Акафисты - 29 мая 2025
Кондак 1
Избранный страстотерпче и исповедниче Христов, священномучениче Александре, Церкве Иерусалимския мудрый управителю и Слова Божия истинный проповедниче, восхваляем подвиги и страдания твоя, с любовию вопиюще ти:
Радуйся, священномучениче Александре, Церкве Иерусалимския похвало и всех православных утверждение.
Икос 1
Ангелов и вселенныя Творец, предъизбра тя, страстотерпче Александре, для служения пастве Церкве Иерусалимския и укрепления веры Христовы. Мы же, славяще подвиги и труды твоя, вопием ти умиленно таковая:
Радуйся, от чрева матере Богом избранный;
Радуйся, во Христовой вере утвержденный.
Радуйся, Духом Святым просвещенный;
Радуйся, мученическим венцем увенчанный.
Радуйся, Иерусалима града молитвенниче;
Радуйся, веры Христовы проповедниче.
Радуйся, священномучениче Александре, Церкве Иерусалимския похвало и всех православных утверждение.
Кондак 2
Видя веру твою несумненну и разум устремленный к горнему, Спас душ наших Христос дарова ти дар разумения и учительства слова Божия, да утвердиши в вере люди Церкви Христовы, да вси единомысленно с тобою вопиют Богу: Аллилуиа.
Икос 2
Разум Божественный имея, яко верный раб Господень, возгнушался еси языческия прелести, паче же возлюби Христову истину, добродетельми аки лествицею от силы в силу восходя, благодать Божию приобрел еси, священномучениче Александре, юже испроси и нам, почитающим тя звании сими:
Радуйся, благочестия непоколебимый столпе;
Радуйся, покаяния неленостный делателю.
Радуйся, житием твоим люди удививый;
Радуйся, словом твоим всех к покаянию наставивый.
Радуйся, яко тобою язычество искоренися;
Радуйся, яко тобою слово Божие утвердися.
Радуйся, священномучениче Александре, Церкве Иерусалимския похвало и всех православных утверждение.
Кондак 3
Силою Всевышняго и благодатию Божиею укрепляемь, во епископа града Флавии поставлен был еси, да научиши верныя чада Христовы, истинно воспевати Творцу: Аллилуиа.
Икос 3
Имеяй разум, силою Божиею просвещенный, священномучениче Александре, небоязненно проповедовал еси пастве своей славную истину Христову и за сие от гонителей темничное заключение претерпел еси. Мы же, восхваляя страдания твоя, умильно вопием ти сице:
Радуйся, хулы и напасти от гонителей претерпевый;
Радуйся, за проповедание слова Божия в темницу заключенный.
Радуйся, архипастырю Богом избранный;
Радуйся, светильниче, светяй во тьме сущим.
Радуйся, Святыя Троицы верный служителю;
Радуйся, молитвы непрестанныя усердный делателю.
Радуйся, священномучениче Александре, Церкве Иерусалимския похвало и всех православных утверждение.
Кондак 4
Бури гонений и злоречий не убоялся еси, страстотерпче святый Александре, но паче на Христа надежду всю возлагал еси и к Нему непрестанно в молитве взывал еси: Аллилуиа.
Икос 4
Услыша Господь молитвы твоя и дарова ти по двухлетнем заточении свобождение от уз темничных, Александре страдальче, да многия светом Христовых словес просветиши. Сего ради мы, грешнии, уповая на молитвенное дерзновение твое к Богу, поем ти тако:
Радуйся, молитвенниче скорый и теплый;
Радуйся, предстателю наш благий и верный.
Радуйся, светильниче, пред Богом горящий;
Радуйся, за правду и истину крепко стоящий.
Радуйся, Православныя веры насадителю;
Радуйся, благодати Христовы носителю.
Радуйся, священномучениче Александре, Церкве Иерусалимския похвало и всех православных утверждение.
Кондак 5
Боготечная звезда явился еси, священномучениче Александре, яко Божественною благодатию, от Бога ти данною, люди, призывающия тя, на спасительныя подвиги укрепляеши, память смертную подаеши и вразумляеши всех пети песнь: Аллилуиа.
Икос 5
Врагу, присно на угодники Божия ополчающуся, жестоким житием противустал еси, страстотерпче святый Александре, плоть бо свою духови покорил еси молитвою и воздержанием. Темже, подвигам твоим чудящеся, зовем ти сице:
Радуйся, венца Христова носителю;
Радуйся, духов злобы победителю.
Радуйся, правило веры;
Радуйся, образе кротости.
Радуйся, обиженных утешение;
Радуйся, путешествующих охранение.
Радуйся, священномучениче Александре, Церкве Иерусалимския похвало и всех православных утверждение.
Кондак 6
Проповедует Церковь Христова по всей вселенней подвиги и труды твоя, имиже ты, священномучениче Александре, трудился еси во благовестии Христове, да вси чада Церкве Православныя во вся дни и до скончания века непрестанно вопиют Богу: Аллилуиа.
Икос 6
Возсиял еси, богомудре Александре, яко светлая звезда на небе церковнем, верным путь ко Христу озаряющи и в истинней вере утверждающи, всем же вся полезная всегда дарующи. Сего ради и мы к тебе присно прибегаем и благодарственно вопием сице:
Радуйся, веры Христовы учителю;
Радуйся, храмов Божиих строителю.
Радуйся, слова Божия сеятелю;
Радуйся, гордых и любоначальных смирителю.
Радуйся, яко твоими молитвами спасаемся;
Радуйся, яко твоими поученьми наставляемся.
Радуйся, священномучениче Александре, Церкве Иерусалимския похвало и всех православных утверждение.
Кондак 7
Хотя поклонитися святыням Иерусалимским, смиренномудре Александре, во Граде Святем сретаем народом и пустынниками, извещенными свыше от Господа о твоем пришествии, был еси и по небесному откровению патриархом Святаго Града избран, идеже до кончины своея воспевал еси Спасителю Богу хвалу: Аллилуиа.
Икос 7
Новая купель Силоамская явился еси, святый архипастырю, в нейже от всяких болезней душевных и телесных исцеляеши и, яко муж мудрый, благочестие возвещаеши всем. Мы же, труды твоя поминающе, непрестанно воспеваем ти сицевая:
Радуйся, Иерусалимския паствы святителю;
Радуйся, благочестия насадителю.
Радуйся, Божиим определением патриархом Святаго Града поставленный;
Радуйся, мученическим венцем в нем прославленный.
Радуйся, в житии твоем истины поборниче;
Радуйся, по кончине твоей за всех молитвенниче.
Радуйся, священномучениче Александре, Церкве Иерусалимския похвало и всех православных утверждение.
Кондак 8
Странное чудо видим на тебе, священномучениче Александре, пастырю Иерусалимский, егда воздвиже гонение на тя Декий. Спасе бо тя Господь от льва, егда той испущен быв нечестивыми да растерзает тя. Но зверь лютый в кроткаго агнца превратися и у ног твоих возлеже, сим мучителей твоих обличая, не ведущих пети: Аллилуиа.
Икос 8
Всем сердцем возлюбил еси Бога, святителю Александре, и мужественно Христа исповедав, множество мучений претерпел еси и в темницу заключен быв, дух свой Господу предал еси. Мы же, восхваляюще страдания твоя, за Христа претерпенная, вопием ти умиленно таковая:
Радуйся, мучениче, Богом прославленный;
Радуйся, исповедниче святый, верными воспеваемый.
Радуйся, поборниче крепкий;
Радуйся, страдальче непобедимый.
Радуйся, за Христа пострадавый;
Радуйся, от Него венцем нетленным увенчанный.
Радуйся, священномучениче Александре, Церкве Иерусалимския похвало и всех православных утверждение.
Кондак 9
Всякия болезни и печали наша утоли, великий исповедниче Христов Александре, и подаждь нам последовати твоему житию, славу земную ни во чтоже вменяя и честь временную презирая, но паче в смиренномудрии и любви возрастати, и молитв твоих ради, Царства Небеснаго достигнути, идеже ты ныне пребываеши и непрестанно вопиеши со Ангелы: Аллилуиа.
Икос 9
Ветии многовещании недоумеют достойно восхвалити тя, страстотерпче Христов Александре, ибо многая и преславная чудодействия источаеши благодатию Божиею. Мы же, любовию твоею побеждаеми, вопием ти сице:
Радуйся, благих прошений исполнителю;
Радуйся, злых намерений искоренителю.
Радуйся, скорый помощниче призывающих тя;
Радуйся, милостивый заступниче почитающих тя.
Радуйся, благодатию Божиею бесы низлагаяй;
Радуйся, вражия козни силою Христовою расторгаяй.
Радуйся, священномучениче Александре, Церкве Иерусалимския похвало и всех православных утверждение.
Кондак 10
Спастися хотяще, мы, грешнии, к тебе прибегаем, Александре священномучениче, и покланяющеся святым мощем твоим и честному образу твоему, усердно молим тя: помози нам, немощным и ленивым, утоли скорбь нашу и на путь правый настави нас, заблуждающихся, да спасеннии твоими молитвами, хвалебными гласы зовем: Аллилуиа.
Икос 10
Стена еси всем христианом, к заступлению твоему прибегающим, священномучениче Александре, и милосердия неистощимый источник; сего ради славяще Бога, Дивнаго во святых Своих, вопием ти сице:
Радуйся, Церкве Иерусалимския заступниче и покровителю;
Радуйся, святаго Гроба Господня усердный служителю.
Радуйся, святых мест почитателю;
Радуйся, писаний святых отцев собирателю.
Радуйся, веры и любве учителю;
Радуйся, страха Божия насадителю.
Радуйся, священномучениче Александре, Церкве Иерусалимския похвало и всех православных утверждение.
Кондак 11
Пение молебное принеси Святей Троице, святителю отче Александре, о почитающих святую память твою, и усердно моли о еже избавитися нам от греховных падений, диавольских козней и вечнаго мучения, да непрестанно во умилении зовем Богу: Аллилуиа.
Икос 11
Светлостию чудес твоих, угодниче Божий Александре, всю вселенную просвещаеши, и верных во истине укрепляеши, и на враги победы даруеши. Сего ради со благоговением зовем ти:
Радуйся, Святаго Града преславное украшение;
Радуйся, Рая Небеснаго прекрасный цвете.
Радуйся, к сонму святых Христом сопричисленный;
Радуйся, во граде Небеснем Им возвеличенный.
Радуйся, яко благодатию Божиею верных просвещаеши;
Радуйся, яко поучении твоими заблудших наставляеши.
Радуйся, священномучениче Александре, Церкве Иерусалимския похвало и всех православных утверждение.
Кондак 12
Благодать и милость испроси нам у Господа, страстотерпче святый Александре, и молитвами твоими настави нас на путь спасения, да тако с тобою и со всеми святыми во веки вопием Спасающему нас Богу: Аллилуиа.
Икос 12
Поюще твоя страдания, священномучениче Александре, величаем память твою, с верою покланяемся многоцелебным мощем твоим и со страхом и любовию зовем ти:
Радуйся, предстателю наш скорый и теплый;
Радуйся, ходатаю о нас пред Богом неусыпный.
Радуйся, болящих целителю;
Радуйся, скорбящих утешителю.
Радуйся, к покаянию нас призываяй;
Радуйся, на мытарствах нам помогаяй.
Радуйся, священномучениче Александре, Церкве Иерусалимския похвало и всех православных утверждение.
Кондак 13
О преславный чудотворче и великий Христов угодниче, священномучениче Александре! Услыши милостивно сие малое моление наше и молитвами твоими испроси нам у Милосерднаго Бога в вере Православней укрепление, в любви христианстей преспеяние и грехов наших прощение, да предстательством твоим унаследуем Царствие Небесное и сподобимся со всеми святыми пети Богу: Аллилуиа.
Этот кондак читается трижды, затем икос 1-й и кондак 1-й
Молитва священномученику Александру, епископу Иерусалимскому
О, священная главо, пастырю добрый словесных овец Христовых, священномучениче Александре, Иерусалимская похвало, всемирный светильниче и скорый наш заступниче и помощниче в скорбех, бедах и всяких нуждах. Услыши нас грешных, к тебе прибегающих и молящихся. Испроси предстательством твоим у Всемилостиваго Бога нашего мир Церкви Его, под знамением Креста воинствующей, тишину помыслов наших, воздержание от пагубных страстей и покаяние. Ей, чадолюбивый и милостивый отче наш, священномучениче Александре, архиерею Божий! Тебе, предстоящему Престолу Господню, ведомы вся нужды наша духовныя и житейския. Призри на нас отеческим оком и твоими молитвами утверди нас в вере, надежде и любве, суемудрия и расколы истреби, болящия исцели, печальныя утеши, обиженныя заступи, бедствующим помози, путешествующим спутешествуй. Не посрами нас, угодниче Божий, к тебе с верою притекающих, но яви древния милости твоя, имиже отцем нашим вспомоществовал еси, не отрини и нас, предстоящих всечестней иконе твоей, яко тебе живу сущу. Умоли убо Милостиваго Бога сохранитися нам до кончины дней наших в страсе Божием, и да отпустит нам Господь вся прегрешения наша вольная и невольная, и да избавит нас твоим предстательством от вечных мук, и сподобит радости вечныя насладитися купно с тобою и со всеми святыми, во веки веков. Аминь.
Кондак 1
Возбранный Воеводо, Творче неба и земли! Победителю смерти похвальное приносим пение, яко по пресветлом Твоем из мертвых Воскресении на небеса со славою вознеслся еси и с пречистою плотию Твоею одесную Бога и Отца возсел еси, да и наше падшее естество совознесеши с Собою, и от грехов и от вечныя смерти свободиши на веки. Мы же Божественное Твое Вознесение празднующе со ученики Твоими от души Тебе вопием:
Иисусе, вознесыйся от нас на небо, не остави нас сирых.
Икос 1
Архангелов и Ангелов лики сопредсташа Тебе, Царю всех, на Елеонстей горе, со страхом видевше Тя на высоту небесную вземлема с плотию, и прославляху величие человеколюбия Твоего, поюще Тебе тако:
Иисусе, Царю Славы, взыди на небеса в воскликновении во гласе трубне.
Иисусе, Господи Сил, взыди на херувимы и возлети на крилу ветреню.
Иисусе, Превечный Боже, даждь гласу Своему глас силы, да трепетна будет ныне вся земля.
Иисусе, Превышний Свете, яви Силу Твою на облацех, и огнь от Лица Твоего да воспламенится.
Иисусе, Искупителю твари, уготови на небесех Престол Твой и Царствию Твоему да не будет конца.
Иисусе, Творче небу и земли, седи одесную Отца Твоего, да будет Бог всяческая во всех.
Иисусе, вознесыйся от нас на небо, не остави нас сирых.
Кондак 2
Видевше Апостоли Тя из мертвых возставша, Владыко Господи, егда во днех четыредесятих являл еси Себе им, глаголюще о тайнах Царствия Божия, и восприявше от Тебе заповедь от Иерусалима не отлучатися, но чаяти обетования Отча, дондеже облекутся силою свыше, сошедшеся, пребываху единодушно вкупе на молитве поюще Тебе едиными усты и единым сердцем: Аллилуиа.
Икос 2
Разум Божественного смотрения открывая, Всеблагий Иисусе, извел еси ученики Твоя вон до Вифании, и возвед их на гору Елеонскую, начат к великому Твоего Вознесения на небо таинству готовити, глаголюще: Приближися, о друзи Мои, восхождения время, шедше убо научите вся языки слову, еже слышасте от гласа Моего, крестяще их во имя Отца и Сына и Святаго Духа. Тии же, еще земная мудрствующе, вопрошаху, не в сие ли лето устроиши Царствие Израилево. Обаче Ты рекл еси им: «несть ваше разумети времена и лета, яже Отец положи во Своей власти», да выну готови будут ко сретению Своего Жениха Небеснаго, вопиюще:
Иисусе, Пастырю Добрый, не разлучайся никогдаже от нас, но пребуди с нами неотступно.
Иисусе, Учителю Благий, Святаго Утешителя Духа ниспосли нам, да пребудет с нами неизменно.
Иисусе, Просветителю наш, просвети души наши Твоим к Небесному Отцу Вознесением.
Иисусе, Спасителю наш, спаси нас от малодушия и бури Твоим заступлением.
Иисусе, Наставниче наш, словом уст Твоих настави нас на Твое служение.
Иисусе, Помощниче наш, Духом Твоим Святым воспомяни нам Твое Откровение.
Иисусе, вознесыйся от нас на небо, не остави нас сирых.
Кондак 3
Силою свыше Апостолы облещи хотяй, Иисусе, егда на горе Елеонстей обетовал еси им Духа Святаго сошествие. Ты повелел еси им, да свидетелие Твои будут во Иерусалиме и во всей Иудеи, и даже до последних земли, глаголюще: Приидите и внидите враты Моими, уготовите путь Мой и путь творите людем Моим и камения от пути размещите, вознесите знамение на языки, да вси вернии воспоют с вами: Аллилуиа.
Икос 3
Имея бездну милосердия, Сладчайший Иисусе, ученики Твоя и жены Тебе последствовавшия и наипаче Рождшую Тя Матерь Твою радости безчисленныя исполнил еси во Твое Вознесение, егда уже отступив от них, распростерл еси руце Твои и благословил еси, глаголюще: «Се Аз с вами есмь во вся дни до скончания века», тии же, страхом исполнени, прославляху Твое милостивное снисхождение, глаголюще:
Иисусе, милости Подателю, помиловати род человеческий на Елеон пришедый.
Иисусе, скорбных Увеселителю, сущия с Тобою други Твоя утешити восхотевый.
Иисусе, Надеждо безнадеждных, Твоим благословением при отшествии на небо нас от уныния сохранивый.
Иисусе, Прибежище безприютных, Твоим Вознесением восход к Отцу Небесному и нам даровавый.
Иисусе, Утешителю Благий, Утешителя Иного от Отца послати нам обещавый.
Иисусе, Пастырю овцам Великий, Твоему верному стаду разсеятися не благоволивый.
Иисусе, вознесыйся от нас на небо, не остави нас сирых.
Кондак 4
Бурю внутрь недоумения и печали многия имуще, Апостоли рыданием слез исполнишася, егда увидеша Тя, Христе, на облацех возносима и плачуще глаголаху: Владыко, како ныне оставляеши рабы Твоя, их же за милосердие Твое возлюбил еси, камо идеши, руками содержай концы? Мы же оставивше вся, Тебе Богу последовахом, радующеся, во веки с Тобою надежду имуще быти. Не остави нас сирых, якоже обещался еси, не разлучися от нас, Пастырю наш Добрый, но посли нам Пресвятаго Духа Твоего, наставляюща, просвещающа и освящающа души наша, да благодарственно воспоем Тебе: Аллилуиа.
Икос 4
Слыша рыдания ученик Твоих, Владыко Господи, о разлучении скорбящих, Ты совершеннейшее благословение преподал еси другом Твоим, глаголюше: не плачите возлюбленнии, и сетование все отрините, полезно вам есть, да Аз иду ко Отцу Моему, аще бо не иду, Утешитель не приидет. Вас ради с небесе снидох и вас ради паки восхожду на небо уготовати место вам, не оставлю бо овец Моих, яже собрах, не забуду, ихже возлюбих. Тии же Божественными словесы сими утешени бывше, со умилением возопиша Тебе:
Иисусе Всеблагий, печаль и слезы наши на радость преложивый, не лиши нас и вечныя радости во Царствии Твоем.
Иисусе Всещедрый, радостию исполнивый нас во Твоем Вознесении, сохрани дух наш в присном радовании и во странствии земном.
Иисусе, якоже кокош собравый птенцы своя, не попусти нам по стогнам мира сего разлучитися.
Иисусе, союзом любве нас на Вечери связавый, не даждь нам по действу сатанину, яко пшенице разсеятися.
Иисусе, мир Твой нам в наследие оставивый, соблюди нас в единомыслии и любви Твоей.
Иисусе, обители мнози в раи устроивый, уготови место нам в Небесной Обители Твоей.
Иисусе, вознесыйся от нас на небо, не остави нас сирых.
Кондак 5
Боготечный облак пресветел зело подъят Тя, Жизнодавче Господи, учеником зрящим, егда отступив от них, благословил еси, и тако со славою многою, яко на крылех херувимских носимый, предивный восход Твой ко Отцу Твоему совершил еси на небо, еже прежде непроходимо бысть от духов злобы поднебесных и от князей власти воздушныя, ныне же внутрь Тебе прият, да от всей твари видимыя и невидимыя услышиши Ангельскую песнь: Аллилуиа.
Икос 5
Видевше преславное Твое с плотию на небеса Восхождение, Царю твари, чини Ангельския, долу сущия, ужасешеся, глаголаху силам горнейшим: Возмите врата вечная, яко грядет Царь Славы, отверзитеся небеса и вы небеса небес, восприимите Господа сил и поклонитеся Ему, вопиюще:
Иисусе, Славы Отчия сияние, просвети нас светом Лица Твоего.
Иисусе, горних умов облистание, облистай нас в невечернем дни Царствия Твоего.
Иисусе, пришедый яве во огни и буре зельней, умное Твое небо свыше призови.
Иисусе, Велий и Хвальный зело в горе Твоей Святей, правду Твою в небесех возвести.
Иисусе, возвеличивый до небес милость Твою, яви славу Твою по всей земли.
Иисусе, возшедый на небо небеси на востоке, во век Слово Твое да пребудет на небеси.
Иисусе, вознесыйся от нас на небо, не остави нас сирых.
Кондак 6
Проповедницы Божественныя Славы, начальнейшие чины Ангельския, сущия на высоте небесней Господствия, Престоли, мнотоочитии Херувими и шестокрылатии Серафими, отверзоша вкупе вся высоты небесныя, сретающе Тя, Владыко Всяческих, и видяще Тя Вознесшагося во плоти, друг ко другу со удивлением вопияху: Кто Сей, пришедый из Эдома, Державный и Сильный во брани? Кто Сей, пришедый от Васора, еже есть от плоти? Почто червлены ризы Его, яко от омочения кровию, венец терновен носяй? Сей есть воистину Царь Славы, Агнец Божий за спасение мира закланный и воскресый, во плоти ныне грядый сести одесную Отца, Емуже выну воспевати будем: Аллилуиа.
Икос 6
Возсиял еси Божественною славою, Иисусе, егда естество человеческое, в негоже облекся еси, милостивно вознесл еси, Отцу спосадил еси, и обожил еси е. Темже небеснии безплотнии чинове, чудеси удивляющеся, ужасахуся, ужасом и трепетом содержимии, Твое человеколюбие величаху. С нимиже и мы земнии Твое нас ради снисхождение и еже от нас на небеса Вознесение славословяще, молимся, глаголюще:
Иисусе, струя Сый жизни, Твоим на небо Вознесением нам странникам земли путь жизни вечныя в Вышний Иерусалим указавый.
Иисусе, бездна Сый милости, Твоим одесную Отца сидением плотское наше восприятие обоживый.
Иисусе, вземый на рамо заблудшее естество наше, возми на Себе и моя тяжкия прегрешения.
Иисусе, возшедый Плотию ко Безплотному Отцу, возведи горе моя долу поникшия помышления.
Иисусе, от земли одесную Бога и Отца на горняя возшедый, даруй ми десную часть спасаемых овец получити.
Иисусе, от Сиона благолепие красоты Твоея явивый, сподоби мя причастником вечнаго блаженства Твоего быти.
Иисусе, вознесыйся от нас на небо, не остави нас сирых.
Кондак 7
Хотяй вознести и прославити падшее во Адаме естество человеческое, Ты, яко вторый Адам, возшед на высоту небесную, уготовал еси Престол Твой во век века, и сел еси одесную Бога и Отца, Божеством Твоим никакоже разлучивыйся Отеческих недр. Приидите убо обнищавшему нас ради и возшедшему одесную Отца Иисусу поклонимся, дадим величия Ему, и воспоем из глубины души: Аллилуиа.
Икос 7
Новое и чистое жительство открыл еси, Господи, егда с Плотию Твоею возшел еси на небеса, да состаревшийся многими грехами мир обновиши возстанием Твоим и на небеса Вознесением, показуя нам явственно, якоже Божественный Павел глаголет, яко жительство наше на небесех есть. Сего ради устранимся суетнаго мира, ум на небеса преложша, и вопиюще Тебе таковая:
Иисусе, со Ангелы небесными Божеством Своим на небеса возшествием нас к небесному жительству подвизатися призвавый.
Иисусе, с человеки - земный Плотию, Своим от земли отшествием нас от земных пристрастий отвращатися научивый.
Иисусе, поискати пришедый заблудшее овча, к незаблудшим Твоим овцам возведи нас на небеса.
Иисусе, совокупити сошедый растоящаяся естества, яже на земли соедини небесным у Вышняго Отца.
Иисусе, во облаце легце возшедый на небеса, сподоби нас, земная оставльше, присно взирати на небесная врата.
Иисусе, седяй во славе на Престоле Божества, даждь нам, отверзше очи, от Закона разумети Твоя чудеса.
Иисусе, вознесыйся от нас на небо, не остави нас сирых.
Кондак 8
Странно и дивно Твое Воскресение, странно и страшно Твое, Жизнодавче Христе, еже от святыя горы Божественное Вознесение, непостижимо и паче ума Твое еже одесную Отца во Плоти сидение, о немже Давид духом глагола: «Рече Господь Господеви Моему: седи одесную Мене, дондеже положу враги Твои подножие ног Твоих». Сего ради вся силы небесныя, зряще Твое на небеса возшествие, воистину покоришася под нози Твои, поюще ангельскими языки Херувимскую песнь: Аллилуиа.
Икос 8
Весь бе в Вышних, Сладчайший Иисусе, егда волею нас ради вознеслся еси со славою на небеса и одесную сел еси Бога и Отца, но и нижних никакоже отлучился еси, зане обетовал еси пребывати неотступно в Церкви и вопиял еси любящим Тя: «Аз есмь с вами и никтоже на вы». Сие милостивое обетование Твое выну помняще и храняще в сердце, с любовию вопием Тебе таковая:
Иисусе, всяку власть на небеси и на земли по Вознесении Твоем восприявый, восприими нас в Твое вечное наследие.
Иисусе, всякия радости ученики Твоя обетованием Святаго Духа исполнивый, исполни нас Того благодати пришествием.
Иисусе, превознесши Возшествием Твоим всю тварь, превознеси горе мою душу воспевати со Ангелы Твою Святыню.
Иисусе, Божий Слове, Словом Твоим небеса утвердивый, утверди в сердце моем словеса Твоя, яко да не согрешу Тебе.
Иисусе, Сыне Отечь, Духом уст Твоим всю силу Твою с небес явивый, обнови Дух правый во утробе моей, яко да не оскверню себе.
Иисусе, вознесыйся от нас на небо, не остави нас сирых.
Кондак 9
Все естество падшее человеческое, долу поникшее и грехми истлевшее, взял еси на рамо Свое, Владыко Господи, новосотворивый Собою, и превыше всякаго начала и власти возвел еси днесь и Богу и Отцу привел еси, и с Собою спосадил еси на Престоле Небеснем, да освятиши е, и спрославиши, и обожиши. Безплотнии же, удивляющеся, глаголаху: Кто Сей Красный Муж, но не Человек точию, но вкупе Бог и Человек, Емуже да поем выну: Аллилуиа.
Икос 9
Витии Божественнии, ученицы Твои, Спасе, Твоему преславному Восхождению удивляющеся, на небо взираху, скорбяще, Тебе вознесшуся, и се два Ангела предстаста пред ними во одежди беле, и рекоста им во утешение: «Мужие Галилейстии, что стоите, зряще на небо? Сей Иисус, вознесыйся от вас на небо, такожде приидет, имже образом видеста Его идуща на небо». Сие ангельское благовестие о Втором Пришествии Твоем, Господи, ученицы Твои слышавше, в радостный трепет приидоша, с нимиже и мы радостно да воспоем Тебе таковая:
Иисусе, Вознесыйся от нас во всей славе Твоей, ей, гряди скоро со Ангелы святыми Твоими.
Иисусе, имеяй паки приити сотворити суд прав, ей, гряди со славою во светлости святых Твоих.
Иисусе, велий и страшный зело над всеми окрестными, помилуй и защити тогда вся кроткия земли.
Иисусе, прославляемый в Совете Святых Твоих, Сам нас спрослави во Царствии Твоем на небеси.
Иисусе, прошедый небеса Плотию, благоволи провести душу по мытарствам воздушным и улицезрети Тя.
Иисусе, Вознесыйся на облацех небесных, сподоби нам с веселием и со дерзновением в последний день на облацех усрести Тя.
Иисусе, вознесыйся от нас на небо, не остави нас сирых.
Кондак 10
Спасти хотя сущия с Тобою ученики, Христе Спасе, и вся верующия словеси их ради в Тя, и по Тебе последовавшая, возшел еси на небеса, да уготоваеши место им, яко в дому Отца Твоего обители многи суть, якоже Сам рекл еси ко страсти грядый, глаголя: «Аще уготовлю место вам, паки прииду и поиму вы к Себе, да идеже есмь Аз, и вы будете». Сего ради сподоби и нам, Господи, по смертнем вознесении нашем обрести храмину нерукотворенну, вечну на небесех, уготованную не от древа, или сена или тростия плотских дел наших ради, яже во огне не устоят, но от злата или сребра или каменей драгих на Твоем основании назданную, идеже выну будем Тебе славити и воспевати: Аллилуиа.
Икос 10
Царю Предвечный, Иисусе Христе, на небеса возшедый с Пречистою Твоею Плотию и всех нас в небесное наше Отечество призвавый, возведи нас долу поверженных от мирских пристрастий и плотских мудрований к высоте небесней и даруй нам еще во дни плоти нашея чистым свидетельством совести причаститися небесныя жизни и выну вкушати в таинстве Божественныя Евхаристии небесную пищу, да от чистаго сердца и духа праваго воспоем Тебе таковая:
Иисусе, Великий Архиерею грядущих благ, в Вознесение Свое прошедый небеса Плотию и возшедый не в рукотворенный храм, но в самое небо, да Лику Божию от нас предстанеши.
Иисусе, Небесный Архитектоне, скинию нерукотворенную на небесех соорудивый и единою вшедый во Святая Святых ко Отцу со Своею Кровию, да вечное искупление совершиши.
Иисусе, Непорочный Агнче Божий, единою за грехи мира закланный, «во еже вознести грехи многих», вознеси к Престолу Божию моя о гресех приношения.
Иисусе, Новаго Завета Ходатаю, единою на небеса ко Отцу возшедый, во еже открыти путь в Небесную Скинию, восприими о нечистоте моей воздыхания.
Иисусе, Возлюбленный Женише наш, Светосиянный Чертог на небеси уготовавый, уготови тамо место Тебе Единому служити восхотевшим.
Иисусе, Добрый Пастырю Твоих овец, небесная пастбища в раи Твоему стаду произрастивый, даруй нам венцы, Тебе Единому последовати возжелавшим.
Иисусе, вознесыйся от нас на небо, не остави нас сирых.
Кондак 11
Пение всеумиленное приношаше Божественному Вознесению Твоему, Слове, рождшая Тя Всенепорочная Мати Твоя. Та бо во страсти Твоей матерски паче всех болезноваше о Тебе, сего ради подобаше Той в прославление Плоти Твоея премножайшия насладитися радости, и с сею радостию великою сниде с Елеонския горы со апостолы, и возвратишася вси во Иерусалим и взыдоша в горницу, и бяху вси Апостоли, терпяще единодушно вкупе в молитве, молении и пощении с женами и Мариею Материю Иисусовой, и с братиею Его, чающе Сошествия Святаго Духа, хваляще и благословяще Бога, и воспевающе Ему: Аллилуиа.
Икос 11
Свет вечный и нетленный возсия всему миру от Святыя горы Елеонския, идеже стоясте пречистыя нозе Твои, Христе Спасе, егда вознеслся еси со славою на небеса, зане прошед небеса с Плотию, Ты отверзл еси врата небесная, падением Адамовым заключенная, и Сам сый Путь, Истина и Живот, открыл еси путь всякой плоти во обители Отца Твоего Небеснаго, якоже и предрекл еси Твоим, учеником, глаголя: «Отселе узрите небо отверзсто и Ангелы Божия восходящия и нисходящия над Сына Человеческаго». Сего ради ведуще путь Твой, яко никтоже приидет ко Отцу, токмо Тобою, поем Тебе сице:
Иисусе, на облацех света возшедый ко Отцу, угасший светильник души моея просвети.
Иисусе, во светлостях святых Твоих вознесыйся горе, животворящий огнь Твой в сердце моем воспламени.
Иисусе, паче Солнца Возсиявый на высоте небесней в Вознесении Твоем, теплотою Духа Твоего хлад души моея разжени.
Иисусе, Свет от Света Божества Твоего возсиявый миру от Отца, светом словес Твоих в нощи греха нас спящих просвети.
Иисусе, Невечерний Свете, имеяй паки в Пришествие Твое исход Твой, яко молнию от восток и даже до запад явление Твое, огнем гнева Твоего не попали нас тогда.
Иисусе, вознесыйся от нас на небо, не остави нас сирых.
Кондак 12
Благодать новую преподал еси, Сладчайший Иисусе, к совершению святых и в созидание Церкви Святыя Твоея, егда на небеса с Пречистою Твоею Плотию возшел еси и одесную Бога и Отца сел еси, якоже писано есть: «Сшедый прежде в дольнейшия страны земли спасения нашего ради», Ты ныне восшел еси на высоту превыше всех небес, да исполниши всяческая к совершению святых, в созидание Тела Христова, сего ради пленил еси плен, и подал еси даяния человеком, дондеже достигнем вси в соединение веры и познания Тебе, Сына Божия, в мужа совершенна, в меру возраста исполнения Твоего, да тако, спасение улучивше, благодарственно воспоем Тебе: Аллилуиа.
Икос 12
Поюще Твое вольное на небеса со славою Вознесение, поклоняемся Твоему, Владыко Христе, одесную Бога и Отца соседению, славим Твое на небеси и на земли воцарение и веруем со Апостолы Твоими, яко воистину, имже образом возшел еси на небо, такожде паки приидеши на облацех со славою и силою многою. Тогда убо не посрами нас в Тебе верующих и тако вопиющих:
Иисусе, со Отцем Твоим на Престоле Божества присно соседяй, сподоби побеждающим мир с помощию Твоею сести с Тобою во Царствии Твоем.
Иисусе, со Святым Утешителем Духом Твоим выну споклоняемый, не лиши нас по обетованию Твоему Того Сошествия во служении Твоем.
Иисусе, с Херувимы и Серафимы и с лики святых по Вознесении Твоем на небеси спребываяй, подаждь нам зде на молитву во Имя Твое собранным присутствие Твое ощущати.
Иисусе, Святые храмы Твоя по отшествии Твоем на небо право в Тя верующим даровавый, помоги нам во храме стоящим себе на небесе быти помышляти.
Иисусе, Пречистую Матерь Твою со Апостолы в Вознесение Твое на молитву за весь мир по Себе оставивый, не остави нас без предстательства Святых Твоих.
Иисусе, Церковь, Невесту Твою на земли по Вознесении Твоем до скончания века оставивый, не лиши нас чад Тоя благодатных даров Твоих.
Иисусе, вознесыйся от нас на небо, не остави нас сирых.
Кондак 13
О Пресладкий и Всещедрый Иисусе, вознесыйся от нас на небо и седением одесную Бога и Отца помиловавый и обоживый падшее естество наше! Призри с высоты небесныя на немощныя и к земли поверженныя рабы Твоя и даруй нам силу свыше побеждати вся искушения от плоти, мира и диавола находящия на ны, да горняя будем мудрствовати, а не земная. И сохрани нас от всех врагов видимых и невидимых возстающих на нас. По кончине же земныя жизни нашея вознеси души наша в небесныя обители, идеже со всеми святыми выну воспевати будем: Аллилуиа.
Этот кондак читается трижды, затем икос 1 и кондак 1
Молитва Вознесению Господню
Господи Иисусе Христе, Боже наш, сошедый с Небесных высот спасения нашего ради и напитавый нас духовною радостию во святыя и пресветлыя дни Воскресения Твоего, и паки по совершении земнаго служения Твоего вознесыйся от нас на небо со славою, и возседый одесную Бога и Отца! В сей "ясный и всесветлый день Божественнаго на небеса восхождения" Твоего "земля празднует и ликует, радуется и небо Вознесением днесь Творца твари", человецы славословят непрестанно, зряще заблуждшее и падшее естество свое на рамо Твое, Спасе, вземлемо и на небеса вознесенное, Ангели же веселятся, глаголюще: Кто Сей, пришедый во славе, силен во брани. Сей воистину Царь Славы?! Сподоби и нам немощным, земная еще мудрствующим и плотоугодия, творити непрестающим, восход Твой на небо страшный помышляющи и празднующе, плотская и житейская отложити попечения и со Апостолы Твоими на небо ныне взирати всем сердцем своим и всеми помышленьми своими, поминающе, яко тамо на небеси горе жительство наше есть, здесь же на земли мы точию странники и пришельцы есмы, отшедшия из дома Отча в страну далечу греха. Сего ради усердно просим Тя, преславным Вознесением Твоим, Господи, оживи нашу совесть, еяже нужнейши ничтоже есть в мире, возведи нас из плена сего греховнаго плоти и мира и сотвори нас горняя мудрствовати, а не земная, яко да не ктому себе угождати будем и жити, но Тебе Господу и Богу Нашему служити будем и поработаем, дондеже отрешившеся от уз плоти и прошедши невозбранно воздушныя мытарства, достигнем небесных обителей Твоих, идеже, ставше одесную Величествия Твоего, со Архангелы и Ангелы и всеми святыми прославляти будем Всесвятое Имя Твое со Безначальным Твоим Отцем и Пресвятым и Единосущным и Животворящим Твоим Духом, ныне и присно и во веки веков. Аминь.