Акафисты - 22 июня 2025

Кондак 1

Возбранному победителю мысленных врагов, мир преслестный и плотския сласти возненавидевшему, в пустыни же псаломски Бога взыскавшему, богоносному отцу нашему составим похвалы. Ты же, яко имеяй дерзновение ко Господу, молися преподобне о нас, верою и любовию чтущих священнейшую память твою, да зовем ти:
Радуйся, Ниле чудотворче, преподобне отче наш.

Икос 1

Ангельскому поревновав житию и великим во отцех подобяся, всего себе обнажил еси мирскаго сплетения, к подвигом же постничества мужески вооружився, опасно путем Божиих заповедей шествовал еси, блаженне, темже и мы, верно чтущии твою священнейшую память, похвалами ублажаем тя сими:
Радуйся, ангельскаго жития подражателю.
Радуйся, древних отец жития последователю.
Радуйся, невидимых врагов мужественный победителю.
Радуйся, заповедей Божиих усердный исполнителю.
Радуйся, отеческих богодухновенных преданий опасный хранителю.
Радуйся, монашескаго постническаго жителства законоположителю.
Радуйся, добродетелей честнейшее зерцало.
Радуйся, образе глубокаго смирения.
Радуйся, ревностный исполнителю Божия хотения.
Радуйся, немощных исцеление.
Радуйся, яко тобою научихомся непрелестным путем спасения ходити.
Радуйся, яко твоим за ны ходатайством надеемся спасение получити.
Радуйся, Ниле чудотворче, преподобне отче наш.

Кондак 2

Видяще твое, паче злата блистающее смиренномудрие, глаголем тебе со дерзновением: яко воистинну Христов еси ученик и снаследник Того Царствия, о всеблаженне, тем и мы, твоим за ны к Нему ходатайством уповающе получити грехов оставление, вопием: Аллилуиа.

Икос 2

Разумом божественных писаний обогатитися хотя, непрестанно в поучении сих пребывал еси, мудре, тем и напоил еси душу твою благочестия водами и нас имиже насыщаеши, поющих ти любовию таковая:
Радуйся, сокровище божественных разумений.
Радуйся, научивыйся исполнению божественных хотений.
Радуйся, реко, наводненная водою Божия благодати.
Радуйся, разумение божественных писаний сподобивыйся прияти.
Радуйся, жаждущих спасения водою твоих словес напоивый.
Радуйся, тебе последующым образ спасения бывый.
Радуйся, вождю по источником спасения.
Радуйся, желающым независтно преподавый воды нетления.
Радуйся, монахов светлое украшение.
Радуйся, показавый собою тем путь спасения.
Радуйся, победе в мысленной брани научивый.
Радуйся, вся козни вражыя упразднивый.
Радуйся, Ниле чудотворче, преподобне отче наш.

Кондак 3

Силою Вышняго препоясався, дерзновенно исшел еси ко ополчению врагов и образ победы собою показал всем, хотящым последовати твоему мужественному борению, победително поя Господеви: Аллилуия.

Икос 3

Имеяй в себе возносящее тя смиренномудрие, востекл еси добродетелей на высоту, благоразумия крилома украшен: легко прелетел еси вся вражыя сети, тем и в небесный чертог со славою вшел еси, мудре. Мы же, дивящеся высоте твоего добродетелнаго жителства, умильно вопием:
Радуйся, истинный подражателю Христова смирения.
Радуйся, сим достигнувый вечнаго упокоения.
Радуйся, смиренномудрием и благоразумием воскриленный.
Радуйся, смирением и любовию в небесная вознесенный.
Радуйся, оружием смирения и щитом терпения себе вооруживый.
Радуйся, Возносящему смиренныя во смирении духа послуживый.
Радуйся, смирившемуся нас ради Христу усердно подражавый.
Радуйся, кротостию и смирением сокрушивый вражыя вся сети.
Радуйся, научивыйся внутрь сердца таинственно Бога непрестанно пети.
Радуйся, сердце твое Божие жилище сотворивый.
Радуйся, непрестанныя молитвы, яко благовонное кадило, Тому приносивый.
Радуйся, Ниле чудотворче, преподобне отче наш.

Кондак 4

Бурю внутрь имеяй суетных помышлений, не могу вознести ума моего к высоте исправлений твоих, отче, и воспети достойно хвалы твоя, но приими мя, сердечною любовию тя поющаго, и ходатайствуй спасение вопиющему: Аллилуия.

Икос 4

Слышавше твои ученицы твоя спасителная предания и мудрая наставления, радующеся, во след тебе притекоша и, тобою руководими, непостижимая постигоша и неведомая уведеша, благодарно тебе поюще:
Радуйся, спасителная предания твоим учеником предавый.
Радуйся, ко спасению удобный и непрелестный путь сим ясно показавый.
Радуйся, Божия заповеди опасно сохранивый.
Радуйся, и последующих тебе хранению оных научивый.
Радуйся, отеческая спасителная предания совершивый.
Радуйся, научивый нас сим последовати верно.
Радуйся, истинно монашествовати желающым мудрый учителю.
Радуйся, древних знаменосных отец усердный ревнителю.
Радуйся, в небесных селениих ликом оных сопричтенный.
Радуйся, по преставлении твоем дарованием чудес одаренный.
Радуйся, яко тобою приемлем телесных болезней исцеление.
Радуйся, яко твоим за ны ходатайством уповаем прияти грехов прощение.
Радуйся, Ниле чудотворче, преподобне отче наш.

Кондак 5

Светосиянную тя звезду, в пустыни просиявшую, видяще радуемся, и тоя зарею привлекаеми, стекшеся, усердно твою память совершаем, преподобне, светло торжествующе и Богу благодарственно воспевающе: Аллилуия.

Икос 5

Видяще тя яко светлаго светильника, в пустыни непроходней светлосияюща, аще и яко под спудом смиренномудрием крыема, но на верх добродетелей возвысившася, укрытися не могущаго, тем твоими чудесы озаряеми, вопием ти:
Радуйся, от Источника Премудрости мудрости наученный.
Радуйся, талант многоусугубивый, от Бога тебе данный.
Радуйся, делатель Христова винограда явивыйся избранный.
Радуйся, умиления слезами ниву души твоея многобогатно напоивый.
Радуйся, многия плоды добродетелей произрастивый.
Радуйся, райский цвете, в пустыни произрастший.
Радуйся, благовонным миром добродетелей нас облагоухавый.
Радуйся, свете разумений таинственных возсиявый.
Радуйся, тму неведения и мрачнаго забвения разгнавый.
Радуйся, разум писаний отеческих нам уяснивый.
Радуйся, сокровенное в них таинство открывый.
Радуйся, Ниле чудотворче, преподобне отче наш.

Кондак 6

Проповедник истинный воистинну был еси, отче наш Ниле приснопамятне, ясно показуя стезю, ведущую к Горнему Царствию, желающым наследники быти онаго, себе образ показуя истиннаго монашества, делы и словесы научая убегати мирских сплетений и воздвизая присно воспевати божественную песнь: Аллилуиа.

Икос 6

Возсиял еси светом чудотворений, по честнем преставлении твоем являяся в далечайших странах и избавляя от горкаго пленения, чудотворче Ниле, отче наш, тем и мы, твои раби, от бед спасаемии тобою, благодарственно вопием ти:
Радуйся, избавителю плененных.
Радуйся, скорый предстателю на помощь тебе призывающым.
Радуйся, сущым в бедах помогаяй.
Радуйся, от обуревания и насилия духов нечистых преславно свобождаяй.
Радуйся, скорби и печали в радость претворяяй.
Радуйся, демонов коварныя сети растерзаяй.
Радуйся, яко тебе призывающым быстро предваряеши.
Радуйся, яко любящих тя от различных бед и напастей изымаеши.
Радуйся, изнемогающым унынием утешение подавый.
Радуйся, мрачныя облаки скорбей разгнавый.
Радуйся, врачу болезней телесных.
Радуйся, ходатаю благ небесных.
Радуйся, Ниле чудотворче, преподобне отче наш.

Кондак 7

Хотящу тебе от нынешняго преставитися века и взыти ко Господу, ученицы твои стекшеся, токи слез проливающе, глаголаху: не остави нас сирых, о отче! С ними же и мы вопием ти: и нас не забуди, посещая, утешая и наставляя, снабдевая рабы твоя, тебе любовию почитающыя и вопиющыя Богу: Аллилуиа.

Икос 7

Новое и преславное чудо показал еси, егда в пленении сущему боголюбивому мужу явися, подобие образа твоего написати повелел еси, молниеобразно просиявая и неизреченно того облагоухая. Мы же дивящеся сим, вопием ти таковая:
Радуйся, чудодействий преславных совершителю.
Радуйся, Божия благоволения к людем исполнителю.
Радуйся, свою святыню и дерзновение к Богу сим ясно известивый.
Радуйся, явлением твоим в скорби и болезни сущаго обвеселивый.
Радуйся, скорое избавление от плена тому обещавый.
Радуйся, троекратным явлением всякое сумление отгнавый.
Радуйся, от недуга и скорби того пременивый.
Радуйся, давый твоего лица изображение.
Радуйся, подавый из пленения преславно избавление.
Радуйся, радостно во Отечество того возвративый.
Радуйся, вся того скорби на радость преложивый.
Радуйся, всех преславным чудотворением твоим удививый.
Радуйся, Ниле чудотворче, преподобне отче наш.

Кондак 8

Странное и преславное чудо видяще, тобою совершаемое, о отче наш Ниле пребогате, молим тя: моли тобою чудодействующаго Бога, да и мы устранимся мира суетнаго и прелестнаго, возможем безбедно житейскую преплыти пучину и в тихое пристанище спасения достигнути ходатайством твоим, во веки благодарственно воспевающе: Аллилуиа.

Икос 8

Весь был еси любве божественныя исполнен, о всеблаженне, никакоже отступая к люблению плоти и мира, но яко безплотен целомудренно и преподобно твою жизнь совершил еси, темже и благодать приял еси от Бога творити преславная чудеса. Приими убо от усердия нашего приносимыя тебе хвалы сия:
Радуйся, божественныя любве пространное вместилище.
Радуйся, Святыя Троицы жилище.
Радуйся, мысленных врагов крепкий и мужественный победителю.
Радуйся, тебе на помощь призывающым к побеждению сих пособителю.
Радуйся, гражданине пустынный.
Радуйся, в терпении крепкий и дивный.
Радуйся, безмолвия великий любителю.
Радуйся, уединеннаго иноческаго жителства мудрый законоположителю.
Радуйся, монашествующым ко спасению наставниче.
Радуйся, ликом преподобных сопричастниче.
Радуйся, яко со всеми святыми наслаждаешися вечнаго веселия.
Радуйся, с ними радостно наследствуеши небесных селений.
Радуйся, Ниле чудотворче, преподобне отче наш.

Кондак 9

Всякое естество ангелское и человеческое удивися дивному твоему во плоти жительству, о богоносе отче наш Ниле! Подвигом бо постническим добре подвизався, непреткновенно течение совершил еси. Тем и венцем славы венчался еси от Бога, с лики святых вселився воспевати присно: Аллилуиа.

Икос 9

Ветийства во плоти мудрых обуяша, егда действом Святаго Духа буии умудришася дерзостныя тех языки обуздати, тем и тебе, о богоносе, не мирская мудрость, но Духа Святаго действо умудри и божественная ветийствующа показа. Мы же похвальную песнь тебе радующеся поем:
Радуйся, премудростию свыше одаренный.
Радуйся, благодатию Святаго Духа озаренный.
Радуйся, таинственный закон монашествующым написавый.
Радуйся, спасителная предания тем предавый.
Радуйся, образе истиннаго монашества.
Радуйся, ходатаю вечнаго блаженства.
Радуйся, спасения наставниче неленостный.
Радуйся, руководителю к получению благ небесных.
Радуйся, гордости рог сломивый.
Радуйся, истинный образ смиренномудрия бывый.
Радуйся, яко твоими за ны молитвами от различных бед избавляемся.
Радуйся, яко твоим к Богу предстателством от вражиих искушений свобождаемся.
Радуйся, Ниле чудотворче, преподобне отче наш.

Кондак 10

Спастися желающым истинный путевождь был еси, о всеблаженный отче, руководя тех заповедьми Спаса Христа и спасительными предании отец богоносных. Темже и мы желающе сих во след ходити, направляеми молитвами твоими, благоговейно воспеваем: Аллилуиа.

Икос 10

Стена и столп утверждения был еси твоим учеником, показуя собою мужественнаго борения образ и утверждая делы и словесы крепко противостати бранем вражиим. Мы же немощнии, к помощи твоего о нас ходатайства взирающе, хвалу тебе приносим вопиюще:
Радуйся, столпе терпения.
Радуйся, образе мужественаго борения.
Радуйся, храбрый воине ополчения Христова.
Радуйся, гражданине Небеснаго Иерусалима новаго.
Радуйся, на земли сеявый умиление слезами.
Радуйся, на небесех питаяйся вечнаго утешения плоды.
Радуйся, пустынная озлобления благодушно претерпевый.
Радуйся, из пустыни в райская селения возлетевый.
Радуйся, в непрестанных молитвах бодрствовавый.
Радуйся, ум горе к Богу вознесен всегда имевый.
Радуйся, умерщвлением плоти Христу спострадавый.
Радуйся, от Него сподобленный божественыя славы.
Радуйся, Ниле чудотворче, преподобне отче наш.

Кондак 11

Пение похвальное приносящих ти, отче, приими и избави страстей мучительства и обуревания помышлений, тебе бо стяжахом, твои раби, помощника и теплаго к Богу о нас предстателя и молитвенника, надеющеся тобою избавление злых и спасение получити, вопиюще: Аллилуиа.

Икос 11

Светлаго светильника монашествующым Христос тя показа, блаженне, невещественным огнем добродетелей просвещающа и смиренномудрия лучами облистающа нас, зарею же чудес озаряюща, вопиющих ти таковая:
Радуйся, светлый монашествующих светильниче.
Радуйся, света невечерняго сопричастниче.
Радуйся, облаче дождеросный, слезныя токи изливаяй.
Радуйся, молниями благодати тя любящих озаряяй.
Радуйся, громообразно враги устрашивый.
Радуйся, тучами твоих слез сих потопивый.
Радуйся, из-под спуда пустыннаго ясно светиши зарями чудес.
Радуйся, яко глубиною смирения вознеслся еси превыше небес.
Радуйся, тихообразно во смирении и кротости твою жизнь совершивый.
Радуйся, христоподражательныя кротости образ всем бывый.
Радуйся, по преставлении твоем чудесы возсиявый.
Радуйся, сим высоту смирения жительства показавый.
Радуйся, Ниле чудотворче, преподобне отче наш.

Кондак 12

Благодать подати тебе восхотев Великий Дародатель, Владыка сый всех и Господь, и на земли прославленна показати, Егоже прослави на Небеси, дарованием чудес тя обогати, освяти и прослави, и научи воспевати о тебе благодарственую песнь: Аллилуиа.

Икос 12

Поюще твоя, о всеблаженне, исправления, подвиги и борения, глубокое смиренномудрие и честное от земных к небесным преставление, восхваляем и благодать чудотворений, юже приял еси от Бога, освятившаго и прославившаго тя и научившаго нас вопити:
Радуйся, подвигов постнических добре совершивый течение.
Радуйся, прерадованное наследивый райское селение.
Радуйся, блистанием добродетелей на земли светло сиявый.
Радуйся, многим твоим трудом на небесех возмездие приявый.
Радуйся, пустыни светлое украшение.
Радуйся, сподобивыйся зрети святых всевеселящее радование.
Радуйся, монашескаго жития светлейшее зерцало.
Радуйся, нам тебе любящым от наветов борителя стена и крепкое забрало.
Радуйся, яко тобою различных искушений избегаем.
Радуйся, яко о нас к Богу предстателством твоим в различных бедах скорейшую помощь обретаем.
Радуйся, здравия телеснаго подателю.
Радуйся, душевнаго спасения ходатаю.
Радуйся, Ниле чудотворче, преподобне отче наш.

Кондак 13

О всеблаженне и преподобне отче наш Ниле! Приими от нас любовию тебе приносимое пение, избавляя от различных бед и напастей и будущаго мучения ходатайством твоим, да сподобимся и мы с тобою вечно воспевати Триединому Богу благодарственную песнь: Аллилуиа.
Этот кондак читается трижды, затем икос 1-й и кондак 1-й

Молитва святому преподобному Нилу, Сорскому чудотворцу
Отче наш всепреподобнейший Ниле! Приими сию похвальную песнь, тебе любовию и верою приносимую, и милостивно приклонься с небесных высот, яко отец чадолюбивейший, ходатайствуй верою и любовию тя почитающым грехов прощение, жития исправление, кончину христианскую, мирну и ненаветну от духов злобы. И предстани тогда, о отче, прогоняя страх смертный от верных твоих рабов и чтителей твоея священнейшия памяти, безбедно творя разлучение души от тела и лютых мытарств прехождение сильным твоим ко Господу молением и предстателством, благодатию, щедротами и человеколюбием Господа и Бога и Спаса нашего Иисуса Христа, и Его Пресвятейшия Матере, твоим милостивым о нас ходатайством. Надеемся вся сия прошения получити и в день страшнаго суда деснаго стояния улучити со всеми угодившими Богу. Аминь.

Кондак 1

Избранный от града Трапезунта и во Афоне постнически просиявый, дивный подвижниче и чудотворче, преподобне отче Афанасие, скорый помощниче и целебниче недугов душевных и телесных, яко имеяй велие дерзновение к прославльшему тя Господу, от всяких нас бед свободи и на спасения стези руководи, да зовем ти хвалебно:
Радуйся, преподобне Афанасие, Афонский чудотворче.

Икос 1

Ангелов и всея твари Содетель, избравый Гору Афонскую земным уделом Пречистыя Своея Матере и даровавый ю в вечное достояние иночествующих, яви тя в ней светла светильника, весь собор преподобных украшающа. Темже убо, яко великому угоднику Христову, воспеваем ти сице:
Радуйся, предобрый иноков наставниче;
Радуйся, преславный ангелов собеседниче.
Радуйся, целомудрия дивное светило;
Радуйся, усерднейший исполнителю поста и воздержания.
Радуйся, духовной во Христе жизни премудрый учителю;
Радуйся, светлый образе кротости и смирения.
Радуйся, имя твое делы безсмертия оправдавый;
Радуйся, деяние и видение чудно в себе сочетавый.
Радуйся, преподобному Петру Афонскому в равноангельном житии подражавый;
Радуйся, равную с ним на Небеси славу восприявый.
Радуйся, преподобне Афанасие, Афонский чудотворче.

Кондак 2

Егда, по блаженном успении родителей твоих, еще младенцу ти сущу и не могущу о себе промышляти, Всеблагий Господь Божественным Своим Промыслом устрои едину черноризицу пещися о тебе, и та воспитоваше тя вместо сына, тогда ты, блаженне, видя сию питательницу твою пребывающу в пощении и молитвах, потщался еси, елико бе мощно отрочати, подражати святому тоя житию, поя с нею Христу Богу: Аллилуиа.

Икос 2

Разум небесный даровася тебе, угодниче Божий, егда в Константинград пришед, в любомудрии книжнем обучитися тщался еси: ибо толико в оном преуспев, яко в мале времени изряден ритор и премудр учитель показался еси. Мы же сице Богом умудренному ти приносим сицевыя немудрыя хвалы:
Радуйся, начало премудрости, страх Божий, правилом жизни себе предложивый;
Радуйся, вся заповеди Господни со тщанием хранивый.
Радуйся, любомудрием твоим суету мира сего ясно разсмотревый;
Радуйся, пещися о душе своей усердно вожделевый.
Радуйся, в юности посту и молитве обучивыйся;
Радуйся, в священных писаниих прилежно поучивыйся.
Радуйся, измлада сединою мудрости украсивыйся;
Радуйся, о лишении родителей твоих Господем утешенный.
Радуйся, воздержанием паче неже млеком воспитавыйся;
Радуйся, от сверстных тебе отроков наставником монахов презнаменовавыйся.
Радуйся, преподобне Афанасие, Афонский чудотворче.

Кондак 3

Сила благодати Божией сочетаваяся благому произволению твоему, поможе ти, блаженне, избежати многоплетенных сетей мира сего и посла тебе святаго старца Михаила, вождя и наставника житию иноческому, в немже до кончины твоея добре подвизался еси, поя Богу: Аллилуиа.

Икос 3

Имея велие желание равноангельнаго жития иноческаго, Царьград оставил еси, блаженне, и обители Малеины достиг, преподобным Михаилом в иноческую власяницу, яко воин в броня, оболчен был еси; и тако мужественно ополчился еси противу невидимых врагов рода человеческаго. Сего ради ублажаем тя сице:
Радуйся, от млада возраста вдавый себе на служение Господу;
Радуйся, Того единаго паче всего возлюбивый.
Радуйся, Царствия ради Небеснаго честь и славу мира оставивый;
Радуйся, вся временная яко уметы презревый.
Радуйся, плоть духу покоривый;
Радуйся, ум твой в богомыслие вперивый.
Радуйся, помыслы вражия бодро отразивый;
Радуйся, святынею и чистотою ангелом уподобивыйся.
Радуйся, Кименския обители велие украшение;
Радуйся, Афону слава и благолепие.
Радуйся, преподобне Афанасие, Афонский чудотворче.

Кондак 4

Славы временныя и почитания от боголюбивых воевод, яко бури и волнения морскаго избегая, Кименскую обитель оставив, во святую Гору Афонскую, яко в тихое пристанище, достигл еси, преподобне Афанасие, и тамо предался еси в послушание старцев подвижников, поя с ними Христу Богу: Аллилуиа.

Икос 4

Слышаще прот и прочии отцы Святыя Горы сладкое твое Священных Писаний добровещание, удивляхуся силе благодати из уст твоих исходящей и прославляху Бога; един же от них, преподобный Павел, пророчески о тебе рече: сей, последи нас пришедый, будет первейший добродетелию и славою в Царствии Небеснем. Сего пророчества мы ныне сбытие ведяще, радостно вопием ти:
Радуйся, дивный избранниче Божий;
Радуйся, пречестное Святаго Духа селение.
Радуйся, преподобных отцев восхваление;
Радуйся, проречений их исполнение.
Радуйся, риторе сладковещанный и богомудрый;
Радуйся, краснописче предобрый и трудолюбивый.
Радуйся, благочиния церковнаго ревнителю;
Радуйся, душевредных в храме шептаний искоренителю.
Радуйся, премудрыми твоими и благодатными глаголы благочестивыя воеводы удививый;
Радуся, на спасения стези тех руководивый.
Радуйся, преподобне Афанасие, Афонский чудотворче.

Кондак 5

Звезды светлее явися миру житие твое, преподобне отче Афанасие: ты бо сам шествуя путем тесным и скорбным, право ведущим в Царствие Небесное, и иных многих научал еси творити волю Господню и представил еси тех Христу Богу добродетельми сияющих, поя с ними: Аллилуиа.

Икос 5

Видя враг рода человеческаго созидание тобою обители ко вселению иночествующих, вельми раздражися и рече другом своим: о друзи и силы мои! Доколе терпим и не расторгнем враждебника нашего Афанасия? Ты же отче, молитвою твоею ко Господу, яко жезлом, поразил еси тех ополчения. Сего ради воспеваем ти сице:
Радуйся, добрый воине Христов;
Радуйся, славный победителю невидимых врагов.
Радуйся, клеветавшия на тя старцы радостно простивый;
Радуйся, враги твоя яко други возлюбивый.
Радуйся, Богом врученному ти стаду добрый пастырь бывый;
Радуйся, словесныя твоя овцы от волков мысленных защитивый.
Радуйся, дар умиления от Бога приявый;
Радуйся, богатство добродетелей собравый.
Радуйся, Самаго Христа Господа в видении зрети сподобивыйся;
Радуйся, яко Того ныне зриши на Престоле Славы седяща.
Радуйся, преподобне Афанасие, Афонский чудотворче.

Кондак 6

Проповедует Гора Афонская труды твоя и подвиги, имиже в удолиих и дебрех ея яко безплотен подвизался еси, преподобне; наипаче же вещает славу твою священная твоя Лавра, в нейже цельбоподательныя мощи твоя почивают, источающия токи чудес и исцелений, верою о тебе поющим Богу: Аллилуиа.

Икос 6

Возсиял еси, преподобне, в бренней плоти светом небесным, яко пламень огненный, еже ученик твой Герасим сподобився зрети, со ужасом возопи: о, отче! Темже и мы вопием ти:
Радуйся, отче, светом добродетелей твоих мир озаривый;
Радуйся, темная бесовская полчища из пустыни Афона отгнавый.
Радуйся, сиянием твоего лица ученика твоего удививый.
Радуйся, лютую того болезнь единым словом исцеливый.
Радуйся, в тленней плоти нетленною славою озарен бывый;
Радуйся, огнь любве Божественныя в себе носивый.
Радуйся, в Царствии Отца Небеснаго яко солнце сияющий;
Радуйся, молитвенниче наш ко Христу Богу теплейший.
Радуйся, в бедах скорый помощниче;
Радуйся, в печалех великий утешителю.
Радуйся, преподобне Афанасие, Афонский чудотворче.

Кондак 7

Хотя христолюбивый воевода Никифор изыти на брань противу нечестивых агарян, моляше отцев Афонских, да помолятся о нем к Богу и да послют тя к нему. Ты же, отче Афанасие, повинуяся отцем, аще и не хотя, путешествовал еси до Крита, и тамо молитвами твоими помогл еси христианом победити агаряны, неведущия пети Богу: Аллилуиа.

Икос 7

Новое умысли зло прелукавый диавол, егда подвиже на зависть единаго от ученик твоих, и научи его заклати тя, яко агнца непорочна. Ты же, отче, десницею Вышняго спасен быв, убийцу онаго отечески простил и облобызал еси. Темже вси мы, таковому твоему незлобию дивящеся, хвалебно вопием:
Радуйся, в кротости и смирении твоем Христу Богу подражавый;
Радуйся, незлобием твоим духа злобы победивый.
Радуйся, сокровищ Христовых дражайший бисере, егоже не возможе душегубец похитити;
Радуйся, егоже десница Господня храняше от всех зол.
Радуйся, от внезапнаго убийства спасенный;
Радуйся, смертоносным питием, по слову Господню, неврежденный.
Радуйся, триех мужей, от глада и мраза изнемогших, смерти избавивый;
Радуйся, многих от различных болезней исцеливый.
Радуйся, верныя в православии утвердивый;
Радуйся, лжеверныя и неверныя посрамивый.
Радуйся, преподобне Афанасие, Афонский чудотворче.

Кондак 8

Странное чудо бе видети, егда повелением твоим, отче, в знойное время почерпнутая из моря сланая вода сотворися хладна и сладка, пиющия ю прохладившая и жажду утолившая. Темже убо величаем Господа, даровавшаго тебе таковый дар чудотворения, и во умилении вопием Ему: Аллилуиа.

Икос 8

Дивно явися тебе Матерь Христа Бога нашего, и повеле ти жезлом поразити камень, из негоже абие истече источник водный, иже и до ныне источает воду живу и целебну. Таковому к тебе благоволению Владычицы чудящеся, взываем сице:
Радуйся, яко пресветлое лице Царицы Небесныя зрети сподобился еси;
Радуйся, яко повелением Ея извел еси воду из камене.
Радуйся, яко сим преславным чудом боговидцу Моисею подобен показался еси;
Радуйся, яко с сим великим пророком в райских обителех ныне обитаеши.
Радуйся, яко источник твой благодатно посещаеши;
Радуйся, яко болящим здравие подаваеши.
Радуйся, яко прокаженныя очищаеши;
Радуйся, яко нечистыя духи от человек отгоняеши.
Радуйся, яко недужным усердно послужил еси;
Радуйся, яко чревныя и неудобоцелимыя язвы уврачевал еси.
Радуйся, преподобне Афанасие, Афонский чудотворче.

Кондак 9

Всяк язык человечь недоумевает по достоянию восхвалити благоволения Царицы Небесныя к подвижником христианским: Та бо в Лавру твою, отче, с двема ангелома прииде, и учеником твоим Матфием видима бысть в храме, раздающа златницы и цаты, усердно предстоящим и поющим Богу: Аллилуиа.

Икос 9

Вси иноцы Горы Афонския блажат тя, отче Афанасие, яко наставника своего и тепла ходатая; не лишены же суть благодатныя твоея помощи и вси православнии людие, с любовию почитающии святую память твою и взывающии сице:
Радуйся, святым и чудным твоим житием святоименный Афон возвеличивый;
Радуйся, небовосходную добродетелей твоих лествицу нам в образ оставивый.
Радуйся, земнаго жребия Матери Божией честное украшение;
Радуйся, иночества православнаго похвало.
Радуйся, за многую твою к согрешающим любовь и милосердие милость Божию получивый;
Радуйся, за великое твое о странных попечение от странствовавшаго нас ради Господа в вечных скиниих славно почтенный.
Радуйся за славную твою над плотию и диаволом победу венцем славы увенчанный;
Радуйся, за девственную чистоту и сердечную простоту от Приснодевы Марии в ближайшее содружество приятый.
Радуйся, яко благоволением Царицы Небесныя, созданная тобою во имя Ея обитель в твое имя преименовася;
Радуйся, яко день преставления твоего в сей обители светло торжествуется.
Радуйся, преподобне Афанасие, Афонский чудотворче.

Кондак 10

Спасти хотя Богом врученное ти стадо от раздоров и соблазнов, и к скончанию смертному приближаяся, завет учеником твоим письмены начертал еси, отче, поучая всех взаимной братской любви и хранению отеческих преданий. Мы же, хваляще таковое твое о чадех попечение, поем Христу Спасителю нашему: Аллилуиа.

Икос 10

Стеною терпения оградився и надеждою вечных благ укрепився, земное странствие тесною стезею прошел еси, преподобне Афанасие, нося ярем поста, многонощнаго бдения и о вверенных тебе душах попечения; ныне же, в небеснем пребывая блаженстве, помяни нас, восхваляющих тя сице:
Радуйся, крепкий подвижниче, вся разжженныя стрелы лукаваго угасивый;
Радуйся, слез излияньми душу твою чисто омывый.
Радуйся, немощи немощных отечески носивый;
Радуйся, в глубину прегрешений впадшия на гору добродетелей возводивый.
Радвйся, многих великих мужей наставник бывый;
Радуйся, царя Никифора в неисполнении даннаго Богу обета кротко обличивый.
Радуйся, будущая пророчески предвидевый;
Радуйся, далече отстоящая ясно зревый.
Радуйся, Божия славы теплый рачителю;
Радуйся, велений его ревностный исполнителю.
Радуйся, преподобне Афанасие, Афонский чудотворче.

Кондак 11

Песнь благодарения принесл еси, отче, Богу, дивно спасшему тя от потопления морскаго со ученики твоими, егда, действом духа злобы, ладия, в нейже плыл еси, опровержена бысть, и вси в ней сущии, в пучину впадше, не погибоша и воспеша хвалу Господеви: Аллилуиа.

Икос 11

Светом благодати Божия озарен имея твой ум и сердце, преподобне отче Афанасие, таинственно предрекл еси твою страдальческую кончину, в нейже яко мученик под развалинами падшаго храма телом погребся, духом преселился еси в горния обители, в нихже, ходатайством твоим ко Господу помози водворитися и нам, вопиющим ти сице:
Радуйся, в животе и по преставлении твоем многая и преславная чудеса сотворивый;
Радуйся, от ноги твоея кровь яко миро благовонное чудесно источивый.
Радуйся, на честное погребение твое множество иноков собравый;
Радуйся, во гробе тело твое небесною радостию светящееся показавый.
Радуйся, помазанием крове твоея болящаго корабленника со одра смертнаго здрава возставивый;
Радуйся, сею же твоею кровию кровоточивую жену уврачевавый.
Радуйся, всех сердца любовию твоею, к себе привлекающий;
Радуйся, благоуханием Божия благодати смрад страстей от многих отгоняющий.
Радуйся, светильниче пресветлый, от горы Афона всему миру православному сияющий;
Радуйся, не точию иноком, но и миряном путь к небу озаряющий.
Радуйся, преподобне Афанасие, Афонский чудотворче.

Кондак 12

Благодать велия тебе, отче, от Бога дадеся, добродетельные человеки на вящшее преуспеяние наставляти, грешныя же к покаянию побуждати, пруги от нив отгоняти и различныя недуги и страсти врачевати. Темже убо смиренно молим тя, отче: не лиши помощи твоея и нас, поющих Богу: Аллилуиа.

Икос 12

Поюще святое, равноангельное твое житие, ублажаем тя, отче Афанасие, яко многомощна молитвенника о нас пред Господем, тепла заступника и наставника ко спасению, и с любовию возглашаем ти сице:
Радуйся, православныя Церкве похвало;
Радуйся, обители твоея и всея Горы Афонския покровителю.
Радуйся, пустыннаго безмолвия искренний любителю;
Радуйся, общежития мудрый руководителю;
Радуйся, постническаго жития истинный ревнителю;
Радуйся, всех иноческих добродетелей светлый образе и учителю.
Радуйся, яко смирения ради не восхотел еси явити миру мощей твоих;
Радуйся, яко хотящим изъяти оныя из недр земных огнем воспретил еси.
Радуйся, яко до ныне православнии людие покланяются святому твоему гробу;
Радуйся, яко и чудодейственный жезл твой тамо зрим есть.
Радуйся, преподобне Афанасие, Афонский чудотворче.

Кондак 13

О, предивный иноков наставниче и чудотворче, преподобне отче Афанасие, предстояй ныне Престолу Царя Славы Господа нашего Иисуса Христа, молися Ему даровати всем нам дух истинныя кротости, любве и целомудрия, да, скончавши живот наш в покаянии, сподобимся со всеми святыми в Небесном Царствии пети Богу: Аллилуиа.

(Сей кондак чтется трижды. И паки чтутся: Икос 1 и Кондак 1)

Молитва

Преподобне отче Афанасие, изрядный угодниче Христов, и великий Афонский чудотворче! Во дни земнаго жития твоего многия на путь правый наставивый, и в Царствие Небесное мудре руководивый, скорбныя утешивый, падающим подавый руку помощи, и всем любезен, милостив и сострадателен отец бывый; ты ныне, в небесней пребывая светлости, наипаче умножаеши любовь твою к нам немощным, в море житейстем различне бедствующим, искушаемым духом злобы и страстьми своими, воюющими на дух. Сего ради смиренно молим тя, святый отче: по данней тебе от Бога благодати помози нам творити волю Господню в простоте сердца и смирении, искушения же вражия победити и свирепое страстей море изсушити; да тако немокренно прейдем житейскую пучину, и предстательством твоим ко Господу, сподобимся достигнути обетованнаго нам Царствия Небеснаго, славяще Безначальную Троицу, Отца и Сына и Святаго Духа, ныне и присно и во веки веков. Аминь.

Кондак 1

Избраннии от Бога святии угодницы, в земли Российстей просиявшии и Церковь нашу, якоже звезды светлыя украсившии, верою сошедшеся днесь восхваляем пречестную память вашу. Вы же, яко имуще дерзновение к Спасу, от всяких бед нас свободите зовущих:

Радуйтеся, вси святии, в земли Российстей просиявшии.

Икос 1

Ангелов и человеков Творче и Царю, отверзи ныне грешная уста наша достойно воспети вся святыя Твоя, благодатию Твоею в земли Российстей просиявшии и Тебе, Бога нашего, благочестием своим прославившии, да с любовию зовем к ним таковая:

Радуйтеся, священномученицы седмочисленнии, кровьми вашими в Херсонесе Тавричестем Церковь Христову утвердившии, от неяже и мы освящение прияхом.

Радуйтеся, Феодоре с юным Иоанном, первомученицы Российстии, прежде просвещения страны нашея за Христа пострадавшии.

Радуйся, Ольго равноапостольная, тьму язычества светом Христовой веры озарившая.

Радуйся, равноапостольный Владимире, земли Российстей славный крестителю.

Радуйся, Михаиле, Церкве русские первосвятителю и православнаго благочестия и чина в земли нашей насадителю.

Радуйтеся, Антоние и Феодосие преподобнии, святыя лавры Киево-Печерския устроителие и жития иноческаго в земли нашей основателие.

Радуйтеся, вси святии, в земли Российстей просиявшии.

Кондак 2

Видев Господь скорби и утеснения малаго словеснаго стада Своего, в земли нашей древле от идольскаго злочестия озлобляема, крепкую помощь Свою дарова, да посрамивше прельщение вражие, в вере Христовой утвердится и непрестанно поет: Аллилуиа.

Икос 2

Разум разумных века сего отвергая и объюродевшую премудрость премудрых погубляя, приял еси, Господи, якоже плод красный от новаго вертограда Твоего, земли нашея, вся святыя, в ней просиявшии, ихже делание ныне восхваляюще, ублажаем их тако:

Радуйтеся, Борисе и Глебе, страстотерпцы святии, в жертву чисту Богови принесшиися.

Радуйтеся, Леонтие священномучениче, страны Ростовския просветителю, и Исаие, Игнатие, Феодоре, Иакове, града Ростова святителие.

Радуйся, Кукшо, земли вятичей благовестниче и священномучениче.

Радуйтеся, Никито и Иоанне, знамению Богоматере послужившии, к прочии святителие Новограда Великаго.

Радуйся, Кирилле, святителю Туровский, слова Божия изрядный проповедниче.

Радуйтеся, Ефреме преподобне, града Торжка просветителю, со Аркадием и Иулианиею девою.

Радуйтеся, вси святии, в земли Российстей просиявшии.

Кондак 3

Сила Божия, в немощех человеческих совершающаяся, укрепляше вас, святии угодницы Божии, в земли нашей Господу многообразне послужившии, Емуже купно с вами поем: Аллилуиа.

Икос 3

Имуще облежащ нас облак толик свидетелей, все множество святых в земли нашей просиявших, торжествуем радостно и духовно веселимся, приносяще им хвалебное пение сие:

Радуйся, Симоне, Владимирския и Суздальския земли святителю и храмов Божиих усердный создателю.

Радуйтеся, Феодоре и Иоанне, с преподобным Дионисием, Евфимием и Евфросиниею, Суздаля звезды пресветлыя.

Радуйтеся, Муромския страны просвятителю Константине со чады твоими Михаилом и Феодором.

Радуйтеся, Петре и Февроние, Муромстии чудотворцы, со Иулианиею праведною и милостивою.

Радуйся, Василие святителю, в Муроме поношение ложное приемый и в Рязань преестественно приплывый.

Радуйтеся, Никито Столпниче и Данииле, мертвых погребателю, Переяславлю Залесскому украшение.

Радуйтеся, вси святии, в земли Российстей просиявшии.

Кондак 4

Буря нечестия идолобожнаго, аще и восставаше в земли нашей на Церковь Христову православную, обаче потопити ю не возможе: доселе бо стоит в чине своем, победно поюще Богу: Аллилуиа.

Икос 4

Слышаша святии сладчайший глас Христов, ко спасению призывающий, и Того иго благое чрез все житие свое понесше, ныне покой безболезненный и вечный в райских обителех обретоша. Сего ради слышат от нас таковая:

Радуйтеся, Несторе, достопамятных деяний списателю, Иоанне многострадальный, Алипие, святых икон живописателю и весь лик прочих преподобных Печерских, от Господа прославленных.

Радуйся, Иове, лавры Почаевския украшение, со всеми угодники и чудотворцы Волынскими.

Радуйся, Евфросиние, граду Полоцку радование и девам сияние.

Радуйтеся, преподобне Авраамие и мучениче Меркурие, Смоленстии чудотворцы.

Радуйтеся, Антоние, Иоанне и Евстафие, Литовстии мученицы, огню служити отвергшиися и страданьми своими многия люди ко Христу приведшии.

Радуйся, Исидоре пресвитере, со всем собором мученик в Юрьеве граде Ливонстем, от латин за веру православную пострадавший.

Радуйтеся, вси святии, в земли Российстей просиявшии.

Кондак 5

Боготечныя звезды землю нашу благодатию озаряющия, восхваляем вас, угодницы Божии, овии во святительстве, друзии во иночестве, инии во юродстве Христа ради подвизавшиися, вси же преподобием и правдою Богу послужившии, Емуже согласно поем: Аллилуиа.

Икос 5

Видевше просиявших в земли Российстей святых Божиих неослабное терпение в сем веце и неизреченную славу на небесех, сами себе и друг друга к подражанию тем поощряти потщимся, зовуще им:

Радуйся, Сергий Радонежский чудотворче, иноков начальниче и за всю землю нашу теплый молитвенниче.

Радуйтеся, Сергие и Германе Валаамстии, Александре Свирский и Арсение Коневский, монахов наставницы и иноверных просветителие.

Радуйся, Антоние, от ветхаго Рима, отечествия Твоего, в Новоград Великий на камени приплывый и зде образ иноческаго жития явивый.

Радуйся, Варлааме, Хутынский чудотворче, Новограду похвало и всея страны нашея светильниче.

Радуйтеся, Зосимо, Савватие и Германе, звезды иночества пресветлыя, со всеми преподобными Соловецкими.

Радуйся, и вся Фиваида русская, — пустыни и дебри Олонецкия, Белоезерския и Вологодския, — святое и славное преподобных отцев множе-ство возрастившая.

Радуйтеся, вси святии, в земли Российстей просиявшии.

Кондак 6

Проповедницы веры Христовы и благочестия христианскаго бысте святии на земли, темже ныне на небесех с веселием предстояще Христу немолчно поете Ему: Аллилуиа.

Икос 6

Возсияли есте нам святии, преукрашеннии изобилием многоразлич-ных даров, имиже венча вас подвигоположник Христос. Прибегающе бо к вам не всуе труждаемся: Божию благодать и милость улучаем молитвами вашими. Сего ради вопием вам:

Радуйтеся, честнии страдальцы Черниговстии Михаиле и Феодоре, велению мучителеву не повинующиися и Единому Богу точию кланятися изволившии.

Радуйтеся, Александре Невский и Андрее Боголюбивый, Георгие и Глебе, Владимирстии чудотворцы, веры ревнителие и защитницы.

Радуйся, мучениче Авраамие Болгарский, в Казани за Христа пострадавый и град Владимир украсивый.

Радуйся, Данииле, града Москвы покровителю, родительскаго благословения наследниче.

Радуйтеся, Арсение, святителю Тверский, княже Михаиле и Анно Кашинская, молитвенницы наши.

Радуйтеся, вси святии, в земли Российстей просиявшии.

Кондак 7

Хотяще спасение вечное улучити, святии скорбным и тесным путем Христу последоваша и Ему единому угождати потщишася, и ныне, лицем к лицу Того во славе зряще, воспевают Ему: Аллилуиа.

Икос 7

Новыя светила, православную Церковь украшающии, зрим вся святыя земли нашея, прославлением бо своим утверждают веру нашу и нам у Бога спасение ходатайствут, да вопием им:

Радуйся, Петре, великий святителю, первопрестольниче Московский.

Радуйся, Алексие, врачу предивный, града Москвы и всея земли нашея похвало.

Радуйся, Ионо, паствы твоея наставниче и предстателю.

Радуйся, Филиппе, царя неистоваго обличивый и люте убиенный.

Радуйся, священномучениче Ермогене, прославлению Казанския иконы Богоматере послуживый и за веру православную душу свою положивый.

Радуйтеся, Василие, Иоанне и Максиме, Московстии чудотворцы, блаженнии юроди Христа ради, подвижницы неложнии и молитвенницы теплии.

Радуйтеся, вси святии, в земли Российстей просиявшии.

Кондак 8

Странно есть неверным видети, како сила Божия в немощи совершается, мы же, истинную Христову веру твердо содержаще, славе святых наших возрадуемся и Господу, прославляющему их, непрестанно и усердно воспоим: Аллилуиа.

Икос 8

Вся отложше попечения житейская и самех себе отвергшеся, неуклонно Христу последовасте, присноблаженнии; не может язык изобразити и воспети достойно веру вашу и любовь, труды и болезни, терпение и злострадания, имиже в радость Господа своего вошли есте. Сего ради восхваляем вас сице:

Радуйтеся, Никоне Радонежский, преподобнаго Сергия преемниче, и Михее смиренный, и Савво Звенигородский, и Стефане Махрищский, и прочии ученицы Сергиевы, мно-гих обителей иноческих устроителие.

Радуйтеся, Макарие Калязинский и Макарие Унженский, Желтоводский, Богу угодившии.

Радуйтеся, Ниле Столбенский, в молитвех и трудех неусыпно подвизавшийся, и Ниле Сорский, скудость скитскую возлюбивый.

Радуйся, Иосифе, отче Волоцкий, монастырскаго чина ревнителю.

Радуйтеся, Пафнутие Боровский, падших исправителю, с Тихоном Калужским чудотворцем внутри дуба обитавшим.

Радуйтеся, вси святии, в земли Российстей просиявшии.

Кондак 9

Всяк подвиг и всяку добродетель исправисте, святии, образ христианскаго благочестия людем в себе показавше, яко да видяще ваша добрая дела, прославят Отца нашего, иже на Небесех, поюще Ему: Аллилуиа.

Икос 9

Витий художество превзошедше, святии, благодатную силу веры Христовой житием и подвиги своими всему миру явиша, благодатию Божиею неустанно невидимаго врага попирающе. Сего ради зовем:

Радуйся, Стефане святителю, Пермския страны апостоле славный.

Радуйтеся, того преемницы: Герасиме и Питириме священномученицы и Ионо, Усть-Вымския чудотворцы.

Радуйся, Трифоне преподобне, страну Вятскую от зловерия идольскаго ко Христу приведший.

Радуйся, Трифоне, Печенгский чудотворче, обители твоея похвало, во тьму языческую стран полунощных свет веры Христовой принесший.

Радуйтеся, Гурие, Варсонофие и Германе, града Казани и всех окрестных стран светила пресветлая.

Радуйтеся, Сибири апостоле, Ин-нокентие Иркутский, первый епископе, с Софронием премудрым и Иоанном Тобольским, добротами вашими вся Сибирския страны озарившии.

Радуйтеся, вси святии, в земли Российстей просиявшии.

Кондак 10

Спасти хотя люди земли нашея, даровал еси нам, Господи, вся святыя в ней просиявшия, яко образы жития спасительнаго и яко ходатаи за нас и помощники, да благодаряще Тебе вопием: Аллилуиа.

Икос 10

Стена есть и заступление всем, с верою к вам прибегающим, святии. Вам бо дадеся благодать всем, требующим полезная даровати: недужным исцеление, скорбящим утешение, в напастех сущим избавление, да воспоим вам таковая:

Радуйтеся, Всеволоде Кроткий и Довмонте, граду Пскову стены необоримыя.

Радуйтеся, Никандре пустынножителю и Евфросине преподобне, во стране Псковстей подвизавшиися.

Радуйся, Прокопие блаженне, град твой Устюг от каменометныя тучи избавивый.

Радуйся, Симеоне праведный, Верхо-турский молитвенниче и всему Уралу утверждение.

Радуйтеся, блаженнии юроди Христа ради: Николае и Феодоре Новоградстии и Исидоре Ростовский, неправды обличителие и премудрости века сего посрамителие.

Радуйся и ты, Российский Златоусте, Ростовский святителю Димитрие, жития святых собравый и в назидание всем словом твоим написавый.

Радуйтеся, вси святии, в земли Российстей просиявшии.

Кондак 11

Пение сие хвалебное и благодарственное приимите от нас, угодницы Божии: к вам бо прибегающее упование наше на предстательство и помощь вашу возлагаем, Богу же вопием: Аллилуиа.

Икос 11

Светозарнии лучи подвиг ваших многообразных всяку душу христианскую осветиша, ко умилению и ревности о спасении побуждают, вам же пети подвизают таковая:

Радуйся, Митрофане, Воронежская похвало, святителю препростый и душ водителю ко Христу премудрый.

Радуйся, Тихоне, Задонский чудотворче, медоточивая уста, Христова Евангелия вещателю сладчайший.

Радуйся, Феодосие, святителю Черниговский, светильниче преизрядный.

Радуйся, Иоасафе, молитвенниче Белоградский и благочестия ревнителю великий.

Радуйся, Питириме, страны Тамбовския предстоятелю и ходатаю пред Богом неленостный.

Радуйся и ты, Серафиме преподобне, радосте наша, подвижниче Саровский пречудный.

Радуйтеся, вси святии, в земли Российстей просиявшии.

Кондак 12

Благодать Господа нашего Иисуса Христа, и любовь Бога и Отца, и причастие Святаго Духа испросите нам, святии угодницы наши, да силою и действием Пресвятыя Троицы ограждаеми, избегнем пагубы, ересей и раскола, православно поюще: Аллилуиа.

Икос 12

Поюще великий и пресветлый полк ваш, вси святии в земли нашей просиявшии, благодарне величаем прославльшаго вас Господа, Егоже милость и прощение нам грешным испросите, да усердно вопием вам:

Радуйтеся, святии в земли нашей потрудившиися во благовестии Христовом и Церковь православную в Сибири, Китае, Японии, Америке и Индии насадившии.

Радуйтеся, вси благовестнический подвиг своею кровию запечатлевшии и за исповедание Христа душу поло-жившии.

Радуйтеся, святии царственнии мученицы и преподобнии старцы Оп-тинстии, и вси прочии земли нашея святии, зде нами не поименованнии, Богу же знаемии, Церкви явленнии и не явленнии, но присно молящиися о нас.

Радуйтеся, Нино равноапостольная со множеством мученик и преподобных Иверских.

Радуйтеся, апостоли Христови Варфоломее и Симоне Кананите, до предел наших дошедшии.

Радуйся, Клименте Римский, священномучениче, подвиг твой в стране нашей скончавый.

Радуйся, Афанасие Царьградский, к нам пришедый и во граде Лубнах мощи своя во благословение нам оставивый.

Радуйся и ты, Церкве Российския первоначальниче, Андрее, апостоле Первозванный, на обильный плод первосеяния твоего ныне взирающий.

Радуйтеся, вси святии, в земли Российстей просиявшии.

Кондак 13

О угодницы Божии, святии, в земли Российстей просиявшии! Всечестную память вашу ныне празднующе, к вашему молитвенному предстательству и заступлению прибегаем, да вашими мо-литвами избавимся в сем веце от падений греховных, от навета злых человек и от напрасныя смерти, и в будущем сподобимся спасение улучити и вечных благ наслаждение, купно с вами ангельски поюще Богу: Аллилуиа.

(Этот Кондак читается трижды, затем Икос 1 и Кондак 1).

Молитва Всем Святым в земле Российской просиявшим

О преславнии и всехвальнии угодницы Божии, святии вси в земли Российстей просиявшии! Многая ваша имена и дарования! Священную и всепраздственную память вашу ныне совершающе, величаем возвеличившаго вас Христа Бога нашего: Ему же верою и любовию чрез все житие добре послужисте и многообразными труды и подвиги своими угодисте и славне Его прослависте; святостию жития вашего Церковь Христова укрепляется и украшается, вера православная утверждается, вся земля наша Российская освящается, и мы, яко духовная чада ваша, светло торжествуем: яко воистинну от Восток солнца до Запад, по всей земли нашей хвально имя Господа. Обаче ведуще безмерная беззакония наша, сами себе осуждаем и к вам, яко теплым ходатаем нашым, с любовию прибегаем и смиренно молимся: да вашими благоприятными молитвами, обаче же Своим человеколюбием Христос Бог страждущую страну Российскую от злых безбожник и власти их свободит, и возставит престол православных царей. Верных рабов Своих, в скорби и печали день и нощь вопиющих к Нему, многоболезный вопль услышит, и изведет от погибели живот наш; да дарует всем нам тихое и безмолвное житие в веце сем пожити во всяком благочестии и чистоте, избавляя нас от искушений и соблазнов лукаваго врага, от бед и напастей, и от всякаго зла; на страшнем же суде Своем да сподобит нас деснаго стояния, и наследники Царства Небеснаго да сотворит, яко благословися и прославися пречестное и великолепое имя Отца и Сына и Святаго Духа, ныне и присно, и во веки веков. Аминь.

Молитва иная

О, преславнии и всехвальнии угодницы Божии, вси святии ведомыя и неведомыя в земле Российстей просиявшии! К вам, яко к теплым ходатаям и предстателям нашим с любовию прибегаем и смиренно молимся: умолите Господа Бога, да вашими благоприятными молитвами, Своим же человеколюбием да дарует нам (имена) тихое и благочестное житие в веце сем пожити, да избавит нас от искушений и соблазнов лукаваго диавола и от бед и напастей, и от всякаго зла; на Страшнем же суде Своем да сподобит нас деснаго стояния и наследники Царствия Своего Небеснаго да сотворит, яко благословися пречестное и великолепое имя Отца и Сына и Святаго Духа, ныне и присно и во веки веков. Аминь.