Акафисты - 06 июня 2025
Кондак 1
Избра́нная уго́днице Христо́ва, свята́я блаже́нная Ксе́ние, хвале́бное пе́ние ти прино́сим, чту́ще терпе́ние твое́ и злострада́ние во́льное; ты же, иму́щи дерзнове́ние ко Го́споду, во вся́ких беда́х и напа́стех заступа́й нас, гре́шных, взыва́ющих к тебе́:
Ра́дуйся, Ксе́ние блаже́нная, моли́твеннице о душа́х на́ших.
Икос 1
Равноа́нгельски на земли́ пожила́ еси́, блаже́нная ма́ти, по успе́нии му́жа твоего́, без приуготовле́ния христиа́нскаго внеза́пу сконча́вшагося, отве́ргла еси́ жизнь мирску́ю, моля́щи Бо́га супру́га твоего́ ду́шу поми́ловати, по́двиг юро́дства на себе́ прия́вши, стяжа́ла еси́ соверше́нство духо́вное. Того́ ра́ди услы́ши от нас похвалы́ сия́, тебе́ возноси́мыя:
Ра́дуйся, Христо́ва уго́дница, в ми́ре надми́рно пожи́вшая; ра́дуйся вся прило́ги ми́ра, пло́ти и диа́вола победи́вшая.
Ра́дуйся, нищету́ во́льную на всю жизнь избра́вшая; ра́дуйся, сокро́вище на Небеси́ име́ти возжела́вшая.
Ра́дуйся, житие́м твои́м Андре́ю, Христа́ ра́ди юро́дивому, ра́вная; ра́дуйся, от всех люде́й правосла́вных люби́мая и сла́вимая.
Ра́дуйся, о часе́ сме́ртнем по́мнити нас призыва́ющая; ра́дуйся, бли́жняго ду́шу па́че ми́ра сего́ люби́ти нас науча́ющая.
Ра́дуйся, Ксе́ние блаже́нная, моли́твеннице о душа́х на́ших.
Кондак 2
Ви́дяще стра́нное житие́ твое́, блаже́нная, я́ко во цве́те мла́дости твоея́ во оде́жду му́жа твоего́ усо́пшаго облекла́ся еси́, и́менем его́ нарекла́ся еси́, себе́ уме́ршую бы́ти глаго́лющи, дом же твой и вся блага́я земна́я оста́вивши, скита́лицу себе́ сотвори́ла еси́, сро́дницы твои́ безу́мную тя бы́ти мня́ху, лю́дие же боголюби́вии воспе́ша: Аллилу́иа.
Икос 2
Ра́зум, от Бо́га ти дарова́нный, в безу́мии мни́мом сокры́ла еси́, блаже́нная Ксе́ние; в суете́ же гра́да вели́каго, а́ки пусты́нница, пребыва́ла еси́, моли́твы своя́ к Бо́гу вознося́щи непреста́нно. Мы же, дивя́щеся житию твоему́, воспева́ем ти си́це:
Ра́дуйся, крест тя́жкий юро́дства, от Бо́га ти да́нный, на ра́мо свое́ прия́вшая; ра́дуйся, мни́мым безу́мием сия́ние благода́ти сокры́вшая.
Ра́дуйся, и́менем му́жеским наре́кшися, не́мощи же́нския отреши́вшаяся; ра́дуйся, печа́ли и ско́рби кро́тце терпе́вшая.
Ра́дуйся, все име́ние твое́ бе́дным лю́дем разда́вшая; ра́дуйся, жили́ще Ду́ху Свято́му в се́рдце твое́м угото́вившая.
Ра́дуйся, всем прибега́ющим к тебе́ благо́е утеше́ние; ра́дуйся, от сме́рти внеза́пныя избавле́ние.
Ра́дуйся, Ксе́ние блаже́нная, моли́твеннице о душа́х на́ших.
Кондак 3
Си́лою, свы́ше ти дарова́нною, благода́тию и му́жеством, зной и сту́жу лю́тую претерпева́ла еси́, всено́щно моля́щися и покло́ны творя́щи; те́мже и просла́влена бысть свя́тость твоя́, блаже́нная Ксе́ние, во Оте́честве на́шем многострада́льнем и во всем ми́ре правосла́внем, да зове́м с тобо́ю Бо́гу: Аллилу́иа.
Икос 3
Име́ла еси́, о ма́ти блаже́нная, не́бо покро́в и зе́млю ло́же свое́, о те́ле, во оде́жду ве́тхую облече́ннем, небрегла́ еси́, моли́твы же к Бо́гу пла́менне возноси́ла еси́, сего́ ра́ди воспева́ем ти си́це:
Ра́дуйся, век твой земны́й без кро́ва прове́дшая; ра́дуйся, Небе́снаго кро́ва взыска́вшая и того́ улучи́вшая.
Ра́дуйся, по вся дни но́щию в по́ли моли́вшаяся; ра́дуйся, покло́ны земны́я на вся страны́ све́та та́мо твори́вшая.
Ра́дуйся, град Петро́в всено́щным бде́нием от бед огражда́вшая; ра́дуйся, гнев Бо́жий от него́ мно́гажды отвраща́вшая.
Ра́дуйся, благода́тию Ду́ха Свята́го чуде́сно согрева́емая; ра́дуйся, хлад лю́тый душ на́ших моли́твою твое́ю растаява́ющая.
Ра́дуйся, Ксе́ние блаже́нная, моли́твеннице о душа́х на́ших.
Кондак 4
Бу́рю жите́йскую, во гра́де Петро́ве мяту́щуюся, кро́тостию и незло́бием препобежда́ла еси́, ма́ти блаже́нная, безстра́стие же посреде́ ми́ра су́етнаго стяжа́ла еси́ и та́ко, Ду́хом Святы́м просвеща́емая, взыва́ла еси́ Пода́телю тишины́ серде́чныя Бо́гу: Аллилу́иа.
Икос 4
Слы́шаша лю́дие дар прозре́ния чу́дный, тобо́ю явле́нный, свята́я ма́ти, и удиви́шася. Се, жене́ не́коей рекла́ еси́: возми́ пята́к, зде царь на коне́, поту́хнет. Та же не ве́дающи, я́ко ты запале́ние до́ма ея́ прозре́ла еси́, притече́ во своя́ си и узри́ дом свой во огни́ горя́щ, и а́бие по моли́тве твое́й пла́мень огня́ угасе́. Мно́зи же стра́ждущии к по́мощи твое́й прибега́ху, ю́же стяжа́вше, та́ко взыва́ша ти:
Ра́дуйся, дар прозре́ния смире́нием кра́йним стяжа́вшая; ра́дуйся, дар сей на по́льзу и спасе́ние стра́ждущим явля́вшая.
Ра́дуйся, свеще́ негаси́мая, к Бо́гу в моли́твах горе́вшая; ра́дуйся, ве́рою твое́ю пла́менною запале́ние домо́в угаша́вшая.
Ра́дуйся, гряду́щия ско́рби людски́я, а́ки настоя́щия, зре́вшая; ра́дуйся, врач безме́здный и милосе́рдый лю́дем бы́вшая.
Ра́дуйся, я́ко и нас, немощны́х в ве́ре, укрепля́еши; ра́дуйся, я́ко сия́нием свя́тости твоея́ лю́ди правосла́вныя озаря́еши.
Ра́дуйся, Ксе́ние блаже́нная, моли́твеннице о душа́х на́ших.
Кондак 5
Боготе́чная звезда́ яви́ся свя́тость твоя́ на тве́рди гра́да Петро́ва, уго́днице Бо́жия, заре́ю свое́ю сердца́ просвеща́ющая: уже́ бо лю́дем, в безу́мии греха́ погиба́ющим, путь спасе́ния указа́ла еси́, к покаянию их наставля́ющи, вое́же вопи́ти Бо́гу: Аллилу́иа.
Икос 5
Ви́дяще по́двиги твоя́ моли́твенныя, терпе́ние хла́да и зно́я вели́кое, лю́дие осла́бити жела́ху злострада́ния твоя́; ты же оде́жду и вся, и́ми приноси́мая, ни́щим раздава́ла еси́, нищету́ свою́, а́ки сокро́вище, храня́щи. Сего́ ра́ди слы́шиши от нас сицева́я:
Ра́дуйся, бога́тство твое́ то́кмо в любви́ к Бо́гу и бли́жним полага́вшая; ра́дуйся, ничто́же земно́е име́вшая и всех духо́вно богати́вшая.
Ра́дуйся, ми́лостивым твои́м се́рдцем стра́ждущим сострада́вшая; ра́дуйся, по́мощь им чрез до́брых люде́й посыла́вшая.
Ра́дуйся, чу́ждая ми́ру, в ми́ре живу́щим бла́го твори́вшая; ра́дуйся, ве́ка сего́ суему́дрия отверга́тися научи́вшая.
Ра́дуйся, пла́кати с пла́чущими нас подвига́ющая; ра́дуйся, от тя́жкаго сна грехо́внаго пробужда́ющая.
Ра́дуйся, Ксе́ние блаже́нная, моли́твеннице о душа́х на́ших.
Кондак 6
Пропове́дана бысть свя́тость жития́ твоего́, блаже́нная, жи́телем гра́да твоего́, егда́ ты, о младе́нце, еще́ не ро́ждшемся, пеку́щися, жене́ до́брей, в до́ме, тобо́ю дарова́нном, жи́вшей, рекла́ еси́: Бог тебе́ сы́на посла́, теки́ на кла́дбище Смоле́нское. Та́я же, со тща́нием прите́кши, сироту́, рожде́нна ма́терию, внеза́пу на пути́ пострада́вшею и сконча́вшеюся, в дом свой прия́ла есть; вся же ле́та жития́ своего́, тебе́ благодаря́ще, сия́ семья́ благода́тная Бо́гу Человеколю́бцу взыва́ше: Аллилу́иа.
Икос 6
Возсия́ла есть сла́ва по́двигов твои́х, блаже́нная ма́ти Ксе́ние, егда́ но́щию на верх хра́ма Смоле́нскаго ка́мение, тая́щися, носи́ла еси́, до́му Пречи́стей возгради́тися посо́бствующи. Ны́не же вси моля́щиися во святе́м хра́ме сем и во всем ми́ре Бо́жием, взира́юще на о́браз твой, воспева́ют ти такова́я:
Ра́дуйся, та́йно твори́ти добро́ науча́ющая; ра́дуйся, к по́двигом благоче́стия всех призыва́ющая.
Ра́дуйся, строи́телем хра́мов Бо́жиих помога́ющая; ра́дуйся, святы́ню церко́вную возлюби́вшая.
Ра́дуйся, в де́лех благи́х усе́рдное поспеше́ние; ра́дуйся, трудо́в на́ших на пути́ спасе́ния облегче́ние.
Ра́дуйся, под кро́вом Бо́жия Ма́тере по́двиги твори́вшая и та́ко почи́вшая; ра́дуйся, с Не́ю ны́не на Небесе́х о нас Христа́ моля́щая.
Ра́дуйся, Ксе́ние блаже́нная, моли́твеннице о душа́х на́ших.
Кондак 7
Хотя́ще судьбы́ людски́я во блага́я устро́ити, повеле́ла еси́ де́ве кро́тцей на Охту́ тещи́, проре́кши, я́ко «муж твой та́мо жену́ погреба́ет». Та же, а́ще и недоумева́шеся, оба́че не ослу́шася глаго́ла твоего́, и та́мо вдовца́ мла́да, над гро́бом жены́ рыда́вшаго, сре́тила есть и утеше́ние в моли́тве ему́ подаде́. Ле́ту же мину́вшу, о́на венча́стася, и та́ко мно́гая ле́та в любви́ и согла́сии пожи́вше, чад свои́х наставля́ху тебе́, свята́я ма́ти, чти́ти, Бо́гу же воспева́ти песнь: Аллилу́иа.
Икос 7
Но́вое чу́до показа́ла еси́, блаже́нная, посреде́ скве́рны людски́я ду́шу твою́, юро́дством сокры́тую, в кро́тости а́нгельстей соблю́дши. Научи́ и нас, ма́ти Ксе́ние, и ма́лыя до́ли скорбе́й твои́х не терпя́щих и в ро́поте на Бо́га и бли́жняго дни на́ши иждива́ющих, вся свы́ше посыла́емая в терпе́нии сноси́ти, да взира́юще на по́двиги твоя́, чи́стым се́рдцем зове́м ти си́це:
Ра́дуйся, ми́ру злохла́дному благода́тную му́дрость яви́вшая; ра́дуйся, нищеты́ духо́вныя блаже́нство вкуси́вшая.
Ра́дуйся, о́браз терпе́ния и благосе́рдия нам подаю́щая; ра́дуйся, смире́нием и покая́нием от бед избавля́тися науча́ющая.
Ра́дуйся, с моли́твою и любо́вию дете́й благословля́вшая; ра́дуйся, прикоснове́нием руку́ твое́ю чуде́сно их исцеля́вшая.
Ра́дуйся, уны́ние тя́жкое, ду́шу сокруша́ющее, от нас отводя́щая; ра́дуйся, наде́ждою несумне́нною на ми́лость Бо́жию окриля́ющая.
Ра́дуйся, Ксе́ние блаже́нная, моли́твеннице о душа́х на́ших.
Кондак 8
Стра́нница бездо́мная протекла́ еси́ путь ско́рбный жития́ твоего́ в сто́льнем гра́де Оте́чества на́шего, ма́ти блаже́нная, взыску́ющи гра́да вы́шняго, Иерусали́ма Небе́снаго; ны́не же в нем со А́нгелы и все́ми святы́ми пое́ши Бо́гу: Аллилу́иа.
Икос 8
Вся в моли́твах ко Творцу́ пребыва́ющи, ма́ти свята́я, до успе́ния твоего́, от страда́ний и по́двигов к жи́зни блаже́ней и ве́чней невозбра́нно прешла́ еси́. Сего́ ра́ди, преклоня́юще коле́на серде́ц на́ших, благогове́йное пе́ние ти прино́сим:
Ра́дуйся, во оби́телех го́рних с ли́ки святы́х лику́ющая; ра́дуйся, и нас, тебе́ моля́щихся, та́мо не забыва́ющая.
Ра́дуйся, чудеса́ неисче́тная по успе́нии твое́м яви́вшая; ра́дуйся, сме́ртно боля́щих, врачми́ оста́вленных, исцеля́вшая.
Ра́дуйся, в пия́нстве ги́бнущих устраше́ние и исправле́ние; ра́дуйся, ме́ста служе́ния лиши́вшимся благо́е поспеше́ние.
Ра́дуйся, вдови́ц и жен, супру́гом оста́вленных, покрови́тельнице; ра́дуйся, стра́нников и безприю́тных пита́тельнице.
Ра́дуйся, Ксе́ние блаже́нная, моли́твеннице о душа́х на́ших.
Кондак 9
Вся́кия утоли́ боле́зни, блаже́ная ма́ти Ксе́ние, на тя наде́ющихся и к по́мощи твое́й усе́рдно притека́ющих: я́коже помина́вших пре́жде ду́шу твою́ ра́ди души́ своея́ спасе́ния, по заве́ту твоему́, та́ко и ны́не помяни́ всех, прославля́ющих тя, Бо́гу же, в тебе́ ди́вно просла́вленному, вопию́щих непреста́нно: Аллилу́иа.
Икос 9
Вити́я суему́дренныя разуме́ти не мо́гут, ка́ко ты безу́мием свои́м безу́мие ми́ра сего́ обличи́ла еси́ и не́мощию свое́ю си́льныя и кре́пкия посрами́ла еси́: не ве́дают бо в тебе́ си́лы и прему́дрости Бо́жия. Мы же, тя почита́юще, с любо́вию зове́м ти си́це:
Ра́дуйся, Боже́ственнаго Ду́ха селе́ние; ра́дуйся, ве́лие к Бо́гу дерзнове́ние.
Ра́дуйся, у усыпа́льницы твоея́ моля́щимся явля́ющаяся и им помога́ющая; ра́дуйся, земле́ю и еле́ем от нея́ мно́гия освяти́вшая и от неду́г исцели́вшая.
Ра́дуйся, я́ко одержи́мых страстьми́ от ги́бели спаса́еши; ра́дуйся, я́ко отверга́тися себе́ нас науча́еши.
Ра́дуйся, любве́ и смире́ния путь во спасе́ние нам указу́ющая; ра́дуйся, во хра́ме Бо́жием с на́ми незри́мо пребыва́ющая.
Ра́дуйся, Ксе́ние блаже́нная, моли́твеннице о душа́х на́ших.
Кондак 10
Спасти́ лю́ди хотя́щи, блаже́нная ма́ти Ксе́ние, при́сно да́руеши им заступле́ние твое́ чу́дное. Се де́ву благочести́вую с вдови́цею ма́терию ея́, в кану́н венча́ния у гробни́цы твоея́ усе́рдно моли́вшуюся, от бра́ка спасла́ еси́ со злоде́ем, и́же ра́тнаго челове́ка уби́, и́мя же и чин его́ себе́ присво́и. В день то́йже уби́йца о́ный внеза́пу обличе́н бысть и, у́жасом объя́т, испове́да пред все́ми, я́ко си́ла Бо́жия сироту́ от бра́ка с ним изба́ви, мы же, дивя́щеся си́ле моли́тв твои́х, нас спаса́ющих, воспева́ем Бо́гу: Аллилу́иа.
Икос 10
Стена́ еси́ неруши́мая, преблаже́нная ма́ти, и дом правосла́вных. Не оста́ви и ны́не супру́ги разлуче́нныя, помози́ роди́телем, за грехи́ своя́ о ча́дех сле́зы пролива́ющим, научи́ ю́ноши и де́вы в чистоте́ себе́ храни́ти и всех нас святы́ню уз семе́йных почита́ти, да еди́неми усты́ воспева́ем ти та́ко:
Ра́дуйся, дев благочести́вых от бра́ка неве́рнаго избавля́ющая; ра́дуйся, спу́тника жи́зни до́браго им обрести́ помога́ющая.
Ра́дуйся, сро́дник вражду́ющих благо́е примире́ние; ра́дуйся, слез де́тских осуше́ние.
Ра́дуйся, от убие́ния младе́нцев во чре́ве жена́м гро́зное преще́ние; ра́дуйся, на ка́мени любве́ и ве́ры домо́в устрое́ние.
Ра́дуйся, супру́гов, сме́ртию разлуче́нных, утеше́ние; ра́дуйся, в жи́зни безсме́ртней ве́чное их соедине́ние.
Ра́дуйся, Ксе́ние блаже́нная, моли́твеннице о душа́х на́ших.
Кондак 11
Пе́ние благода́рственное прино́сят ти, ма́ти блаже́нная, лю́дие правосла́внии, от бед и боле́зней моли́твами твои́ми изба́вленнии; и ны́не, а́ще попу́стит нам Всепра́ведный Госпо́дь ско́рби грех на́ших ра́ди, со слеза́ми к тебе́ припаде́м, упова́юще на ми́лостивое твое́ о нас к Бо́гу предста́тельство, да воспое́м Ему́: Аллилу́иа.
Икос 11
Светоза́рная луча́ во мра́це жития́ сего́, путь ко Све́ту Непристу́пному освеща́ющая, яви́лася еси́, богому́драя Ксе́ние, чуде́с мно́жеством просия́вши. В лю́тую же годи́ну гоне́ний безбо́жных ве́рнии от часо́вни твоея́ не отступи́ша, но, презре́вше и страх сме́ртный, с ве́рою и упова́нием к тебе́ притека́ху, се́рдцем воспева́юще си́це:
Ра́дуйся, безнаде́жных наде́яние; ра́дуйся, в бе́здне отча́яния погиба́ющих спасе́ние.
Ра́дуйся, уни́женных и гони́мых покрови́тельнице; ра́дуйся, от клеветы́ и суда́ непра́веднаго защи́тнице.
Ра́дуйся, оби́димых и обездо́ленных утеше́ние; ра́дуйся, оби́дящих гро́зное вразумле́ние.
Ра́дуйся, гра́да свята́го Петра́ засту́пнице; ра́дуйся, ча́дом земли́ Росси́йския ма́ти и пита́тельнице.
Ра́дуйся, Ксе́ние блаже́нная, моли́твеннице о душа́х на́ших.
Кондак 12
Благода́ть утеше́ний оби́льно излива́еши, блаже́нная Ксе́ние, всем чту́щим па́мять твою́ и к заступлению твоему́ притека́ющим. Те́мже и мы, гре́шнии, на тя по Бо́зе наде́жду на́шу возлага́ем и мо́лимся тебе́ усе́рдно: не оста́ви нас во обстоя́ниих ско́рбных, умоли́ Го́спода сил, да не отпаде́м от ве́ры правосла́вныя, в нейже тобо́ю утвержда́еми, зове́м Ему́ ве́рно: Аллилу́иа.
Икос 12
Пою́ще мно́гая твоя́ чудеса́, блаже́нная ма́ти Ксе́ние, восхваля́ем тя, я́ко те́плую на́шу засту́пницу и ско́рую предста́тельницу. Улуча́юще же от тебе́ по́мощь благода́тную, неуста́нно воспева́ем ти си́це:
Ра́дуйся, све́том кро́тости твоея́ вся концы́ земли́ озари́вшая; ра́дуйся, житие́м твои́м по́стническим горды́ню диа́вольскую посрами́вшая.
Ра́дуйся, до́му ца́рскому поможе́ние и благослове́ние; ра́дуйся, ми́ра Бо́жия в сердца́ ве́рных насажде́ние.
Ра́дуйся, о спасе́нии Оте́чества на́шего при́сно моля́щаяся; ра́дуйся во Оте́чество Небе́сное нам путь указу́ющая.
Ра́дуйся, по Богоро́дице в ско́рбех и печа́лех на́ше утеше́ние; ра́дуйся, по Бо́зе грехо́в на́ших проще́ние и ве́чное спасе́ние.
Ра́дуйся, Ксе́ние блаже́нная, моли́твеннице о душа́х на́ших.
Кондак 13
О свята́я блаже́нная ма́ти Ксе́ние, в житии твое́м крест тя́жкий поне́сшая. Приими́ от нас, гре́шных, моле́ние сие́, тебе́ приноси́мое, огради́ нас моли́твами твои́ми от наве́тов духо́в тьмы, от бед и напа́стей, умоли́ Всеще́драго Бо́га пода́ти нам си́лу и кре́пость, да взе́мше крест свой, восле́д Христу́ гряде́м, пою́ще Ему́ с тобо́ю вове́ки: Аллилу́иа.
Этот кондак читается трижды, зате́м 1-й икос «Равноа́нгельски на земли́ …» и 1-й кондак «Избра́нная уго́дница …».
Моли́тва
О свята́я всеблаже́нная ма́ти Ксе́ние! Под кро́вом Всевы́шняго жи́вшая, ведо́мая и укрепля́емая Богома́терию, глад и жа́жду, хлад и зной, поноше́ния и гоне́ния претерпе́вшая, дар прозорли́вости и чудотворе́ния от Бо́га прия́ла еси́ и под се́нию Всемогу́щаго поко́ишися. Ны́не Свята́я Це́рковь, я́ко благоуха́нный цвет, прославля́ет тя. Предстоя́ще на ме́сте погребе́ния твоего́, пред о́бразом твои́м святы́м, я́ко живе́й ти, су́щей с на́ми, мо́лимся тебе́: приими́ проше́ния на́ша и принеси́ их ко Престо́лу милосе́рдаго Отца́ Небе́снаго, я́ко дерзнове́ние к Нему́ иму́щая. Испроси́ притека́ющим к тебе́ ве́чное спасе́ние, на блага́я де́ла и начина́ния на́ша ще́дрое благослове́ние, от вся́ких бед и скорбе́й избавле́ние. Предста́ни святы́ми твои́ми моли́твами пред Всеми́лостивым Спаси́телем на́шим о нас, недосто́йных и гре́шных. Помози́, свята́я блаже́нная ма́ти Ксе́ние, младе́нцы све́том свята́го креще́ния озари́ти и печа́тию да́ра Ду́ха Свята́го запечатле́ти, о́троки и отрокови́цы в ве́ре, че́стности, богобоя́зненности воспита́ти и успе́хи в уче́нии им дарова́ти; боля́щия и неду́гующия исцели́, семе́йным любо́вь и согла́сие низпосли́, мона́шествующих по́двигом до́брым подвиза́тися удосто́й и от поноше́ний огради́, па́стыри в кре́пости Ду́ха Свята́го утверди́, лю́ди и страну́ на́шу в ми́ре и безмяте́жии сохрани́, о лише́нных в предсме́ртный час причаще́ния Святы́х Христо́вых Та́ин умоли́. Ты на́ша наде́жда и упова́ние, ско́рое услы́шание и избавле́ние, тебе́ благодаре́ние возсыла́ем и с тобо́ю сла́вим Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.
Кондак 1
Взбранный чудотворче и великий Христов угодниче! Восхваляем тя с любовию, чада твоя, тепла предстателя к Богу тебе стяжавше. Ты же моли прославившаго тя Господа от всяких нам бед свободитися, зовущим: радуйся, Никито преподобне, столпниче и чудотворче.
Икос 1
Ангелов подобника и бесов противоборца провидя тя всея твари Зиждитель словесы пророческими: измыйтеся и чисти будите, на покаяние огласив тя, яко втораго Павла, человеколюбно к себе призва, нас же научи ублажати тебе сице: Радуйся, сосуде избранный, свыше Богом предуведанный; радуйся, в храм Духа Всесвятаго предуставленный. Радуйся, сподобивыйся Божественнаго призвания; радуйся, удостоивыйся от Господа оправдания. Радуйся, благодать Божию, умягчающую сердце твое, получивый; радуйся, очистительнаго покаяния токи слез источивый. Радуйся, веру в призвавшаго тя Господа несумненну восприявый; радуйся, всего себе водительству Божию предавый. Радуйся, супружницу и клевретов твоих Господа ради оставивый; радуйся, невозвратное твое шествие к снисканию спасения направивый. Радуйся, Царствия Небеснаго стяжателю; радуйся, о всех к тебе притекающих теплый ко Господу предстателю. Радуйся, Никите преподобне, столпниче и чудотворче.
Кондак 2
Видя супружницу твою, дивящуюся пременению снедных мяс якобы в человеческия члены и недоумевающую о неисповедимых судьбах Божиих, свыше озарен, исповедал еси, яко Господь на покаяние тя призывает, и абие познал еси спасающему тя Богу пети: Аллилуиа.
Икос 2
Разум недоразумеваемый, в дивном призвании твоем проявленный разумети ища, преподобне отче Никито, помышлял еси, како о Господе возмощи мир и диавола посрамити, к лавре святаго великомученика Никиты абие потекл еси, идеже и ангельский образ на ся восприим, добль воин Христов показался еси. Мы же, Господа спасшаго тя прославляюще, радостно вопием ти: Радуйся, яко мытарь, ко Господу о помиловании вопиявый; радуйся, яко заблудший сын, Отца Небеснаго взыскавый. Радуйся, яко хананея, от Христа не отступавый; радуйся, яко блудница, о гресех рыдавый. Радуйся, яко Езекия, умильно моливыйся; радуйся, яко Манассия, в покаянии смиривыйся. Радуйся, яко Иов, искушения крепко терпевый; радуйся, яко Даниил, премудрость Божию разумети вожделевый. Радуйся, Давидово раскаяние явивый; радуйся, Петровы слезы источивый. Радуйся, путь истинный к животу вечному обретый; радуйся, яко крин, любовию Божественною процветый. Радуйся, Никито преподобне, столпниче и чудотворче.
Кондак 3
Сила Вышняго осени тя, преподобне отче Никито, егда в начале не был еси удостоен приятия в лавру великомученика Никиты, и трехдневным твоим пред враты оныя приседением и всенародным грехов твоих исповеданием победителя на диавола тя яви, научая нас дающему крепость людем Своим Богу пети: Аллилуиа.
Икос 3
Имеяй благоприятное стремление во святей лавре великомученика Никиты водворитися, но от сея быв отреваем, в тинное блато наг поверглся еси на терзание мшицем и гадом. Мы же толико крепкому твоему терпению дивящеся, вопием ти: Радуйся, миру единожды навсегда умерый; радуйся, нераскаянно вся красная мира сего презревый. Радуйся, тщеславныя помыслы смиривый; радуйся, мысль в Бозе утвердивый. Радуйся, сребролюбие изсушивый; радуйся, сластолюбие умертвивый. Радуйся, всякий гнев и избыток злобы отложивый; радуйся, смиренномудрие возлюбивый. Радуйся, душу твою по слову Христа возненавидевый; радуйся, делы благими Велиара преобидевый. Радуйся, плоть со страстьми и похотьми распный; радуйся, по обращении твоем не себе, но единому Богу живый. Радуйся, Никито преподобне, столпниче и чудотворче.
Кондак 4
Бурю внутрь имея помышлений сумнительных, святыя лавры игумен смятеся, зря тебе, грехолюбива бывша, на подвиги иночествующих толико бодренно дерзающа, в месте тесне тя затвори во испытание благаго твоего произволения; ты же на диавола, яко Давид на Голиафа, единоборствовати радостно с каменем веры потекл еси, поя Господу Сил: Аллилуиа.
Икос 4
Слышав сказания житий древних подвижников, преподобне, како от Господа наставляеми и укрепляеми, труды ко трудом прилагаху, тем подражати возревновал еси, и тяжкия вериги, по благословению игумена, на ся возложив, день и нощь в молитвах пребывал еси. Мы же, дивное твое подвижничество прославляя, зовем ти таковая: Радуйся, житием отцев пустынных плененный; радуйся, любовию Божественною распаленный. Радуйся, произвольное узничество возлюбивый; радуйся, во умерщвление плоти железа на себе возложивый. Радуйся, в подвизех неутомимый; радуйся, во благочестии неохладимый. Радуйся, во плоти безплотных Ангелов сожителю; радуйся, своего произволения воли Божией покорителю. Радуйся, исправлении твоими безплотных удививый; радуйся, равноангельнаго жития образ истинный нам явивый. Радуйся, в собеседование с Богом выну углубленный; радуйся, благодатию Божиею преобогащенный. Радуйся, Никито преподобне, столпниче и чудотворче.
Кондак 5
Богопесненную Псалтирь к достижении Небеснаго Отечества, яко светильник, во уме твоем выну содержа, тою прославлял еси Небеснаго Отца, воспевая: Аллилуиа.
Икос 5
Видевше ближнии и дальнии, еже по Бозе житие твое, преподобне, чудному твоих нравов изменению удивляхуся, добродетели же и подвиги твоя прославляху, с ними же и мы сице вопием ти: Радуйся, яко в старости крепость мужескую показал еси; радуйся, яко обет иночества делами оправдал еси. Радуйся, в многострастней плоти подвизавыйся, яко безплотный; радуйся, благими помыслы и делы многоплодный. Радуйся, твоими подвиги от обленения нас возставляяй; радуйся, твоею жизнию путь ко спасению всем изъявляяй. Радуйся, любовь велию к Богу показавый; радуйся, многообразне помощь Божию испытавый. Радуйся, Божией любви к кающимся зерцало; радуйся, подвизающимся на диавола крепкое забрало. Радуйся, выну о нас с молитвою Богу предстоящий; радуйся, и поднесь обитель твою нерушиму хранящий. Радуйся, Никито преподобне, столпниче и чудотворче.
Кондак 6
Проповедают тяжкия твоя вериги, смиренномудре Никито, труды и болезни, Бога ради тобою подъятыя, ихже ради дивно прослави тя Господь, обильныя исцелений струи тобою источая нам, да выну поем Ему: Аллилуиа.
Икос 6
Возсиявшая в сокрушеннем сердце твоем благодать Всесвятаго Духа провидца будущих и скораго наветуемым от бесов свободителя показа тя, преподобне, научая всех вопити тебе сице: Радуйся, предняя, яко настоящая прорекавый; радуйся, дальная, яко близ сущая прозиравый. Радуйся, яко князю Михаилу вину разслабления его телеснаго объяснил еси; радуйся, яко мученическую кончину ему и болярину его быти предвестил еси. Радуйся, со пророки прославленный; радуйся, чудотворцем сопричисленный. Радуйся, гордыни диаволей низложителю; радуйся, бесов прогонителю. Радуйся, силу вражию поправый; радуйся, в силе Божией преспевавый. Радуйся, яко Царствие Божие внутрь себе стяжал еси; радуйся, яко Христа навеки в тебе жити восприял еси. Радуйся, Никито преподобне, столпниче и чудотворче.
Кондак 7
Хотящу диаволу явлением своим во образе дракона устрашити тя, стояща на молитве, оружием креста поражение бесконечное нанесл еси, победителю Богу воспевая: Аллилуиа.
Икос 7
Новую тварь показа тя Зиждитель, от миролюбия к толикому боголюбию сердце твое обратив, преподобне отче, яко ты на столп, аки Илия на огненную колесницу, возшед, бдение, пост и молитву, аки кони быстротечныя от земли к небеси стяжал еси, и тако ко Христу представ, выну ходатайствуеши о нас, вопиющих тебе: Радуйся, яко еже по Бозе истинное житие познал еси; радуйся, яко тое ищущим делами показал еси. Радуйся, велемудров века сего обуивый; радуйся, истинную мудрость в смиренномудрии быти явивый. Радуйся, иго Христа восприявый: радуйся, благость онаго житием оправдавый. Радуйся, язвы Господа Иисуса любезне на теле твоем понесый; радуйся, всего себе в жертву Господеви принесый. Радуйся, земный странниче; радуйся, Божий избранниче. Радуйся, монахов наставнице; радуйся, Богоприятный о нас молитвенниче. Радуйся, Никито преподобне, столпниче и чудотворче.
Кондак 8
Странное и преславное чудо видится всем, притекающим к тебе, отче Никито, яко и вода от изрытых тобою кладенцев, черплемая с верою, телесныя и душевныя недуги исцеляет, научая чудодеющему Богу пети: Аллилуиа.
Икос 8
Весь от Всесвятаго Бога облагодатствован еси, преподобне отче, яко духом Престолу Божию предстоиши, телом же в недре земли почивая, от гроба твоего подаеши цельбы. Сего ради и взываем ти таковая: Радуйся, верный рабе Владыки Всеблагаго; радуйся, храме преукрашенный Духа Всесвятаго. Радуйся, Царя Небеснаго предстоятелю; радуйся, скорый прошений подателю. Радуйся, источниче исцелений; радуйся, сокровищнице чудотворений. Радуйся, видимыми чудесы невидимую благодать, в тебе сущую, являяй; радуйся, верных души знаменьми в вере утверждаяй. Радуйся, чадам Церкве лучезарный светильниче; радуйся, дивный Христов угодниче. Радуйся, увенчанный подвижниче; радуйся, Богу присный любимиче. Радуйся, Никито преподобне, столпниче и чудотворче.
Кондак 9
Всякое естество ангельское удивися великому свыше тебе дарованию, преподобне Никито, яко и древяный посох твой, страждущему телесным разслаблением Черниговскому князю Михаилу посланный от тебе и в руку им приятый, абие исцеление тому дарова и научи его пети чудодеющему тобою Богу: Аллилуиа.
Икос 9
Ветии многовещаниии недоумеют по достоянию восхвалити тя, достославно отче, яко паче естества силу вражию преславно низлагаеши. Еще бо в телеси пребывая, беса, шествовавшу к тебе князю Михаилу явльшася во образе инока и благое княже предприятие воспящавша, видимо к столпу твоему именем Христа пригвоздил еси, и поднесь туюжде власть на бесы являеши, разрушая злокозненныя действа их на человеков. Сего ради и зовем ти сице: Радуйся, лжи диаволей обличителю; радуйся, прелести бесовския посрамителю. Радуйся, власть на духи нечистыя приявый; радуйся, туюжде и по смерти удержавый. Радуйся, яко демони и гроба твоего трепещут; радуйся, яко на них и вериги твоя стрелы палящия мещут. Радуйся, яко бесныя во обитель твою точию нуждею привлачаеми бывают; радуйся, яко они здравии и смыслящии тую оставляют. Радуйся, яко демони зде и не хотяще себе открывают; радуйся, яко тобою гоними, из одержимых ими скоро убегают. Радуйся, реко исцелений быстротечная; радуйся, стражо обители вечная. Радуйся, Никито преподобне, столпниче и чудотворче.
Кондак 10
Спасти хотя душу твою, богомудре отче, в кротости и смиренномудрии Христове выну поучался и дивно преуспел еси. Темже и рабом твоим, хотящим нуждно изъяти душу твою, ничтоже пререкл, ниже возопил еси; но, яко агнец незлобивый, главу подклонив, смерть от тех приял еси, поя Богу: Аллилуиа.
Икос 10
Стена еси всем, воспевающим тя и притекающим с верою к заступлению твоему, Никито столпниче. Темже и нам, к тебе прибегающим, буди столп непоколебим, от всяких нас бед и напастей выну застеняя и ограждая, за еже и поем тебе таковая: Радуйся, пристанище обуреваемых; радуйся, помоще озлобляемых. Радуйся, скорбных утешителю; радуйся, немощных укрепителю. Радуйся, грешных Бога умилостивляяй; радуйся, благих в добре утверждаяй. Радуйся, кающихся своим примером ободряяй; радуйся, о спасении подвизающимся спобораяй. Радуйся, мятущихся помыслами умирителю; радуйся, вражиих наветов отразителю. Радуйся, наших царей державо и похвало; радуйся, града Переславля утверждение и красото. Радуйся, Никито преподобне, столпниче и чудотворче.
Кондак 11
Пение благодарственное Господу приносят вси, приемлющии, видящии и слышащии многочисленная чудеса, от тяжких вериг и гроба твоего бывающая силою Божиею, юже ты выну на небесех прославляеши, поя Богу: Аллилуиа.
Икос 11
Светозарное светило, на тверди церковней возсиявшее, преподобне отче Никито, показаша тя три огневидныя столпы, явльшияся над поверженными от убийц твоих и яко древо в водах волжских плававшими твоими веригами, яже и положити зде на гробе твоем, яко почесть трудов твоих, в нощнем видении повелел еси. Чесо ради твое водворение во светлостех святых быти уразумевше, тя воспеваем: Радуйся, жителю Божественнаго селения; радуйся, достигший вечнаго упокоения. Радуйся, благ неизреченных наслаждающийся; радуйся, лицезрения Божия насыщающийся. Радуйся, со Ангелы присно ликующий; радуйся, Трисвятую песнь немолчно поющий. Радуйся, с преподобными ублажаемый; радуйся, с мучениками увенчаваемый. Радуйся, радостию вечною преисполняемый; радуйся, любовию Божественною преуслаждаемый. Радуйся, яко тобою Вышний на небеси и на земли славится; радуйся, яко и ты сего ради Вышним на небеси и на земли прославился еси. Радуйся, Никито преподобне, столпниче и чудотворче.
Кондак 12
Благодать чудес твоих, преподобне отче Никито, в сердце первосвятителя Фотия велие ко отысканию многоцелебных мощей твоих желание возжже. Ты же, богомудре, аще и попустил еси откопати и видети нетленное и чудесы благоухающее тело твое; обаче якоже и прежде человеческия славы убегавший, всех из храма, аки бурею, изринув, паки себе в землю скрыл еси. Чесо ради дивному во святых Своих Богу Иаковлю воспеваем: Аллилуиа.
Икос 12
Поюще преславно действующаго тобою чудеса Царя Небеснаго, тя, отче достославне, восхваляем, аще и недостойными устами, обаче усердно ублажая тя сице: Радуйся, честное Пресвятыя Троицы носило и похваление; радуйся, святыни Духа чистое и непорочное селение. Радуйся, чудес пучино, Богом излиянная: радуйся, мироварнице, на вся недуги врачеваниями преизобильная. Радуйся, образе агнцем и пастырем; радуйся, преукрашенный всяким Божественным дарованием. Радуйся, правило веры и образе кротости духовныя; радуйся, зрителю красоты Божественныя неизреченныя. Радуйся, мира Христова благоухание; радуйся, многоцветный крине райскаго прозябения. Радуйся, яко Ангели о твоих исправлениих радуются; радуйся, яко мнози человецы по твоему примеру и предстательству спасаются. Радуйся, Никито преподобне, столпниче и чудотворче.
Кондак 13
О, преславный чудотворче и великий Христов угодниче, Никите преподобномучениче! Нынешнее наше хвалебное приношение прием, не остави присно ходатайствовать о нас у Отца Небеснаго, да в житии сем сетей вражиих и прелести бесовския избывше, воздушных мытарств и геенны вси избегнем, и всельшеся в горний Иерусалим, сподобимся с тобою пети Всеблагому Богу нашему вечно немолчное: Аллилуиа.
(Этот кондак читается трижды, затем икос 1 и кондак 1)
Молитва преподобному Никите Столпнику, Переславскому чудотворцу
О, всечестная главо, преподобне отче преблаженне, Никито преподобномучениче! Не забуди нищих твоих до конца, но поминай нас всегда во святых своих и благоприятных молитвах к Богу и не забуди присещати чад своих. Моли за ны, отче благий и избранниче Христов, яко имеяй дерзновение к Небесному Царю, и не премолчи за ны ко Господу, и не презри нас, верою и любовию чтущих тя. Поминай нас, недостойных, у Престола Вседержителева и не престай моляся за нас ко Христу Богу: тебе бо дана бысть благодать молитися за ны. Не мним бо тя мертва суща, аще бо и телом преставился еси от нас, но и по смерти убо жив пребываеши. Не отступай от нас духом, сохраняя и соблюдая нас от стрел вражиих и всякия прелести бесовския, заступниче и молитвенниче наш добрый. Аще бо и мощей твоих рака пред очима нашима видима есть всегда, но святая твоя душа со ангельскими воинствы, со безплотными лики, с небесными силами у Престола Вседержителя Бога достойно веселится. Ведуще убо тя воистинну и по смерти жива суща, тебе припадаем, и тебе молимся, и милися деем, еже молитися о нас Всесильному Богу о пользе душ наших, и испроси нам время на покаяние и невозбранно прейти от земли на Небо, и горьких мытарств, и воздушных князей, и вечныя муки избавится нам, и Небесному Царствию наследником быти со всеми праведными, от века угодившими Ему, Господу нашему Иисусу Христу. Емуже подобает всякая слава, честь и поклонение со Безначальным Его Отцем и Святым Духом, ныне и присно и во веки веков. Аминь.