Тропари, кондаки и величания - 23 июня 2025
Тропарь благоверных князей Бориса и Глеба
Днесь церковная разширяются недра,/ приемлющи богатство Божия благодати,/ веселятся русстии собори,/ видяще преславная чудеса,/ яже творите приходящим к вам верою,/ святии чудотворцы Борисе и Глебе,// молите Христа Бога, да спасет души наша.
Тропарь благоверных князей Бориса и Глеба
Правдивая страстотерпца/ и истинная Евангелия Христова послушателя,/ целомудренный Романе с незлобивым Давидом,/ не сопротив стаста врагу сущу брату,/ убивающему телеса ваша,/ душам же коснутися не могущу./ Да плачется убо злый властолюбец,/ вы же, радующеся с лики Ангельскими,/ предстояще Святей Троице,/ молитеся о державе сродников ваших богоугодней быти// и сыновом Российским спастися.
Тропарь благоверного князя Глеба
Мученик Твой, Господи,/ спасшеся веры ради,/ княже Глебе,/ труждающимся быстрый помощник/ и ненадежным надежа./ Ты бо болезни врачуеши притекающим к тебе с верою./ Темже и мы верою молимся/ от бед избави нас,/ чтущим любовию память твою.
Кондак благоверных князей Бориса и Глеба
Явися днесь в стране Русстей/ благодать исцеления/ всем, к вам, блаженнии,/ приходящим и вопиющим:// радуйтеся, заступницы теплии.
Ин тропарь благоверных князей страстотерпцев Бориса и Глеба
Пречестнии, и целомудреннии, и незлобивии страстотерпцы,/ Романе славный и Давиде чудный,/ иго бо Господне евангельски на рамо вземше,/ последовасте Христу/ и, крест Его, яко скипетр, в руку имуще,/ врага брата и злаго властолюбца соодолесте,/ и той ныне в геенне мучится,/ вы же радуетеся, с лики ангельскими предстояще Святей Троице,/ молитеся о державе сродник ваших, благоугодней быти,/ и сыновом русским спастися.
Ин тропарь благоверных князей страстотерпцев Бориса и Глеба
Мученицы Господни спасшиися,/ преславнии блаженнии князи Борисе и Глебе,/ труждающимся быстрии помощницы,/ недужным целители,/ вы бо болезни врачуете/ притекающих в церковь с верою./ Темже и мы молимся:/ от бед избавите нас,/ чтущих с любовию пренесение мощей ваших.
Ин тропарь благоверных князей страстотерпцев Бориса и Глеба
Днесь всякая душа верных веселится,/ в пренесение честных мощей ваших, Борисе и Глебе,/ слепыя просвещаете, немым уста отверзаете и печальных утешаете,/ прияли бо есте от Христа Бога благодать исцелений,/ молитеся о душах наших.
Ин кондак благоверных князей страстотерпцев Бориса и Глеба
Приидите, вси русстии собори,/ чудотворцев и мучеников Бориса и Глеба восхвалим,/ законно бо пострадавше,/ победисте сопротивнаго врага,/ тем святым заступлением князи русстии враги побеждают,/ тем память ею весело и любовию похвалим, вопиюще:/ за ны молите Святую Троицу,/ умирити мир и спасти души наша.
Ин кондак благоверных князей страстотерпцев Бориса и Глеба
От гроба знамения показасте во стране Русстей,/ явися днесь благодать исцеления/ всем, к вам, страстотерпцы, притекающим с верою,/ Борисе славный со Глебом чудным./ Крепцы верою, добропобеднии мученицы, за Христа подъемше различныя муки,/ и на многа лета сокровени быша ваши святии мощи,/ ныне же являетеся от земли,/ возсиявше лучами, яко богатство многоценно,/ и в церковь Божию честно носими, архиерей Божиих дланьми./ Темже вопием вам:/ радуйтеся, князи, русстии заступницы.
Кондак благоверных князей Бориса и Глеба
Возсия днесь преславная память ваша,/ благороднии страстотерпцы Христовы, Романе и Давиде,/ созывающи нас к похвалению Христа Бога нашего./ Тем, притекающе к раце мощей ваших,/ исцеления дар приемлем молитвами вашими, святии:// вы бо божественнии врачеве есте.
Ин тропарь благоверных князей страстотерпцев Бориса и Глеба
Яко плодовита винограда, отрасли добродетелей суще,/ Небесный дождь Христов прилете,/ источающе отечеству своему струю Православия,/ Борисе пречудне с доблим Глебом,/ вкупе молитеся Господеви сохранити град и люди,/ и на враги пособствовати,/ и душам нашим даровати велию милость.
Ин тропарь благоверных князей страстотерпцев Бориса и Глеба
Мученическою кровию порфиру окропивше светло,/ украшени предстоите, страдальцы славнии, Царю Безсмертному,/ и, венцы славы от Него приимше,/ молитеся стране нашей подати на враги одоление/ и душам нашим велию милость.
Ин кондак благоверных князей страстотерпцев Бориса и Глеба
Аще и убиени бысте и во гробех положени,/ но на Вышнее Царство преидосте,/ оваго бо копии насунута,/ другаго же, яко агнца незлобива, ножем зарезаша,/ тем и кровь ваша бысть исцеление миру,/ верою призывающим вас, святии, на помощь.
Кондак благоверного князя Глеба
Днесь земля ублажается, напившися крови твоея,/ и храм освящается, приимши тело твое,/ великомучениче княже Глебе./ Желанием болезни твоея за грези предлагаема/ и удесы благоухания освящающи,/ подающи всему миру велию милость.
Тропарь святителям Ростовским
Святителие премудрии,/ паствы вашея учителие богопросвещеннии,/ веру евангельскую в людех преумножившия,/ любве Небесныя на земли достоподражательнии образи,/ люди страны Ростовския и Ярославския приобщавшии спасению,/ служителие воистинну Божий/ и сопричастницы апостолов достойнии явилися есте,/ Леонтие священномучениче, Исаие, Игнатие, Иакове, Феодоре/ и златословесниче Российский Димитрие,/ Христа Бога молите/ о архиереех, на престоле вашем преемницех,/ о людех, благочестно вас почитающих,/ о стране нашей православной// и о всей Христовой Церкви.
Тропарь святителей Димитрия Ростовского, Митрофана и Тихона Воронежских
Якоже древле на Востоцех трие велицыи святителие,/ сильный словом Василий,/ глубина Богословия Григорий и Златоустый Иоанн,/ тако и днесь в стране полунощней/ три новоявленная светила веры на тверди церковней востекоша:/ столп веры Митрофан,/ слово истины в лице царю исповедавый,/ и обличитель раскола Димитрий,/ мечем обоюду острым вся козни его разсекий,/ и помазания полный сосуд Тихон,/ тихостию словес своих грешника к покаянию призвавый./ О велицыи трие святителие земли Российския,/ молите Христа Бога, Емуже угодни бысте,/ спастися душам нашим.
Тропарь свт. Димитрию Ростовскому
Православия ревнителю и раскола искоренителию, / Российский целебниче и новый к Богу молитвенниче, / списаньми твоими буих уцеломудрил еси, / цевнице духовная, Димитрие блаженне, / моли Христа Бога спастися душам нашим.
Тропарь святителя Димитрия
Православия ревнителю и раскола искоренителю,/ Российский целебниче и новый к Богу молитвенниче,/ списаньми твоими буих уцеломудрил еси,/ цевнице духовная, Димитрие блаженне,// моли Христа Бога спастися душам нашим.
Кондак святителей Димитрия Ростовского, Митрофана и Тихона Воронежских
Иже в поздния наша роды и в последняя времена/ обуреваемых треволнением житейских страстей и хладом безверия недугующих/ в скорби душевней утешивший и теплотою вашея веры согревавший,/ трие новоявленный святителие Российстии,/ Димитрие, Митрофане и Тихоне,/ на камени Православия утвердите ны/ и, яко чадолюбивии отцы,/ духовная чада ваша стезею заповедей отеческих в Царствие Христово вслед себе руководите.
Кондак святителя Димитрия
Звезду Российскую, от Киева возсиявшую,/ и чрез Новград Северский в Ростов достигшую,/ всю же страну сию ученьми и чудесы озарившую,/ ублажим златословеснаго учителя Димитрия:/ той бо всем вся написа, яже к наставлению,/ да всех приобрящет, якоже Павел, Христу// и спасет правоверием души наша.
Кондак святителя Димитрия
Звезду Российскую, от Киева возсиявшую,/ и чрез Новград Северский в Ростов достигшую,/ всю же страну сию ученьми и чудесы озарившую,/ ублажим златословеснаго учителя Димитрия:/ той бо всем вся написа, яже к наставлению,/ да всех приобрящет, якоже Павел, Христу// и спасет правоверием души наша.
Величание святителя Димитрия Ростовского
Величаем тя, / святителю отче Димитрие, / и чтим святую память твою, / ты бо молиши за нас / Христа, Бога нашего.
Тропарь священномученику Гавриилу Масленникову
Земли Михайловский украшение,/ Церкве Святыя светильниче/ за веру Христову пострадал еси,/ священную одежду омочив в крови/ священномученике Гаврииле,/ молися прилежно ко Господу/ купно с тобою пострадавшими,/ да страну нашу Российскую в мире сохранит/ и спасет души наша.
Тропарь святителю Иннокентию, епископу Иркутскому
Светильниче Церкве пресветлый,/ озаривый лучами доброт твоих страну сию,/ и исцеленьми многими притекающих к тебе с верою/ Бога прославивый,/ молим тя, святителю Иннокентие,/ ограждай молитвами твоими град сей// от всех бед и печали.
Кондак святителю Иннокентию, епископу Иркутскому
Непорочности соименнаго пастыря,/ проповедника веры в языцех Монгольских,/ славу и украшение Иркутския паствы/ любовию восхвалим, вси вернии:/ той бо есть хранитель страны Сибирския// и молитвенник о душах наших.
Тропарь священноисповеднику Сергию Касимовскому (Правдолюбову)
Пастырскаго служения правило / неустанный проповедниче слова Божия / послушания священноначалию наставниче / единства церковного ревнителю / Сергие, испо-ведниче Христов / Егоже моли // спастися душам нашим.
Кондак священноисповеднику Сергию Касимовскому (Правдолюбову)
Во священницех благочестно пожив / и многажды темничное злострадание и поношение претерпев / вышнюю радость и славу наследовал еси / сего ради почитаем тя усердно вопиюще // от бед избави нас твоими молитвами Сергие, исповедниче Христов.
Тропарь священномученику Павлу Рязанскому (Добромыслову)
Земли Рязанския украшение/ и неусыпный о ней к Богу молитвинниче/ за веру Христову душу свою положив,/ яко мученик и пастырь прославился еси,/ священномучениче Павле,/ пролей теплую молитву ко Господу о нас,/любовию чтущих тя,/ да спасет души наша.
Тропарь священномученику Василию (Зеленцову)
Святое житие твое/ украсив венцем мучения,/ возшел еси, радуяся,Ї к небесным обителем./ И ныне, предстоя Святей Троице,/ священномучениче Василие,/ моли за град Твой,/ и вся люди, совершающия память Твою.
Кондак священномученику Василию (Зеленцову)
Елеем милости Христовой всяку душу уврачевав,/ и растерзав яко паучину козни велиаровы,/ копием Слова Божия диавола умертвил еси, святе,/ и прославился еси в Царствии Небеснем,/ отче священнейший.
Тропарь мученика благоверного князя Романа, Рязанского
Мученьми странноужасными/ и доблестию терпения/ всех преудивил еси, княже Романе:/ честных бо членов твоих по составом резание/ и всего телесе твоего раздробление/ претерпел еси за веру Христову./ Темже и возшел еси к Престолу Царя Христа Бога/ и явился еси новый предстатель Церкве Рязанский./ Молися убо ко Господу,/ да мир и благоденствие дарует граду нашему,/ и испроси у Него милость и спасение/ чтущим священную память твою, многострадальна.
Кондак мученика благоверного князя Романа, Рязанского
Оклеветанный пред ханом в хулении зловерия его,/ дерзновенно предстал еси судищу нечестивому;/ убоявся же Страшнаго Суда Христова,/ ханское повеление и страх поплевал еси, святый Романе./ Телом, яко розга, режемый,/ в страданиих уподобился еси Иакову Персянину/ и явился еси великомученик изрядный,/ столп и утверждение Церкви Рязанстей,/ заступник и воевода Российский преславный.
Тропарь преподобного Германа Аляскинского
Звездо пресветлая Церкве Христовы,/ на севере просиявшая,/ вся к Царствию Небесному путеводящая,/ учителю и апостоле истинныя веры,/ предстателю и заступниче гонимых,/ украшение изящное Святыя Церкве во Америце,/ преподобне отче Германе Аляскинский,/ молися ко Господу, Спасу нашему,/ спастися душам нашим.
Тропарь преподобного Германа Аляскинского
Лозу Православия принесл еси в Америку из России благочестивый/ и, удобрив корень постническими трудами/ и напоив обильне молитвенными слезами,/ плоды принесл еси — виноград возлюбленный,/ Германе преблаженне отче наш./ Темже и Бог тя прослави, яко апостола преподобнаго,/ нетлением мощей и благодатию чудес,/ от них же почерпающе благодеяния, восхваляем тя:/ слава Давшему ти крепость,/ слава Венчавшему тя, слава Даровавшему тя Америце светило Православия.
Ин тропарь преподобного Германа Аляскинского, поемый во Америце
Преподобне отче наш Германе,/ первый светильниче, в земли нашей просиявый,/ приносим вси тебе похвалы сия,/ ты же, яко имея дерзновение ко Господу,/ буди нам заступник и утешитель/ и Церкве нашел покровитель дивный,/ да вси со умилением зовем ти:/ радуйся, отче наш Германе, Аляски и всея Америки преславный чудотворче.
Кондак преподобного Германа Аляскинского
Свет вечный Христа Спаса нашего/ тя на путь евангельский во Америку настави,/ возвестити весть о мире евангельскую./ Днесь Престолу Славы предстоя,/ молися о стране твоей и людех ея,/ о мире всего мира/ и спасении душ наших.
Ин кондак преподобного Германа Аляскинского
Валаама постриженник честный, возлюбленный Божия Матери бывый, ревнитель подвигов древних, подвижник новый, молитву, яко копие и щит, приемый, страшен демоном и тьме языческой ставый, Германе преподобне, моли Христа Бога спасти души наша.
Ин тропарь преподобного Германа Аляскинского
Преподобне отче наш Германе,/ первый светильниче, в земли нашей просиявый,/ приносим вси тебе похвалы сия,/ ты же, яко имеяй дерзновение ко Господу,/ буди заступник нам, и утешитель,/ и Церкви нашея покровитель дивный,/ да вси со умилением зовем ти:/ радуйся, отче наш Германе, Аляски и всея Америки преславный чудотворче.
Ин кондак преподобного Германа Аляскинского
Валаама пострижник,/ честный возлюбленник Божией Матери бывый,/ ревнитель подвигов древних подвижников новый,/ молитву, яко копие и щит, приемый,/ страшен демоном и тьме язычестей ставый,/ Германе преподобне, моли Христа Бога спасти души наша.
Кондак преподобного Германа Аляскинского
Взбранному Воеводе своинствовався,/ в брань вступил еси на духа злобы в поле преподобия и апостольства./ И, пожав победы обоюдныя,/ воздвизаеши нас вопити тебе:/ радуйся, святе Германе, апостоле преподобный.
Тропарь праведному Софронию Ибердскому
Кондак праведному Софронию Ибердскому
Тропарь святителю Феодориту, архиепископу Рязанскому
Кондак святителю Феодориту, архиепископу Рязанскому