Тропари, кондаки и величания - 22 июня 2025
Тропарь преподобного Сергия Нуромского (Вологодского)
Желанием духовным разгарашеся, пребогате,/ слез твоих течением душу свою напоил еси/ и еже из глубины воздыханьми уязвляше сердце свое,/ и бодренными молитвами, и всенощным предстоянием Владыце Христу/ многодобродетелен плод принесе сам себе./ И сего ради яко Божий угодник светло миру показася,/ сияя чудесы, Сергие отче наш,/ теплый молитвенниче к Богу, всегда о нас Того моли,/ да спасет души наша.
Кондак преподобного Сергия Нуромского (Вологодского)
Яко звезда пресветлая, от Святыя Горы провозшедши,/ доброты чудес твоих весь просветил мир,/ Христов бо крест взем, последова Ему,/ в пустынном озлоблении, в молитвах же и пощениих,/ во бдениих же и злостраданиих изнурив плоть свою,/ тем и Христос даром чудес одари тебе,/ Емуже о нас моляся, посещай чад своих, да зовем ти:/ радуйся, Сергие отче наш, пустынный жителю.
Тропарь преподобному Евфимию Новому
В тебе, отче, известно спасеся еже по образу:/ приим бо Крест, последовал еси Христу,/ и дея учил еси презирати убо плоть, преходит бо,/ прилежати же о души, вещи безсмертней,// темже и со Ангелы срадуется, преподобне Евфимие, дух твой.
Кондак преподобному Евфимию Новому
Волнений множества невлажно преходя,/ безплотныя враги струями слез твоих крепко погрузил еси,/ богомудре Евфимие преподобне,/ и, чудес дар прием,/ исцеляеши страсти всякия,// моли непрестанно о всех нас.
Величание преподобному Евфимию Новому
Ублажаем тя, преподобне отче Евфимие, и чтим святую память твою, наставниче монахов и собеседниче ангелов.
Тропарь святителя Григория
Православия светильниче,/ Церкве утверждение и учителю, монахов доброто,/ богословов поборниче непреоборимый, Григорие чудотворче,/ Фессалонитская похвало, проповедниче благодати,// молися выну спастися душам нашим.
Тропарь Григория Паламы, архиепископа Фессалонитского
Православия наставниче, святителем украшение,/ Богословцем поборниче непобедимый, Григорие чудотворче,/ Солуню великая похвало, проповедниче благодати,/ моли Христа Бога спастися душам нашим.
Кондак святителя Григория
Премудрости священный и Божественный орган,/ богословия светлую согласно трубу, воспеваем тя, Григорие богоглагольниче,/ но яко ум, Уму первому предстояй,/ к Нему ум наш, отче, настави, да зовем:// радуйся, проповедниче благодати.
Тропарь святителя Даниила, архиепископа Сербского
Чудо явися извещения,/ делами добродетелей Божиих возсиял еси,/ монашествующих лики упасл еси,/ архиерейская седалища утвердил еси,/ еретическаго нападения не усумневся,/ Церковию Христовою управляя,/ преподобне отче, Данииле премудре,/ умер, яко спя,/ тело же твое цело и нетленно соблюдено бысть,/ и подает цельбы болящим от различных недугов,/ и демоны прогоняет./ Сего ради молим тя: моли спастися душам нашим.
Кондак святителя Даниила, архиепископа Сербского
Возбранному и дивному нашел земли светильнику днесь любовию притекаем/ и песнь тебе, Богоносе, плетем,/ яко имущему дерзновение ко Господу:/ избави нас от многообразных обстояний, да зовем ти:/ радуйся, утверждение отечеству нашему и великий покровителю обители своея.
Тропарь святителю Савве, первому архиепископу Сербскому
Пути, вводящаго в жизнь,/ наставник, и первопрестольник, и учитель был еси:/ первее бо пришед, святителю Савво,/ отечество твое просветил есй/ и, породив тое Духом Святым,/ яко древа маслинная,/ в мысленнем рай насадил есй всеосвященная твоя чада./ Тем, яко апостолом и святителем сопрестольна/ чтуще тя, молим:/ моли Христа Бога/ даровати нам велию милость.
Ина служба святителя Саввы Сербскаго. Тропарь
Православия наставниче,/ благочестия учителю и чистоты,/ вселенныя светильниче,/ архиереов Богодухновенное удобрение,/ Савво премудре,/ ученьми твоими вся просветил еси,/ цевнице духовная,/ моли Христа Бога спастися душам нашим.
Тропарь общий преподобных Симеона Мироточиваго и сына его, святителя Саввы Перваго, архиепископа Сербскаго
Обители Хиландарския священных строителей / и Афона светильники, Сербии похвалу, / Симеона величайшаго, преподобных лепоту, / и род его чудный, святителя, - глаголю,- Савву,/ приидите согласно почтим, глаголя: / молите Христа Бога / о пастве вашей, блаженнии,/ и о еже Церкви свободней быти от обстояний.
Тропарь общий преподобных Симеона Мироточиваго и сына его, святителя Саввы Перваго, архиепископа Сербскаго
Иже теплыя заступники в скорбех и напастех имуще, / Симеона Богоноснаго и Савву первосвятителя,/ припадем к нима с верою,/ яко да молитвами их от напастей избавляеми,/ по долгу благоверно Спаса и Бога прославим, глаголюще: / слава Давшему вам крепость,/ слава Прославльшему вы чудесы,/ слава Избавлыпему нас от скорбей молитвами вашими.
Тропарь в честь перенесения мощей преподобного Саввы Сербского
Пути, вводящего в жизнь,/ наставник, и первопрестольник, и учитель был еси:/ первее бо пришед, святителю Савво,/ отечество твое просветил еси/ и, породив тое Духом Святым,/ яко древа маслинная,/ в мысленнем раи насадил еси всеосвященная твоя чада./ Тем, яко апостолом и святителем сопрестольна/ чтуще тя, молим:/ моли Христа Бога/ даровати нам велию милость.
Кондак святителю Савве
Яко первосвятителя великаго и апостолов сообщника,/ Церковь прославляет тя людей твоих, преподобне,/ но яко имея дерзновение ко Христу Богу,/ молитвами твоими от всяких нас бед спасай, да зовем ти:/ радуйся, отче Савво Богомудре.
Ина служба святителя Саввы Сербскаго. Кондак
Струями слез твоих, Богоносне Савво,/ церковь телесную очистив,/ слуга бысть Святыя Троицы,/ сохраняй отечество свое непобедимо,/ тому бо ты еси утверждение.
Кондак общий преподобных Симеона Мироточиваго и сына его, святителя Саввы Перваго, архиепископа Сербскаго
Горнюю жизнь возлюбивше, славнии,/ жизнь сущую на земли презресте./ Сего ради в вышних со Ангелы всегда ликующе,/ молите о всех нас.
Кондак в честь перенесения мощей преподобного Саввы Сербского
Заступниче скорбящим,/ в напастех помощниче,/ ко Владыце молебниче,/ не презри нас, смиренных, обремененных грехи,/ но предвари и исхити от мук вечных с верою молящихтися,/ ускори на заступление и потщися на помощь,/ заступи, святителю Христов Савво, поющия тя.
Ина служба святителя Саввы Сербскаго. Ин кондак
Избраннаго от пелен Христовою благодатию/ и возлюбленнаго от юности Божиим Духом,/ юностный цвет, Савву блаженнаго,/ похвальный венцы, вернии, днесь сплетше/ и Божественную главу его венчающе, воззовем:/ радуйся, отче, Божие жилище.
Ин кондак общий преподобных Симеона Мироточиваго и сына его, святителя Саввы Перваго, архиепископа Сербскаго
Днесь Симеон с Саввою, блаженнии, в дусе пришедше,/ спасают от обстояний паству их:/ сии бо Троицу проповедаша Единаго Бога,/ Церкве явишася утверждение,/ в преподобных Мироточивый и во святых чудотворец:/ сии бо и во бранех необоримии защитницы ноказашася,/ Афона похвала и народа Сербскаго крепость.
Тропарь святителя Саввы II, архиепископа Сербского
Исправление веры и образ кротости,/ и якоже сад посреде рая,/ преподобными делы твоими мир просвещаеши,/ сего ради к честней раце мощей твоих любовию прикасаемся,/ лобызаем их и верно вопием:/ предстани в помощь воспевающим память святую твою и светоносную,/ святителю отче Савво пребогате, молимся,/ Христу Богу молися/ спастися душам нашим.
Кондак святителя Саввы II, архиепископа Сербского
Яко архиереем сопрестольник/ и святителем изрядный поборник был еси, святителю Савво,/ сохраняли отечество, обитель, град же и люди, почитающия тя верою/ и честным твоим мощем покланяющияся,/ да велегласно тебе вопием:/ радуйся, Савво Богомудре.
Тропарь преподобного Стефана, в иночестве Симеона, царя Сербского, мироточивого
Божественною благодатию просветився,/ и по смерти показуеши светлость жития твоего,/ источаеши бо миро благоухания/ притекающим к раце мощей твоих,/ и люди твоя наставил еси к свету Богоразумия,/ Симеоне отче наш,/ Христа Бога моли/ даровати нам велию милость.
Тропарь общий преподобных Симеона Мироточиваго и сына его, святителя Саввы Перваго, архиепископа Сербскаго
Обители Хиландарския священных строителей / и Афона светильники, Сербии похвалу, / Симеона величайшаго, преподобных лепоту, / и род его чудный, святителя, - глаголю,- Савву,/ приидите согласно почтим, глаголя: / молите Христа Бога / о пастве вашей, блаженнии,/ и о еже Церкви свободней быти от обстояний.
Тропарь общий преподобных Симеона Мироточиваго и сына его, святителя Саввы Перваго, архиепископа Сербскаго
Иже теплыя заступники в скорбех и напастех имуще, / Симеона Богоноснаго и Савву первосвятителя,/ припадем к нима с верою,/ яко да молитвами их от напастей избавляеми,/ по долгу благоверно Спаса и Бога прославим, глаголюще: / слава Давшему вам крепость,/ слава Прославльшему вы чудесы,/ слава Избавлыпему нас от скорбей молитвами вашими.
Кондак преподобного Стефана, в иночестве Симеона, царя Сербского, мироточивого
Ангельское возлюбив на земли житие,/ миродержание и мир оставив,/ пощением Христу, Симеоне, последовал еси,/ к Немуже любящих тя апостольски наставил еси, вопия:/ возлюбите Бога, якоже Он возлюби нас.
Кондак общий преподобных Симеона Мироточиваго и сына его, святителя Саввы Перваго, архиепископа Сербскаго
Горнюю жизнь возлюбивше, славнии,/ жизнь сущую на земли презресте./ Сего ради в вышних со Ангелы всегда ликующе,/ молите о всех нас.
Ин кондак преподобного Стефана, в иночестве Симеона, царя Сербского, мироточивого
Иго Христово прием, Симеоне,/ и, Того Крест взем, последовал Ему, / насажден в дому Господнем, процвете, яко финике, / якоже кедр, иже в Ливане, умножил еси чада твоя,/ муж желаний духовных, чудотворец бо явися,/ Христа Бога моли непрестанно о всех нас.
Ин кондак общий преподобных Симеона Мироточиваго и сына его, святителя Саввы Перваго, архиепископа Сербскаго
Днесь Симеон с Саввою, блаженнии, в дусе пришедше,/ спасают от обстояний паству их:/ сии бо Троицу проповедаша Единаго Бога,/ Церкве явишася утверждение,/ в преподобных Мироточивый и во святых чудотворец:/ сии бо и во бранех необоримии защитницы ноказашася,/ Афона похвала и народа Сербскаго крепость.
Тропарь преподобного Иннокентия Комельского, Вологодского
От юности сосуд избранен был еси/ и в житии Богу послужил еси,/ иноков наставниче Иннокентие,/ потщался еси хуждшее покорити лучшему,/ темже и страсти умертвив,/ возвысился еси к зрению красоты несозданныя,/ в Бозе Емуже предстоиши,/ моли, отче, Христа Бога/ спастися душам нашим.
Ин тропарь преподобного Иннокентия Комельского, Вологодского
От юности своей весь Богу поработился еси, блаженне,/ Того ради любве отечество и род оставил еси,/ и, в пустыню вселився,/ в ней жестокое житие показал еси,/ и чудес дарования от Господа приял еси,/ преподобне Иннокентие,/ моли Христа Бога спастися душам нашим.
Кондак преподобного Иннокентия Комельского, Вологодского
Мира и сродник удалився,/ в пустыни неустанною молитвою Богу угодил еси/ и в подвизе жития, отче, просиял еси,/ поминай нас, чтущих усердно память твою, да зовем ти:/ радуйся, Иннокентие преподобне.
Ин кондак преподобного Иннокентия Комельского, Вологодского
Отечества, преподобне, удалився/ и вселився в пустыню,/ тамо жестокое житие показал еси и многих людей житием своим удивил еси./ Помилуй нас, чтущих память твою, да зовем ти:/ радуйся, преподобне Иннокентие, отче наш.
Тропарь преподобного Нила Сорского
Удалився бегая Давидски мира,/ и вся яже в нем яко уметы вменив,/ и в месте безмолвне вселився,/ духовныя радости исполнился еси, отче наш Ниле:/ и Единому Богу изволив служити,/ процвел еси яко финикс,/ и яко лоза благоплодна умножил еси чада пустыни./ Темже благодарственно вопием:/ слава Укрепившему тя в подвизе пустынножительства,/ слава Избравшему тя в России отшельником уставоположника изрядна,/ слава молитвами твоими и нас Спасающем.
Ин тропарь преподобного Нила Сорского
Мирскаго жития отвергся/ и мятежа житейскаго бегая,/ преподобне и Богоносне отче наш Ниле,/ не обленился еси собрати цветы райския от писаний отеческих/ и, в пустыню вселився,/ процвел еси, яко крин сельныи,/ отонюду же прешел еси и в Небесныя обители;/ научи и нас, честно почитающих тя,/ твоим царским путем шествовати/ и молися о душах наших.
Кондак преподобного Нила Сорского
Любве ради Христовы удалився мирских смущений,/ радостною душею вселился еси в пустыни,/ в нейже подвизався добре,/ яко Ангел на земли, отче Ниле, пожил еси:/ бдением бо и постом тело свое изнурил еси вечныя ради жизни./ Еяже ныне сподобився,/ во свете неизреченныя радости Пресвятей Троице со святыми предстоя,/ моли, молимтися, припадающе, чада твоя,/ сохранитися нам от всякаго навета и злых обстояний/ видимых и невидимых враг/ и спастися душам нашим.
Ин кондак преподобного Нила Сорского
Терпя, потерпел еси суетныя обычаи/ и мирския нравы братии твоих,/ обрел еси пустынное безмолвие, преподобне отче,/ идеже постом, бдением и непрестанною молитвою в трудех подвизався,/ ученьми твоими правыя стези указал еси нам/ шествовати ко Господу./ Темже и почитаем тя, всеблаженне Ниле.
Тропарь Евфимию новому, Иверскому
Постнически преподвизався на горе, умная врагов ополчения всеоружием креста погубил еси, всеблаженне, паки же ко страдальчеству мужески облеклся еси, убив Копронима мечем веры и обоих ради венчался еси от Бога, преподобномучениче Евфимие приснопамятне.
Тропарь Всем святым, в земли Российской просиявшим
Якоже плод красный Твоего спасительнаго сеяния, / земля Российская приносит Ти, Господи, / и вся святыя в той просиявшия. / Тех молитвами в мире глубоце / церковь и страну нашу Богородицею соблюди, Многомилостиве.
Кондак Всем святым, в земли Российской просиявшим
Днесь лик святых в земли нашей Богу угодивших предстоит в церкви и невидимо за ны молится Богу; Ангели с ним славословят и вси святии Церкве Христовы ему спразднуют: о нас бо молят вси купно Превечнаго Бога.
Величание Всем святым, в земли Российской просиявшим
Ублажаем вас, / чудотворцы наши славнии,/ землю Русскую добродетельми вашими озарившии / и образ спасения нам / светоявленно показавшии.
Тропарь преподобного Петра Афонского
Мир оставил еси, Петре, Господа ради своего/ и крест восприим на рамо свое,/ на гору достигл еси Афонскую,/ якоже древле фесвитянин Илия./ И в ней пребыв пощением, и молитвами, и бдением,/ Бога милостива творя,/ и Пречистую Богородицу Молебницу предлагая,/ сего ради вопием ти:/ моли Христа Бога, да спасет души наша.
Тропарь преподобных Онуфрия и Петра
Боже отец наших,/ творяй присно с нами по Твоей кротости,/ не отстави милость Твою от нас,/ но молитвами их// в мире управи живот наш.
Кондак преподобного Петра
Удалив себе человеческаго сожительства,/ в пещерах каменных и разселинах пожил еси,/ желанием Божественным и любовию, Петре, Господа твоего,/ от Негоже венец приял еси.// Моли непрестанно спастися нам.
Тропарь преподобному Паисию Хилендарскому
Кирилла равноапостольнаго язык,/ защитив обновил еси/ и Патриарха Евфимия благословение Тройческое, предначав,/ исполнил еси./ Твоим бо трудом болгаром/ паки внятным их языком благочестие воспроповедася,/ и тобою первее начат Промысл Тройческий -/ дело освобождения рода Болгарскаго./ Сего ради тя почитаем,/ Паисие блаженне,/ и любовию совершаем честную память твою.
Кондак преподобному Паисию Хилендарскому
Во брань вступил еси не оружием,/ но книжицею малою, блаженне,/ никакоже устрашйвся силы врагов,/ но, зажег светильник посреде смертныя тьмы,/ победил еси в конец за люди твоя./ Сего ради вопием ти:/ радуйся, Паисие отче,/ деннице светлая болгарскаго новаго дне.
Тропарь преподобного Афанасия Афонского
Еже во плоти житию твоему/ удивишася ангельстии чини:/ како с телом к невидимым сплетением изшел еси, приснославне,/ и уязвил еси демонские полки./ Отонудуже, Афанасие,/ Христос тебе воздаде богатыми дарованьми,/ сего ради, отче, моли/ спастися душам нашим.
Кондак преподобного Афанасия Афонского
Яко невещественных существ зрителя изрядна/ и деятельна сказателя всеистинна,/ взывает тя стадо твое, Богоглагольниче:/ не оскудей, моля о рабех твоих,/ избавитися напастей и обхождений, вопиющим ти:/ радуйся, отче Афанасие.
Кондак преподобному Фоме Малеину
Велию победу мужески показал еси, отонудуже божественною любовию разгоревся, царя тленнаго и вся красная преобидел еси, на горе малейстей вселение совершив: от неяже в небесная возшел еси к царю царей, Фомо, моли непрестанно о всех нас.
Ин тропарь Всем святым, в земле Русской просиявшим
Иерусали́ма Вы́шняго гра́жданы,/ от земли́ на́шея возсия́вшия/ и Бо́гу во вся́цем чину́ и вся́ким по́двигом угоди́вшия,/ прииди́те, воспои́м, ве́рнии:/ о, всеблаже́ннии земли́ Росси́йския засту́пницы,/ моли́теся ко Го́споду,/ да поми́лует сию́ от гне́ва Своего́,/ исцеля́я сокруше́ние ея́,// и ве́рныя лю́ди Своя́ уте́шит.
Перевод: Граждан Небесного Иерусалима, просиявших в земле нашей и Богу во всяком чине и всяком подвиге угодивших, придите, верующие, воспоем: о всеблаженные земли Российской заступники, молитесь ко Господу, да помилует ее от гнева Своего, исцеляя беды ее, и верующих людей Своих утешит.
Ин кондак Всем святым, в земле Русской просиявшим
Предста́телие страны́ на́шей неусы́пнии,/ хода́таи о нас ко Творцу́ непреста́ннии,/ не пре́зрите моле́ний на́ших,/ но, предваря́юще на по́мощь, я́ко сро́дницы на́ши,/ ускори́те на моли́тву/ и потщи́теся на умоле́ние,// предста́тельствующе при́сно о чту́щих вас.
Перевод: Предстатели страны нашей неутомимые, ходатаи о нас ко Творцу постоянные, не забудьте о молениях наших, но, приходя на помощь, как родственники наши, поспешите на молитву и побеспокойтесь об умилостивлении, ходатайствуя всегда о почитающих вас.
Тропарь преподобному Максиму Кавсокаливиту
Кондак преподобному Максиму Кавсокаливиту