Молитвы - 12 июня 2025
О, всеблаженне святый священномучениче святителю отче наш Иоанне, правды Божия поборниче и святыя православныя веры Христовой защитниче, хулителей Святыя Церкве обличителю, врагов прогонителю, обидимым покровителю и всех верных христиан теплый предстателю. Ты всею душею от юности заповеди Христовы возлюбил еси. И во дни гонения лютаго на веру Православную, яко истинный пастырь явился еси, крестный путь прошед: поругание, заточение, оклеветание претерпевый и тако мученический венец восприял еси, обретши благодать Господу молитися за ны. Вемы, яко ты, предстоя Престолу Вседержителя, имаши велие дерзновение в молитвах пред Господем. И ныне смиренно припадаем и усердно молимся: о, скорый заступниче наш, святителю священномучениче отче Иоанне, услыши нас грешных и недостойных чад твоих: умоли Всемилостиваго Господа и Пречистую Его Матерь Пресвятую Богородицу веру православную соблюсти, Святую нашу Церковь укрепити в единстве мира и любви, отпадшия от Святыя Церкве паки возвратити, страну нашу Латвийскую в мире, христианских добродетелех и благоденствии сохранити. Помози нам и разум наш питати не суетною мудростию человеческою, но смиренным познанием воли Божия. О, святый угодниче Божий, не презри нас молящихся тебе: не токмо от бед и скорбей избавления просим, но силы и твердости, великодушия и любве, дабы претерпети оныя напасти восстающия на ны. Испроси нам неослабное терпение до конца жития нашего, мир с Господем и грехов наших прощение. Ей, святый священномучениче, моли Господа Бога и Спаса нашего Иисуса Христа Сына Божия избавитися нам от всякаго зла и сохранити храм сей, и град, и страну нашу, и люди благочестно чтущия тя от всякия напасти, от болезней, глада, потопа, огня, меча, нашествия иноплеменников и междоусобныя брани, от клеветы и всякаго злаго обстояния. Молитвами твоими святыми рассеянныя собери, заблудшия на путь правый настави, старость поддержи, юныя вразуми, младенцы воспитай и всех нас с любовию почитающих тя утверди, да пребудем в любве друг ко другу, единомысленно исповедуя Отца и Сына и Святаго Духа, Троицу Единосущную и Нераздельную, и тако да сподобимся Небеснаго Царствия, идеже славится Пречестное и Великолепое Имя Пресвятой и Живоначальной и Нераздельной Троицы. Аминь.
О, великий, преславный исповедниче Христов и дивный чудотворче, отче наш Иоанне!
Постниче изрядный, девственниче, прозорливче, мудрый воспитателю и целителю скорый. Призри на нас, сирых и обремененных грехи многими, уврачуй страсти, болезни и скорби тяжкие, умири нашу жизнь и огради молитвами твоими от лютаго велиара и всякаго супостата восстающего на ны.
Ей, святче Божий, услыши моление наше, с верою и любовию возносимое тебе, и не презри нас, требующих твоего заступления, буди защитниче и покровителю людем твоим, граду сему, и всякому граду и державе Российстей. На тя бо упование возлагаем, чудотворче преславный, ибо сам рекл еси пастве твоей: Не забуду, кто приидет ко мне, тому помогати буду молитвами своими у престола Царя Славы, - идеже ты пребываеши с вои ангельстими предстательствуя за землю нашу, прославляя Бога в Троице, Емуже слава, честь и поклонение во веки веков. Аминь.
О, предивный и славный угодниче Христов, преподобие отче Иоанне исповедниче. В житии своем и подвизех преподобному Серафиму и праведному Иоанну Кронштадтскому уподобился еси. Такожде и мы, к Твоему твердому заступлению прибегающе, в сокрушении сердечном молим Тя: озари нас светом дарованной Тебе благодати и молитвенным предстательством пред престолом Божиим утверди и умножь веру нашу. Ты бо и в годину лютых гонений являл немощным подкрепление и утешение, болящим исцеление и заступление, заблудшим исправление, бедствующим благовременную помощь. И ныне не остави нас, с верою и надеждою к раце мощей Твоих притекающих. Умоли Всеблагаго Господа народы Отечества нашего в единомыслии веры и во всяком благочестии соблюсти, междоусобныя брани умирить, дух благочестия, братолюбия и страха Божия в сынах русских возродить. Имамы бо Тя, неусыпающаго молитвенника и предстателя, непрестанно с любовию славословим дивнаго во святых Своих Бога - Отца и Сына и Святаго Духа, ныне и присно и во веки веков. Аминь.