Акафисты - 20 июня 2025
Кондак 1
Избранный и дивный угодниче Христов, преподобне отче Тихоне! По достоянию ублажити тя недоумеем мы, любовию чтущии тя; обаче тоюжде любовию побуждаеми, похвальная восписовати тебе дерзаем. Ты же, просвещаяся ныне обильно от Божественнаго света во Царствии Христа Бога, и нас омраченных греховными страстьми просвети, и твоими ко Господу молитвами от всяких бед избави, да радующеся вопием ти: Радуйся, Тихоне преподобне, преславный чудотворче.
Икос 1
Ангельстии чини возрадовашася твоим подвигом, имиже в пустыни сей подвизался еси, в посте и бдении просияв и в молитвах непрестанных, серафимскою горя любовию к Богу. Темже мы ныне почитающе тя, яко приснаго собеседника ангелов, со усердием похвальная пения восписуем ти сице: Радуйся, во плоти небесный жителю; Радуйся, страстей телесных победителю. Радуйся, воздержания образ явивый; Радуйся, пустыню Луховскую просветивый. Радуйся, иноком на спасение учителю; Радуйся, безмолвия добрый рачителю. Радуйся, истинный в добродетелех наставниче; Радуйся, скорый в скорбех помощниче. Радуйся, на путь правый заблуждающих наставляяй; Радуйся, неослабнаго терпения образ нам являяй. Радуйся, унывающих утешение; Радуйся, согрешающих исправление. Радуйся, Тихоне преподобне, преславный чудотворче.
Кондак 2
Видяще окрестнии жители безмолвное житие твое, преподобне отче наш Тихоне, дивляхуся твоему терпению; темже и мы, духовная чада твоя, любезно ныне воспоминающе подвиги и труды твоя, прославляем тебе прославившаго Бога, дивнаго во святых Своих, и поем Ему: Аллилуиа.
Икос 2
Разуму податися нам Божественному, помолися к Сильному и Богу разумов, преподобне отче Тихоне, во еже разумно ублажати тя; ты бо Божественным сияя светом, со ангелы водворяешися ныне, и приими посильное ублажение сие от нас, радостно похвалы сицевая тебе приносящих: Радуйся, постническими добродетельми просиявый; Радуйся, Божественную благодать стяжавый. Радуйся, чистоты усердный хранителю; Радуйся, безмолвия истинный любителю. Радуйся, ангелов собеседниче; Радуйся, ко Христу Богу о нас грешных молитвенниче. Радуйся, Троичнаго света присный зрителю; Радуйся, темныя области слуг прогонителю. Радуйся, подвигов иноческих наставниче; Радуйся, небесныя славы наследниче. Радуйся, яко печали от человек отгоняеши; Радуйся, яко скорую помощь всем подаваеши. Радуйся, Тихоне преподобне, преславный чудотворче.
Кондак 3
Сила Вышняго благодатне осени тя, преподобне отче Тихоне, и показа тя всем яве селение и жилище быти Святаго Духа. Темже и мы, любовию почитающе память твою, верно вопием Богу, дивному во святых Своих: Аллилуиа.
Икос 3
Имуще тя велика, отче, заступника и скораго в бедах и напастех помощника, мы, духовная чада твоя, святую память твою совершающе, сия тебе любовию восписуем: Радуйся, скорбящим Божественное утешение; Радуйся, светлое Божия благодати селение. Радуйся, ревностный Троицы Святыя служителю; Радуйся, скорый всех унывающих посетителю. Радуйся, противныя силы прогнание; Радуйся, недугующих врачевание. Радуйся, столпе веры, Богом Самим утвержденный; Радуйся, учителю благочестия совершенный. Радуйся, ко спасению всем нам благонадежный водителю; Радуйся, бедствующих защитителю. Радуйся, Бога паче всего возлюбивый; Радуйся, богатство и славу мира сего ни во чтоже вменивый. Радуйся, Тихоне преподобне, преславный чудотворче.
Кондак 4
Бурю страстей многомятежнаго мира сего возненавидев, преподобне отче Тихоне, устранился еси сует его и водворился еси в пустыни, чая Бога, спасающаго тя от малодушия и от бури. Ныне же в вышних обителех водворяяся, Владыце всех с небесными силами предстоиши, поя купно с ними спасшему тя Богу: Аллилуиа.
Икос 4
Светозарную лучу имуще тя вернии, молим тя, преподобне отче наш Тихоне, просвети и вразуми сердца наша во спасение, да радующеся вопием тебе сице: Радуйся, пределов Костромских украшение; Радуйся, Луховския пустыни озарение. Радуйся, постников красото; Радуйся, подвижников доброто. Радуйся, благодатию Духа Святаго осиянный; Радуйся, источниче чудес богодарованный. Радуйся, исцелений независтный подателю; Радуйся, немудрых богомудрый наказателю. Радуйся, в болезнех сущих добрый врачу и целителю; Радуйся, всех призывающих тя с верою скорый посетителю. Радуйся, чудесы твоими Луховскую страну просвещающий; Радуйся, исправлении твоими славу Божию возвещающий. Радуйся, Тихоне преподобне, преславный чудотворче.
Кондак 5
Светильника тя показа светла, иже чудес Бог и Отец светов, горяща и светяща в сей уединенной пустыни, преподобне отче наш Тихоне. Темже окрестнии людие, дивящеся твоему благочестию и святыне, воспеваху дивному во святых Своих Богу песнь: Аллилуиа.
Икос 5
Видяще святое твое житие людие Луховстии, Тихоне преподобне, начаша благоговейно тебе почитати: ты же, бегая славы человеческия, тай работал еси Богу, прославльшему тя яве славою нетления и благоуханием святыни. Темже и мы, духовная чада твоя, сицевая любовию вопием ти: Радуйся, яко светило в пустыни сей сияющий; Радуйся, чудесы твоими всех просвещающий. Радуйся, наставниче великий на путь спасения; Радуйся, истинный последователю Евангельскаго Христова учения. Радуйся, иго Христово благое на себе восприявый; Радуйся, всего себе и весь живот твой Христу Богу предавый. Радуйся, нестяжания образ нам явивый; Радуйся, вольную нищету возлюбивый. Радуйся, забывшаго обет свой человека отечески наказавый; Радуйся, томужде вскоре исцеление и здравие телесное чудесно даровавый. Радуйся, терпением скорбей всяческих в пустыни сей просиявый; Радуйся, вольною нищетою вечное богатство стяжавый. Радуйся, Тихоне преподобне, преславный чудотворче.
Кондак 6
Гласа, вопиющаго в пустыни: “Уготовайте путь Господень”, и проповеди Евангельския, еже не пещися ни о чесом же, послушавый от сердца, вся сущая в мире Бога ради презрел и оставил еси, да Христа единаго приобрящеши, Тихоне преподобне. Темже и нам от Христа Бога получити ослабу от страстей умоли, вопиющим Ему: Аллилуиа.
Икос 6
Возсиял еси от Литовския земли, яко светозарная звезда от темнаго запада, преподобне отче Тихоне, и просветил еси пустыню Луховскую сиянием твоих доблестей. Темже молим тя усердно, от всяких вражеских наветов данною тебе от Бога благодатию избавити нас, вопиющих тебе сицевая: Радуйся, крест твой терпеливно носивый; Радуйся, плоть свою духови покоривый. Радуйся, усердный винограда Христова делателю; Радуйся, пустыни тщаливый устроителю. Радуйся, ублажаемый на земли; Радуйся, прославляемый на небеси. Радуйся, от страстей и бед чтущия тя избавляющий; Радуйся, молящихся тебе от уз греховных разрешающий. Радуйся, яко мзда твоя на небеси многа; Радуйся, яко восприял еси сугубо воздаяние трудов твоих от Бога. Радуйся, вышняго Сиона гражданине; Радуйся, моляйся тамо о нас, молитвенно воспоминающих тя ныне. Радуйся, Тихоне преподобне, преславный чудотворче.
Кондак 7
Удивися Суждальский епископ Симеон твоей нищете глубоцей и совершенному нестяжанию, преподобне отче Тихоне, еже наипаче по преставлении твоем всем яве показал еси; темже от своих си усердно послужи твоему погребению, зовый Богу песнь: Аллилуиа.
Икос 7
Новый воистинну подвижник показался еси и стране сей, Тихоне преподобне, с преподобным Макарием подвизався, с нимже купно и упокоеваешися в вечных обителех. Мы же почитающе твоя подвиги и труды, похвальными песнопении сице память твою ублажаем: Радуйся, постом и бдением и молитвою страсти греховныя разуму покоривый; Радуйся, оружием креста князя тьмы победивый. Радуйся, яко всякое желание плотское увядил еси; Радуйся, яко безстрастием природу победил еси. Радуйся, иноческих подвигов ревнителю; Радуйся, пустыни Луховския благоукрасителю. Радуйся, постников похвало и славо; Радуйся, воздержания подвижников зерцало. Радуйся, всякую добродетель в себе изобразивый; Радуйся, иго Христово и бремя Его легкое возлюбивый. Радуйся, истинную веру собою утверждающий; Радуйся, в невечернем дни Царствия Христова пребывающий. Радуйся, Тихоне преподобне, преславный чудотворче.
Кондак 8
Странное и жестокое житие твое бысть в мире сем, Тихоне преподобне; ты бо и землю пустынную орати рукама своима не возгнушался еси, и в древоделии упражняяся, неблагообразныя виды лепотным благообразием украшал еси, и телесную болезнь терпением побеждая, непрестанною молитвою воспевал еси выну, яко безплотен, песнь Богови: Аллилуиа.
Икос 8
Весь был еси умом и сердцем твоим в вышних, аще и в земледелии упражнялся еси, преподобне Тихоне, и горе оком души твоея присно взирал еси. Темже и ныне всецело водворялся тамо, заступаеши всех, верою и любовию вопиющих тебе таковая: Радуйся, новый пустынножителю; Радуйся, древних подвижник усердный ревнителю. Радуйся, Сергию Великому подражавый; Радуйся, в пустыни Луховстей чудесы просиявый. Радуйся, духовнаго совершенства учителю; Радуйся, добродетелей христианских рачителю. Радуйся, всяцем образом Владыце всех угодивый; Радуйся, равноангельное житие во плоти на земли поживый. Радуйся, яко молитвы Богу присно о нас приносиши; Радуйся, яко всем полезная от Бога просиши. Радуйся, яко Христа в души твоей вообразил еси; Радуйся, яко равную с первыми делатели, аще и последнейший леты, мзду от Него получил еси. Радуйся, Тихоне преподобне, преславный чудотворче.
Кондак 9
Луховская страна удивися тебе, Тихоне преподобне, во дни подвигов и трудов твоих; но и доныне по достоянию ублажает честную память твою. Ты бо мира сего красная ни во чтоже вменив и Единаго Бога всем сердцем своим возлюбив, явился еси воистинну глас вопиющаго в пустыни, и яко безплотен во плоти пожив, воспевал еси непрестанно, и ныне со ангелы поеши присно Богу песнь: Аллилуиа.
Икос 9
Витии хитрословесныя по достоянию восхвалити тя не могут, богомудре отче наш Тихоне: ты бо от юности весь Богу прилепился еси, и даже до конца многотруднаго жития твоего Тому усердно послужил еси. Мы же любовию вопием тебе сице, по силе нашей тя ублажающе: Радуйся, православия ревнителю; Радуйся, благочестия рачителю. Радуйся, напастей тьму отгоняяй; Радуйся, на путь спасения наставляяй. Радуйся, яко нас, чад твоих, духовно посещаеши; Радуйся, яко многая благодеяния всем подаваеши. Радуйся, яко молитвы о нас Богу приносиши; Радуйся, яко о всех злостраждущих Господа просиши. Радуйся, унывающих утешение; Радуйся, согрешающих исправление. Радуйся, пустынножителей российских удобрение; Радуйся, костромских пределов славо и похваление. Радуйся, Тихоне преподобне, преславный чудотворче.
Кондак 10
Спасти хотя душу твою, преподобне отче наш Тихоне, инославнаго отступнического суемудрия благоразумно отбегл еси, и областей великия России достиг, в пустыни Луховския страны православную веру невредимо соблюл еси, еюже к вечному Востоку востек, со ангелы поеши присно песнь Богови: Аллилуиа.
Икос 10
Стену тя незыблему и град убежища необоримый во всех скорбех и напастех житейских стяжавше, преподобне отче наш Тихоне, тебе, яко присному к Богу о нас молитвеннику, похвальная приносим пения сице: Радуйся, сущих в бедах и треволнениях всегда готовый посетителю; Радуйся, Божественных велений ревностный исполнителю. Радуйся, яко молитвою и постом врагов шатания низложил еси; Радуйся, яко пути Господни правыя тщаливо сохранил еси. Радуйся, страсти плотския воздержанием умертвивый; Радуйся, во плоти, яко безплотен, на земли сей поживый. Радуйся, многосуетнаго мира любве ради Христовы отрекийся; Радуйся, в пустыни, яко в тихом пристанище, в нова человека, созданнаго по Богу, в правде и святости истины облекийся. Радуйся, яко неозрелся еси вспять, возложь руку твою на рало; Радуйся, граду нашему Луху и всей стране его стена и забрало. Радуйся, веры светлый светильниче; Радуйся, ко грядущему граду верный наставниче. Радуйся, Тихоне преподобне, преславный чудотворче.
Кондак 11
Пение всех Богови непрестанное во всем житии твоем приносил еси, преподобне отче наш Тихоне. Ныне же от нас воспеваемый и по достоянию ублажаемый на земли, тамо на небеси купно со ангелы прославльшему тя дивно Богу воспеваеши вечное: Аллилуиа.
Икос 11
Светозарный светильниче благодати и великий угодниче Божий, Тихоне преблаженне, Ты многими и великими добродетельми сияющи, яко светило умнаго неба, вшел еси в небесныя обители и предстал еси Престолу Царя Славы, идеже ныне и нас поминай, вопиющих тебе сицевая: Радуйся, яко закон Христов не словом или языком, но самым делом истинно исполнил еси; Радуйся, яко всецело посвятився Богу, совершенно ему благоугодил еси. Радуйся, за сие восприятый от Него в горняя селения; Радуйся, сподобивыйся тамо с верными Его рабами вечнаго веселия. Радуйся, в истинней вере нас утверждающий; Радуйся, от напастей и бед свобождающий. Радуйся, яко безплотным подобно пожил еси; Радуйся, яко ангельских ликостояний сподобился еси. Радуйся, Божия благодати нам ходатаю; Радуйся, Божиих дарований всем подателю. Радуйся, яко врагов спасения нашего посрамляеши; Радуйся, яко вся козни и наветы их разрушаеши. Радуйся, Тихоне преподобне, преславный чудотворче.
Кондак 12
Благодать, данную тебе свыше от Отца светов, преподобне отче наш Тихоне, и вся труды твоя и подвиги кто от человек изрещи и похвалити возможет по достоянию; в пустыни бо нестяжательно и трудолюбно пожив, стяжал еси смирением твоим высокая и нищетою твоею богатая, и вселился еси со ангелы и всеми святыми в горнем Иерусалиме, поя присно Богу песнь: Аллилуиа.
Икос 12
Поем добльственныя твоя подвиги, ублажаем святое житие твое, почитаем честную и достохвальную кончину твою и прославляем священную память твою, преподобне отче наш Тихоне! И от избытка сердца похвальная вопием ти сице: Радуйся, от ангел с торжеством в радость Господа твоего введенный; Радуйся, в чертозе небеснем лику святых сопричтенный. Радуйся, православных крепкий поборниче; Радуйся, христианом скорый помощниче. Радуйся, истинныя веры, терпения и смиренномудрия добрый блюстителю; Радуйся, суеверия и всякия злобы и вражды искоренителю. Радуйся, пустынное стадо твое духовно посещаяй; Радуйся, нам, духовным чадом твоим, мир и благословение свыше невидимо подаваяй. Радуйся, делателю добрый; Радуйся, пастырю бодрый. Радуйся, избранный сосуд благостыни; Радуйся, прославленный от Господа благоуханием святыни. Радуйся, Тихоне преподобне, преславный чудотворче.
Кондак 13
О всехвальный угодниче Христов и чудотворче предивный, преподобне и блаженне отче Тихоне! Молим тя верою и любовию, и вопием тебе всеусердно: приими ныне малое моление сие наше и умоли милостиваго Бога, да избавит нас от всяких бед и напастей молитвами твоими, и будущия свободит муки вопиющих Ему: Аллилуиа.
(Этот кондак читается трижды, затем икос 1 и кондак 1)
Молитва преподобному Тихону, Луховскому чудотворцу
О священная главо, преподобне и достоблаженне отче наш Тихоне! Ты воистинну муж желаний духовных и вторый Даниил показался еси. Якоже бо оный древний высокою добродетелию и святостию жития своего небесных видений и дивных откровений сподобился; сице и ты, преподобне, восхождения в сердцы своем полагая, преспевал еси в добродетелех, восходя от силы в силу, и яко добрый и верный раб, вшел еси в радость Господа твоего. Темже и мы, яко духовная чада твоя, любовию побуждаеми, похвальная песнопения в честней памяти твоей, по мере веры нашея, тебе восписуем и молитвенно на помощь нашей немощи призываем. Смиренно молим тя, преподобне и преславне отче наш Тихоне, твоими благоприятными ко Господу молитвами заступи возлюбленную тобою пустыню сию, град же и весь, и всех верою чтущих святую память твою, от всякаго навета сопротивнаго, от всяких бед и напастей и от всякаго зла. Молися, преподобне, о всей державе нашей. Умоли милостиваго Бога и о нас смиренных и недостойных, да отпустит нам вся прегрешения наша, да спасет нас благодатию Своею, и сподобит радости вечныя наслаждатися в горнем онем Иерусалиме, иже есть мати всем нам, купно с тобою и со всеми святыми, от века Ему благоугодившими, в нихже в Троице славимый Бог благословен есть всегда, ныне и присно, и во веки веков. Аминь.
Текст утвержден Священным Синодом
Русской Православной Церкви
14 мая 2018 года (журнал № 38)
Кондак 1
Избра́нный чудотво́рче и уго́дниче Христо́в, пути́ небла́зненнаго ко спасе́нию о́браз подава́яй и ду́ха теплото́ю ми́ра хлад согрева́яй, благода́рно воспева́ем ти, о́тче Па́вле; ты же, име́яй ве́лие дерзнове́ние ко Го́споду, от вся́кия ско́рби свободи́ ве́рою зову́щих ти:
Ра́дуйся, святы́й пра́ведный Па́вле, преди́вный чудотво́рче!
Икос 1
А́нгелом уподо́битися возжеле́вый, на земли́ живы́й, богому́дре Па́вле, от ю́ности твоея́ кра́сная ми́ра сего́ отве́ргл еси́; Христа́ ра́ди земна́я расточи́вый, небе́сная преумно́жил еси́. Те́мже ны́не слы́шиши от всех похвалу́ сицеву́ю:
Ра́дуйся, ве́тве благопло́днаго дре́ва земна́го; ра́дуйся, сонасле́дниче Ца́рствия Небе́снаго.
Ра́дуйся, пути́ те́снаго ко спасе́нию избра́ние; ра́дуйся, неусы́пное благода́ти стяжа́ние.
Ра́дуйся, ева́нгельскаго жития́ о́браз яви́вый; ра́дуйся, пре́лесть ми́ра тем обличи́вый.
Ра́дуйся, фимиа́ме чистоты́ благоуха́нный; ра́дуйся, све́том Бо́жия любве́ осия́нный.
Ра́дуйся, утеше́ние люде́й благочести́вых; ра́дуйся, похвало́ иере́ев боголюби́вых.
Ра́дуйся, моли́твы непреста́нное де́лание; ра́дуйся, моле́ний ско́рое услы́шание.
Ра́дуйся, святы́й пра́ведный Па́вле, преди́вный чудотво́рче!
Кондак 2
Ви́девый ре́вность твою́ о спасе́нии души́, боголюбе́зне Па́вле, роди́тель твой, про́мыслу Бо́жию внем, отпусти́ тя на стези́ стра́нничества, благослове́ние ти препода́в; ты же, о го́рнем помышля́я, вы́ну ко Го́споду взыва́л еси́: Аллилу́иа!
Икос 2
Разуме́ние богоразу́мное достоя́ние твое́ бысть, блаже́нне Па́вле, я́ко дом о́тчий оста́вил еси́, Ца́рствия Небе́снаго взыску́я, и поко́й теле́сный презре́в, в простоту́ и нестяжа́ние обле́клся еси́; лю́дие же ве́рнии, тща́ние твое́ зря́ще, во умиле́нии пою́т ти:
Ра́дуйся, по́чести ми́ра ни во что́же вмени́вый; ра́дуйся, стра́нническое житие́ возлюби́вый.
Ра́дуйся, о смиренному́дрии раде́ние; ра́дуйся, в моли́твенном по́двизе поспеше́ние.
Ра́дуйся, рабо́м свои́м свобо́ду дарова́вый; ра́дуйся, себе́ раба́ ве́рна Бо́гу сотвори́вый.
Ра́дуйся, поста́ ра́достное несе́ние; ра́дуйся, поко́я тле́ннаго отверже́ние.
Ра́дуйся, су́етнаго бога́тства отврати́выйся; ра́дуйся, да́ры духо́вными обогати́выйся.
Ра́дуйся, и́стиннаго богопозна́ния обре́тение; ра́дуйся, Про́мысла Госпо́дня явле́ние.
Ра́дуйся, святы́й пра́ведный Па́вле, преди́вный чудотво́рче!
Кондак 3
Си́лою благода́ти свы́ше укрепля́емь, по́двиг пра́веднаго жития́ всему́ ми́ру явил еси́, тру́дниче Бо́жий, в трезве́нии же и моли́тве дни и но́щи пребыва́я, стро́гостию воздержа́ния плоть умертви́л еси́, я́коже и А́нгелом диви́тися кре́пости твое́й, воспева́ющим Творцу́: Аллилу́иа!
Икос 3
Име́я ве́ру непосты́дную и любо́вь нелицеме́рную ко Го́споду, смиренному́дре Па́вле, ве́лиих дарова́ний от Него́ удосто́ился еси́, во е́же наставля́ти заблу́ждшия на стези́ спасе́ния, глаго́лющим ти:
Ра́дуйся, избра́нниче Небе́с преудо́бренный; ра́дуйся, сосу́де, Свята́го Ду́ха испо́лненный.
Ра́дуйся, та́йны душ челове́ческих прозрева́яй; ра́дуйся, судьбы́ Бо́жии лю́дем открыва́яй.
Ра́дуйся, опло́те благоче́стия, Про́мыслом Бо́жиим ми́ру явле́нный; ра́дуйся, свети́льниче, Го́споду возжже́нный.
Ра́дуйся, ве́ру в немощны́х укрепля́яй; ра́дуйся, вра́жия наве́ты разруша́яй.
Ра́дуйся, неради́вых покая́нное пробужде́ние; ра́дуйся, нечу́вствием окамене́нных умиле́ние.
Ра́дуйся, вино́ цельбоно́сное, ра́ны омыва́ющее; ра́дуйся, ми́ро чудотво́рное, сердца́ исцеля́ющее.
Ра́дуйся, святы́й пра́ведный Па́вле, преди́вный чудотво́рче!
Кондак 4
Бу́рею скорбе́й потопля́еми и в грехо́вную печа́ль погружа́еми, с наде́ждею взира́ем на тя, святы́й ко́рмчий, я́ко моли́твою не́когда мо́ря волне́ние укроти́вшаго; те́мже и ны́не ко бре́гу спасе́ния тобо́ю направля́еми, с благода́рностию вопие́м Бо́гови: Аллилу́иа!
Икос 4
Слы́шаще о благомо́щии твое́м, вси тружда́ющиися и обремене́ннии притека́ют к тебе́, уго́дниче Христо́в, зане́ вои́стину подае́т Госпо́дь моли́твами твои́ми поко́й и ра́дование всем, та́ко велича́ющим тя:
Ра́дуйся, в ско́рби ра́дости подая́ние; ра́дуйся, во отча́янии луче́ спасе́ния.
Ра́дуйся, благопристу́пный уте́шителю; ра́дуйся, неистощи́мый ми́лости пода́телю.
Ра́дуйся, чад наде́жное сохране́ние; ра́дуйся, неду́гов их во здра́вие преложе́ние.
Ра́дуйся, роди́тельския сле́зы осуша́яй; ра́дуйся, упова́нию на Го́спода науча́яй.
Ра́дуйся, укроще́ние стихи́и страсте́й; ра́дуйся, разсе́яние мглы́ напа́стей.
Ра́дуйся, лампа́до неугаси́мая доброде́лания; ра́дуйся, свеще́ присногоря́щая милосе́рдия.
Ра́дуйся, святы́й пра́ведный Па́вле, преди́вный чудотво́рче!
Кондак 5
Богопросвеще́нный ра́зум стяжа́в, любому́дре Па́вле, о спасе́нии бли́жних раде́л еси́ и, труды́ человеколю́бия неосла́бне творя́, тех науча́л еси́ возноси́ти хвалу́ Бо́гу: Аллилу́иа!
Икос 5
Ви́дяще по́двиги твоя́, душеве́дче Па́вле, не́кий тщесла́вный челове́к с надме́нием дерза́ше подража́ти тебе́; оба́че ты, вну́тренняя прозрева́я, ве́тхому ме́ху того́ уподо́бил еси́. Помози́ и нам, свя́те, тщесла́вие побежда́ти и се́тей вра́жиих избега́ти, вопию́щим такова́я:
Ра́дуйся, ве́ры богоизбра́нный учи́телю; ра́дуйся, усе́рдия самочи́ннаго обличи́телю.
Ра́дуйся, прельще́нных нело́жное вразумле́ние; ра́дуйся, го́рдости умовре́дныя посрамле́ние.
Ра́дуйся, ста́рче, сокрове́нная устроя́яй;
Ра́дуйся, о́тче, в послуша́нии чад твои́х наставля́яй.
Ра́дуйся, я́ко всему́дренне ду́ши врачу́еши; ра́дуйся, я́ко смире́ния о́браз показу́еши.
Ра́дуйся, плодо́в духо́вных умноже́ние; ра́дуйся, пра́веднаго жития́ зна́мение.
Ра́дуйся, кро́тости Христо́вой уподобле́ние; ра́дуйся, земли́ блаже́нных насле́дование.
Ра́дуйся, святы́й пра́ведный Па́вле, преди́вный чудотво́рче!
Кондак 6
Пропове́дуя житие́м твои́м свет Ева́нгелия во тьме грехо́вней пребыва́ющим, ве́рный ра́бе Бо́жий, на распу́тиих призыва́л еси́ на пир бра́чный ни́щия и бе́дныя, слепы́я и хромы́я, да возвели́чат и́мя Госпо́дне, немо́лчно пою́ще: Аллилу́иа!
Икос 6
Возсия́нием риз твои́х, досточу́дне Па́вле, я́ко светови́ден столп яви́ тя Госпо́дь лю́дем Свои́м, дивя́щимся сни́тию свы́ше на тебе́ благода́ти и славя́щим тя:
Ра́дуйся, любо́вию О́тчею осия́нный; ра́дуйся, дары́ Свята́го Ду́ха сниска́вый.
Ра́дуйся, и́мя Христо́во непреста́нно помина́вый; ра́дуйся, Стра́сти Его́ благогове́йно почита́вый.
Ра́дуйся, слу́жбы Бо́жия ревни́телю; ра́дуйся, благоле́пия хра́мов попечи́телю.
Ра́дуйся, ве́рности Пресвяте́й Тро́ице горе́ние; ра́дуйся, при́сное па́мятование о спасе́нии.
Ра́дуйся, сердца́ я́ко лампа́ды возжига́вый; ра́дуйся, в ду́се любве́ насле́дие воспита́вый.
Ра́дуйся, скрижа́ле, Творце́м начерта́нная; ра́дуйся, броне́ пра́вды, во бра́ни испыта́нная.
Ра́дуйся, святы́й пра́ведный Па́вле, преди́вный чудотво́рче!
Кондак 7
Не хотя́ утаи́ти безве́стная и та́йная прему́дрости Бо́жия, ди́вный ста́рче, священнои́ноку еди́ному предре́кл еси́ служе́ние ве́лие во гра́де Иерусали́мсте; внегда́ же ви́дети тому́ сверше́ние проро́чества, хвалу́ Вы́шнему вознесе́: Аллилу́иа!
Икос 7
Новозаве́тнаго открове́ния прия́телище и за́поведей Госпо́дних усе́рдный исполни́телю, Христа́ всем се́рдцем возлюби́л еси́, подо́бне и и́скренняго своего́ до конца́; сего́ ра́ди ны́не слы́шиши благода́рное пе́ние:
Ра́дуйся, блаже́нство ева́нгельское избра́вый; ра́дуйся, наслажде́ние тле́нное попра́вый.
Ра́дуйся, одея́ние смире́ния боготка́нное; ра́дуйся, ковче́же ми́лости Боже́ственныя.
Ра́дуйся, тала́нты земны́я умно́живый; ра́дуйся, сокро́вища небе́сная собра́вый.
Ра́дуйся, озаре́ние свы́ше прие́мый; ра́дуйся, от избы́тка се́рдца бли́жнему подава́вый.
Ра́дуйся, водо́ю живо́ю ду́ши напоя́яй; ра́дуйся, ко Исто́чнику жи́зни обраща́яй.
Ра́дуйся, со́ле земли́, е́юже да осоли́мся; ра́дуйся, све́те ми́ру, и́мже да просвети́мся.
Ра́дуйся, святы́й пра́ведный Па́вле, преди́вный чудотво́рче!
Кондак 8
Стра́нничеством дух укрепля́я, богоблаже́нне, пришле́ц на земли́ яви́лся еси́, к небе́сному же оте́честву устремля́яся, о́браз ревнова́ния о го́рнем показа́л еси́ взыску́ющим Го́спода и вопию́щим: Аллилу́иа!
Икос 8
Всем вся был еси́, о́тче Па́вле, собира́я о́вцы под кров твой и путь спасе́ния сим указу́я, ста́рца тя нарица́ющим и глаго́лющим ти:
Ра́дуйся, Спа́су Христу́ послужи́вый; ра́дуйся, па́ству Его́ соблюды́й.
Ра́дуйся, ка́ющихся и заблу́ждших окормле́ние; ра́дуйся, о Бо́зе стра́нствующих попече́ние.
Ра́дуйся, све́том ду́ха омраче́нныя озаря́яй; ра́дуйся, по́мощию многочу́дною тех осеня́яй.
Ра́дуйся, изсо́хших душ любо́вию ороше́ние; ра́дуйся, в сих благода́рности Созда́телю взра́щение.
Ра́дуйся, оти́шие наде́жное стра́ждущих; ра́дуйся, насыще́ние а́лчущих и жа́ждущих.
Ра́дуйся, дво́ре, от стужа́ющих укрыва́яй; ра́дуйся, ста́рче, во оби́тели Отца́ Небе́снаго приводя́й.
Ра́дуйся, святы́й пра́ведный Па́вле, преди́вный чудотво́рче!
Кондак 9
Вся́ким глаго́лом, исходя́щим из уст Бо́жиих, пра́ведне Па́вле, живы́й, неуста́нный пропове́дник прича́стия Святы́х Та́ин яви́лся еси́, о еди́нем Хле́бе Небе́снем всех, приходя́щих к тебе́, пещи́ся наставля́я и поуча́я Бо́гу воспева́ти: Аллилу́иа!
Икос 9
Вети́йство суесло́вное презре́в, честны́й Па́вле, му́дрость ева́нгельския простоты́ избра́л еси́, науча́я чи́стым се́рдцем сла́вити Го́спода. Те́мже взыва́ем ти:
Ра́дуйся, у́мныя моли́твы де́лателю; ра́дуйся, покая́ния возвести́телю.
Ра́дуйся, нищету́ духо́вную стяжа́вый; ра́дуйся, помышле́ния твоя́ горе́ воздвиза́вый.
Ра́дуйся, в Бо́жиих свиде́ниих наставле́ние; ра́дуйся, из се́тей безве́рия избавле́ние.
Ра́дуйся, я́ко любе́зне с кро́ткими бесе́довал еси; ра́дуйся, я́ко ро́пщущих прему́дро увещава́л еси́.
Ра́дуйся, гордели́ваго разжже́ния угаше́ние; ра́дуйся, хла́дных серде́ц возгре́яние.
Ра́дуйся, мре́же, Христу́ челове́ков уловля́ющая; ра́дуйся, земле́, се́мя до́брое прозяба́ющая.
Ра́дуйся, святы́й пра́ведный Па́вле, преди́вный чудотво́рче!
Кондак 10
Спасе́ния хотя́ коему́ждо, милосе́рдне Па́вле, бли́жних к покая́нию призыва́л еси́; де́нно и но́щно о сих моли́твы со слеза́ми вознося́, непреста́нно вопия́л еси́ к Бо́гу: Аллилу́иа!
Икос 10
Сте́ны ка́менныя темни́цы не возбрани́ша любви́ твое́й к заключе́нным дости́гнути, и́бо ра́ди Христа́ ми́лость сию́ твори́л еси́, заточе́нных печа́льниче, а́лчущих пита́я, жа́ждущих напоя́я, наги́х одева́я. Те́мже приими́ от нас славосло́вие сицево́е:
Ра́дуйся, десни́це щедро́т неоскудева́ющая; ра́дуйся, руко́, из пучи́ны бед извлека́ющая.
Ра́дуйся, призре́ние ни́щих и оби́димых; ра́дуйся, приста́нище ти́хое томи́мых.
Ра́дуйся, сле́зных проше́ний благоприя́тие; ра́дуйся, сокрове́нным воздыха́нием вня́тие.
Ра́дуйся, я́ко рыда́ющих на пе́рси прие́млеши; ра́дуйся, я́ко немощны́х на рамена́ подъе́млеши.
Ра́дуйся, вся́кия тесноты́ разреши́телю; ра́дуйся, во обстоя́ниих су́щих изба́вителю.
Ра́дуйся, несокруши́мый наш засту́пниче; ра́дуйся, добропобе́дный миротво́рче.
Ра́дуйся, святы́й пра́ведный Па́вле, преди́вный чудотво́рче!
Кондак 11
Пе́ние ра́достне творя́ще, святи́и А́нгели вознесо́ша на не́бо ду́шу твою́, пра́ведниче Па́вле, да уве́дят тя избра́нника Бо́жия вси сумня́щиися, и прозре́вше возопию́т Вседержи́телю: Аллилу́иа!
Икос 11
Светозаре́нием со́лнца сликовству́ет небе́сная Це́рковь Це́ркви земно́й о пренесе́нии честны́х моще́й твои́х, святы́й Па́вле, и прославля́юще просла́вльшаго тя Бо́га, воспева́ют ти А́нгели и челове́цы:
Ра́дуйся, звездо́, на тве́рди церко́вней явле́нная; ра́дуйся, све́том Со́лнца пра́вды Христа́ озаре́нный.
Ра́дуйся, я́ко в тебе́ благода́ть Бо́жия яви́ся; ра́дуйся, я́ко лик святы́х и́менем твои́м украси́ся.
Ра́дуйся, Небе́сныя Трапе́зы прича́стниче; ра́дуйся, на земли́ оста́вльшихся печа́льниче.
Ра́дуйся, гра́да при мо́ри покрови́телю; ра́дуйся, Гра́да Небе́снаго жи́телю.
Ра́дуйся, пла́чущим обетова́нное утеше́ние; ра́дуйся, се́тования в ра́дость претворе́ние.
Ра́дуйся, наде́ждо, проше́ния предваря́ющая; ра́дуйся, упова́ние, тьму уны́ния разгоня́ющее.
Ра́дуйся, святы́й пра́ведный Па́вле, преди́вный чудотво́рче!
Кондак 12
Благода́тныя по́мощи кла́дязь неизсяка́емый ты еси́, святы́й Па́вле, животворя́щую бо твою́ к нам любо́вь и по успе́нии твое́м явля́еши, неуста́нно моля́ся о нас пред Престо́лом Госпо́дним, да попече́нием таковы́м в ве́ре укрепля́еми, Бо́гу непреста́нно сла́ву возсыла́ем: Аллилу́иа!
Икос 12
Пое́м многосла́вимыя по́двиги твоя́, земны́й а́нгеле, поели́ку чудеса́ твоя́ умно́жишася зело́, и, ублажа́юще тебе́ я́ко многомо́щнаго о нас предста́теля, восхваля́ем тя:
Ра́дуйся, умире́ния оби́льный исто́чниче; ра́дуйся, благоуве́тливый в ско́рбех помо́щниче.
Ра́дуйся, духо́вных боле́зней исцеле́ние; ра́дуйся, теле́сных неду́гов врачева́ние.
Ра́дуйся, сосу́де еле́я освяще́ннаго; ра́дуйся, пшени́це чи́стая, благослове́нная.
Ра́дуйся, цве́те целому́дрия богоро́сный; ра́дуйся, дре́во доброде́телей плодоно́сное.
Ра́дуйся, отча́янных кре́пкое наде́яние; ра́дуйся, путе́й непра́ведных исправле́ние.
Ра́дуйся, неосла́бное о ча́дех твои́х предста́ние; ра́дуйся, Го́спода ве́рное достоя́ние.
Ра́дуйся, святы́й пра́ведный Па́вле, преди́вный чудотво́рче!
Кондак 13
О, чудотво́рче преди́вный и пресла́вный, святы́й пра́ведный Па́вле! Ны́нешнее на́ше прие́м приноше́ние, не оста́ви нас, в не́мощех и нестрое́ниих су́щих, грехи́ мно́гими обремене́нных, бу́ди нам помо́щник необори́мый, моли́твенник дерзнове́нный и хода́тай усе́рдный, на Стра́шнем же суди́щи Христо́ве испроси́ нам удела избра́нных, да сподо́бимся с тобо́ю воспева́ти Бо́гу: Аллилу́иа!
(Этот кондак читается 3 раза, а затем снова икос 1 и кондак 1)
Молитва свято́му пра́ведному Па́влу Таганро́гскому
О, вели́кий уго́дниче Бо́жий и чудотво́рче, отче Па́вле! Ты́, на высоту́ доброде́телей возше́д, я́ко пресве́тлая звезда́, житие́м твои́м возсия́л еси́ и, стра́нническое жи́тельство избра́в, ми́ра сего́ кра́сная ни во что́же вмени́л еси́. Те́мже Всепра́ведный Судия́ мно́гими чудесы́ тя просла́ви, ду́шу же твою́ святу́ю в небе́сныя оби́тели всели́, иде́же, любве́ Бо́жия наслажда́яся, на́ша ну́жды зри́ши и проше́ния слы́шиши. Сего ради бу́ди на́м в неду́зех цели́тель, по мо́рю пла́вающим ко́рмчий, и утопа́ющим благонаде́жное избавле́ние. О, Па́вле блаже́нне, испроси́ все́м, во вся́цей ну́жде су́щим, и ко твоему́ засту́плению прибега́ющим, вся́кий да́р коему́ждо благопотре́бен: ве́ры и любве́ преспе́яние, благоче́стия умноже́ние, ми́ра утвержде́ние, больны́м исцеле́ние, печа́льным утеше́ние, бе́дствующим по́мощь, оби́димым заступление. И сподо́би ны, уго́дниче Бо́жий, моли́твами твои́ми благоче́стно житие́ земно́е сконча́ти, Небе́сное Ца́рствие и живо́т ве́чный унасле́дити со все́ми святы́ми во ве́ки веко́в. Ами́нь.