Акафисты - 09 июня 2025
Кондак 1
Избранному от пелен в воинство Христово и вписанному от юности в книгу живота вечнаго, дивному в чудесех, преподобному отцу нашему Нилу, вси, насыщающиися чрез него подаваемых неоскудно Божиих дарований, сошедшеся воспоем ему, яко ходатаю и молитвеннику о душах наших, в веселии глаголюще: Радуйся, преподобне отче Ниле, Столобенский чудотворче.
Икос 1
Ангела Господь Своего посла к тебе, преподобне отче, возвестити, егда узре твое мудрование о небесных, дабы прешел еси из прежния пустыни во оную, в нейже подвизался еси; ты же ни места, ни страны оныя ведая, но паче на Пославшаго тя Господа уповая и веруя, яко пернатый потекл еси в ню. Мы же, чада твоя, аки на пути тя сретающе, приветствуем, сице возглашающе: Радуйся, послушания нам образ оставивый; Радуйся, любве ради Христовы вся красная мира сего за уметы вменивый. Радуйся, Мелхиседеку подобен явивыйся; Радуйся, яко ты родителей земных утаил еси от нас, да Небесному Отцу в сыновство причтешися. Радуйся, яко за лишение сродства и дружества стяжал еси с небесными содружество; Радуйся, преподобне, возненавидевый мира сего всякое наслаждение. Радуйся, яко за сие восприял еси небесныя жизни учреждение; Радуйся, преподобне, послуживый Господу преподобием и правдою. Радуйся, за сие от Него почтенный честию и славою вечною; Радуйся, в подвизех дневных и ночных течение жизни временныя совершивый. Радуйся, в невечернем дни Царствия Божия присно пребываяй; Радуйся, тех благих, ихже око не виде и ухо не слыша, вечный наследниче. Радуйся, преподобне отче Ниле, Столобенский чудотворче.
Кондак 2
Видев показанное ти Богом место, преподобне отче Ниле, возрадовался еси о красоте его; от радости же, яко не презре Господь Бог трудов твоих, сия благодарным гласом восклицал еси: О Троице Пресвятая, едина в Божестве в триех Лицах нераздельная, Боже Отче Всемогущий, Боже Сыне Единородный, Боже Душе Утешителю, светозарный миру свете, наставниче и промыслителю всех спасения, даруй мне до конца жизни моея на сем месте выну воспевати Тебе песнь: Аллилуиа.
Икос 2
Разум весь углублен имея, преподобне отче, в поучении о блаженней вечности и в ню водворитися желая, непрестанно со Давидом вопил еси: увы мне, яко пришельствие мое продолжися, быша бо слезы моя мне, яко хлеб, день и ночь. Мы же таковому мудрованию твоему дивящеся, вопием: Радуйся, преподобне, земное мудрование Божественней воли повинувый; Радуйся, желание твое ко Владыце, Христу Господу, всячески утверждение имевый. Радуйся, крилами Богомыслия сети вражия сокрушивый; Радуйся, вся его злобная на тя умышления до конца посрамивый. Радуйся, оставивый привременныя имения и возлюбивый нищету Христову; Радуйся, яко ныне за сие достигл еси к вечному и неистощимому Его богатству. Радуйся, во умерщвлении страстей даже до конца жизни твоея неусыпно бодрствовавый; Радуйся, смертию временною к вечному безсмертию прешедый. Радуйся, за глубокое смирение в вечныя кроны вознесенный; Радуйся, в неприступней славе получивый причастие. Радуйся, всякия добродетели себе самаго образ нам явивый; Радуйся, яко за сие ныне во Царствии Небеснем велий наречен еси. Радуйся, преподобне отче Ниле, Столобенский чудотворче.
Кондак 3
Сильна и непреоборима тебе показал еси, преподобне отче, древнему врагу и завистнику блаженства нашего: егда бо зря тебе он, яко день от дне лествицу добродетелей к небеси незыблему утверждаеши, и человек плотян, но яко ангел безплотный житие проходиши, умысли от благословеннаго ти Богом места отдалити, различными привидении устрашаше тя; ты же вся его коварства, аки паучинныя сети, бодренною молитвою разгнал еси, яко не смети ему и издалеча на тя взирати, егда слыша тя поюща: Аллилуиа.
Икос 3
Имея несумненную надежду о спасении твоем, преподобне отче Ниле, ко исходу от жизни сея всегда готов был еси, и выну имея в памяти смерть, прежде оныя многотрудному своему телу место своима рукама изготовил еси. Мы же, чада твоя, аки надгробную песнь поем ти, сице глаголюще: Радуйся, труды твоя и подвиги иноческия изменивый вечным упокоением; Радуйся, страстей мглу истребивый. Радуйся, облеченный ныне в ризу безстрастия; Радуйся, ангельски на земли житие поживый. Радуйся, ко граду нетленнаго Едема прешедый; Радуйся, предстояния у страшнаго Престола Владычня сподобивыйся во славе вечней. Радуйся, усердно возлюбивый заповеди Христа Господа; Радуйся, яко друг честен и сам от Него возлюблен еси. Радуйся, многи скорби с великим благодарением претерпевый; Радуйся, в неизглаголанную радость Господа своего восприятый. Радуйся, яко даровася тебе от Бога во благословениих прославляему быти; Радуйся, яко слава твоя от человек всегда ублажается. Радуйся, преподобне отче Ниле, Столобенский чудотворче.
Кондак 4
Бурею помышлений неверных о тебе, преподобне отче, неистовии человецы смятошася, мняще, аки бы не ради любве Христовы толь жестокий пустынный путь проходил еси, но вину уединеннаго жития твоего непщеваху быти стяжание имения, чесо ради и окрасти тя умыслиша; но вместо чаемаго сокровища обретоша един образ Пречистыя Богоматере с Предвечным Младенцем, на руку Ея держимым, Господом Иисусом, к Немуже ты денно и нощно воспевал еси: Аллилуиа.
Икос 4
Слышим и веруем, преподобне отче Ниле, яко Бог тебе, любящему Его, дарствует толикая воздаяния, ихже око не виде и ухо не слыша, и яже на сердце человеку не взыдоша. Желающе же и мы твоими богоприятными молитвами таяжде получити, вопием ти: Радуйся, желания твоего совершенное получивый исполнение; Радуйся, на еже верою взирал еси, ныне лицом к лицу неприступнаго Божества славу созерцаеши. Радуйся, яко оттуду неизреченныя радости и веселия почерпаеши исполнение; Радуйся, яко ктому не приключится что тебе желати и хотети во веки. Радуйся, яко ктому не приразится к душе твоей прилог вражиих наветов и искушений; Радуйся, яко корабль твой управил еси на место воистинну доброе. Радуйся, яко стал еси им, аки на горах Араратских, на самых горах небесных; Радуйся, яко ктому уже он не боится потопления. Радуйся, яко ум твой укреплен есть во веки благодатным укреплением; радуйся, яко обогатился еси преизобильно дарами Божественными. Радуйся, яко до возглашения архангельских труб имаши душевное Боговидение; Радуйся, яко егда по возглашению их мертвии от гробов воскреснут, и ты востанеши с телом сим к лицезрению Божию. Радуйся, преподобне отче Ниле, Столобенский чудотворче.
Кондак 5
Боготечная яко звезда явился еси, преподобне, во острове Селигера езера; ибо вся окрестная страны данною ти от Солнца правды, Христа Бога, благодатию озаряеши, и на мори страстнаго сего жития обуреваемых наставляеши пособием молитв твоих на путь спасения, к небесному отечеству ведущ, и научаеши единеми усты и единем сердцем с тобою воспевати в Троице славимому Богу: Аллилуиа.
Икос 5
Видел еси, преподобне, яко в мире сем всяческая суть суета и вся тлению причастна: преходит бо мир и похоть его; уразумел же еси, яко творя и волю Божию, тою един пребывает во веки; сего ради, бегая мира и сродник твоих, вседушно потщался еси благоугодити превечному Богу. Темже за толикое твое усердие услыши нас, присно глаголющих тебе сицевая: Радуйся, орле небопарный, крилами Богомыслия возлетевый зрети немерцающую светлость Солнца правды, Иисуса Христа; Радуйся, уме чистейший, не осквернивыйся прелестьми мирскими. Радуйся, крине чистаго обоняния; Радуйся, постников воздержание. Радуйся, благочестия столпе непоборимый; Радуйся, честное духовное сокровище. Радуйся, светлое добродетелей приятелище; Радуйся, дражайший сосуде благодатнаго сокровения. Радуйся, скорбящих радосте и утешение; Радуйся, путешествующих путеводителю. Радуйся, безмездный врачу болезней всяких; Радуйся, скорый заступниче обидимых. Радуйся, преподобне отче Ниле, Столобенский чудотворче.
Кондак 6
Проповедует самое место пустынное, преподобне отче Ниле, на немже до конца жизни твоея подвизался еси, какови бяху твои труди, подвизи и терпение, яко во всю жизнь твою не имел еси ни когоже соскорбящаго и утешающаго тя в терпении, но паче отвсюду належаху ти озлобления, воздвизаемая от врага невидимаго; не терпя бо завистник богоугоднаго жития твоего зрети, некогда наусти подобных себе келию твою сожещи и с тобою, но ты, якоже на него самаго, тако и на вся его злокозненныя сети, имел еси поражающь камык, яко Давид на Голиафа, непрестанную ко Господу Богу песнь: Аллилуиа.
Икос 6
Возсия всему миру добродетелей твоих просвещение, преподобне отче, о нихже благодаряще, прославляем Отца Небеснаго, давшаго ти толикую благодать величия Своего, и тебе, яко теплому о нас молитвеннику, радостная воспеваем сице: Радуйся, усердный исполнителю Божиих велений; Радуйся, терпением твоим удививый ангелов и человеков. Радуйся, притекающим под кров твой сладкое упокоение; Радуйся, изнемогающим от трудов возстановление. Радуйся, источниче чудес обильный; Радуйся, во всяких нуждах призывающим тя скорый помощниче. Радуйся, надеющимся на тя защищение непостыдное; Радуйся, всем притекающим к тебе пристанище небурное. Радуйся, хотящим твоему непорочному житию последовати укрепителю; Радуйся, свещниче, горяй светом благочестия. Радуйся, путевождю во тьме неверия блудящим; Радуйся, подателю разума буиим. Радуйся, преподобне отче Ниле, Столобенский чудотворче.
Кондак 7
Хотя, преподобне, от здешняго века преставитися прелестнаго, на всяк день исходя слезил и рыдал еси над гробом твоим, не аки бояся смерти, яже таковым угодником Божиим, яко ты еси, единым есть прохождением от трудов на упокоение, от скорбей и болезней на вечную радость и веселие; но паче желая разрешитися от юз плотских и предстати Престолу Бога Вседержителя со Архангелы и Ангелы, и вкупе с ними торжественно воспевати песнь: Аллилуиа.
Икос 7
Нова вся явишася тебе, преподобне, егда разлучился еси повелением Господним от привременных: небо ново, земля нова и град Иерусалим нов предуготован от Бога, яко невеста украшенная мужу своему, в негоже с неизреченным веселием восприялся еси в сожитие вечное Ангелом и всем святым. Мы же, о таковем твоем преселении веселящеся, умильно глаголем сице: Радуйся, единаго Бога в триех Лицах сподобивыйся лицезрения; Радуйся, в число приятый истинных Его поклонников. Радуйся, яко не ктому с земными, но и с небесными силами на Престоле неприступныя славы Седящему поеши: Свят, Свят, Свят Господь Саваоф; Радуйся, яко от Него почерпаеши преизобильная благодати исполнение. Радуйся, и на земли Богом собраннаго твоего стада бодрый хранителю; Радуйся, всем подражающим житию твоему святому наставниче. Радуйся, яко укрепляеши последующих ти к мужественному со врагом борению; Радуйся, яко ходатайствуеши им венцы, достойныя трудов и подвигов, от Христа Бога. Радуйся, надеждо им известная, яко не всуе тещи и ни вотще трудитися им подобает; Радуйся, яко и в течении служиши им прохладою и утешением. Радуйся, яко сам правы стези Господни соделал еси; Радуйся, яко и всех темиже стезями шествовати научаеши. Радуйся, преподобне отче Ниле, Столобенский чудотворче.
Кондак 8
Странное слышание во ушию нашею обносится о тебе, преподобне отче Ниле: се бо толик дар имел еси во плоти от Бога, яко еже и втайне содеянное от человек разумел еси, и окалянна греховною нечистотою абие обличил еси, поучая не творити того более. Мы же, сицевому твоему прозрению дивящеся, прославляем Бога, прославляющего таковыя верныя Своя рабы, и вопием Ему: Аллилуиа.
Икос 8
Всего себе, елико мощно, повинул еси воли Божией, преподобне отче; темже и от Бога вся елика желал, восприял еси, от нас же, яко отец и наставник наш, услыши и приими похвальное сие пение: Радуйся, преподобне, яко душа твоя святая по желанию твоему ныне в небесных скиниях обретается; Радуйся, яко во мзду приемлет упокоение и отраду. Радуйся, яко во стране онаго веселия неизреченную сладость вкушаеши; Радуйся, яко той сладости человеку смертному не леть есть и глаголати. Радуйся, яко тоя доброты и благости око человечо не виде и ухо не слыша; Радуйся, яко с преизобилием паче желания и хотения получил еси утешения. Радуйся, техже благих и нам ходатаю присный; Радуйся, от твоих благодатных даров и нам подателю независтный. Радуйся, яко промышляеши о нашем спасении; Радуйся, яко ты печешися о добродетельнем нашем совершении. Радуйся, яко тобою ум наш в Богомыслии научается; Радуйся, яко тобою мрак неведения прогоняется. Радуйся, преподобне отче Ниле, Столобенский чудотворче.
Кондак 9
Всяко слово к похвалению ангелоподобнаго жития твоего недовольно зрим быти, преподобне отче: како бо можем того по достоянию ублажити, егоже Сам Бог дивно прославляет? Тело бо его, на земли тлению непричастное, чудес реки источает, всякия целит болезни и бесы прогоняет, душа же его святая с двадесять четырьми старцы поет вечно в небеси Седящему на Престоле: Аллилуиа.
Икос 9
Витий краснословесных не может быти тако действительно, еже бы возбудити каковаго грешника к покаянию, якоже твое сильно и действенно бысть, преподобне, едино мание: егда бо узрел еси грядуща к тебе человека, углебнувша в плотских нечистотах, абие затворил еси от него оконце келии твоея, не аки гнушаяся грешника, но являя, коль мерзит Духу Святому душа, повинная греху; тойже умилився покаяся и обещася ктому душу и тело чисто соблюдати. Мы же, радующеся, яко имеем тя о покаянии нашем усерднаго промыслителя, взываем ти таковая: Радуйся, наш истинный наставниче; Радуйся, яко чесому учил еси, та и сам неленостно творил еси. Радуйся, яко за сие велий во Царствии Небесном наречен еси; Радуйся, яко удостоен еси внити в число девствующих и последующих Агнцу на горе Сионстей. Радуйся, столпе благочестия и утверждение; Радуйся, твердое православия правило. Радуйся, вся заповеди Господни совершенно сохранивый; Радуйся, Христа ради вся оставивый и вся в Нем обретый. Радуйся, яко пользою твоих дел, аки пресладкими плоды, верных души питаеши; Радуйся, яко в меру добродетелей твоих текущих наставлявши. Радуйся, житию нестяжательному Христа ради научивыйся; Радуйся, заповедь Христову: “Не можете работати Богу и мамонне”, добре исполнивый. Радуйся, преподобне отче Ниле, Столобенский чудотворче.
Кондак 10
Спасти хотя душу твою, преподобне, всячески о телеси небрегл еси: не имеяше бо оно у тебе во всю жизнь твою упокоения ни седением, ни на земли лежанием; но вместо упокоения бяху телесную слабость поддерживающе жезли, и тако путь многоскорбнаго жития сего совершил еси; чесо ради тело твое оставил еси нам нетленно и многочудесно в подражание твоих подвигов, душею же предстал еси Престолу Владычню, с лики Святых воспевати: Аллилуиа.
Икос 10
Стена явился еси, преподобне отче Ниле, во искушениих вражиих нас утверждающая; якоже бо древле израильтяном повеле Бог вознести змию в пустыни на древо, да уязвеннии от змиев, на ню взирающе, исцеляются; тако и ты предложил еси себе нам, да егда который брат по навету вражию каковою-либо страстию побежден будет, абие взирал бы на твое чудесы обогащенное тело и исцелевался: ибо и ты таковую же плоть и темже страстем подлежащую имел еси, якоже и мы, но благодатию Божиею победитель всех страстей явился еси. Сего ради торжествующе память твою, воспеваем сице: Радуйся, преподобне, древняго врага человекоубийцу диавола со всеми его хитростьми посрамивый; Радуйся, во всю жизнь твою малейшаго угождения плоти не явивый. Радуйся, ни каковыяже дружбы с миром не имевый; Радуйся, преславную над оным победу одержавый. Радуйся, воздушная мытарства князя тьмы безбедно прошедый; Радуйся, лаяния мысленных псов не слышавый. Радуйся, яко супостат наш диавол не обрете, что на тя клеветати; Радуйся, яко вся его сила на воздусех пришествием твоим посрамися и уничижися. Радуйся, яко восходяща тя в небесное отечество сретоша небеснии Ангели и Архангели; Радуйся, яко узревше тя вси Святии возрадовашася. Радуйся, яко сподобился еси услышати прелюбезный сей глагол: “Прииди, сыне благословенный, наследуй уготованное ти Царство”; Радуйся, сего вожделеннаго жребия и нам присный ходатаю. Радуйся, преподобне отче Ниле, Столобенский чудотворче.
Кондак 11
Пение всеприятное приносил еси Богу, преподобне отче Ниле, паче жертв и всесожжений, от сердца сокрушенна и смиренна, пламенем любве воспаряющее в молитве, яже выну восхождаше во уши Господа Саваофа, яко и тебе самаго сильна явися вознести на небо и поставити пред Престолом Славы Его, идеже вечно воспеваеши Ему: Аллилуиа.
Икос 11
Света безвиновнаго причастием насладивыйся, преподобне отче Ниле, светильник мысленный явился еси нам, блудящим во греховней тме, наставляяй правыми стезями шествовати ко свету самобытному, Христу Богу нашему. Мы же, елико мощно, шествующе по тебе, яко предводители и руководце нашем, благодарственная восклицаем сице: Радуйся, церковный неугасимый светильниче; Радуйся, ко свету Богу Отцу в сыновство причтенный. Радуйся, ко свету Богу Сыну братство благодатию Его стяжавый; Радуйся, от света Бога Духа Святаго восприявый обручение живота вечнаго. Радуйся, яко вся, елика хощеши, от онаго триипостаснаго света заимствуеши; Радуйся, яко и нас благодатным светом просвещаеши. Радуйся, яко ради твоих за нас пред Престолом Божиим молитв, и мы при исходе от жизни сея надеемся избежати зрения мрачнаго лица демонскаго; Радуйся, яко при твоем светении и мы безбедно приити уповаем до горы небесныя. Радуйся, яко тебе, нас руководствующа, устрашится князь тмы, не терпя зрети светлости лица твоего; Радуйся, яко от света твоего вся простертыя на нас сети его, аки паучина, исчезнут. Радуйся, яко мы, тобою руководими, надеемся приити ко оному незаходимому свету, Христу Господу; Радуйся, яко тобою наставляеми, и мы веруем быти причастницы славы Его. Радуйся, преподобне отче Ниле, Столобенский чудотворче.
Кондак 12
Благодать не престай изливати, преподобне отче Ниле, на место, идеже постническаго жития твоего течение совершил еси, и идеже прежде кончины твоея возвестил еси духом пророческим быти иночествующим вселению: се бо, по предречению твоему, мы зде вселихомся, зде и покой наш. Ты же, яко отец и наставник, укрепляй ны и помогай нам до конца жизни нашея душеспасительную песнь воспевати Господу Богу: Аллилуиа.
Икос 12
Поюще твоя иноческия подвиги, ублажаем бдения, непрестанныя молитвы, пост, смирение и терпение, преподобне отче Ниле; но обаче вемы, яко, аще бы и тмочисленными устнами могли тя ублажити, ни коеже слово довольно будет на похвалу твоих преславных добродетелей. Тойже бо Един силен тя по достоянию прославити и ублажити, Иже глаголет: “Прославляющия Мя прославлю”. И ныне убо, яко торжественный победитель врагов спасения, прославляйся и седи на Престоле с двоюнадесятьми старцы, от нас же чад твоих, аще и малое, обаче приими приношение сие: Радуйся, готовнейший защитниче во обидах сущим; Радуйся, крепкий щите от льстиваго и клеветливаго языка. Радуйся, отвратителю от грешников праведнаго гнева Божия; Радуйся, кающихся грешников скорый пред Богом заступниче. Радуйся, в последней беде смертной паче надежды помощниче; Радуйся, добрый пастырю овец Христовых. Радуйся, яко молитвами твоими воспящаеши древнему человекоубийце диаволу в кознех его противу рабов Божиих; Радуйся, яко, ихже он мнится имети во своей власти, и тех исторгаеши. Радуйся, яко пособием твоих молитв безнадежнии и отчаяннии надежни бывают; Радуйся, яко тебе, их руководствующу, и они Царствие Небесное улучити чают. Радуйся, яко тебе, их защищающу, вражия стрелы тех не уязвляют; Радуйся, яко при твоей помощи они сами врага устрашают. Радуйся, преподобне отче Ниле, Столобенский чудотворче.
Кондак 13
О великий угодниче Христов, преподобне отче Ниле! Во многих потребных нам недостаточни есмы, обаче многая и нуждная оставивше, о единем тебе ныне молим и просим: ходатайствуй и моли о нас Господа нашего Бога, да в день всемирнаго суда сподобит ны деснаго стояния и сопричтет лику торжествующих воспевати вечно Ему песнь: Аллилуиа.
(Этот кондак читается трижды, затем икос 1 и кондак 1)
Молитва преподобному Нилу Селигерскому, Столбенскому чудотворцу
О великий угодниче, преславный чудотворче, собранного зде о тебе стада Христова бодрый пастырю и обители сея Богом данный начальниче, Ниле всеблаженне! Душею на небеси Престолу Божию предстояй и Троичныя славы наслаждаяйся, телом же на земли в Божественном храме сем почиваяй и от него данною ти свыше благодатию различная источаяй чудеса, призри милостивым оком на предстоящия честней твоей раце люди и просящия сильныя твоея помощи. Се бо мы в безмерных согрешениях осквернившиися и в тине страстей присно валяющиися, праведный гнев Божий на себе наведохом и всякия милости недостойны сотворихомся; темже и не смеюще возвести очес наших к высоте небесней, ниже вознести молебный глас, сердцем сокрушенным и духом смиренным тебе в ходатайство и пособие призываем. Ты убо, яко стяжавый дерзновение, воздвигни горе преподобныя твоя руце, якоже иногда чудный оный Моисей Боговидец Амалика побеждаяй, и простер к Господу Творцу всех и Богу теплую свою молитву, испроси Церкви благостояние, воздуха благорастворение, земли плодоносие. Избави же всех, верою несумненною к Богу приходящих и многоцелебныя мощи твоя благоговейно почитающих, от всяких бед душевных и телесных, от всех томлений и прилогов диавольских. Буди печальным утешитель, недугующим врач, напаствуемым помощник, нагим покровитель, вдовицам заступник, сирым защитник, младенцем питатель, старым укрепитель, странствующим путевождь, плавающим кормчий и исходатайствуй всем, крепкия помощи твоея усердне требующим, вся яже ко спасению полезная. Яко да твоими молитвами наставляеми, путь на земли маловременнаго жития нашего безбедне совершим, улучим же на небеси нескончаемый покой и прославим купно с тобою всех благих Дателя, единаго в Троице славимаго Бога Отца и Сына и Святаго Духа, ныне и присно, и во веки веков. Аминь.
Молитва иная (пред гробницею преподобного)
О преподобне и богоблаженне, пастырю и начальниче, отче Ниле! Ты убо, яко имея ко Владыце Христу дерзновение и ко Пречистей Его Матери, Пресвятой Богородице, буди молитвенник и помощник и ходатай о нас, недостойных рабех твоих, живущих во святей обители сей, ейже ты начальник богоизбранной дружине братству сему, и о приходящих с верою к цельбоносным мощем твоим. Буди помогая и заступая от злаго нашего сопротивника, яко, да твоими молитвами пребывающии на месте сем и приходящии с верою к раце мощей твоих и на всяком месте призывающии тя на помощь невредими будем от бесов и злых человек, славу и благодарение возсылающе Отцу, Сыну и Святому Духу, ныне и присно и во веки веков. Аминь.
Кондак 1
Возбранный Параклите, Царю неба и земли, Животворящий, Спасительный и Всесвятый Душе, выну от Отца исходяяй и в Сыне почиваяй, сошествием же в виде огненных языков Апостолы просветивый, снизойди и ныне с горних высот на ны недостойныя рабы Твоя, и породи нас к новой благодатной жизни, да воспоем Тебе: Прииди, Утешитель Благий, вселися в ны, и спаси души наша.
Икос 1
Ангелов Творец и Господь Сил с небесе сошед и плотское восприем естество наше, прииде на землю, да спасет Крестом и Воскресением Своим падший древле род человечь, и паки восшед на небо, седе одесную Бога и Отца, да совознесет и обожит естество наше, и да созиждет на земли Царство правды и мира о Дусе Святе, егоже никтоже может видети, аще кто не родится свыше Темже Духом. Сего ради Господь наш, ко Отцу отходя, не остави нас сирых, но обетова грешником своим, глаголюще: Аз умолю Отца и инаго Утешителя даст вам, да будет с вами во век, Дух Истины, Егоже мир не может прияти, ниже знает Его, иже от Отца исходит, Той свидетельствует о Мне. Утешитель, Дух Святый, Той вы научит всему и воспомянет, яже рек вам. Сему обетованию внемлюще, апостоли моляху Тебе, Святый Утешителю, да скоро снидеши, вопиюще Тебе сице: Прииди, Утешителю Благий, выну от Отца исходяяй. Прииди, Небесной Параклите, присно в Сыне почиваяй. Прииди, Подателю жизни, приклони небеса и сниди. Прииди, Небесный Царю, прикоснися горам и воздымятся. Прииди, Всесвятый Душе, и настави нас светом истины Твоея. Прииди, кристаловидный Животе, и просвети мир огнем благодати Твоея. Прииди, Утешителю Благий, вселися в ны, и спаси души наша.
Кондак 2
Видев Господь по Воскресении Своем ученики Своя еще плотская мудрствующих и земное царство чающих, явися, им дверем затворенным, дуну и преподаде им Духа Святаго благодать просвещающую помышления их и уготовляющую их к приятию существенному таинства Божественнаго, глаголюще: Приимите Дух Свят, Имже отпустите грехи, отпустятся им, и имже держите, держатся. Темже, приемше таковую власть духовную, укрепишася духом, вопиюще Богу: Аллилуиа.
Икос 2
Разум Божественный о грядущем Царствии Божии открывая, Господь наш собра ученики Своя вся вкупе на горе Елеонстей, и повеле им по Вознесении Его на небо от Иерусалима не отлучатися, но ждати обетования Отча, дондеже облекутся силою свыше, яко не по мнозех днех имут креститися Духом Святым. И тако заповедав, рече им: нашедшу Святому Духу на вы, приимите силу и будете Ми свидетели во Иерусалиме и во всей Иудеи и Самарии и даже до последних земли. И сия рек, вознесеся на небо. Ученицы же, возвратившеся во Иерусалим, взыдоша в горницу и бяху вси терпяще единодушно в молитве и молении и пощении с женамии Мариею Материю Иисусовою и с братиею Его, чающе сошествие Утешителя и поюще Ему сице: Прииди, Душе Господствуяй и Животворяяй, Отцу Собезначальный и Соприсносущный. Прииди, Душе Истинный и Всеблагий, с Сыном Купносущный и Равночестный. Прииди, Душе Владычный, от Отеческаго состава и от Божественных и Безначальных уст Его несказанно Исходяяй. Прииди, Душе Христов, Соипостасное Дыхание и Премудрости Сило, в Сыне нераздельно пребываяй. Прииди, Непостижимый Просветителю, откровение тайны Пресвятыя Троицы людем даровати восхотевый. Прииди, Премудрый Всепосетителю, весь мир благодатными дарованиями исполнити возжелавый. Прииди, Утешителю Благий, вселися в ны, и спаси души наша.
Кондак 3
Силою Божественною облечен Святый Петр, востав посреди ученик, рече к ним: Мужие братие, преклоньше колена, сердца же горе возведше, помолимся ко Господу нашему, обетовавшему Утешителя инаго, да созиждет чисты сердца наша и да обновит дух прав во утробах наших и да сотворит горницу сию Церковь Божию и скоро да ниспошлет нам Духа Всеблагаго Своего, Емуже вси да воспоим едиными усты и единым сердцем: Алиллуиа.
Икос 3
Имуще страх велий, Апостоли в смущении быша, како немощным им сущим, якоже агнцам без Пастыря, проповедати Евангелие всей твари, сего ради, егда скончавахуся дние Пятьдесятницы, быша вси вкупе на молитве и вознесоша тепле моление ко Пастырю Своему, глаголюще: Царю Ангелов, управляяй всеми на земли и на мори! Раби Твои вопиют к Тебе: скоро посли нам Всесвятаго Духа Твоего. Господь же их плотию на небесех Отцу соседяй, услышав моление сие рече: Самовластный Утешителю, снизойди, чают бо Тя ученицы Мои, ихже собрах к Тебе и ко Отцу, тепле бо вопиют к Тебе, глаголюще: Прииди, Душе Благий и настави нас на землю праву. Прииди, Свете Святый, и направи стопы наши на стезю мирну. Прииди, Владыко Непостижиме, всем хотящим спастися несумненное упование. Прииди, Неизследимый Царю, всем жаждущим правды благодатное насыщение. Прииди, Душе Живый и Животворяй, Твоею бо благодатию живем и движемся и есмы. Прииди, Свете Святый и Светоносяй, Твоею бо чистотою возвышаемся, светлеемся и хранимы. Прииди, Утешителю Благий, вселися в ны, и спаси души наша.
Кондак 4
Бурное дыхание велие внезапу пронесеся, учеником в Сионе собранным и в горнице об часе третьем дне молящимся, и бысть шум, яко гром с небесе, тишине велией окрест сущей, и исполни весь дом, идеже бяху седяще. И колебашеся храмина, яко лодия, и убояшеся апостоли мняще, яко от дыхания бурна падется горница, и вси в страсе возопиша: О, Владыко, утиши колебание и посли Всесвятаго Духа Твоего, Емуже согласно да воспоем: Аллилуиа.
Икос 4
Слышаще шум с небесе и колебание воздушное видяще, боголюбивии Апостоли и вси сущии с ними исполнишася ужаса, зане в дыхании бурне сошествие Утешителево уразумеша и в шуме небеснем глас Господень ощутиша, в себе помысливше: се глас Господень возгреме в крепости. Се глас Господа Источающаго пламень огня, якоже Давид предрече. Се буря от Господа, якоже Иеремия возвести. В сие время Господь наш восхоте послати Утешителя инаго и даровати Закон нов, якоже древле на Синаи. Тамо от гласа Его колебашеся гора, здесь же от дыхания Утешителева потрясеся горница, тамо быша громи и молния, здесь же пронесеся шум с небесе. Обаче приступихом не к горе осязаемой и огнем пылающей, но к Сионстей горе, к Иерусалиму Небесному, к Ходатаю Завета Новаго, да приимем Царство Непоколебимо, и да восприимем благодать Духа, ею же послужим благоугодно, вопиюще Ему сице: Прииди, Душе Страха Божия, не во огне и буре, но во гласе хлада тонка, да нас от духа боязни рабския свободиши. Прииди, Душе Сыноположения, апостолы во едино стадо совокупивый, да и нас чада Божия сотвориши. Прииди, Душе Премудрости и Откровения, да воспомянеши нам вся словеса Христовы в познание Его. Прииди, Душе ведения и благочестия, да просветиши очи сердечный светом заповедей Его. Прииди, Душе Божия Святыни, да облечеши нас силою свыше от Своих небесных высот. Прииди, Душе всякия благостыни, да окропиши нас росою благодати по множеству Своих щедрот. Прииди, Утешителю Благий, вселися в ны, и спаси души наша.
Кондак 5
Богоноснии Апостоли еще паче исполнишася страха, егда по гласе шума се бысть им видение новое паче перваго и явишася огненнии языцы, разделяющияся сюду и сюду, и седоша по единому на коемждо от них над главами их, да исполнится Давида праотца предречение: Бог яве приидет и не умолчит, огнь пред Ним возгорится и окрест Его буря зельна. Сим духоносным огнем Утешителя просвещаемии, апостоли со страхом и с радостию возопиша, сретающе пришествие Его: Аллилуиа.
Икос 5
Видевше сошествие Утешителя в виде огненных язык, Апостоли удивишася, како дыхание бурно с пламенем совокупися, и како с ветры видены быша светильницы, с росою же искры. Наипаче же объяша их страх Божественный, егда огненнии языцы, седше над главами их, не опалиша власы, но паче просвещаху мысли их, и тако огнедохновенным озарением Святаго Духа просвещаеми, уразумеша проречение Давидово: Огнь от Лица Его воспламенится: углие возгореся от него. И приклони небеса и сниде. И прославиша Бога, яко прииде обетованный Утешитель, да огненное крещение восприявше от Него, благодарственно возопиют ему сице: Прииди, Огненосный Душе, да огненным крещением весь мир просветиши. Прииди, огнь подаяй, Боже, да терние наших прегрешений попалиши. Прииди, огнь Божественный на землю низводяй, Господи, да угасшия светильницы душ наших паки возжеши. Прииди, огненныя реки апостолом орошаяй, Владыко, да теми весь мир огнем благодати Твоея обновиши. Прииди, во огненных языцех всему миру на молитве возглаголавый Душе, воздыхании неизглаголанными научи нас о чесом молитися Небесному Отцу. Прииди, во огне и буре Божество Пресвятыя Троицы Открывый, Царю, огнедохновенным дыханием воспламени огнь Божественныя любве и в наши хладныя сердца. Прииди, Утешителю Благий, вселися в ны, и спаси души наша.
Кондак 6
Проповедник дивный, божественный Петр, видев, яко огненное видение исполни страха ученики, возопи: не бойтеся, огнь сей нежегомый есть, якоже древле неопалимая купина, или якоже пламень Вавилонския пещи, иже не опали три отроки. Сего ради кийждо от нас да отринет страх из души, и да не убоится неопальнаго пламени, огнь бо сей да разумеем, якоже рози, яко цвети на главах наших, имиже увенча, украси и озари нас Всесвятый Дух, Емуже вси с радостию да воспоим: Аллилуиа.
Икос 6
Возсия велие просвещение благодати Божией всей Церкви Христовой в великий сей Пятидесятный день, егда во огненных языцех Ты Сам существенно снисшел еси на апостолы и на вся верующия, Святый Животворящий и Всесильный Душе, Един Сый от Пресвятыя Троицы, и богатно излил еси не некия Отчии дары, якоже прежде, но от всея полноты Божества излил еси от Духа Твоего на всяку плоть, не в меру бо подаст Бог Духа, и потекоша реки воды живыя благодати Твоея от Иерусалима во всю вселенную, и тако завершишася телесныя дела Христовы и прияша начало дела Твоя, Душе, да созиждется Царствие Твое в человецех и да преобразится Тобою мертвенная плотская жизнь наша на живую и духовную. Сего ради вси водимии Тобою да воспоем Тебе сице: Прииди, Утешительный Душе, с небесных высот сошедый, да безкнижныя ученики Христовы неботаинники сотвориши. Прииди, Небесный Царю, везде сый и вся исполняяй, да во Христа верующия духовныя жизни сопричтеши. Прииди, неумаляемое Сокровище благодати, да приобщиши нас даров Твоих, и райскою радостию возвеселимся. Прииди, Неувядаемый Цвете чистоты, да окропиши нас иссопом Твоим и паче снега убелимся. Прииди, Зиждителю всея Твари, да царствуеши и господствуеши над всеми силами души моея. Прииди, Владыко Неба и Земли, да властвуеши и управляеши над всеми движениями сердца моего. Прииди, Утешителю Благий, вселися в ны, и спаси души наша.
Кондак 7
Хотя спасти вся языки, Господи, даровал еси учеником Твоим во огненных языцех Духа Твоего, да по обетованию Твоему возглаголют новыми языки, и вси исполнишася Духа Свята и начаша глаголати иными языки, якоже Дух даяше им провещевати, да вси народи от всех язык на праздник пришедшия, услышат их проповедующия своими их языки. В Вавилоне иногда размесишася языцы дерзости ради столпотворения, да разделятся языки, ныне же боговедения ради умудришася языцы, в соединение бо всех призва Вышний, да согласно славят всесвятаго Духа, поюще Ему едиными усты и единем сердцем: Аллилуиа.
Икос 7
Новое чудо Твое, Утешителю, бысть во знамение всем, и исполни ужаса языков собрания на праздник пришедших: видяху бо учеников Спасовых огненными языки глаголющих и кийждо от них свою беседу слышаше. И дивляхуся вси, друг другу глаголюще: не вси ли сии глаголющии галилеяне суть, и како мы слышим кийждо свой язык, в немже родихомся? Како сотворишася соотечественницы всем языком? Видел ли есть Петр Египет? Живяше ли когда Андрей в Месопотамии? Видеша ли когда Памфилию сыны Заведеовы? Како явишася сии Римляном, яко не варвари, Парфяном, яко им подобнии, Мидяном же, яко свои. Обаче елицы благоговейнии быша, тии прославиша Бога, вопиюще Утешителю сице: Прииди, во пророцех глаголавый Божественный Душе, возглаголи мирная и благая в сердцах наших. Прииди, во Апостолех проповедавый огненными языки Безсмертный Царю, возсияй молниями Божества в душах наших. Прииди, Животе Безначальный, разделенныя языки в соединение призвавый, и в нас дух вражия разделения всеконечно потреби. Прииди, Любы Безконечная, Апостолы на вечери союзом любве связавый, и в нас дух братския любве навеки насади. Прииди, с небесе снисшедый Утешителю наш, да на стези небесныя наставиши нас, Тебе поющих. Прииди, от земных горе возвышаяй Боже наш да от сладости мирских красот избавиши нас Тебе вопиющих. Прииди, Утешителю Благий, вселися в ны, и спаси души наша.
Кондак 8
Странными глаголы вещающе, возглаголаша святии Апостоли странныя учения и странныя веления Святыя Троицы, от Духа Святаго просвещаеми. Высокоглаголивыми же проповедующе языки, не человеком глаголаху первее, но Богу, тайны вещающе духом, якоже божественный Павел глаголет, быша бо в восторзе духовном, неизглаголанными воздыхании Святаго Духа наставляеми. Неверующим же от язык сие Духа действо пьянство непщевашеся быти. Обаче мнози благоговейни бывше, ужасахуся, и недоумевающеся, друг друга вопрошаху: что убо хощет сие быти? И с верою прославиша Бога, поюще Ему: Аллилуиа.
Икос 8
Весь исполнен быв огненосныя благодати Духа Божия, святый Петр, востав с единонадесятьми, воздвиже глас свой и нача проповедовати собранным от язык величия Божия и страшное Твое, Святый Утешителю, во огненных языцех схождение, еже пророк Иоиль древле предрече, глаголя о сем великом и просвещенном дне Господнем: “Изолью от Духа Моего на всяку плоть, на рабы Моя и на рабыни Моя, и прорекут сынове ваши и дщери ваши и юноши ваши видения узрят”. Сим Святым Духом исполненнии бывше, Апостоли не вином упишася, но упоением Духа, новаго винограда рождения Божественнаго веселия приобщившеся, вопиюще и глаголюще сице: Прииди, Божественный Утешителю, во Иордане на Спаса нашего в виде голубине снисшедый, даруй нам криле голубине кротости и чистоты, да полетим и почием. Прииди, Сладчайший Душепосетителю, в Сионе ко апостолом во огненных языцех пришедый, ороси нас огнем благодати Твоея, да верою и любовию воспламенеем. Прииди, Святый Живоначальный Душе, древле в человецех плоть сущих пребывати не восхотевый, свободи нас законом духа от закона плоти, да паки живеши в нас. Прииди, Великий Непостижимый Боже, в последок дний сих от Духа Твоего на всяку плоть изливый, сподоби нам не по плоти жити, но по духу, да всегда пребудеши в нас. Прииди, Душе всякия чистоты, помози нам, да плоть не похотствует на дух наш, и да Тобою водими будем. Прииди, Присный наш Животе, спобори нам, да не сеем в плоть и тление, но в дух, да от Духа Твоего жизнь вечную пожнем. Прииди, Утешителю Благий, вселися в ны, и спаси души наша.
Кондак 9
Всякое естество человеческое возвеселися днесь о сошествии Твоем, Утешителю Благий, зане в ветхую Пятидесятницу при Синае бывшую, вси людие издалече стояху в страхе и в ужасе, всей горе дымящейся и во огне бывшей, един бо точию Моисей взыде на верх ея во мрак, идеже бяше Бог. Ныне же, вси слышавшии Петра умилишася сердцем, увероваша и крестишася, и приложися в день той душ, яко три тысящи, и тако в сей великий день Пятидесятницы положися начало Церкви Христовой на земли и вси исполнишася Духа Святаго и духом взыдоша на гору Господню благодати Божия, вси очами веры Господа узреша и с радостию возопиша Ему: Аллилуиа.
Икос 9
Витии Божественныя святии Апостоли, прежде безкнижнии рыбарие, ныне же мудрии богословцы явишася, прежде починяху мрежи своя, ныне же облеченнии силою свыше от Духа Святаго, начаша проповедь Слова Божия, прежде точию рыб уловляху, ныне же сотворишася ловцы человеков и люди безчисленнии из глубокия тьмы начаху изымати. Прежде боящиися, ныне же дерзновение приявшии и радости исполненнии от Тебе, Святый Утешителю, тии уразумеша, яко нова тварь ныне суть и каковый велий дар получиша по обетованию Господню, сего ради ныне отбеже от них страх и дух немощи и тии ощутиша, яко уже имут силу по повелению Господню пройти даже до конец вселенныя, учаще вся языки и крестяще их во имя Отца и Сына и Святаго Духа. Сего ради в веселии духа возопиша сице: Прииди, Свете Живоначальный, да вся языки светом боговедения просветиши. Прииди, Животе Безначальный, да вся человеки к новой жизни во Христе приобщиши. Прииди, Теплото Живительная, да духом любве Твоея хладныя сердца неверных языков воспламениши. Прииди, Сладосте Неизреченная, да благодатию Твоею всех вкусивших ю паче меда и сота усладиши. Прииди, Радование наше непрестанное, да нас скорбных и печальных очищением совести возвеселиши. Прииди, Сокровище наше превожделенное, да нас нищих и убогих множеством дарований духовных обогатиши. Прииди, Утешителю Благий, вселися в ны, и спаси души наша.
Кондак 10
Спасения день — сей великий Пятидесятницы праздник, в оньже, Утешителю Благий, Церковь Христову до скончания века облагодатил еси и всю тварь Твоим Живоносным дыханием обновил еси, Везде сый и вся исполняяй, Ты идеже хощеши дышиши, вся живиши и повсюду в мире разливаеши свою живоначальную силу: Тебе поет солнце, Тебе славит луна, Тебе служит свет, Тебе работают источницы, Тобою един дождь напояет землю и бывает бел в кринех, и красен в розах, багрян же в фиалках, тако многообразна благодать Твоя: единому убо даеши слово премудрости, другому — дар пророчества, иному — сказание Божественных Писаний: единаго укрепляеши на целомудрие, другаго учиши поститися и подвизатися, оваго же уготовляеши на мученичество. Вся же сия действуеши Ты, единый Душе, разделяя коемуждо хощеши, да всякое дыхание поет Тебе: Аллилуиа.
Икос 10
Царю Небесный и жизни Подателю! Царство Твое — Царство всех веков и Владычество Твое во всяком роде и роде. Сошед же на апостолы. Ты явил еси ими Царство не от мира сего — Церковь Христову, юже исполнил еси безчисленными дары благодати Твоея, имиже, яко финикс процвете и яко кедр, иже в Ливане умножися. И тако Твоею благодатию напояема, Церковь процвете многочисленными сонмы девственник, учителей, мучеников, исповедников, преподобных, пустынников, да исполнится Осии пророка предречение: процветет, яко цвет и прострет корение, яко дубрава и яко маслина плодовита будет. Зряще убо сии сонмы духоносных отцев, Тобою, Святый Душе, возращенных, воззовем Тебе таковая: Прииди, Источниче Божественных сокровищ, вдохни нам светоносный Твоя дарования. Прииди, Подателю и Совершителю нашего освящения, освяти ум, сердце и вся наша помышления. Прииди, благости и милосердия Неизнуряемое Хранилище, сохрани в нас жизнь духовную под кровом Твоея благости. Прииди, настоящих и грядущих благ Нескончаемое Сокровище, соблюди нас в чистоте совести в предначатие вечныя радости. Прииди, падших Всенадежное Востание, Тобою бо источаются благодатныя струи напояющия всяку тварь ко оживлению. Прииди, мертвых духом и телом Благое Воздвижение, Тобою бо подаются вся силы к животу и благочестию, воздвизающиявсяку плоть к Воскрешению. Прииди, Утешителю Благий, вселися в ны, и спаси души наша.
Кондак 11
Пение духовное воспоем Тебе, Святый Утешителю, Твое во огненных языцех на Апостолы Сошествие празднующе и сим Павловым глаголом последующе: “помолюся духом, помолюся и умом, воспою духом, воспою и умом”. И тако духом на молитве и в служении пламенеюще, да не угасим плотоугодием Духа Твоего, во святом крещении восприятаго, но присно да взираем на уверовавших в день Сошествия Твоего: тии бо внимающе слову Петрову: “спасайтеся от рода сего развращеннаго”, выну бяху в учении апостол, в общении и преломлении Хлеба Жизни и в молитвах, и бысть на всякой душе страх Божий, и бяху вси вкупе единодушно, имуще вся обща, и с радостию в простоте сердца воспеваху Богу: Аллилуиа.
Икос 11
Света солнечнаго светлее явися благодать Твоя, Светоносный Душе, вся бо просветляеши, очищаеши и освещаеши Твоим огненосным осиянием. Ты бо сошел на Пресвятую Деву Марию, соделал еси Ю Пресветлый храм девства и Пречистый дом Божества Сыну Божию. В явлении же Твоем во Иордане при Крещении Господнем в виде голубине Ты отверзл еси небеса грехопадением Адамовым заключенная и обожил еси Пречистую плоть Христову. В Сошествии же Твоем на Апостолы исполнил еси Божественнаго присутствия Своего всю Церковь, Невесту Христову, да будет непорочна и свята. Сего ради точиши в Ней пророчествия, и священники совершаеши, собираеши весь собор церковный, и сходиши, яко огнь с небесе в Божественную Литургию и во всех таинствах, и тако вся Церковь одевается светом благодати Твоея, яко ризою, да во Свете Твоем узрим Свет, и да воспоем Тебе сице: Прииди, чистотою Сияющий Душе, Святую Деву Чисту в рождестве сохранивый, да и нам благодать девства и чистоты преподаси. Прииди, небеса разверзший Небесный Царю, на Спаса Христа при Крещении низшедый, да и всем верующим в Него путь на небо отверзеши. Прииди, Солнце Незаходимое и Несокрываемое, да свет возсияши праведным и правым сердцем веселие. Прииди, Сияние Присносияющее и Немерцающее, да внутрь нас возсияеши Церковь Божия Духа в Твое Божественное посещение. Прииди, Свете Святый и Животворяй, просвети мир Твоим Божественным осиянием. Прииди, огню от огня Происходяй и Боготворяй, озари нас Твоим огненосным вдохновением. Прииди, Утешителю Благий, вселися в ны и спаси души наша.
Кондак 12
Благодать духоносную даровал еси, Утешителю Святый, всей Церкви Христовой в великий день Святыя Пятидесятницы, якоже и прежде выну спребывал еси Владыке Христу во днех Его плоти, яко же великий в богословех святый Григорий витийствует: “Рождается Христос и Дух предворяет. Крещается Христос и Дух свидетельствует. Искушается Христос и Дух возводит (в пустыню). Совершает силы Христос и Дух сопутствует. Возносится Христос и Дух преемствует”. Сего ради и начатки Божества подаеши ныне, Святый Душе, естеству перстному, да паки возведеши е к первому райскому благородию и да обожиши е во образ Вознесеннаго на небеса естества Христова. Мы же исчести не могуще многочисленная паче песка морскаго благодеяния дарований Твоих, вопием Тебе: Аллилуиа.
Икос 12
Поюще, Божественный Душе, Твою Живоначальную благодать, обновляющую лице земли дохновением Твоим, поклоняемся Твоему во огненных языцех на Апостолы сошествию, и веруем, яко по обетованию Христову выну Твоя благодать во Святей Церкви пребудет, дондеже паки приидеши в последний день во общее Воскресение во еже воздвигнути вся от века умершия, яко же святый Иезекииль предрече глаголя: “от четырех ветров прииде, Душе, и вдуни в мертвыя кости сия и да оживут. И вниде в них Дух Жизни и ожиша и сташа на ногах своих собор мног зело”. Тогда не посрами нас вопиющих Тебе сице: Прииди, Утешение и Радосте моя, услыши мя в день скорби и печали моея. Прииди, Дыхание и Жизнь моя, буди ми един дух со мною до самыя смерти моея. Прииди, Блестящееся одеяние души моея, покрый внутреннюю наготу и безобразие грехопадения моего. Прииди, Теплейшее очищение совести моея, отмый скверну души и тела моего чистыми слезами пришествия Твоего. Прииди, Пище Неизреченная и Нетленная, напитай алчущий дух мой в жизнь вечную безсмертия плодами. Прииди, Питие Божественное и превожделенное, напой жаждущую душу мою благочестия водами. Прииди, Утешителю Благий, вселися в ны и спаси души наша.
Кондак 13
О, Небесный Параклите и Душе Всесвятый, от Отца Исходяй и Сыном Пришедый! Приими малое сие от всея души приносимое Тебе благодарение. Прииди к нам и пребуди выну в Церкви, да не угаснет в нас Божественный пламень Тобою возженный. И сподоби нам духом пламенети и плотоугодия не творити в похотех, да никогдаже угаснет дух наш и да выну прославляти будем Тя в душах и телесех наших, и тако возрожденнии Тобою, чистым духом и чистыми усты воспоем Единому Богу во Святей Троице: Аллилуиа.
(Этот кондак читается трижды, затем икос 1 и кондак 1)
Молитва на Сошествие Святаго Духа
О, Небесный Царю, Утешителю Святый, Душе Истины, везде сый и вся исполняяй, никогдаже начинаемый, ниже престаяй, но со Отцем и Сыном присно Сущий, первее во Ангельских Воинствах действовавый, священие даруя; и при миробытии в начале верху воды носивыйся, яко жизни Податель, в рай же первозданныя люди дыханием жизни воодушевивый и сладким общением Божественным утешавый я, по грехопадении же прародителей наших не восхотевый с падшими сынами человеческими пребывати, зане плоть быша, но точию во избраннех патриарсех и пророцех древле отцем глаголавый, в последок же дней сих, восхотев излити от Духа Своего на всяку плоть, первее на Честнейшую Горних Сил Пресвятую Деву Марию низшедый и велие таинство Воплощения Сына Божия Тою неизреченно совершивый, и паки на Том же Сыне Божием, во плоти на Иордан пришедшем, в виде голубине почивый, по сем же в великий день Пятидесятницы существенно в видении огненных язык на Апостолы сошедый и сими всю вселенную просветивый и Святую Церковь до скончания века Своею Божественною благодатию изобильно исполнивый, во еже падшее естество наше обожити и паки к райскому блаженству возвратити! Призри убо в сей великий, совершенный и конечный Пятидесятный праздник на моления рабов Твоих коленопреклоненно Тебе возносимый, и очисти нас священным наитием Твоим от множества согрешений наших во всем житии нами содеянных. Едине Чистый и Пресвятый Душе, очисти нас от многия нечистоты нашея, да не паки оставиши нас, аще по плоти жити будем, яко не имать обитати Дух Твой в человецех плоть сущих, зане плоть и кровь Царствия Божия наследити не могут. Сего ради молим Тя: угаси живоносным дыханием Твоим весь пламень страстей наших, да не творим плотоугодия в похотех, но водимии Тобою, да будем прославляти Тя в душах и телесех наших. И избави нас от духа праздности, уныния, печали и гордости и даруй нам дух кротости и чистоты, дух смирения и целомудрия, дух терпения и любве, да приидеши во внутреннюю храмину душ наших и воцаришися тамо над страстями нашими, во еже сеяти нам ктому уже не в плоть и тление, но в дух, да от Духа Твоего пожнем живот вечный в последнее Воскресение и прославим Тя с лики святых со Отцем и Сыном во веки веков. Аминь.
Кондак 1
Избраннаго исповедника Христова и чудотворца предивнаго, поборника святыя веры Православныя, Русскою землею рожденнаго и в земли Эллады возсиявшаго, святаго праведнаго Иоанна похвальными песньми почтим; ты же, угодниче Божий, яко предстояй пред престолом Царя Славы, от всяких нас бед свободи, с любовию и благодарением зовущих ти: Радуйся, святый праведный Иоанне, скорый помощниче и преславный чудотворче.
Икос 1
Ангелов Творец и всея твари Создатель избра тя, праведне Иоанне, во еже народи Руси и Эллады духовно соединити, и яви тя Церкви Своей Святей великаго чудотворца, имущаго к Нему дерзновение молитися о исцелении недугов душевных и телесных, о избавлении от всяких бед и скорбей. Темже мы, сынове русстии, благоговейне преклоняем пред тобою колена телесная и сердца наша и умиленно глаголем:
Радуйся, земный Ангеле и человече небесный.
Радуйся, благодати тезоименитый.
Радуйся, кротости и послушания образе.
Радуйся, молитвы благоуханное кадило.
Радуйся, терпением злобу мира сего победивый.
Радуйся, венцем исповедническим от Господа украшенный.
Радуйся, земли Асии подвиги своими озаривый.
Радуйся, чудесы твоими землю Эллады наполнивый.
Радуйся, светлая звездо Русския земли.
Радуйся, Отечество земное молитвами твоими не оставляяй.
Радуйся, Христа ради на земли пострадавый.
Радуйся, с Ним на Небесех воцаривыйся.
Радуйся, святый праведный Иоанне, скорый помощниче и преславный чудотворче.
Кондак 2
Видя Христос Господь сердца твоего благое намерение, Иоанне блаженне, предначерта ти тернистый и многотрудный путь спасения: егда был еси с воинством царя Петра, плениша тя агаряне и в раба продаша в землю Асии, во град Прокопион, идеже ты пребыл еси непоколебим в вере Православней и жизнь твою посвятил еси Богу, непрестанно усты и сердцем воспевая Ему: Аллилуиа.
Икос 2
Разум богопросвещенный и веру несумненную имел еси, святче Божий, егда гнева агарян не устрашився, исповеда себе христианина быти и радостно восприял еси биения, узы железныя, огнем жжение и многи муки нестерпимыя. Темже вси, таковому твоему дерзновению и мужеству дивящеся, глаголем:
Радуйся, во страсе Божии добре воспитанный.
Радуйся, закону Господню верно наученный.
Радуйся, от юности твоея всего себе Богу предавый.
Радуйся, всегда в молитве утешение духовное обретавый.
Радуйся, злобы агарян не устрашивыйся.
Радуйся, муки нестерпимыя победно претерпевый.
Радуйся, за Господа распятаго огнем от мучителей опаленный.
Радуйся, Христовым страстем в телеси твоем приобщивыйся.
Радуйся, терпение крепкое во страданиих явивый.
Радуйся, от веры Православныя не отступивый.
Радуйся, Христа единаго всем сердцем возлюбивый.
Радуйся, воине Христов непобедимый.
Радуйся, святый праведный Иоанне, скорый помощниче и преславный чудотворче.
Кондак 3
Силою Вышняго укрепляемь, со дерзновением проповедал еси Единаго Истиннаго Бога пред мучители твоими. Злочестивый господин твой, надеяся уловити тя и к вере своей привлещи, тело твое нача истязати. Ты же, страстотерпче Христов, жестокая биения от него претерпевая, укрепляющему тя Богу из глубины сердца воспевал еси: Аллилуиа.
Икос 3
Имея в души своей пламенное желание последовати Агнцу Божию, пострадавшему спасения нашего ради, праведне Иоанне, не убоялся еси мучений и молился еси за враги твоя и мучители, вопия: «Ничтоже мя разлучит от любве Твоея, Христе Боже», и от веры во Христа никакоже отступил еси. Сего ради величаем тя сице:
Радуйся, адаманте веры Христовы.
Радуйся, о всех христианах усердный молитвенниче.
Радуйся, даже до крове во исповедании Христа пострадавый.
Радуйся, в мужестве непоколебимом пребывый.
Радуйся, яко вся мучения претерпел еси, благодатию свыше укрепленный.
Радуйся, свирепство мучителей победивый.
Радуйся, страстем Христовым мужественный подражателю.
Радуйся, врагов Церкве Христовы посрамителю.
Радуйся, веру, надежду и любовь к Богу до конца сохранивый.
Радуйся, подвигом твоим христиан Прокопиона возвеселивый.
Радуйся, в сердце твоем образ Христа носивый.
Радуйся, страданьми за Него мзду многу на Небесех получивый.
Радуйся, святый праведный Иоанне, скорый помощниче и преславный чудотворче.
Кондак 4
Буря лютых мук и страстей мира сего не потопи корабля души твоея, праведне Иоанне, ты бо благодушие в телеснем пленении явил еси, кротость же, незлобие и смирение, и якоже Ангел на земли пожил еси, в трудех, посте и молитве подвизаяся, кесарю - кесарево, а Божие - Богу отдавая, по слову Господа, нощию же без сна пребывая, о прощении своих согрешений, наипаче же о творящих ти обиды и озлобления молился еси, в сокрушении сердечнем поя Богу: Аллилуиа.
Икос 4
Слышавше и видевше дивное твое житие, кротость же, смирение и премногую добродетель, гонители твои удивишася и прославляху тебе, яко человека праведна. Егда же лютый господин твой узре в дому своем молитв твоих ради изобилие во всем и даде тебе ослабу, ты, огнем любве ко Господу окриляемь, умножил еси труды подвижническия, на всяку нощь течением слез помост притвора церковнаго в молитве орошая. Помози убо и нам подражати тебе, укрепи нас, от мглы страстей избави и даруй мужество духовное всем прибегающим ко предстательсту твоему и вопиющим тебе таковая:
Радуйся, унижением твоим евангельскому Лазарю уподобивыйся.
Радуйся, терпением твоим с многострадальным Иовом сравнивыйся.
Радуйся, смирившемуся нас ради Христу усердно подражавый.
Радуйся, подвигом твоим Ангелов удививый.
Радуйся, трудниче прилежный, земному господину верно послуживый.
Радуйся, кротостию и благостию своею сердце его победивый.
Радуйся, за творивших ти обиды и озлобления Богу молитвы возносивый.
Радуйся, злобу их на милость преложивый.
Радуйся, на паперти церковней нощи в молитвах проводивый.
Радуйся, подвижниче благочестия и исповедниче, во граде Прокопионе возсиявый.
Радуйся, любве и милосердия ко всем людем исполненный.
Радуйся, яко за ненавидящих и обидящих нас молитися подвизаеши.
Радуйся, святый праведный Иоанне, скорый помощниче и преславный чудотворче.
Кондак 5
Боготечная звезда, от Руси возсиявшая, явился еси, блаженне Иоанне, блистая чистотою ангельскою и лучами добродетелей твоих земли Авии и Эллады озарив. Егда же ты болен бе, и день своея кончины от Бога ведая, восхотел еси причаститися Святых Христовых Таин, иерей, Богом вразумленный, принесе тебе Святыя Дары во яблоце, ихже прияв, праведную душу твою в руце Божии предал еси, и светильник нося, полн елея добрых дел, вшел еси в Царствие Небесное, во еже непрестанно со всеми святыми воспевати всех святых Святейшему Слову: Аллилуиа.
Икос 5
Видевше людие града Прокопиона богоугодное житие твое и блаженную кончину, со слезами и благоговением погребоша тело твое во храме святаго великомученика Георгия. По кончине же твоей мнози недужнии - не токмо православнии, но инославнии и агаряне получиша исцеления у гроба твоего, благодарение Богу приносяще, и тебе, яко теплому молитвеннику о всех страждущих, взываша тако:
Радуйся, яко сердце твое покаянными слезами омыл еси.
Радуйся, слезами и молитвами к смерти себе приуготовавый.
Радуйся, яко всех обидящих тя простил еси.
Радуйся, незлобием Христовым духа злобы победивый.
Радуйся, в чистоте душу и тело твое сохранивый.
Радуйся, кончину свою предуведевый.
Радуйся, праведно жизнь земную скончавый.
Радуйся, возлюбившему тя Господу душу твою предавый.
Радуйся, венцем безсмертия от Господа увенчанный.
Радуйся, вечней радости с Ним по смерти приобщивыйся.
Радуйся, яко церковь великомученика Георгия прият честное тело твое.
Радуйся, яко во обителех Небесных водворися святая душа твоя.
Радуйся, святый праведный Иоанне, скорый помощниче и преславный чудотворче.
Кондак 6
Проповедником чудес и славы Божия явися клирик некий града Прокопиона, егда узре в соннем видении блаженнаго Иоанна, повелевающаго открыти гроб, в немже обретаются нетленныя мощи его. Темже вернии молитвенно возопиша ко Господу, да явит Он людем мощи Своего избранника, зовуще со благодарением Ему: Аллилуиа.
Икос 6
Возсиял еси, яко новое светило всему христианскому роду, праведне Иоанне, егда Божиим изволением обретено бысть нетленное и благоуханное тело твое, источающее обилие чудес всем с верою к твоему заступлению прибегающим. Темже уврачуй и облагоухай нас, верою и любовию тебе взывающих:
Радуйся, на земли, яко беплотен, поживый.
Радуйся, сосуде Божественныя благодати.
Радуйся, по смерти священнику церкве великомученика Георгия явивыйся.
Радуйся, праведниче Божий, в чудесех просиявый.
Радуйся, яко Христос с небесе призре на святыя мощи твоя.
Радуйся, яко столп огненный над ними показася.
Радуйся, святыя мощи твоя, якоже сокровище велие явити изволивый.
Радуйся, благоуханием от них верных возвеселивый.
Радуйся, яко нетлением тело твое прослави Господь.
Радуйся, яко мощей твоих демони трепещут.
Радуйся, яко во Царствии Небеснем со святыми пребываеши.
Радуйся, яко и нас, грешных, на земли не оставляеши.
Радуйся, святый праведный Иоанне, скорый помощниче и преславный чудотворче.
Кондак 7
Хотящим врагом град твой разорити и мощи твоя огню предати, явися страшное и преславное чудо: воини увидеша тя, Иоанне, стояща посреде огня и оставити град грозно им повелевающа. Тии же ужасошася видению, вон бежаша и никоегоже зла сотвориша. Вернии же людие паки обретоша мощи твоя, к нимже и мы припадающе вопием Богу победную песнь: Аллилуиа.
Икос 7
Новаго тя чудотворца и молитвенника во времена последняя дарова нам Человеколюбец Господь, егда оскуде вера, любы охладе, стихии земныя поколебашася. Темже молим тя, праведне Иоанне, не остави нас, грешных и слабых, в годину испытаний, укрепи молитвами твоими всех любящих тя и вопиющих ти таковая:
Радуйся, верных надеждо и заступление.
Радуйся, неверных страх и посрамление.
Радуйся, яко подвиги твоими град Прокопион освятил еси.
Радуйся, яко молитвами твоими землю Эллады облагоухал еси.
Радуйся, свет Христов в сердце твоем носивый.
Радуйся, тьму жизни нашея светом Христовых заповедей озаряяй.
Радуйся, о людех страны Греческия молитвенниче неусыпный.
Радуйся, помощниче людем русским Богодарованный.
Радуйся, от разорения град твой и храм оградивый.
Радуйся, православных христиан прибежище.
Радуйся, яко ныне со всеми святыми престолу Божию предстоиши.
Радуйся, яко неизреченную славу Господню созерцаеши.
Радуйся, святый праведный Иоанне, скорый помощниче и преславный чудотворче.
Кондак 8
Странником и пришельцем был еси в стране пленения твоего, угодниче Божий, взыскующим Горняго Иерусалима Небеснаго, и тако странное для сущих от мира житие пожив, добродетельми многими к Богу приблизился еси, научая всех верных искати едино на потребу, еже есть богоугождение. Сего ради Сам Господь, видя смирение твое, возвеличи тя благодатию Своею, Егоже восхваляюще, поем ангельскую песнь: Аллилуиа.
Икос 8
Весь был еси любве Божественныя исполнен, блаженне, светом благодати Божия сияя пред человеки, и святыя мощи твоя - врачебница есть духовная, сокровище чудес, небесных аромат вместилище. Сего ради, дерзновение велие ко Господу имея, молишися за христианы, во всем мире живущия, и верою тя на помощь призыващим пособствуеши. Не остави убо и нас благодатною твоею помощию и заступлением, да благодарно тебе зовем:
Радуйся, даром любве к Богу и ближним исполненный.
Радуйся, всех приходящих к тебе скорый утешителю.
Радуйся, верою чудодейственною озаренный.
Радуйся, в молитвах и бдениих учителю наш предивный.
Радуйся, благодатную росу исцелений верным источаяй.
Радуйся, в милости неистощимый.
Радуйся, недугов лютых прогонителю.
Радуйся, православных людей тихое пристанище.
Радуйся, в сониих и видениих страждущих посещаяй.
Радуйся, в бедах и напастех помощь им подаваяй.
Радуйся, странниче земный, во Отечество Небесное вшедый.
Радуйся, во всем мире христианстем прославленный.
Радуйся, святый праведный Иоанне, скорый помощниче и преславный чудотворче.
Кондак 9
Всякое естество человеческое удивися, видевше чудеса преславная, от мощей праведнаго Иоанна истекающия, мнози убо восхотеша части их во инии места и грады отделити, обаче всем хотящим взяти их ты, угодниче Божий, возбранял еси. Егда же святогорцы русскаго монастыря моляхуся, да часть мощей твоих даруется им, благоволил еси принести на Афон, в Сад Богоматере, десную руку твою в благословение им и утешение. И бысть велие торжество: вси иноцы обители Пантелеимоновой, колена преклоняюще, сретоша десную руку твою от града Прокопиона принесенную, воспевающе Богу благодарственную песнь: Аллилуиа.
Икос 9
Ветии многовещаннии не возмогут изрещи силу любве православных эллинов, иже изгнанни бывше от Прокопиона неверными, изнесоша мощи твоя, праведне Иоанне, на остров Эвбею, идеже воздвигоша велий благолепный храм во имя твое, в немже и положени быша многоцелебныя мощи твоя. Темже и мы, молящеся в храме сем и предстояще пред ракою твоею, чудесы благоухающей, прилежно молим тя: услыши нас, твоего предстательства просящих и благоговейне вопиющих:
Радуйся, верных и неверных в бедах утешителю.
Радуйся, яко тобою прославляется вера христианская.
Радуйся, страну Греческую и людей ея возлюбивый.
Радуйся, яко смотрением Божиим мощи твоя на землю Эллады принесени быша.
Радуйся, храму, имени твоему посвященному, покрове, Богом данный.
Радуйся, града Неопрокопиона и всея земли Эллады святый покровителю.
Радуйся, мощами твоими Гору Афонскую освятивый.
Радуйся, нетленною десницею во обители Пантелеимоновой пребываяй.
Радуйся, братии Афонскаго вертограда в подвизех скорый помощниче.
Радуйся, яко во всей Церкви Христовой имя твое прославляется.
Радуйся, яко всей стране Гречестей, яко солнце незаходимое, сияеши.
Радуйся, яко и Отчизну твою, страну Русскую, не оставляеши.
Радуйся, святый праведный Иоанне, скорый помощниче и преславный чудотворче.
Кондак 10
Спасение в бедах и напастех восхотев дати Господь верным чадом Своим, дарова нам тя, угодниче Божий, приял бо еси благодать целити недуги всем притекающим к тебе с молитвою: кровоточивии бо и прокаженнии прикосновением к раце мощей твоих очищаются, глусии слышат, разслабленнии здрави бывают, слепии прозревают. Мы же, поминающе скорое заступление твое, благодарным гласом восхваляем Бога, поюще Ему песнь: Аллилуиа.
Икос 10
Стена еси стране Гречестей и народу ея благочестивому, праведне Иоанне, и необоримый заступник всем призывающим имя твое, зане тако благоволи Сам Господь - быти тебе защитником христиан не токмо земли Эллады, но всех любящих и чтущих тя людей православных. Темже Элладския Церкви людие, Афонских отец собори, Русския страны вернии и во всякой стране чтущии Бога восхваляют тя сице:
Радуйся, страже земли Эллады, нечестивыя отгоняяй.
Радуйся, всех благочестивых людей ея от бед избавляяй.
Радуйся, яко во всех странах живущим христианом благодатную помощь подаеши.
Радуйся, яко целебныя дары повсюду точиши.
Радуйся, от Господа власть на духи нечистыя приемый.
Радуйся, силою Божиею их изгоняяй.
Радуйся, оставленным врачами предивное поможение.
Радуйся, яко от смертоносных язв многих свобождаеши.
Радуйся, болящих младенцев присный врачевателю.
Радуйся, скорбящих их родителей благий утешителю.
Радуйся, проповедниче покаяния и ходатаю нашего спасения.
Радуйся, смиренномудрия и терпения учителю.
Радуйся, святый праведный Иоанне, скорый помощниче и преславный чудотворче.
Кондак 11
Пение всеумиленное приносим Христу Богу, прославльшему тя, праведне Иоанне, яко дарова нам великаго заступника, утешителя и молитвенника о спасении православных христиан, по всему лику земли обитающих. Темже славим тя, просяще твоего предстательства пред Господом о стране нашей, да избавимся от нашествий иноплеменных и междоусобных браней, и возможем в мире и тишине воспевати Христу Богу песнь: Аллилуиа.
Икос 11
Светозарный светильник Божия благодати явился еси, праведне Иоанне, духовным сиянием подвигов твоих и чудес просветивый земли Асии и Эллады, ты бо, Русскою землею рожденный, повсюду источаеши чудес величество и молишися о всех любящих и чтущих тя. Темже убо моли Христа Бога Отечеству твоему и всей стране Гречестей непоколебимыми и безмятежными быти, от навет вражиих и от агарянскаго нашествия их огради, воинству православному победу на враги даруй, да к тебе, яко крепкому о нас молитвеннику, взываем сице:
Радуйся, Церкви Вселенския Православныя преславное украшение.
Радуйся, о людех православных пред Богом дивный предстателю.
Радуйся, во дни бед и испытаний в земли Эллады чтущих тя не оставивый.
Радуйся, об Отечестве нашем и народе его теплый молитвенниче.
Радуйся, Ангеле земли нашея, во стране Гречестей прославленный.
Радуйся, и в Руси благоговейне почитаемый.
Радуйся, светильниче, омраченныя души просвещаяй.
Радуйся, лампадо златая, елеем милости исполненная.
Радуйся, радости духовныя чтущим тя подателю.
Радуйся, спасительное христиан прибежище.
Радуйся, яко тобою страстей очищение приемлем.
Радуйся, у престола Божия о нас, недостойных, ходатаю.
Радуйся, святый праведный Иоанне, скорый помощниче и преславный чудотворче.
Кондак 12
Благодать Духа Святаго, живущая в тебе, блаженне, дивно показася в нетлении твоих честных мощей, в чудесех от них и исцелениих, ихже любовию лобызающе, славим о тебе Христа Бога, дивнаго во святых Своих. Сего ради не забуди и нас, усердно призывающих тя во времена тяжких бед и напастей, и молитвами твоими от них избави, не престани ходатайствовати всем нам телеснаго здравия и душевнаго спасения, со благоговением чтущих святую память твою и поющих Богу: Аллилуиа.
Икос 12
Поюще подвиги многострадальнаго жития твоего, почитаем страдания, хвалим долготерпение, славим кротость и смирение, ублажаем святую твою кончину и почитаем тя, яко небеснаго предстателя нашего, ты бо от бед и скорбей избавляеши, недуги врачуеши, печали утоляеши всех почитающих тя. Благодарим и величаем прославившаго тя Господа, даровавшаго нам дивнаго молитвенника и чудотворца, Егоже умоли спастися всем поющим ти таковая:
Радуйся, добропобедный воине Царя Небеснаго.
Радуйся, великий Христов угодниче.
Радуйся, плачем и скорбьми временными утешения вечнаго сподобивыйся.
Радуйся, кротостию своею и смирением землю праведных унаследивый.
Радуйся, чистотою и целомудрием от Бога украшенный.
Радуйся, цветом неувядаемым почтенный на Небеси.
Радуйся, Ангельских Воинств собеседниче.
Радуйся, яко с преподобными и праведными светло торжествуеши.
Радуйся, милостивое заступление Божия Матере к нам приклоняяй.
Радуйся, светильниче, любовию своею нас освящаяй.
Радуйся, всех святых земли Русския сонаследниче.
Радуйся, яко предстоиши ныне со всеми святыми престолу Божию.
Радуйся, святый праведный Иоанне, скорый помощниче и преславный чудотворче.
Кондак 13
О пречудный и преславный чудотворче, святый праведный Иоанне, земли Русския благодатное рождение, подвижников Эллады похвало и украшение. Приими от любящих тя сердец малое сие моление и принеси его ко Христу Богу нашему, да сохранит нас от враг видимых и невидимых, от недуга и глада, от всякия скорби и внезапныя смерти, и сподобит вкупе с тобою во Царствии Небеснем непрестанно пети Спасителю нашему и Богу песнь: Аллилуиа.
(Этот кондак читается трижды, затем икос 1 и кондак 1)
Молитва первая
О великий угодниче Божий, святый праведный Иоанне Русский, просиявый в земли Ассии равноангельным житием твоим, ревностию о Господе и подвигами во исповедании веры Христовы, града Неопрокопиона и всея земли Эллады пресветлое украшение, богохранимей стране нашей, людем ея и во всем мире живущим православным христианом помоще и крепкое заступление! Благодарим Господа, дивнаго во святых Своих, в вере истинней непоколебимо тя утвердившаго, в стоянии за исповедание ея укрепившаго и доброе скончание подвига многотруднаго даровавшаго, последи же многая и великая чудеса нам явившаго чрез многоцелебную раку мощей твоих. Ныне, предстоя Небесному Царю, испроси у Него избавити вся грады и веси страны нашея и земли Эллады от глада, труса, мраза, огня, смертоносных болезней, от нашествий иноплеменных и междоусобных браней. Помози всем путешествующим, болящим, в заточении сущим, в скорбех и гонениих за святую веру Православную терпящим. Соедини всех православных людей любовию ко Христу Богу нашему и Церкви Его Святей, даруй нам дух любве и мира к братскому единению всех верных. Умоли Господа, да подаст нам дух покаяния и сокрушения о гресех наших и всесильною Своею благодатию да поможет и укрепит в борьбе со страстьми и похотьми, да дарует нам дух смирения и кротости, дух братолюбия и незлобия, дух ревности по Бозе и спасении ближних. Помяни и нас, грешных, молящихся тебе: страждущих и болящих исцели, скорбящих утеши, бедствующим скорую помощь подай, всем же чтущим и любящим тя испроси христианскую кончину живота безболезненну, непостыдну, мирну и добраго ответа на Страшнем Судищи Христове. Буди нам помощник и покровитель во спасение, да твоими молитвами сподобимся в нынешнем и будущем веце прославляти в Троице славимаго Бога, Отца и Сына и Святаго Духа, ныне и присно и во веки веков. Аминь.
Молитва вторая
О всеблаженный исповедниче Христов и великий чудотворче Иоанне, Эвбея скоровище, Греческия страны похвало и людей русских сродниче! Ты в пленении агарянском лютая биения и влас сожжение твердо за Христа претерпел еси, благочестием же своим, подвиги и чудесы верныя премного укрепил еси, неверныя же умягчил еси и просветил, по кончине же бесчесленными чудесы и исцеленьми просияваеши. Вемы, угодниче Божий, яко велие дерзновение имаши ко Господу, нам же, бедствующим, сострадаеши тако тепле, яко не терпиши и зрети ны в лютых недузех или тяжких скорбех сущими, и сего ради и непризываемый скоро притекаеши, телеса и души врачуя, бесы изгоняя, заблуждшия обращая, наипаче же от малых детей всякую болезнь и горесть отгоняя. Се бо и ныне греси мнози отяготиша ны и изнуряющими скорбьми души наша сотрошася, силы же телесныя оскудеша, и како унынию и тягостней печали противостати возможем, аще не ты сам, святче Божий, восстанеши по нас и противу врагов наших благодатне ополчишися! Испроси же, благоприятными твоими ко Господу молитвами, телесными недуги страждущим совершенное исцеление, всем же спасительное терпение и благодарение; скорби, бесовския наветы и искушения отврати; вся же, елика попустит Господь, научи во очищение понести благоразумне; нас же, во тьме неведения и забвения заповедей Божиих сущих, просвети, выну неуклонне творити волю Божию настави, бесплодия духовнаго разреши, очищение, освящение и просвещение душам нашим даруй; да с тобою вкупе выну и во веки веков прославим Всеблагаго Бога и Пречистую Богородицу, твоим всемощным заступлением. Аминь.