Акафисты - 03 июня 2025

Акафист святому преподобному Адриану игумену Ондрусовскому Олонецкому чудотворцу

Кондак 1

Избранниче Божий, преподобне отче наш Адриане, приим крест свой, последовал еси Христу и деянием учил еси презирати плоть, преходит бо, прилежати же о души своей безсмертней. Темже со ангелы срадуется дух твой, и мы земнии тя по долгу ублажаем поюще:
Радуйся, Адриане, скорый наш помощниче и чудотворче.

Икос 1

Ангел земный и человек быв небесный, всем житием твоим научаеши нас, преподобне: надеющийся на Господа яко гора Сион не подвижится во век. Той бо покрыет и в день напасти, и спасет от неприязни; яже памятствующе, тако ти рцем:
Радуйся, изрядный сосуде благодати божественныя.
Радуйся, Христа ради оставивый вся мира сего красная.
Радуйся, тесным и горким путем вшедый в вечный живот.
Радуйся, сего ради зело от Господа возлюбленный.
Радуйся, дивный в чудесех о нас молитвенниче.
Радуйся, скорый тя призывающым споспешниче.
Радуйся, Адриане, скорый наш помощниче и чудотворче.

Кондак 2

Видение бе радостное, егда тя, младенца суща, именитии родителие твои принесоша в храм Господень. Тамо бо иерей в купели крещения возроди тя во Христе и священным миропомазанием дарова ти вся силы, яже к животу и благочестию, да выну Богови со искупленными честною Его Кровию, выну поеши: Аллилуиа.

Икос 2

Разумевше твои родителие, преподобне, яко точию благочестие на вся полезно, имеяй обетование нынешняго и грядущаго жития, тщашася тя воспитати в страсе Божием и Церкви святей в послушании, в немже и пребыл еси до скончания жития. Сего ради тебе тако вопием:
Радуйся, от рода боярскаго прозябение дивное.
Радуйся, яко в купели крещения от древния клятвы омылся еси.
Радуйся, яко дар премудрости и разума приял еси в миропомазании.
Радуйся, яко утвердился в тебе дух совета и крепости.
Радуйся, тебе же укрепишася вся силы естества во спасение вечное.
Радуйся, призванный к деланию духовному от служения в дружине княжестей.
Радуйся, Адриане, скорый наш помощниче и чудотворче.

Кондак 3

Силою благодати Божия приведен быв ко преподобному пустынножителю Александру Свирскому, терпению того умилился еси, преподобне, аще и млад быв боярин и от великаго князя любим, обаче силу словес Христовых: «Аще кто хощет по Мне ити, да отвержется себе и возмет крест свой и по Мне да идет», уразумел еси, и Тому невозвратно последовал еси с песнию: Аллилуиа.

Икос 3

Имения многа бедным раздал еси, преподобне, и вся отложив, к преподобному Александру пришел еси и жестокому того житию поревновал еси, слышай днесь от нас по достоянию сицевыя хвалы:
Радуйся, яко же древле Евстафий Плакида, еленем приведенный к спасительному пути жизни твоея.
Радуйся, обретый пустыннаго мужа, от негоже познал еси иноческое пустынное житие.
Радуйся, тое возлюбивый абие.
Радуйся, ревнителю иноческих подвигов.
Радуйся, егоже дух яко елень возжада к Богу Крепкому Живому.
Радуйся, учениче дивнаго Александра, Святыя Троицы собеседника.
Радуйся, Адриане, скорый наш помощниче и чудотворче.

Кондак 4

Бури езера Ладожскаго не убоялся еси, преподобне, егда бури и суеты житейския бежал еси: с радостию бо устремился еси, отнюдуже яко свещы, во тме мерцающыя, светях и звоном церковным окрестная оглашающя, обители Валаамская и Коневская украшахуся лики иноческими, иже немолчно воспеваху Богови: Аллилуиа.

Икос 4

Слыша божественное пение и зря монахов множества, к стопам игумена Валаамскаго припал еси, преподобне, и смиренне молил еси, да приимет тя яко единаго от наемник. Мы же зря твое смирение, тако ти рцем:
Радуйся, пришельче, знатность рода сокрывый глубиною смирения.
Радуйся, приятие обета нестяжания упредивый раздаянием имений меньшей братии.
Радуйся, браку честному предпочтый обручение ангелообразному житию.
Радуйся, всякое послушание приимавый со благодарением.
Радуйся, вся тяготы искушения иноческаго пренесый добре.
Радуйся, тако ся предуготовавый ко приятию иноческаго великаго пострига.
Радуйся, Адриане, скорый наш помощниче и чудотворче.

Кондак 5

Боготечный апостол Павел многи страны обтекий благовествуя Евангелие, глаголаше верным: «Глаголю безбрачным и вдовицам, добро им есть аще пребудут яко же и аз, аще ли же ни, да посягают. Оженивыйся бо печется, како угодити жене, а не оженивыйся печется, како угодити Господеви.» Ты же, преподобне девство паче брака честна избрал еси, яко духу твоему сродное, и егда ангельскаго образа сподобился еси, умиленне воспевал еси Богови: Аллилуиа.

Икос 5

Врача Небеснаго умолил еси, преподобне, сего ради ни память прежняго твоего жития, ни славы и богатства отложение, не возмогоша смутити дух твой, обаче вся тяготы и скорби добре пренесл еси, научая нас пети ти, яко иноков наставнику:
Радуйся, со отъятием влас воли своея отрешивыйся.
Радуйся, смиренное послушание имевый ко настоятелю и братии.
Радуйся, в нищете скончавый дние своя.
Радуйся, постом истончивый плоти страстная.
Радуйся, молитвою просветивый душу свою.
Радуйся, труды многими праздности губительныя бегавый.
Радуйся, Адриане, скорый наш помощниче и чудотворче.

Кондак 6

Проповедниче смирения, преподобне отче наш Адриане, егда от настоятеля и от братии зело почитаем был еси, славы сея аки тяжкаго бремене бегий, тайно отшел еси в место блатно, отнюду же наставника твоего Александра по времени посещал еси и с ним единеми усты и сердцем воспевал еси Богови: Аллилуиа.

Икос 6

Возсия из пустыни добродетель твоя, преподобне Адриане, и многи привлече к тебе споработати хотящих, имуще тя искушенна наставника и мудра. Сбыстся о тебе слово Господне: «Не может град укрытися верху горы стоя». Темже ти вопием:
Радуйся, смирением возшедый на гору добродетелей благочестивых.
Радуйся, во убозей хижине возсылавый к Господу молитвы теплыя.
Радуйся, зной и мрак тамо со благодушием преносивый.
Радуйся, молитвою прогонявый мрачныя демоны.
Радуйся, препобедивый тех многоразличная страхования.
Радуйся, пустыннаго жития рачителю.
Радуйся, Адриане, скорый наш помощниче и чудотворче.

Кондак 7

Хотяй спасения нашего Господь апостолом Иаковом рече: «Иже аще обратит грешника от пути его нечестиваго, спасет душу и покрыет множество грехов». Ты же преподобне, сия памятующе, с любовию приимал еси к тебе притекающих, и с ними усердная моления возсылал еси, научая их со искренним умилением духа пети: Аллилуиа.

Икос 7

Купель Силоамская бысть обитель твоя грешником; два бо разбойника молитвами твоими управишася на путь покаяния и вечнаго спасения: от них же един в обители дние благочестно сконча, другий же Киприан именован быв, обитель Сторожевскую согради и многия во спасение управи. Яже поминающе, тако ти рцем:
Радуйся, о мире всего мира неусыпный молитвенниче.
Радуйся, умоливый слезами разбойника Ондруса не изгоняти тя со ученики из пустыни сея горкия.
Радуйся, того, от соперника плененна и ко убиению связанна молитвою разрешивый от уз и явлением.
Радуйся, тем и онаго к познанию силы Божия приведый абие.
Радуйся, яко оба во обители твоей слезами покаяния омыша душевный свой позор.
Радуйся, учениче Христов, приведый лютая разбойника ко подражанию благоразумнаго разбойника.
Радуйся, Адриане, скорый наш помощниче и чудотворче.

Кондак 8

Странниче в земной юдоли, преподобне Адриане, покров странником создал еси, егда обитель Ондрусовскую соградил еси ко утешению и спасению к тебе собравшихся, и храмом в честь Успения Пречистыя Владычицы Богородицы украсил еси, Ейже со умилением выну взывал еси: «К кому прибегну в горести моей или к кому припаду в в печали моей, разве не к Тебе, Владычице», и славил еси Троицу Живоначальную песнию: Аллилуиа.

Икос 8

Вся во обители твоей устроив благообразно и по чину, в царствующий град отшел еси, преподобне, да благодарение воздаси царю благочестивому за милости, яже обители твоей яви; сия поминающе, тако тя хвалим достойно:
Радуйся, братии ради понесый труды многия.
Радуйся, показателю приятия даяний со благодарением.
Радуйся, убогим иноком достигий града, в немже в богатстве и славе пожил еси в юности.
Радуйся, любезне царем Иоанном приятый и царицею Анастасиею кроткою.
Радуйся, со Геннадием Костромским от купели крещения дщерь цареву прияти сподобивыйся.
Радуйся, паки странником в пустыню убогую путь приемый.
Радуйся, Адриане, скорый наш помощниче и чудотворче.

Кондак 9

Вседушне прилепившеся к тленному стяжанию и неправедным прибытком, неции от окрест обители твоея живущих нападоша на тя, из царствующаго града возвращающагося, мняще дары царския похитити. Посрамишася же во злом своем уповании, точию суму странническу обретоша при тебе пролившии кровь твою; ты же в конец жития страдальческою кончиною украсился еси и возшел еси на Небеса с победною песнию: Аллилуиа.

Икос 9

Витийствующая уста твоя умолкоша, сокрышася кротции очи твоя и безгласен был еси старче мудрый и нестяжательный, земля скры твой лик умиленный, но слава твоих исправлений не умре, и мы, чтуще память твою, тако ти вопием:
Радуйся, рабе, вшедый в радость Господа твоего.
Радуйся, нищетою духовною обретый богатство неиждиваемое.
Радуйся, жаждавый правды, днесь зряй правду вечную.
Радуйся, кротостию стяжавый землю святых.
Радуйся, в скорби временнаго жития зело днесь утешенный.
Радуйся, присный собеседниче Александра Свирскаго.
Радуйся, Адриане, скорый наш помощниче и чудотворче.

Кондак 10

Спасения ради и утешения братии по некоем времени открыл еси единому от иноков, идеже губителие сокрыша честныя мощи твоя; яко же бо предрекл еси тако и бысть: конь бо бел обретеся поблизости, орущу некоему земледельцу ту, иже и приведе к месту блатну, из негоже извлекоша твое многотрудное тело. Обретше же оное тлению непричастное, вси прославиша Бога песнию: Аллилуиа.

Икос 10

Стена спасительная бысть в древняя времена обитель твоя, преподобне, от мрака греховнаго и суеверия языческаго, учащи люди боголюбезному житию; и память исправлений твоих не забвеся, обаче научает нас пети тебе таковая хвалы:
Радуйся, присный во благочестии наставниче.
Радуйся, неусыпный зде обитающих охранителю.
Радуйся, низводяй Божие на ны благословение.
Радуйся, тя призывающих защитителю.
Радуйся, яко никто просяй с верою, тощь от тебе отходит.
Радуйся, яко всяк приемлет просимое с верою теплою.
Радуйся, Адриане, скорый наш помощниче и чудотворче.

Кондак 11

Пение и звон не умолче на месте, идеже потрудился еси, преподобне: не точию бо мнози верующии притекают ко гробу твоему и ту исцеления подаеши, но и на водах плавающым способствуеши. Валаамскаго бо игумена Иннокентия со святителем Николаем явлься спасл еси от потопления не езере Ладожстем в нощи темней и ветру зело свирепствующу и кораблецу разрушенну бывшу, еже памятующе, вопием умиленне: Аллилуиа.

Икос 11

Светоприемная свеща благодати Божия явися гроб твой, преподобне, иже многоразличая источает чудеса, врачуя страсти неисцельныя и научая нас пети тебе:
Радуйся, егоже память с похвалами.
Радуйся, яко гроб твой источник исцелений явися.
Радуйся, яко кости твоя аки Елиссеовы чудотворят.
Радуйся, яко житием святым очистил еси плоти страстная.
Радуйся, благодати Божия приятелище.
Радуйся, пришествия втораго Христова провозвестниче.
Радуйся, Адриане, скорый наш помощниче и чудотворче.

Кондак 12

Благодатию Божиею имущаго быти общаго всех воскресения уверителя яви тя Владыка Христос, преподобне: гроб бо твой, чудеса источаяй, яве вещает, яко грядет час, воньже вси мертвии оживут и изыдут: сотворшия злая в воскресение суда, а сотворшия благая в воскрешение живота, поюще Богови: Аллилуиа.

Икос 12

Поем твоя милости и чудеса, преподобне отче наш Адриане: выну бо и по отшествии своем нас не оставляеши, всем бо потребная во спасение скоро подаеши, болезни и скорби наша незриме врачуеши, да с радостию тебе вопием:
Радуйся, незримый наш покровителю.
Радуйся, нечистых духов прогонителю.
Радуйся, слепых прозрение.
Радуйся, глухих слышание.
Радуйся, разслабленных здравие.
Радуйся, скорбящих утешение.
Радуйся, Адриане, скорый наш помощниче и чудотворче.

Кондак 13

О преподобне и богоносне отче наш Адриане, приими сие малое, от любящих тя сердец приносимое хваление. Яко имеяй велие ко Господеви дерзновение, молися за ны, да избавит нас от всяких бед и скорбей, враг видимых и невидимых, напрасныя смерти и будущих мук и сподобит со избранными Его выну пети Ему со безплотными песнь великую: Аллилуиа.

Этот кондак читается трижды, затем икос 1-й и кондак 1-й

Молитва преподобному Адриану, игумену Ондрусовскому, Олонецкому чудотворцу

О преподобне отче Адриане, угодниче Божий, пустынный жителю, послушниче Христов! Ты убиение от нечестивых человек по наущению вражию претерпел еси, но Господь Бог деснаго стояния Своего со святыми тя сподоби. Сего ради к раце честных мощей твоих припадаем и молим тя усердно: буди молитвенник ко Господу Богу о нас грешных, святыми твоими молитвами сохрани нас от всякаго зла, огня, глада, потопа и всякия болезни и внезапныя смерти, и умоли Господа Бога даровати нам оставление грехов, деснаго же стояния и нас сподобити, да непрестанно прославляем Пресвятую Троицу, Отца и Сына и Святаго Духа, во веки веков. Аминь.

Акафист святым преподобным Зосиме, Савватию и Герману, Соловецким чудототворцам

Кондак 1

Избраннии угодницы Господни и велицыи чудотворцы, светильницы Христовы Церкве пресветлии, облиставшии благочестия светлостьми пустыни Севернаго Помория, и всей стране Российстей сияющии выну чудес множеством, Преподобнии отцы наши Зосимо, Савватие и Германе, яко имущии дерзновение ко Господу, благоприятными своими к Тому мольбами от всяких нас бед и зол сохраняйте, да радующеся зовем вам:

Радуйтеся, Преподобнии отцы наши Зосимо, Савватие и Германе.

Икос 1

Ангели воистину явистеся земнии и человецы небеснии житием вашим, преблаженнии отцы наши Зосимо, Савватие и Германе: во плоти бо, яко безплотнии, ангельское совершисте жительство на земли, вся красоты мира и наслаждения временная яко уметы вменяюще, чистотою же и пощением выну к Богу приближающеся. Емуже ныне достойно со безплотными предстояще, приимите от любве нашея приносимая вам хваления сицевая:

Радуйтеся, Единаго Бога от всея души своея возлюбившии;

Радуйтеся, от юности Тому преподобием и правдою послужившии.

Радуйтеся, возненавидевшии мира сего тленныя красоты;

Радуйтеся, избежавшии мудре житейских соблазнов и суеты.

Радуйтеся, к деланию заповедей Господних всею любовию прилепившиися;

Радуйтеся, мира сего и всякаго пристрастия ко оному удалившися.

Радуйтеся, иноческое житие богоугождения ради себе предизбравшии;

Радуйтеся, тесный и прискорбный путь всею душею возлюбившии.

Радуйтеся, мудрии взыскателие Христа, бисера вожделеннаго и драгаго;

Радуйтеся, люботрднии носителие Христова бремене, легкаго и благаго.

Радуйтеся, ангелом безплотным во плоти бренней подражавшии;

Радуйтеся, на земли жительство небесное нам показавшии.

Радуйтеся, Преподобнии отцы наши Зосимо, Савватие и Германе.

Кондак 2

Видя себе, святе Савватие, ради многих своих добродетельных исправлений, всюду в сопребываниих иноческих почитаема и ублажаема, и бегая суетныя мира сего славы, взыскуя же вечнаго воздаяния на небесех, устремился еси ко отоку Соловецкому, да тамо втайне и никимже видимый поработаеши невидимому и вся видящему Богу. Темже и улчив желаемое, блаженным Германом к сему наставляем, радостно возопил еси Богу: Аллилуиа.

Икос 2

Разум неуклонно вперив от утробы матерни к Богу, и горняя выну мудрствуя и взыскуя, дольних же всецело отвергаяся, богомудре Зосимо, поревновал еси житию Преподобнаго Савватия, и во отоце пусте, идеже сей богогодне соверши подвиги своя, вселился еси, да с ним наследуеши жительство горняго Иерусалима. Темже во обоих восхваляюще пустынножития рачительство, зовем вам:

Радуйтеся, любве ради Христовы, любовь в себе к миру поправшии;

Радуйтеся, всякую греховную сладость века сего презревшии.

Радуйтеся, подобницы Аврааму не точию верою и упованием, но и добровольным от рода своего и дома отеческаго преселением;

Радуйтеся, пустыни всекрасная и благозлачная насаждения.

Радуйтеся, безмолвия тщаливейшии рачителие;

Радуйтеся, трудных подвигов пустынных искреннии любителие.

Радуйтеся, в дебрех и горах паче, неже в селех мира, изволившии приметатися;

Радуйтеся, в пустынях непроходимых, едини во трудех и соблюдении заповедей Господних возлюбившии подвизатися.

Радуйтеся, яко злато, искусившиися в горниле пустыннаго озлобления;

Радуйтеся, доблественне претерпевшии от бесов же и от людей многая искушения.

Радуйтеся, пророку Божию Илии и крестителю Господню Иоанну нравом пустыннолюбия подражателие;

Радуйтеся, доблем Герману единомысленнии сподвижницы любобезмолвнии купножителие.

Радуйтеся, Преподобнии отцы наши Зосимо, Савватие и Германе.

Кондак 3

Силы небесныя, в служение посылаемыя хотящым наследовати спасение, дивно послужиша вам, о двоице боголюбивая. Егда бо насельницы мирстии, стужающе безмолвию твоему, отче Савватие, жити хотяху во острове близ тебе с женами и чады, ангели грозным прещением и наказанием жены рыбаревы воспятиша сих от начинания богопротивнаго: тебе же, отче Зосимо, во озимении пребывавшему кроме брашна, ангельским служением преподашася потребная ко препитанию. Сего ради Богу, спасающему угодники Своя, поим: Аллилуиа.

Икос 3

Имуще оток морский во обителище себе, никимже населяемый, и в нем пребывающе, аки в раи богозданнем, вне мятежей и волнений житейских, и кроме суетных попечений, благочестно и богоугодно подвизастеся, о богоблаженнии, во дни и нощи поучающеся в законе Господни, и на всякий час умом несмущеным и сердцем чистым возносяще усердныя к Богу молитвы и моления. Сего ради радостию вопием вам:

Радуйтеся, в законе Господни непорочно ходити всегда восхотевшии;

Радуйтеся, Господа своего пред очима своима присно имевшии.

Радуйтеся, страхом Господним вся пути своя ограждавшии;

Радуйтеся, в трезвении умнем все житие свое провождавшии.

Радуйтеся, вся помыслы ума в послушание Христово всецело пленившии;

Радуйтеся, чистыя ваша сердца в жилище Святому Духу представившии.

Радуйтеся, не давшии сна очима во всенощных Господеви предстояниих;

Радуйтеся, выну претерпевавшии скорби в поучении смертнем и в сердечных ко Господу воздыханиих.

Радуйтеся, с искреннею любовию подвизавшиися на славословие Божие и псалмопения;

Радуйтеся, сердцем и усты непрестанныя возсылавшии к Богу моления.

Радуйтеся, внутрь сердца своего сокровенное Царствие Божие обретшии;

Радуйтеся, восхождении умными к небесным видением востекшии.

Радуйтеся, Преподобнии отцы наши Зосимо, Савватие и Германе.

Кондак 4

Бурю жития сего многомятежнаго безбедно преминусте, отцы Преподобнии, и свирепыя волны страстей же и искушений, от мира и плоти и от духов злобы воздвизаемыя, не погрузиша и не поколебаша корабля душ ваших, ветрилы молитвы непрестанныя окриляемаго, и нестяжанием облегчаваемаго, благодатию же Божиею управляемаго. Темже и достигосте к безмятежному пристанищу живота вечнаго, вопиюще Богу: Аллилуиа.

Икос 4

Слышаще и ведуще от писаний Божественных, яко вси подвизавшиися во благочестии, распинаху плоть свою со страстьми и похотьми, благочестномудренно, о Преподобнии, сих подвигом последствующе, подвизастеся умертвити уды своя сущия на земли, в пощениих, бдениих и во всяких трудех иноческаго жития мужески претерпевающе скорби. Сего ради, яко доблия подвижники благочестия, венчаем вы хвалении сицевыми:

Радуйтеся, телеса своя труды и болезньми воздержания увядившии;

Радуйтеся, вся плотская мудрования, на дух воюющая, духу покорившии.

Радуйтеся, покаянными слезами пламень страстей угасившии;

Радуйтеся, в пещи воздержания душы своя яко злато очистившии.

Радуйтеся, ветхаго человека со страстьми его совлекшиися;

Радуйтеся, одеждею безстрастия и славою нетления достойно облекшиися;

Радуйтеся, возненавидевшии временную греха сладость;

Радуйтеся, наследовавшии на небеси нескончаемую радость.

Радуйтеся, прежде смерти, миру и сластем его плоть свою распеншии;

Радуйтеся, прежде воскресения, славу будущия жизни в себе проявившии.

Радуйтеся, стезею поста к наследию рая, потеряннаго невоздержанием, путь нам указавшии;

Радуйтеся, в телеси мертвеннем и тленнем безсмертие и нетление будущаго века всем предъявившии.

Радуйтеся, Преподобнии отцы наши Зосимо, Савватие и Германе.

Кондак 5

Боготечныя и многосветлыя звезды явилися есте, Преподобнии отцы Зосимо, Савватие и Германе, светозарными исправлении заповедей Господних озаряющии душы и сердца верных, и преплавающым в нощи греховнаго омрачения пучину житейскаго моря указующии благонадежный путь ко блаженному пристанищу Небеснаго Царствия. Темже явившему вы, яко руководители и наставники ко спасению, благодетелю Богу поим: Аллилуиа.

Икос 5

Видевше злокозненнии ненавистницы спасения человеческаго, нечистии дуси тьмы, богоугодное житие ваше, отцы преблаженнии, многообразная воздвигаху на вы искушения и страхования, овогда в мысли и сердце всевающе боязнь и смущение, овогда же преобразующеся; в различная привидения дивиих зверей и гад, с яростию устремляхуся на вы, чающе отвратити от подвига богоугоднаго и изгнати от пребывания пустыннаго: вы же, твердою верою в Бога Промыслителя возмогающе и оружием молитвы и воздержания противу врагов ваших ополчающеся, до конца победисте и низложисте их державу. Сего ради, победительную песнь поюще, взываем к вам:

Радуйтеся, воини духовнии непобедимии;

Радуйтеся, оружницы Христовы добропобеднии.

Радуйтеся, подвижницы, противу козней лукаваго мужески ополчившиися;

Радуйтеся, столпи крепцыи, от нападений вражиих не поколебавшиися.

Радуйтеся, вся стрелы диаволи аки хврастие сокрушившии;

Радуйтеся, вся стужения того и страхования ни во чтоже вменившии.

Радуйтеся, яко во плоти суще, победисте враги безплотныя и невидимыя;

Радуйтеся, яко и во гробех лежаще, низлагаете вражия ополчения.

Радуйтеся, победоносцы славнии, венчаннии от Небеснаго Венцедателя;

Радуйтеся, споборницы доблии ратующым на миродержителя тьмы века сего.

Радуйтеся, яко подвигом вашым ангели удивишася;

Радуйтеся, яко о славе вашей собори верных возвеселишася.

Радуйтеся, Преподобнии отцы наши Зосимо, Савватие и Германе.

Кондак 6

Проповеданное от ангел изволение Божие о населении иночествующими отока Соловецкаго исполнися вами, отцы преблаженнии Зосимо, Савватие и Германе: се бо пустыня неплодная и ненаселенная, поты же и слезами вашими обильно напоенная, показася яко вертоград благоцветущий и рай словесный, идеже лицы иночестии, вами благонаученнии, плоды богоугодныя приносяще, поют ангельскую Богу песнь: Аллилуиа.

Икос 6

Возсиясте, отцы богоноснии, светом благочестия, яко светила богосветлая, светоносными лучауми ваших подвигов и добродетелей просвещающии всюду. Отонудуже мы, грешнии и тьмою страстей помраченнии, во свете ваших богоугодных деяний текуще ко дню света и спасения, восхваляем вы, поюще сице:

Радуйтеся, ученицы Христови благопослушнии;

Радуйтеся, Владыки своего раби блазии и вернии.

Радуйтеся, трудолюбнейшии винограда Христова делателие;

Радуйтеся, тщаливейшии заповедей Христовых исполнителие.

Радуйтеся, игу Христова смирения и кротости благопокорне рамо свое подклонившии;

Радуйтеся, во след Христа Господа, учившаго о нищете, усердно в нищете и нестяжании последовавшии.

Радуйтеся, по словеси Господа, прешедшии путь временнаго жития сего, стезями прискорбными и тесными;

Радуйтеся, аки дождем, измывшии душы своя токи слезными.

Радуйтеся, краснейшему душ Жениху красоту девства своего сохранившии;

Радуйтеся, во всякой святыни, всеми добрыми делы Тому благоугодившии.

Радуйтеся, Господа своего прославившии в душах ваших и телесех;

Радуйтеся, от Господа по достоянию прославленнии на земли и на небесех.

Радуйтеся, Преподобнии отцы наши Зосимо, Савватие и Германе.

Кондак 7

Хотяй спасти вами многия, Премилосердый Бог яви вас быти не точию наставники сонма иночествующих, но якоже боговещанныя проповедники, возвестившыя имя Божие в странах Лапландии. Людие бо, во онех местех обитающии, и не ведевшии дотоле Бога, но прилежавшии весьма идолопоклонению и нечестию, во светлости вашего, о Преподобнии, жития, знамений же и чудес, узреша первую зарю спасительнаго боговедения и благочестия, и от вас научишася воспевати истинному Богу: Аллилуиа.

Икос 7

Дивно и преславно совершивше путь своего спасения, чудную же и боголепную основавше обитель во спасение иночествующим, блаженную восприясте живота своего кончину, приснопамятнии отцы наши, Зосимо, Савватие и Германе: обаче, и по смерти вашей, присно живи суще, нас, чад своих, никогдаже оставляете, не духом точию нам присно спребывающе, но и мощи своя цельбоносныя нам предавше, яко сокровище безценное. Сего ради с радостию ублажаем вы, зовуще:

Радуйтеся, добрым подвигом во всем житии своем подвизавшиися;

Радуйтеся, славою и честию от Владыки своего Христа увенчавшиися.

Радуйтеся, яко привременно потрудившеся, в вечный покой внидосте;

Радуйтеся, яко тесным шествовавше путем, к блаженству Царства Небеснаго достигосте.

Радуйтеся, аще и не единокупно, но в равных подвизех подвизавшиися на земли;

Радуйтеся, за равноподвижное житие, радостию и веселием вкупе наслаждающиися на небеси.

Радуйтеся, во отоце пусте, яко град, обитель иноком основавшии;

Радуйтеся, сонмы иноков о Христе Бозе во оней собравшии.

Радуйтеся, стражи стаду своему приснободреннии, и по днех временныя жизни от дел благотворений не почивающии;

Радуйтеся, сынове Царствия, на Небесех живущии и земных не оставляющии.

Радуйтеся, духом вашим горе со ангелы святыми, и долу с нами грешными присно пребывающии;

Радуйтеся, от честных мощей ваших струи милости на всех источающии.

Радуйтеся, Преподобнии отцы наши Зосимо, Савватие и Германе.

Кондак 8

Странную и пречудную, велию же и прекрасную узрев на воздусе явльшуюся церковь, все же место оно, на немже имяше возградитися обитель иноков, видя неизреченным светом осияваемо, ужасом исполнился еси, отче Зосимо, от предивнаго видения. Обаче, Божие во оном откровение поразумев, на созидание обители тебе поощряющее, купно же и грядущую славу места сего прозря, умиленным сердцем и усты воспел еси Богу: Аллилуиа.

Икос 8

Вси правовернии российстии людие, прославляюще ваше святое и равноангельное житие, во всяких нуждах и скорбех притекают к вашей помощи и заступлению, отцы досточуднии: дана бо есть вам от Бога благодать, еже молитися за ны, избавляти же и спасати от всяких бед и зол притекающыя к ракам честных мощей ваших, и на всяком месте призывающыя святое ваше имя. Темже, исповедающе чудная ваша благодеяния, благодарственная восписуем вам, зовуще:

Радуйтеся, источницы Божественных дарований неизчерпаемии;

Радуйтеся, милования и любве к людем сосуди неиждиваемии.

Радуйтеся, яко кадило благовонное, о мире молитвы к Богу возносящии;

Радуйтеся, немолчными вашими ходатайствы всякое благословение от десницы Божия на ны низводящии.

Радуйтеся, сущым в скорбех и нуждах известнии помощницы;

Радуйтеся, во обстояниих и напастех скории пособницы.

Радуйтеся, в недузех целители, и в бури страждущым благонадежнии кормчии и избавители;

Радуйтеся, во всяких бедах и искушениих теплии предстатели и утешители.

Радуйтеся, верным, благочестно чтущим вас, на сопротивныя споборницы;

Радуйтеся, всея земли Российския избраннии молебницы и заступницы.

Радуйтеся, на земли и на мори чудеса преславная содевающии;

Радуйтеся, во вся концы призывающым вы скорую помощь независтно простирающии.

Радуйтеся, Преподобнии отцы наши Зосимо, Савватие и Германе.

Кондак 9

Всеми Богокрасными лепотами добродетелей украсив себе, прехвальне Зосимо, наипаче явился еси краснейший душею же и телом, достойно помазався священства Божественною мастию. Темже, егда во святем храме совершал еси пред престолом Господним первую Божественную службу, видеша вси лице твое, облистанное светом благодати, яко лице ангелово: весь же храм, во известное свидетельство достоинства твоего, исполнися велия благоухания. Сего ради вси, благодаряще Бога о своем пастыре, радостным сердцем взываху: Аллилуиа.

Икос 9

Ветийственными добровещаньми несть возможно по достоянию воспети и прославити многая и неисчетная, велия же и преславная, и всякое разумение земное превосходящая, совершамая вами, отцы Преподобнии, на всякое время чудотворения. Обаче, да не явимся чрез немотствование подобни рабу, сокрывшему сокровище своего Владыки, от уст, аще и не обученных и слова премудрости отнюд не имущих, любовию же точию и благодарением движимых, дерзаем простирати песнь благодарения в память и прославление чудес ваших, зовуще сице:

Радуйтеся, чудотворцы великоименитии и благославнии;

Радуйтеся, душ и телес врачеве немздоприемнии.

Радуйтеся, очеса слепых благодатию Божиею просвещающии;

Радуйтеся, немотою связанныя уста ко благоглаголанию разрешающии.

Радуйтеся, расслабленных удесы исправляющии неможение;

Радуйтеся, хромым дарующии правохождение.

Радуйтеся, плененных предстательством своим от уз и пленения свобождающии;

Радуйтеся, мертвыя силою Божиею, вашим же умолением воскрешающии.

Радуйтеся, во всяких страстех и недузех совершающии благодатное исцеление.

Радуйтеся, томимым во обстояниих и напастех дарущии мир и духовное просветление;

Радуйтеся, идущим во след Господа путем тесным и прискорбным подающии божественное вспоможение.

Радуйтеся, Преподобнии отцы наши Зосимо, Савватие и Германе.

Кондак 10

Спасения подвиг добре совершив, жития же сего временнаго отрешаяся и отходя к животу вечному и блаженному, Зосимо богоблаженне, утешал еси ученики твоя, глаголя яко, разлучаяся с ними телесне, не отступен будеши от них и обители твоея твоим духом. Отонудуже и самеми делы слово твое исполняяй являешися, не точию невидимо соприсутствуя нам и назирая вся, но и видимо многажды, вкупе со блаженным Савватием, являяся во время благопотребно призывающым вас в помощь и вопиющим Богу: Аллилуиа.

Икос 10

Стена необоримая и покров твердый, спасения забрало и оружие победы быша нам, отцы Преподобнии, теплые ваша к Богу молитвы, в день брани оныя лютыя, егда, по грехом и беззаконием нашым, врази крепцыи и бранноискуснии со огнем и мечем нападоша на ны в достоянии вашем, во еже сокрушити святыни ваша и положити я в разорение и попрание, духовная же чада ваша победити и погубити смертию безгодною; обаче, никоеже зло возмогше сотворити, сами наипаче тии исполнишася студа и безчестия, уповающии же на помощь вашу препоясашася радостию и веселием о своем спасении. Благодаряще убо о сем Бога, исповедуем купно ваше ходатайство и застпление, и вопием вам тепле из глубины души:

Радуйтеся, пастырие добрии, от врагов губительных стадо свое защищающии;

Радуйтеся, яко орли под крилома своима птенцы своя покрывающии.

Радуйтеся, покровом молитв своих в день брани нас осенившии;

Радуйтеся, гнев Божий, праведно на ны движимый, ходатайством своим утолившии.

Радуйтеся, не давшии своего достояния в попрание и расхищение;

Радуйтеся, паче надежды сохранившии е от огненнаго запаления.

Радуйтеся, уповающыя на вы от губительства смертнаго свободившии;

Радуйтеся, от раны и язвы, от уз и пленения дивно тех сохранившии.

Радуйтеся, врагов гордыню и дерзновение обратившии в студ им и безчестие;

Радуйтеся, ны, жительствующия в обители вашей, неисксобранныя и безоружныя, одеявшии в радость и веселие.

Радуйтеся, веры и благочесия отеческаго неусыпнии охранители;

Радуйтеся, за Отечество явльшиися и по смерти мужественнии воители.

Радуйтеся, Преподобнии отцы наши Зосимо, Савватие и Германе.

Кондак 11

Песни хвалебныя и моления всеумиленная приносяще, долготу же путную и опасности моря ни во чтоже вменяюще, притекают к цельбоносным мощем вашым царие и князи, святители и вельможи, богатии и убозии, ближнии и дальнии, всяк возраст и пол, и всякое верных совокупление, и яко от неистощимаго источника, по коегождо своей потребе, приемлюще обильная врачевания душевная же и телесная, прославляют и величают Бога, таковую благодать вам даровавшаго, поюще: Аллилуиа.

Икос 11

Светом Божественныя благодати, в недрех земли, в предивных знамениих и чудесех, от первых дней упокоения возблиставшия ваша мощи, достодолжно и праведно лицы иночестии, от многолетнаго покровения изнесше, поставиша со благоговением на свещнице церковнем, во храме, имени вашему созданнем, благочестием великаго и святаго подражателя ваших подвигов, исповедника и мученика, Святителя и первопрестольника Российскаго Филиппа. И мы ныне, благочестно о славе вашей веселящеся, обстояще честныя раки мощей ваших и любезно тыя облобызающе, велегласно зовем вам:

Радуйтеся, светильницы пресветлии, на свещнице церковем преславно поставленнии;

Радуйтеся, кивоти честнии, не камением и златом, но благодати дарованьми украшеннии.

Радуйтеся, яко три звезды, озаряющии тьму полунощную;

Радуйтеся, яко три столпа, в пределех Севернаго Помория утверждающии веру православную.

Радуйтеся, источницы райстии, моря чудес изливающии;

Радуйтеся, бисерие дражайшии, Церковь Христову украшающии.

Радуйтеся, благочестия и добродетели светлейшая зерцала;

Радуйтеся, Церкви и Отечества необоримая забрала.

Радуйтеся, райскаго исполнения крини благовоннейшии;

Радуйтеся, лозы Божественныя розги благоплодейшия.

Радуйтеся, отцы всеблаженнии, прославляемии горе от Бога и ангел, и долу ублажаемии от человек;

Радуйтеся, яко радость ваша, святая и совершенная, пребывает во век.

Радуйтеся, Преподобнии отцы наши Зосимо, Савватие и Германе.

Кондак 12

Благодать свою Божественную, в телесех ваших обитающую, яви иногда Преблагий Бог благоговейному иноку Иосифу во образе двух столпов огнезрачных, от земли до небес над гробы вашими возносящихся и сияющих светом неизреченным: воистинну бо вы есте, отцы Преподобнии, духовнии светозарнии столпи, светлостию высоких добродетелей и светом богознания, знамений же и чудес, озарившии пресветло духовню тьму в странах полунощных. Сего ради Богу, прославляющему святыя Своя, поим: Аллилуиа.

Икос 12

Поюще в песнех подвиги и труды вашего богоугоднаго жития, преславная же содеяная и содеваемая во всяком роде благотворения и чудотворения восхваляюще и прославляюще, недоумеем, отцы досточуднии, како вас по долгу возименуем: многия бо суть ваша добродетели и дарования, сего ради многая приличествуют вам и именования. Обаче, во многих малыми удовляющеся, сия вам с любовию восписуем:

Радуйтеся, ангели земнии, яко ангельским жительством на земли пожисте;

Радуйтеся, человецы небеснии, яко земнородни суще, возненавидесте земная, небесная же возлюбисте.

Радуйтеся, постницы терпеливейшии, в приснем пощении все житие свое проводившии;

Радуйтеся, пустынницы достохвальнии, в пустынях незаходимых Господеви послужившии.

Радуйтеся, учителие и наставницы, руководящии своими делы на пути спасения;

Радуйтеся, вожди духовнии, многих душы возводящии в небесная селения.

Радуйтеся, мучеником единонравнии, яко мужески бравшиися со страстьми;

Радуйтеся, апостолом подражателие, просветившии тьму неверия боговедения светлостьми.

Радуйтеся, пророком подобницы, тайных и будущих проведением и проречением;

Радуйтеся, всем святым единочестнии, подвигов ради и богоугождения.

Радуйтеся, таинницы благодати и чудес совершителие предивнии;

Радуйтеся, граждане небеснии и друзи Богу и святым Его приснии.

Радуйтеся, Преподобнии отцы наши Зосимо, Савватие и Германе.

Кондак 13

О Преподобнии отцы наши, / Зосимо, Савватие и Германе! / Приимите благоутробно / от нас смиренных и недостойных / сия возносимая вам хваления, / и благоприятными вашими к Богу мольбами / оградите ны от всякия беды и напасти, / от недуга и глада, от огня и меча, / и нашествия иноплеменных. Наипаче же сохраните ны вашим заступлением крепким / от врагов невидимых, / ищущих ны погубити, да избывше их многокозненных сетей, / праведно и богоугодно поживем в нынешнем веце, / и сподобимся в Небеснем Царствии / купно с вами воспевати Христу Богу: // Аллилуиа, аллилуиа, аллилуиа.

Кондак сей глаголи трижды, таже икос 1-й и кондак 1-й

Акафист святителю Христову Филиппу, митрополиту Московскому и всея России чудотворцу

Кондак 1

Избранный от Господа сил Российских первопрестольников преемниче, славным подвигом исповедничества, яко светило златозарное, озаривый Церковь православную, чудесы велиими и нетлением твоих мощей от Бога прославленный, святителю отче наш Филиппе, величая дивнаго во святых Своих Господа, восхваляем тя с любовию, яко усерднаго пред престолом Господним молитвенника, чуднаго пастыря и мученика, и от всего сердца вопием ти:

Радуйся, святителю Христов Филиппе, исповедниче великий и преславный чудотворче.

Икос 1

Ангельския силы радовахуся, святителю отче наш Филиппе, чистому и святому житию твоему, видяще, яко издетска кротость дивную, благочестие и святое послушание являл еси; мы же, благодаряще Господа, тако о тебе благоволившего, прославляем тя яко Божия избранника восхвалениями сими:

Радуйся, родителей твоих плод благословенный.
Радуйся, из млада Господа Бога возлюбивый.
Радуйся, в чистей молитве твоей пред Господем дитя незлобивое.
Радуйся, с отрочества житиями угодников Божиих сердце твое питавый.
Радуйся, служб Божиих неленостный посетителю.
Радуйся, книжнаго церковного учения искренний любителю.
Радуйся, наказанию отца твоего духовного зело прилежавый.
Радуйся, пустошным играм, яже детей обычай, нимало же внимавый.
Радуйся, родителей твоих радость и утешение.
Радуйся, всех знаемых твоих похвало и удивление.
Радуйся, наш святый молитвенниче.
Радуйся, наш дивный учителю.
Радуйся, святителю Христов Филиппе, исповедниче великий и преславный чудотворче.

Кондак 2

Видел еси, святителю Филиппе, отрок млад сый, храмов Божиих благолепие, святых обителей украшение, честных мощей и икон святых от народа почитание, ярких свещей горение, фимиама воскурение и купно с материю твоею службами церковными зело умилялся еси, красоту же храмов Божиих вседушно возлюбил еси; и тако благочестиво возрастая, от юности твоея Отечества Небеснаго искал еси, идеже Господь во славе, идеже непрестанная песнь: Аллилуиа.

Икос 2

Разум твой учением слова Божия и молитвою умудряя, явился еси, святителю Филиппе, юноша благонравен, и за премногую твою добродетель излюблен был еси юным царем Иоанном, иже тя яко отрасль высокого рода приблизи к своему престолу царскому и многими почестьми тя украси; ты же, земную славу ни во чтоже вменяя, искушения земных почестей победил еси и о едином на потребу попечение имел еси, сего ради мы тебе радостно восхваляем тако:

Радуйся, от юности добрый и благочестивый рабе Христов.
Радуйся, благоговейныя матере твоея верный и послушный сыне и друже.
Радуйся, старцы и старицы добре почитавый.
Радуйся, нищия и убогия зело возлюбивый.
Радуйся, юношеских похотей победителю.
Радуйся, целомудрия рачителю.
Радуйся, церковных песен и Божественныя псалтири усердный любителю.
Радуйся, песен срамных, смехотворства и безчинства злаго нелицемерный презрителю.
Радуйся, всякую буесть юности отгнавый.
Радуйся, мудрость Евангельскую возлюбивый.
Радуйся, всех добродетелей вместилище.
Радуйся, благодати Божия искренний причастниче.
Радуйся, святителю Христов Филиппе, исповедниче великий и преславный чудотворче.

Кондак 3

Силою благодати Божия влекомь, всем сердцем познал еси, угодниче Божий, суету жизни мира сего: того ради внимание к себе царево видя и общение со избранными слугами того имея, услады душевныя в сих мирских прелестех не обретал еси, но об иноческом житии в сердце твоем помышляя, молился еси о благодатней небесней помощи, и тую в себе ощутив, благодетелю Богу радостно взывал еси: Аллилуиа.

Икос 3

Имея возраст совершен, услышал еси, преподобне отче, в храме Божием словеса Господа не можете Богу работати и мамоне (Мф. VI. 24), сими словесами Христа Спасителя восхищенный, не приложился еси плоти и крови, но Божию призыву повинуяся со усердною молитвою на устах, заступлением Богоматери и угодников Божиих окормляемь, оставил еси царское приближение, отчий дом, богатство тленное, и нищ быв, тайне душевнаго ради спасения ко обители преподобных Зосимы и Савватия устремился еси. Таковому твоему послушанию гласу Господа дивящеся, сице восхваляем тя:

Радуйся, по завету Господа мир и вся, яже в мире, презревый.
Радуйся, крест Христов на рамена твоя с веселием возложивый.
Радуйся, путь тесный к Царствию Небесному избравый.
Радуйся, узкими враты за Господем последовавый.
Радуйся, богатство мира сего возненавидевый.
Радуйся, Христовой нищете себе смиренно покоривый.
Радуйся, Господа и Спасителя паче родителей и дома твоего возлюбивый.
Радуйся, царя земнаго оставивый, да Царю Небесному всего себе поработиши.
Радуйся, добрый странниче ко Отечеству Небесному.
Радуйся, безбоязненный путниче к морю-окиану ледовитому.
Радуйся, земный ангеле.
Радуйся, небесный человече.
Радуйся, святителю Христов Филиппе, исповедниче великий и преславный чудотворче.

Кондак 4

Буря смущений найде на тя, святителю Христов, егда Господь, испытуяй любящия Своя, не попусти тя дойти до Лавры Соловецкия, но остави тя в пределах земли Новгородския, у езера Онежского, идеже, в веси Киже, прилепился еси ко единому от житель страны тоя пасти овцы его. Но в сих напастех ты, угодниче Божий, унынию не вдался еси, радостно же вся Господа ради терпевый. Умильно взывал еси, овцы господина твоего пасый, истинному Пастырю Христу ангельскую песнь: Аллилуиа.

Икос 4

Слышаны быша на езере Онежском подвиги иноков обители Соловецкия, и паки, аки огнь, возгореся желание твое, святителю Филиппе, в сей святей обители во славу Божию потрудитися. Таже, оставль Кижу, устремился еси на оток Соловецкий, идеже никим же знаемь, паче же высокородие твое скрывая, смиренныя ради мольбы твоея принят был еси во обитель, да послушание твое Господеви истинно явиши. И послушник быв, вся повеленная тебе во обители радостно творил еси и своея воли вседушно отреклся еси. Сего ради в похвалу тебе сице глаголем:

Радуйся, кроткий и смиренный послушниче обители Соловецкия.
Радуйся, повеления игумена и старцев, яко веления Самого Господа, исполнявый.
Радуйся, сечением дров во обители смирение стяжавый.
Радуйся, земли копанием и камения ношением плоть свою обручивый.
Радуйся, аки вторый Дамаскин, скаредныя места очищавый.
Радуйся, всякие тягчайшия работы радостно исполнявый.
Радуйся, яко биемь бываем, никакоже злом за зло воздавал еси.
Радуйся, яко многия обиды и уничижения благодушно претерпевал еси.
Радуйся, Христовых заповедей добрый исполнителю.
Радуйся, церковных заветов усердный хранителю.
Радуйся, терпения учителю.
Радуйся, смиренномудрия наставниче.
Радуйся, святителю Христов Филиппе, исповедниче великий и преславный чудотворче.

Кондак 5

Богомыслие пустынное ко святому послушанию приложил еси, отче наш Филиппе, сего ради игумен обители радостно по благому твоему хотению сопричисли тя ко избранному стаду иноков Соловецких и твой постриг во инока соверши; ты же, со страхом и трепетом обеты иночества изрекая, о содействии благодати Божия молился еси и со слезами великого умиления взывал еси Господу: Аллилуиа.

Икос 5

Видеша игумен и братия обители Соловецкия в тебе воистину избранный сосуд Божия благодати: ангельский бо чин восприяв, великих подвигов твоих не оставил еси, преподобне, но всяко смиряя себе, носил еси дрова и воду, огнь возгнешал еси, в поварне и пекарне прилежно трудился еси, вкупе же паче прежняго в молитве и прочих духовных трудех ходил еси. Егда же иноцы обители начаша восхваляти тя блаженне, ты сея славы людския не стерпел еси, но оставль обитель, удалился еси на том же отоце во едино пусто место. И тамо денно и нощно не едино лето в молитве, чтении Слова Божия и богомыслии пребывал еси. За таковыя твоя во славу Господа подвиги восхваляем тя усердно:

Радуйся, истинного монашеского жития великий образе.
Радуйся, иноческих обетов пламенный исполнителю.
Радуйся, дневными и нощными подвигами плоть твою всецело духови покоривый.
Радуйся, молитве Иисусовой усердно прилежавый.
Радуйся, умную молитву от Господа стяжавый.
Радуйся, древним восточным подвижником искренний подражателю.
Радуйся, токмо в молитве ко Господу все утешение полагавый.
Радуйся, сладостным общением с Господом в пустыни дух твой питавый.
Радуйся, Божия Матере любимиче.
Радуйся, Ангелов собеседниче.
Радуйся, наше верное прибежище.
Радуйся, наше светлое упование.
Радуйся, святителю Христов Филиппе, исповедниче великий и преславный чудотворче.

Кондак 6

Проповедник словом и делом чистаго и святаго монашеского жития был еси, святителю Филиппе, сего ради игумен, престарелый в летех, вкупе с братиею обители умоли твое смирение прияти высокое звание иноков начальника и священства, да водимая тобою святая обитель яко яркий светильник всея Руси православныя явится, да иноцы и мирстии людие, молящиеся в ней, возрастают от силы в силу, воспевая Богу: Аллилуиа.

Икос 6

Возсия светом велиим обитель Соловецкая, егда святитель Филипп, гласу Божию повинуяся, восприял бремя тяжкое игуменства монастырского. Святый игумен, по заповеди Господа, себе самого яко слугу всех вмени, телесным бо трудом и молитвенным подвигом паче прежняго себе предавая, Христоподражательным своим нравом и иноческим житием братию без слова пленяше, таже чин церковного богослужения исправляше и о благоукрашении святыя обители попечение имеяше. Воспоминающе убо славные труды сего дивнаго игумена, восхваляем его тако:

Радуйся, Соловецкия обители мудрый управителю.
Радуйся, братии обители кроткий и смиренный начальниче.
Радуйся, о вечном спасении братии слезно ко Господу взывавый.
Радуйся, скорби и радости иноков в сердце твоем не тесно вмещавый.
Радуйся, яко поучения инокам усердно вещал еси.
Радуйся, яко Евангельския законы в сердца их глубоце внедрял еси.
Радуйся, добрым иноком сугубую честь воздававый.
Радуйся, строптивыя и нерадивыя иноки судом Божиим вразумлявый.
Радуйся, Христовыя любве и небеснаго мира усердный благовестниче.
Радуйся, вечныя правды Христовы твердый поборниче.
Радуйся, иноческих уставов ревнителю.
Радуйся, красоты церковных служб рачителю.
Радуйся, святителю Христов Филиппе, исповедниче великий и преславный чудотворче.

Кондак 7

Хотящих честне изобразити чудныя дела игуменства твоего вразуми, святителю Филиппе: недоумеет бо язык человеческий изрещи достойныя хвалы денным и нощным трудам твоим: твоему о благоукрашении обители попечению, твоему уставом церковным послушанию, твоим слезам молитвенным, твоим воздыханием сердечным, твоему пустынному уединению. Обаче в толиких безмерных трудех твоих силу благодари Божественныя видяще, усердно вопием щедродателю Господу Богу ангельскую песнь: Аллилуиа.

Икос 7

Новый Зосима явился еси обители твоей, святителю Филиппе. Всею душею твоею живя в Господе, присно в молитве пребывая, слезами умиления покрывая ложе твое, ты, святителю великий, не забыл еси и великого дела домовного строительства: новые храмы и скиты воздвигал еси, блатныя места46 осушал еси, пути по отоку Соловецкому исправлял еси, братския домы, больницы и прочия строения обители созидал еси. Таковому твоему доброделанию дивящеся, тако похваляем тя:

Радуйся, преподобному Савватию в молитве и духовнем делании подобный.
Радуйся, по домовому строительству и во игуменстве великому Зосиме равный.
Радуйся, преподобному Герману в твердей вере и светлем на Господа уповании подражавый.
Радуйся, добродетели всех Соловецких подвижников усвоивый.
Радуйся, честнаго Успения Богоматере и Боголепаго Спасова Преображения храмов мудрый зиждителю.
Радуйся, пустыни твоего имене и скитов обители основателю.
Радуйся, пресныя воды Соловецких источников во единем Святем езере совокупивый.
Радуйся, в красотах севернаго неба славу Премудраго Творца вселенной умильно созерцавый.
Радуйся, всякую пядь земли отоков Соловецких твоими честными стопами освятивый.
Радуйся, чащи лесныя и брега морския слезами умиления обильно орошавый.
Радуйся, пред Богом молитвенниче наш усердный.
Радуйся, святителю Христов Филиппе, исповедниче великий и преславный чудотворче.

Кондак 8

Странник безвестен и проситель смиренный иноческого послушания у врат обители Соловецкия явился еси, Филииппе, но како духовных твоих доблестей ради содеяся славно имя твое блаженнее, град бо Москва и вся Русь православная познаша в тебе яве добродетелей твоих светлость и молитв твоих силу; сего ради и был еси вождь духовен всея Руси святыя и всех, спасения ищущих, во еже взывати Господу: Аллилуиа.

Икос 8

Всею душею и телом обители преподобных Зосимы и Савватия поработал еси, отче преподобне, сего ради о нуждах обители сея зело прилежал еси и о сих царя Иоанна Грознаго извещал еси. Грозный же царь, юношеския дружбы твоея и подвигов твоих иноческих ради щедро обители твоей снабдение творяще, подражающе же ему, и прочии града Москвы обитателие от трудов твоих обители прилежаху, и к молитвенному твоему заступлению притекающе, тако прославляху тя:

Радуйся, от царских чертогов до иноческия нищеты нисшедый.
Радуйся, честь земную на богатство неоскудевающее пременивый.
Радуйся, Божественныя литургии пламенный совершителю.
Радуйся, слова Божия усердный изъяснителю.
Радуйся, иноческими подвигами твоими родительницу твою возвеселивый и житием твоим ко иночестей жизни склонивый.
Радуйся, нужды отечества твоего земнаго в сердце твоем имевый и о них пред Богом слезы источивый.
Радуйся, мирских людей наставниче.
Радуйся, столпе православия непоколебимый.
Радуйся, истины поборниче неодоленный.
Радуйся, утешение всех скорбящих.
Радуйся, отрадо к твоей помощи всех прибегающих.
Радуйся, святителю Христов Филиппе, исповедниче великий и преславный чудотворче.

Кондак 9

Всяк возраст и чин града Москвы зело возрадовася, егда изыде весть о приятии тобою, смиренным игуменом Соловецким, чести и сана первосвятителя Церкви Российския. Ведомо бо бе людем русским и прежнее твое к царю приближение, и царское твоих иноческих подвигов почитание. Сего ради упованием светлым сердца их исполнишася: новый бо первосвятитель истинный и мощный печальник и заступник пред Грозным царем о всех обидимых и правды ради гонимых восстанет, и в сей великой радости и надежде возгласиша Благодателю всех Богу благодарственно хвалебную песнь: Аллилуиа.

Икос 9

Ветийствующий язык человеческий не возможет достойне изобразити труды и скорби твоя, святителю Филиппе, на первосвятительском престоле Церкве Российския. Грозный бо царь в тыя дни свою державу злою опричниною возмути: люди русские зело сокрушахуся, егда о убиении мужей неповинных слышаху и козни жестокия видяху. И ты, ревнителю Божий, сию неправду цареву видя, в защищение верных сынов русских дерзновенно глас свой возвысил еси и, входя к царю, кротко того поучал еси, и опричнину злую упразднити и убиения невинных прекратити умолял еси. И благослови Господь святительское твое пред царем Грозным печалование. Царь Иоанн, твоим мольбам и слезам внемля, гнев свой на время укроти. Народ же русский и град Москва твое мощное пред царем заступление видяще, сице радостно восхваляху тя:

Радуйся, архиерею истинный.
Радуйся, яко вторый Моисей бремене всего народа русскаго носителю.
Радуйся, граду Москве и всему народу русскому словес Божественных усердный изъяснителю.
Радуйся, российский Златоусте, устами златыми Божия правды и суда Христова провозвестниче.
Радуйся, царя и людей русских во апостольских и отеческих преданиях мудрый наставниче.
Радуйся, непокоряющихся Божьему закону грозный запретителю.
Радуйся, Грознаго царя искренний, нелицеприятный и нельстивый друже.
Радуйся, об исполнении пути его и о вечном его спасении усердный и слезный молитвенниче.
Радуйся, злых опричнины деяний безбоязненный обличителю.
Радуйся, обидимых защитниче и скорбящих душею утешителю.
Радуйся, всех заветов Евангелия Христова смиренный исповедниче.
Радуйся, о земных наших скорбех милостивый печальниче.
Радуйся, святителю Христов Филиппе, исповедниче великий и преславный чудотворче.

Кондак 10

Спасти хотя всю Русь православную от суемудренного свирепства царского, яко пастырь добрый, душу твою за паству положити готовый, ты, святителю Христов, всенародно ярость самонравного царя на кротость преложити потщался еси. О новых же злодеяниях опричнины уведев и гнев царский на себе испытав, к венцу мученическому приуготовил себе и в благодатном умилении ко Господу взывал еси чистыми твоими устами хвалебную песнь: Аллилуиа.

Икос 10

Царя Грознаго ярость и свирепство зело угобзил еси, святителю отче наш Филиппе, егда Христову учению внимая, во храме Владычицы честнаго Ея Успения новыя беззакония царя Грознаго обличив еси, еще же и опричника в глумлении над Евангелием укорил еси. За сие твое дерзновение судом неправедным святительского сана лишен был еси, в храме Божием злыми опричниками во святительском одеянии обезчестен был еси и муки жестокия, в темницу ввержен, претерпел еси. Последи же, от смерти избавлен быв, во Отрочь монастырь во изгнание послан был еси. Чада же твоя духовная, твое поругание и страдание видяще, со слезами возглашаху тебе сия:

Радуйся, страдальче наш незлобивый.
Радуйся, паству твою до смерти возлюбивый.
Радуйся, пророку Илии и Предтече Господню во обличении царя беззаконнаго уподобивыйся.
Радуйся, учение Христово в доме царстем аки вторый Павел проповедавый.
Радуйся, великому Амвросию, епископу Медиолана, единоправный.
Радуйся, безбоязненный правды поборниче.
Радуйся, аки вторый Златоуст безчестие и изгнание от царя претерпевый.
Радуйся, о вразумлении царя Грознаго яко верный Христов пастырь непрестанно моливыйся.
Радуйся, наш благий и великий святителю.
Радуйся, наш златословесный учителю.
Радуйся, яко твоему подвигу Ангели возрадовашася.
Радуйся, яко твоему исповедничеству вся вселенныя дивится.
Радуйся, святителю Христов Филиппе, исповедниче великий и преславный чудотворче.

Кондак 11

Пение надгробное со слезами скорбными град Москву, обитель Соловецкую и всю Русь православную огласи, егда во вся концы отечества нашего изыде весть о мученической кончине твоей, наш дивный исповедниче. Смерть бо неправедную, горькую, во Отроче монастыре от рук злаго слуги царского восприял еси. Присно со Христом пребывая, молитву за убийц твоих творил еси, святителю, егда праведная душа твоя от тела нуждею разлучашеся. Мы же, прославляюще твою страдальческую кончину, со слезами умиления вопием премудрому Господу: Аллилуиа.

Икос 11

Свет благодатных исцелений обильно возсия от честных мощей твоих, святителю Филиппе, первее в Соловецкой обители, а послежде во граде Москве, в нюже многоцелебныя мощи твоя великим Никоном пренесошася. К сим мощем припадающе, в похвалу тебе, наш великий святителю, тако глаголем:

Радуйся, возвращением твоим в Соловецкую обитель братию обители зело возвеселивый.
Радуйся, игуменство твое в ней духовне возобновивый.
Радуйся, яко Соловецкая обитель части мощей твоих благодарне поклоняется.
Радуйся, яко сию часть мощей твоих обитель твоя, яко драгоценную жемчужину, почитает.
Радуйся, яко прославлением честнаго твоего тела и град Москву и все отечество наше возвеличил еси.
Радуйся, яко чудесами от нетленных мощей твоих благочестие в стране нашей умножил еси.
Радуйся, святителем Христовым Петру, Алексию и Ионе единоправный.
Радуйся, подвигом твоим святителя Ермогена на великое пастырское дерзновение воодушевивый.
Радуйся, светозарное солнце земли Российския.
Радуйся, разумного света заре.
Радуйся, светило церковное и архиерейская красото.
Радуйся, небесных законов на земли живая проповедь и христоподражательного жития образе.
Радуйся, святителю Христов Филиппе, исповедниче великий и преславный чудотворче.

Кондак 12

Благодать святаго дерзновения безбоязненно делом и словом вещати Христово учение подаждь нам, немощным, великий угодниче Божий и святителю Филиппе, наипаче подаждь сию благодать пастырем Церкви Христовыя, да возмогут они немолчно свою духовную паству учити и вразумляти, лицеприятия избегати, да таковое дерзновение стяжавше, вси мы на благом пути ко спасению обрящемся и сподобимся в вечном Небесном Царствии выну воспевати Господу: Аллилуиа.

Икос 12

Поюще твое дивное житие, твоя иноческия подвиги на отоце Соловецком воспевающе, твою святительскую ревность и дерзновение восхваляюще, поклоняющеся твоему до крове правдолюбию и исповедничеству, святителю отче наш Филиппе, молим тя в борениях и искушениях многоразличных не оставляти нас, но наипаче твоими молитвами укрепити, да возможем и мы твоими подражательми быти и тебе, нашего отца и наставника, восхваляти сице:

Радуйся, звездо Российская.
Радуйся, чистый сосуде Святаго Духа.
Радуйся, вселенским мучеником и исповедником подобниче.
Радуйся,Церкви Российския похвало и всего священства украшение.
Радуйся, иноческия кротости образе.
Радуйся, монашеского постнического жительства истинное правило.
Радуйся, безплотных сожителю.
Радуйся, Христова смирения ревнителю.
Радуйся, чудес велиих совершителю.
Радуйся, о скорбех земнаго отечества твоего милостивый пред Богом печальниче.
Радуйся, яко тобою Соловецкая обитель славится.
Радуйся, яко тобою град Москва и вся Россия украшается.
Радуйся, святителю Христов Филиппе, исповедниче великий и преславный чудотворче.

Кондак 13

О, великий святителю Христов Филиппе! приими от нас, грешных, сие похвальное пение и священными твоими молитвами тя поющия в мире сохрани, от напастей и бед избави, во святей православной вере укрепи, угодное Богу житие проводити помози, уныние наше в радость претвори, дух крепкого стояния за церковныя законы и церковныя предания обнови в нас, да тако сподобимся во веки в райских обителех воспевати нашему Пастыреначальнику и Господу:

Аллилуиа. Аллилуиа. Аллилуиа (трижды) и таже икос I и кондак I.

Молитва святителю Христову и чудотворцу Филиппу

О, великий печальниче земли Российския святителю Христов Филиппе! Великими и многими даровании обогати тя щедродаровитый Владыка Господь, ты же, яко раб благий и верный, дарования сия зело умножил еси, от отроческих лет даже до кончины твоея заповедем Господним внимая, пребывая в них и возрастая, полн сый любве и милосердия, кротости и смирения, сими добродетельми ты богатно служил еси Господу и присным твоим, образ евангельского жития показуя, благочестивым житием Бога прославляя. За сие житие твое от Бога прославлен еси, велим даром чудес обогатился еси, святое дерзновение стяжал еси и до днесь земному отечеству и народу твоему служиши, и воздыхания наши предворяеши.

И мы, грешнии, затупничеству твоему перед Богом верующее, молимся тебе усердно. Буди нам, якоже в земнем твоем житии, отец и заступник, помози всем нам крест земнаго жития с терпением и радостию носити. Малодушныя молитвою твоею подкрепи и от житейских соблазнов любовию твоею отврати, сеющия соблазны рукою твоею крепкою вразуми. Даждь нам, святителю Христов, прежде кончины нашея, радость твоего мощнаго заступления ощутити, даждь многострадальному твоему отечеству силы благодатныя присно Христу работати, якоже благочестивии отцы наши своим церковным житием славу Божию и веру Христову на земли множаху, даждь нам их благочестию подражати, уставы церковныя хранити, заповеди Божии благоговейно соблюдати, нищия любити и щедро им благотворити, обидимыя заступати, веру Христову и закон Божий безбоязненно исповедати, всякого греха гнушатися и одеждою всякия правды светло украшатися. Да тако твоими молитвами укрепляеми, возможем и мы житие свое богоугодне устроити, грехов прощение от Господа получити и милостию и человеколюбием Спаса нашего и Господа в небесных селениях водворитися, идеже ангели и вси святи славят великолепое имя Отца и Сына и Святаго Духа.

Акафист преподобноисповеднику Гавриилу, архимандриту Мелекесскому

Кондак 1

Избранный подвижниче и истинный пастырю Церкве Русския, / изрядный угодниче и твердый исповедниче Христов, / богоблаженне отче
наш Гаврииле! / Почитаем тя любовию и похвальная восписуем ти: / ты бо в заточении неотступно пребыл еси верен Христу, / в скорбех,
тесноте и гонениих благодаривый Бога. / Не престай молитися, поминая чад твоих, / да спасет Господь взывающих и поющих ти: // Радуйся, отче наш Гаврииле, теплый молитвенниче о душах наших.

Икос 1

Ангельскому житию поревновавый, от юности чистоту и верность Христу Богу сохранил еси, Господеви жизнию своею послужити желая,
вся земная и временная оставил еси, да приобрящеши богатство неиждиваемое. Сего ради и зовем тебе сице:
Радуйся, родителей благочестивых чадо богоизбранное;
радуйся, измлада ангельскими нравы украшенный.
Радуйся, чистое житие от юности возлюбивый;
радуйся, в богомыслии отрочество твое проводивый.
Радуйся, от лет юных сердце твое к подвижничеству склонивый;
радуйся, издетска к молитве и послушанию прилежавый.
Радуйся, еще во отрочестве к иноческому житию устремивыйся;
радуйся, волею своею воли Божией покоривыйся.
Радуйся, отче наш Гаврииле, теплый молитвенниче о душах наших.

Кондак 2

Видя Церковь Русскую раздираему, яко ризу Христову, от безбожных и злых, не убоялся еси, отче Гаврииле, но желая, аще ти есть душу
свою за веру положити, во всем последовати Христу, темже и дарова тя Господь пастыря верна и кротка, да упасеши овцы Его. Мы же с
благодарностию взываем Богу: Аллилуиа.

Икос 2

Разумом ти Свыше данным, богомудре Гаврииле, о душах чад Христовых усердное попечение имевый, темже убо ограждая их от ереси и
раскола, поученьми твоими веру истинную в сердцах их насаждал еси. Мы же, ведуще тя о спасении нас тако пекущася, с любовию вопием
ти:
Радуйся, яко ярость богоборцев ни во чтоже вменил еси;
радуйся, яко Церкви Божией послужити не убоялся еси.
Радуйся, пастырю, Свыше умудренный;
радуйся, благодатию Божиею просвещенный.
Радуйся, веры истинныя ревнителю;
радуйся, христианскаго благочестия рачителю.
Радуйся, кротостию украшенный;
радуйся, смирением обогащенный;
Радуйся, отче наш Гаврииле, теплый молитвенниче о душах наших.

Кондак 3

Сила Божия подается с верою призывающим имя Его, тя же Господь сподоби в годину тяжкую чин ангельский прияти, крепостию Божиею
именова, темже воздвигнув тя воистину воина верна Церкве Христовы. Ты же, прияв божественную благодать возблагодать, вопияше Богу: Аллилуиа.

Икос 3

Имеяй велию ревность в исполнении устава церковнаго, службу в храме благоговейно со слезами совершал еси, такожде и глаголы Божия
неустанно проповедуяй, зело усердно пастырски подвизался еси, самоотверженно Богу и людям служа. Темже и мы, горение твое по Бозе
видевше, поем ти таковая:
Радуйся, чистоты ангельския исполненный человече;
радуйся, неустанный словес Божиих проповедниче.
Радуйся, Церкве Христовы воине доблий;
радуйся, рабе благий и верный.
Радуйся, апостольских преданий хранителю;
радуйся, церковнаго устава блюстителю.
Радуйся, Православия исповедниче непреложный;
радуйся, Господа Вышняго служителю благоговейный.
Радуйся, отче наш Гаврииле, теплый молитвенниче о душах наших.

Кондак 4

Буря ярости и гонений, обрушившаяся на Церковь Русскую, поглоти в пучину лютыя скорби верныя люди Божия: мнози бо архиереи и
священницы в заточении томяхуся, ты же, о тех печаляся, любвеобильный отче, со духовными чады твоими, христианския любве
исполненными, втайне приношения собираяй, в темницу посылал еси. Мы же, истинное твое братолюбие ублажающе, взываем Богу:
Аллилуиа.

Икос 4

Слышаще безбожницы о тебе, яко пастырь почитаемый еси, и лжесвидетельствующе, наведоша на тя чреду гонений на долгия годы. Ты же,
помышляя, яко сие есть в любви и вере Божией тебе испытание, со смирением неложным приял еси крест твой, радуяся, яко Господь
сподоби тя пострадати и потерпети вся скорби, выпавшия Православным. Темже, мужество твое славяще, величаем тя словесы таковыми:
Радуйся, пастырю благий и любвеобильный;
радуйся, милости и сострадания к страждущим исполненный.
Радуйся, христианскаго милосердия верный учителю;
радуйся, неисчерпаемый в любви тайноделателю.
Радуйся, верный рабе, Христу последовавый;
радуйся, крест Его на ся вземый.
Радуйся, клеветы со смирением приявый;
радуйся, поношения с кротостию терпевый.
Радуйся, отче наш Гаврииле, теплый молитвенниче о душах наших.

Кондак 5

Божественныя милости исполненный, предивный отче Гаврииле, аки верный пастырь Христовы Церкве, и в заточении твое служение не
оставил еси, обаче и в тяжких испытаниих не престал еси помогати ближним твоим, просвещаяй вся светом веры Православныя. Мы же,
любовию твоею согреваемии, благодарне вопием Богу: Аллилуиа.

Икос 5

Видевше в заточении пребывающии еже по Бозе житие твое, преподобне, не токмо людие верующии к тебе стекахуся, помощи
молитвенныя просяще, но и разбойницы, по злым делом своим осужденнии, познаху тя отца, любовию преисполненнаго. Темже, воистину
тя пастыря добра почитающе, приносим ти таковая:
Радуйся, пастырскаго долга непоколебимый исполнителю;
радуйся, мира Божия благосклонный подателю.
Радуйся, Божия благодати дивный таинниче;
радуйся, обремененных и озлобленных скорый поборниче.
Радуйся, скорбящим велие утешение подаваяй;
радуйся, незлобием твоим тяжкосердых умягчаяй.
Радуйся, и в заточении паству твою молитвою не оставивый;
радуйся, милосердный отче, о чадех твоих сердцем горевый.
Радуйся, отче наш Гаврииле, теплый молитвенниче о душах наших.

Кондак 6

Проповедь веры христианския явися само житие твое, досточудне Гаврииле, егоже не могуще терпети, богоборцы, не взирающе на седины
твоя и болезни, всякая прещения тебе творяху, ты же, святый отче, вся страдания безропотно и мужественно претерпеваяй, в благий
Промысл Божий непоколебимо верил еси, взывая к Тому: Аллилуиа.

Икос 6

Возсиял еси Божиею благодатию, юже стяжа, преподобне, за всецелое себе отречение ближняго твоего ради, темже и прослави тя Господь
дары Духа Святаго, иже суть болезней исцеление и судеб Божиих тайновидение, имиже во славу Господа потрудился еси. Мы же, дивящеся таковому о тебе Божию произволению, прилежно вопием тебе сице:
Радуйся, светильниче веры, горяй и светяй;
радуйся, стамно Божия благодати.
Радуйся, дары Духа Святаго обогащенный;
радуйся, сострадания к ближнему источниче преистекаемый.
Радуйся, в немощи твоей тяжкия труды понесый;
радуйся, лютый мраз, биения и поругания терпевый.
Радуйся, смертное испив, по глаголу Божию, неврежден бывый;
радуйся, за враги твоя по заповеди Христовой моливыйся.
Радуйся, отче наш Гаврииле, теплый молитвенниче о душах наших.

Кондак 7

Хотя всем сердцем твоим, блаженне Гаврииле, единому Господу работати, себе ни во чтоже вменил еси, труды к трудом в дусе кротости и
смирения прилагая, постом и бдением плоть свою умерщвляя, дерзновение в молитве стяжал еси, всех призывая верно славити Бога, в
Троице Единаго, и воспевати Ему: Аллилуиа.

Икос 7

Новаго показа тя Господь заступника и молитвенника о нас, грешных, яко помощию безмерною и любовию неисчерпаемою многия упасл
еси ко спасению. Мы же, чтуще святую память твою, со умилением взываем ти:
Радуйся, жизнию монашескою усердно подвизавыйся;
радуйся, на ниве Христовой изрядно потрудивыйся.
Радуйся, всецелое послушание архипастырем твоим имевый;
радуйся, постом и бдением плоть твою изнуривый.
Радуйся, отче чадолюбивый, о детех твоих тепле моливыйся;
радуйся, о ближних твоих прилежно пекийся.
Радуйся, винограда Христова верный делателю;
радуйся, и за ны пред Богом усердный ходатаю.
Радуйся, отче наш Гаврииле, теплый молитвенниче о душах наших.

Кондак 8

Странник быв и бездомен, из заточения в весь свою явился еси, блаженне, не имеяй где главу приклонити, во всем уподобивыйся Христу,
якоже друзи и искреннии твои далече от тебе сташа и бояхуся убо к себе прияти, ложно тя врага народа именующе. Но верен Бог любящим
Его, ибо не остави тя, и Тому поем: Аллилуиа.

Икос 8

Всем был еси вся, да многия ко Христу приведеши, и вся чада твоя, светом веры, надежды и любве твоея озаряемии, стекахуся к тебе,
досточудне Гаврииле, со всея страны нашея. Ты же, яко чадолюбивый отец, недуги своя превозмогая, без устали днем и нощию двери твоея души страждущим отверзал еси. Мы же ти, яко благодетелю, с любовию тепле вопием таковая:
Радуйся, многи скорби, болезни и нужды Христа ради понесый;
радуйся, странничеством твоим Христу уподобивыйся.
Радуйся, неисчерпаемый кладезю веры, надежды и любве;
радуйся, яко сердце твое уподобися неопалимей купине.
Радуйся, о сирых и убогих с любовию попечение имевый;
радуйся, бедных вдовиц в нуждах их заступавый.
Радуйся, в бедах и напастех помощи скорый подателю;
радуйся, и о всех притекающих к тебе верный предстателю.
Радуйся, отче наш Гаврииле, теплый молитвенниче о душах наших.

Кондак 9

Всякия скорби, болезни и труды в жизни твоей непоколебимо претерпел еси, в сердце твоем Единаго Господа имеяй, темже мирныя,
блаженныя и христианския кончины от Бога сподобивыйся, странствие земное совершил еси и в Горния обители вселился еси, вознося
песнь Богу: Аллилуиа.

Икос 9

Витиям многовещанным не довлеет словес, во еже изрещи всю скорбь, еюже исполнися сердца верных, с любовию к честным останком
твоим стекающихся, и со слезами ко гробу твоему припадающих, и поминающих тя словесы таковыми:
Радуйся, крине, мира Христова благоухания исполненный;
радуйся, светильниче лучезарный, божественным елеем наполненный.
Радуйся, лозо неувядаемая, мног плод принесшая;
радуйся, кадильнице златая, фимиам молитвы к Богу вознесшая.
Радуйся, адаманте, крепость в терпении нам показавый;
радуйся, каменю, образ твердости в вере нам явивый.
Радуйся, столпе непоколебимый Церкве Православныя;
радуйся, светлая заре незаходимаго Солнца правды.
Радуйся, отче наш Гаврииле, теплый молитвенниче о душах наших.

Кондак 10

Спасение души твоея от Бога улучивый, предивне Гаврииле, в радость Господа вшел еси, и ныне, венцем нетленным увенчавыйся, со
Ангелы ликуеши, взирая на Всецаря Творца; Того моли, да сподобит Господь и нас купно с тобою воспевати Ему: Аллилуиа.

Икос 10

Стена быв при жизни всем приходящим к тебе, такожде и по смерти ны не оставлявши твоим заступлением; духом ныне пребываяй у
Престола Вышняго, за всех с верою и любовию тебе молящихся тепле предстательствуеши и помощь неоскудную подаеши. Тебе бо, яко
мощному заступнику о душах наших, благодарственно поем сицевая:
Радуйся, от лет ранних Бога всем сердцем возлюбивый;
радуйся, верен Тому до конца дний твоих пребывый.
Радуйся, жизнию твоею безраздельно Господеви послуживый;
радуйся, темже Царствие Небесное себе унаследовавый.
Радуйся, всех к тебе прибегающих скорый услышателю;
радуйся, о всех тебе с верою молящихся прилежный попечителю.
Радуйся, помощниче всем в бедах и напастех сущим;
радуйся, целителю душею и телом болезнующих.
Радуйся, отче наш Гаврииле, теплый молитвенниче о душах наших.

Кондак 11

Песнь благодарственную восписуют людие Православнии, радующеся о толиком благодеянии Божием, яко Церковь Русская ныне украсися
сонмом новых мучеников и исповедников Российских, с нимиже и ты, отче Гаврииле, вкупе веселяся в чертозех райских, воспеваеши Богу:
Аллилуиа.

Икос 11

Свет велий веры христианския силищася сатана затмити, седмьдесят лет мучаше и убиваше люд Православный, темже убо сотворь
невиданное доселе воинство Христу Богу нашему, Имже и посрамлен бысть. Тебе же, отче Гаврииле, яко верному ратнику воинства сего,
воспеваем сице:
Радуйся, прещений нечестивыя власти не убоявыйся;
радуйся, в роде сем Господа исповедати не постыдивыйся.
Радуйся, иго Христово на рамена своя вземый;
радуйся, вслед Господа тесными враты ходивый.
Радуйся, вместо сладости земныя терния избравый;
радуйся, ныне же нетленным венцем от Бога украсивыйся.
Радуйся, яко Христа ради и Евангелия себе отверглся еси;
радуйся, яко нищетою духовною богатство неиждиваемое стяжал еси.
Радуйся, отче наш Гаврииле, теплый молитвенниче о душах наших.

Кондак 12

Благодать Божия, еюже излияся море чудес от честных мощей твоих, предивне Гаврииле, днесь собра вся верныя, с благоговением и
любовию чтущия святую память твою и молящия ти: не остави нас и ныне предстательством твоим, обидимыя заступи, болящия исцели, в
беду впавшия свободи и всех нас сохрани молитвами твоими, да выну поем Богу: Аллилуиа.

Икос 12

Поюще песнь благодарения Всещедрому и Человеколюбцу Богу, прославльшему тя, яко вернаго исповедника Церкве Русския, ублажаем
болезни и труды твоя, имиже во славу Божию поработал еси, восхваляем подвиги твоя, яже за Христа претерпети сподобился еси,
почитаем пастырскую кротость и смирение твое, яко добре упасл еси чада Православная, и воспеваем тя хваленьми сицевыми:
Радуйся, служителю Христов и любимиче Божий;
радуйся, пастырю благий, смиренный и кроткий.
Радуйся, нуждным и отягощенным неложное вспоможение;
радуйся, скорбящим и обуреваемым присное утешение.
Радуйся, архимандрите, духовныя овцы добре хранивый;
радуйся, друже Божий, крест Христов доблестне носивый.
Радуйся, любимаго Господа лик пресветлый видети сподобивыйся;
радуйся, яко во светлости святых Его ныне пребываеши.
Радуйся, отче наш Гаврииле, теплый молитвенниче о душах наших.

Кондак 13

О преславный и достохвальный исповедниче Христов, преподобне и богоносне отче наш Гаврииле, пастырю кроткий и чадолюбивый! В
умилении молебно тебе предстоящих не презри, но твоим предстательством заступи и помози богоугодно течение жизни нашея скончати,
Христа Бога верно и небоязненно исповедующе, да ныне и присно с тобою вкупе и всеми святыми поем Ему: Аллилуиа, аллилуиа,
аллилуиа.
Сей кондак чтется трижды, затем 1-й икос и 1-й кондак.

Акафист преподобному Антонию Сийскому

Кондак 1

Избраннаго вождя иноков, изряднаго учителя подвижников, добродетельми яко цветы украсившася, чудесы же, яко лучами солнечными, сияюща, восхваляем тя с любовию, преподобне. Ты же, предстоя престолу Пресвятыя Троицы, испроси нам оставление грехов и избавление от всех бед и зол; да житие неблажненно и безмятежно текуще, благодарне зовем ти: Радуйся, преподобне отче наш Антоние.

Икос 1

Ангелов ревнитель от юности показался еси, преподобне; рождейся во убозей веси, яко гражданин небеснаго Иерусалима ходил еси; прост сый земледелец, первозванному апостолов тезоименит и подражатель был еси; Христу последуя, многи ученики собрал еси. Сего ради зовем ти:
Радуйся, рождением радость, яко первенец, родителем подавый.
Радуйся, и на небесех благословение первородных наследивый.
Радуйся, юности буесть издетска отложивый.
Радуйся, словесное млеко Божественных писаний, паче матерня, вожделевый.
Радуйся, в душеполезных учениих сверстники своя превозшедый.
Радуйся, благочестием и разумом наставники удививый.
Радуйся, яко измлада сказания о святых и жительство их возлюбил еси.
Радуйся, яко рано уразумел и презрел еси суету благ временных.
Радуйся, яко дом Божий паче отча избрал еси.
Радуйся, яко издетска навыкл еси песнословити Господа.
Радуйся, яко образ Создателя на дсках живописуя, яснейшее подобие Его на скрижалех сердца твоего вообразил еси.
Радуйся, яко от юности в сердцы твоем к небесным восхождения положил еси.
Радуйся, преподобне отче наш Антоние.

Кондак 2

Видяще близ кончину живота своего, благовернии родителие твои с молитвою предаша тя и братию твою Господеви. Сего ради и по смерти их не познал еси себе сира, но со благодарением возопил еси Богу: Аллилуиа.

Икос 2

Разумом и испытанием конечне познал еси суету привременныя сладости; достигнув же в меру возраста в мужа совершенна, подобно подвигоположнику своему, явившему себе мирови, тридесяти лет вдал еси себе в службу Господеви; оставив мир и вся, яже в нем, приял еси образ ангельский. Таковое убо изволение твое восхваляюще, глаголем:
Радуйся, яко на распутиих мира сего обрел еси правый путь в Царствие Небесное.
Радуйся, яко оставив дом отца своего водворился еси в дому Господни.
Радуйся, добрый рабе, яко был еси верен Владыце твоему.
Радуйся, яко уже неси раб, но сын и наследник Божий.
Радуйся, яко и в супружестве, како угодити Господеви, помышлял еси.
Радуйся, яко в иночестве всецело Господеви себе предал еси.
Радуйся, яко вожделения плоти обуздал еси.
Радуйся, яко плоть духови покорил еси.
Радуйся, яко раздав имения своя, нищыя ущедрил еси.
Радуйся, яко нищетою богатство нетленное стяжал еси.
Радуйся, яко убегл еси соблазнов мира и сетей диавола.
Радуйся, горлице пустыннолюбная, исторгнувшаяся от сети ловчи.
Радуйся, преподобне отче наш Антоние.

Кондак 3

Сила Божественная яве укрепи тя, обнощевавша за пять поприщ до святыя обители Пахомиа; егда бо в соннем видении крестом осени тя старец святолепен, рекий ти: возми крест твой и гряди вслед мене, не бояся козней диаволих; ты, в радости востав от сна, всю нощь молился еси Господеви, благодарне воспевая: Аллилуиа.

Икос 3

Имый сердце уготовано в службу Господеви, Сего пречистому образу со слезами радости и благодарения поклонился еси во вратех тоя обители, в нюже вселься, не солгал еси Святому Духу, но паче всех работал еси Господеви. Сего ради зовем ти:
Радуйся, яко препоясался еси с высоты силою.
Радуйся, яко крепце ополчился еси противу плоти, мира и диавола.
Радуйся, яко приискренне принеслся еси Богови.
Радуйся, яко сраспялся еси Христу.
Радуйся, яко сладце понесл еси бремя Его.
Радуйся, яко смирением украсился еси.
Радуйся, яко вся, яже на земли, мудрования отринул еси.
Радуйся, яко постническими труды Богу угодил еси.
Радуйся, яко глаголы Божественными душу напитал и укрепил еси.
Радуйся, яко бодренною молитвою и псалмопением дух твой окрылил еси.
Радуйся, яко бдении всенощными и хранением сердца уготовал еси себе к зрению невечерняго света.
Радуйся, яко образ жития иноческаго был еси.
Радуйся, преподобне отче наш Антоние.

Кондак 4

Бурю душегубительну непщуя быти славу человечу, из обители в пустыню удалился, идеже храм воздвигл еси, и тамо седмь лет непрестанными труды, молитвами и посты благоугождал еси Богови, немолчно воспевая: Аллилуиа.

Икос 4

Слышав молву и прещения окрестных жителей, помянув еси словеса Христова, бежати от гонящих ны, и сквозе непроходныя дебри привел еси ученики твоя ко езеру, идеже обретеся место, за многа лета в жилище иноком назнаменанное, и посреде дебрей, блат и езер с дивиими зверьми вселился еси. Сего ради взываем ти:
Радуйся, смиренномудрием всяку распрю погасивый.
Радуйся, кротостию злобу победивый.
Радуйся, любовию вражду отмстивый.
Радуйся, необитаемая места молитвою освятивый.
Радуйся, безмолвныя дебри Божественными песнми огласивый.
Радуйся, в непроходимых стези благи обретый.
Радуйся, в напастех и искушениих терпения и упования не погубивый.
Радуйся, спутники твоя в терпении укрепивый.
Радуйся, в неправеднем изгнании, входы Царства Небеснаго обретый.
Радуйся, древо плодоносно, при водах насажденное.
Радуйся, финиче, процветый в пустыни.
Радуйся, яко кедр, иже от Ливана, возвеличивыйся.
Радуйся, преподобне отче наш Антоние.

Кондак 5

Боготечней звезде уподобился еси водяй спутники твоя на место, идеже первее водрузил еси Крест Господень, и слезно молился еси Владыце Христу, сохранити тя от враг видимых и невидимых, и утвердити в терпении нести крест свой и пети Богу: Аллилуиа.

Икос 5

Видя невидимых врагов прилоги, отгонял еси тех, подъемля руце на молитву в трудех и подвизех непрестанных, дивиими точию зелии питался еси; алчущыя же ученики твоя, не имый хлеба, словесы Божественными насыщал и укреплял еси, дондеже некто, мимоходяй, подаде ти вся потребная к препитанию и строению обители. Сицевому убо смотрению Божию, якоже и вере твоей дивящеся, радостно вопием ти:
Радуйся, безсилие темных сил обличивый.
Радуйся, силу молитвы победительну показавый.
Радуйся, веру непоколебиму стяжавый.
Радуйся, упование неотложно сохранивый.
Радуйся, любовь нелицемерну и безкорыстну соблюдый.
Радуйся, всяко житейское попечение отложивый.
Радуйся, всяку печаль на Господа возвергий.
Радуйся, терпением во искушениих, мужество необоримо явивый.
Радуйся, мудрый строителю, не на песце, а на тверде камени зиждяй.
Радуйся, яко нищ быв Господа ради, доволен был еси многи боголюбцы собрати и препитати.
Радуйся, ничтоже имый, вся содержай.
Радуйся, в промышлении любве Божия, источник всякаго довольства неизсякающ обретый и иным явивый.
Радуйся, преподобне отче наш Антоние.

Кондак 6

Проповедник святыни твоея, преподобне, явися враг твой, един от приставник к собиранию даней; он бо, непщуя тя имуща стяжания многа, наят разбойники расхитити обитель твою, но не возможе озлобити ю, народа ради, со оружии обстояща ю; уведевый же, яко не человеки, но Силы Небесными охраняешися, при ногу твоею раскаяся о зле, просяй прощения. Ты же незлобив сый, с любовию отпустив его, воспел еси Богу: Аллилуиа.

Икос 6

Возсиял еси яко звезда светлая, лучами святыни озаряя Россию; слава добродетелей твоих промчеся по всем градом, привлачащи многия во обитель твою. И царь, послав тебе грамоту, да строиши пустынное жительство, предаде себе и царство свое твоим богоприятным молитвам, имиже ограждаеми зовем ти:
Радуйся, российских царей предстателю.
Радуйся, Отечествия твоего хранителю.
Радуйся, светильниче, горяй любовию и светяй святынею.
Радуйся, воеводо полка иноческаго.
Радуйся, правый водителю ищущих спасения.
Радуйся, силою Божиею изъимаяй из плена греховнаго.
Радуйся, свобождай от работы суетныя.
Радуйся, многия козни лукаваго помощию Божиею победивый.
Радуйся, исполняяй душы сладостей духовных.
Радуйся, источаяй токи слезныя из сердец окамененных.
Радуйся, воздеянием руку твоею, спасаяй нас от нападений мысленнаго Амалика.
Радуйся, преводяй благопокоривыя ти в землю, святым обетованную.
Радуйся, преподобне отче наш Антоние.

Кондак 7

Хотяй насыщати словесы Божественными и песнми духовными собранное тобою стадо, создал еси храм Живоначальныя Троицы, и неописанный образ Триединаго Божества потщался еси вообразити на иконе, споспешествующу ти самому Господу, Емуже в посте и молитве работал еси, вопия: Аллилуиа.

Икос 7

Новое чудо яви Господь, изнесый невидимою рукою честную икону из горящия церкве и невредиму ю поставивый посреде обители; ты же, радуяся, приемь ю, с упованием на Господа, новый пространнейший дом Пресвятей Троице воздвигл еси, и иныя храмы наздал еси, и тако обитель благоустроил еси, юже и ныне ограждаеши молитвами твоими, спасаяй вопиющыя ти:
Радуйся, яко твоими молитвами новый источник благодати Божия отверзеся.
Радуйся, яко икона Пресвятыя Троицы, тобою начертанная, чудесы прославися.
Радуйся, яко в пустыни обитель благочестия процвете.
Радуйся, яко тобою пристанище благоотишно душам уготовася.
Радуйся, яко тобою училище покаяния устроися.
Радуйся, яко тобою открыся путь хотящым к почести вышняго звания тещи.
Радуйся, яко тобою лествица духовных восхождений утвердися.
Радуйся, яко ищущым спасения от потопа греховнаго нов корабль тобою исправися.
Радуйся, яко во обители твоей исцеляются недуги душ и телес.
Радуйся, даяй прибежище целомудрию, постничеству и вольней нищете.
Радуйся, яко ищущии твоего предстателства, присно милость Божию обретают.
Радуйся, яко приял еси благодать молитися о всех.
Радуйся, преподобне отче наш Антоние.

Кондак 8

Странная чудеса во обители твоей сотвори Господь своею иконою, юже из пламене чудно спасе; точию бо прикоснуся к ней усты слуга некий, абие свободися от духа злаго. Иный слуга, положен быв пред нею, избавися падучия болезни; и сестра иереа, слепа сущи, абие прозре, егда облобызаше чудотворный образ Пресвятыя Троицы. Сего ради и мы Пресвятей Троице вопием: Аллилуиа.

Икос 8

Весь собор инок едва возможе преклонити смирение твое к приятию игуменства; еже приемь, дивен настоятель был еси, первенствуя в трудех иноческих, яко мний всех и раб всем показуяся, рубищем покрывая себе, смиренным же зраком утаевая обилие благодати и богатство святыни. Сего ради приснии радовахуся, пришельцы же не мняху тя началника быти, мы же умильне зовем ти:
Радуйся, яко мний мняйся быти, велий у Господа славы вменился еси.
Радуйся, яко уча ины творити, вся первее сам сотворил еси.
Радуйся, яко нощь не преможе твоего бдения.
Радуйся, добрый страже дома Божия.
Радуйся, яко в зраце твоем присно являшеся трезвение ума твоего.
Радуйся, правило веры и образ смирения.
Радуйся, яко тягчайшыя работы люботрудне со всеми разделял еси.
Радуйся, яко болящым усердно послужил еси.
Радуйся, яко странныя ввел и нищыя препитал еси.
Радуйся, яко немощи немощных терпеливно понесл еси.
Радуйся, преподобне отче наш Антоние.

Кондак 9

Всяку славу и честь аще и праведне тебе воздаему от человек, непщуя быти виновну лишения славы Божия, предал еси власть твою единому от ученик твоих, и со единым от них тайно отшел еси во остров един, идеже вдал еси себе непрестанней молитве, трудом и пощению, бодренно воспевая Господеви: Аллилуиа.

Икос 9

Ветия дивен был еси, присно от сердца исполнена любве глаголяй и помышления человеческая духом провидяй, единаго от ученик твоих предварив, наставил еси не отлагати обеты иноческия ради мирския прелести; и утешив его словесы Писания, возбранил еси злому помыслу возвратитися в сердце его. Сего ради зовем ти:
Радуйся, изряднейший врачу духовный.
Радуйся, верный наставниче умов заблуждших.
Радуйся, сердец мятущихся упокоителю.
Радуйся, злых начинаний разорителю.
Радуйся, благих помыслов насадителю.
Радуйся, святых желаний внушителю.
Радуйся, разслабленныя воли укрепителю.
Радуйся, искушений и соблазнов избавителю.
Радуйся, от прилогов диаволих защитителю.
Радуйся, унылых и отчаявающихся утешителю.
Радуйся, усыпленных совестей возбудителю.
Радуйся, путей покаяния и спасения мудрый сказателю.
Радуйся, преподобне отче наш Антоние.

Кондак 10

Спастися хотящии стужаху ти, приходяще в пустынную келлию твою; сего ради далечайше в дебрь отбегл еси, и во глубине гор, аки в конобе, водворился еси, и тягчайшыя подвиги подъял еси, презрев страхования демонов и обнажив до чресл тело мшицам, в молитве терпел еси, воспевая Богу: Аллилуиа.

Икос 10

Стеною крепкою и оплотом надежным был еси обители твоей, егда возвратился еси в ню ко учеником твоим, разсеятися хотящым, и добре пасл еси стадо твое; уста бо твоя, яко сот мед, искапаху словеса благодати, зрак же твой являше кротость и любовь отчу, седина извествоваше мудрость ума и чистоту сердца, согбенный вид твой, старче Божий, подобяше тя древу, красных плодов обилием долу преклонену. Сего ради зовем ти:
Радуйся, красото Церкве Христовы.
Радуйся, сосуде святыни.
Радуйся, цвете иночества.
Радуйся, светилниче мирови.
Радуйся, красное здание благодати Христовы.
Радуйся, преукрашенный храм Святаго Духа.
Радуйся, новый образе Божий.
Радуйся, подобие Христово.
Радуйся, дражайший кораблю, вносяй в пристанище неисчетна сокровища духовная.
Радуйся, купец, приумноживый вданные ти от Бога таланты.
Радуйся, верный приставниче дому Божия.
Радуйся, преподобне отче наш Антоние.

Кондак 11

Пение Господеви совершившым учеником твоим, в праздник боголепнаго Преображения Христова предложил еси во славу Божию велие и чудно учреждение на трапезе, якоже и Господь сотвори; повелел еси рыбарем, обнощь всуе труждавшымся о ловитве рыб, паки воврещи мрежу во езеро, и якоже предрекл еси им, извлекоша множество великих и различных рыб, яко всем дивитися, и дивному во святых Богу воспети: Аллилуиа.

Икос 11

Светозарную жизнь скончавая, (седмидесяти девяти лет) старец сый, яко отец чадолюбив, вся смотрителне устроил еси во обители твоей. Ученики твоя, о скорем преставлении твоем скорбящыя, наставил и утешил еси; уставы общежития писанием утвердил еси, и вместо себе иного игумена нарекл еси; сам же во бдении и молитве не вкусил еси покоя, дондеже Господеви предал еси святую душу твою. Ученицы же твои, возвращшеся из храма и видевше тя бездыханна лежаща, руце же яко молящуся при персех имуща, со слезами возопиша:
Радуйся, благий наш отче, зряй ныне Отца светов.
Радуйся, пастырю наш добрый, предстояй ныне пастыреначалнику Христу.
Радуйся, питателю наш, сладостьми небесными насыщаяйся.
Радуйся, покровителю наш, во кровех небесных водворивыйся.
Радуйся, предстателю наш пред Богом, ангельская зряй утешения.
Радуйся, сожителю святым небожителем.
Радуйся, гражданине горняго Иерусалима.
Радуйся, священная главо, венчанная от Царя славы.
Радуйся, зрителю Триипостаснаго Света.
Радуйся, ведче божественных таин.
Радуйся, на лоне любве Божия упокоивыйся.
Радуйся, радостей ради небесных, всяку болезнь и печаль конечне забывый.
Радуйся, преподобне отче наш Антоние.

Кондак 12

Благодати сосуд честное тело твое, не дерзнуша ученицы твои, по глаголу твоему, изврещи в дебрь на растерзание зверем, или обесити на стене в снедь птицам или потопити во езере; но праведно разориша завещание твое, благочестне положше мощи твоя во храме Живоначалныя Троицы и гробницу твою украсивше святыми иконы, по всяк вечер усердно стекахуся пети над нею надгробная: Аллилуиа.

Икос 12

Пети вся чудеса твоя не возможем, многа бо зело дивная сотворил еси и по смерти твоей. Сего ради веруем, яко ныне на небесех живеши, и приносимая тебе пения милостивно приемлеши, и паче дерзаем глаглати:
Радуйся, божественный врачу, всяку болезнь и всяку язю скоро исцеляяй.
Радуйся, разслабленныя возставляяй.
Радуйся, и малодушныя утверждаяй.
Радуйся, слепыя видети творяй.
Радуйся, и помраченныя умы, смысленны деяй.
Радуйся, и неверующыя веровати научаяй.
Радуйся, уповающыя спасаяй.
Радуйся, из греховныя бездны изъемляй.
Радуйся, от насилия демонскаго свобождаяй.
Радуйся, к самоубийству текущыя воспящаяй.
Радуйся, паче надежды помощь подаваяй.
Радуйся, и не звавшым тя, яко зван, благовременне помогаяй.
Радуйся, преподобне отче наш Антоние.

Кондак 13

О предивный чудотворче и великий угодниче Христов, преподобне отче Антоние, предстояй ныне престолу Пресвятыя Троицы, приими от нас грешных приносимая ти хвалебная пения и молитвами твоими испроси нам у Господа отпущение грехов, избавление от бед временных и спасение от мук вечных, да с тобою выну Триипостасному Богу воспеваем: Аллилуиа.

(Этот кондак читается трижды, затем икос 1 и кондак 1)

Молитва

О предивный чудотворче и великий угодниче Божий, преподобне отче Антоние, пастырю наш добрый, теплый заступниче и скорый помощниче; предстояй престолу Пресвятыя Троицы, призри милостивым оком на ны и на вся люди, благоговейне притекающыя к честному гробу твоему, в немже лежащыя святыя мощи твоя, от дний древних нетлением цветущыя и благодатию Животворящаго Пресвятаго Духа благоухающыя, исцеления от всяких недугов душевных и телесных неоскудно источают. Услыши нас молящихся тебе и чтущих святую память твою. Простри руце твои ко Владыце небесе и земли, страждущую страну Российскую от лютых безбожник и власти их да свободит, и да возставит престол православных царей, верных рабов Его, в скорби и печали день и нощь вопиющих к Нему, многоболезный вопль да услышит и да изведет от погибели живот наш, и испроси нам оставление прегрешений наших. Моли милостиваго Бога отвратити от нас всякий гнев Его, праведно на ны движимый и сохранити не точию обитель нашу, но и вся грады и веси, и вся страны христианския, и люди живущыя в них от града и глада, от труса и потопа, от огня и меча, от нашествия иноплеменных и междоусобныя брани, от смертоносныя язвы и всякия пагубы и всякаго зла, даровати же нам вся к жизни временней благопотребная и к вечному спасению полезная. Помози нам, святче Божий, избежати пагубных сетей диаволих, препобедити соблазны мира и умертвити уды нашя сущыя на земли; отврати очи наши от суетных и прелестных вещей земных, направи же умы и мысли нашя к зрению красот божественных, пренебесных и нетленных; сердца наша, недугующая страстьми греховными, исцели, да не прильпнут сластем привременным, и безместным; согрей же я божественною любовию, да вожделеют истиннаго и непреходящаго блаженства, еже в Бозе. Укрепи нас ко исполнению заповедей Господних, даждь нам покаяние сердечное и умиление слезное, молитву непрестанную и трудолюбие неослабное, бодренное трезвение ума и хранение сердца, мир помыслов, чистоту желаний, правоту деяний, да избавльшеся тобою от всех враг видимых и невидимых, от всяких зол душевных и телесных, и соблюдше веру правую, надежду неотложную и любовь нелицемерную, богоугодне скончаем житие наше на земли, и прешедше в жизнь вечную, сподобимся зрети трисветлую зарю трисияющаго вечнаго Солнца, и в невечернем дни Небеснаго Царствия, купно с тобою и со всеми святыми, благодарне воспевати и благословити Пресвятую Троицу, Отца и Сына, и Святаго Духа, во веки веков. Аминь.

Молитва иная

О богоблаженне и приснопамятне отче наш Антоние! Не мним тя мертва суща, аще телом и преставился еси от нас, но жив в соборе ангелов водворяешися. Моли за ны, избранниче Христов, и не презри нас верою и любовию чтущих тя, поминай нас недостойных у престола Царя Небеснаго, тебе бо дадеся благодать молитися за ны. О, заступниче и молитвенниче наш добрый! Се бо святых мощей твоих рака пред очима нашима видима есть, сохраняй убо нас всегда от сетей вражиих; молися ко Господу о спасении душ наших и испроси нам покаяния время и христианскую кончину безболезненну, непостыдну, мирну, да невозбранно прейдем мытарства воздушных князей и сподобимся Небеснаго Царствия со всеми угодившими Владыце неба и земли, Господу нашему Иисусу Христу, Емуже подобает всякая слава, честь и поклонение всегда, ныне и присно и во веки веков. Аминь.

Акафист святому преподобному Трифону, Печенгскому чудотворцу

Кондак 1

Избравшу тя Пастыреначальнику Христу во апостола страны северныя, абие отринул еси, досточудне Трифоне, мира сего красная, претерпел же всяко озлобление, благовестил еси седящым во тме и сени смертней Бога явльшагося плотию: темже со апостолы срадуется дух твой в небесных обителех. Имея убо дерзновение ко Христу Богу нашему, от всяких бед избави нас зовущих:
Радуйся, Трифоне, страны северныя просветителю, Печенгский чудотворче.

Икос 1

Ангелы Своя странам и языком предстатели даровавый Бог, егда прииде времен исполнение, моления ради ангела страны, яже близ океана хладна, и народа лопска предстателя, призва тя во благовестие, всехвальный Трифоне, яко да спасени будут людие тии. Поминающе убо сия, вопием ти:
Радуйся, священнаго корене благое прозябение.
Радуйся, пустынным издетска житием сосуд избран себе Богови уготовавый.
Радуйся, зван быв свыше, к океану морю преселивыйся.
Радуйся, во Христе грядущее избавление тамо благовестивый.
Радуйся, поспешествующей ти благодати Божией, приведый ко Христу чад множество.
Радуйся, совершенною Христа любовию уязвився, образ по сем иноческий на себе приемый.
Радуйся, Троицы Живоначальныя обитель устроивый, и яже ко Христу монахов ликостояния.
Радуйся, велия ради смирения от начальства над обителию отрекийся, повелеваяй зверьми дивиими.
Радуйся, течение свое святолепне скончав, благочестне ко Христу отшедый.
Радуйся, яко обитель твоя, от враг разоренная, по словеси твоему паки возставится.
Радуйся, по преставлении твоем царя Феодора спасый и всем потребная скоро подаваяй.
Радуйся, Трифоне, страны северныя просветителю, Печенгский чудотворче.

Кондак 2

Видяща родителя твоя, досточудне Трифоне, издетска постническое твое житие, аще и стужастася о твоем терпении, обаче радовастася, проразумевающа, яко хощет Господь воздвигнути тебе нова миру светильника, и Тому воспеваста: Аллилуиа.

Икос 2

Разум свыше осени тя, преподобне, всего себе предати Христову изволению, имже в пустыню приведен был еси: тамо бо найде на тя Сила Божия, во еже благовестити Евангелие Хритово народу иному. Темже вопием ти:
Радуйся, иереа Божия радосте и матере твоея веселие.
Радуйся, родителей честных чадо, от Бога зело возлюбленное.
Радуйся, девство драгое и чистоту душевную соблюдый непорочны.
Радуйся, издетска в дому Божии, аки Христос отрок, приметатися изволивый.
Радуйся, услышавый тамо слово реченное: пустынным живот сокровен есть, божественным рачением воскриляющымся.
Радуйся, оным гласом, яко воин, на служение Царю призванный.
Радуйся, пустынным житием себе в добрем изволении утвердивый.
Радуйся, во юности плотския страсти умертвивый.
Радуйся, постом душу свою, во еже глас свыше слышати, предочистивый.
Радуйся, от Христа языку лопску избранный благовестниче.
Радуйся, еже о мире сем отложивый попечение и абие вослед Христу последовавый.
Радуйся, Трифоне, страны северныя просветителю, Печенгский чудотворче.

Кондак 3

Силою во еже благовестити, свыше Христос облече тя, досточудне Трифоне. В пустыни бо, аки Моисеови древле в купине, глас ти бысть: «Иди в землю необетованную и рцы, яко любы обручения Моего не разорится». Егда же рекл еси: «Кто еси Господи»; отвеща ти: «Иисус Есмь, Егоже ты ищеши». Сия же слышав, со умилением преклонься, возопил еси Тому: Аллилуиа.

Икос 3

Имущу ти, аки Моисей, смирение велие, во еже отрещися такова звания, рекл еси, преподобне: «Невежда есмь, Господи, и малокнижен». Обаче Той заповеда ти: «Ничесоже вопреки глаголи, яко на вся послю тя, и идеши. вся, яже заповедаю ти, глаголи, не убойся, с тобою бо Есмь». Сего ради вопием ти:
Радуйся, радости родителей твоих оправдание.
Радуйся, видевый славы Отчия сияние.
Радуйся, яко благодать Божия излияся на тя богатно.
Радуйся, яко разумение ти языков дадеся.
Радуйся, яко найде на тя дух премудрости и ведения.
Радуйся, Духа Святаго приятелище.
Радуйся, силою Божиею аки мечем препоясанный.
Радуйся, яко рыбарь ко океану на уловление душ человеческих во спасение призванный.
Радуйся, Андреа Первозваннаго, на горах Киевских благовестника ревнителю.
Радуйся, Мефодиа и Кирилла избранный последователю.
Радуйся, Гуриа и Варсонофиа, Стефана и Иннокентиа достойный преемниче.
Радуйся, Трифоне, страны северныя просветителю, Печенгский чудотворче.

Кондак 4

Бури океана хладна не убоявся, любовию Христовою согреваемь, во страну северную преселился еси, досточудне Трифоне, да предложиши тамо народу Лопску огнь любве Божия, хлад и мрак души разгоняющ, во еже чистым сердцем и усты воспевати: Аллилуиа.

Икос 4

Слышаще идолов посрамление от тебе, злочестивии людий сих учителие, кебуни нарицаеми, злобу велию воздвигоша на тя, преподобне, по ланитома биюще, по каменем влачаще, и ины пакости деюще. Мы же зряще тя, со смирением таковая приемлюща, умильно вопием:
Радуйся, яко купец многоценна ради бисера ко океану устремивыйся.
Радуйся, ввергий мрежу свою на уловление душ во спасение.
Радуйся, тщету идолов обличивый.
Радуйся, сего ради аки Павлово от иудей страдание приемый.
Радуйся, яко слово Божие светлостию лица твоего утверждашеся.
Радуйся, яко слово твое пройде в сердца окамененная.
Радуйся, от Бога создание всея твари из небытия народу лопарску возвестивый.
Радуйся, благовестивый сим людем во Адаме наше падение, во Христе же обновление.
Радуйся, отриновенныя Христовым обручением утешивый.
Радуйся, благовестием твоим небесныя лики возвеселивый.
Радуйся, ангела предстателя страны северныя себе явивый.
Радуйся, Трифоне, страны северныя просветителю, Печенгский чудотворче.

Кондак 5

Боготечней звезде уподобився, всю страну северную обтекл еси, досточудне Трифоне. Яко бо денница, солнцу преходящая, от языка лопска привел еси ко Христу чад множество, иже со умилением сердца приимше крещение, возопиша о тебе Богу: Аллилуиа.

Икос 5

Видение бе дивное, егда от мрачна неведения тобою приведеннии Христови сочеташася: земля бо и небо ликоваху, во струях Печенги, аки Иордана и Днепра, зряща множество крещаемых. Поминающе убо сия, восклицаем ти:
Радуйся, гласе вопиющаго, от народа лопска услышанный.
Радуйся, Крестителя Христова собеседниче.
Радуйся, яко тма идольская от тебе разорися.
Радуйся, яко крест, аки знамя победное, тобою зде водрузися.
Радуйся, яко трапеза бесовская ни во что же тамо вменися.
Радуйся, яко вместо тоя утвердися тамо трапеза Христова спасительная.
Радуйся, тобою бо Матерь Божия прославися.
Радуйся, яко святии просвященным тобою людем присни сташа.
Радуйся, яко Владимир святый, зря чад умножение, возвеселися.
Радуйся, в распутиях мира сего обретый на вечерю Христову избранныя.
Радуйся, Церкве от народа лопска создателю.
Радуйся, Трифоне, страны северныя просветителю, Печенгский чудотворче.

Кондак 6

Егда проповедано бысть Евангелие всей стране северней, ин подвиг приял еси на себе, досточудне Трифоне. Языку бо крещену бывшу, абие прием образ ангельский, создал еси обитель Живоначальныя Троицы, в нюже стечеся инок множество, во еже пети Богу: Аллилуиа.

Икос 6

Возсия во мраце Севера, яко светильник света невечерняго, обитель от тебе созданная, светом Троическим вся осиявающая. Темже радующеся вопием ти:
Радуйся, апостолом веселие, преподобным же удобрение.
Радуйся, кукулем, аки венцем незлобия, главу свою увязивый.
Радуйся, поясом чресла своя во умерщвление плоти препоясавый.
Радуйся, Иоанну Богом возлюбленну поревновавый.
Радуйся, нестяжания учителю.
Радуйся, смирения великаго носителю.
Радуйся, каменю, на немже создася жилище Пресвятыя Троицы.
Радуйся, в жилищих тмы селение света невечерняго соделавый.
Радуйся, яко возстена князь мира сего, зря воинства Христова водворение.
Радуйся, яко зде ста колесница, Иезекиилем созерцанная.
Радуйся, яко вознесеся седящему на ней песнь великая, в вышних песнословимая.
Радуйся, Трифоне, страны северныя просветителю, Печенгский чудотворче.

Кондак 7

Хотяй чада своя препитати и спасти, егда глад стране прилучися, блаженному Гурию предал еси, досточудне Трифоне, обитель от тебе созданную, сам же изшед во Отечествие, осмерицу лет по градом тамо прехождал еси, даяния блага приемля и поя Богу: Аллилуиа.

Икос 7

Новую купель Силоамскую яви тя Бог, преподобне, егда странен сый во Отечествии, приемля даяния, многоценна сокровища всем источал еси, тобою бо слепии прозираху, немии глаголаху, недужнии здравие улучаху. Чудящеся сему, ублажаем тя:
Радуйся, Моисеови уподобивыйся.
Радуйся, Товита праведна ревнителю.
Радуйся, яко Товиа в путех ангелом храненный.
Радуйся, святителя Николаа Мирликийскаго подражателю.
Радуйся, Сампсона страннолюбива и Филарета милостива увеселителю.
Радуйся, алчущих питателю.
Радуйся, сирых заступление.
Радуйся, вдовиц ограждение.
Радуйся, младенцев соблюдение.
Радуйся, милосердия учителю.
Радуйся, образе жития богоугоднаго.
Радуйся, Трифоне, страны северныя просветителю, Печенгский чудотворче.

Кондак 8

Странствие скончавая, к царствующему граду устремился еси, досточудне Трифоне, идеже новое о тебе чудо благоволи Бог сотворити: не сущу бо еще ти тамо, со единем от обители Соловецкия цареви предстал еси дивно. Темже последи той, приемль тя любовию, всякаго исполни даяния, поя Богу: Аллилуиа.

Икос 8

Весь благоговеинства исполнився, в тое же время царевич Феодор, изшед от церкве, посла ти, преподобне, одежды своя, яко да милостыня его предъидет царскому даянию, еже и бысть по сем велие. Темже вопием ти:
Радуйся, смирения ради вознесенный.
Радуйся, сильным мира сего явленный.
Радуйся, яко царь пришествию твоему удивися.
Радуйся, яко явлением двою той возвеселися.
Радуйся, от царя достойне почтенный.
Радуйся, от сына царева одаренный и возлюбленный.
Радуйся, от напастей сего выну соблюдавый.
Радуйся, яко милостынею его обитель твоя снабдеся.
Радуйся, яко благочестием его царство Российское увеселися.
Радуйся, яко царство наше цари благочестивыми украшается.
Радуйся, яко святыми мужи оное утверждается.
Радуйся, Трифоне, страны северныя просветителю, Печенгский чудотворче.

Кондак 9

Всяких дарований исполнен сый, паки во страну северную, аки солнце к захождению, притек, досточудне Трифоне, создал еси церковь благоверных князей Бориса и Глеба, и оставль обитель, в дольней пустыни водворився, остаток дний своих препроводил еси в терпении мнозе, поя Богу: Аллилуиа.

Икос 9

Витии от инок дивное еже ти тварей повиновение всюду возвестиша, преподобне: не сущу бо ти единожды в келлии, зверь дивий в ню вниде и начат бывшая ясти. Возвращшу же ти ся и наказавшу сего, николиже паки ко обители твоей от тацех приближатися смеяше. Сему же чудящеся, взываем ти:
Радуйся, ластовице пустыннолюбивая.
Радуйся, Успенския пустыни украшение.
Радуйся, молчания образе.
Радуйся, прилоги лукаваго уразумевый.
Радуйся, гордыни его не приложивыйся.
Радуйся, стрелы того безсильны явивый.
Радуйся, в конец сего посрамивый.
Радуйся, Адаму первозданну уподобивыйся.
Радуйся, яко тя зверие дивии царя себе познаша.
Радуйся, от земнородных прозябение дивное.
Радуйся, кораблю великий, ко пристанищу тихому приблизивыйся.
Радуйся, Трифоне, страны северныя просветителю, Печенгский чудотворче.

Кондак 10

Спасти хотя собранныя, прежде кончины твоея досточудне Трифоне, паки во обитель твою прешел еси, и Богови служение заповедал еси братии: юже грядущаго ради озлобления Христовым утешив милосердием, в небесныя кровы отшел еси, идеже со святыми поеши Богу: Аллилуиа.

Икос 10

Стена был еси чадом обители твоея, преподобне, иже со умилением поюще надгробная, положиша святое тело твое, якоже заповедал еси, в пустыне тобою возлюбленней Зряще же оное токи чудес источающее, радостно возопиша:
Радуйся, Пресвятыя Троицы изрядный почитателю.
Радуйся, Девы Преблагословенныя ублажателю.
Радуйся, святым Зосиме, Савватию и Герману единонравный.
Радуйся, добре Богови поживый.
Радуйся, в старости мастите ко Христу преселивыйся.
Радуйся, яко глава твоя, приклонена сущи, труды извествоваше.
Радуйся, седина бо твою мудрость обличаше.
Радуйся, таланты, от Бога ти вданныя, приумноживый.
Радуйся, благий рабе, вшедый в радость Господа твоего.
Радуйся, честных монахов похвало и украшение.
Радуйся, обители твоея присный Богови предстателю.
Радуйся, Трифоне, страны северныя просветителю, Печенгский чудотворче.

Кондак 11

Пение всеумиленное приносим ти, досточудне Трифоне! Обитель бо твоя, аще по словеси твоему от свеев разорися, обаче страданием братий прославльшися, паки возставися. Аще и вторицею опусте, силою же лучшею ныне обновися, в нюже иноцы текуще, о тебе радостно Богови поют песнь немолчную: Аллилуиа.

Икос 11

Светозарней звезде уподобися обитель твоя, преподобне, егда ю свее разоряху: чада бо, тобою собранная, терпением враги посрамиша, венцы мученическими украсишася, и купно с церковию огнем попалившася, яко жертва угодна Богови принесошася. Поминающе убо таковая, умильно вопием ти:
Радуйся, грядущая в Бозе созерцаяй.
Радуйся, обители разорение предъявивый.
Радуйся, до времене ю вои небесными соблюдавый.
Радуйся, яко ученик твой Иона, молитвами тя выну чтый, в пустыни твоей от меча скончася.
Радуйся, Гуриа, Германа и иных прославленных Богом подвижников веры и благочестия наставниче.
Радуйся, яко вся чада твоя от Христа прияшася.
Радуйся, яко обитель твоя паки возставися.
Радуйся, яко паки тем светильник благочестия страны даровася.
Радуйся, тою лжеучения сокрушаются.
Радуйся, святыя бо твоя мощи аки камень краеуголен являются.
Радуйся, яко вся коемуждо полезная молитвами твоими даруеши.
Радуйся, Трифоне, страны северныя просветителю, Печенгский чудотворче.

Кондак 12

Благодати Христовы носителю, досточудне Трифоне! С верою тя призывающым полезная подаеши, от напастей же, яко царя Феодора, скоро избавляеши. Сему бо нощию явився во стане, рекл еси: «Скоро изыди, да не найдет на тя смерть нечаянная». Сия же сотворшу ему, абие от стреляния вражеска скиния опровержеся и ложе разметася, людие же чудящеся пояху: Аллилуиа.

Икос 12

Поюще Богу песнь благодарения, радуемся о тебе, преподобне, яко вся нам полезная даруеши. Тобою бо пагуба отгоняется, здравие улучается, мир и благоустроение водворяется: понеже на небесех присно ходатайствуеши о нас, взывающих ти сице:
Радуйся, на небесех о нас теплый предстателю.
Радуйся, почитающих тя верный хранителю.
Радуйся, не чтущих тебе вразумителю.
Радуйся, духов злобы отгонителю.
Радуйся, помраченных умы просветителю.
Радуйся, недугов изрядный целителю.
Радуйся, от потопления морскаго спасателю.
Радуйся, яко тобою царю Феодору даровася избавление.
Радуйся, яко тобою небесное царей наших познася соблюдение.
Радуйся, яко тобою всяка печаль отгоняется.
Радуйся, яко тобою благочестие во обители твоей и по всей стране сей утверждается.
Радуйся, Трифоне, страны северныя просветителю, Печенгский чудотворче.

Кондак 13

О преподобне и досточудне отче наш Трифоне! Живоначальней предстоя Троице, в неприступнем свете и радости неизглаголанней, приими сие от умиленнаго ти сердца возносимое хваление, и не престай моляся о нас, да поживше благочестне, по успении нашем сретени от тебе обрящемся на небесех, и воспоем Богови со ангельскими лики: Аллилуиа.

(Этот кондак читается трижды, затем икос 1-й и кондак 1-й)

Молитва святому преподобному Трифону, Печенгскому чудотворцу

О Всесвятыя Троицы угодниче, о блаженнейший и равноапостольный пастырю, преподобне отче наш Трифоне! Не забуди твоея паствы, поминай во святых твоих и богоприятных молитвах, приносимых в Троице славимому Богу, стадо твое, еже сам, по благовестию от ангела, пришествием твоим собрал и упасл еси. Понеже в сродстве твоего мирскаго жилища, слышав во святей церкви на утрени поющих: «Пустынным живот сокровен есть, божественным рачением воскриляющымся»; и от того восперився божественною любовию, оставль дом и сродство, и пришед вскрай северныя страны, просветил еси святым крещением неведущий Творца, всех Бога, лопарский народ, за еже, во утверждении христианския веры, многа изгнания и злоключения подъял еси. И близ реки Печенги в пустыню вселився, братию из многих градов и весей собрав, велию обитель воздвигл еси, и при отшествии к небесным селением, о посещении твоея обители пророчествия дар от Бога восприял еси, и по смерти на мори и на суши многа чудеса и цельбы с верою просящым сотворил еси и ныне твориши. Темже молим тя, не забуди присещати чад твоих: моли за ны, преподобне отче, приходящыя к тебе с верою, и за вся христианы, яко имеяй дерзновение к Безсмертному Царю Христу всех Богу. Не премолчи за ны ко Господу, и не презри нас верою и любовию чтущих тя и поминающих святую память твою. Аще бо ты и преставился еси от нас телом, но и по смерти живый духом, всегда чудодействуеши. Молитвами твоими сохраняй нас от стрел и козней вражиих, и всякия прелести бесовския, и от враг видимых и невидимых. Пастырю наш добрый! Аще мощи твоя в раце незрими нам суть, обаче, понеже всегда в Троице славимому Богу, при Престоле Его непостижимаго величествия неотступно в молитвах предстоиши, усердно к тебе прибегаем и просим: умоли и испроси нам время к покаянию, да в час исхода души прейдем от земных к небесным, мытарств же воздушных и вечныя муки избавимся, и Небесному Царствию наследницы будем со всеми от века угодившими. О всеблаженне отче наш Трифоне! Не презри и ныне нас, притекающих к тебе, яко да молитвами твоими и помощию спасаеми, славу и благодарение, хвалу и поклонение за вся в Троице единому Богу, всех Создателю возсылаем, Отцу и Сыну, и Святому Духу, ныне и присно и во веки веков. Аминь.

Акафист преподобному Елеазару Анзерскому, Соловецкому Чудотворцу

Кондак 1

Избранный угодниче Божий, светлостию жития твоего и чудес благодатию просиявый в пустыни севернаго Помория, преподобне отче наш Елеазаре! Хвалебныя песни приносим ти, подвиги твоя воспевающе. Ты же, яко благоприятный молитвенник ко Господу, от всяких нас бед свобождай, да зовем ти: Радуйся, преподобне отче наш Елеазаре.

Икос 1

Ангел житием и путеводитель многим ко спасению был еси, преподобне отче Елеазаре. Темже и мы ныне к твоему предстательству прибегающе, приносим ти хваления сицевая: Радуйся, единаго Господа измлада возлюбивый; радуйся, чистоту душевную от юности сохранивый. Радуйся, равноангельно поживый на земли; радуйся, яко со ангелы ликуеши на небеси. Радуйся, на демоны мужественно ополчивыйся; радуйся, небесных видений сподобивыйся. Радуйся, смирение сердца до конца сохранивый; радуйся, безмолвное житие тепле возлюбивый. Радуйся, преподобне отче наш Елеазаре.

Кондак 2

Видевше благочестивии родители твои усердие твое ко иноческому житию, на сей спасительный путь тя благословити не отрекошася. Ты же, преподобне, из дому отеческаго абие изшед, во обитель Соловецкую устремился еси, еяже достиже, радостно воспел еси Богу: Аллилуиа.

Икос 2

Разум богопросвещенный стяжав, мирскаго пристрастия избегл еси, пречудне Елеазаре, и подвиги плоть умертвив, образ добраго жития иноком преподал еси. Сего ради восхваляем тя сице: Радуйся, отечество и род твой оставивый; радуйся, богатство и славу возненавидевый. Радуйся, суровое житие возлюбивый; радуйся, Христу последовати возжелавый. Радуйся, яко пристанища тихаго достигл еси; радуйся, яко спасению многих послужил еси. Радуйся, грядущая прозираяй; радуйся, далече сущая провидяй. Радуйся, преподобне отче наш Елеазаре.

Кондак 3

Сила Божия укрепляше тя на подвиги, блаженне Елеазаре, егда из обители преподобных Зосимы и Савватия изшед, в пустыню Анзерскаго острова вселился еси, идеже в безмолвии воспевал еси Богу: Аллилуиа.

Икос 3

Имея молитву и крестное знамение яко щит непобедимый, досточудне Елеазаре, мужественно прогонял еси вражия ополчения, страховании многообразными на тя воюющая. Мы же яко воина Христова ублажаем тя сице: Радуйся, темных духов прогонителю; радуйся, злокозненных их сетей разрушителю. Радуйся, именем Иисусовым враги невидимыя отражавый; радуйся, мудрость духовную стяжавый. Радуйся, на невидимую брань верою и молитвою вооруживыйся; радуйся, воин Христов непобедимь явивыйся. Радуйся, полунощныя страны светильниче; радуйся, неусыпный о людех молитвенниче. Радуйся, преподобне отче наш Елеазаре.

Кондак 4

Бурю искушений и бед враг рода человеческаго воздвизая на тя, доброподвижниче Елеазаре, аки от игумена посланный льстивно тебе является. Ты же молитвою Господнею того обличил еси и в бегство обратил еси, воспевая Богу: Аллилуиа.

Икос 4

Слышав христолюбивый царь Михаил слух богоугоднаго твоего жития, преподобне Елеазаре, лице твое видети возжела: ты же, повелению цареву повинуяся, во стольный град притекл еси и о рождении первенца ему прорекл еси. Сего ради глаголем тебе сице: Радуйся, дерзновение ко Господу стяжавый; радуйся, пророческаго дара исполненный. Радуйся, христолюбиваго царя веру умноживый; радуйся, на хвалу Господню того подвигнувый. Радуйся, честию царевою не превозносивыйся; радуйся, о славе единаго Бога возвеселивыйся. Радуйся, яко твоею молитвою неплодие царицы прекратися; радуйся, яко плод благословен земли Российстей молитвою твоею даровася. Радуйся, преподобне отче наш Елеазаре.

Кондак 5

Боготечная звезда иноком Соловецким являешися, отче Елеазаре, к небесному отечеству тех путеводящая, такожде и всех притекающих к раце мощей твоих умилением и верою просвещающая, вопиющих к Богу: Аллилуиа.

Икос 5

Видеша ученицы твои, преподобне Елеазаре, царево к тебе благоволение, и повеление его к построению храма во обители твоей приемше, радовахуся. Мы же, Господне на то благословение уведевше и видения чудесная тебе явленная воспоминающе, глаголем: Радуйся, Христовы словесныя овцы ко спасению подвизаяй; радуйся, нерадивыя от сна греховнаго возбуждаяй. Радуйся, ученики твоя неленостно в житии назидавый; радуйся, и по преставлении писаньми твоими тех сердца умиляяй. Радуйся, словеса и учения святоотеческая в сердце твоем запечатлевый; радуйся, теми души ко спасению наставляяй. Радуйся, верный подражатель богоносным учителем бывый; радуйся, искусный иноков наставник явивыйся. Радуйся, преподобне отче наш Елеазаре.

Кондак 6

Провидец и провозвестник будущих и далече отстоящих яко близ сущих был еси, преподобне Елеазаре: темже и преставление духовнаго друга твоего за тридесять поприщ прозрел еси. Сего ради Богу, дивно прославляющему святыя Своя, поим: Аллилуиа.

Икос 6

Возсияваше лице твое небесною радостию и духовным веселием, ангелоподобне Елеазаре, егда сподоблялся еси Божественных откровений и видений. Сего ради сице тебе зовем: Радуйся, глас Божественный многажды слышавый; радуйся апостолу Павлу собеседник в видении бывый. Радуйся, Христов лик присно во уме твоем предносивый; радуйся, многострадальнаго о Христе жития благий образ явивый. Радуйся, на демоны воинствующим присный споборник бывый; радуйся, братию твою козни демонския прозирати научивый. Радуйся, правыя веры добрый учителю; радуйся, сомнящихся вере мудрый наказателю. Радуйся, преподобне отче наш Елеазаре.

Кондак 7

Хотяще злии человецы досаду тебе сотворити, и того ради глубокое море преплывше, дерзостно к келлии твоей с прещением приближишася; но Божественною силою во изступление ума впадше, окрест жилища твоего в недоумении блуждаху. Ты же, незлобив сый, молитвою тати оныя от таковаго помрачения исцелил еси и научил еси пети Богу: Аллилуиа.

Икос 7

Дивно от Царицы Небесныя на подвиги наставляемь, преподобне отче, непоколебимь во твоем изволении блазе пребыл еси, и небесную славу улучити сподобился еси. Темже ублажающе тя, глаголем: Радуйся, небесных видений достойный зритель бывый; радуйся, сосуде, Божия благодати преисполненный. Радуйся, путь спасения ясно познавый; радуйся, житием твоим путь сей нам указавый. Радуйся, безмолвия и молитвы учителю; радуйся, заповедей Господних верный блюстителю. Радуйся, ангелоподобный человече; радуйся, монашескаго жития наставниче. Радуйся, преподобне отче наш Елеазаре.

Кондак 8

Странствие досточудно совершил еси, чудотворче Христов Елеазаре, егда море преплывал еси с братиею, ладию твою молитвою от крушения посреде плавающаго леда избавил еси и спасл еси сущия в ней люди, воспевающия Богу песнь: Аллилуиа.

Икос 8

Весь пламенем Божественныя любве объят был еси, преподобне Елеазаре, егда во острове пусте богомыслием непрестанным и плоти умерщвлением подвизался еси, душу убо молитвою питая, тело же веригами удручая. О сем хваляще тя, зовем таковая: Радуйся, ветхаго человека в себе не пощадивый; радуйся, силою креста в подвизех себе утвердивый. Радуйся, пустынное лишение доблественне претерпевый; радуйся, память смертную присно имевый. Радуйся, власяницею и веригами плоть свою смиривый; радуйся, все плотское мудрование духу покоривый. Радуйся, богодухновенных книг списатель бывый; радуйся, мудрость духовную возлюбивый. Радуйся, преподобне отче наш Елеазаре.

Кондак 9

Вси жительствующии в богоспасаемой обители сей к раце честных мощей твоих сошедшеся днесь, приснопамятне Елеазаре, и памятию добродетелей твоих сердца умиляюще, приносим ти хвалебную песнь, ангельски поюще Богу: Аллилуиа.

Икос 9

Витийственных словес плетение не довлеет восхвалити достойно чудотворения твоя, преподобне Елеазаре. Обаче любовию движими, восписуем ти сицевая: Радуйся, вождю духовных воинов; радуйся, беснуемых свободителю. Радуйся, приемый от Господа власть на духи нечистыя; радуйся, и по смерти твоей низлагаяй вражия на нас ополчения. Радуйся, яко мощей твоих духи злобы устрашаются; радуйся, яко предстательством твоим всякия болезни исцеляются. Радуйся, в пучине морстей плавающим помощниче; радуйся, обидимых защитниче. Радуйся, преподобне отче наш Елеазаре.

Кондак 10

Спасения подвигом добре подвизался еси, приснопамятне Елеазаре. Темже от Господа венец нетления тебе сплетеся, егда святую душу твою предал еси в руце Вседержителя, воспевая ангельскую песнь: Аллилуиа.

Икос 10

Царю превечному в Небеснем Царствии предстал еси, святе Елеазаре, отшед от временныя жизни. Мы же, молитвенника тя тепла пред Престолом Господним имуще, зовем сице: Радуйся, от трудов временных к покою вечному славно прешедый; радуйся, и нас труды богоугодныя возлюбити научаяй. Радуйся, на земли Пресвятую Троицу присно славити обыкнувый; радуйся, Святей Троице ныне со ангелы предстояй радостно. Радуйся, дерзновение молитвенное ко Господу стяжавый; радуйся, дар чудотворения свыше восприемый. Радуйся, здравие болящим подаваяй; радуйся, во всякой нужде и беде сущим скоро помогаяй. Радуйся, преподобне отче наш Елеазаре.

Кондак 11

Пения хвалебная угоднику Божию приносяще, о празднолюбцы, всечестную память его духовно торжествуим; подвиги же его и чудесная деяния прославляюще, воспоим Богу песнь: Аллилуиа.

Икос 11

Светозарная звезда явился еси, отче Елеазаре, во мраце страстей нас сущих озаряющая и ко свету спасения приводящая всех вопиющих тебе таковая: Радуйся, обитель твою и по смерти не оставляяй; радуйся, живущия в ней невидимо назираяй. Радуйся, пищею духовною нас удовляяй; радуйся, на потребу телесную вся от Господа нам подаваяй. Радуйся, в житии твоем молитве деннонощней братию научивый; радуйся, и по преставлении твоем в молитве нас укрепляяй. Радуйся, скорбящих тайный утешителю; радуйся, страдальцев незримый посетителю. Радуйся, преподобне отче наш Елеазаре.

Кондак 12

Благодать приял еси от Христа Бога, угодниче Христов Елеазаре, еже за ны, во обители твоей жительствующия, молитися. Темже ныне память твою любезно почитающия благослови и удовли нас ко славословию Бога с песнию: Аллилуиа.

Икос 12

Поюще твоя чудеса и пророческий дар твой благоговейно почитающе, все же богоугодное твое житие и многая исцеления, от раки твоея святыя болящим подаваемая, любовию воспоминающе, молим тя, угодниче Христов Елеазаре, твоего предстательства и нас грешных не отщетити, но прияти от нас хваления сицевая: Радуйся, благодатию Пресвятыя Троицы освященный; радуйся, благодатию Пресвятыя Богородицы осененный. Радуйся, в лице преподобных ублажаемый; радуйся, к великим чудотворцем Соловецким сопричтенный. Радуйся, со всеми святыми прославляемый; радуйся, со ангелы Пресвятей Троице предстояй. Радуйся, еще на земли Господа зрети сподобивыйся; радуйся, ныне Того лицем к лицу созерцаяй. Радуйся, преподобне отче наш Елеазаре.

Кондак 13

О преподобне и богоносне отче наш Елеазаре! Приими ныне приносимая тебе хваления наша и святыми твоими молитвами в жизни сей нас от всякаго злаго обстояния сохрани, в будущей же вечнаго осуждения избави, да сподобимся купно с тобою и со всеми святыми воспевати в Троице славимому Богу: Аллилуиа.

(Этот кондак читается трижды, затем икос 1 и кондак 1)

Молитва

О преподобне отче наш Елеазаре, безмолвнаго иноческаго жития в пустыни Анзерстей богоизбранный начальниче и основателю! Молим тя мы, смиреннии и недостойнии, обстояще священный гроб твой во храме Пресвятыя Троицы, имже место сие освятися и, сущия ради в тебе благодати пророческия, прославися; испроси, угодниче Божий, у Вседержителя Бога, в Троице покланяемаго, Емуже в дерзновении с лики святых предстоиши, да дарует православному народу нашему на враги победу и одоление, державе Российстей мир и утверждение, церквам благостояние и всем людем тишину, и благоденствие, и изобилие плодов земных. Угаси молитвами твоими разжженныя на ны стрелы диавольския, да не прикоснется нам злоба вражия, да благочестно скончавше временное житие, сподобимся наследовати Царствие Небесное и купно с тобою славити Отца и Сына и Святаго Духа во веки веков. Аминь.

Акафист святым равноапостольным царем Константину и Елене

Кондак 1

Избраннии предвечным Царем, святии равноапостольнии Константине и Елено, на всемирное воздвижение Животворящаго и Спасительнаго Креста Господня, имже соделася спасение рода человеческаго, искупленнаго кровию пригвожденнаго на нем Агнца Божия, да вси праведнии и грешнии благодарственно взывают вам:

Радуйтеся, святии равноапостольнии Константине и Елено, обретшии Крест Господень, оружие спасительное.

Икос 1

Ангельский собор на земли зряше велие чудо — како обретеся Святое Древо, на много лет в недрех земли бездушным камением хранимое, ныне же руками архиерейскими возносимое, людие же видевше сие, ниц на землю падоша, слезно вопия: "Господи, помилуй! Господи, помилуй! Господи, помилуй!" Вас же, святии равноапостольнии Константине и Елено, смиренно величаху:

Радуйся, блаженная мати, зело возлюбившая Христа; радуйся, боговенчанный сыне, слуго Небеснаго Царя.

Радуйтеся, земнии Ангели и небеснии человецы; радуйтеся, строителие таин Божиих.

Радуйтеся, яко вами небо и земля духовно возрадовашася; радуйтеся, яко от всех земнородных вкупе прославишася.

Радуйтеся, достойнии носителие имене Христова; радуйтеся, два светила великая во вселенней.

Радуйтеся, святии равноапостольнии Константине и Елено, обретшии Крест Господень, оружие спасительное.

Кондак 2

Видев славный Константин во время брани с Максентием в полудни Крест на небе, светом сияющий, и письмена "Сим побеждай", повеле оковати все оружие и шлемы бранные, да до конца победив врага помощию Крестною, воспоют распятому Христу победную песнь: Аллилуиа.

Икос 2

Разум твой, не просвещен еще святым крещением, царю Константине, просвети Господь во сне нощию, научая победити врага крестным знамением, мы же, дивяся таковому Промыслу Божию о тебе, взываем сице:

Радуйся, двукратным видением Креста свыше озаренный; радуйся, паче всех царей земных превознесенный.

Радуйся, свыше предызбранный на апостольское служение; радуйся, победителю врагов видимых и невидимых.

Радуйся, Крест Господень зело прославивый; радуйся, Церкви Христовой вся силы отдавый.

Радуйся, врага спасения человеческаго посрамивый; радуйся, честным Крестом главу его сокрушивый.

Радуйтеся, святии равноапостольнии Константине и Елено, обретшии Крест Господень, оружие спасительное.

Кондак 3

«Силою Креста во брани, - ведал еси, богомудре Константине - Аз спасох град сей от врагов, и сердце мое уязвлено любовию распятаго Христа, Егоже чту, Емуже покланяюся и не возбраняю любящим Его пети блаженную песнь: Аллилуиа».

Икос 3

Имея в сердцы чувство живыя христианския веры, великий Константин повеле, да сокрушатся идолы и да созиждутся храмы, идеже сонмы Ангелов и лики праведных выну молят своего Создателя. Мы же недостойнии, просяще о мире мира и добром ответе на Страшнем Судищи Христове, зовем вам:

Радуйтеся, первии во христианех царие; радуйтеся, милосердием и властию украшеннии.

Радуйтеся, любовию и правдою одеяннии; радуйтеся, от вражиих прелестей избавленнии.

Радуйтеся, уставов церковных хранителие; радуйтеся, девства и целомудрия любителие.

Радуйтеся, языческия храмы нa земли упразднившии; радуйтеся, день воскресный праздновати установившии.

Радуйтеся, святии равноапостольнии Константине и Елено, обретшии Крест Господень, оружие спасительное.

Кондак 4

Бурныя потоки христианския крове твоим повелением, святый Константине, прияша конец; сущии в темницех получиша ослабу, крыющиися во пещерах и горах вспять возвращахуся, и чада Церкве лобзанием святым во объятии встречаху друг друга, воспевая Богу песнь хвалы: Аллилуиа.

Икос 4

Слышавше мученицы и страдальцы Христовы повеление твое, богоблаженне Константине, да свободно исповедают веру Христову, возвеселишася и со слезами радости воспеваху ти сице:

Радуйся, великаго Рима украшение; радуйся, узников Христовых свобождение.

Радуйся, языческаго мира упразднение; радуйся, идолов и кумиров сокрушение.

Радуйся, прав и законов утверждение; радуйся, чар волшебных и гаданий карательное запрещение.

Радуйся, о Церкви пекийся, аки чадолюбивая мати; радуйся, возбранивый осужденных на крестех распятие.

Радуйтеся, святии равноапостольнии Константине и Елено, обретшии Крест Господень, оружие спасительное.

Кондак 5

Воскресение Христово видевше, воспеваху людие: се Крест, имже прииде радость всему миру. Неведомо бысть миру оружие, имже новый Давид победи смерть, сокрыто бысть от поклонения верных людий, Ангелы токмо охраняху честный Крест, немолчно воспевая: Аллилуиа.

Икос 5

Видя осмидесятилетняя старица, богомудрая мати Елена, сердце твое, пречудне царю Константине, желанием исполнено к прославлению Святаго Древа, сама со тщанием приемлет труды, да открыет сокровище на поклонение всем языком, с любовию зовущих вам таковая:

Радуйтеся, святии равноапостольнии Константине и Елено, царие премудрии; радуйтеся, двоице святая, Богом возлюбленная.

Радуйтеся, любовию к Нему аки Серафими пламеневшии; радуйтеся, ревностию аки Апостолы послужившии.

Радуйтеся, усердием вашим яко жены с миры пришедшии; радуйтеся, за подвиги ваша от всех земнородных славимые.

Радуйтеся, яко Ангелы с вами ликуют на небеси; радуйтеся, яко человецы выну восхваляют вас на земли.

Радуйтеся, святии равноапостольнии Константине и Елено, обретшии Крест Господень, оружие спасительное.

Кондак 6

Проповедником тайны, идеже бе треблаженное Древо, бысть некий Иуда, иже не хоте указати место сие, сего ради изнурен бысть гладом во глубине кладенца по повелению святой царицы Елены, ейже Дух Святый откры, да употребит всякое усилие для взыскания Креста Господня на радость православным христианом, поющим Богу: Аллилуиа.

Икос 6

Возсия луч Божественнаго света в сердцы Иуды, непреклоннаго доселе к прошениям и увещаниям богомудрой царицы Елены, иже, отверз уста, глаголаше: "Близ Голгофы, в капище Венеры, обрящете Крест вашего Христа". Оттоле начата искати, многи труды понесоша, не обретше жe сокровища, зело изнемогша. Егда же ощутиша велие благоухание из недр земли, усугубиша труды и обретоша три креста, тогда вернии людие прославляху вас со слезами:

Радуйтеся, треблаженнаго Древа усердные искателие; радуйтеся, дела апостольскаго неленостные продолжателие.

Радуйтеся, торжество веры православныя явившии; радуйтеся, люди, чтущии Крест Господень, зело возвеселившии.

Радуйтеся, воздух животворным знамением освятившии; радуйтеся, обретением Креста оставившии людем память вечную.

Радуйтеся, принесшии всему миру радость безконечную.

Радуйтеся, святии равноапостольнии Константине и Елено, обретшии Крест Господень, оружие спасительное.

Кондак 7

Хотя тщательно уведети Крест, на немже принесеся Жертва Святая, да не воздадят честь Креста иному, блаженный патриарх Макарий повеле возложити кресты на болящу и мертва, сии же ожиша и здрави бяху, тогда людие, видевше чудо, падоша ниц до земли, Животворящему Кресту, победителю смерти и ада, поюще: Аллилуиа.

Икос 7

Новый христианский храм созидает мудрая царица Елена на Голгофе для всемирнаго воздвижения Животворящаго Креста Господня, безчисленное же множество людий молиша блаженнаго патриарха Макария, да сподобятся узрети Господень Крест. Он же, смирения сый исполнен, с освященным собором высоко подъяша Крест, да видят вси; зряще сие, племена и языцы с благоговением и радостию восклицаху:

Радуйся, Треблаженное Древо, имже спасеся двоица первозданная; радуйся, Честное Древо, имже ад испусти узники.

Радуйся, Честное Древо, Архангелами и Ангелами хранимое; радуйся, Честное Древо, пророками богоглаголивыми предзримое.

Радуйся, Честное Древо, преподобных и праведных веселие; радуйся, Честное Древо, кающихся грешников надеждо и спасение.

Радуйтеся, святии равноапостольнии Константине и Елено, обретшии Крест Господень, оружие спасительное.

Кондак 8

Странствующему на земли нашего ради спасения, Иже не имеяше, где главы подклонити, воздвигоша храмы, богомудрии Константине и Елено, в Вифлееме рождшемуся, на Голгофе, идеже распятся, на горе Елеон, отонюдуже вознесеся к Безначальному Отцу, и у дуба Мамврийска, идеже Авраам пригласи Его странна, да вси вернии непрестанно поют Серафимскую песнь: Аллилуиа.

Икос 8

Все ваше служение бысть во славу Сладчайшаго Господа и Его Пречистыя Матере, Заступницы мира. Кий язык изречет подъятые вами труды? Кий разум постигнет радость, егда обретеся вами желаемый Крест Господень? Сего ради вси земнороднии благодарно взывают вам:

Радуйтеся, Ангельскою чистотою пожившии; радуйтеся, всем сердцем Господа возлюбившии.

Радуйтеся, апостольскою ревностию потрудившиися; радуйтеся, христианским смирением украсившиися.

Радуйтеся, вся добродетели в себе совокупившии; радуйтеся, блаженство райское унаследовавшии.

Радуйтеся, яко зрите всегда Творца и Господа; радуйтеся, яко мзда ваша многа на небесех.

Радуйтеся, святии равноапостольнии Константине и Елено, обретшии Крест Господень, оружие спасительное.

Кондак 9

Всякое еретическое учение отвергше, богомудрии отцы и учителие, собравшиися повелением твоим, царю Константине, на первом Вселенстем соборе, Ария отгнаша и его пособников, и яко гром возгреме во вся концы песнь: Аллилуиа.

Икос 9

Витии сладковещаннии, богоноснии отцы, святители и учители на соборе Никейстем, Николай Мирликийский, Спиридон Тримифунтский, Пафнутий Фиваидский, Павел Неокесарийский, Афанасий Александрийский и прочие исповедницы Христовы, иже, свыше умудрившеся, изложиша тамо Символ веры и всей Церкви узакониша пети Троицу Единосущную, принесше песнь благодарения Верховному Владыце всех Богу и сослужителю своему взывая:

Радуйся, достойный сыне матере своея богомудрыя Елены; радуйся, подражавый ей во смирении неизреченно.

Радуйся, царю, превосходяй мудрость Соломона; радуйся, стяжавый веру праотца Авраама.

Радуйся, законов и власти высокий архитектоне; радуйся, новый Апостоле великаго града Константинополя.

Радуйся, милостивый и кроткий повелителю; радуйся, перваго Никейскаго собора мудрый председателю.

Радуйтеся, святии равноапостольнии Константине и Елено, обретшии Крест Господень, оружие спасительное.

Кондак 10

Спастися хотящим в побдвизе девства не возбранял еси, великий Константине, да чистым сердцем возносят молитвы Единому Богу о мире всего мира и, отрешеннии молвы житейския, яко Ангелы поют: Аллилуиа.

Икос 10

Стена, покров и защита бысть тебе во всем Сама Пречистая Дева, Владычица неба и земли. Ейже вручил еси новый град твой на брегах Босфора, да вси людие, укрепляеми Ея милосердым заступлением, воспоминающе веру и подвиги твоя, прехвальне Константине, благоумиленно взывают:

Радуйся, новую столицу Византии освятивый; радуйся, заступлению и покровительству Матере Божией ю вручивый.

Радуйся, храм Божий во имя Ея создавый; радуйся, горячия молитвы в нем возславый.

Радуйся, яко раб разумный таланты своя умноживый; радуйся, волю свою в волю Божию предавый.

Радуйся, храмов святых украшение; радуйся, пастырей Церкве Христовы вразумление.

Радуйтеся, святии равноапостольнии Константине и Елено, обретшии Крест Господень, оружие спасительное.

Кондак 11

Пения и усердныя молитвы приносяще ныне во храме вашем, святии равноапостольнии царие Константине и Елено, просим со слезами: воздежите блаженнии ваши руце, имиже приясте Крест Святый, и молите распятаго на нем Господа, да в покаянии непрестанно зовем Ему: Аллилуиа.

Икос 11

Светла и радостна кончина ваша, святии равноапостольнии Константине и Елено, вы бо победоносное знамение в объятиях своих держаще, показуете сим, да возмет кийждо крест свой и, во смирении шествуя путь земнаго странствия, сподобится получить безболезненную кончину и Божественных Таин причащения, со слезами взывая вам:

Радуйтеся, яко поете Ему со Ангелы Трисвятое пение; радуйтеся, яко с собором Апостолов Ему предстоите.

Радуйтеся, яко вкупе со всеми святыми райская селения зрите; радуйтеся, бедных и убогих милостивии попечителие.

Радуйтеся, от уз и пленения скорые свободителие; радуйтеся, праздника не почитающих строгие наказателие.

Радуйтеся, о всех чтущих память вашу пред Господем предстателие.

Радуйтеся, святии равноапостольнии Константине и Елено, обретшии Крест Господень, оружие спасительное.

Кондак 12

Благодать мира, тишину испросите притекающим к вашему заступлению, угодницы Божии, сохраните отечество наше от врагов, находящих на ны, и междоусобныя брани, да милость Божию улучим вашими молитвами, вопиюще со всеми святыми Владыце Христу: Аллилуиа.

Икос 12

Поюще и восхваляюще вас, святии равноапостольнии царие Константине и Елено, празднуем святую память вашу и просим: не забудите нас, грешных, чтущих труды и подвиги ваша, да вси с верою и любовию зовем к вам:

Радуйтеся, града и храма сего покровителие; радуйтеся, пастырем Церкве богомудрии учителие.

Радуйтеся, во тьме заблуждшим яркие светильницы; радуйтеся, за отечество наше теплии пред Богом молитвенники.

Радуйтеся, яко больных, слепых и глухих исцеляете; радуйтеся, яко от нечаянныя смерти избавляете.

Радуйтеся, еретиков и хульников веры страхом правосудия Божия устрашаете; радуйтеся, грешникам кающимся прощения у Престола Божия испрошаете.

Радуйтеся, святии равноапостольнии Константине и Елено, обретшии Крест Господень, оружие спасительное.

Кондак 13

О двоице премудрая, великие царие Константине и Елено, приимите малое сие моление наше и приносимое вам хваление! Избавите чтущих святую память вашу от греховных страстей и вечнаго осуждения, да ходатайством вашим возможем до скончания дней своих покланятися Животворящему Древу Креста Господня и тамо, идеже сияет свет невечерний, пети во славу Креста: Аллилуиа.

Этот кондак читается трижды, затем икос 1-й «Ангельский собор…» и кондак 1-й «Избраннии предвечным Царем…».

Молитва первая

О предивнии и всехвальнии царие, святии равноапостольнии Константине и Елено! К вам, теплым заступником, возносим наши недостойныя молитвы, яко велие имате дерзновение ко Господу. Испросите у Него мир Церкви и всему миру благоденствие, начальником мудрость, пастырем попечение о пастве, пасомым смирение, старцем желанное упокоение, мужем крепость, женам благолепие, девственником чистоту, детям послушание, младенцем христианское воспитание, больным исцеление, враждующим примирение, обидимым терпение, обидящим страх Божий. Приходящим в храм сей и молящимся в нем святое благословение и всем вся по коегождо прошению полезная, да хвалим и поем Благодетеля всех Бога, в Троице славимаго, Отца, и Сына, и Святаго Духа, ныне и присно и во веки веков. Аминь.

Молитва вторая

О святии равноапостольнии Константине и Елено! Избавите приход сей и храм наш от всякаго навета вражия и не оставите заступлением вашим нас, немощных (имена), умолите благость Христа Бога нашего даровати нам помыслов мир, от пагубных страстей и всякия скверны воздержание, благочестие же нелицемерное. Испросите нам, угодницы Божии, свыше дух кротости и смиренномудрия, дух терпения и покаяния, да прочее время жития нашего в вере и сокрушении сердечнем поживем, и тако в час скончания нашего благодарно восхвалим прославльшаго вас Господа, Безначальнаго Отца, Единороднаго Его Сына и Единосущнаго Всеблагаго Духа, Троицу Нераздельную, во веки веков. Аминь.

Тропарь, глас 8

Креста Твоего образ на Небеси видев и, якоже Павел, звание не от человек прием, в царех апостол Твой, Господи, Царствующий град в руце Твоей положи, егоже спасай всегда в мире молитвами Богородицы, едине Человеколюбче.

Кондак, глас 3

Константин днесь с материю Еленою Крест являют, всечестное древо, всех убо иудеев посрамление суще, оружие же на противныя верных людей: нас бо ради явися знамение велие и во бранех грозное.

Величание

Величаем вас, святии благовернии и равноапостольнии царие Константине и Елено, и чтим святую память вашу, вы бо святым Крестом всю вселенную просветили есте.

Акафист святому преподобному Александру, Ошевенскому чудотворцу

Акафист святому преподобному Александру, Ошевенскому чудотворцу в формате PDF

Акафист преподобному отцу нашему Арсению, Коневскому чудотворцу

Кондак 1

Избранный чудотворче и предивный угодниче Христов, преподобне отче наш Арсение, благий и верный рабе Господень, труды и подвиги твоими восток и север озарил еси. Прославляя прославльшаго тя Господа, похвальная восписуем ти, яко усердному служителю Богоматере; ты же, яко имеяй благодать молитися за ны, поминай нас, любовию тебе поющих: Радуйся, преподобне Арсение, Коневский чудотворче.

Икос 1

Ангельски жити желая, во ангельский образ облеклся еси и на земли небесный человек явился еси, темже ангельскими гласы подобаше и восхвалити тя, преподобне отче Арсение; но аще и грехи обременени есмы, обаче с любовию дерзаем человеческая славословия воспети ти сице: Радуйся, Новаграда Великаго древо Богонасажденное; Радуйся, плоды добродетелей миру принесшее. Радуйся, любве сокровище неиждиваемое; Радуйся, мира Божественнаго вместилище благоуханное. Радуйся, терпения источниче неизсякаемый; Радуйся, благости кладязю благодати неизчерпаемый. Радуйся, милосердия пучино безмерная; Радуйся, веры правило известнейшее. Радуйся, кротости образе изряднейший; Радуйся, воздержания учителю предивный. Радуйся, тяготы греховныя притекающих к Тебе носителю; Радуйся, Закона Христова усердный исполнителю. Радуйся, преподобне Арсение, Коневский чудотворче.

Кондак 2

Видя жития сего непостоянное и в мире всяческую суету, преподобне отче Арсение, от юности своея потщался еси украшатися добродетелей виды и приуготовлятися в Вышний Сион, во град Бога Живаго, идеже ныне со тмами Ангел и всеми святыми поеши: Аллилуиа.

Икос 2

Разум неудоборазумеваемый, сокровенный святым в Небеснем Иерусалиме, постигнути желая, земная отринув, во обитель в пределех Новаграда на горе вселился еси, преподобне отче Арсение, и тамо ангельски пожив, путь был еси ко спасению всех, вопиющих ти сицевая: Радуйся, нищих духом в Царствие Небесное водителю; Радуйся, плачущих по Бозе утешителю. Радуйся, кротких к дивному наследию приуготовителю; Радуйся, алчущих правды истинный насытителю. Радуйся, жаждущих вечныя жизни сладкое питие; Радуйся, милостивых невидимый соучастниче. Радуйся, чистых сердцем смиренный учителю; Радуйся, миротворцев любвеобильный наставниче. Радуйся, изгнанных правды ради верный спутниче; Радуйся, терпящих поношения за Христа сострадателю. Радуйся, со всеми святыми вселивыйся; Радуйся, во Царствии Отца Небеснаго, яко солнце, просветивыйся. Радуйся, преподобне Арсение, Коневский чудотворче.

Кондак 3

Сила Вышняго подвизаше тя, преподобне отче Арсение, на большия подвиги, и душа твоя желаше к Богу Крепкому — Живому, яко жаждущий елень на источники водныя; сего ради изшел еси из земли отечества твоего в гору Афонскую, в удел Богоматере достигл еси, поя Богу: Аллилуиа.

Икос 3

Имея ум богозрительный и восхотев добродетели своя утаити, да Отец Небесный, видяй втайне, воздаст тебе явно, сего ради во обитель Святогорскую достигл еси, преподобне отче Арсение, и тамо от игумена Иоанна к общему деланию с братиею сопричаститися благословение приял еси, мы же, видя произволение твое благое, взываем ти сице: Радуйся, добродетельми своими небесныя дары стяжавый; Радуйся, благим житием праотцем святым подражавый. Радуйся, яко Авраамову веру в Бога приобрел еси; Радуйся, яко Исааково послушание имел еси. Радуйся, яко Иаковля Боговидения сподобился еси; Радуйся, яко Иосифово целомудрие облобызал еси. Радуйся, яко Иовле терпение снискал еси; Радуйся, яко Моисеево сострадание стяжал еси. Радуйся, яко Самуилово Богопризвание услышал еси; Радуйся, яко Давидову кротость восприял еси. Радуйся, яко Илиину ревность по Бозе в сердце твоем носил еси; Радуйся, яко Даниилово обителище Духа Святаго был еси. Радуйся, преподобне Арсение, Коневский чудотворче.

Кондак 4

Бурею печали исполнися блаженный Иоанн, егда ты, преподобне отче Арсение, по триех летех в северную страну возвратитися восхотел еси; провидев же о тебе Божественное Промышление, благослови тя в путь, моляся глаголаше: “Господи Боже отец наших, от Престола славы Твоея призри на раба твоего Арсения, да почиет на нем всегда благодать Духа Твоего Пресвятаго, да поет Ти: Аллилуиа”.

Икос 4

Слышаша иноцы Афонстии, яко блаженный Арсений оставляет гору Афонскую, бяху скорбни зело; прозорливыма же очима усмотрив будущая, игумен Иоанн вручаше ти образ Богоматере со Предвечным Младенцем и глаголаше сицевая: Радуйся, яко тобою Бог воздвигнет в стране северней обитель; Радуйся, яко тамо посрамлен будет искуситель. Радуйся, яко за усердие к Богоматери мзду восприимеши; Радуйся, яко от Сына Ея на небесех прославишися. Радуйся, яко Ангелом собеседник будеши; Радуйся, яко человеком наставник добр явишися. Радуйся, новое светило хладного севера; Радуйся, любовию Христовою мрак суеты разгнавшее. Радуйся, яко тобою мнози сладость жизни духовныя уразумеют; Радуйся, яко земнии ликом Ангельским сопричастницы будут. Радуйся, звездо, путь ко Христу указующая; Радуйся, солнца мысленного — святыя иконы Богоматере колеснице. Радуйся, преподобне Арсение, Коневский чудотворче.

Кондак 5

Боготечней звезде уподобився, от востока на север в Великий Новград притекл еси, преподобне отче Арсение, и в нем благословение на устроение обители во имя Пречистыя Девы приял еси от святителя, иже лобызаше принесенную тобою икону Богоматере и со слезами вопияше: Аллилуиа.

Икос 5

Видев тя добродетели многими преисполнена, святитель Новаграда с благословением дарует тебе некая потребная ко устроению обители новыя, и прием сие благоговейно, преподобне отче Арсение, на ладии по реце Волхову и великому Ладожскому езеру в Валаамскую обитель достигл еси; мы же мысленными очесы зряще тя путь творяща, взываем в похвалу твою таковая: Радуйся, отче, отцев мужества соименный; Радуйся, всего себе в волю Божию предавый. Радуйся, иго благое на себе совершенне восприемый; Радуйся, бремя Христово легце понесый. Радуйся, труждающихся о Господе незримый помощниче; Радуйся, грехми обремененных к покаянию наставниче. Радуйся, окамененнаго нечувствия отгнателю; Радуйся, во отчаянии сущим благия надежды подателю. Радуйся, кротость Христову восприемый; Радуйся, смирению Его притекающих к тебе научивый. Радуйся, монашествующих покрове и утверждение; Радуйся, всех верных человек упование. Радуйся, преподобне Арсение, Коневский чудотворче.

Кондак 6

Проповедник твоего добродетельнаго жития и чудес от иконы Богоматере, по пришествии твоем на остров Коневский, явися рыбарь Филипп, иже любезне прият тя, преподобне отче Арсение, и с тобою пояше Богу: Аллилуиа.

Икос 6

Возсиял еси светом добродетелей твоих во острове Коневстем, идеже, яко пустыннолюбная горлица, вселився и уединенное житие пожив, на месте обитания твоего первее честный Крест водрузил еси; уведев же, авва Сила посла инока Лаврентия, да призовет тя паки во обитель Валаамскую, он же пришед и видев богоугодное житие твое, преподобне отче Арсение, глаголаше тебе сицевая: Радуйся, Богом управляемый подвижниче; Радуйся, Девы Марии истинный служителю. Радуйся, Божия правды дивный проповедниче; Радуйся, лжи нелицемерный обличителю. Радуйся, веры правыя насадителю; Радуйся, суеверия искоренителю. Радуйся, целомудрия наставниче; Радуйся, послушания учителю. Радуйся, ненавидения разрушителю; Радуйся, мира Божественнаго всеятелю. Радуйся, подвизающихся о Господе укрепителю; Радуйся, в грехи впадших исправителю. Радуйся, преподобне Арсение, Коневский чудотворче.

Кондак 7

Хотящу ти, преподобне отче Арсение, обитель во острове Коневстем создати, первее малый храм в честь Богоматере воздвигл еси, в оньже притекаху хотящии шествовати путем добродетельнаго жития и пояху Богу: Аллилуиа.

Икос 7

Новое чудо сотворил еси, егда со всеми собравшимися к тебе, икону Богоматере взем и к нарицаемому Коню-Камени пришед, прилежным молением злых духов, тамо живущих, отгнал еси; мы же, ведяще сие, в похвалу тебе, преподобне отче Арсение, взываем таковая: Радуйся, постом и молитвою диавола посрамивый; Радуйся, крестом от козней вражиих себе оградивый. Радуйся, от Коня-Камене злых духов прогнавый; Радуйся, от прелести лукаваго окрестных людей избавителю. Радуйся, соль земли, от воды крещения раждаемая; Радуйся, силою Божественною притекающих осоляющая. Радуйся, граде Христов, на верху горы стоящий; Радуйся, светом небесным украшенный. Радуйся, светильниче, в мире сем добродетельми светящий; Радуйся, к Богу и ближним любовию горящий. Радуйся, обуреваемых ересьми тихое пристанище; Радуйся, православия столпе непоколебимый. Радуйся, преподобне Арсение, Коневский чудотворче.

Кондак 8

Страннолюбив зело, яко древний Авраам, был еси, преподобне отче Арсение; ненавидяй же добрая диавол восхоте добродетели сей препятие сотворити; егда убо ты уразумел лукавство его, тогда общее учреждение приходящим ставити повелел еси, воспевая питателю всех Богу: Аллилуиа.

Икос 8

Весь воистину сам себе и всю собранную во обители нове братию попечению Богоматере вручил еси, преподобне отче Арсение, егда по летех некиих паки на гору Афонскую к стопам подвига, отцем святым отыти восхотел еси; богособранная же чада твоя, провождающе, зваху ти сицевая: Радуйся, наставниче благий, попечению Богоматере нас вручивый; Радуйся, никогдаже в отчаяние впадати научивый. Радуйся, паче всего искати Царствия Небеснаго завещавый; Радуйся, яко ищущим сего приложатся и земная, глаголавый. Радуйся, плоть свою духу покоривый; Радуйся, плоды духа миру явивый. Радуйся, служителю Божий, Христови сраспявыйся; Радуйся, сосуде Божественныя благодати. Радуйся, яко тобою Бог прославляется; Радуйся, яко тобою демоны посрамляются. Радуйся, печальных велие утешение; Радуйся, скорбящих нечаянное радование. Радуйся, преподобне Арсение, Коневский чудотворче.

Кондак 9

Вси иноцы во обители твоей, преподобне отче Арсение, скорби велией предашася, умедлившу ти на Афоне: глад бо тяжек и скудость многа постиже их и хотяху разытися кийждо во свояси; сия же им помыслившим, явися во сне Матерь Божия возлюбленному ученику твоему старцу Иоакиму, скорбящу о сем зело, и рече ему: “Не скорби, старче, но шед рцы братии, да пребывают во обители, ибо слуга Мой Арсений со множеством потребных вскоре грядет к вам, поя Богу: Аллилуиа”.

Икос 9

Витии сладкоглаголивии не могут изъяснити добродетели и чудеса твоя, преподобне отче Арсение; слышав бо таковая, восхоте приити к тебе из Новаграда, пользы ради духовныя, святитель Христов Евфимий, иже пришед и тако возлюби тя, яко первосвятительский ветхий клобук свой дарствова тебе, глаголя сицевая: Радуйся, земный Ангеле и небесный человече; Радуйся, согражданине святым и присный Богу. Радуйся, ветхаго человека со страстьми отложивый; Радуйся, во Христа облекийся. Радуйся, дивный ратоборче, вся оружия Божия восприемый; Радуйся, обитель во имя Богоматере создавый. Радуйся, кознем врага противоставый; Радуйся, Святаго Духа чистое жилище. Радуйся, добродетелей вместилище; Радуйся, заповедей Божиих светлосте. Радуйся, оправданий Господних сияние; Радуйся, уединенное житие возлюбивый. Радуйся, преподобне Арсение, Коневский чудотворче.

Кондак 10

Спасти хотя от опасности водныя обитель твою на возвышенное место преселил еси, преподобне отче Арсение, и устав, святыми отцы преданный, оставив, вместо себе игуменом старца Иоанна избрал еси, поя Богу: Аллилуиа.

Икос 10

Стену и прибежище, икону Владычицы Святогорскую, живущим во обители твоей оставив и Святых Тайн причастився, предсмертный завет завещавал еси, глаголя: “Аще пребудете в законе Господни, то не оскудеет обитель сия и Матерь Божия покровительницею ея будет”, таже по словесех сих дух твой Господеви предал еси, преподобне отче Арсение, окружающии же одр твой взываху сицевая: Радуйся, яко пред исходом в вечную жизнь Хлебом Небесным себе подкрепивый; Радуйся, яко пред смертию твоею чашу Господню испивый. Радуйся, светило православия, на севере неба возшедшее; Радуйся, к Небесному Свету, Христу Богу достигшее. Радуйся, яко от веры жив пребываеши; Радуйся, яко по исходе твоем духом нас не оставляеши. Радуйся, новый наш пред Богом предстателю; Радуйся, молитвенниче о душах наших теплейший. Радуйся, святе, к ликом святых сопричтенный; Радуйся, праведниче, в покой небесный достигнувый. Радуйся, трудов твоих достойную мзду восприемый; Радуйся, рабе благий, в радость Господа своего вшедый. Радуйся, преподобне Арсение, Коневский чудотворче.

Кондак 11

Пение всякое не довлеет к прославлению чудес твоих, преподобне отче Арсение, по преставлении бо множицею повсюду являлся, от потопления спасаеши и от болезней исцелявши притекающих к тебе и вопиющих Богу: Аллилуиа.

Икос 11

Светозарен весь явився, старца Моисея с рыбари от потопления спасл еси, слепцу в Новеграде представ, на исцеление во обитель твою послал еси, разслабленнаго инока Лаврентия укрепил еси, Иоанна от изступления ума исправил еси, преподобне отче Арсение, они же от бед и болезней избавльшеся, благодарственно взывают ти сицевая: Радуйся, до смерти в мире сем скорбное житие по Бозе препроводивый; Радуйся, мирскую суету о Христе препобедивый. Радуйся, по смерти делами веру твою извествуеши; Радуйся, яко являяся людем, велия чудеса совершаеши. Радуйся, обетований Христовых наследниче; Радуйся, славы Его сопричастниче. Радуйся, от потопления спасение; Радуйся, слепцев прозрение. Радуйся, разслабленных исцеление; Радуйся, изступивших из ума исправление. Радуйся, заблуждших наставниче; Радуйся, обуреваемых помоще. Радуйся, преподобне Арсение, Коневский чудотворче.

Кондак 12

Благодать творити чудеса дивная дана ти есть от Бога, преподобне отче Арсение; Афанасия бо со другом его из плена Свейскаго избавил еси, зело скорбящему иноку в Валаамстей обители во сне представ, в свою обитель послал еси его, и просящу молитв о нем, рекл еси ему: “Аще воздержишися от вина и многоглаголания, то моление сотворю о тебе”, взывая к Богу: Аллилуиа.

Икос 12

Поюще твоя чудеса, восхваляем тя, преподобне отче Арсение, и чтим святую память твою, вопиюще в похвалу сицевая: Радуйся, Царя царей — Христа Господа служителю; Радуйся, небесных сил сожителю. Радуйся, православия утверждение; Радуйся, ересей посрамление. Радуйся, болящих исцелителю; Радуйся, из плена избавителю. Радуйся, во истине призывающих послушателю; Радуйся, скорбных сердцем утешителю. Радуйся, верных прославление; Радуйся, неверных обличение. Радуйся, плачущих о гресех пред Богом ходатаю предивный; Радуйся, кающихся отец чадолюбивый. Радуйся, преподобне Арсение, Коневский чудотворче.

Кондак 13

О преподобне и достославне отче наш Арсение, утешение скорбящих и исцеление немощствующих, приими ныне малое сие приношение и от будущия муки избавится всем нам Господа умоли, да с тобою вопием Ему: Аллилуиа.

(Этот кондак читается трижды, затем икос 1 и кондак 1)

Молитва преподобному Арсению, Коневскому чудотворцу

О преподобне отче наш Арсение, зрителю неизреченныя славы в Небеснем Царствии. Не остави обитель твою, в нейже труды и подвиги о Христе подъял еси, но сохрани ю в мире и тишине, да пребудет незыблема от ухищрений врагов видимых и невидимых. Укрепи в доброделании чад твоих, их же собрал еси, мудре, во обитель твою, да познают звание свое, да будут достойни попечения о них Богоматере. Посети с высоты небесныя всех, верно притекающих к тебе животворною твоею молитвою. Плавающих на мори управи. Волнения моря жития сего утиши. Церковные раздоры укроти. Мир мирови у Господа всем нам испроси. Болящих уврачуй спасительным твоим заступлением. В скорбех буди утешитель и наставник благий. Всем буди вся, яко же был еси и в земнем житии твоем. Сотвори к Богу молитву, ибо дана ти есть благодать молитися за ны. Вемы бо, вемы воистину, яко много может молитва праведника, поспешествуемая ходатайством Богородицы. Аще и недостойны есмы, обаче и нас вручи Ея всесильному покрову и заступлению, да сподобимся улучити блаженство в Царствии Сына Ея, Христа Бога нашего, купно с тобою и всеми святыми во веки веков. Аминь.

Акафист преподобному Герману, Соловецкому чудотворцу

Кондак 1

Избранный чудотворче и изрядный угодниче Христов, отче наш Германе преблаженне, пустыннаго жития на острове Соловецстем первоначальниче, восхваляем тя любовию; ты же, яко имея дерзновение ко Господу, от всяких нас бед и скорбей свобождай, да зовем ти:

Радуйся, отче наш Германе, преподобных Зосимы и Савватия сподвижниче.

Икос 1

Ангельски пожив, яко ангел безплотен на земли явился еси, преподобне отче наш Германе; ты бо евангельскаго гласа послушав, от юности иго Христово на рамо свое взем, в пустыню потекл еси, и, упование все на Бога возложив, Тому ревностно служити возжелал еси. Сего ради восхваляем тя сице:

Радуйся, родителей твоих плоде благословенный; радуйся, Господа твоего благий рабе и верный.

Радуйся, яко Христа единаго возлюбил еси; радуйся, яко многая лета на острове пустыннем Богу служил еси.

Радуйся, иго Христово на себе вземый; радуйся, от Подвигоположника Христа дар исцелений приемый.

Радуйся, яко красная мира сего нивочтоже вменил еси; радуйся, в бреннем телеси, яко безплотен, пожил еси.

Радуйся, в страсе Божии издетска воспитанный; радуйся, на подвиги иночества от Господа призванный.

Радуйся, места рождения твоего града Тотьмы похвало и утверждение; радуйся, обители Соловецкия славо и ограждение.

Радуйся, отче наш Германе, преподобных Зосимы и Савватия сподвижниче.

Кондак 2

Видя, яко надлежит человеку прилежно злая от юности его терпети, усердно потщался еси совлещися ветхаго человека, тлеющаго в похотех его, и облещися в новаго, по Богу созданнаго в преподобии и правде; темже слезами покаяния день и нощь душевную ниву твою орошал еси, терния грехов и страстей искореняя, Христу же поя: Аллилуиа.

Икос 2

Разум просвещен свыше имея, провидел еси, отче Германе, будущая яко настоящая, и егда преподобный Зосима узре свет, осиявый место, на немже живяше, и церковь велию на воздусе, на востоце явльшуюся, тогда пророчески рекл еси ему, глаголя: «Не ужасайся и внимай себе, яко Господь чрез тя монахов множество соберет зде». Мы же, проречения твоего исполнение видяще и сему дивящеся, тако глаголем ти:

Радуйся, душетленных сластей мира сего не познавый; радуйся, премудрости небесныя взыскавый.

Радуйся, яко добре на земли подвизался еси; радуйся, яко козней демонских не убоялся еси.

Радуйся, некнижным путь верный к небесем показавый; радуйся, в молитве и трудех непрестанно пребывавый.

Радуйся, яко нерадивых молитвою твоею к покаянию воздвизаеши; радуйся, яко изнемогающих и унывающих силою благодати укрепляеши.

Радуйся, вольную Христа ради нищету возлюбивый; радуйся, в нестяжании безпечальное житие проводивый.

Радуйся, яко лучами добродетелей твоих иноков просвещаеши; радуйся, яко от всякия напасти их ограждаеши.

Радуйся, отче наш Германе, преподобных Зосимы и Савватия сподвижниче.

Кондак 3

Сила Вышняго укрепи тя, егда, приступая работати Господеви, по слову Писания, душу твою во искушение уготовал еси, постом, бдением и многими лишении в пустыни тело твое изнуряя, душу же молитвою непрестанною питая, во псалмех и пениих и песнех духовных воспевая сердцем и усты Богу: Аллилуиа.

Икос 3

Имея ревность о спасении души своея, дом отчий и вся красная мира сего оставил еси, угодниче Христов, и мужественно в пустыню вселился еси, сподвижник и сотаинник преподобным Савватию и Зосиме был еси; темже и на небеси купно с ними мзду трудов своих обрел еси, идеже слышиши от нас похвалы сия:

Радуйся, преподобных Савватия и Зосимы сожителю; радуйся, преподобных совершеннаго безмолвия любителю.

Радуйся, яко тесный путь паче широкаго избрал еси; радуйся, яко непрестанною молитвою дары духовныя стяжал еси.

Радуйся, святым древним отцем ревновавый; радуйся, всего себе на служение Богу предавый.

Радуйся, яко демонския полки всеконечно погубил еси; радуйся, яко ангельския лики возвеселил еси.

Радуйся, плоти угодия никогдаже творивый; радуйся, притекающим к тебе отец чадолюбивый.

Радуйся, яко во плоти сый риз греховных до конца совлеклся еси; радуйся, яко образ Божий в себе благодатию Христовою возставил еси.

Радуйся, отче наш Германе, преподобных Зосимы и Савватия сподвижниче.

Кондак 4

Бурю уныния и напастей, от врага спасения подвижником благочестия наводимую, молитвою отгоняя и в непрестанных трудех пребывая, помощию Божиею достигл еси тихаго пристанища, покоя душевнаго, благодарне Благодетелю Богу взывая: Аллилуиа.

Икос 4

Слышавше ревнителие равноангельнаго жития, яко на острове Соловецстем преподобнии oтцы Зосима и Герман обитель боголепнаго Спасова Преображения устрояют и ищущих спасения братолюбно приемлют, Божиим Духом движимии притекаху к има, просяще наставления и руководительства. Мы же, суетою омраченнии, тебе, яко общаго наставника, отче наш Германе, прославляем звании сими:

Радуйся, плоть твою духови покоривый; радуйся, трудом, бдением и постом ю изнуривый.

Радуйся, яко слез твоих струями ниву душевную напоил еси; радуйся, яко вся помыслы душепагубныя от себе удалил еси.

Радуйся, стрелою любве Божественныя сердце твое уязвивый; радуйся, немощи немощных, яко сильный, на себе носивый.

Радуйся, яко причастник всем боящимся Бога был еси; радуйся, яко до зела себе смирил еси.

Радуйся, очи наша верою просвещаяй; радуйся, сердца наша надеждою спасения озаряяй.

Радуйся, яко преподобному Зосиме в созидании обители послужил еси; радуйся, яко подвиги твоими братию всю удивил еси.

Радуйся, отче наш Германе, преподобных Зосимы и Савватия сподвижниче.

Кондак 5

Боготечная звезда явился еси, богоблаженне отче наш, преподобным Савватию и Зосиме, егда восхвалял еси пустынность острова Соловецкаго и провождал еси их, по морю плывя, на место святое сие, идеже в безмолвии труды ко трудом прилагая, плоды духовныя собирал еси, Богу же сердцем чистым взывал еси: Аллилуиа.

Икос 5

Видя враг рода человеча, яко необитаемая доселе пустыня процветает, яко крин, и яко в ней имя Господне от пустынножителей прославляется, восхоте погубити святое дело Божие; напусти бо человека некоего с женою его и чады преселитися на остров. Ангели же Господни, биения давше жене, повелеша оставити остров, да будет сей в жилище токмо иноков. Сего ради, прославляюще Господа, тако благоизволившаго, глаголем ти:

Радуйся, измлада иноческое житие избравый; радуйся, пустыннаго и безмолвнаго пребывания взыскавый.

Радуйся, яко непрестанно себе внимал еси; радуйся, яко равноангельное жительство показал еси.

Радуйся, в терпении мнозе потрудивыйся; радуйся, молитв забралом присно ограждавыйся.

Радуйся, яко преподобным Зосиме и Савватию сподвижник и сотаинник был еси; радуйся, яко с ними в пристанище безстрастия достигл еси.

Радуйся, яко злато в горниле искушенный; радуйся, светом Трисиянным озаренный.

Радуйся, яко с небесе на вся ны милостивно призираеши; радуйся, яко вся прошения наша во благо исполняеши.

Радуйся, отче наш Германе, преподобных Зосимы и Савватия сподвижниче.

Кондак 6

Проповедник всем глагол ангельских был еси, преблаженне отче, егда, по совершении с преподобным Савватием воскреснаго нощнаго молитвословия изшед из храмины, внезапу услышал еси глас жены плачущия и, узрев ю, вопросил еси о причине плача. Она же рече: «Два юноши светли жестоко биша мя и рекоша ми: бежите отсюду, ибо не для вас место сие, яко зде иноков множество прославит Господа». Ты же, слышав сие, умиленне Богу возгласил еси: Аллилуиа.

Икос 6

Возсия свет велий от обители Соловецстей, осияваяй всю страну нашу, ибо лучами добродетелей твоих просвещаеши не токмо притекающих к цельбоносным мощем твоим, но и издалече верою призывающих тя. Озари убо светом Евангелия омраченная грехом сердца наша и укрепи нас во благочестии, да вси радостно взываем ти:

Радуйся, пустыни красное прозябение; радуйся, постников предивное украшение.

Радуйся, яко в бодреннем трезвении пребывал еси; радуйся, яко мзду трудов твоих на небеси восприял еси.

Радуйся, ангелов собеседниче; радуйся, Царствия Христова наследниче.

Радуйся, яко благодать от Бога обрел еси; радуйся, яко иерею благоговейному образ твой во сне списати повелел еси.

Радуйся, безмездный недугов целителю; радуйся, благодатный бесов прогонителю.

Радуйся, яко с преподобными Зосимою и Савватием ревностно трудился еси; радуйся, яко с ними наставник добр монахом явился еси.

Радуйся, отче наш Германе, преподобных Зосимы и Савватия сподвижниче.

Кондак 7

Хотя всем человеком спастися и в разум истины приити, Человеколюбец Господь указа ти место удобно спасения, идеже ты многими поты и скорбьми, злострадании и лишении неленостне Богу работал еси, выну вопия Ему: Аллилуиа.

Икос 7

Новаго Моисеа, древнему подобна, видим тя, богоизбранне отче наш, ибо в пустыни земнаго странствия нашего всех, к помощи твоей прибегающих, к Иерусалиму горнему наставляеши, фараона мысленнаго потопляя и всех молением твоим ограждая, вопиющих ти таковая:

Радуйся, молитвенниче наш неусыпный; радуйся, предстателю о нас непостыдный.

Радуйся, яко скорби пустыннаго жития доблественне претерпел еси; радуйся, яко постом и молитвою, аки крилами, на высоту добродетелей возшел еси.

Радуйся, чистотою душевною и телесною Бога прославивый; радуйся, нравы твоими вся ны наставивый.

Радуйся, яко в небесных чертозех вселился еси; радуйся, яко оных обителей и нам пред Богом ходатай явился еси.

Радуйся, бед и напастей нас свобождаяй; радуйся, всем благая от Спаса Христа подаваяй.

Радуйся, яко непрестанно духом горел еси; радуйся, яко со всеми человецы мир имел еси.

Радуйся, отче наш Германе, преподобных Зосимы и Савватия сподвижниче.

Кондак 8

Странно убо видети, како ты, богоблаженне отче, старостию притружденный, за послушание настоятелю и братии по морю многажды плавал еси, о нуждах новосозидаемыя обители и об утешении братии попечение имея, отнюд покоя себе не дая и среди опасностей потопления живот твой Богови вверяя и сердцем взывая Ему: Аллилуиа.

Икос 8

Весь ум твой в небесная вперив, горняя мудрствовал еси, а не земная, преподобне отче наш, вышних ища, идеже есть Христос одесную Бога седя, идеже празднующих глас непрестанный, идеже радость праведных несказанная. Тамо убо со всеми святыми водворяяся, слышиши от нас ублажения сии:

Радуйся, очесы веры на Христа присно взиравый; радуйся, в злостраданиих николиже роптавый.

Радуйся, яко на ладии многажды по морю плыл еси; радуйся, яко сие за послушание настоятелю и братии творил еси.

Радуйся, морских волнений и напастей не страшивыйся; радуйся, благому Промыслу Божию всецело покоривыйся.

Радуйся, яко смирением и послушанием Богу угодил еси; радуйся, яко козни вражия до конца сокрушил еси.

Радуйся, в бурю пловцем подаваяй спасение; радуйся, дивное им в бедах поможение.

Радуйся, яко душу твою по братии полагал еси; радуйся, яко имя Господне непрестанно призывал еси.

Радуйся, отче наш Германе, преподобных Зосимы и Савватия сподвижниче.

Кондак 9

Всякое плотское мудрование мужественне отринув, вдал еси себе в совершенное послушание настоятелю и братии, памятуя слово наставления святоотеческаго, яко послушание паче поста и молитвы есть, и тако достигл еси в мужа совершенна, в меру возраста Христова, Богу поя: Аллилуиа.

Икос 9

Витии премудрии не возмогут достойно восхвалити труды и подвиги твоя, ибо всего себе от юности в жертву Господеви возложив, даже до старости многолетныя распинал еси плоть со страстьми и похотьми, да очистиши сердце твое и да будеши храм Животворящаго Духа Святаго. Сподоби и нас, святче Божий, тебе усердно подражати и сице тебе возглашати:

Радуйся, в пустынных дебрех и горах привитавый; радуйся, постом и молитвою в напастех себе ограждавый.

Радуйся, яко чести и славы мирския избегал еси; радуйся, яко во смирение аки в порфиру Царствия Небеснаго облеклся еси.

Радуйся, благодати сосуде избранный; радуйся, любве, соуза совершенства, кладенец преизливанный.

Радуйся, яко игу Христову выю твою подклонил еси; радуйся, яко по трудех дневных нощи в молитве проводил еси.

Радуйся, вся обеты иноческия свято соблюдавый; радуйся, прельщениям лукаваго никакоже внимавый.

Радуйся, яко от всякаго зла себе хранил еси; радуйся, яко полчища бесов посрамил еси.

Радуйся, отче наш Германе, преподобных Зосимы и Савватия сподвижниче.

Кондак 10

Спасти хотя душу твою, нозе твои на камени веры поставил еси и, светильник слова Божия вжег, в законе Господни ходил еси, помышляя, яко странник и пришлец еси на земли, и яко жительство Твое на небеси есть. Сего ради ко всем заповедем Господним направлялся еси, всяк путь неправды возненавидев, во еже непрестанно воспевати Христу Богу ангельскую песнь: Аллилуиа.

Икос 10

Стена еси и крепкое заступление обители твоея и всем верно молящимся тебе, ибо небесе и земли Творец, видя богоугодное житие твое, облагодати тя, да будеши печальным утешение, скорбящим радование, недугующим врач и целитель, кающимся надежда прощения и всем во всяких нуждах помощник, да вси ублажают тя сице:

Радуйся, образе кротости и смирения; радуйся, теплый ходатаю нам спасения.

Радуйся, яко ревнующих о спасении под кровом своим соблюдаеши; радуйся, яко трудников и богомольцев обители твоея с небеси благословляеши.

Радуйся, обидимых благонадежное и скорое защищение; радуйся, в скорбех и печалех нам всем утешение.

Радуйся, яко всем, притекающим к тебе, в нуждах помогаеши; радуйся, яко за вся православныя христианы молитвы Богу возсылаеши.

Радуйся, на свещнице Христовой поставленный; радуйся, на земли дивно от Бога прославленный.

Радуйся, яко гнев Божий от нас грешных отвращаеши; радуйся, яко любовию чтущих святую память твою благодатно посещаеши.

Радуйся, отче наш Германе, преподобных Зосимы и Савватия сподвижниче.

Кондак 11

Пение надгробное со слезами смешанное принесл еси, всеблаженне отче, егда, возвратився в обитель, уведел еси о преставлении сподвижника твоего преподобнаго Савватия, егоже зело, яко брата, любил еси. Егда же Господь посла тебе новаго сподвижника твоего, преподобнаго Зосиму, тогда радости исполнився, благодарно Богу возгласил еси: Аллилуиа.

Икос 11

Светозарное светило показался еси, отче наш, Германе, в нощи греховней блуждающим, души наша светом богопознания просвещая и по пути заповедей Христовых ходити наставляя. Сего ради к тебе усердно притекаем и тако тя восхваляем:

Радуйся, целомудрия изрядный ревнителю; радуйся, чистоты усердный блюстителю.

Радуйся, яко надежду небеснаго наследия в себе имел еси; радуйся, яко жития преподобных Зосимы и Савватия списати повелел еси.

Радуйся, вся заветы преподобнаго Зосимы свято хранивый; радуйся, ни един же от них преступивый.

Радуйся, яко о смертнем часе непрестанно помышлял еси; радуйся, яко ко исходу от жития сего себе присно уготовлял еси.

Радуйся, по Бозе упование твое на Матерь Божию возлагавый; радуйся, Богородицу яко Матерь Света выну в песнех величавый.

Радуйся, яко преподобнаго Зосиму ко гробу проводил еси; радуйся, яко тело его многотрудное слезами теплыми оросил еси.

Радуйся, отче наш Германе, преподобных Зосимы и Савватия сподвижниче.

Кондак 12

Благодать, свыше ти дарованную, подаждь нам, досточудне отче наш, яко да и мы, подражающе вере и благочестию твоему, принесем Спасителю нашему дары духовныя: покаяние теплое, молитвы усердныя, братолюбие нелицемерное со всеми добродетельми и сподобимся купно с тобою взывати Богу: Аллилуиа.

Икос 12

Поюще твоя чудеса, богоносне отче наш, восхваляем подвиги твоя, ублажаем и кончину твою, ибо, на смертнем одре возлежа и исход свой провидя, возжелал еси исповедатися и Святых Христовых Таин причаститися. Сподоби убо и нас христианския кончины живота нашего и добраго ответа на Страшнем судищи Христове, да зовем ти:

Радуйся, в монастыри преподобнаго Антония Римлянина богоугодное житие твое скончавый; радуйся, в Новограде на послушании умиленный дух твой Богу предавый.

Радуйся, яко и по смерти чудесы твоими сияеши; радуйся, яко духи нечистыя от человек прогоняеши.

Радуйся, от обители земныя во обители небесныя преселивыйся; радуйся, тамо со всеми святыми в вечней славе водворивыйся.

Радуйся, яко мощи твоя на месте трудов твоих почивают; радуйся, яко тыя мощи исцеления верующим источают.

Радуйся, духом воскресый прежде общаго воскресения; радуйся, и нашим душам указуяй путь обновления.

Радуйся, яко монахов множество наставника тя почитают; радуйся, яко православных собор присно тя ублажает.

Радуйся, отче наш Германе, преподобных Зосимы и Савватия сподвижниче.

Кондак 13

О преподобне и преблаженне отче наш Германе, приими ныне малое сие моление наше, от души в похвалу тебе приносимое, и твоим многомощным предстательством умоли Господа нашего Иисуса Христа, да пробавит милость Свою нам грешным и подаст нам во временнем житии нашем вся благая и потребная яже к животу и благочестию, да и мы с тобою и всеми святыми выну Ему вопием: Аллилуиа.

Этот кондак читается трижды, затем 1-й икос: «Ангельски пожив …» и 1-й кондак: «Избранный чудотворче…».

Молитва первая

О великий угодниче Христов, земный ангеле и небесный человече, преблаженне отче наш Германе, преподобных Зосимы и Савватия сподвижниче, Соловецкий чудотворче и пустынножителю, обстояще честную раку цельбоносных мощей твоих, мысленными очесы зрим тя с нами суща и мольбам нашим внемлюща. Сего ради, с верою и любовию припадающе к тебе, молим тя: призри с небесе святаго на нас грешных, слабых духом и немощных телом и умилосердися, помози нам твоим многомощным ходатайством ко Творцу и Спасителю нашему. Ты веси, яко, подобно реце многоводней, разливаются по земли нашей безбожие, неверие, зловерие, ереси, расколы, распри, раздоры, разделения, и увы нам. Среди именующихся именем Христовым хулится имя Божие, раздирается Церковь - Тело Христово, попираются Евангелие и закон Христов. Ты зриши оскудение велие любве многих и умножение беззаконий, ихже ради грядет гнев Божий на нас грешных. К кому прибегнем, отче наш? К кому возопиим? Кто предстанет и защитит нас? На тя упование наше возлагаем, предивный угодниче Христов. Испроси нам у Господа грехов наших прощение и отврати от нас весь гнев Его, праведно движимый на ны. Утверди веру правую в сердцах наших, защити Церковь святую, духом грядущаго в мир противника Христова обуреваемую. Даруй нам любовь к Богу и друг ко другу, мир и единомыслие, утоли вся раздоры и нестроения наша, да не до конца погибнем. Буди стена крепка и заступление обители твоей, в еяже созидании много потрудился еси. Буди отец и наставник и покровитель иноком, ихже с преподобными Зосимою и Савватием мудре собрал еси на месте трудов ваших. Помози им подвигом добрым подвизатися, веру нераздельну соблюсти, главы невидимых змиев сокрушити, победителем греха явитися и житием своим прославити превелие имя Святыя Троицы. Не забуди и нас, любовию чтущих святую память твою и к тебе, яко отцу чадолюбивому, притекающих. Помогай и нам, отче наш милостивый, в душевных и телесных нуждах наших, подавай нам вся благая и потребная в жизни временней, да ревностно поработаем Господу Богу прочее время живота нашего, и понесем на себе иго Его благое и легкое Его бремя, и, тако достигше благодатию Христовою Небеснаго Царствия, сподобимся с тобою и со всеми святыми славити и воспевати пречестное и великолепое имя Отца и Сына и Святаго Духа ныне и присно, и во веки веков. Аминь.

Молитва вторая

О преподобне и Богоносне отче наш Германе, безмолвнаго иноческаго жития во острове Соловецстем первоначальниче! Молим тя мы, недостойнии, прибегающе к молитвам твоим, имиже купно с молением преподобных отец наших Зосимы и Савватия освящается и прославляется богоизбранное место сие. Буди, с сими угодники Божиими и прочими Соловецкими чудотворцы и всея Российския земли Небесными предстатели, молитвенник и ходатай о нас, грешных, пред Престолом Вседержителя Бога, Емуже в дерзновении предстоиши со Ангелы и всеми святыми, да дарует нам, яко Благий и Человеколюбивый, вся потребная к животу и благочестию, душам и телесем нашим здравие, во всех благих преспеяние и Свою всесильную помощь во всяких искушениих, бедах же и напастех, воздвизаемых на ны от враг спасения нашего; обители твоей моли избавится от всякаго злаго обстояния и приходящим в ню ближним и дальним получити вся просимая ко душевней и телесней пользе. Наипаче же испроси, угодниче Христов, всем нам грехов отпущение, христианскую кончину жития и наследие Царства Небеснаго у Христа Бога нашего, Емуже честь и слава, со Отцем и Святым Духом, ныне, и присно, и во веки веков. Аминь.

Акафист Преподобному Александру, Свирскому чудотворцу

Кондак 1

Избранный угодниче Христов и чудотворче, преподобный отче Александре, возсиявый мирови, яко звезда богосветлая, жития твоего добротою и множеством чудотворений, восхваляем тя любовию в песнех духовных: ты же, яко имеяй дерзновение ко Господу, молитвами твоими от всяких нас бед свободи, да зовем ти: Радуйся, преподобне Александре, Свирский чудотворче.

Икос 1

Ангельский нрав имел еси, отче преподобне, и яко безплотный, непорочно житие совершил еси на земли, дивный образ совершенства духовнаго нам оставив, да подражаем добродетелем твоим, и зовем ти сице: Радуйся, благочестивых родителей плод богодарованный. Радуйся, неплодие рождших тя разрешивый. Радуйся, сетование их на радость преложивый. Радуйся, от пелен Богом избранный. Радуйся, от утробы матерния на службу Ему предуставленный. Радуйся, от юности Его Единаго всем сердцем возлюбивый. Радуйся, вся красная мира сего ни во что же вменивый. Радуйся, постом и бдением молитвенным плоть твою удручивый. Радуйся, непорочный сосуде Божия благодати. Радуйся, жилище Духа Святаго, украшенное чистотою. Радуйся, мужу желаний духовных. Радуйся, главо, освященная десницею Всевышняго. Радуйся, преподобне Александре, Свирский чудотворче.

Кондак 2

Видя Господь душу твою, яко ниву благовозделанную к плодоносию духовному, от юности к исканию единаго на потребу направи твой помысл, преподобне, темже любве ради Христовы, родителей твоих и дом отеческий оставил еси, всякаго пристрастия суетнаго свободився, притекл еси в пустынную обитель Валаамскую на подвиги иноческия, зовый спасающему тя Богу: Аллилуиа.

Икос 2

Разумом богопросвещенным постигл еси суету мира сего и непостоянство, в немже радость сменяется скорбию, благополучие наветуется нечаянными бедами. Темже вечных нетленных благ возжелел еси, отче преподобне, и сия взыскати потщался еси отречением мирских благ и вольною нищетою, подвигая нас звати тебе: Радуйся, пустыннаго безмолвия любителю. Радуйся, смирения и нестяжания рачителю. Радуйся, истиннаго самоотвержения совершенный образе. Радуйся, иноческаго равноангельскаго жития всеизрядное явление. Радуйся, правило веры и благочестия. Радуйся, зерцало терпеливаго послушания. Радуйся, безмолвие иноческое возлюбивый. Радуйся, слезы духовныя стяжавый. Радуйся, плачем временным блаженство вечное снискавый. Радуйся, молитвами непрестанными прилоги вражия сокрушивый. Радуйся, бдением и труды плоть твою духови покоривый. Радуйся, постом и воздержанием страсти укротивый. Радуйся, преподобне Александре, Свирский чудотворче.

Кондак 3

Силою Всевышняго осененный и укрепляемый, в иночестем пострижении власов главы твоея, все плотское мудрование отложил еси, преподобне, и яко воин благоискусный, схиму иноческую в броню спасения стяжав, и непобедимым оружием Креста Христова вооружився, крепко ратовал еси противу врага невидимаго – диавола, смирением глубоким побеждая его вознесенную гордыню, и выну вопия ко Господу: Аллилуиа.

Икос 3

Имея слез источник изобильный, угодниче Божий, и умиления велию благодать, хлеб твой слезами орошал еси, и питие плачем растворял, от преизбытка желания Божественнаго и любве ко Господу. Темже и мы ублажаем тя звании сими: Радуйся, крепости и мужества тезоименитый подвижниче. Радуйся, ангелоподобный человече. Радуйся, Царя Небеснаго воине добропобедный. Радуйся, валаамския обители плоде добрый. Радуйся, пустынножителю благоприятный. Радуйся, молитвенниче неусыпающий. Радуйся, постниче изрядный. Радуйся, безмолвниче дивный. Радуйся, подвигом древних богоносных отцев последователю. Радуйся, их терпению и трудом подражателю. Радуйся, благовременно могилу себе ископавый. Радуйся, о смертнем часе непрестанно помышлявый. Радуйся, преподобне Александре, Свирский чудотворче

Кондак 4

Буря искушений и устремлений диавольских не возможе поколебати храмины твоея душевныя, преподобне отче, основана бо бе на твердем камени веры во Христа, и хранима трезвением и молитвами непрестанными, имиже выну противоборствовал еси врагу спасения человеческаго, и непреткновенно восходил еси по стезем добродетелей к совершенству духовному в меру возраста Христова, воспевая Богу: Аллилуиа.

Икос 4

Слышав похваляема себе от человек, убоялся еси превозношения суетнаго, отче богомудре, и яко истинный смирения образ, умыслил еси убежати в пустыню неизведанную, на реку Свирь, на место свыше тебе указанное в видении чудном, да тамо и невозбранно единому Богу поработаеши, идеже мы сретаем тя благохвалении сими: Радуйся, смирившагося до рабия зрака Христа Господа благий последователю. Радуйся, святых Его заповедий усердный исполнителю. Радуйся, девственниче душею и телом. Радуйся, трудолюбче нелицемерный. Радуйся, презревый славу человеческую суетную. Радуйся, сокрушивый сети тщеславия и гордыни. Радуйся, поправый высокоумия душевредную прелесть. Радуйся, усвоивый себе святое смирение Христово. Радуйся, исполнивый вся обеты иночества. Радуйся, украсивыйся дарами благодати Божия. Радуйся, по благодати приемый власть на духи нечистыя. Радуйся, ни во что же вменивый тех устрашения и привидения. Радуйся, преподобне Александре, Свирский чудотворче.

Кондак 5

Светозарный луч озари в нощней темноте место пустынное, на немже вселитися пришел еси, преподобне, знаменуя собою светлость души твоея, и пламенеющее любовию ко Господу сердце твое, идеже благоприятно бысть Творцу твое произволение работати Ему в преподобии и святости, и пети Ему тамо хвалебную песнь: Аллилуиа.

Икос 5

Видевше ангельстии чинове равноангельское житие твое отче богоблаженне, смирения твоего глубину, молитвы неотступность, воздержания твердость и велию ревность духа твоего о чистоте, удивишася и прославиша человеколюбца Бога, укрепляющаго немощное естество человеческое. Мы же ублажаем тя и зовем: Радуйся, светилниче пустынный, просветивый страну корельскую сиянием твоих добродетелей. Радуйся, монашествующих дивное украшение. Радуйся, крине благоуханный пустыннаго прозябения. Радуйся, древо благоплодное небеснаго насаждения. Радуйся, возлюбивый благолепие дому Божия. Радуйся, в самем себе храм Триипостасному Божеству уготовивый. Радуйся, преподобием и правдою одеянный. Радуйся, союзом добродетелей удобренный. Радуйся, помазание приемый от Святаго Духа. Радуйся, освященный сосуде благодати Божия. Радуйся, рабе Христов, благий и верный. Радуйся, слуго Господень истинный. Радуйся, преподобне Александре, Свирский чудотворче.

Кондак 6

Проповедник подвигов твоих в пустыни Свирстей явился ловец зверей дивиих, иже гнав еленя в дубраве непроходимей, смотрением Божиим обрете храмину твою, преподобне отче: видев же тя во плоти ангела, знамение благодатнаго озарения на лице своем носяща, страха и радости исполнися и припад к честным твоим стопам, во умилении сердца возопи Зиждителю Богу: Аллилуиа.

Икос 6

Возсиял еси в пустыни Свирстей богосветлое светило, и на спасения стезю наставил еси многи души человеческия: яви бо тя Христос наставника и учителя иноком пустыннолюбивым, иже стекахуся к тебе, яко овцы к пастырю, могущу упасти их на пажити живоносней. Темже, яко сотворившаго и научившаго, чествуем тя сими похвальными словесы: Радуйся, источниче богодухновенных учений. Радуйся, хранилище изобильнаго умиления. Радуйся, одушевленныя скрижали закона Господня. Радуйся, немолчный проповедниче Евангелия Христова. Радуйся, заповеди Господни исполнивый, и оным научивый учеников твоих. Радуйся, ленивых подвигнувый к исправлению твоими Христоподражательными нравы. Радуйся, немощных укрепивый данною ти от Господа благодатию. Радуйся, скорбящих утешивый сладостию твоих словес. Радуйся, грешных к покаянию направивый. Радуйся, юныя уцеломудривый. Радуйся, сострадания исполненный. Радуйся, в милости богатый. Радуйся, преподобне Александре, Свирский чудотворче.

Кондак 7

Хотя Человеколюбец Господь прославити место подвигов твоих, отче, посла Ангела своего благовестити тебе, яко будет на месте том обитель иноком во спасение, и в ней храм во имя Святыя Троицы. Ты же явлением безплотнаго просвещен, с радостным трепетом внимал еси благовестию небесному, зовый в смирении духа Владыце Ангелов и человеков: Аллилуиа.

Икос 7

Новое знамение благоволения Божия даровася тебе, преподобне, егда безмолвствующу ти в избранней пустыни, в нощи свет велий облиста тя, и три мужа в одеждах светлых предсташа пред тобою, мир тебе дарующе и повелевающе, да устроиши тамо обитель иноческую, и в ней храм во имя Святыя Троицы. Дивяся убо сему пречудному в триех ангельских лицех Троическому явлению, зовем ти: Радуйся, таинниче Пресвятыя и Единосущныя Троицы. Радуйся, самовидче неизреченнаго Божия явления. Радуйся, собеседниче светоносных ангельских сил. Радуйся, созерцателю лучезарнаго Божественнаго видения. Радуйся, причастниче огнезрачнаго трисолнечнаго сияния. Радуйся, поклонниче Триипостаснаго Божества. Радуйся, в смертнем телеси, безсмертия зарею просвещенный. Радуйся, на земли небеснаго посещения удостоенный. Радуйся, смирением высокая стяжавый. Радуйся, нищетою богатую милость Господню улучивый. Радуйся, сеявый слезами радость присносущную. Радуйся, приемый исполнение обетований непреложных. Радуйся, преподобне Александре, Свирский чудотворче.

Кондак 8

Страннолепно явился ти на воздусе Ангел Господень в мантии и куколи иночестем, указуяй место, на немже храм во имя Живоначальныя Троицы имел еси создати в пустыни Свирстей, преподобне отче, егоже Божиим поспешением совершив и освятив, со ученики твоими немолчныя хвалы возсылал еси в нем Господеви, зовый: Аллилуиа.

Икос 8

Всего себе предав воле Господней, учениками твоими умоленный, священства благодать восприяти не уклонился еси, отче, аще и тужаше дух твой, ужасаяся высоты сея, но послушание явил еси духовным чадом твоим, подвизая их согласно звати тебе: Радуйся, безкровныя жертвы достойный совершителю. Радуйся, олтаря Господня благоговейный служителю. Радуйся, преподобныя руце твои со многим дерзновением ко Господу воздеявый. Радуйся, молитвы теплейшия от сердца чиста к престолу Вседержителя возносивый. Радуйся, образ благочестия бывый твоим учеником. Радуйся, мастию священства умащенная главо. Радуйся, вождю благоискусный воинов духовных. Радуйся, отче благомудрый общежития иноческаго. Радуйся, свеще, в молитве к Богу возжженная. Радуйся, звездо ко спасению путь верный показующая. Радуйся, маслино, елей милости Божия источившая. Радуйся, чаше, жаждущих учения спасительнаго напоившая. Радуйся, преподобне Александре, Свирский чудотворче.

Кондак 9

Вси иноцы обители твоея в радостный трепет приидоша, егда устремление потока воднаго, на святую обитель твою движущееся, молитвою твоею укротил еси, и призыванием всесильнаго имене Иисус Христова, бурному потоку тещи безвредно устроил еси на благую потребу иночествующих, еже видевше духовная чада твоя всеумиленно возгласиша купно с тобою Богу: Аллилуиа.

Икос 9

Ветийство человеческое не довлеет изрещи обилие радости духовныя, еюже преисполнился еси, отче богоносне, егда во время молитвы твоея нощныя, явися ти Пресвятая Богородица с ликом чинов ангельских и обетовании непреложными душу твою возвесели, яко присная заступница обители твоея будет, снабдевающи и покрывающи ю по вся дни. Темже и мы сия радостныя тебе приносим глаголы: Радуйся, благоволением Богоматере осененный. Радуйся, посещением Царицы небесе и земли утешенный. Радуйся, слышавый милостивыя от уст Ея глаголы. Радуйся, приемый обетование крепкаго Ея обители заступления. Радуйся, любимиче Ея преискренний. Радуйся, избранниче Сына Ея и Бога. Радуйся, даром чудотворения облагодатствованный. Радуйся, будущая, яко настоящая провидевый. Радуйся, рыбарем ловитву чудесно умноживый. Радуйся, неплодным родителем чадородие даровавый. Радуйся, болящия здравы возставивый. Радуйся, тайная согрешения человеческая обличивый. Радуйся, преподобне Александре, Свирский чудотворче.

Кондак 10

Спасти хотя души ученик твоих, отечески назидал еси их, богомудре, оваго словом, оваго примером жития твоего, с кротостию обличая, с любовию увещавая их преуспевати в благочестии и чистоте: наипаче же пред кончиною твоею, вся ко спасению душевному благопотребная заповедал еси им, и научил еси их в молитвах бодрствовати и немолчно пети Богу: Аллилуиа.

Икос 10

Стена заступления быша молитвы твоя чудотворче святый, всем с верою к тебе притекающим во всякой скорби, ибо чистоты ради твоея сердечныя сила духовная от Бога тебе даровася, болящих изцеляти, бедствующим помогати, будущая прорицати, яко славити ближним и дальным величия Божия, в тебе явленная, и звати тебе сице: Радуйся, врачу немздоприемный недугов человеческих. Радуйся, не токмо телесных, но и душевных болезней изрядный целителю. Радуйся, слепым прозрение даровавый. Радуйся, сляченных и увечных здравы сотворивый. Радуйся, бесных от диавольскаго удручения свободивый. Радуйся, изступленным ум здравый возвративый. Радуйся, покрытых струпами уврачевавый. Радуйся, печальных утешивый. Радуйся, бедствующим на помощь ускоривый. Радуйся, плененным и в темнице седящим ослабу и свободу явлением твоим даровавый. Радуйся, преподобне Александре, Свирский чудотворче.

Кондак 11

Пение всеумиленное принесл еси Пресвятей Троице во время кончины твоея, преподобне, и молитве сущей на устех твоих предал еси святую душу твою в руце Живаго Бога, Егоже от юности возлюбил еси, и Емуже до старости маститыя работал еси нелицемерно, темже со упованием благим радостно прешел еси к обителем небесным, со ангельскими лики пети Триипостасному Богу: Аллилуиа.

Икос 11

Мирную кончину твою видевше твои ученицы, великий угодниче Божий, скорбь разлучения с тобою утешением благодатным раствориша, в уповании всесильнаго предстательства твоего горе у престола Божия, идеже слышиши с любовию тебе зовущих: Радуйся, венец безсмертныя жизни приемый от руки Вседержителя. Радуйся, ликовствуяй в чертозе Небеснаго Домовладыки. Радуйся, откровенным лицем созерцаяй славу Трисияннаго Божества. Радуйся, со старцы белоризными покланяяйся Творцу. Радуйся, наследниче всесветлаго Царствия Христова. Радуйся, гражданине Иерусалима Горняго. Радуйся, небеснаго Сиона жителю. Радуйся, нерукотворенных скиний райских обитателю. Радуйся, по трудех временныя жизни, покой вечный получивый. Радуйся, блаженство, от века праведным уготованное, праведно восприявый. Радуйся, лучами невечерняго света свыше осиянный. Радуйся, долу величием чудес блистаяй. Радуйся, преподобне Александре, Свирский чудотворче.

Кондак 12

Благодати причастна явися священная рака, содержащая многоцелебныя мощи твоя, чудотворче святый, ихже по летех мнозех яви Господь в недрах земных нетленными, изцеления неоскудно источающия, и всяк недуг врачующия силою Бога, дивнаго во святых Своих, дивно прославльшаго тя на небеси и на земли, Емуже воспеваем: Аллилуиа.

Икос 12

Поюще радостную песнь хвалы и благодарения Человеколюбцу Богу, прославльшему тя в стране российстей чудотворца дивнаго и милостиваго, молим тя преподобне отче наш: буди ходатай к Нему и молитвенник присный о нас зовущих ти: Радуйся, заступниче рода христианскаго. Радуйся, сокровищнице даров многоразличных. Радуйся, покрове, Богом зданный Радуйся, от Бога благодать изцелений восприявый. Радуйся, цвете нетления, облагоухавый святую Церковь. Радуйся, заре безсмертия, от гроба преславно возсиявшая. Радуйся, щедрот и милования струе неизсякаемая. Радуйся, благоутробия источниче неоскудеваемый. Радуйся, любве и сострадания явление многочудесное. Радуйся, телес наших богодарованное врачевание. Радуйся, о душах наших благоприятное предстательство. Радуйся, преподобне Александре, Свирский чудотворче.

Кондак 13

О великий и преславный чудотворче, преподобне отче наш Александре! Милостивно приими сие малое моление наше, и молитвами твоими сохрани нас от недугов душевных и телесных в жизни сей, и от грядущих мучений вечных избави, и сподоби нас вкупе с тобою во Царствии Небеснем выну пети Богу: Аллилуиа.

Кондак сей глаголется трижды, также икос 1-ый и кондак 1-ый.

Молитва

О священная главо, Ангеле земный и человече Небесный, преподобне и Богоносне отче наш Александре, изрядный угодниче Пресвятыя и Единосущныя Троицы, являяй многия милости живущим во святей обители твоей и всем с верою и любовию притекающим к тебе! Испроси нам вся благопотребная к житию сему временному и нужная к вечному спасению нашему. Пособствуй и предстательством твоим, угодниче Божий, на враги видимыя и невидимыя, да в мире глубоце пребудет Святая Православная Церковь Христова и благостроении зиждется, во всяком благочестии нерушимо. Буди всем нам, чудотворче святый, помощник скорый во всякой скорби и обстоянии. Наипаче же в час кончины нашея явися нам заступник благосердый, да не предани будем на мытарствех воздушных власти злобнаго миродержца, но да сподобимся непреткновеннаго восхода в Царствие Небесное. Ей, отче, молитвенниче наш присный! Не посрами упования нашего, не презри смиренная моления наша и предстательствуй за нас пред Престолом Живоначальныя Троицы, да сподобимся вкупе с тобою и со всеми святыми мы, недостойнии, в селениях райских славити величие, благодать и милость Единаго в Троице Бога, Отца, и Сына, и Святаго Духа, во веки веков. Аминь.

Молитва преподобнаго Александра Свирскаго Господу Богу и Пресвятей Богородице.

Боже, очисти мя, грешнаго, и помилуй мя, и прости ми, Господи Боже, Спасе Милостивый! Даждь ми, Господи, христианский конец с Пречистым Телом и с Честною Кровию, со слезами и покаянием. Избави, Господи, муки вечныя, огня негасимаго, и червия неусыпающаго, и смолы кипящия. Господи, Ты создал мя еси, Господи, Ты помилуй. Господи, Твое есмь создание.

Пречистая Госпоже Милостивая, Царице Небесная, помолися Господу Богу и Спасу нашему Иисусу Христу, Сыну Твоему, за мене, грешнаго раба Твоего (имя рек). Даждь ми, Госпоже, христианский конец с Пречистым Телом и с Честною Кровию и со слезами и покаянием. Избави, Госпоже, муки вечныя, огня неугасимаго, и червия неусыпающаго, и смолы кипящия. Пречистая Госпоже, Милостивая Царице Небесная, Ты еси Молебница ко Господу Богу и Спасу нашему Иисусу Христу за мене, грешнаго и окаяннаго раба Твоего (имя рек), Ты еси Помощница, Ты Заступница от всякаго зла и сопостата, не забуди, Пречистая Госпоже, нищаго Твоего до конца.

Посем:

Заступнице Усердная, Благоутробная Господа Мати, к Тебе прибегаю аз, окаянный и паче всех человек грешнейший. Вонми гласу моления моего и вопль мой и стенание услыши. Яко беззакония моя превзыдоша главу мою и аз, якоже корабль в пучине, погружаюся в море грехов моих. Но Ты, Всеблагая и Милосердая Владычице, не презри мене, отчаяннаго и во гресех погибающаго. Помилуй мя, кающагося в злых делех моих, и обрати на путь правый заблуждшую окаянную душу мою. На Тебе, Владычице моя Богородице, возлагаю все упование мое. Ты, Мати Божия, сохрани и соблюди мя под кровом Твоим ныне, и присно, и во веки веков. Аминь.

Таже молитва по вся дни.

Душе, душе моя, почто жалуешися на Господа? Яко леность твоя вечней муце ходатай есть. Аще бы ведала дар Божий, плакала бы ся горящими слезами, стенающи со воздыханием, скорбящи о всяком гресе, о малем и о велицем. Возопий ко Своему Владыце, да не предварит тебе ярость одержащаго всесильною рукою праведною. Аз же, грешный и ленивый и льстивый язык имеяй, како помолюся Владыце моему, да избавит мя Господь от Страшнаго Суда? Всегда бо трепещу помыслом в сердцы моем о Страшнем Суде, да избавит мя от муки вечныя, и червия неусыпающаго, и тьмы кромешныя, и от грозы несогреемыя. Помилуй мя, грешнаго раба Твоего (имя рек), яко Павла апостола, егоже любляше паче всех, и от нас, убогих, не отврати лица Твоего во он День Страшный, егоже трепещет душа моя и составы тела моего ужасаются. Господи, избави мя страшнаго часа, да не отпаду от милости Твоей. Но молю святыя Ангелы и Архангелы, и пророки, и мученики, и вся святыя, да молят Бога за мою душу. Вашего ради моления да возвратит Владыка требы Своя от мене, грешнаго. И ты, Пречистая Госпоже Дево, имущи дерзновение к Сыну о рабех Твоих, не забуди трудов раба Твоего (имя рек). Владыко Спасе, от убогия души Тебе молюся, избави мя от печали грехов моих и введи в радость безконечнаго жития, идеже прославляется всесвятое Имя Твое, Отца и Сына и Святаго Духа, всегда, ныне, и присно, и во веки веков. Аминь.

Записки о здравии и упокоении

Поминовение в храмах и монастырях

Перейти

Мобильное приложение Правжизнь

Православный молитвослов. Календарь. Библия

Скачать

Интернет-магазин Правжизнь

ПравЖизнь - магазин 100 000 православных товаров с доставкой по всему миру

Перейти