляем и славныя подвиги твоя блаженне Симоне. Тако устроися Божиим изволением, и якоже обыкл еси, в преподобии и правде дни и нощи работал еси Богови. Мы же прославляюще прославльшагося в тебе Господа, вопием ти сице:
Радуйся, собою явивый, яко честна пред Господем смерть преподобных Его.
Радуйся, якоже древний Лазарь в лютых ранах в недра Авраамля преселился еси.
Радуйся, в славных недрех Авраамлих и ныне утешаяйся.
Радуйся, по кончине своей собравый ко святей гробнице своей великое множество православных людей.
Радуйся, яко в торжественнем и великолепнем погребении твоем возимели прияти участие множество духовенства и тысящи граждан града Юрьевца, такожде окрестных градов и весей.
Радуйся, яко благодарнии людие сретоша, и умиленне сопровождаху гроб твой честный.
Радуйся, яко вси людие Юрьевецкии прияша тя любезне, яко велия праведника Божия.
Радуйся, абие по преставлении твоем новыя потоки чудес явивый.
Радуйся, и чрез веки приносяй людем велий дар исцелений.
Радуйся, яко путем узким право по земли шествовал еси, и тем путем Рая Божественнаго достигл еси.
Радуйся, яко убогий и многими поругаемый во одежды святости оболкийся.
Радуйся, днесь множество верных собираяй ко святым образом твоим.
Радуйся, блаженный и праведный Симоне, Христа ради юродивый, Юрьевецкий чудотворче.

Кондак 12

Благодать, юже даде ти Господь, блаженне Симоне, днесь собра нас, да почтим елико возможем святую память твою. Образом святаго и богоугоднаго жития своего и нас к богоугодному и чистому житию зовеши, и научаеши нас пети Господу Богу ангельскую песнь: Аллилуиа.

Икос 12

Поюще чудеса твоя, блаженне Симоне, восхваляем подвиги и труды твоя во славу Божию творимыя, ублажаем святую кончину твою, почитаем заступление твое о нас пред Престолом Божиим. Величаем Великаго Подателя всех благ земных и небесных Господа Бога, даровавшаго нам толикое множество славных и дивных подвижников Христовых, и со умилением зовем ти:
Радуйся, терпением и незлобием своим вельми угодил еси Распятому на Кресте Господу Иисусу.
Радуйся, яко подвигами воздержания и повседневным безстрастием своим юдагодатию Божией обогатился еси.
Радуйся, верный Христов угодниче.
Радуйся, яко тму тмущую коварных бесов от себе отгнал еси.
Радуйся, в добродетелех благоискусный.
Радуйся, яко на плещу святых добродетелей равноангельских в горняя подъят был еси.
Радуйся, яко бесом нечистым чистотою своея души страшен был еси, ангелом же собеседник явился еси и с ними ко Престолу Троицы Святыя воспарил еси.
Радуйся, рая Иисусова крине неувядаемый.
Радуйся, яко велиим смирением своим попрал еси бесы гнева и гордости.
Радуйся, терпением удары и посмеяния людей неразумных яко общежитие с ангельскими силами обрел еси.
Радуйся, любящих и чтущих тя присное радование.
Радуйся, во благоухании святости своей в богоспасаемом граде Юрьевце телом своим почиваяй.
Радуйся, блаженный и праведный Симоне, Христа ради юродивый, Юрьевецкий чудотворче.

Кондак 13

О предивный и пречудный, блаженный и праведный, Христа ради юродивый Симоне, Юрьевецкий чудотворче! Приими сие малое молитвенное приношение наше, и стоя во святей чистоте своей у Престола Божия, умоли Господа Вседержителя, да ниспослет Той нам мир и здравие, и во всем благое поспешение. Да прославится имя Его, во святых своих Дивнаго, всегда, ныне и присно и во веки веков. Аминь.

Этот кондак читается трижды, затем икос 1-й и кондак 1-й

Молитва блаженному Симону, Юрьевецкому чудотворцу

Молитва твоя несумненно многомощна у Престола Божия, сего ради и прибегаем к тебе, помощнику и заступнику нашему, блаженный и праведный симоне, Христа ради юродивый, Юрьевецкий чудотворче! Молим тя, молися о нас Господу Богу: да избавит Он народ свой от всяких бед и зол. Да послет нам Вседержитель мир и благоденствие, здравие и изобилие плодов земных. Да поможет нам твоими святыми молитвами, искоренити из сердец наших богопротивную гордость и самомнение. Да вселит Он в сердца наша любовь к Нему и к людем, дух целомудрия, смирения, терпения и кротости. Молися за нас грешных, да сотрет Господь Бог страшное рукописание грех наших безмерных, да сподобит Он нас в безконечной вечности пети Ему: Аллилуиа. Предстоя Святому Престолу Божию, молися Отцу нашему Небесному, да угасит Он горящую пещь огненных страстей наших. Ты прославился еси чудесы твоими! Темже молим тя: исцели и наша недуги телесныя и душевныя, да здрави воспоем и восхвалим прославльшаго тя Господа Иисуса во веки веков. Аминь.

Акафист святому славному и всехвальному апостолу Христову Симону Зилоту, иже и Кананит именуется

Кондак 1

Избранный апостоле Христов и благовестниче, мрежею проповеди твоея уловивый во спасение многия души человеческия и ко Христу приведый идолослужением помраченныя люди, Симоне блаженне, в песнех восхваляем тя с любовию и молим ти ся прилежно: яко имеяй дерзновение ко Господу, молися Ему выну за ны грешныя и молитвами твоими от всяких нас бед свобождай, да зовем ти: Радуйся, Симоне, апостоле Христов и молитвенниче о душах наших.

Икос 1

Ангелов Творец и Владыка, Христос Бог, спасти хотя падшее человечество, в плоть нашу облечеся и с человеки поживе, в Кану же Галилейскую на брак в дом твой прииде, Симоне прехвальне, вкупе с Пречистою Своею Материю, Девою Богородицею, Еяже умолением Матерним начаток чудес Своих в доме твоем яви, воду в вино на браце твоем чудесно претворив и сим показав Божества Своего силу. Темже тебе, сице облагодатствованному посещением и благоволением Богочеловека, яко Боговидцу и ученику Его избранному, со умилением сице вопием: Радуйся, женише прекрасный, от брака земнаго на брак Агнчий чудесно призванный; Радуйся, на небеси и на земли прославленный. Радуйся, воплощшемуся Богу Слову верно послуживый; Радуйся, в проповедании Евангелия правды ревность велию явивый. Радуйся, Пресладкаго Господа Иисуса всем сердцем твоим возлюбивый; Радуйся, обручницу земную оставивый и во след Его потекий. Радуйся, Симоне, апостоле Христов и молитвенниче о душах наших.

Кондак 2

Видев чудеса Христовы, Симоне преславне, верно последовал еси во плоти явльшемуся Богу, от Негоже возлюблен был еси и к лику избранных дванадесяти апостол Его сопричтен был еси, якоже ревнитель славы Его, наименование новое Зилота, си есть ревнителя, получил еси. Сию ревность о славе Божией испроси и нам, учениче Спасов, да купно с тобою сподобимся пети Христу: Аллилуиа.

Икос 2

Разум небесный тебе свыше дадеся, Симоне богомудре, темже внимая Божественным словесем Христа Бога, слагал еси я в сердце твое, и, яко земля добрая, плод сторичен принесл еси Ему учения Евангельскаго благодать, еюже озарил еси во спасение мира концы и, яко богопроповедник душеспасительный, слышиши от нас песни таковыя: Радуйся, иго Христово, благое и легкое, на рамо твое восприемый; Радуйся, примером твоим святым вся ны к последованию Христову привлекаяй. Радуйся, ревности тезоименитый ревнителю о славе Божией; Радуйся, теплейший любителю Господа Иисуса. Радуйся, дивный наставниче к Нему ищущих спасения; Радуйся, немолчный благовестниче Евангельскаго душеспасительнаго учения. Радуйся, Симоне, апостоле Христов и молитвенниче о душах наших.

Кондак 3

Сила Божия осени тя, апостоле Христов Симоне, егда во след ходил еси Христа Господа, обходя с Ним Иудею и Галилею, внимая учению Его Божественному и созерцая превелия Его чудеса. Темже и Христос, яко верному Своему последователю и ученику, дарова ти власть и силу недуги исцеляти, болезни врачевати и духи нечистыя прогоняти, да вси славят силу Его, в тебе явленную, и поют Ему хвалебную песнь: Аллилуиа.

Икос 3

Имел еси едино попечение, Симоне всеблаженне, еже верно служити и благоугождати Христу Богу, во плоти явльшуся на спасение человеческое, Егоже спутник и самовидец сподобился еси быти и от уст Его Божественных почерпнул еси превелию учения небеснаго благодать, о нейже дивящеся, сице тебе глаголем: Радуйся, всерадостный нам проповедниче Евангелия правды; Радуйся, деннице, возвестившая нам солнце невечернее. Радуйся, самовидче и слуго воплощеннаго Бога; Радуйся, странствия Владычня и безсмертныя Его трапезы сопричастниче. Радуйся, избранный и верный Христов учениче; Радуйся, друже Его присный, до конца дружество твое к Нему сохранивый. Радуйся, Симоне, апостоле Христов и молитвенниче о душах наших.

Кондак 4

Буря ярости иудейския пригвозди ко Кресту Христа Бога, волею пострадати за вся люди изволившего, но не поколеба веры и упования твоего, Симоне блаженне, яко Той есть Спаситель мира, древле прореченный пророки во искушение падшаго человечества. Темже, яко Владыце и Богу, верно воспевал еси Ему хвалебную песнь: Аллилуиа.

Икос 4

Слышав Божественный глас Христа жизнодавца, тридневно воскресшаго от мертвых и дверем затворенным вшедшаго ко учеником Своим, и “Мир вам!” рекшаго, Симоне богоносне, зело возрадовался еси и Тому, яко Богу, благоговейно поклонился еси, всем же потом возвещал еси немолчно непреложную истину Его воскресения. О сем и мы хвалебно тебе зовем: Радуйся, мир Христов достойно приемый в непорочный сосуд души твоея; Радуйся, миром тем мира концы умиротворивый благодатно. Радуйся, древния вражды идолослужительныя потребителю; Радуйся, истины воскресения Христова очевидный и громогласный свидетелю. Радуйся, дверем затворенным дивно прошедшаго Христа созерцателю; Радуйся, пребожественнаго и радостотворнаго гласа Его слышателю. Радуйся, Симоне, апостоле Христов и молитвенниче о душах наших.

Кондак 5

Боготечное на небо вознесение Христово видев и Духа Святаго, от Него ниспосланнаго во огненных языцех, сопричастник быв, Симоне прехвальне, духоносец божественный соделался еси и, облеченный силою свыше, потекл еси на проповедь Евангельскую во Иудею, Сирию, Египет, Мавританию, Испанию, Британию, Персиду, Иверию и Армению, возвещая людем, во мраце неверия бывшим, свет Христа Бога спасительный и веру в Него правую и всех приводя звати Ему: Аллилуиа.

Икос 5

Видевши тя, апостоле Христов, Пречистая Богородица, от дальных стран на облаце приспевшаго ко пречестному Ея успению, возрадовася радостию святою и сподоби тя Своея беседы и благословения предсмертнаго; ты же о коликия радости исполнился еси, созерцая Сына Ея и Бога, со святыми Ангелы к Ней пришедшаго и святую душу Ея в руце Свои приемшаго. Сию радость твою и мы, благоговейно воспоминающе, от любве усердныя возглашаем ти сия всерадостныя глаголы: Радуйся, небошественный учениче Спасов, на погребение Матере Господни на облаце чудесно принесенный; Радуйся, Христа, в руце Свои душу Матере Своея приемшаго, созерцавый. Радуйся, погребению Пречистыя Богоматере достойно послуживый; Радуйся, вознесенную с телом горе Богородицу уразумевый. Радуйся, погребальныя пелены и праздный гроб Ея в Гефсимании видевый; Радуйся, в видении светозарнем со святыми Ангелы пришедшую Владычицу мира зрети сподобивыйся. Радуйся, Симоне, апостоле Христов и молитвенниче о душах наших.

Кондак 6

Проповедник богоглаголивый явился еси, апостоле Христов Симоне, в странах диких и людем зверонравным возвещал еси Евангелие Христово, кротостию и незлобием твоим препобеждая тех лютость и из волков дивиих претворяя их в агнцы Христовы, иже и научишася тобою пети Триединому Богу ангельскую песнь: Аллилуиа.

Икос 6

Возсиял еси, учениче Спасов, яко светильник лучезарный, в странах неверных и, яко боготечное светило, обтекл еси восток и запад, возвещая людем спасительную веру во Христа Иисуса, Иже внушает нам благохвалити тя, богопроповедника божественного, похвалами сими: Радуйся, от востока востекий и запад просветивый светом Христовым; Радуйся, Африку и Испанию огласивый учением Евангельским. Радуйся, бритян суровость укротивый кротостию Иисусовою; Радуйся, Армению и Иверию приведый к познанию Сына Божия. Радуйся, персов и мидов убедивый веровати во Христа Бога; Радуйся, неутомимо трудивыйся во благовестии Христове. Радуйся, Симоне, апостоле Христов и молитвенниче о душах наших.

Кондак 7

Хотение усердное имел еси, апостоле Христов, еже мученически пострадати за имя Христово и кровию твоею запечатлети божественную истину проповеди твоея Евангельския, еже Господь устрояя, приведе тя во Иверии от неверных Лазов на кресте распяту быти и мученически скончатися. Таковую страдальческую Христоподобную кончину твою воспоминающе, почитаем болезни и труды твоя и поем Богу: Аллилуиа.

Икос 7

Новаго Ноя, начальника ковчега душеспасительнаго веры Христовы во Иверии, познаем тя быти, Симоне Богоглаголиве, и яко основателя и краеугольнаго камня церкве Иверския тя почитаем, место же погребения твоего с любовию чтим, яко освященное кровию твоею и мощей твоих почиванием, от негоже дары целебныя источаеши верным и привлекаеши звати тебе: Радуйся, Иверии хранителю неотступный; Радуйся, Пицунды покровителю, Богом данный. Радуйся, храм твой в пустыни чудесно сохранивый от конечнаго разрушения; Радуйся, гроб твой честный нам даровавый во утешение. Радуйся, место подвигов твоих и страданий обновивый обителию иноческою во имя твое; Радуйся, от святаго Афона подвижники поста и молитвы в ню преселивый предивно. Радуйся, Симоне, апостоле Христов и молитвенниче о душах наших.

Кондак 8

Странствие земное совершив, апостоле Спасов, преселился еси от земли к обителем небесным, на земли же чудес лучами сияеши и просвещавши души верных, иже по Бозе молитвенно к тебе прибегают и почитают святую твою память, юже и мы благоговейно чтуще, поем прославльшему тя Богу песнь: Аллилуиа.

Икос 8

Вся церковь Иверская почитает тя, апостоле Симоне, яко основателя своего и покровителя, наздавшаго ю на основании незыблемом веры Христовы и оросившаго ю к плодоносию духовному честною твоею кровию, от неяже дивно прозябоша в ней сонмы святых, торжествующих ныне вкупе с тобою на небе. Темже и мы на земли блажим твоя подвиги и сице тебе зовем: Радуйся, благий и милостивый утешителю скорбящих; Радуйся, скоропредстательный помощниче бедствующих. Радуйся, велие дерзновение стяжавый ко Христу Богу, яко друг Его искренний; Радуйся, приемый от Него власть на духи нечистыя. Радуйся, обители твоея святыя славо и похвало; Радуйся, подвизающимся в ней ходатаю вечнаго спасения. Радуйся, Симоне, апостоле Христов и молитвенниче о душах наших.

Кондак 9

Всему миру судити имаши, апостоле Спасов, седяй на престоле высоце и превознесенне, егда Христос Господь со славою приидет сотворити суд Свой праведный; тогда, свято, умоли Его благость помиловати нас и не осудити в погибель вечную, но сподобити со святыми пети Ему: Аллилуиа.

Икос 9

Витийство человеческое не довлеет к достойному прославлению твоих подвигов и чудес, Симоне прехвальне, обаче приими, учениче Спасов, благоутробно и милостиво сия малыя наша и нехитростныя песни, в похвалу тебе приносимыя с верою и любовию, и услыши вопиющих ти сице: Радуйся, от востока и до запада хвалимый и славимый; Радуйся, Иверскую страну кончиною твоею освятивый. Радуйся, яко лозу благоплодную, в ней Нину равноапостольную духовно возрастивый; Радуйся, сонмы святых от недр ея Христу плодопринесый. Радуйся, горы и удолия ея подвижниками благочестия прославивый; Радуйся, яко отец со чады, со святыми Иверскими в обителех райских торжествуяй. Радуйся, Симоне, апостоле Христов и молитвенниче о душах наших.

Кондак 10

Спасения залог, святую православную веру, унаследовахом от тебе, апостоле Христов Симоне. Темже молим тя: от всяких ересей и расколов соблюди нас, чад твоих, молитвенным предстательством твоим к Богу и помози нам в православии непоколебимом пребыти до конца дней наших и верно пети Богу: Аллилуиа.

Икос 10

Царя Небеснаго Христа избранный учениче, Симоне блаженне, помолися Ему за ны грешныя, да ревность твоя боголюбезная о хранении закона Его даруется и нам недостойным, во еже быти нам готовыми на подвиги доброделания христианского и на исповедание православныя нашея веры не словесы токмо, но и делы, и явитися чадами твоими не по имени токмо, но самою истиною. О сем тя молим и зовем: Радуйся, звездо пресветлая, всех путеводящая к солнцу правды Христову; Радуйся, свеще неугасимая, в молитвах присногорящая у Престола Господа славы. Радуйся, столпе непоколебимый святыя Христовы Церкве; Радуйся, фиале златый, изливаяй струи нам целебныя. Радуйся, приемый от Христа власть вязати и решити; Радуйся, получивый от Него благодатныя дары Духа Святаго. Радуйся, Симоне, апостоле Христов и молитвенниче о душах наших.

Кондак 11

Пение Пресвятей Троице горе приносиши ее всеми святыми, Симоне прехвальне, и от небесных высот отечески приникаеши на место подвигов и страданий твоих на земли, молитвами твоими помогая всем, верно чтущим святую память твою и поющим о тебе песнь Богу: Аллилуиа.

Икос 11

Светоподательный светильнике Трисолнечнаго Света являешися верным, апостоле Христов Симоне, и всех нас невидимо озаряеши на пути доброделания христианскаго, да не падем в сеть врага, диавола, но невредимы пребудем от всех его ловлений лукавых и тако неосужденно возможем вопити тебе: Радуйся, пастырю добрый словеснаго стада Христова; Радуйся, не попускаяй волку душегубительному расхитити духовную паству твою. Радуйся, мрежею проповеди твоея мира концы уловивый во спасение; Радуйся, и ныне способствуяй нашему спасению молитвами твоими. Радуйся, архитектоне премудрый Церкве Христовы; Радуйся, каменю краеугольный ея основания. Радуйся, Симоне, апостоле Христов и молитвенниче о душах наших.

Кондак 12

Благодать и милость испроси нам у Господа, Симоне богоносне, апостоле Спасов, яко стяжавый велие к Нему дерзновение, наипаче проси нам у Него покаяния во гресех и исправления жития нашего, да будет оно преисполнено добродетелей христианских, во еже возмощи нам еще на земли достойно пети Создателю нашему небесную песнь: Аллилуиа.

Икос 12

Поюще болезни и труды твоя, апостоле Спасов, имиже трудился еси во благовестии Христово, почитаем святую и приснославную память твою, яже облагоухает нас духовно и услаждает души наша: миро бо воистину явишася пред Богом поты твоя и капли крове страдальческия, за Христа излиянныя тобою, святый наш предстателю. Темже и зовем тебе: Радуйся, Пресвятыя Живоначальныя Троицы верный проповедниче; Радуйся, ангельских ликов достойный собеседниче. Радуйся, апостолов красото и основание; Радуйся, человеческаго рода возвышение. Радуйся, врачу безмездный недугов душевных и телесных; Радуйся, по Бозе и Пресвятей Богородице непостыдное наше упование. Радуйся, Симоне, апостоле Христов и молитвенниче о душах наших.

Кондак 13

О святый, славный и всехвальный апостоле Христов Симоне, ревнителю закона Божия и многомощный наш предстателю! Приими малое сие молебное пение, в похвалу тебе приносимое, и умоли Спаса Христа избавити нас муки вечныя и сподобити радости святых, да с ними поем Ему во веки: Аллилуиа.

(Этот кондак читается трижды, затем икос 1 и кондак 1)

 

Молитва святому славному и всехвальному апостолу Христову Симону Зилоту, иже и Кананит именуется

Святый славный и всехвальный апостоле Христов Симоне, сподобивыйся прияти в дом твой в Кане Галилейстей Господа нашего Иисуса Христа и Его Пречистую Матерь, Владычицу нашу Богородицу, и очевидцем быти преславнаго чудесе Христова, на браце твоем явленнаго, претворения воды в вино! Молим тя с верою и любовию: умоли Христа Господа претворити души наша из грехолюбивых в боголюбивыя; сохрани и соблюди нас молитвами твоими от искушений диавольских и падений греховных, и испроси нам свыше помощь во время уныния и беспомощия нашего; да не преткнемся о камень соблазна, но неуклонно шествуем спасительным путем заповедей Христовых, дондеже достигнем оных блаженных обителей райских, идеже ты ныне водворяешися и веселишися. Ей, апостоле Спасов! Не посрами нас, крепце на тя уповающих, но буди вам помощник и покровитель во всем житии нашем и помози нам благочестно и богоугодно житие сие временное скончати, благую и мирную христианскую кончину получити и добраго ответа сподобитися на Страшнем Суде Христове; да избежавше мытарств воздушных и власти лютаго миродержца, унаследуем Царство Небесное и прославим великолепное имя Отца и Сына и Святаго Духа, во веки веков. Аминь.

Акафист святителю Симону Печерскому, епископу Владимирскому и Суздальскому, чудотворцу

Кондак 1

Возбранный и преславный защитниче наш от враг спасения нашего видимых и невидимых, святителю отче Симоне всеблаженне, почитаще честныя и многоцелебныя мощи твоя, яко многоценный залог неусыпнаго предстательства твоего о нас ко Господу, со умилением благодарственно зовем ти: Радуйся, отче Симоне, прилежный о нас к Богу молитвенниче.

Икос 1

Ангел Господа Вседержителя воистинну, по слову пророчу, достоин еси нарицатися святителю отче Симоне: ангельски бо жительствуя на земли, ангельское служение совершал еси в людех, равноангельно подвизаяся за хотящих наследовати спасение вечное; егоже и мы недостойнии предстательством твоим сподобитися уповающе, со умилением восписуем ти таковая: Радуйся, в служении твоем спасению ближних, ангелов дивный подражателю; радуйся, в ревности твоей о славе имене Божия преславный пророков последователю. Радуйся, в подвизех благовествования Христова истинный апостолов преемниче; радуйся, в трудех архипастырства равночестный преславным святителем сопрестольниче. Радуйся, строителю дома Божия верный и воистинну мудрый; радуйся, изъяснителю велений Господних неленостный и воистинну учительный. Радуйся, священнотаинниче, освященный Богом в приношение жертвы Ему благоприятныя; радуйся, праведниче, егоже молитва много может пред Господем поспешествуема. Радуйся, отче Симоне, прилежный о нас к Богу молитвенниче.

Кондак 2

Видя и слыша от иных самовидцев равноангельная жития преподобных отец Печерския Лавры, потщался еси, богомудре отче, не точию добре запечатлети я на cкpижaлex сердца твоего, но и писанием достоверно известити я родом последнейшим, да выну взирающе на скончание жительства угодников Божиих, и подражающе вере их, благочестно воспевают дивному во святых Своих Господу: Аллилуиа.

Икос 2

Разум спасения вечнаго, данною ти свыше премудростию, просвещал еси всем приближающимся к тебе, и закону Господню от уст твоих поучахуся мнози, хотящии благочестно жити; сотвори убо предстательством твоим, святче Божий, да поне и наша страстьми омраченныя смыслы благодатно просветятся, во еже добре искушати нам, что есть воля Божия благая и угодная и совершенная; да во всех заповедех и оправданиих Господних ходяще безпорочно, доволни будем и иных на истинный путь спасения наставити. Сего ради ублажаем тя: Радуйся, священноучителю, воистинну уста Божия имущий; радуйся, богомудрый наставниче, изводяй честное от недостойнаго. Радуйся, делателю непостыдный, яко во спасение ближних твоих благоплодно потрудился еси; радуйся, благий и верный рабе, яко Господу господствующих воистинну добре послужил еси. Радуйся, отче богомудре, написавый в научение наше словеса премудра; радуйся, яко теми и по отшествии твоем нас уча не престаеши. Радуйся, яко со угодники Печерскими, ихже жития написал еси, во обителех небесных водворяешися; радуйся, яко ходатайствуеши ко Господу, да и мы с ними в книги животныя напишемся. Радуйся, отче Симоне, прилежный о нас к Богу молитвенниче.

Кондак 3

Силою благодатною свыше осенен, на брань противу сил преисподних укрепился еси, постом же и молитвою вся наветы их и коварства до конца отразил еси; темже, всеблаженне, не престай моляся ко Господу и о нашем укреплении в брань ко врагом спасения нашего, да победивше вся козни их, благодарственно вопием о тебе Богу: Аллилуиа.

Икос 3

Имея от Господа обилие дарований духовных, возсиял еси, богомудре отче, от безмолвия пещернаго в далечайшия страны светом добродетелей твоих, и мнози желаху тя в предводителя и наставника себе имети; темже и избран был еси во игумена обители иноческия, яже во граде Владимире, да просветится свет твой в просвещение множайших. Сего ради величаем тя: Радуйся, святыя Печерския Лавры благоплодное насаждение; радуйся, обители Пресвятыя Богородицы благоуханное прозябение. Радуйся, постническаго лика преподобных светило многосветлое; радуйся, подвигов иноческих зерцало преизящное. Радуйся, яко в житии твоем Антонию дивному подражал еси; радуйся, яко в подвизех твоих Феодосию чудному ревновал еси. Радуйся, яко послушающих тебе управил еси ко спасению вечному; радуйся, яко повинующимся тебе был еси ходатай Царствия Небеснаго. Радуйся, отче Симоне, прилежный о нас к Богу молитвенниче.

Кондак 4

Бурю страстей и свирепеющия волны похотей плотских до конца утолил еси постом и бдением и молитвою, благодатию же Божиею охраняем, достигл еси во отишие безстрастия; темже убо изми, отче преподобне, молитвами твоими и нас недостойных от потопа страстей и погибели вечныя, да спасающему тобою всещедрому Богу благодарственно вопием: Аллилуиа.

Икос 4

Слыша о подвизех твоих, и видя исправления твоя во игуменстве, благоверный князь Георгий зело любляше тя, и в чести велией имеяше тя, угодниче Божий; темже молением его возведен был еси на архипастырский престол богоспасаемых градов Владимира и Суждаля, идеже паче просиял еси благими делы, учением просвещая, любовию согревая, благодатию же от Бога испрошенною живот подая всем, ублажающим тя звании сими: Радуйся иерарше, благодатию Святаго Духа освященный; радуйся, архипастырю, воистинну Богом избранный. Радуйся, питателю, пищею слова Божия верныя насыщающий; радуйся, святителю, благодатию Божественною души наша освящающий. Радуйся, истинный учителю, показавый в научение наше веру твою от дел твоих; радуйся, благоискусный наставниче, поучаяй нас кротости и премудрости не cлoвoм точию, но и образом жития твоего. Радуйся, преславный миротворче, яко мятущуюся Церковь Владимирскую пришествием твоим возвеселил еси; радуйся, благосердый отче, яко любовию и кротостию духовная чада твоя обрадовал еси. Радуйся, отче Симоне, прилежный о нас к Богу молитвенниче.

Кондак 5

Боготечная звезда явился еси на высоком степени святительства, ясно путь заповедей Господних показуя всем, хотящим благочестно жити; темже убо озари, отче преподобне, и нас, во тьме страстей пребывающих, сиянием добродетелей твоих, да яко во дни благообразно ходяще, вопием о тебе с благодарением Богу: Аллилуиа.

Икос 5

Видя, яко в мире сем всяческая суета и тлению причастна, потщался еси вседушно, Богоблаженне отче, Единому Превечному Богу благоугодити, и не вотще быша труды твоя: пременил бо еси тленная на нетленная, наипаче же сподобился еси блаженнаго предстояния пред Престолом Господа Славы, во Царствии Небеснем. Тамо убо, святче Божий, не забуди и нас, притекающих к заступлению твоему, и с любовию вопиющих к тебе таковая: Радуйся, нищеты ради духовныя богатство нетленное стяжавый; радуйся, плачем и печалию, яже по Бозе, утешение вечное восприявый. Радуйся, кротостию и незлобием Царствие Небесное наследовавый; радуйся, чистотою сердца лицезрения Божия сподобивыйся. Радуйся, доблий воине Христов, и вождю благоискусный воинов духовных; радуйся, ратоборче Господень, низложивый врага темнаго оружии правды десными и шуими. Радуйся, Богоблаженне подвижниче, яко подвигом добрым подвизался еси; радуйся, истинный праведниче, яко пред Господем Правды непорочен и праведен обрелся еси. Радуйся, отче Симоне, прилежный о нас к Богу молитвенниче.

Кондак 6

Проповедь Евангельскую, яко смиряяй себе вознесется, всем сердцем и всею мыслию твоею восприял еси, досточудне отче; темже аще и достойне одеждою святительства одеялся еси, обаче тем не возносяся, смиреномудренно желал еси, лучше тебе един день аки сметию в дому тамо Божия Матере приметатися, нежели тысящу лет славиму быти на престоле. О всеблаженне, испроси и нам у Щедродавца Господа достолюбезную добродетель нищеты духовныя, да не высокая о себе мудрствующе, но смиренными ведущеся, благоприятно вопием Богу: Аллилуиа.

Икос 6

Возсиял еси во светлостех святых солнца светлейшее, венцем благоволения Божия, доброты же неизреченныя и славы непрестающия благодатно украшаем; темже, всеблаженне, не престай моляся ко Господу Сил и Царю Славы о всех, притекающих к заступлению твоему, и величающих тя благохвалении сими: Радуйся, преблаженне, яко приял еси царствие благолепия от Царя Небеснаго; радуйся, преподобне, яко венчался еси славою и честию от руки Господни. Радуйся, кающихся со умилением ходатаю преусердный; радуйся, борющихся со страстьми и похотьми помощниче преизрядный. Радуйся, ищущим уврачевания уязвленной совести целителю премудрый; радуйся, унывающих и безнадеждных утешителю пресладкий. Радуйся, заблуждающих и в самозабвении жительствующих исправителю прекроткий; радуйся, лукавнующих и беззаконнующих обличителю незлобивый. Радуйся, отче Симоне, прилежный о нас к Богу молитвенниче.

Кондак 7

Хотяй всем человеком спастися и в разум истины приити, многомилостивый и долготерпеливый Господь дарова нам во освящение, защищение и отраду честныя и многоцелебныя мощи твоя, святителю отче Симоне; в нихже с верою и любовию приемлюще стража нам неотступна, благодарственно вопием сице благоволившему о нас Господу: Аллилуиа.

Икос 7

Нова небесе и новы земли благодатию Божиею достигл еси, всеблаженне отче, к ним же и мы недостойнии стяжахом тя путеводителя и наставника; темже молим тя, не попусти нас погибнути в дебрех греховных, но приведи нас стезею правою в страну света и радости вечныя, с любовию вопиющих тебе: Радуйся, горняго мира обитателю всеблаженный; радуйся, дольняго мира заступниче многомощный. Радуйся, кивоте честный, даровании духовными преукрашенный; радуйся, каменю драгий, Церковь Христову украшающий. Радуйся, яко нетлением мощей твоих проповедуется миру будущее всех воскресение; радуйся, яко и нам недостойным даровася от них многоценный залог твоего заступления. Радуйся, сокровище милосердия к нам Божия неисчерпаемое; радуйся, хранилище дарований нам благодатных неиждиваемое. Радуйся, отче Симоне, прилежный о нас к Богу молитвенниче.

Кондак 8

Странное преселение твое от земных в небесная пресветлая места ведуще, устранимся суетных прелестей мира сего, помышляюще, яко ты, всеблаженне, подобострастен быв нам, мир сей прелестный, и вся злая в нем победил еси, нам оставль образ добрых подвигов твоих; о толикой убо победе твоей радости исполнени, торжественно вопием Богу: Аллилуиа.

Икос 8

Весь исполнен быв любве Божественныя, всем быти вся восхотел еси, по образу святаго апостола Павла; темже, Богоблаженне, являл еси всем, приближающимся к тебе коемуждо благопотребну помощь, неусыпно труждаяся в научении, утешении и утверждении их в вере и благочестии, да всяко некия спасеши. Сего ради со благоговением приносим ти похвалы сицевыя: Радуйся, Православия и благочестия учителю богомудрый; радуйся, воздержания и целомудрия наставниче преизрядный. Радуйся, кротких и благих нравов благоискусный насадителю; радуйся, нечестивых и душетленных обычаев неуклонный искоренителю. Радуйся, стужаемых и обуреваемых нечистыми помыслы верный помощниче; радуйся, злословимых и оклеветаемых благонадеждный защитниче. Радуйся, малодушием колеблемых и во унынии закосневающих известный ободрителю; радуйся, в печали и злострадании сущих незримый предстателю. Радуйся, отче Симоне, прилежный о нас к Богу молитвенниче.

Кондак 9

Всяк грех содеяхом, всякою нечистотою осквернихом души наша; ты же святителю Христов, чиста соблюдый себе благодатию Божественною от всякия скверны плоти и духа, облагоухай нас твоею святынею, да со страхом Божиим прочее в мире сем жительствующе, со всякою же чистотою созидающе себе в жилище Божие духом, чистым сердцем и нескверными усты вопием Богу: Аллилуиа.

Икос 9

Витийская многовещания и риторскую хитрость отвергше, искренним точию сердцем в песнех духовных величаем тя, заступника нашего, святителю Христов отче Симоне: хвалим богоугодное житие твое, торжествуем славу твою, и покланяющеся честным мощем твоим, умильно глаголем: Радуйся, Небеснаго Архиерея иерарше святейший; радуйся, Духа Святаго органе преизящнейший. Радуйся, яко ангельский образ восприимь, ангельски на земли пожил еси: радуйся, яко святительским саном облечен, небесною святынею просиял еси. Радуйся, яко во иночестве и архипастырстве сугубо Христу Господу послужил еси; радуйся, яко за сугубыя по­двиги твоя сугубый венец от Него восприял еси. Радуйся, истинный Христов последователю, не прельстивыйся славою мира сего; радуйся, благий и верный рабе, вшедый в радость Господа твоего. Радуйся, отче Симоне, прилежный о нас к Богу молитвенниче.

Кондак 10

Спастися хотяще от различных напастей и бед мира сего, тебе, всеблагий отче, теплаго предстателя и многомощнаго молитвенника к Богу, призываем: не тщетну убо сотвори надежду нашу на заступление твое, не остави нас милостию твоею; буди нам защитник необоримый от враг видимых и невидимых, и помощник в напастех, нуждех и скорбех; избави нас ходатайством твоим от лютых бед и искушений; да не в смущении духа, но от избытка сердца, радостно всегда глаголем Богу: Аллилуиа.

Икос 10

Стены горняго Иерусалима, емуже Художник и Содетель Бог, имущия оснований дванадесять, и на них имен дванадесять Апостолов Агнчих, не во откровении таинственном, но яве зриши ныне, святче Божий: не престай убо моляся ко Господу о вопиющих к тебе таковая: радуйся, подвижниче Богоблаженный, подвигом добрым подвизавыйся, да благодать пред Господом обрящеши; радуйся, добропобедный воине, куплями житейскими не обязавыйся, да Воеводе угоден будеши. Радуйся, яко иноческими твоими подвиги удивил еси Ангелов лики; радуйся, яко святительскими твоими исправлении возвеселил еси человеков собори. Радуйся, благочестно труждающихся на пользу общую всегда готовый споспешниче; радуйся, благих наставников и воспитателей юношества незримый советниче. Радуйся, нищих и убогих благосердый попечителю; радуйся, сирых и страждущих благоутробнейший покровителю. Радуйся, отче Симоне, прилежный о нас к Богу молитвенниче.

Кондак 11

Пение умиленное, с верою и любовию, приносим ти, угодниче Божий, и прославляя прославльшаго тя Господа, всеусердно молимся тебе: сохрани предстательством твоим, во здравии и всяком благополучии, и соблюди от всякаго злаго обстояния; да мирно и безмятежно в державе нашей жительствуем, со благодарением Царю царствующих и Господу господствующих воспеваем: Аллилуиа.

Икос 11

Светом добрых дел твоих прославляя на земли Отца Небеснаго, и просвещая во тьме греховней пребывающыя, толико смирен сердцем был еси, досточудне отче, яко в послании твоем к блаженному Поликарпу, исповедуя себе грешника быти, смиренномудренно написал еси: «аз грешный епископ Симон тужу, скорблю и плачу, желая во святей обители Печерской скончатися, и положен быти во блаженной той персти, дабы поне малу отраду многих грехов моих приял, молитв ради преподобных отец Антониа и Феодосиа, и единомудренных им учеников их». Темже ныне прославляя Бога, исполнившаго во благих желание сердца твоего, и прославившаго тя за смирение твое славою неизглаголанною, приими от нас похвалы сицевыя: Радуйся, яко смирением твоим воистинну высокая и преславная стяжал еси; радуйся, яко тем наипаче смиренному сердцем Господу Иисусу приближился еси. Радуйся, Пресвятыя Богородицы изрядный любимиче и преискренний любителю; радуйся, боголепныя обители Ея избранный питомниче и преусердный ревнителю. Радуйся, яко честное тело твое, по желанию твоему, во блаженной той персти положися; радуйся, яко дух твой в сонме духов безплотных со угодники Печерскими на небеси пред Господем радуется. Радуйся, горняго Иерусалима гражданине богоизбранный; радуйся, небеснаго Сиона обитателю всеблаженный. Радуйся, отче Симоне, прилежный о нас к Богу молитвенниче.

Кондак 12

Благодатию, от Господа и Подателя всякия благостыни умоленною, просвети, отче богоносне, души наша к разумению спасительных истин веры Христовы и к приятию добрых учений благочестия Евангельскаго, да премудростию, и разумом, и во всех добродетелех преспевающе, и такo достойно ходяще звания, в немже поставлены есмы, со благодарением Единому Отцу светов и Богу разумов во веки воспеваем: Аллилуиа.

Икос 12

Поюще и превозносяще Бога, дивнаго во святых Своих, прославляем труды и подвиги твоя, имиже Господа на земли прославил еси, святителю отче Симоне; хвалим ревность твою по Бозе, ублажаем служение твое спасению ближних, славим кротость твою, величаем смиренномудрие твое, почитаем священную память твою, и со умилением благочестно зовем ти: Радуйся, яко жития преподобных Печерских люботрудно в назидание наше собрал еси; радуйся, яко та и на скрижалех сердца твоего добре написал еси. Радуйся, смиренномудре, николиже вознесыйся в сердце твоем, яко честен и славен еси; радуйся, праведне, никогдаже прельстивыйся мыслию, яко греxa не имаши. Радуйся, яко главу седмоглаваго змия седмицею дарований духовных стерл еси; радуйся, яко в воздаяние за подвиги и труды твоя венцем нетления от Господа венчался еси. Радуйся, яко со ангельскими лики выну на небеси Творца славословиши; радуйся, яко со избранными Его во обителех райских присно торжествуеши. Радуйся, отче Симоне, прилежный о нас к Богу молитвенниче.

Кондак 13

О великий и преславный угодниче Христов, святителю отче Симоне! Приими благоутробно сие малое моление, от нас недостойных со благодарением в похвалу тебе приносимое: буди заступник и покровитель всем, молитвенно притекающим к заступлению твоему с верою, и любовию, и упованием; избави нас от врагов видимых и невидимых, от всяких бед, скорбей и напастей; да мирно и благочестно поживше в веце сем, сподобимся с тобою и всеми святыми вечно в радости блаженней воспевати Богу: Аллилуиа.

(Этот кондак читается трижды, затем икос 1 и кондак 1)

Молитва первая

О священная главо, великий угодниче Божий, святителю Христов и чудотворче, преподобне и богоносне отче Симоне! К тебе, небесному заступнику и теплому предстателю нашему с верою и любовию припадаем и со упованием всеусердно молим тя: яви милосердие твое нам смиренным и грешным, и пролей теплыя молитвы твоя о нас ко Господу, Емуже со Ангелы и всеми святыми предстоиши на небеси во славе вечней. Вемы, святче Божий, яко свойственно есть тебе милосердие, ибо еще на земли живущу ти, едино имел еси попечение, еже спасати от погибели греховныя души человеческия; темже убо потщися, благосерде, предстоя страшному Престолу Господа Славы, ходатайствовати о нашем спасении, да не погибнем люте со беззаконии нашими. Веруем, отче всеблаженне, яко ты иже Христовою любовию, ближния твоя возлюбил еси, всегда пребывал еси в мире сем, кольми паче любиши вся ны о Господе на небесех водворяяся; темже всеусердно молим тя, яко отца нам суща, да выну соблюдаеши ны под покровом твоим от всякаго зла. Ты, отче преподобне, не точию сам верою правою и благими делы добре угодивый Господеви, но и иных научивый право веровати и волю Божию творити, велий наречен еси во Царствии Небесном, по неложному обетованию Христову; темже убо настави и нас, данною тебе от Господа благодатию, тако веровати, и тако путем заповедей Господних шествовати, яко не точию нам самем николиже на погибельный путь неверия и на стезю повелениям Божиим противну совратитися, но паче да будем довольни и иных во правоверии утвердити и на путь истинного благочестия наставити. О преблаженне, потщися убо о сем наипаче умоляти Щедродавца Бога, да подаст нам веру праву и несумненну, благочестие искреннее и непоколебимое, братолюбие нелицемерное, и преспеяние во всех благих делех, да выну памятующе звание и избрание наше, будем, якоже учит святый апостол, совершенни и исполнени во всякой воли Божией, никомуже не полагающе претыкания или соблазна ни словом, ни житием нашим, но всегда промышляюще точию добрая пред Богом и человеки. Еще же припадающе молим тя, угодниче Христов, предстательствовати ко Всемилостивому Владыце и Царю царствующих, да сохранит под покровом Своея благости, во здравии и непременяемом благополучии богохранимый народ наш, и избавит его от всякаго злаго обстояния; да соблюдет Церковь святую от ересей и расколов, державу же православно-русскую от всякаго мятежа, браней и нестроений; да даст пастырем Церкви святую ревность о спасении пасомых и просвещении неверующих светом Богоразумия, и да умудрит их право правити слово истины; дарует начальствующим мудрость и силу, подчиненным усердие и благопокорливость, судиям прозорливость и нелицеприятие, супругам верность и единодушие, родителем разум и благочестие, чадом кротость и послушание, наставником и воспитателем юношества доброучительность и смиренномудрие, учащимся и воспитуемым благое в вере и благочестии научение и возрастание, всем же людем всяк дар коемуждо благопотребен, всяку благовременну помощь во благих делех, и вся ко спасению и славе Божией подобающая. Сохрани, отче преподобне, твоими богоприятными молитвами вся грады и веси державы нашея, и град сей, и дом сей, от всякаго зла и нападений вражиих, вся же правоверныя люди, с любовию и упованием притекающия к покрову твоему, и благочестно покланяющияся мощем твоим, осени небесным твоим благословением, и вся прошения их во благо исполни. Ей, угодниче Божий, не презри молений наших, и не посрами нас от упования и чаяния нашего! Се бо мы недостойнии, и смиреннии многих грехов исполненнии, ведуще, яко грешники Бог не послушает, но аще кто Богочтец есть и волю Его творит, того послушает, ко твоему прибегаем предстательству, тобою дерзаем умоляти милосердие Божие; веруем бо, всеблаженне, яко елика аще ты, праведен сый, воспросиши в молитве от Бога, даст ти Бог. Темже убо буди теплый о нас предстатель ко Щедродавцу Богу, да твоею помощию и заступлением мирно и благочестно поживше на земле сподобимся и небесных благ восприятия, славяще и превозносяще Отца, и Сына, и Святаго Духа, Единаго в Троице славимаго и покланяемаго Бога, и твое милостивое предстательство во веки веков. Аминь.

Молитва вторая

О всехвальный и всечестный архиерею, святителю Христов, преподобне и богоносне отче Симоне! Призри, с свойственным тебе благосердием, от высот небесных, идеже со ангелы и всеми святыми Господу Славы предстоиши, на нас недостойных и долу преклонных, смиренных же и грешных, притекающих к многомощному предстательству твоему с верою, любовию и упованием. Простри молитвенно преподобныя руце твоя ко Господу и Владыце, и испроси от щедродательныя Его благостыни оставление согрешений наших вольных и невольных, покаяние сердечное, здравие душевное и телесное, житие мирное и безмятежное, воздуха благорастворение, земли плодоносие, житейских потреб довольство, во всем благое поспешение, и да не во зло обратим даруемая нам благая, но во славу пресвятаго имене Его, и во спасение наше. Еще же припадающе молим тя, потщися, благосерде, предстательствовати ко Господу Человеколюбцу, да избавит нас, по велицей Своей милости, от всяких бед и скорбей, от всяких недугов и болезней, от внезапныя смерти и от всех озлоблений, от всяких козней врагов видимых и невидимых и от всякаго зла; да укрепит в нас правую веру и благочестие нелицемерное, и да подаст нам силы в борьбе со страстьми и похотьми нашими; да соблюдет нас от нечестивых и душепагубных учений неверия и суеверия, имиже наветуется в нас святоотеческая православная вера, и да избавит нас от всяких приражений духа, иже ныне действует в сынех противления; да всадит в сердца наша дух смирения и кротости, дух братолюбия и незлобия, дух терпения и целомудрия, дух святыя ревности о славе Божией и спасении ближних; да призрит благоутробно на всякую душу, требующую благодатныя Его милости, и дарует, по неизреченным щедротам Своего человеколюбия, болящим исцеление, скорбящим утешение, малодушным успокоение, унывающим ободрение, страждущим ослабу, бедствующим помощь, сирым покров, безприютным пристанище, обидимым защиту, злословимым терпение, уничижаемым великодушие, гонимым заступление, оклеветаемым оправдание, и всем, во всяких нуждах и злостраданиях сущим, душевную отраду, и скорое избавление. Ей, святче Божий, буди теплый молитвенник и прилежный ходатай ко Господу о всякой души верных твоих чтителей, ищущих твоея помощи, да никтоже во уповании своем на тя посpaмлен будет, но вси предстательством твоим да обрящут, во всяких обстояниих, благодать и милость Всещедраго Бога, Емуже подобает всякая слава, честь и поклонение, ныне и присно, и во веки веков. Аминь.

Тропарь, глас 1:

Житий преподобных отец Печерских списателю известный, святителю Христов Симоне преблаженне, молися прилежно с ними Христу Богу, да управит в мире живот наш, и в книги животныя да напишет ны, спасая души наша.

Кондак, глас 2:

Святительства одеждею, аще и достойне одеялся еси, обаче тем не возносяся, желал еси паче сметием пред враты Лавры Печерския поврещися, смиренномудре Симоне. Темже, не аки сметие, врат вне, но яко сокровище, внутрь святыя пещеры положен быти сподобился еси, и ныне на Небеси Господеви предстоя, молися о нас, чтущих тя.

Величание

Величаем тя, святителю отче Симоне, и чтим святую память твою, ты бо молиши за нас Христа Бога нашего.